ཆུ་རླངས་འབྲུག་བྱམས།
བརྙན་ཐུང་ཞིག་ནི་ངའི་དྲན་པའི་ནང་ནམ་ཡང་བརྗེད་ཐབས་མི་འདུག དེ་ནི་བོད་ཀྱི་སྐུ་ཚབ་ཚོགས་ཆུང་ཐེངས་དང་པོ་བོད་ལ་བསྐྱོད་པའི་སྐབས་ཀྱི་བརྙན་ཐུང་ཞིག་རེད། བརྙན་ཐུང་དེའི་ནང་དུ་ཨ་མ་རྒན་མོ་ཁག་ཅིག་གིས་ངུ་འབོད་དང་བཅས་སྐུ་ཚབ་རྣམ་གྱི་ལག་པར་འཇུས་ནས་ཞུ་འབོད་བྱེད་བཞིན་པ་དང་ཁག་ཅིག་ས་ལ་འགྱེལ་ཡོད་པའི་གནས་ཚུལ་དེ་དག་མཐོང་ཐུབ། བརྙན་ཐུང་དེ་ཕྲན་བོད་ནས་རྒྱ་གར་ལ་བཙན་བྱོལ་ལ་ཡོངས་སྐབས་བལ་ཡུལ་སྣེ་ལེན་ཁང་དང་རྡ་རམ་ས་ལ་བཅས་ནས་ཐེངས་མང་པོ་བལྟས་པ་ཡིན། བོད་ཀྱི་སྐུ་ཚབ་ཚོགས་ཆུང་ཐེངས་དང་པོ་རེབ་གོང་ལ་ཕེབས་པའི་སྐབས་རེད། རྒྱ་དམར་གྱིས་བོད་ལ་བཙན་འཛུལ་བྱས་ནས་ལོ་ངོ་ཉི་ཤུའི་རྗེས་རེད། སྐབས་དེར་སྐུ་ཚབ་ཚོགས་ཆུང་རེབ་གོང་ལ་མ་ཕེབས་སྔོན་ལ། ལ་ཧྲའུ་ཅི་ཟེར་བའི་རྒྱ་མི་འགོ་ཁྲིད་དེས་རེབ་གོང་མི་དམངས་ལ་གཏམ་བཤད་བྱས་ཏེ། ཁྱོད་ཚོས་ངོ་ལོག་སྐུ་ཚབ་ཚོ་ས་གནས་འདིར་སླེབས་སྐབས་རྡོ་དང་དབྱུག་པ་སོགས་ཀྱིས་གཞུ་མི་ཉན། ཁྱོད་ཚོས་སྒོང་ང་དང་ལྡུམ་སྒོང་༼ Tomatoes༽ གིས་གཞུ་དགོས་ཅེས་མི་དམངས་ལ་སྐུལ་སློང་བྱས།
ལ་ཧྲུའུ་ཅི་ཟེར་བའི་རྒྱ་མི་འགོ་ཁྲིད་དེས་རང་ཉིད་ལ་ངོས་འཛིན་ཡག་པོ་ཞིག་བྱེད་མ་ཐུབ་པར་ཉིན་མོར་རྨི་ལམ་རྨིས། ཉིན་མོའི་རྨི་ལམ་དེ་མངོན་དུ་འགྱུར་བར་རེ་སྒུག་བྱས་ནས་བསྡད། སྐུ་ཚབ་ཚོགས་ཆུང་རེབ་གོང་ལ་སླེབས། རེབ་གོང་མི་དམངས་ཀྱིས་རྡོ་དང་དབྱུག་པའི་ཚབ་ལ་ལག་ཏུ་ཁ་བཏགས་བཟུང་ཤིང་ངག་ནས་མ་ཎི་ཡིག་དྲུག་དབྱངས་སུ་གྱེར་ནས་སྐུ་ཚབ་རྣམ་གཉའ་ལ་འཁུར་ཏེ་རྒྱལ་ཐང་ནས་རོང་པོ་དགོན་ཆེན་བར་དུ་གདན་འདྲེན་བྱས། མི་དམངས་སྟོང་ཕྲག་མང་པོ་རང་འགུལ་གྱིས་གནས་གཅིག་ཏུ་འཛོམས། མི་དམངས་རྣམས་ཀྱི་ཞུམ་པ་མེད་པའི་སྙིང་སྟོབས་བསྐྱེད་ནས་༧རྒྱལ་བ་རིན་པོ་ཆེ་བོད་ལ་ཕེབས་གནང་རོགས། ང་ཚོས་༧གོང་ས་མཆོག་ལ་སྒུགས་ནས་བསྡད་ཡོད་ཟེར་བ་སོགས་སྐུ་ཚབ་རྣམས་ལན་བསྐུར། ང་ཚོས་བརྙན་ཐུང་དེའི་ནང་ནས་མཐོང་ཐུབ་པ་དང་ངུ་འབོད་བྱས་ནས་ས་ལ་འགྱེལ་བ་དེ་དག་གི་གྲས་ནས་གཅིག་ནི་ཨ་ཅེ་མཁའ་མོ་ཐར་རེད།
ལ་ཧྲུའུ་ཅི་ཟེར་བའི་འགོ་ཁྲིད་དེས་ཅོག་ཙེའི་སྟེང་དུ་ཁུ་ཚུར་གྱིས་གཞུས་ནས་རེབ་གོང་མི་དམངས་ལ་ལོ་ངོ་ཉི་ཤུ་རིང་སློབ་གསོ་སྤྲད་པ་དག་ཉི་མ་གཅིག་ལ་དགུ་ཆུའི་ནང་དུ་བསྐུར་སོང་ཅེས་མགོ་ལག་པས་སྐྱོར་ནས་ངུས། ལ་ཧྲུའུ་ཅི་མུ་མཐུད་ནས་ངུས།
ཆུང་དུས་ནས་ཨ་ཅེ་མཁའ་མོ་ཐར་གྱི་སྐོར་ཡང་ཡང་ཐོས་མྱོང་མོད། འོན་ཀྱང། མོ་ལ་དངོས་སུ་ཐུག་མྱོང་མེད། ཡིན་ནའང། ད་ལྟའི་བར་དུ་ཨ་ཅེ་མཁའ་མོ་ཐར་ནི་རང་ཉིད་གྱི་སེམས་སུ་བརྗེད་ཐབས་མེད་པའི་མཛངས་མ་ཞིག་ཡིན་པས་ནམ་ཡང་དྲན་བཞིན་ཡོད།
བོད་ཀྱི་ས་ཁུལ་མང་པོ་ཞིག་ཏུ་༡༩༥༨ ལོ་ནི་མི་ནག་གི་ལོ་ཞིག་དང་ཆེས་སྡུག་རྩུབ་ཅན་གྱི་ལོ་ཞིག་ཏུ་ངོས་འཛིན་བྱེད་ཀྱིན་ཡོད། སྐྱེས་པ་མང་པོ་ཞིག་དམར་གསོད་བཏང་བའི་ལོ། གཞན་མང་པོ་ཞིག་བཙོན་དུ་བཅུག་པའི་ལོ། ལྷག་ཡོད་པ་རྣམས་བུད་མེད་དང་བྱིས་པ་ཚོ་རེད། བུད་མེད་དང་བྱིས་པ་ཚོས་ཉིན་ལྟར་མཐོང་པ་དང་ཐོས་པ་ནི་གསོད་པ་དང་འཕྲོག་པ། རིག་གནས་གསར་བརྗེ་དང་གུང་ཁྲན་གྱི་སློབ་གསོ་དག་རེད།
རིག་གནས་གསར་བརྗེའི་སྐབས་བོད་ཀྱི་དགོན་སྡེ་སྟོང་ཕྲག་མང་པོ་གཏོར་ཤིག་བཏང། ལྷ་རྟེན་ཆོས་གསུམ་རྩ་མེད་བཟོས། རྒྱ་དམར་གཞུང་གིས་རེབ་གོང་ནས་དགོན་པ་དག་གཏོར། ལྷ་རྟེན་ཆོས་གསུམ་རྩ་མེད་བཟོ་སྐབས་ཨ་ཅེ་མཁའ་མོ་ཐར་གྱིས་ཞུམ་པ་མེད་པའི་ངང་མཐའ་གཅིག་ཏུ་ངོ་རྒོལ་བྱས། དགོན་པ་དག་གཏོར་བཅོམ་བྱས་ཚར་རྗེས་རིམ་པས་དུད་ཚང་རྣམས་གཏོར་མགོ་བརྩམས། རིམ་བཞིན་ཨ་ཅེ་མཁའ་མོ་ཐར་གྱི་རང་ཁྱིམ་དུ་སླེབས་ནས་གུ་རུའི་སྐུ་འདྲ་ཞིག་ཡོད་པ་དེ་གཏོར་རྩིས་བྱས། ཨ་ཅེ་མཁའ་མོ་ཐར་གྱིས་སེམས་ཐག་རྦད་བཅད་ཀྱིས་གུ་རུའི་སྐུ་འདྲ་གཏོར་ཏུ་འཇུག་པ་ལས་རང་ཉིད་ཤི་ན་དགའ་ཅེས་སྲོག་བསྡོས་ཀྱིས་གུ་རུའི་སྐུ་འདྲ་དེ་གཏོར་དུ་བཅུག་མེད།
མཐར་ས་གནས་སྲིད་གཞུང་གིས་ཨ་ཅེ་མཁའ་མོ་ཐར་མོའི་ཁྱིམ་དུ་བཅུག སྒོ་ལྕགས་བརྒྱབ། བཟའ་བཏུང་ཅི་ཡང་མ་སྤྲད་པར་ཟླ་ཁ་ཤས་རིང་ནང་དུ་བཅུག་པ་རེད། ཟླ་ཁ་ཤས་འགོར་རྗེས་ཨ་ཅེ་མཁའ་མོ་ཐར་ཤི་ཡོད་བསམ་ནས་ལྟ་སྐབས། མོ་སྔར་བཞིན་སྐུ་གཟུགས་བདེ་ཐང་ངང་གནས་ཡོད་པ་རེད། མི་ཚང་མ་ཨ་ཅེ་མཁའ་མོ་ཐར་ལ་དགའ་བ་དང་དུང་བ་ཟབ་དུ་སོང། རྗེས་སུ་ཨ་ཅེ་མཁའ་མོ་ཐར་གྱིས་བཤད་པ་ཡིན་ན། ང་སྒོ་ལྕགས་བརྒྱབ་ནས་ནང་དུ་བཅུག། ངའི་ཉིན་རྟག་པར་གུ་རི་རིན་པོ་ཆེ་ལ་གསོལ་བ་རྩེ་གཅིག་ཏུ་བཏབ་ནས་བསྡད་པ་ཡིན། ཉིན་ཁ་ཤས་རྗེས་སུ་ཙི་ཙི་ཞིག་གིས་གྱང་བར་ནས་སྲན་མ་ནང་དུ་འཁྱེར་ཡོང་གི་འདུག ངས་ཙི་ཙི་དེས་བསྐྱལ་ཡོང་བའི་སྲན་མ་དེ་དག་ཟོས་ནས་བསྡད་པ་ཡིན། ང་སེམས་མ་སྐྱིད་པ་དང་གྲོད་ཁོག་ལྟོགས་པ་དེ་འདྲ་གང་ཡང་བྱུང་མ་སོང་ཅེས་བཤད་ཡོད་པ་རེད།
དངོས་བྱུང་གི་གཏམ་རྒྱུད་འདི་ནི་ཅི་འདྲའི་ཡིད་དུ་འོང་ལ་བརྗོད་ལས་འདས་པ་ཞིག་རེདའང་།རིག་གནས་གསར་བརྗེའི་སྐབས་ཡོད་ཚད་ཚང་མ་དམར་པོའི་སྲིད་གཞུང་ལ་དབང། རྒྱ་གཞུང་གིས་ཧམ་བཤད་དང་འཁྱོགས་བཤད། དབང་ཤུགས་བཅས་ཀྱིས་བོད་མི་ཚོར་རང་ཁྱིམ་ནས་ཆུ་ཚ་བོ་དཀར་ཡོལ་གང་བསྐོལ་བའི་ཐོབ་ཐང་ཡང་མེད། ཉིན་རེ་བཞིན་བོད་མི་བརྒྱ་ཕྲག་མང་པོ་ལམ་ཁ་སོགས་སུ་ལྟོགས་སྐོམ་གྱིས་འཆི་བཞིན་ཡོད་པའི་སྐབས་ཞིག་རེད། རྒྱུ་ནོར་དང་ས་ཞིང་ཚང་མ་རྒྱ་དམར་སྲིད་གཞུང་ལ་དབང། ཨ་ཅེ་མཁའ་མོ་ཐར་རོང་བོ་རོ་ནས་ཡིན། ཁོ་ཚོའི་ཁྱིམ་གྱི་ས་ཞིང་ཧ་ཅང་ཡག་མོད། སྐབས་དེར་ལོ་ཏོག་འདེབས་པའི་དབང་ཆ་མེད། ས་གནས་མི་དམངས་ཀྱིས་སོ་སོའི་ཞིང་ཁ་ནས་འབྲུ་རྡོག་རྐང་གཅིག་ལེན་པའི་དབང་ཆ་ཡང་མེད།
ཞིང་ཁ་ནས་ལས་ཀ་བྱས་ཚར་རྗེས་མི་རྣམས་ཀྱིས་བཀྲེས་ལྟོགས་སེལ་ཆེད་ལམ་བར་དང་ཞིང་ཁ་སོགས་སུ་སོང་ནས་འབྲུ་རྡོག་རྐང་གཅིག་རེ་ཨེ་རག་བལྟས། ས་གནས་སྲིད་གཞུང་གི་མིས་དེ་ལྟར་བྱེད་ཀྱི་ཡོད་པ་ཤེས་ཚེ་བོད་མི་རྣམས་ལ་གཅར་རྡུང་གཏོང་བ་སོགས་ཉེས་ཆད་ལྕི་མོ་གཅོད། ཨ་ཅེ་མཁའ་མོ་ཐར་གྱིས་ཀྱང་འབྲི་རྡོག་རྐང་གཅིག་རེ་ཨེ་རག་ན་བསམ་ནས་རྒྱལ་པོ་སྒང་ཅེས་པའི་སྡེ་བའི་ཞིང་ཁ། རྒྱལ་རིའི་ལ་ཁ་ཅེས་པར་སོང་ནས་འབྲི་རྡོག་རེ་བཙལ་མོད། ས་གནས་སྲིད་གཞུང་གི་མིས་ཤེས་ནས་མོ་ལ་རྡུང་རྡེག་ཚད་མེད་བཏང། མཐར་ཨ་ཅེ་མཁའ་མོ་ཐར་གྱིས་རང་ཉིད་སྨྱོན་པ་ཡིན་མདོག་གིས་སྨྱོ་རྟགས་བསྟན་ནས་བྲོ་འཁྲབས། གླུ་བླངས། མོའི་གླུ་ཚིག་ནང་དུ།
ཆང་བ་ལིའི་ཁ་མདོག་སེར་པོ་རེད། །
གན་སོས་པ་སྐལ་ལྡན་ཕེབས་རྟགས་རེད། །
སིལ་ལི་འགྱན་ཁ་མདོག་དམར་པོ་རེད། །
གན་སོས་པ་གྲྭ་ཚོགས་རྒྱས་རྟགས་རེད་ཟེར།
ད་དུང་འདི་ལ་ཚིགས་བཅད་ཁ་ཤས་ཡོད་པ་འདྲ་མོད། དྲན་སོས་ཀྱི་མི་འདུག་པས་དགོངས་དག་ཞུ།
སྐབས་དེར་ཤར་སྐལ་ལྡན་རྒྱ་མཚོ་མཆོག་རྒྱ་ནག་གི་བཙོན་དུ་བཞུགས་ཡོད་པ་དང་དགོན་པ་རྣམས་གཏོར་བཅོམ་དང་གྲྭ་བ་གཅིག་ཀྱང་ལྷག་མེད་པའི་སྐབས་རེད། ཨ་ཅེ་མཁའ་མོ་ཐར་གྱིས་སྐབས་དེར་རང་ཉིད་སྨྱོན་པ་ཡིན་མདོག་གི་ཤིང་ཏོག་གི་མདོག་ལ་བལྟས་ནས་རང་གི་རྩ་བའི་བླ་མ་བཙོན་ནས་ཕྱིར་ཕ་ཡུལ་ལ་ཕེབས་ནས་སྔར་བཞིན་ཆོས་སྲིད་གྱི་ཐུགས་འགན་བཞེས་རྒྱུ་དང་གྲྭ་བཙུན་གྱི་སྡེ་གནམ་གྱི་སྐར་ཚོགས་བཞིན་སླར་ཡང་རྒྱས་པའི་སྨོན་ལམ་གླུ་རུ་བླངས་པ་རེད། ཨ་ཅེ་མཁའ་མོ་ཐར་གྱི་སྙིང་སྟོབས་དང་ལར་ཞེན། བོད་མི་རིགས་ལ་བཅངས་བའི་བརྩེ་བ་ནི་གསེར་གྱི་ཀ་བ་ཞིག་ནང་བཞིན་བོད་མི་རིགས་ཀྱིས་ལོ་རྒྱུས་ནང་དུ་བཞག་ཡོད། འོན་ཀྱང། ངའི་འདིར་རང་ཉིད་གྱི་དྲན་པ་ཐོར་རེ་བ་ཞིག་བཀོད་པ་ལས་ཨ་ཅེ་མཁའ་མོ་ཐར་གྱི་ལོ་རྒྱུས་རྒྱས་པ་ཞིག་བཀོད་པར་རང་ཉིད་ལ་ཤེས་ཚད་སོགས་ཕྱོགས་གང་ཅིའི་ཐད་ནས་འདང་གི་མེད་པས་བཀོད་ཐབས་བྲལ། ཡིན་ནའང། ངའི་དྲན་པ་ཐུང་ཐུང་འདིས་ཨ་ཅེ་མཁའ་མོ་ཐར་ལ་རྒྱུས་ཡོད་མཁན་དག་ལ་དྲན་སྐུལ་ཞིག་བྱེད་ཐུབ་པ་དང་མ་འོངས་བར་མོའི་སྐོར་ལ་ལོ་རྒྱུས་ཁ་གསལ་ཞིག་འབྲི་རྒྱུའི་རེ་བ་སྙིང་ནས་ཞུ།
སྐབས་དེར་ང་ཚོས་འཇོན་ཡོད་མ་རེད
གཏམ་རྒྱུད་སྙན་གི
ཆུ་རླངས་འབྲུག་བྱམས་ལེགས་ཀྱིས་རེབ་གོང་ལ། དམར་པོའི་གཞུང་གི་ལས་བྱེད་པས་ཇི་ལྟར་བྱས་པ་དེ་དག་གསལ་པོར་བྲིས་པ་ཀློག་འདོད་བྱུང་། གཤམ་གསལ་རྣམས་ལས། དང་པོ་རྣམས་དིང་སང་གི་ཁ་སྐད་དང་༏ གཉིས་པ་དག། བོད་སྤྱི་ཡི་ཡིག་སྐད་ཡིན་པར་བསམ་མོ།
འདང་། ལྡང་། ཡོངས་བར། འོངས་པར། མི་དམངས། མི་མངས། བརྙན། ཞེས་གཡར་པའི་དོན། འདིར་སྒྲུང་གི་དོན་ལ་བཀོལ། རོགས། གྲོགས། བཟུང་ཤིང་ངག་ནས་མ་ཎི་ཡིག་དྲུག་དབྱངས་སུ་གྱེར་ནས། བཟུངས་ཤིང་ངག་ནས་མ་ཎི་ཡིག་དྲུག་དབྱངས་སུ་གྱེར་ནས། གྱེར། ཞེས་དོན་དག་བོད་པ་གཞན་གྱིས་མི་གོ་བས་གཞན་གོ་བ་ཞིག་བཅུག་ན་བཟང་། གཞུ༏ མདའ་གཞུ། རྡུང་རྡེགས། ཞེས་ན་ལེགས། ཐེངས་དང་པོ། ལན་དང་པོ། ཡོངས། འོངས། རྡ་རམ་ས་ལ། དྷ་རྨ་ཤཱ་ལཱ།
ཐུགས་རྗེ་ཆེ་འབྲུག་བྱམས་ལགས། སྐབས་དེའི་གནས་ཚུལ་མཐོང་ཐོས་ཅུང་ཙམ་རེ་ཡོད།ཡིན་ཡང་དྲན་ངོགས་སུ་མང་པོ་མི་འདུག་མོད།འོན་ཀྱང་དེ་རིང་དངོས་སྒྲུང་འདི་ཀློག་དུས་ཡིད་ལ་ཅུང་ཟད་རེ་ཤར་གྱི་འདུག གལ་སྲིད་ད་རུང་ཅུང་ཟད་རེ་དྲན་ཚེ་མུ་མཐུད་འབྲི་རོགས།
ཀློག་བདེ་ལ་སྙན་པའི་སྒྲུང་ཐུང་དོན་སྙིང་ལྡན་པ་རེད་ཡ། བཟང་གི