སྐྱོ་བྲག་དགའ་དབང་།
སྤྱིར་བོད་ནི་མཐོ་སྒང་གི་ས་ཆ་ཡིན་ཕྱིར། ཤིང་མེད་པའི་རི་ལུང་མང་ནའང་། ང་ཚོའི་ས་ཆར་ཤིང་རིགས་ཆེ་ཕྲ་འགའ་ཤས་ཡོད་པ་ལས་ཁང་པ་སོགས་ལ་བེད་སྤྱོད་བྱེད་པའི་བཟང་ཤིང་ནི་ཤུག་པ་རེད། རི་ལུང་གི་ཉིན་ངོས་ཕལ་མོ་ཆེ་ཤུག་པས་བཟུང་བས་ཅི་དགོས་ཡོད་ཟེར་ནའང་ཆོག་མོད་དེ། གདོད་མའི་ཁོར་ཡུག་སྲུང་སྐྱོབ་ཀྱི་བག་ཆགས་ཀྱིས་གཅོད་བྲེག་བྱེད་པ་ཆེས་ཉུང་། གལ་ཏེ་གཅོད་དགོས་ཤར་ཚེ། རང་ལ་དགོས་པ་དེ་ཡིན་མིན་བརྟགས་པ་ཞིབ་ཚགས་བགྱིས་ཏེ་གདོད་གཅོད་པའི་ལུགས་སྲོལ་ཡོད་པས་ན། ངའི་ཨ་ཕས་ཀྱང་ལོ་ཟླའི་རིང་ཨ་ནས་ཡང་དུ་བརྟགས་ཞིབ་བགྱིས་མཐར་ཤུག་སྡོང་ཞིག་བཅད་པའི་གཞོགས་ངོས་གཅིག་ལ་རྐང་ལག་རང་གྲུབ་ཅན་གྱི་རྐུབ་བཀྱག་ཅིག་བཟོས་གདའ། ང་ཚོ་ཆེ་ཆུང་ཚང་མས་ནམ་དགོས་བེད་སྤྱོད་བྱེད་ཀྱི་ཡོད།
ཤུག་པ་ནི་སྲ་བའི་ཤིང་རིགས་ཡིན་པ་ཙམ་དུ་མ་ཟད། བཟོ་སྟངས་ཀྱང་སྲ་བོ་ཡོང་ཐབས་ལ་གཙོར་འདོན་གྱིས་མཐུག་པོ་བྱས་སྟབས། གནམ་གཡུག་ས་རྡེབ་ཇི་འདྲ་བྱས་ནའང་ཆག་གྲུམ་ཤོར་གྱི་མེད་ལ། ཚ་གྲང་ཆར་རླུང་གང་གིས་ཀྱང་གནོད་པ་ཆེར་བྱེད་མི་ཐུབ་པས་ན། བཟོས་ནས་ད་བར་རགས་རྩིས་བྱས་ན་མི་ལོ་བཞི་བཅུ་ཡས་མས་ཤིག་འགྲོ་ཟིན་ནའང་ད་དུང་བེད་སྤྱད་ནས་བསྡད་ཡོད་པའི་པར་ཞིག་ཉེ་དུས་མཁན་པོ་དཔའ་བརྟན་གྱིས་བསྐུར་གནང་བྱུང་།
ཕར་བལྟས་ཚོད་ལ་ངའི་ནང་མིའི་མཁོས་ཀ་ཆེས་ཞན་པས་ཧ་ལས་པའི་རྐུབ་བཀྱག་རྙིང་གོག་ཅིག་བེད་སྤྱོད་བྱེད་ཀྱིན་ཡོད་ནའང་། དོན་ལ་ཤིང་ནི་གཟུགས་པོའི་འཕྲོད་བསྟེན་ལ་ཆེས་མཛའ་ཞིང་། ཁོར་ཡུག་ལ་ཆེས་ཕན་པའི་གདོད་མའི་སྲོལ་བཟང་མེད་དུ་མི་རུང་བ་ཞིག་ཡིན་པ་རེད། གལ་ཏེ་འཛམ་གླིང་གི་མི་རིགས་ཡོད་དོ་ཅོག་གིས་ང་ཚོའི་ལུགས་སྲོལ་བཞིན་མཁོ་ཆས་རྣམས་ཡུན་རིང་རྒྱུན་སྤྱོད་བྱས་ཡོད་ན། གནམ་གཤིས་འགྱུར་ལྡོག་གི་གནས་ཚུལ་འཇིགས་ཤིང་སྐྱི་གཡའ་བ་རྣམས་ཡོང་དོན་མེད་པ་ཡིན།
རྐུབ་སྟེགས་ཀྱིས་རྐྱེན་བྱས་ནས་པ་ལགས་དྲན་སོང་གདའ།
སྙན་མོ་བྲིས་གདའ།