ཨ་བོད་རྒྱ་གསུམ་གྱི་ཆབ་སྲིད་དང་གནས་བབ་ལས་འཕྲོས་པའི་བསམ་ཚུལ།

རྭ་འཕྲིན ༼ ཨ་རི ༽

ཉིས་སྟོང་ཉི་ཤུ་ལོའི་རྙོག་འཛིང་ཅན་གྱི་ཨ་རིའི་སྲིད་འཛིན་འདེམས་རྩོད་བྱུང་བ་ནས་བཟུང་། ད་ལྟའི་བར་དུ་ཨ་རི་དང་རྒྱ་ནག་གི་གཙོས་འཛམ་གླིང་གི་ཆབ་སྲིད་ཀྱི་གནས་བབ་ལ་གནམ་ས་བླ་འོག་ལྟ་བུའི་འགྱུར་བ་བྱུང་དང་འབྱུང་བཞིན་པ་ཀུན་གྱིས་མཁྱེན་གསལ་རེད། དེས་ན་ཁོ་བོས་ཀྱང་རང་ཉིད་བོད་པ་ཞིག་ཡིན་པའི་ཆ་ནས་འཛམ་གླིང་གི་འགྱུར་ལྡོག་མྱུར་མོ་འདིའི་ཁྲོད་དུ་བོད་མི་རིགས་ཀྱི་ཆབ་སྲིད་གནས་སྟངས་དང་། ང་ཚོས་མ་འོངས་པར་ཁ་ཕྱོགས་ཅི་འདྲ་ཞིག་བསྙེག་ན་ད་གཟོད་ཁེ་ཕན་ཡོད་མེད་ཀྱི་ཕྱོགས་ལ་བསམ་ཚུལ་ཅུང་ཙམ་ཞིག་ཞུ་འདོད་བྱུང་། 

སྤྱིར་ང་ཚོ་བོད་ཀྱི་ཆབ་སྲིད་ཟེར་ན་འདྲ། གནས་བབ་ཟེར་ཀྱང་ཆོག ཐ་ན་འཛམ་གླིང་ཡོངས་ཀྱི་ཆབ་སྲིད་དང་བདེ་སྡུག་གང་ཡིན་རུང་། མདོར་བསྡུས་ན་སྟོབས་ཆེན་རྒྱལ་ཁབ་ཨ་རི་དང་ཁ་ཐུག་འབྲེལ་བ་ཆགས་བསྡད་ཡོད་པ་སྨོས་མ་དགོས་པ་ཞིག་རེད། དེ་ཡིན་དུས་ཁོ་བོས་ཀྱང་ཐེངས་འདིའི་བརྗོད་གཞི་མ་གླེང་གོང་ལ་ཐོག་མར་ཨ་རིའི་ཆབ་སྲིད་ཀྱི་གནས་སྟངས་དང་། ཁ་ཕྱོགས་སོགས་ཀྱི་སྐོར་ལ་རྒྱུན་ཤེས་ལྟ་བུའི་ངོ་སྤྲོད་མདོར་བསྡུས་ཤིག་བརྗོད་འདོད་པ་ནི། ཨ་རིའི་གཞུང་དེ་དབང་ཤུགས་གསུམ་ལྡན་གྱི་གཞུང་ཞིག་ཡིན་ལ། གྲོས་ཚོགས་དང་། ཆེས་མཐོ་ཁྲིམས་ཁང་།ཕོ་བྲང་དཀར་པོ་བཅས་གསུམ་ལས་གྲུབ་ཡོད། གྲོས་ཚོགས་ལ་གོང་འོག་གཉིས། གོང་མའི་ནང་འཐུས་མི་བརྒྱ་དང་། འོག་མའི་ནང་འཐུས་མི་བཞི་བརྒྱ་སུམ་བཅུ་སོ་ལྔ་བཅས་ཡོད་པ་རེད། ཨ་རིས་སྲིད་གཞུང་དང་མི་དམངས་གཉིས་ལས་མི་དམངས་གལ་ཆེན་པོར་བརྩི་བ་དང་། འཐུས་མི་རྣམས་ཨ་རིའི་མི་མང་གི་ཚབ་མཚོན་ཡིན་པས། གྲོས་ཚོགས་གོང་འོག་གཉིས་ཆེས་གནད་འགག་ཅན་གྱི་ཚོགས་པ་ཞིག་ཀྱང་ཆགས་ཡོད། 

ཆེས་མཐོ་ཁྲིམས་ཁང་ནང་ལ་ཁྲིམས་དཔོན་དགུ་ཡོད་ལ། འདི་དག་ཁྲིམས་ཀྱི་འཁྲུན་ཐག་གཅོད་པ་པོ་དང་། གནད་དོན་ཐག་མ་ཆོད་པ་དག་མཐའ་འཇུག་ཐག་གཅོད་བྱེད་མཁན་གྱི་དབང་ཤུགས་གཙོ་བོ་རེད།  ཕོ་བྲང་དཀར་པོའམ་སྲིད་འཛིན་གཞུང་ལས་ཁང་ནི་ཁྲིམས་དང་གྲོས་གཞི་སོགས་ལག་བསྟར་འདེབས་མཁན་དང་། ཁ་གསལ་ནས་བཤད་ན་ས་རྟགས་ཤིག་རྒྱུ་གཅིག་པུ་ཡིན་མོད། འོན་ཀྱང་ཁྲིམས་དང་གྲོས་གཞི་གང་ཡིན་རུང་སྲིད་འཛིན་གྱིས་ས་རྟགས་མ་བརྒྱབ་ན་རྩིས་མེད་ཡིན་པ་རེད། ཁོང་ཚོ་རེ་རེ་ལ་དབང་ཤུགས་རེ་ཡོད་པས། འདི་གསུམ་ལས་ཕྱོགས་གཅིག་ལ་མོས་པ་མེད་ན་གྲོས་གཞི་དང་ཁྲིམས་ལུགས་གང་ཡིན་རུང་གཏན་འབེབས་བྱེད་མི་ཐུབ་པ་རེད། 


ཆབ་སྲིད་ཀྱི་ཕྱོགས་ཁག་གཉིས། དམངས་གཙོ་རིང་ལུགས་དང་སྤྱི་མཐུན་རིང་ལུགས་པ་གཉིས་ཡིན། སྤྱི་མཐུན་པ་ལ་ ( GOP) Grand Old Party ）སྲོལ་རྒྱུན་རིང་ལུགས་པ་ཡང་ཟེར། འདི་གཉིས་ལ་གཡས་གཡོན་ཞེས་འབོད་སྲོལ་ཞིག་ཀྱང་ཡོད། དམངས་གཙོ་ལ་གཡོན་དང་སྤྱི་མཐུན་ལ་གཡས་ཞེས་འབོད་ཀྱི་ཡོད། ད་སྐབས་གྲོས་ཚོགས་འོག་མའི་ནང་དུ་སྤྱི་མཐུན་པའི་དབང་ཤུགས་ཆེ་བ་དང་། གྲོས་ཚོགས་གོང་མའི་ནང་དུ་དམངས་གཙོ་བའི་དབང་ཤུགས་ཆེན་པོ་ཡིན། ཨ་རིའི་གྲོས་ཚོགས་ནང་ལ་འདི་གཉིས་ལས་ད་དུང་ Legislature of Liberia ཟེར་བ་ཞིག་དང་། སྔོན་མ་ Tea Part ཟེར་ལ་ཕྱིས་སུ་ House Freedom Caucus གྲོས་ཚོགས་རང་དབང་ཇུས་སྟོན་ཚོགས་ཆུང་ཟེར་བའི་ཕྱོགས་ཁག་ཆུང་ཆུང་འགའ་ཤས་ཡོད་པ་ལས། གྲོས་ཚོགས་རང་དབང་ཇུས་སྟོན་ཚོགས་ཆུང་ཞེས་པ་འདི་ལ་ཚོགས་མི་ལྔ་བཅུ་ལྷག་ཡོད་པས་འདིའི་ནུས་པ་ཡང་ཆུང་ཆུང་མིན། ཐེངས་འདིའི་ཚོགས་གཙོ་འོས་འདེམས་སྐབས་ལ་དོ་སྣང་ཡོད་མཁན་ཚོས་ཁོ་ཚོའི་སྟོབས་ཤུགས་གསལ་བོ་ཤེས་ཡོད། རྩ་བའི་ཆ་ནས་ཁོང་ཚོ་ཚང་མ་སྤྱི་མཐུན་རིང་ལུགས་པ་རེད། 


ང་ཚོ་བོད་པ་ཚོར་མཚོན་ན་ངེས་པར་དུ་ཤེས་དགོས་པ་ནི། ཆབ་སྲིད་ཀྱི་ཕྱོགས་ཁག་འདི་གཉིས་ཀྱི་ལངས་ཕྱོགས་དང་། དམིགས་ཡུལ། ད་དུང་ཕྱོགས་ཁག་འདི་གཉིས་ལས་སུ་དང་འབྲེལ་ན་ང་ཚོའི་གནས་སྟངས་ལ་ཁེ་ཕན་ཡོད་པ་དེ་ཡིན་པས། འདིའི་ཕྱོགས་ལ་བློ་གཟུ་བོས་དཔྱད་པ་གཏོང་རྒྱུ་དེ་ཤིན་ཏུ་གལ་ཆེན་པོར་སྣང་། དཔེར་ན། དམངས་གཙོ་རིང་ལུགས་པ་ཚོས་དུས་རྒྱུན་དུ་བཤད་ཀྱིན་ཡོད་པ་ནི། རྒྱ་ནག་གཅིག་གི་སྲིད་ཇུས་ཟེར་བ་ཞིག་ངོས་འཛིན་བྱེད་ཀྱིན་ཡོད་ལ། སྲིད་ཇུས་འདིས་བོད་པའི་གནས་སྟངས་ལ་ཕན་གནོད་ཅི་ཞིག་ཡོད་མེད་ལ་ཤིན་ཏུ་དཔྱད་དགོས་པ་མ་ཟད། ད་དུང་དམངས་གཙོ་ཚོགས་པའི་ཁ་བཤད་དང་ལག་ལེན་གཉིས་ཀ་མཐུན་དང་མི་མཐུན་གྱི་ཕྱོགས་ལ་བརྟག་དཔྱད་གཟབ་ནན་བྱེད་དགོས་པ་ཞིག་རེད། ཨ་རིའི་དམངས་གཙོ་རིང་ལུགས་པ་དང་རྒྱ་ནག་བར་གྱི་འབྲེལ་བ་ཧ་ཅང་གི་ལྐོག་གྱུར་ཡིན་པ་དང་། ཕྱི་ཚུལ་ནས་གནོན་ཤུགས་སྤྲད་ཀྱི་ཡོད་མདོག་བྱས་ཏེ་ལྐོག་ནས་ངན་འབྲེལ་གཏིང་ཟབ་ཡོད་པའི་རྩོམ་ཡིག་དང་དཔྱད་བརྗོད་མང་པོ་མཐོང་རྒྱུ་འདུག་པས། ང་ཚོས་དམངས་གཙོ་བ་དང་ལངས་ཕྱོགས་གཅིག་འཛིན་པའམ། ཚོགས་པ་འདིར་འབྲེལ་བ་བྱེད་སྐབས་ངེས་པར་དུ་བསམ་བློ་གཉིས་པ་ཞིག་ལ་གྲ་སྒྲིག་བྱེད་དགོས་པ་རེད་བསམ། 


འོ་ན་ཨ་རིའི་སྤྱི་མཐུན་ནམ་སྲོལ་རྒྱུན་རིང་ལུགས་པ་ཚོས་རྒྱ་ནག་ལ་བཟུང་བའི་སྲིད་ཇུས་དང་ཁ་ཕྱོགས་ཅི་འདྲ་ཞིག་རེད་ཅེ་ན། འདས་པའི་ལོ་ངོ་བཅུ་ཕྲག་དུ་མར་ཨ་རིས་རྒྱ་ནག་ལ་བཟུང་བའི་སྲིད་ཇུས་དང་དམིགས་ཡུལ་དེ། རྒྱ་ནག་ཡར་རྒྱས་སུ་བཏང་ནས་མ་འོངས་པར་དམངས་གཙོའི་རྒྱལ་ཁབ་ཅིག་ཏུ་བསྒྱུར་ཨེ་ཐུབ་ལ་འབད་པ་རེད། འོན་ཀྱང་རྒྱ་ནག་ལ་བཟང་བྱས་ན་ངན་དུ་གྱུར་ཏེ་རྒྱ་ནག་དམངས་གཙོར་བསྒྱུར་རྒྱུ་ཕར་ཞོག།  དམར་ཤོག་དང་སྒེར་གཅོད་ཀྱི་རིང་ལུགས་ཇེ་བརྟན་དུ་བཏང་སྟེ། ཕྱིར་འཁོར་ནས་ཨ་རིའི་ཚོང་ལས་དང་དེང་རབས་ལག་རྩལ་སོགས་ཡོད་དོ་ཅོག་ལ་འདྲ་བཤུས་དང་། ལྐོག་འཁྱེར། གཡོ་བསླུ་སོགས་ཇག་རྐུན་གྱི་ལས་འཛེམས་མེད་དུ་བསྒྲུབས་ནས། ཨ་རིའི་ཆབ་དཔལ་རིག་གསུམ་ལ་གནོད་འཚེ་ཆེན་པོ་ཐེབས་བཅུག་ཡོད་པ་རེད།དེའི་རྐྱེན་གྱིས་ཉིས་སྟོང་བཅུ་དྲུག་ལོར་སྲིད་འཛིན་ཊོམ་པི་ཨ་རིའི་སྲིད་འཛིན་ལ་ལངས་ནས་རྒྱ་ནག་ལ་ཁ་གཏད་བཅག་པ་དེ་ཀུན་གྱིས་ཤེས་གསལ་ཡིན་ལ། ཨ་རི་དང་རྒྱ་ནག་གཉིས་ཀྱི་ཆབ་སྲིད་ཀྱི་འཕོ་འགྱུར་འདིའི་ཁྲོད་ནས། ང་ཚོ་བོད་ཀྱི་ཆབ་སྲིད་དང་གནས་བབ་སྐོར་ལ་འགྱུར་བ་ཅི་ཞིག་གཏོང་དགོས་མིན་སྐོར་ལ་ང་ཚོས་བསམ་གཞིག་ནན་མོ་གཏོང་དགོས་པར་འདོད།  


ང་ཚོའི་ལོ་ངོ་བཅུ་ཕྲག་དུ་མར་དབུ་མའི་ལམ་ཟེར་བའི་ཞི་བདེའི་ལམ་ཁ་ཞིག་བསྙེགས་ནས་བསྡད་ཡོད་མོད། དོན་ངོ་མར་དུས་ཡུན་དེའི་རིང་ལ་འཛམ་གླིང་གི་ཆབ་དཔལ་རིག་གསུམ་ཀུན་ལ་འགྱུར་ལྡོག་ཆེན་པོ་བྱུང་ཚར་བ་རེད། བོད་ཀྱི་ཁ་དཔེ་ཞིག་ལ་གནའ་འདྲ་བ་ད་མིན། ཕ་འདྲ་བ་བུ་མིན་ཟེར་བ་དེ་ལས་མ་མཆིས། འོན་ཀྱང་ང་ཚོས་ད་དུང་ལམ་ཁ་གཅིག་པུ་དེ་བསྙེགས་ནས་བསྡད་པ་ཡིན་ན། གཏན་ནས་འགྲིག་གི་མེད་པ་རིགས་པས་དཔྱད་ན་ཤེས་ཐུབ་ཅིང་། ལམ་རྙིང་གཅིག་པུ་དེ་ཡང་འཛམ་གླིང་གི་འགྱུར་ལྡོག་ཁྲོད་བེད་མེད་ཆགས་པའི་ཉེན་ཁ་ཤིན་ཏུ་ཆེ། ལོ་ངོ་བཅུ་ཕྲག་དུ་མའི་ཡར་སྔོན་གྱི་འཛམ་གླིང་གི་གནས་སྟངས་དང་། ནང་སྒོས་སུ་ཨ་རི་དང་རྒྱ་ནག་གི་ཆབ་སྲིད་ཀྱི་གནས་བབ་དང་བསྟུན་ན་དབུ་མའི་ལམ་ཁ་དེ་མཆོག་ཏུ་གྱུར་བ་ཞིག་ཡིན་པ་སྨོས་ཅི་དགོས། དེ་དུས་ཨ་རི་དང་རྒྱ་ནག་གཉིས་ཀྱི་མཐུན་ལམ་ཡང་ཆེས་ཡག་ཤོས་ཀྱི་སྐབས་ཤིག་རེད།  སྐབས་དེར་དབུ་མའི་ལམ་འདེམས་པ་དེ་མཆོག་ཏུ་གྱུར་བའི་རྣམ་དཔྱོད་ཅིག་རེད། འོན་ཀྱང་འཛམ་གླིང་གི་གནས་སྟངས་ཉིན་རེ་ནས་ཉིན་རེར་འགྱུར་བ་འབྱུང་གི་ཡོད་པ་དེ་ང་ཚོས་ངེས་པར་དུ་ཧ་གོ་དགོས་པ་ཞིག་དང་། འགྱུར་བ་དང་བསྟུན་པའི་ཇུས་གཞི་འདིང་དགོས་པ་དེ་ལས་ཀྱང་གལ་ཆེན་པོར་མཐོང་། གལ་སྲིད་ཡང་བསྐྱར་གདམས་ཀ་ཞིག་འདེམས་དགོས་ཐུག་རུང་མ་འགྲིག་པ་ཅི་ཡང་མི་འདུག་སྙམ། 


ང་ཚོའི་སྤྱི་ཚོགས་ནང་ལ་ཁྱབ་རྒྱ་ཤིན་ཏུ་ཆེ་བའི་བཤད་སྲོལ་འདི་འདྲ་ཞིག་ཡོད། རྒྱ་ནག་སྟོབས་འབྱོར་ཆེན་པོ་རེད། གང་ཅིའི་ཐད་ནས་ང་ཚོ་བོད་པ་ཚོས་དོ་ཟླ་ཡོང་གི་མ་རེད། ལྷག་པར་ཏུ་རྒྱ་ནག་གི་དཔལ་འབྱོར་ཡར་རྒྱས་སུ་ཕྱིན་ཏེ་འཛམ་གླིང་གི་རྒྱལ་ཁབ་མང་པོ་རྒྱ་ནག་ལ་བརྟེན་ནས་བསྡད་ཡོད་ཚུལ་མང་པོ་བཤད་རྒྱུ་ཡོད། དེ་ནི་རྒྱ་ནག་གི་ཆབ་སྲིད་ཀྱི་གནས་སྟངས་དང་རྒྱབ་ལྗོངས། སྤྱི་ཚོགས་གནས་བབ་སོགས་ལ་དཔྱད་པ་སྤུ་ཙམ་ཡང་གཏོང་ཐུབ་མེད་པའི་རྟག་མཚན་ཁོ་ནར་མཐོང་ལ། ལོ་ངོ་བཅུ་ཕྲག་དུ་མའི་རིང་ལ། ང་ཚོས་རྒྱ་ནག་གི་ཆབ་དཔལ་རིག་གསུམ་གྱི་ཕྱོགས་གང་ཅིའི་ཐོག་ལ་ཐ་ན་ཚད་དང་ལྡན་པའི་ཞིབ་འཇུག་ཚོགས་པ་ཙམ་ཡང་འཛུགས་ཐུབ་མེད་པ་ཡང་གནད་དོན་འདི་ལ་ཐུག་ཡོད། 

སྤྱིར་ན་བཙན་བྱོལ་སྒྲིག་འཛུགས་ཀྱི་ངོས་ནས་བསྐྱར་དུ་རྒྱ་ནག་ཞིབ་འཇུག་སྡེ་ཚན་ཚད་ལྡན་ཞིག་གསར་འཛུགས་བྱ་རྒྱུ་དེ་ཕྱི་དྲགས་མེད་ན་སྔ་དྲགས་མེད་པ་གསལ་བོ་རེད། སྔོན་མ་རང་ཉིད་ཀྱི་བསམ་བློར་ཡང་། ད་སྐབས་ང་ཚོ་བོད་ཀྱི་གནས་སྟངས་འདི་འདྲ་ཞིག་གིས་རྒྱ་ནག་ལྟ་བུའི་རྒྱལ་ཁབ་སྟོབས་པོ་ཆེ་ཞིག་ལ་ཁ་གཏད་ཅི་འདྲ་ཞིག་གཅོག་ཐུབ་བམ་ཞེས་རེ་བ་ཆད་མྱོང་། འོན་ཀྱང་འདས་པའི་ལོ་ངོ་དུ་མའི་ནང་འཛམ་གླིང་གི་འཕོ་འགྱུར་དང་། ནང་སྒོས་སུ་ཨ་རི་དང་རྒྱ་ནག་གི་ཆབ་སྲིད་ཀྱི་གནས་སྟངས་ལ་བལྟས་པ་ཡིན་ན། ང་ཚོ་ལ་ཡང་གོ་སྐབས་ཤིག་ཡོང་སྲིད་པ་རེད་བསམ། གོ་སྐབས་དེ་གང་ཞེ་ན། མ་འོངས་པར་རྒྱ་ནག་གུང་ཁྲན་ཏང་མཇུག་སྒྲིལ་བའི་དུས་སྐབས་དེ་རེད་བསམ་ལ། ཡིན་པ་ཙམ་མ་ཟད་གོ་སྐབས་དེ་མ་འོངས་པའི་ལོ་ངོ་བཅུ་ཕྲག་གི་ནང་ལ་མངོན་དུ་གསལ་རྒྱུ་ཡིན་པ་ཕྱོགས་གཉིས་ནས་བལྟས་ཏེ་དཔྱད་ན་ཤེས་ཐུབ་སྙམ་མོ། 


དང་པོ་ནི་རྒྱ་ནག་གི་ནང་ཁུལ་གྱི་འགྱུར་ལྡོག་སྟེ། དབང་ཤུགས་ཀྱི་ཕྱོགས་ནས་སྔོན་མའི་ཏིན། ཅང་། ཧུའུ། ཝིན། སུན་ལས་ཅོན་སོགས་རྒྱ་ནག་དམར་ཤོག་པའི་དབང་ཤུགས་དེ་ཕྱོགས་མང་པོ་ཞིག་གིས་བཟུང་ཡོད་ཀྱང་། ད་ལྟ་ཞི་ཅིང་ཕིང་གཅིག་པུའི་སྒེར་གཅོད་དམར་ཤོག་རིང་ལུགས་ཤིག་ཏུ་གྱུར་ཡོད་པ་འདི་ཡང་། ང་ཚོར་མཚོན་ན་དགྲ་མང་པོ་ཞིག་གཅིག་ཏུ་གྱུར་བ་ཡིན་ལ། གུང་ཁྲན་ཏང་གི་སྲོག་རྩ་ཡང་དུ་མ་ཞིག་ནས་གཅིག་ཏུ་གྱུར་ཏེ་ཤིན་ཏུ་ཇེ་གཉོམ་དུ་སོང་ཡོད་པ་རེད།  ད་དུང་ཁོས་ལོ་གསུམ་རིང་ཏོག་དབྱིབས་ནད་དུག་ལ་ཁ་གཡར་ནས་རྒྱ་ནག་མི་དམངས་ཡོངས་རྫོགས་བཀག་སྡོམ་བྱས་ཏེ་རྒྱ་ནག་གི་དཔལ་འབྱོར་དང་། མི་དམངས་ཀྱི་འཚོ་བའི་ཁྲོད་ལ་གྱོང་གུན་ཚབ་ཆེན་ཐེབས་པར་བརྟེན། མི་དམངས་ཀྱི་ངོ་རྒོལ་ཡང་ཉིན་རེ་རེ་བཞིན་དང་། སྐབས་རེ་རེ་བཞིན་ཛ་དྲག་ཏུ་འགྲོ་བཞིན་པ་དེ་རེད། དཔེར་ན། པེ་ཅིན་གྱི་སི་ཐོང་ཟམ་པའི་རྒོལ་གཏམ་གསལ་བསྒྲགས་དང་། ཕྱིས་སུ་ཤོག་དཀར་ལས་འགུལ་ལ་སོགས་པའི་སྐབས། རྒྱ་ནག་གུང་ཁྲན་ཏང་མཇུག་སྒྲིལ་དགོས། ཞི་ཅིང་ཕིང་མར་འབབ་དགོས་པ། སྒེར་གཅོད་མི་དགོས་དམངས་གཙོ་དགོས། ཞེས་རྒོལ་གཏམ་བསྒྲགས་པ་འདི་དག་ནི། གུང་ཁྲན་ཏང་གི་ལོ་རྒྱུས་ནང་བྱུང་མ་མྱོང་བ་ཞིག་རེད། དྲུག་བཞིའི་ལས་འགུལ་ལ་ཡང་རྒོལ་གཏམ་དེ་འདྲ་བསྒྲགས་མེད་པ་རེད། འདིས་ཅི་ཞིག་མཚོན་གྱི་ཡོད་དམ། རྒྱ་ནག་མི་དམངས་ལ་ཡང་གུང་ཁྲན་ཏང་རྩ་མེད་གཏོང་རྒྱུར་མོས་པ་དང་འདོད་པ་ཡོད་པའི་རྟགས་མཚན་གསལ་བོ་ཞིག་ཡིན་པ་སྨོས་མ་དགོས། ད་དུང་ཆེས་གལ་ཆེན་པོ་ཞིག་ནི་རྒྱ་ནག་དམར་ཤོག་པས་དུས་རྒྱུན་དུ་ཐེ་ཝན་ལ་དམག་བརྒྱབ་ཏེ་བཅིངས་འགྲོལ་བྱེད་རྒྱུ་ཡིན་མདོག་མདོག་བཤད་ནས་ལོ་བཅུ་ཕྲག་མང་པོ་འདས་ཤིང་། གལ་སྲིད་ཞི་ཅིང་ཕིང་གིས་བཀའ་རྒྱ་བཏང་སྟེ་ཐེ་ཝན་དང་དམག་འཁྲུགས་བསླངས་པ་ཡིན་ན། སྐབས་དེ་ནི་རྒྱ་ནག་གུང་ཁྲན་ཏང་ཟེར་བའི་དམར་ཤོག་རིང་ལུགས་པ་འདི་དངོས་སུ་མཇུག་སྒྲིལ་རྒྱུ་མགོ་བརྩམས་པ་དང་ཁྱད་མ་མཆིས་པས། ང་ཚོས་ཀྱང་མ་ནོར་བའི་་ལངས་ཕྱོགས་བརྟན་པོ་ཞིག་བཟུང་སྟེ། རྒྱ་ནག་གུང་ཁྲན་ཏང་ཕམ་པར་རྒྱག་པའི་ཆེ་བ་རྒྱལ་ཁབ་ཁག་གི་སྲིད་ཇུས་ནས། ཆུང་བ་ཚོགས་སྡེ་དང་སྒེར་པ་ཚུན་ཆད་ཀྱི་ལངས་ཕྱོགས་གཅིག་པ་ཐམས་ཅད་ཀྱིས་སྟོབས་ཤུགས་གཅིག་བསྡུས་བྱས་ཏེ། རྒྱ་ནག་དམར་ཤོག་ཚོགས་པ་རྩ་མེད་གཏོང་རྒྱུའི་སྲིད་ཇུས་ལ་རྒྱབ་སྐྱོར་དང་ནུས་ཤུགས་གཅིག་སྤུངས་བྱེད་ཨེ་ཐུབ་བལྟ་རྒྱུ་དེ་ཤིན་ཏུ་གལ་ཆེན་པོ་རེད་བསམ། 


ཕྱོགས་གཉིས་པ་དེ་ད་ལྟའི་ཆར་ཨ་རིའི་ཆབ་སྲིད་ཀྱི་ཕྱོགས་ཁག་གཉིས་ཀྱི་ནང་རྒྱ་ནག་ལ་ཁ་གཏད་གཅོག་ཐུབ་མཁན་གཙོ་བོ་དེ་སྤྱི་མཐུན་རིང་ལུགས་པ་ཚོ་ཡིན་ལ། ཁོ་བོས་བསམ་པར་མ་འོངས་པའི་ལོ་གཉིས་གསུམ་ནང་ཨ་རིའི་གྲོས་ཚོགས་གོང་འོག་གཉིས་དང་ཕོ་བྲང་དཀར་པོ་སོགས་ཨ་རིའི་སྲིད་དབང་ཡོངས་སུ་རྫོགས་པ་སྤྱི་མཐུན་པས་འཛིན་རྒྱུ་ཡིན་པ་གཏན་ཁེལ་རེད་བསམ། གང་ཞེ་ན། སྤྱི་མཐུན་རིང་ལུགས་པ་ཚོར་སྲིད་འཛིན་ཊོམ་པི་ལགས་ཀྱི་གཙོས་མ་འོངས་པར་ཨ་རིའི་གནད་ཡོད་ཆབ་སྲིད་མི་སྣ་ལ་ལངས་ཐུབ་མཁན་གྱི་མི་སྣ་སྐད་གྲགས་ཆེ་ཞིང་། ནུས་སྟོབས་ལྡན་པ། ཨ་རིའི་མི་དམངས་ནང་ཤུགས་རྐྱེན་ཆེ་བ་ཧ་ཅང་མང་པོ་ཡོད་པ་དང་། འདས་པའི་ལོ་གཉིས་ནང་ལ་སྲིད་འཛིན་ཊོམ་པི་མཆོག་གིས་ཨ་རིའི་རྒྱལ་ཡོངས་ཀྱི་སྤྱི་མཐུན་པ་ཚོ་ཕྱོགས་གཅིག་ཏུ་བསྡུས་ཏེ་གཞོན་སྐྱེས་ཆབ་སྲིད་པ་གང་མང་སྐྱེད་བསྲིང་བྱས་ཡོད་པ་མ་ཟད། དཔེར་ན་ད་ལྟའི་ Florida མངའ་སྡེའི་སྲིད་བློན་ Ron Desantis རོན• ངྷས་སན་ཊི་སི་ལྟ་བུ། ད་དུང་Mike Pompeo དང་ད་ལྟའི་ཚོགས་གཙོ་ Kevin McCarthy སོགས་ལྟ་བུའི་ཆབ་སྲིད་ཀྱི་མི་སྣ་གནད་འགག་ཅན་མང་པོ་ཡོད། དེ་བཞིན་དུ་House Freedom Caucus ནང་གི་གཞོན་སྐྱེས་ཆབ་སྲིད་པ་ཡོངས་ཀྱིས་ MAGA དང་ཨ་རི་དང་པོའི་སྲིད་ཇུས་ལ་མཐའ་གཅིག་ཏུ་རྒྱབ་སྐྱོར་ཐོབ་ཀྱིན་ཡོད། འདི་དག་ཚང་མ་རྒྱ་ནག་དམར་ཤོག་རིང་ལུགས་ལ་མཐའ་གཅིག་ཏུ་ངོ་རྒོལ་བྱེད་མཁན་རྐྱང་རྐྱང་རེད། ད་དུང་ཨ་རིའི་ཆབ་སྲིད་ཀྱི་གར་སྟེགས་སུ་སླེབས་མེད་པའི་སྤྱི་མཐུན་རིང་ལུགས་པ་ཚད་ལྡན་Kari Lake དང་ Tulsi Gabbard ལྟ་བུའི་གསར་སྐྱེས་བུད་མེད་ཆབ་སྲིད་པ་མང་པོ་ཞིག་བྱུང་དང་འབྱུང་བཞིན་ཡོད། ཁོང་ཚོས་མ་འོངས་པར་རྒྱ་ནག་གུང་ཁྲན་ཏང་ལ་ཁ་གཏད་གཅོག་རྒྱུ་དང་། རྒྱ་ནག་གུང་ཁྲན་ཏང་སྲིད་དབང་དང་རྒྱ་ནག་མི་མང་གཉིས་ལོགས་སུ་ཕྱིས་ཏེ། ཐ་ན་རྒྱ་ནག་གུང་ཁྲན་ཏང་ཟེར་བ་དེ་རྩ་བ་ཡན་ལག་དང་བཅས་པ་མེད་པ་བཟོ་རྒྱུའི་སྲིད་ཇུས་ཤིག་ཀྱང་གཏན་འབེབས་བྱེད་མི་སྲིད་པ་ཞིག་མ་རེད་སྙམ། དེ་དུས་ང་ཚོའི་ལངས་ཕྱོགས་དེ་རང་བཙན་གཙང་མ་ཡིན་པར་འཛིན་ཐུབ་ན་ཨ་རི་གཞུང་གི་རྒྱབ་སྐྱོར་ཀྱང་ཐོབ་སྲིད་པ་མ་ཟད།གུང་ཁྲན་ཏང་མེད་པ་ཆགས་ཚར་དུས་ང་ཚོར་ཡང་རང་ས་རང་བདག་དང་གཞིས་བྱེས་མཉམ་མཛོམས་ཀྱི་སྐལ་བ་བཟང་པོ་ཞིག་བྱུང་ཐག་ཆོད་རེད་བསམ། 


མ་ཚད་ཉེ་ཆར་ཨ་རིའི་གྲོས་ཚོགས་ཀྱི་ཚོགས་གཙོ་གསར་པ་ Kevin McCarthy མཆོག་གི་གསུངས་བཤད་དང་ལས་འཆར་ཐེངས་དང་པོའི་ནང་དུ། རྒྱ་ནག་༼ འདི་ནས་གསལ་བོར་བྱས་ཏེ་རྒྱ་ནག་གུང་ཁྲན་རུ་ཚོགས་ཞེས་མིང་བཏགས་ཡོད ༽ལ་དམིགས་བསལ་ཞིབ་འཇུག་ཚོགས་པ་འཛུགས་དགོས་པའི་གཏམ་བཤད་གནང་བ་དང་ཆབས་ཅིག་ཏུ་ཚོགས་ཆུང་རྩ་འཛུགས་བྱས་ཏེ། ཚོགས་གཙོ་ལ་སྐུ་ཞབས་ Mike Gallagher ལགས་བསྐོས་ཏེ། ཁོང་གིས་ལས་གཞི་དངོས་སུ་མགོ་བརྩམས་ཚར་ཡོད་པ་ཚང་མས་མཁྱེན་གསལ་རེད། སྐབས་འདིའི་རྒྱ་ནག་གུང་ཁྲན་རིང་ལུགས་ཞིབ་འཇུག་སྡེ་ཚན་རྩ་འཛུགས་བྱེད་དགོས་པའི་གྲོས་ཆོད་འདི་ལ་སྤྱི་མཐུན་པའི་འོས་ཤོག་བརྒྱ་ཆའི་བརྒྱ་དང་། དམངས་གཙོ་པའི་བརྒྱ་ཆའི་བདུན་བཅུ་ཡས་མས་ཀྱིས་རྒྱབ་སྐྱོར་ཐོབ་ཡོད་པ་རེད། ལས་གཞི་འདི་འདྲ་བ་ཧ་ཅང་གལ་ཆེ་བས། ང་ཚོས་ཀྱང་གང་མགྱོགས་གཞུང་འབྲེལ་ཐོག་དངོས་ཤུགས་བརྒྱུད་གསུམ་གང་ཅིའི་ཐད་ནས་རྒྱ་ནག་ཆབ་སྲིད་ཞིབ་འཇུག་སྡེ་ཚན་འཛུགས་རྒྱུ་དང་། རྒྱ་ནག་གི་ཆབ་སྲིད་ཀྱི་འགྱུར་ལྡོག་ལ་དོ་སྣང་དང་ཞིབ་འཇུག་བྱེད་རྒྱུ་དེ་ཤིན་ཏུ་གལ་ཆེན་པོར་སྣང་། རྒྱ་ནག་དང་ཨ་རིའི་ཆབ་སྲིད་ཀྱི་གནས་བབ་ཅི་འདྲ་ཞིག་ཡིན་པ་རྟོགས་ཐུབ་ན། ད་གཟོད་ང་ཚོའི་མུ་མཐུད་ནས་དབུ་མའི་ལམ་ལ་རེ་བ་བརྒྱབ་བསྡད་ན་གྲུབ་འབྲས་ཅི་ཙམ་ཐོན་མིན་ཧ་གོ་ཐུབ་ལ། ཡང་ན་ཁ་ཕྱོགས་གཞན་གང་དག་ནས་ང་ཚོའི་ཆབ་སྲིད་ལ་ཁེ་དབང་ཡོད་མེད། དཔེར་ན་ཡང་བསྐྱར་རང་བཙན་གཙང་མའི་ཕྱོགས་ལ་རེ་བ་རྒྱག་རྒྱུ་ཡོད་དམ་མེད། ཨ་རིའི་གནོན་ཤུགས་འོག་ནས་རྒྱ་ནག་དམར་ཤོག་པ་ལོ་ག་ཚོད་ལ་གནས་ཐུབ་མིན་དང་།ཞི་ཅིང་ཕིང་གི་སྒེར་གཅོད་ལམ་ལུགས་དངོས་སུ་མགོ་བརྩམས་པ་ནས་བཟུང་གུང་ཁྲན་དམར་ཤོག་ཚོགས་པ་མཇུག་སྒྲིལ་བའི་བར་དུ་དུས་ཡུན་ག་ཚོད་འགོར་སྲིད་དམ། མདོར་ན་གུང་ཁྲན་ཏང་མེད་པ་ཆགས་ཚར་བའི་སྐབས་དེར་ང་ཚོའི་ཆབ་སྲིད་ཀྱི་ལངས་ཕྱོགས་དབུ་ལམ་ཡིན་ན་ཅི་འདྲ་ཞིག་ཆགས་སྲིད་པ་དང་། ཡང་ན་སྐབས་དེར་ང་ཚོའི་རང་བཙན་གཙང་མའི་ལངས་ཕྱོགས་བཟུང་བསྡད་ན་ཁེ་ཕན་དང་དགེ་མཚན་ཅི་ཙམ་ཡོད་པ། འདི་དག་ལ་སོགས་པའི་ཆབ་སྲིད་ཀྱི་གནས་སྟངས་གང་ཡིན་རུང་བོད་པ་ཚོའི་མ་འོངས་པ་དང་ཁ་ཐུག་འབྲེལ་བ་ཆགས་བསྡད་ཡོད་པས། ཚང་མས་བློ་གཟུ་བོས་བསམ་གཞིག་བཏང་ནས་དྲི་བ་འདི་དག་ལ་ལན་ཞིག་རྙེད་དགོས་པ་རེད་མ་གཏོགས། ཉི་མ་གཅིག་ལ་ལོ་རྒྱུས་ཀྱི་འགྱུར་ལྡོག་ཁྲོད་ཐོབ་པའི་་གོ་སྐབས་ཤོར་སོང་བ་ཡིན་ན། འགྱོད་པའི་རྒྱ་མཚོར་ལྷུང་ཡང་ཕན་པ་ཅི་ཞིག་ཡོད། བཤད་སྲོལ་ལ་ཡང་གོ་སྐབས་ནི་གྲ་སྒྲིག་ཅན་ལ་དབང་ཞེས་གྲགས་ལ། གོ་སྐབས་ཟེར་བ་དེ་དང་འཕྲད་བསམ་པ་ཡིན་ན་དཔེ་མི་སྲིད་པ་ཡང་སྲིད་པར་གྱུར་འགྲོ་བ་ཆོས་ཉིད་རེད་སྙམ། 


སྤྱིར་ན་བསམ་ཚུལ་ནི་བསམ་ཚུལ་ཙམ་ཡིན་པའི་དཔྱོད་ལྡན་པ་སུ་ཞིག་ལ་ཕོག་ཐུག་ཤོར་བ་ཡིན་ན་དགོངས་སེལ་སྙིང་ནས་ཞུས་པ་ཡིན། ང་ཚོ་བོད་ཀྱི་སྤྱི་ཚོགས་ནང་ལ་བསམ་ཚུལ་མ་མཐུན་པ་ཉུང་དྲགས་ནས་ད་གཟོད་ང་ཚོའི་ལོ་ངོ་བཅུ་ཕྲག་དུ་མར་ལམ་ཁ་གཅིག་ལ་རེ་བ་བརྒྱབ་ནས་བསྡད་དགོས་ཐུག་པ་རེད་བསམ། སྤྱི་ཚོགས་ཤིག་གི་ནང་ལ་བསམ་ཚུལ་མ་འདྲ་བ་ཡོང་ཐུབ་ཀྱི་ཡོད་པ་དེ་ཡར་རྒྱས་ཀྱི་རྣམ་པ་ཞིག་རེད། གང་ལྟར་ཀྱང་། བློ་གཟུ་བོས་བསམ་བློ་བཏང་བ་ཡིན་ན། རྒྱ་ནག་གི་ཆབ་སྲིད་ནི་ཏང་གི་འཐུས་མི་ཚོགས་ཆེན་འཚོགས་ཐེངས་རེ་རེ་བཞིན་འགྱུར་བ་འགྲོ་བསྡད་ཡོད་ལ། ཨ་རི་ཡང་དེ་བཞིན་རེད། སྲིད་འཛིན་རེ་རེ་དང་གྲོས་ཚོགས་གོང་འོག་ནང་དུ་འཐུས་མི་འོས་འདེམས་སྐབས་རེ་རེ་ནས་ཕྱོགས་ཁག་གཉིས་ཀྱི་འཐུས་མིའི་མང་ཉུང་ལྟར་ཆབ་སྲིད་ཀྱི་ལངས་ཕྱོགས་དང་དམིགས་ཡུལ་སོགས་གང་ཅིའི་ཐད་ནས་འགྱུར་བ་འགྲོ་བསྡད་ཡོད་པ་ཞིག་རེད། འོ་ན་ང་ཚོའི་ཆབ་སྲིད་ཀྱི་ལངས་ཕྱོགས་དེ་བགྲང་བྱ་བཅུ་ཕྲག་དུ་མར་རྩ་བ་ཉིད་ནས་འགྱུར་བ་འགྲོ་མ་ཐུབ་པ་ཡིན་ན་དེ་རྒྱུ་མཚན་ཞིག་ཡོད་དམ། གནས་ལུགས་དང་ཆབ་སྲིད་ཀྱི་འགྲོ་སྟངས་དང་མཐུན་ནམ། ཐ་ན་ལོ་སྔོན་མའི་ནང་འཛམ་གླིང་གི་ཕྱུག་བདག་ Elon Musk མཆོག་གི་བཤད་པ་ནང་བཞིན། ངས་ད་ལྟའི་བར་དུ་དམངས་གཙོ་རིང་ལུགས་ལ་རྒྱབ་སྐྱོར་བྱས་པ་ཡིན་མོད། ཡིན་ན་ཡང་ད་ནས་བཟུང་སྤྱི་མཐུན་རིང་ལུགས་པ་ཚོར་འོས་འཕེན་རྩིས་ཡིན། ཞེས་སྤྱི་མཐུན་ལ་རྒྱབ་སྐྱོར་བྱེད་ཀྱི་ཡོད་པ་འདི་ཡང་ང་ཚོར་མཚོན་ན་གོ་བརྡ་ཞིག་དང་། ཡང་ན་ང་ཚོའི་ངེས་པར་དུ་བསམ་བློ་གཏོང་སའི་ཡུལ་ཞིག་ཀྱང་རེད་བསམ། 


སྟབས་ལེགས་པ་ཞིག་ལ་དེ་རིང་ཁ་སང་ཨ་རི་དང་རྒྱ་ནག་གུང་ཁྲན་རིང་ལུགས་པ་གཉིས་རྦད་དེ་རྒྱབ་འགལ་བྱུང་སྟེ། ཁྱོད་ཤི་ང་གསོན་གྱི་དགྲ་ཟླ་ལྟ་བུ་ཆགས་བསྡད་ཡོད་པ་དེ་ང་ཚོར་མཚོན་ན་གཏམ་བཟང་ཞིག་རེད། ནང་སྒོས་སུ་ཨ་རིའི་སྤྱི་མཐུན་ནམ་སྲོལ་རྒྱུན་རིང་ལུགས་པ་ཚོས། སྲིད་འཛིན་ཊོམ་པི་ཡིས་སྐབས་ནས་བཟུང་རྒྱ་ནག་གུང་ཁྲན་རིང་ལུགས་པ་དང་རྒྱ་ནག་མི་དམངས་གཉིས་ལོགས་སུ་ཕྱེས་ཏེ་དམར་ཤོག་རིང་ལུགས་དང་ཁ་གཏད་གཅོག་མགོ་བརྩམས་ཡོད་པ་རེད། བདུན་བཅུ་དོན་དགུའི་ལོར་རྒྱ་ནག་དང་ཨ་རི་གཉིས་ཀྱི་བར་ལ་ཕྱི་འབྲེལ་ཆགས་པ་ནས་བཟུང་སྟེ། ད་ལྟའི་བར་དུ་རྒྱ་ནག་གི་གུང་ཁྲན་དམར་ཤོག་པ་དང། རྒྱ་ནག་མི་མང་གཉིས་ལོགས་སུ་ཕྱེས་པ་འདི་ཨ་རིའི་ཆབ་སྲིད་ཀྱི་ལངས་ཕྱོགས་ཐེངས་དང་པོ་ཆགས་ཡོད་པ་མ་ཟད། འདི་ལ་སྤྱི་མཐུན་པ་དང་དམངས་གཙོ་ཚོགས་པ་གཉིས་ཀའི་རྒྱབ་སྐྱོར་ཐོབ་ཡོད་པ་ཞིག་རེད། ལྷག་དོན་སྲིད་འཛིན་ཊོམ་པི་ཡང་བསྐྱར་ཨ་རིའི་སྲིད་འཛིན་ལ་ལངས་རྒྱུར་གཏན་ཁེལ་བ་འདི་ང་ཚོར་མཚོན་ན་ཆེས་གསལ་ཁ་ཅན་གྱི་གོ་བརྡ་ཞིག་ཡིན། རྒྱ་ནག་གུང་ཁྲན་དམར་ཤོག་ཚོགས་པ་ཞེད་ས་འཇིགས་ས་ཞིག་ཡོད་ན་མེད་ན་དེ་སྲིད་འཛིན་ཊོམ་པི་ལགས་ཀྱི་ལངས་ཕྱོགས་ MAGA ལས་འགུལ་དང American First Policy ཨ་རི་དང་པོའི་སྲིད་ཇུས་འདི་གཉིས་རེད། འདི་ལ་ཨ་རིའི་སྤྱི་མཐུན་མིང་ཙམ་པ་ RINO ( Republican in Name Only ) ཁ་ཤས་ཤིག་ལས། ཨ་རིའི་སྤྱི་མཐུན་པའི་ཕྱོགས་མང་ཤོས་དང་ལྷག་པར་དུ་House Freedom Caucus ཚོགས་མི་ཡོངས་ནས་མཐའ་གཅིག་ཏུ་རྒྱབ་སྐྱོར་ཐོབ་ཀྱི་ཡོད་པ་མ་ཟད། དེ་རིང་ཁ་སང་ཨ་རིའི་མི་དམངས་ཡང་གཉིད་ལས་སད་དེ། སྲིད་ཇུས་འདི་ལ་རྒྱབ་སྐྱོར་བྱེད་མཁན་ཉིན་རེ་ནས་ཇེ་མང་འགྲོ་བཞིན་ཡོད་པ་ཤིན་ཏུ་གསལ་བོ་རེད། 

སྤྱི་ཚོགས་ནང་མི་མང་པོ་ཞིག་གི་ཨ་རི་དང་པོ་ཞེས་པའི་སྲིད་ཇུས་འདི་ལ་གོ་བ་ལོག་ལེན་བྱེད་ཀྱིན་ཡོད་པ་འདྲ། ཁོ་བོས་བསམ་པར་འདིའི་ནང་དོན་དེ་ཁེ་བཟང་ཡོད་དོ་ཅོག་དང་པོ་ཟ་མཁན་དེ་ཨ་རི་ཡིན་དགོས་ཟེར་ཀྱིན་ཡོད་མ་རེད་བསམ། སྲིད་ཇུས་འདིའི་དམིགས་ཡུལ་དང་གོ་དོན་ངོ་མ་དེ་ཨ་རི་འཛམ་གླིང་གི་ཨང་དང་པོ་ཡིན་ཟེར་བ་དང་། ཡང་ན་ཡིན་དགོས་ཞེས་རྒྱ་ནག་གུང་ཁྲན་པ་ཚོ་གཙོས་མི་མཐུན་ཕྱོགས་ཡོངས་ལ་གོ་བརྡ་ཞིག་སྤྲད་ཀྱིན་ཡོད་པ་རེད།  འདི་གལ་ཆེན་པོ་ཞིག་ཀྱང་རེད། རྒྱལ་པོ་ཨ་རིའི་རྒྱལ་ས་བརྟན་བསྡད་ན་ད་གཟོད་སྤྲང་པོ་བོད་ལྟ་བུ་དག་གིས་ཉལ་ས་ཡང་བདེ་བོ་ཡོང་གི་རེད། དེ་མ་གཏོགས་རྒྱ་ནག་དང་དམར་ཤོག་རིང་ལུགས་པ། ཡང་ན་སྒེར་གཅོད་སྲིད་དབང་བ་ཚོ་འཛམ་གླིང་གི་དང་པོ་ཆགས་པ་ཡིན་ན་ང་ཚོ་བོད་པ་ལྟ་བུའི་སྤྲང་པོ་ཉམ་ཆུང་དག་ལ་དུས་ནམ་ཡང་བདེ་བ་ཞིག་ཡོང་དཀའ་སྙམ་མོ། །

མཇུག་མཐར་༧ གོང་ས་སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོའི་སྐུ་ཚེ་ཁྲི་ལོར་བརྟན་པ་དང་མཛད་འཕྲིན་ཡར་ངོས་ཟླ་ལྟར་རྒྱས་ཏེ། མ་འོངས་བོད་གཞིས་བྱེས་མཉམ་འཛོམས་ཀྱི་སྐལ་བ་བཟང་པོ་མྱུར་བ་མྱུར་དུ་ཤར་བའི་སྨོན་འདུན་དང་བཅས། རྭ་འཕྲིན་མིང་ཅན་གྱིས་ཨ་རིའི་རྒྱལ་སར།