–རྔ་བ་ཀུན་བཟང་།
ཨ་མ་ལགས། ང་ཕ་ཡུལ་ལ་ལོག་ཡོད།
མི་ལོ་སུམ་ཅུ་ཟིན་པའི་འཁྱམ་པོ་ང་།
གཞན་ཡུལ་དུ་ནར་སོན་ཞིང་།
གཞན་ཁྱིམ་ནས་རྒས་ཏེ།
དེ་རིང་དེ་ལྟར་ལེ་དབར་སྟོང་ཕྲག་ཆོད་ནས་ཕ་ཡུལ་ལ་ལོག་དུས།
འཇིག་རྟེན་གྱི་གྲུ་ཁ་འདིེར་ཐོག་མར་འཁྱེར་ཡོང་མཁན་གྱི་ཨ་མ་ཁྱོད་ཉིད་མེད་དུས།
ད་གཟོད། སྔར་ཡོད་ཀྱི་འབྲོག་ཁྱིམ་དང་། རྩྭ་ཐང་དང་རྟ་ནོར།
རི་ཆུ་ནག་གསུམ་ཡོད་ཚད་ཁེར་རྐྱང་ལ་འགྱུར་སོང་བས།
ཅི་ཞིག་བཤད་འདོད་ཀྱང་། ཅི་ཡང་མི་ཤོད་པའི་དུས་ཤིག་བྱུང་།
ཨ་མ་ལགས། ང་ཕ་ཡུལ་ལ་ལོག་ཡོད།
འོན་ཀྱང་། ཁྱིམ་འདི་ན་ཁྱོད་ཀྱིས་སྐྱ་རེངས་ཁྲོད་ནས་འོ་མ་དཀྲོགས་པའི་ཤག་སྒྲ་དང་། མཚན་མོའི་གནའ་གཏམ།
མར་གྱིས་གྲུབ་པའི་ཟས་མཆོག་སྦྲང་དཀར་རྩམ་པ་ལ་རེ་སྒུག་བྱེད།
དེ་བས་ཀྱང། ཨ་ཕའི་ལག་གི་མ་ཏྲིའི་འཁོར་ལོ་དང་།
གདོང་གི་གཉེར་མ། མགོའི་སྐྲ་ལོ་དག་མཐོང་མ་ཐག
ང་ནི་སྨྲ་བ་འགག་ནས་ཡུལ་རིང་ལ་ལུས་དུས།
ད་གཟོད། ང་རང་ལོ་ན་ཤིན་ཏུ་ཆུང་དུས་ཀྱི་ཨ་ཕའི་ཁྱོད་ལ་བཅང་བའི་ལྷད་མེད་ཀྱི་
སེམས་པ་དང་།
ཁྱོད་ཀྱིས་ཨ་ཕར་བསྟན་པའི་བརྩེ་སེམས་ཀྱི་མིག་མདངས་རེ་རེའི་རྣམ་འགྱུར་སྣ་ཚོགས་ཡིད་སེམས་ལ་འཁོར་དུས།
ཨ་ཕའི་དྲན་ངོགས་ནས་གཏན་ནས་བརྗེད་མི་ཐུབ་པ་དེ་ཨ་མ་ཁྱོད་ཉིད་ཡིན་པ་ཤེས།
ཨ་མ་ལགས། ང་ཕ་ཡུལ་ལ་ལོག་ཡོད།
ལོ་འདི་དག་གི་རིང་ལ། ཁྱོད་ཇི་ལྟར་བཙལ་ཀྱང་མ་རག་ལ།
གང་ན་སོང་ཡང་རྣམ་ཤེས་འཁོར་ས་དེ་ཁྱོད་ཡིན་འདུག
ད་དུང་། རི་ཆུ་ནག་གསུམ་གྱི་འཕྲང་ལམ་དང་། འཚོ་བའི་ཀྱག་ཀྱོག་རེ་རེ་མྱོང་དུས།
འུ་གཉིས་བར་གྱི་བཤད་མི་ཚར་བའི་སྙིང་གཏམ་དང་།
ཚེ་རབས་གཅིག་གི་བདེ་སྐྱིད་ཀྱི་དྲན་གསོ་དག་ལྷག་ཏུ་དྲན།
དེའི་ཕྱིར། གནམ་འོག་འདི་ནས་ངའི་སུ་ཡང་བརྗེད་སྲིད་ཡང་།
ཁྱོད་ཉིད་ནམ་ཡང་བརྗེད་མི་སྲིད།
ཨ་མ་ལགས། ང་ཕ་ཡུལ་ལ་ལོག་ཡོད།
ཁྱེད་ཉིད་ཆེས་དགའ་སའི་ཨ་ཕ་ལ་ལྟ་རུ་ཡོང་ཡོད།
རེད་དེ། དེ་རིང་ང་རང་གཅིག་པུ་སྦྲ་ནག་གི་སྒོ་ཁ་ལ་ལངས་ཏེ།
སྔོན་ཆད་ཁྱེད་རང་འདིར་ཡོད་པའི་ལྷན་འཛོམས་ལ་ཕྱིར་དྲན་ཞིག་བྱེད་དུས།
བྱིས་དུས་ཀྱི་མཚན་མོ་རེ་རེར།
ང་ཚོ་མིང་སྲིང་ཚོས་སྦྲ་ནག་གི་ཁ་ཚུབ་ངོས་ཀྱི་ཁ་བ་ལྟ་ཞོར་ལ།
ཁྱོད་ཉིད་རུམ་ཁ་དྲོད་མོ་ནས་འཚར་ལོངས་བྱུང་ལ།
མར་ཆུར་འོ་མ་འཐུང་ནས་རྩྭ་ཐང་ནས་རྟ་ནོར་འཚོས་པའི་ལོ་ཟླ་ལ་ཡིད་མོས་ཚལ་
ཡང་།
དེ་རིང་ཡུལ་འདི་ན་བྱ་ཚང་མེད་པའི་བྱེའུ་ཕྲུག་ལྟར་ལུས་བའི་སྣང་བ་ཞིག་ཤར་དུས་
མིག་ཆུ་ཡང་ཡང་ཤོར་སོང་ལ།
ངའི་མིག་མདུན་ན་ཁྱོད་མེད་པའི་སྟོང་ཆ་དེ་ནི་ཅི་འདྲའི་ན་ཟུག་ཞིག་རེད་ཨང་།
ཨ་མ་ལགས། ང་ཕ་ཡུལ་ལ་ལོག་ཡོད།
ཉིན་མ་འདི་ཚོར་ཁྱིམ་འདི་ན་“ཨ་མའི་གཅེས་ཕྲུག”ཅེས་འབོད་མཁན་མེད་པས།
ང་རང་རི་མགོའི་དར་ལྕོག་ལྟར་རླུང་ནག་འཚུབ་ཀྱི་དཀྱིལ་ནས་དར་དར་ངང་ལྷག་ཡང་།
ཡ་ང་སྙིང་རྗེ་མེད་པའི་སྟོན་རླུང་བཙན་པོ་དེ་ཨ་རོ་ཙམ་ཡང་མི་ཟེར།
ད་དུང་། འབྲོག་མོའི་ལ་གཞས་དང། ནོར་ནག་གི་ངུར་སྒྲ། རྩྭ་ཐང་གི་མེ་ཏོག་ཡོད་ཚད།
མྱ་ངན་ཐང་གི་ངུ་འབོད་ལས་མ་འདས། སྟོང་ལྷང་ལྷང་། སྐྱོ་ལྷང་ལྷང་། འཇམ་ཐང་
ཐང་།
ཨ་མ་ལགས། ཁྱོད་འདི་ལྟར་འཆི་བ་ཟེར་བའི་གནས་ཤིག་ལ་འགྲོ་དགོས་པ་ནི་ཅི་འདྲའི་བཟོད་དཀའ་བའི་ཆོས་ཉིད་ཞིག་ལག་ཨང་།
ཨ་མ་ལགས། ང་ཕ་ཡུལ་ལ་ལོག་ཡོད། ཡུལ་འདི་ན་ཁྱོད་མེད་པས།
རྩྭ་ཐང་གི་རིག་གནས་འབོར་བཞིན་འདུག
ཀི་འབོད་དང་སྦྲ་ནག་གི་འཚོ་བ་སྟོང་བཞིན་འདུག
ཕ་ཡུལ་ཞེས་པའི་སེམས་པ་རྟེན་ས་དང་། སྤུན་ཟླ་ཟེར་བའི་ཚེ་རབས་གཅིག་གི་སྐྱིད་
སྡུག་གི་སེམས་གཏམ་བཤད་ས་ཇེ་ཉུང་ནས་ཇེ་ཞན་རེད།
གང་ལྟར་ཀྱང་། སྟོང་མདངས་ལ་གོམས་པའི་ང་ནི་ཁྱེད་ཉིད་མེད་པའི་འཇིག་རྟེན་ན་
མགོན་མེད་སྐྱབས་མེད་ཀྱི་རྣམ་ཤེས་ཁེར་འགྲོ་ཞིག་ལས་མ་འདས་ཡང་།
མ་བུའི་བརྩེ་མདངས་ཀྱི་ཆུ་བོ་ཡང་གཏན་དུ་བཞུར་ངེས་པས།
ང་ཕ་ཡུལ་ལ་ལོག་དོན་ཡང་ཁྱོད་ལ་སླང་ཡང་མཇལ་འཛོམས་ཡོང་བའི་རྣམ་དག་གི་སྨོན་ལམ་ཐེངས་ཤིག་བརྒྱབ་འདོད་བྱུང་།