འཇམ་གཅེས།
སྣ་མང་ལྟ་སྤྱོད་དགའ་བའི་དེང་རབས་ཀྱི་སྤྱི་ཚོགས།།
དུས་ཆེན་འདྲ་མིན་ཆུ་ཁའི་བྱེ་མ་ལས་མང་མོད།།
དེ་དག་ཀུན་ལ་དུང་བ་བདག་ཉིད་ལ་མེད་རུང་།།
མ་ལོའི་དུས་ཆེན་ཉིན་མོར་དྲན་གདུང་དེ་ལྕི་འདུག །
དམ་པའི་ལྷ་ཆོས་འཇིག་རྟེན་མི་ཆོས་ཀྱི་རིང་ལུགས།།
གང་ལ་གཞིགས་ཀྱང་དྲིན་ཅན་མ་ལོ་ཡི་དུས་བཟང་།།
བཅོས་མའི་ཕྱི་ཚུལ་རྣམ་འགྱུར་མཛེས་ཆོས་ཙམ་མིན་པར།།
མ་བཅོས་སྙིང་ནས་བསུས་ཤིག་རིགས་བཟང་གི་བོད་མི།།
མི་གཙང་གཅིན་སྐྱག་ཁ་ལག་གང་བདེ་དེ་སྤྱོད་ནས།།
གཙང་ཕྱགས་བགྱིས་པའི་བཀའ་དྲིན་གཅིག་པུ་ལ་བསམ་རུང་།།
ཕྱི་ཚུལ་མཛེས་མཛེས་ཙམ་གྱིས་མ་ལོ་ཡི་བཀའ་དྲིན།།
ཆོག་ཤེས་འཛིན་ན་སྤྱོད་ངན་ཡིན་པ་དེ་ཤེས་ཡོང་།།
ལོ་ན་བགྲེས་སོང་ཅན་གྱི་དྲིན་ཅན་གྱི་མ་ལོས།།
རྒན་གསོ་ཁང་དག་འཚང་ཀ་ཤིག་ཤིག་དེ་མཐོང་དུས།།
འགོག་མེད་མིག་ཆུས་ངོ་གདོང་བརླན་གཤེར་དང་ལྷན་དུ།།
དམར་ཆུང་སྙིང་གི་ན་ཟུག་གཞན་དག་ལས་ལྕི་འདུག །
ཕྱི་ལུགས་ལོ་གསར་ཕྱི་ལུགས་སྟོན་པ་ཡི་སྐྱེས་སྐར།།
སྐྱག་རྫུན་དགའ་གྲོགས་གདོན་འདྲེ་བ་གླང་གི་དུས་ཚིགས།།
ལམ་དང་ལུགས་སྲོལ་རྨོངས་ཞེན་ཡོད་དོ་ཀུན་དོར་ནས།།
རིན་ཆེན་མ་ལོའི་དུས་ཆེན་སེམས་དཀྱིལ་ནས་བསུས་མཛོད།།
མ་ཡུམ་དུས་བཟང་འདི་ཡི་དགེ་མཚན་དང་དགོས་པ།།
བྲིས་ཀྱང་རྫོགས་པའི་མཐའ་ཞིག་ཐུག་ཚོད་དེ་མེད་པས།།
རི་ཆུ་སྟོང་གིས་བཅད་པའི་ས་མཐའ་ཡི་བུ་ངས།།
མ་ལོར་མྱུར་མཇལ་རེ་སྨོན་མཆོག་གསུམ་ལ་རེ་ཡོད།།
༄༅།།དྲིན་མ་ལོའི་གཉོར་སྐྱོང་བྲིས་བ་འདི་ཡག་བྱུང་། །
དྲིན་མ་ལོའི་བཀའ་དྲིན་དྲན་པ་འདི་བཟང་གི །
དྲིན་མ་ལོ་ལོ་རྒས་ནུབ་ཁའི་ནི་ཉི་མ། །
དྲིན་མ་ལོ་དྲིན་འཇལ་དུས་ལ་ནི་བབ་འདུག །
ཨ་ཕའི་ཉིན་མེད་ཀྱང་། །
ཨ་མའི་ཉིན་མོ་འདུག་གོ །
ཕྲུ་གུ་དང་ནི་ས་གཞིའི། །
ཉིན་མོ་སྲུང་བརྩི་ཞུ་བགྱིད། །