གཙང་མེ་ལྕེ།
ཆར་ཞོད་དེའི་རྗེས་སུ། ལུང་མདོ་ནས་མུན་པ་དལ་གྱིས་ཐིབ་འོངས།
མུན་པ་དང་ནམ་མཁའ་གཅིག་ཏུ་འདྲིས་པས།
འཁྱམ་པོ་ཚོ། བྲེལ་སྟབས་ཀྱིས་སོ་སོའི་གླས་ཁང་དུ་ལོག
བདག་མེད་ཀྱི་ཁྱིའུ། སྲང་དབར་ནས་གྲང་འདར་རྒྱག་བཞིན་སུ་ལ་ཟུག་པར་བྱེད།
འཁྱམ་པའི་དུས་ལ། དྲན་པའི་གདུང་བ་སེམས་སུ་ན་བས།
སུ་ཡི་འབྲི་འདོད་ལངས་པའི་སྙན་ངག་སྨྱུག་རྩེར་ལུས།
སུ་ཡི་མགྲིན་པ། དབུགས་ཀྱིས་བརྣངས་ཤིང་འགག་དུས།
གདུང་བའི་སྨྱེ་ངག་སུ་ཡིས་ཚོར།
མཚན་མོའི་མཚམས་ལ། སུ་ཡི་སེམས་ངལ།
ཡི་གེའི་གདངས་སུ་ཇི་ལྟར་འཕོས་ཀྱང་།
རང་ངོ་འཕྲོད་ཅིང་རང་སེམས་རྟོགས་པའི།
ཡིད་ཀྱི་སྣང་བརྙན་འགུལ་ཐབས་མི་འདུག
མུན་པས་ནམ་མཁའ་ཁེབས་རྗེས།
སུ་ཡི་གྲིབ་གཟུགས་འཛད་ཅིང་ཡལ།
སུ་ཡི་རང་ས་སྨག་གིས་གཡོགས་པ།
སུ་ཡིས་ཁྱེད་ལ་བདེན་དཔང་གནང་ཨང་།
12/07/2019 ཉིན།