བོང་སྟག་རི་ལུ། མཚོ་ནུབ།
ད་ལོའི་རྒྱལ་བཙུགས་དུས་ཆེན་ཀྱི་གནང་བ་ཕྱིན་རྗེས། ང་རང་ཉིན་གང་བོར་ཁྱིམ་དུ་འཛུལ་ནས་དཔེ་ཆ་སྣ་ཚོགས་ཤིག་ལ་བལྟ་ཀློག་བྱས་ནས་བསྡད་པ་ཡིན། ཡིན་ནའང༌། མི་སེམས་བློང་བློང་བོར་གཏོང་བའི་གསར་འགྱུར་ཞིག་གཅིག་རྗེས་གཉིས་མཐུད་ངང་སྒྲོག་ཡོང་བ་ནི་བསྟུད་མར་ཉིན་གསུམ་གྱི་རིང་ལ་འགྲིམ་འགྲུལ་དོན་རྐྱེན་བྱུང་ནས་མི་བཅུ་ཁ་ཞིག་གི་རང་སྲོག་ཤོར་བ་དེ་ཡིན། དེ་ཡང་ཏག་ཏག་མེ་རིའི་རྡོ་སོལ་སྔོག་འདོན་བྱེད་པའི་རླངས་འཁོར་དེ་དག་གིས་བཟོས་པའི་ཆག་སྒོ་རྐྱང་རྐྱང་རེད།
དེ་བས། ང་རང་ཡང་ཁྱིམ་ནས་སྡོད་མི་ཚུགས་པའི་ན་ཟུག་ཅིག་གིས་སྒོའི་ཕྱི་རུ་སོང་ནས་གསར་འགྱུར་སྣ་ཚོགས་ཤིག་ཨེ་ཐོས་ཡང་ཡང་བལྟས་པ་ཡིན་ལ། ཁ་བྱང་ལ༼མེ་རིའི་རྡོ་སོལ་ཐོན་ཁུགས་དང་ཡུལ་མི་ཚོའི་སྐྲག་འཇིགས༽ཅེས་པའི་གསར་འགྱུར་མ་ཡིན་ལ་སྙན་ཞུ་རྩོམ་ཡིག་ཅིག་ཀྱང་མ་ཡིན་པ་ཞིག་འབྲི་འདོད་སྐྱེས། དེས་ན། ངས་རྒྱ་ཆེའི་ཀློག་མཁན་ཚོས་ཤེས་རྟོགས་བྱུང་མེད་པའི་མེ་རིའི་རྡོ་སོལ་ཐོན་ཁུགས་མི་གླེང་ཀ་མེད་དུ་གྱུར། མེ་རིའི་རྡོ་སོལ་ཐོན་ཁུངས་ནི་རྫོང་དང་སྤྱི་ལེ་ ༡༠༠ ཙམ་ཡོད་པའི་ས་ཁུལ་ཞིག་ཏུ་ཡོད་ཅིང༌། རྡོ་སོལ་གྱི་ཐོན་ཁུངས་ཧ་ཅང་ཆེན་པོ་ཡིན་ལ། དེ་ནི་རང་ཞིང་གི་ཆེས་ཆེ་བའི་རྡོ་སོལ་ཐོན་ཁུངས་ཤིག་ཀྱང་ཡིན། ལོ་ངོ་མང་པོ་ཞིག་གི་ཡར་སྔོན་ནས་བཟུང༌། རྒྱལ་གཉེར་ཁེ་ལས་ཁ་ཤས་ཤིག་གིས་སྔོག་འདོན་བྱེད་བཞིན་ཡོད་ནའང༌། སྐབས་དེར། ས་ཆ་མཐའ་འཁོབ་ཡིན་པ་དང་འགྲིམ་འགྲུལ་སྟབས་བདེ་མིན་པ་སོགས་ཀྱི་དབང་གིས་འདྲུ་སྐྱེལ་བྱེད་པའང་ཆད་མ་མཐུད་ཞིག་ཏུ་གྱུར་ཡོད། ཡིན་ནའང༌། ཉེ་བའི་ལོ་ཤས་ཀྱི་སྔོན་ནས་བཟུང༌། མེ་རིའི་རྡོ་སོལ་ཐོན་ཁུངས་དེ་སྦྱིན་བདག་ཆེན་མོ་ཞིག་གིས་བདག་འཛིན་བྱས་པ་ནས་ཐོག་མར་དེ་ལ་རྒྱལ་ཁབ་རིམ་པ་གཉིས་པའི་སྤྱི་སྤྱོད་གཞུང་ལམ་ལས་པ་དང༌། ཐོན་ཁུངས་ཀྱི་ཟུར་ཁ་གཞན་ཞིག་ནས་ཀྱང་མེ་འཁོར་གྱི་ལྕགས་ལམ་ལས་ནས་ཕལ་ཆེར་འགྲུབ་ཡོད་ཚོད་འདུག་པ་དེས་མི་རིའི་རྡོ་སོལ་ཐོན་ཁུངས་དེ་མི་ཡུལ་གྱི་གནས་འགྲོ་མ་ལྟ་བུ་ཞིག་ཏུ་བཏང་ཚར་འདུག དེ་ལའང་ཡུལ་མི་ཚོའི་ཁ་ནས་ཐོས་པ་ལྟར་ན། མེ་རི་རྡོ་སོལ་ཐོན་ཁུངས་དེར་ཉིན་རེར་རླངས་འཁོར་ཆིག་སྟོང་ལྷག་གིས་དྲུད་ནས་ཕལ་ཆེར་ལོ་ངོ་ཁ་ཤས་འགོར་ཡང་ད་དུང་ཐོན་ཁུངས་ཀྱི་ཆ་ཤས་ཙམ་ཡང་དྲུད་ཚར་མེད་ཟེར། སྐད་ཆ་འདི་ལས་ཕྱོགས་གཅིག་ནས་ང་ཚོའི་ཕ་ཡུལ་གྱི་ཐོན་ཁུངས་དེ་ག་འདྲ་ཞིག་ཡིན་པ་རྟོགས་ཐུབ་ལ། ཕྱོགས་གཞན་ཞིག་ནས་ཡུལ་མི་ཚོའི་ལག་པ་གནམ་ལ་སྲུང་བའི་བཟོ་ལྟ་དང་རང་ལ་སྒལ་ཚིགས་མེད་པའི་ངང་ཚུལ་མཐོང་ཡོང༌།
ས་རྒྱལ་ཁབ་ཀྱིས་ཡིན་ལ། གཏེར་རྒྱལ་ཁབ་ལ་དབང་བའི་བཅའ་ཁྲིམས་ཀྱི་མདུན་ནས་ང་ཚོས་ད་དུང་ངའི་ཕ་ས་གསེར་གྱི་མཐུ་འདྲད་འདྲ། མ་ས་མ་མོ་བྲང་འདྲ་འདྲ་ཞེས་པ་དེ་ཇི་འདྲའི་དགོད་བྲོ་བའི་ཚིག་ཅིག་རེད་ཨང༌།
ད་དུང་དེ་ལས་ཀྱང་འཇིགས་སུ་རུང་བ་ནི། གཡག་སྨྱོན་ལྡང་ལ་རྒྱུགས་པ་ལྟ་བུའི་རླངས་འཁོར་དེ་དག་དང་སྤུས་ཚད་མེད་པའི་ཁ་ལོ་བ་དག་གིས་བཟོས་པའི་ཆག་འཇིག་དང་ཡུལ་མི་ཚོའི་སྐྲག་འཇིག་ཁོ་ན་རེད། ཐེངས་ཤིག་ལ། ང་རང་ཡུལ་དུ་སོང་བ་ཡིན་ལ། ཇ་འཐུང་ཞོར་དང་ཤ་ཟ་ཞོར་དུ་རླངས་འཁོར་དེ་དག་གིས་ང་ཚོ་ལ་ཐུབ་ཚོད་ཚད་མེད་བྱེད་བཞིན་པ་བརྗོད་བཞིན་པའི་སྒང་ལ་ཏག་ཏག་ང་ཚོས་མིག་གིས་མཐོང་བའི་གཞུང་ལམ་དེའི་སྟེང་ནས་རླངས་འཁོར་ཞིག་གིས་དུང་སྒྲ་སྒྲོག་བཞིན་སྦག་སྦག་འཁོར་ལོ་ཞོན་པའི་འབྲོག་པ་ཞིག་བསམ་གཟས་ཏེ་ལམ་གྱི་གཡོན་ཕྱོགས་སུ་གཡུགས་བྱུང༌། དེ་དང་དེ་ལྟ་བུའི་བཟོ་ལྟ་འགའ་རེ་མཐོང་བ་ན་ངའི་ཕ་ཡུལ་གྱི་ཡུལ་མི་ཚོ་ནམ་རྒྱུན་རང་ཡུལ་ནས་རྫོང་ཐོག་ཏུ་འགྲོ་བའི་ལམ་དུ་ཡང་སེམས་ཁུར་ཚད་མེད་མྱོང་དགོས་པ་མཐོང་བྱུང༌།
རྩོམ་འབྲི་བ་བོང་སྟག་རི་ལུ་ལགས། ད་ལོའི་གསུམ་བཅུའི་དུས་དྲན་རྗེས་ནས་བཟུང་ངས་དྲ་རྒྱ་དང་དུས་དེབ་ཁག་ཅིག་ཏུ་ཁྱེད་ཀྱི་རྩོམ་ཡིག་མང་དག་ཅིག་མཐོང་ཞིང་། དེ་དག་ཕལ་ཆེ་བ་ན་ཟུག་གི་དབང་གིས་བྲིས་པ་ཤ་སྟག་ཡིན་སྟབས། ཧ་ཅང་གུས་བཀུར་བྱེད་ཀྱིན་ཡོད་མོད། ཁྱེད་ནི་གཞིས་བཞུགས་སྤུན་ཟླ་ཞིག་ཡིན་སྟབས་རང་ཉིད་ཀྱི་བདེ་འཇགས་ལ་སྲུང་སྐྱོབ་བྱ་རྒྱུ་རེ་བ་ཡིན།