བསྒྱུར་འབྲི་མཁན་ཀླུ་འབུམ།
ཨ་མི་རི་ཀའི་རྗེས་དྲན་གྱི་ཉིན་མོ་ནི་ལོ་ལྟར་རྒྱལ་ཡོངས་སུ་སྲུང་བརྩི་བྱེད་བཞིན་པའི་ཉིན་མོ་གལ་ཆེན་ཞིག་ཡིན་པ་དང་། ང་ཡང་ཉིན་དེར་གུང་སེང་ཡིན་པས་གྲོགས་པོ་ཞིག་དང་མཉམ་སྤྲོ་འཆམ་དང་། ཉིན་མོ་དེར་རྒྱུས་ལོན་རོབ་ཙམ་བྱས་བ་ཡིན། དེ་ནི་ཨ་མི་རི་ཀའི་དམག་འཐབ་ཀྱི་ལོ་རྒྱུས་ཁྲོད་ས་མཚོ་གནམ་གསུམ་གྱི་དམག་མི་ཁྲི་ཕྲག་མང་པོས་སོ་སོའི་རྒྱལ་ཁབ་དང་། ཡང་ན་དྲག་གནོན་འོག་ཡོད་པའི་ཕྱིའི་རྒྱལ་ཁབ་གཞན་ཚོའི་རང་དབང་ཆེད་རང་སྲོག་བློས་གཏོང་གིས་དམག་འཐབ་བྱས་པའི་དཔའ་བོ་དཔའ་མོ་ཚོའི་བཀའ་དྲིན་རྗེས་དྲན་ཆེད་སྲུང་བརྩི་བྱེད་སྲོལ་དར་བ་རེད།
དེ་སྔ་དུས་རབས་༡༧པའི་མཇུག་དང་། ༡༨པའི་འགོར། ཨ་མི་རི་ཀའི་ནང་གི་མངའ་སྡེ་ཁག་གི་བར་དང་། ལྷག་པར་ཤར་ནུབ་བར་མི་རིགས་དཀར་ནག་གི་རིགས་ཞེན་དམག་འཁྲུག་བྱུང་བ་དང་། རྗེས་སུ་དམག་འཁྲུག་ཅུང་ཞི་འཇགས་བྱུང་བཞིན་པའི་སྤྱི་ལོ་༡༨༦༦ཟླ་༤ཚེས༢༩ཉིན་སྐབས་དེའི་དམག་སྤྱི་ཇོན་ལོ་ཀེན་ཞེས་བས་དམག་མི་འདས་བོ་ཚོའི་སྐུ་ཕུང་ཞུགས་འབུལ་ཞུ་ཡུལ་དུ་མྱ་ངན་གུས་འདུད་ཞུ་རྒྱུའི་གསལ་བསྒྲགས་གནང་བ་ནས་རྗེས་དྲན་ཉིན་མོ་འདི་ཐོག་མར་དར་སྲོལ་བྱུང་བ་དང་། སྐབས་དེར་དྲན་དགོས་པའི་ཉིན་མོ་ཞེས་དུར་ཁྲོད་ལ་ཡོད་པའི་སྐུ་ཕུང་ལ་མེ་ཏོག་གི་མཛེས་རྒྱན་སྤྲས་ནས་མྱ་ངན་གུས་འདུད་བྱེད་བཞིན་པ་རེད།
རྗེས་སུ་སྤྱི་ལོ་༡༨༨༢ལོར་གཞི་ནས་རྗེས་དྲན་གྱི་ཉིན་མོའམ་memorial dayཞེས་མིང་བསྒྱུར་གནང་བ་དང་། འཛམ་གླིང་དམག་ཆེན་གཉིས་བའི་རྗེས་སུ་ཨ་མི་རི་ཀ་ཁྱོན་ཡོངས་སུ་རྗེས་དྲན་ཉིན་མོ་རིམ་པས་དར་ཁྱབ་བྱུང་འདུག་ལ་སྤྱི་ལོ་༡༩༦༧ལོ་ནས་ཨ་མི་རི་ཀ་དབུས་གཞུང་གིས་ཉིན་མོ་དེ་བཞིན་གཞུང་འབྲེལ་གྱིས་གུང་སེང་གཏན་འབེབས་བྱས་འདུག རིམ་པས་སྤྱི་ལོ་༡༩༦༨ལོར་ཨ་མི་རི་ཀའི་གྲོས་ཚོགས་ཀྱིས་གཞུང་འབྲེལ་གྱི་རྗེས་དྲན་ཉིན་མོའི་དུས་ཚོད་དེ་ཡང་ལོ་རེའི་སྤྱི་ཟླ་༥བའི་བདུན་ཕྲག་བཞི་བའི་རེས་གཟའ་ཟླ་བར་ཡོངས་ཁྱབ་གནང་འདུག
རྗེས་དྲན་ཉིན་མོར་ས་ཁུལ་སོ་སོའི་དམག་མི་འདས་བོ་ཚོའི་དུར་ཁྲོད་ལ་མེ་ཏོག་གི་མཛེས་རྒྱན་སྤྲས་ནས་གུས་འདུད་བྱེད་བ་དང་། དམག་ཞབས་ཟུར་བ་ཚོས་རུ་སྒྲིག་རྔམ་སྟོན་བྱེད་པ་སོགས་རྒྱལ་ཡོངས་སུ་བྱེད་སྒོ་འདྲ་མིན་སྤེལ་སྲོལ་ཡོད་ལ། ཤུགས་ཆེ་ཤོས་ཨ་མི་རི་ཀའི་རྒྱལ་ས་ཝ་ཤིན་ཀྲོན་ལ་རྒྱལ་ཡོངས་ཀྱི་དམག་ཞབས་ཟུར་བ་ཚོས་འཕྲུལ་རྟ་སྦག་སྦག་འཁོར་ལོ་ནམ་རྒྱུན་མཐོང་དཀོན་པ་མང་པོ་བཞོན་ནས་རུ་བསྒྲིགས་ཀྱི་རྔམ་སྟོན་བྱེད་བཞིན་པ་ནི་ལྟད་མོ་ཆེ་ལ་མི་མང་གིས་དགའ་མོས་གནང་ཡུལ་ཞིག་ཡིན་པ་རེད།