ཨ་རི་ _ ལྷ་ཡིས་དབང་བསྒྱུར་བའི་རྒྱལ་ཁབ།

ཨ་རིའི་བོད་པས་
ཨ་མེ་རི་ཀའི་རྒྱལ་ཁབ་འདི་ལྷ་ཡིས་དབང་བསྒྱུར་བའི་ཆོས་སྲིད་ཟུང་འབྲེལ་གྱི་རྒྱལ་ཁབ་ཅིག་རེད་ལབ་ན་མི་མང་པོ་ཞིག་ཡིད་ཆེས་དཀའ་བགྱི་རེད། སྤྱིར་ཆོས་སྲིད་ཟུང་འབྲེལ་ལབ་དུས་བོད་པ་མང་ཆེ་བའི་སེམས་ངོར་དམར་ཕྱོགས་ཀྱི་རྒད་པོ་ཨེན་ཀེ་སིས་རྒྱལ་པོ་དང་ཆོས་བདག་གཉིས་ཀ་མི་གཅིག་གིས་བྱས་པ་ཆོས་སྲིད་ཟུང་འབྲེལ་གྱི་གོ་དོན་ལ་བཤད་པ་དམར་པོའི་ཐུགས་སྲས་དུང་དཀར་གྱིས་བོད་ལ་ངོ་སྤྲོད་བྱས་པ་དེ་ལས་གཞན་སེམས་ལ་འཆར་རྒྱུའི་ཅང་ཡོད་རྒྱུ་མ་རེད།
ཁོ་བོ་བོད་དུ་ཡོད་དུས་ཆོས་ལ་དད་པ་བྱེད་པ་ནི་རྗེས་ལུས་དང་ཆོས་སྲིད་ཟུང་འབྲེལ་ནི་ཆེས་མུན་ནག་གི་ལམ་ལུགས་ཞིག་ཡིན་པ་རེད། ཟེར།
ངེད་དབྱིན་ཇིའི་རྒྱལ་ས་ལོན་ཀྲོན་ལ་ཐོན་པའི་ཉིན་ཤས་རྗེས་འཇིགས་སྐུལ་པས་ཨ་རིའི་ཐོག་ཁང་མཚེ་མ་ལ་གཏོར་རྒོལ་ཐེབས་པའི་ཤི་གསོན་ཚོའི་ཆེད་དུ་ཨ་རིའི་སྲིད་འཛིན་བྷོའུ་ཞི་དང་སྲིད་འཛིན་ཟུར་བ་ཁུ་ལོན་ཀྲོན།རྒྱལ་ཚོགས་ཀྱི་དྲུང་ཡིག་ཆེན་མོ་སོགས་ཀྱིས་ཡི་ཤུའི་ལྷ་ཁང་ཆེན་པོ་ཞིག་གི་ནང་ན་ཆོས་དཔེ་རེ་ལག་ལ་བཟུང་ནས་གསོལ་བ་སྨོན་ལམ་འདེབས་བཞིན་པ་བརྙན་འཕྲ ིན་བརྒྱུད་དེ་མཐོང་སོང་།ཆབ་སྲིད་པ་གྲགས་ཆེན་ཚོས་ཆོས་བཏོན་པ་དེ་ནི། ཆོས་ལུགས་ཚན་རིག་དང་དཔལ་འབྱོར་ཡར་རྒྱས་ཀྱི་བཀག་རྡོ་རུ་སྨྲ་བའི་དམར་པོས་དབང་བསྒྱུར་བའི་ཁོར་ཡུག་ཅིག་གི་ནང་སྐྱེས་བ་བདག་ལ་མཚོན་ན་དེ་ནི་ཧ་མི་གོ་བའི་གནས་ཚུལ་ཁྱད་མཚར་ཞིག་རེད། དེ་ནས་ཉི་མ་འགའི་གཞུག་ནས་ང་ཨ་རི་ལ་འབྱོར།
ཨ་རིའི་བཀའ་དྲིན་རྗེས་དྲིན་(thanksgiving)ཟེར་བའི་ཉིན་ང་ཚོའི་གོ་ལ་འདིའི་ཕྱི་རོལ་ན་ཡོད་པའི་རྒྱལ་སྤྱིའི་མཁའ་དབྱིངས་འབབ་ཚིགས་ན་ཚན་རིག་པ་གཉིས་ཀྱིས་དཀོན་མཆོག་ལ་ཟས་མཆོད་འབུལ་གྱིན་ཡོད་པ་འཁོར་སྐར་བརྙན་འཕྲིན་ལས་སྟོན་གྱིན་ཡོད་པ་དེས་ངའི་མགོ་ཡང་བསྐྱར་རྨོངས་སུ་བཅུགས་སོང་།ཚན་རིག་པ་ཟས་མཆོད་འབུལ་མཁན་ཞིག་ཡོད་པ་སེམས་ལ་དྲན་མ་མྱོང་། ཨ་རིའི་གྲོང་དང་གྲོང་ཁྱེར་ཁག་གི་སྲང་ལམ་བཅུ་ཕྲག་རེ་མཚམས་ན་ཡི་ཤུ་ལྷ་ཁང་རེ་ཡོད་པའི་ཚོར་སྣང་སྐྱེས་ཐལ། ལོར་དེར་མི་ཉིས་ཁྲི་ལྷག་གིས་ཧ་ལོ་བིན་ཟེར་བའི་འདྲེ་ཡི་དུས་ཆེན་བརྩི་སྲུང་བྱས་སོང་། བྱིན་རླབས་ཀྱི་ཟླ་བ་ཞེས་འབོད་པའི་ཟླ་བ་བཅུ་གཉིས་པའི་ནང་ཆ་ཚང་ལ་གྲ་སྒྲིག་བྱས་ནས་མིང་གྲགས་ཅན་གྱི་སྟོན་པ་ཡི་ཤུའི་འཁྲུངས་སྐུར་ལ་ཨ་རིའི་གཞུང་དམངས་གཉིས་ཀས་རྟེན་འབྲེལ་ཞུ་བ་ནི་རྒྱུན་ལྡན་ལྟར་ཡིན་ཟེར། ཉིན་ཞིག་ཁོ་བོ་བསྡོད་ས་ནས་ཁད་རིང་བའི་སྐད་གྲགས་ཅན་གྱི་ནེའུ་ཡོག་གྲུང་ཁྱེར་དང་དེའི་ལྟེ་བར་ཡོད་པའི་ཁྲམ་སི་ཁར་ཟེར་བའི་ཁྲོམ་སྲང་་(Times Square)་ལ་བལྟ་སྐོར་དུ་འགྲོ་རྒྱུའི་གོ་སྐབས་བྱུང་།
སྲང་ལམ་དེའི་དཀྱིལ་ན་རྡོ་རིང་ཞིག་གི་ངོས་སུ་ཡིག་ཆེན་གྱིས་་ཚེ་སྲོག་ནི་ལྷ་དཀོན་མཆོག་དང་མི་མང་ལ་ཞབས་འདེགས་ཞུ་ཆེད་ཡིན།་་ཞེས་བྲིས་འདུག།
ཁོ་བོའི་རྣ་ལམ་ལ་རིག་གསར་གྱི་སྐད་ཆ་ཞིག་ལ་་་ལྷ་འདྲེ་གདོན་བགེགས་གཏོར་དགོས་ཟེར་བ་ད་དུང་ཡང་ངའི་སེམས་ལ་འཇགས་འདུག་པ་འདེའི་ལྡོག་ཕྱོགས་ཡིན་པས་ཐེ་ཚོམ་གྱི་ཐོག་ལ་ཐེ་ཚོམ་ཞིག་སྐྱེས།
དེ་མིན་དགོད་བྲོ་བ་ཞིག་ཡོད་པ་ནི་ཨ་རིའི་བརྙན་འཕྲིན་བརྒྱུད་ལམ་ཞིག་ན་གཟའ་སྤེན་པ་དང་ཉི་མ་གང་རུང་ལ་ཉིན་གང་བོར་བུད་མེད་ཅིག་གིས་མོ་འདེབས་ཀིན་འདུག
མི་མང་པོས་འཚང་ཁ་ཤིག་ཤིག་གིས་མོ་བ་ལ་ཁ་པར་བཏང་ནས་རང་གི་རེ་འདོད་བཤད་ཀིན་འདུག འགལ་འདུ་དེ་དག་གི་ཕྱིར་ངས་ཡི་ཤུའི་ཆོས་དང་ཨ་རིའི་བར་གྱི་འབྲེལ་བར་དོ་སྣང་བྱས་པ་ཡིན།
༡༦༠༩་ལོར་དབྱིན་ཇི་རྒྱལ་ཁབ་ཀྱི་ཡི་ཤུ་ཆོས་ཁང་ཞིག་གི་ཆོས་པ་རྣམས་ནང་མ་མཐུན་པར་ཆོས་པ་བརྒྱ་སྐོར་ཙམ་ཞིག་ཆོས་དད་རང་དབང་ཆེད་ཧོ་ལན་རྒྱལ་ཁབ་ལ་བཙན་བྱོལ་དུ་སོང་། ས་ཁུལ་དེར་ཁོ་ཚོའི་བུ་རབས་ཚ་རྒྱུད་ཀྱི་རིང་ལ་ཆོས་དང་རིགས་གཞུང་སྲུང་སྐྱོབས་བྱེད་མི་ཐུབ་པར་དོགས་ནས་རྒྱ་མཚོའི་ངོགས་སུ་ཉིན་༦༦་ལ་གྲུ་གཟིངས་ཐོག་གྲང་ལྟོགས་དང་འཇིགས་སྣང་ངང་བསྐྱོད་མཐར་བྱང་ཨ་རིའི་ས་ཐོག་ལ་༡༦༢༠་ལོར་ཐོན། ཨ་རིའི་གདོད་མའི་མི་(ཨིན་ཌི་ཡན)རིགས་ཚོས་ཁོ་ཚོའི་ལྟོགས་སྐོམ་བསད་དེ་སྣེ་ལེན་བྱས།
༡༦༢༠་ལོའི་ཟླ་༡༡་པའི་༢༡་ཉིན་ཁོ་ཚོས་སྒྲིག་གཞི་བཟོས་ནས་ཆོས་དཔོན་ཇོན་ཁ་བེར་ཁོ་ཚོའི་ཚོགས་སྡེ་དེའི་ཆོས་སྲིད་གཉིས་ཀྱི་དབུ་ཁྲིད་ལ་བདམས།
ཚོགས་སྡེ་དེ་ནི་དེང་སང་གི་སྟོབས་ཆེན་ཨ་མེ་རི་ཀ་མངའ་ཁུལ་གཅིག་འདུས་རྒྱལ་ཁབ་འདིའི་ཐོག་མའི་ས་བོན་ལྟ་བུ་ཡིན་པར་མ་ཟད། ཨ་རིའི་ཆོས་སྲིད་ཟུང་འབྲེལ་གྱི་མགོ་ཡང་འདི་ནས་ཚུགས་པར་སྙམ། དེ་ནས་རིམ་བཞིན་བྱང་ཨ་རིའི་ནང་ལ་ཕྱོགས་ཡོང་གི་གཞིས་་ཆགས་ཇེ་མང་དུ་སོང་ཡོད་ལ། དེ་དག་ཕལ་ཆེ་བ་རང་རང་གི་དད་མོས་བྱེད་སའི་ཡི་ཤུ་ཆོས་ཁང་གི་བཀོད་ཁྱབ་འོག་གནས་ཡོད་ཅེས་གཤད་ན་ཆོག ཡུན་རིང་པོ་ཞིག་ལ་ཁོ་ཚོའི་གཞུང་གི་ཁྲིམས་གཞི་ཡོད་ཚད་སྟོན་པ་ཡི་ཤུའི་ལུང་ཚིག་ཁོ་ནར་བརྟེན་ནས་ཐག་གཅོད་བྱས་འདུག ཐོག་མའི་ལྡོམ་བུ་པའི་ཚོགས་སྡེ་དེ་ནས་དུས་ད་ལྟའི་བར་ཁོ་ཚོ་དཀོན་མཆོག་ལ་ངོ་ལོག་མྱོང་མི་འདུག་ལ། བཤད་ལྟངས་གཞན་ཞིག་བྱས་ན་དུས་ད་ལྟའི་བར་ཁོ་ཚོས་རིག་གནས་གསར་བརྗེ་བྱས་མི་འདུག ཆོས་ལུགས་དད་མོས་རང་དབང་ནི་རང་དབང་ཐམས་ཅད་ཀྱི་དང་པོ་བཞག་ཡོད། དཀོན་མཆོག་ནི་ཁོ་ཚོས་ཚན་རིག་དང་དཔལ་འབྱོར་སོགས་གང་ཞིག་སྒྲུབ་ཀྱང་དེ་སྒྲུབ་བྱེད་ཀྱི་རྣམ་ཤེས་ལྟ་བུ་རེད།
༡༧༧༦་ལོར་ཨ་རི་དབྱིན་ཇིའི་འོག་ནས་རང་བཙན་ཐོབ་སྟེ་འཛམ་གླིང་གི་དེང་རབས་ཀྱི་ཆེས་ཐོག་མའི་མང་གཙོའི་རྒྱལ་ཁབ་ལ་གྱུར། ༡༨༠༢་ལོར་ཨ་རིའི་སྲིད་འཛིན་ཇེ་ཧྥིར་སིན་གྱིས་ཆོས་སྲིད་ཁ་ཁར་དབྱེ་དགོས་པའི་ཡི་གེ་ཞིག་ལ་བརྟེན་ནས་དུས་རབས་ཉི་ཤུ་བའི་ནང་ཕྱིའི་ཚུལ་དུ་ཆོས་སྲིད་ཁ་ཁ་ཡིན་པར་བསྒྲགས་ཡོད། ཆོས་སྲིད་དབྱེ་ལྟངས་དཀོན་མཆོག་གི་བཀའ་སྲིད་ཁྲིམས་སུ་བསྒྲགས་པ་དང་། སྲིད་གཞུང་གིས་ཆོས་དོན་ལ་འགྲོ་སོང་གཏོང་བ།ཆོས་ཀྱི་མཚོན་རྟགས་སྲིད་རྟགས་ལ་འཇོགས་པ། ཆོས་ཁང་ཁག་གི་ཆེད་གཞུང་འབྲེལ་གྱིས་ཁྲལ་བསྡུ་བ་སོགས་མེད་པར་བྱས་ཏེ་ཆོས་སྲིད་ཟུང་འབྲེལ་ཁ་ཁར་ཕྱེ་བ་(separation of church and state)་ཡིན་ཟེར་གྱིན་ཡོད་མོད། དོན་དུ་ཨ་རི་ནི་ད་ལྟའི་བར་ལྷ་ཡིས་དབང་བསྒྱུར་བའི་ཆོས་སྲིད་ཟུང་འབྲེལ་གྱི་རྒྱལ་ཁབ་ཅིག་ཡིན། དེ་ལ་རྒྱུ་མཚན་དང་དཔུང་རྟགས་མང་པོ་ཡོད།
གྲོས་འཚོགས་ནང་གི་ཆོས་དཔོན་དང་དད་ལྡན་མི་མང་།
༡༧༨༩ལོ་ནས་བཟུང་ཨ་རིའི་གྲོས་ཚོགས་གོང་འོག་གཉིས་ལ་ཡི་ཤུ་ཆོས་དཔོན་རེ་རེ་བསྐོ་རྒྱུ་གཏན་ཁེལ་བྱས། ཆོས་དཔོན་གཉིས་ཀྱིས་འཐུས་མིའི་བཟའ་སྒྲིག་དང་དུར་འཇུག་གི་ཆོ་ག་སྒྲུབ་པ་དང་གྲོས་ཚོགས་ཁང་་གི་གལ་ཆེ་བའི་འཚོགས་འདུའི་རིགས་འཚོགས་སྐབས་འཚོགས་འདུའི་མགོ་མཇུག་ནས་ལྷ་དཀོན་མཆོག་གི་བཀའ་བསྒྲོགས་ནས་སྐྱབས་འཇུག་ཞུ་བ་སོགས་ཀྱི་ལས་དཀའ་གནང་དགོས་པ་རེད།
ཨ་རི་བའི་བྱམས་དང་སྙིང་རྗེ།་དྲངས་ལྡན་དང་ཤེས་རབ།ལྷག་པར་སྤྱིན་གཏོང་གི་བློ་སྟོབས་དང་ཡ་རབ་ཀྱི་ཀུན་སྤྱོད་སོགས་གཤིས་རྒྱུད་ལ་འཇགས་པ་ནི་ཨ་རིའི་ཡི་ཤུ་ལྷ་ཁང་འབུམ་བཞི་དང་ཁྲི་ལྔ་ལྷག་ཡོད་པའི་ནང་རེས་གཟའ་ཉི་མའི་ཉིན་རྟག་པར་དགེ་སྦྱོར་བྱེད་པ་ལས་བྱུང་བར་བཤད། མཐའ་ན་ལྷ་ཁང་རེ་རེ་ནང་གི་ཆོས་དཔོན་དང་ཚོགས་མིའི་ལུས་ངག་ཡིད་གསུམ་གྱི་བྱ་སྤྱོད་ཀྱི་ཁོར་ཡུག་ལས་མི་གཤིས་ལ་ཁྱད་པར་བྱུང་གི་ཡོད་ཟེར།
སྤྱིར་མང་གཙོ་ཚད་ལྡན་གྱི་རྒྱལ་ཁབ་ཅིག་ཡིན་ཚེ་མི་མང་གི་བསམ་ཚུལ་གཞི་ལ་བཞག་ནས་སྲིད་ཁྲིམས་ལག་ལེན་བྱེད་དགོས་པས་ཡི་ཤུའི་ཆོས་ལུགས་པའི་བརྒྱ་ཆའི་བརྒྱད་ཅུ་གྱ་གཉིས་ཟིན་པའི་རྒྱལ་ཁབ་འདིའི་སྲིད་དོན་ནང་ཡི་ཤུ་ཆོས་ཀྱི་ཤུགས་རྐྱེན་ཇི་འདྲ་ཞིག་ཡོད་པ་ནི་བཤད་མ་དགོས་པ་ཞིག་རེད། དཔེར་ན། མི་སྐྱེས་བ་དང་བུད་མེད་བཟའ་ཚང་སྒྲིག་པ་ལས་མཚན་མཐུན་བཟའ་སྒྲིག་སྟེ་ཕོ་དང་ཕོ། མོ་དང་མོ་ལ་བཟའ་ཚང་སྒྲིག་པ་ལྷ་དཀོན་མཆོག་གིས་གནང་མེད་ཟེར་བའི་འདུ་ཤེས་ཀྱིས་མཚན་མཐུན་བཟའ་སྒྲིག་རྒྱལ་ཡོངས་རང་བཞིན་གྱི་ཁྲིམས་མཐུན་བྱུང་ཐུབ་མེད་པར་མ་ཟད། བུ་ཕྲུག་ཁོག་ནས་འདེད་(དཀོན་མཆོག་གིས་སྡིག་པ་ཡོད་ཟེར)པ་ཡང་ཁྲིམས་མཐུན་ཆགས་མེད།
སྒོར་མོའི་ཐོག་གི་དཀོན་མཆོག་དང་རྒྱལ་དར་མདུན་གྱི་དཀོན་མཆོག
སྤྱི་ལོ་༡༨༦༡་ནས་༡༨༦༥་བར་ལོ་བཞི་ཙམ་གྱི་རིང་ཨ་རིའི་ལྷོ་བྱང་གཉིས་ཀྱིས་ཚབ་ཆེ་ཞིང་ཡ་ང་བའི་ནང་འཁྲུག་བརྒྱབས་པའི་ཁྲོད་ཨ་རིའི་མི་གྲངས་ས་ཡ་སོ་གཅིག་ལྷག་(༣༡༤༤༣༣༢༡)་ཡོད་པའི་ནང་གི་འབུམ་དྲུག་དང་ཁྲི་གཉིས་(༦༢༠༠༠༠)ལྷག་གི་ཚེ་སྲོག་ཤོར་འདུག སྤྱི་ལོ་༡༨༦༤ ལོར་ནང་འཁྲུག་ཆེན་པོ་དེ་ནང་འགྲིག་ཡོང་ཆེད་ཆོས་དཔོན་ཞིག་གིས་རེ་མདུན་ལྟར་ཨ་རིའི་གཞུང་གིས་སྐར་(སྐར་བརྒྱ་ལ་ཨ་སྒོར་གཅིག་ཡིན)གཉིས་ཅན་གྱི་ཐོག་ལ་་ང་ཚོ་དཀོན་མཆོག་ལ་ཡིད་ཆེས་ཡོད་(IN GOD WE TRUST)་ཞེས་པ་འགོད་པར་གྲོས་ཐག་བཅད།
༡༩༣༥ལོར་ཨ་རིའི་སྲིད་འཛིན་ཧྥི་རིན་ཁི་ལེན་རོ་ཟི་བེལ་གྱི་སྐབས་ཤོག་སྒོར་གཅིག་ཅན་གྱི་རྒྱབ་ངོས་སུ་ཨ་རིའི་ལོ་རྒྱུས་ཀྱི་དོན་སྙིང་ལྡན་ཞིང་ཆོས་སྲིད་གཉིས་ཀྱི་མཚོན་དོན་ཡོད་པའི་གཟུགས་རིས་གསར་བ་བཀོད་པ་ནི་གཡས་གཡོན་གཉིས་ལ་རི་མོ་གོར་གོར་གཉིས་ཡོད་པའི་གོར་གོར་གཡས་པའི་ངོས་སུ་ཆོས་ཀྱི་མཚོན་དོད་གནའ་བའི་ཨི་ཇེབ་ཀྱི་མཆོད་རྟེན་ཟུར་གསུམ་ཚེ་དང་ད བང་ཐང་གི་གནམ་ལྷའི་སྤྱན་དང་ལྡན་པ་ཞིག་བཀོད་པའི་གོང་ན་ལྰ་ཏན་ཡི་གེ་ནང་ལྷ་དཀོན་མཆོག་གིས་ང་ཚོའི་ལས་དོན་སྐྱོང་ཞེས་བ་དང་གཤམ་དུ་བློ་བཀོད་གསར་བའི་དུས་ཞེས་བྲིས་ཡོད།
གོར་གོར་གཡོན་པའི་ངོས་སུ་སྲིད་ཀྱི་མཚོན་དོད་ཨ་རིའི་གཞུང་གི་ཐམ་ཀ་ཆེན་མོ་སྟེ་གོང་ན་སྐར་མ་བཅུ་གསུམ་ཡོད་པའི་ཨ་རིའི་གདོད་མིའི་ལྷ་བྱ་གླག་གིས་ཞི་དྲག་གཉིས་ཀ་མཚོན་བྱེད་མདའ་དང་སྡོང་ལོ་བཟུང་ཡོད་པ་བཀོད་འདུག་ལ། མཆོད་རྟེན་གྱི་ཞབས་ལ་ཐམ་ཀ་ཆེན་མོ་ཞེས་བྲིས་ཡོད་པ་དང་། ཐམ་ཀ་ཆེན་མོའི་ཞབས་ལ་མངའ་ཁུལ་གཅིག་སྒྲིལ་གྱི་ཞེས་བྲིས་ཡོད་པས། མངའ་ཁུལ་གཅིག་སྒྲིལ་གྱི་ཐམ་ཀ་ཆེན་མོ་ཞེས་གཡས་གཡོན་གྱི་ཆོས་དང་སྲིད་ཀྱི་མཚོན་དོད་གཉིས་ཀ་ ཚིག་སྒྲུབ་གཅིག་གི་ནང་ལ་ཟུང་འབྲེལ་བྱས་འདུག
གཞན་ཡང་མཚོན་དོད་འདི་གཉིས་ཀྱིས་ཨ་རིའི་གཞུང་གིས་གདོན་འདྲེ་སྲུང་མ་ཞིག་རྟེན་གིན་ཡོད་པའི་གསང་བའི་བཤད་པ་་མང་པོ་ཞིག་ཡོད་མོད་སྐབས་གཞན་ནས་བཤད་ཆོག
ཨ་རིས་༡༩༤༧་ལོ་ནས་༡༩༩༡་ལོ་བར་སུའུ་ལེན་གཙོ་བོ་ཡིན་པའི་དངོས་གཙོ་(བཅའ་དངོས་གཙོ་བོར་འཛིན་པ་ལ་གོ་དགོས)དམར་ཕྱོགས་རིང་ལུགས་དང་མ་རྩ་་མང་གཙོ་རིང་ལུགས་བར་གྱི་ལྟ་བའི་དམག་འཁྲུག་ཆེན་མོ་སྟེ་གྲང་དམག་གི་ཁྲོད་༡༩༥༦་ལོ་ནས་བཟུང་ད་ལྟའི་བར་ཨ་རིའི་གཞུང་གིས་ལྕཊ་སྒོར་མ་ཟད་དང་ཤོག་སྒོར་($1,$2,$5,$10,$20,$50,$100)་ཡོད་ཚད་ཐོག་ལ་་ང་ཚོ་ལྷ་དཀོན་མཆོག་ལ་ཡིད་ཆེས་ཡོད་(IN GOD WE TRUST)་ཞེས་བཀོད་པ་དེ་ནི་་ཁོ་ཚོ་ཨ་རི་བ་རྣམས་ལྷ་མེད་སྨྲ་བ་དམར་ཕྱོགས་པ་རྣམས་དང་འདུ་ཤེས་འཛིན་སྟངས་ཐ་དད་ཡིན་པ་དང་ཁོ་ཚོས་ལྷ་ལ་བློ་གཅིག་སེམས་གཅིག་གིས་དད་པ་བྱས་ནས་ལྷ་མེད་དམར་ཕྱོགས་རིང་ལུགས་ཀྱི་འཇིགས་སྐུལ་དང་རང་དབང་གཏོར་བཤིག་ལས་རྣམ་པར་རྒྱལ་བ་གསལ་བསྒྲགས་བྱས་པ་ཡིན་ཟེར།
ནམ་རྒྱུན་ཨ་རིའི་རྒྱལ་གླུ་ལེན་པའི་སྔོན་ལ་རྒྱལ་དར་མདུན་དམ་བཅའ་འཇོག་དགོས། དམ་ཚིག་གི་ནང་ན་ཡང་ལྷའི་སྐྱབས་འོག་ན(under God)་ཞེས་ལྷ་དཀོན་མཆོག་གི་མིང་ཡོད། མིང་ཚིག་དེ་ནི་༡༩༥༤་ལོ་ནས་གསར་དུ་བཅུགས་པ་ཞིག་རེད།
དམག་ཁོངས་ཀྱི་ཆོས་དགེ་དང་སྒེར་གྱི་ཚོགས་སྡེ་ཁག་གི་ཨ་མཆོད།
༡༧༧༥་ལོ་ནས་བཟུང་ཨ་རིའི་དམག་ཁོངས་སུ་ཨ་མཆོད་དམ་ཆོས་དགེ་(chaplain)བསྐོས་ཡོད། དེང་སྐབས་ཨ་རིའི་གཞུང་གི་དམག་ཁོངས་སུ་ཆོས་དགེ་དང་ཆོས་དགེ་ལས་རོགས་པ་༢༢༠༠་ལྷག་ཡོད་པར་བཤད། ཁོ་ཚོའི་ལས་རྟགས་ལ་ཡང་སོ་སོའི་ཆོས་ལུགས་ཀྱི་མཚོན་རྟགས་བཞག་ཡོད། དཔེར་ན། ཨ་རིའི་དམག་ཁོངས་སུ་ནང་པའི་དམག་མི་༣༣༠༠ཙམ་ཡོད་པ་ལ་ནང་པའི་ཆོས་དགེ་(བོད་ཀྱི་ནང་པའི་ཆོས་དཔོན་གཅིག་)གསུམ་ཡོད་པའི་ལས་རྟགས་ལ་ཆོས་འཁོར་བཞག་འདུག དེ་མིན་མངོན་ཤེས་སྨྲ་མཁན་འགའ་རེ་ཨ་རིའི་གསང་བའི་ལས་ཁོངས་ཀྱི་ལས་རོགས་ལ་བཞག་ཡོད་པར་གོ་ཐོས་བྱུང་ལ། བཙོན་ཁང་ནང་ལའང་ཆོས་དགེ་བཞག་འདུག འདི་དག་གཞུང་འབྲེལ་ཡིན་པས་ཁོ་ཚོའི་ཕོག་ཐོབ་གཞུང་གིས་སྤྲོད་ཀིན་འདུག
གསར་འགོད་སྡེ་ཁག་དང་རོལ་དབྱངས་སྡེ་ཁག ཚོང་ར་སོགས་མཉམ་འབྲེལ་ཁེ་ལས་སྡེ་ཁག སྤོ་ལོའི་རྩེད་མོ་སོགས་རྩེད་མོའི་སྡེ་ཁག་དང། སྨན་ཁང་སོགས་འཕྲོད་རྟེན་སྡེ་ཁག་སོགས་ནང་ཆོས་དགེ་འམ་ཨ་མཆོད་བཞག་ནས་སྐྱབས་འཇུག་ཞུ་བཞིན་ཡོད། དཔེར་ན། ༢༠༠༧ལོའི་བསྡོམས་རྩིས་ལྟར་ན་ཨ་རིའི་མཉམ་འབྲེལ་ཁེ་ལས་སྡེ་ཁག་གི་ནང་ཨ་མཆོད་བཞི་སྟོང་ལྷག་ཡོད་ཟེར།
སློབ་གྲའི་ནང་གི་ཞལ་འདོན་དང་མི་སེར་ཁ་ཡི་སྨོན་ལམ།
སྤྱི་ལོ་༡༦༩༠་ནང་ནས་ཨ་རིའི་སློབ་གྲ་ཁག་གི་ནང་ཡི་ཤུ་གསུང་རབ་ཀློག་པ་དང་ཞལ་འདོན་འདོན་པའི་མགོ་བཙུགས་འདུག ༡༧༨༢ ལོར་ཨ་རིའི་གྲོས་འཚོགས་ཀྱིས་སློབ་གྲའི་ནང་ཡི་ཤུའི་ཆོས་འདོན་པ་ཁྲིམས་མཐུན་བཅོས། ཡིན་ནའང་༡༩༦༢་ལོར་མི་ཚང་ཅིག་གི་ཁ་མཆུ་ལ་རྒྱབ་རོགས་སུ་ཇོའུ་ཆོས་ལུགས་སོགས་ཆོས་ལུགས་མི་འདྲ་བའི་ཚོགས་སྡེ་ཁག་གིས་ངོ་རྒོལ་བྱས་པས་ཨ་རིའི་ཆེ་མཐོའི་ཁྲིམས་ཁང་གིས་གཞུང་གཉེར་སློབ་གྲ་ཁག་གི་ནང་ཆོས་འདོན་མི་ཆོག་པར་གཏན་འབེབས་བྱས། ཡིན་ནའང་སྒེར་གཉེར་སློབ་གྲ་བརྒྱད་སྟོང་ལྷག་ཡོད་པའི་ནང་ད་སྐབས་ཀྱང་ཞལ་འདོན་གསུང་གིན་འདུག་པར་མ་ཟད། མཐོ་རིམ་སློབ་ཆེན་ཁག་མང་པོའི་ནང་ད་དུང་ཆོས་དགེ་བསྐོས་ཡོད།
སྤྱི་ཚོགས་དཔྱད་བརྗོད་པ་འགའ་རེ་བཤད་ན་གཞུང་གཉེར་སློབ་གྲའི་ཆོས་འདོན་མི་ཆོག་པར་བཅོས་བ་དེས་ཨ་རིའི་མི་གཤིས་ལ་ཤུགས་རྐྱེན་ཆེན་པོ་ཐེབས་སྐད། དཔེར་ན་། གཞུང་གཉེར་སློབ་གྲའི་ནང་ཞལ་འདོན་མཚམས་འཇོག་བྱས་པའི་ལོ་ནས་ཉིས་སྟོང་ལོར་བར་ལོ་ངོ་སོ་བརྒྱད་རིང་ལ་ཨ་རིའི་སྤྱི་ཚོགས་ནང་ཇག་རྐུན་དང་མི་གསོད། བཙན་གཡབ་དང་བཟའ་འཐོར། དུད་ནག་སོགས་དུག་རྫས་སྤྱོད་མཁན་དང་བུ་ཕྲུག་ཁོག་ནས་འདེད་མཁན་སོགས་ཆ་སྙོམས་ཀྱིས་རྡབ་བཞི་ལྷག་འཕར་འདུག་ཟེར།
གྷ་ཊི་བྷི་ལེ་སི་(God bless )ཟེར་བ་ནི་དཀོན་མཆོག་གིས་བྱིན་གྱིས་རློབས་ཟེར་བའི་དོན་ཡིན་ལ། དེ་ནི་ཨ་མེ་རི་ཀའི་མི་སེར་མཐོ་དམན་བར་གསུམ་གྱི་སེམས་ལ་འཇགས་ཤིང་ཁ་ལ་བྱང་བའི་ཚོར་འདུ་དྲག་པོ་ཅན་གྱི་མིང་ཚིག་ཅིག་རེད། སྤྲང་བོ་ཚོས་སློང་མོའི་རྗེས་སུ་གྷ་ཊི་བྷི་ལེ་སི་བརྗོད་ལ་སྲིད་འཛིན་གྱིས་གཏམ་བཤད་རྗེས་སུ་ཡང་གྷ་ཊི་བྷི་ལེ་སི་བརྗོད།
གྷ་ཊི་བྷི་ལེ་སི་ཨ་མེ་རི་ཀ་ཞེས་པའི་སྐད་གྲགས་ཅན་གྱི་རྒྱལ་ཞེན་གླུ་གཞས་དེ་རྩེད་མོ་སོགས་གཞུང་སྒེར་གྱི་མཛད་སྒོ་མང་པོའི་ཐོག་ལེན་གིན་འདུག
འདི་ལ་ཧ་ཅང་འདྲ་ས་ཞིག་ཡོད་པ་ནི་བོད་པའི་ས་ཁུལ་ཁ་ཤས་ན་སྣ་སྦྲིད་རྒྱབ་ན་་་གནམ་གྱིས་སྲུངས། ཚེ་རིང་།ཟེར་སྲོལ་ཡོད་པ་བཞིན་ཡི་ཤུ་བ་ཚོས་ཡང་སྣ་སྦྲིད་རྒྱབ་ན་་གྷ་ཊི་བྷི་ལེ་སི་ཡུའོ་(ཡུའོ་ནི་ཁྱེད་ལ་ཟེར་བའི་དོན)ཟེར་སྲོལ་འདུག
མདོར་ན་ཨ་རི་མངའ་ཁུལ་གཅིག་སྒྲིལ་རྒྱལ་ཁབ་འདིས་མི་མང་གིས་ཡོད་ཚད་དཀོན་མཆོག་གིས་བཟོས་ཤིང་ཡོད་ཚད་དཀོན་མཆོག་གི་ཆེད་སྒྲུབ་ཀིན་འདུག
འདི་ནི་དུས་རབས་བར་མའི་ནང་ཡོ་རུབ་གླིང་དུ་ཆོས་ཀྱི་ཆེད་དུ་སྲིད་བཟུང་བ་ལྟར་མ་ཡིན་པར། སྲིད་ཀྱི་ཆེད་དུ་ཆོས་བཟུང་སྟེ་མི་མང་གི་དད་པ་དང་མངོན་འདོད་གཞི་ལ་བཞག་ནས་མང་གཙོ་སྤེལ་བས་ཨ་རིའི་མང་གཙོ་ལ་ལོ་ངོ་ཉིས་བརྒྱ་དང་སོ་ལྔའི་རིང་ལ་བར་ཆད་མེད་པར་བླ་ན་མེད་པའི་གྲུབ་འབྲས་བླངས་ཡོད། ཨ་རིའི་མི་མང་གི་སྲོག་དང་བླ་ལ་ཞུགས་པའི་དཀོན་མཆོག་གི་སྙིང་སྟོབས་དེས་ཁོ་ཚོ་འཛམ་གླིང་གི་དཔལ་འབྱོར་གྱི་བཞི་ཆའི་བདག་པོ་གྱུར་ཞིང་དམག་འཁྲུག་ཆེན་པོ་དག་ལས་རྣམས་པར་རྒྱལ་ཡོད། ཁོ་ཚོས་བསམ་ན་བྷིར་ལེན་གྱི་རྩིགས་གྱང་གཏོར་ནས་སུའུ་ལེན་འཐོར་བཤིག་ཏུ་སོང་བ། ཟླ་བའི་ནང་ལ་གོམ་བགྲོད་བྱས་ནས་གཟའ་མིག་དམར་ནང་ལ་འཕྲུལ་ཆས་བསླེབས་པ་སོགས་ཡོད་ཚད་དཀོན་མཆོག་གིས་བཀའ་དྲིན་ཡིན་ཟེར་རོ། །
ཟུར་མཚན་༙ འདི་ཁོ་བོས་འབྲི་བཞིན་པའི་དུག་དབྱུང་ཞེས་པའི་རྩོམ་དེབ་ལས་དགོས་དབང་གིས་སྔ་འདོན་བྱས་པ་ཡིན