གཡུ་སྒང་དགེ་འདུན།
༡། ཨ་ཀ་མ་ཡི་ལུང་ལ་གཞི་བཅོལ་ཏེ།།
ཨ་ཐང་མ་ཆད་བར་དུ་འཚོལ་ཉུལ་གྱིས།།
ཨ་མདོའི་ལྟག་མཚེར་རི་སྡེ་ཁྲ་མོ་རུ།།
ཨ་མའི་བུ་རྒོད་ལྷ་མོའི་དོན་གྲུབ་རྙེད།།
༢། གངས་རིའི་བླ་སྲོག་ཕོ་བྲང་པོ་ཏ་ལར།།
གང་གི་ཞབས་ཟུང་གསེར་གྱི་འཁོར་ལོ་ནི།།
མི་འགྱུར་བརྟན་བརླིང་བརྗིད་པའི་སྟངས་སྟབས་ཀྱིས།།
མི་འཇིགས་སེངྒེའི་ཁྲི་ལ་རྣམ་པར་བཀོད།།
༣། དམར་ཕྱོགས་འདྲེ་ཡི་དཔུང་ཤུགས་བོད་ལ་སླེབས།།
སྡར་མའི་སྐུ་དྲག་ཨུ་ཐུག་གཡོ་བྱུས་ཀྱིས།།
རྙོག་ཟིང་སྲིད་ཀྱི་ཁུར་པོ་ལྗིད་ཁོག་ཅན།།
དགུང་གྲངས་བཅུ་དྲུག་བྱིས་པའི་ཕྲག་ལ་བཞག །
༤། ཕྱི་ཚུལ་སོར་སྐྱེས་མི་ཡི་རྣམ་རོལ་ཀྱང་།།
ནང་སེམས་ཀུན་རྟོགས་ཡེ་ཤེས་རང་བཞིན་ཅན།།
འགྲན་མེད་རྣམ་དཔྱོད་མི་ཡི་རྩེར་སོན་པས།།
སྟོབས་ལྡན་ཨ་རིས་གསེར་གྱི་གཟེངས་རྟགས་ཕུལ།།
༥། གཞན་ཕན་བྱང་ཆུབ་སེམས་ཀྱི་རྩ་བ་ལས།།
བདག་གཞན་མཉམ་བརྗེ་དཔག་བསམ་ལྗོན་ཤིང་རྒྱས།།
ལག་ལེན་མེ་ཏོག་དུས་སུ་ཆེར་སྨིན་པས།།
མཐར་ཐུག་འབྲས་བུ་ཞི་བདེའི་དེད་དཔོན་རྒྱལ།།
༢༠༡༥ ཟླ་ ༡༠ ཚེས་ ༡༦ ཉིན།