ཨ་རིའི་སྲིད་འཛིན་གསར་པའི་བུ་མོའི་གཏམ་བཤད།

ཡིག་སྒྱུར་བ། རྩི་ལྗང་ལོ།

 
“དེ་རིང་ངས་ཨ་རིའི་མི་མང་ཚོར། ངའི་ཨ་ཕ་ཁྱེད་རང་ཚོའི་རྒྱབ་ཏུ་ལངས་པ་ནས་བཟུང་། ཁྱེད་རང་ཚོས་ནམ་ཡང་སེམས་ཁྲལ་དང་དངངས་སྐྲག་དགོས་ཀྱི་མ་རེད་ཟེར་རྒྱུ་ཡིན། ཁོང་གིས་ག་དུས་ཡིན་རུང་། ཕྱོགས་ཡོངས་ནས་ཁྱེད་རང་ཚོའི་ཆེད་དུ་འཐབ་རྩོད་བྱེད་ཀྱི་རེད”ཅེས། ཨ་རིའི་སྲིད་འཛིན་གསར་པ་(Donald Trump) གྱི་བུ་མོ་(Ivanka) ཡིས་གཏམ་བཤད་བྱས་ཡོད་པ་རེད།
ཐུགས་རྗེ་ཆེ། ལོ་གཅིག་གི་སྔོན་དུ་ངའི་ཨ་ཕ་འོས་མིར་ལངས་རྒྱུའི་གསལ་བསྒྲགས་བྱས་པ་དང་། སྐབས་དེར་ངས་ང་རང་གི་ཨ་ཕ་ངོ་སྤྲོད་ཅིག་བྱས་པ་ཡིན། ཁོང་གིས་རང་གི་འདོད་པ་དང་། རེ་བ་ལྟར་བློས་གཏོང་ཆེན་པོ་བྱས་ཏེ། ཆབ་སྲིད་ཀྱི་ཁོར་ཡུག་དེར་ཞུགས་པ་དང་། རྣམ་དཔྱོད་ལྡན་པའི་འོས་མི་བཅུ་དྲུག་དང་མཉམ་རྒྱལ་ཕམ་བྱས་པ་བརྒྱུད། ལོ་གཅིག་ལྷག་གི་ནང་ཁོང་དེ་ཚོའི་གྲལ་ནས་འོས་མི་ལེགས་ཤོས་དེ་ཆགས་ཡོད་པས། དོ་ནུབ་ཁོང་མི་མང་གིས་ཨ་རིའི་སྲིད་འཛིན་དུ་འོས་འདེམས་བྱུང་པ་རེད། ང་དང་འདྲ་བའི་ལོ་རབས་བརྒྱད་ཅུའི་རྗེས་ཀྱི་མི་མང་པོ་ཞིག་གིས། རང་ཉིད་ཨ་རིའི་ཆབ་སྲིད་ཚོགས་པ་གཉིས་པོ་གང་གི་ཁོང་གཏོགས་ཡིན་མིན་ཡང་ངོ་ཤེས་ཀྱི་མེད་ཀྱང་། ངས་ང་རང་གི་འོས་ཤོག་དེ་ངའི་ནང་མི་དང་རྒྱལ་ཁབ་ལ་འོས་པའི་མི་དེར་བླུགས་ཡོད།

སྐབས་ལ་རེར་འོས་མིའི་གདམ་ཁ་དེ་ཧ་ཅང་གི་ཁག་པོ་ཡིན་ན་ཡང་ད་ཐེངས་དེ་ལྟར་ཁག་པོ་ཞིག་མ་རེད། ད་རེས་ཁྱེད་རང་ལ་དེ་ལྟར་རྒྱལ་ཁ་ཐོབ་པ་དེར། ཁྱེད་ཀྱི་བུ་མོ་ང་ལ་སྤོབས་པ་ཡོད། མཚམས་འདིར་ངས་ཁྱེད་ཚོར་(Donald Trump) གྱིས། ཨ་རིའི་རྒྱལ་ཁབ་སླར་ཡང་རླབས་ཆེན་གྱི་རྒྱལ་ཁབ་ཅིག་བཟོ་བའི་དུས་ལ་སླེབས་པ་རེད་ཅེས་ཟེར་རྒྱུ་ཡིན། ལོ་བཅུའི་རིང་ཕྱིའི་ལམ་ལུགས་ཙམ་མ་གཏོགས། དངོས་གནས་ཚད་ལྡན་གྱི་འགྱུར་བ་ཞིག་གང་ཡང་མཐོང་མ་སོང་། ཡིན་ན་ཡང་འགྱུར་བ་འགྲོ་དགོས་ཀྱི་ཡོད་ན་ངའི་ཨ་ཕ་ཁོང་ལྟ་བུས་འགྱུར་བ་གཏོང་གི་རེད། ངའི་ཨ་ཕ་ནི། ཁོང་གི་མི་ཚེ་གང་བོར་མི་གཞན་གྱིས། ཁོང་གིས་དེ་བྱེད་ཐུབ་ཀྱི་མ་རེད་བསམ་པའི་ལས་ཀ་ཁོ་ན་བྱས་ནས་ཡོང་བའི་མི་ཞིག་དང་། ངའི་ཨ་ཕ་ནི་འཐབ་རྩོད་པ་ཞིག་རེད། སྤྱིར་བཏང་ལས་ཀ་ཁ་ཤས་བྱེད་རྒྱུར་ཁག་པོ་ཡོད་ཀྱང་ཁོང་གིས་ཚད་ལྡན་གྱི་འགོ་ཁྲིད་ཚོས་གང་བྱས་པ་དེ་བྱེད་ཐུབ་ཀྱི་ཡོད་རེད། ཁོང་ལས་ཀ་ནན་ཏན་དང་ཧུར་ཐག་བྱེད་མཁན་ཡིན་པར་བརྟེན། ལས་དོན་གང་ཡིན་ཡང་ཇེ་ཡག་ཇེ་བརྟན་དུ་འགྲོ་ཡི་རེད།

དེ་སྔོན་ཁོང་གིས་ནང་མི་དང་། ལས་མི། སྤྱི་གཉེར་ཁང་སོགས་ཀྱི་ཆེད་འཐབ་རྩོད་བྱེད་ཀྱི་ཡོད་པ་མཐོང་མྱོང་ལ། ད་ལྟ་ཁོང་གིས་རྒྱལ་ཁབ་དང་མི་རིགས་ཀྱི་ཆེད་དུ་འཐབ་རྩོད་བྱེད་ཀྱི་ཡོད་པ་ཡང་མཐོང་གི་འདུག དེ་ནི་ཁོང་གི་འདས་ཟིན་པའི་མི་ཚེའི་ལོ་རྒྱུས་རེད། ཉེ་ཆར་ཁོང་རྣམ་དཔྱོད་དང་འཆར་གཞི་ལྡན་པའི་སྒོ་ནས་འོས་མིར་ལངས་པ་བརྒྱུད། ཁོ་རང་གི་རེ་བ་དང་དམིགས་ཡུལ་སྒྲུབ་སའི་ལམ་ཐོག་ཏུ་ཞུགས་པ་རེད། དེ་ཡང་ཚོགས་པའི་ཆིག་སྒྲིལ་དང་ནུས་པར་བརྟེན་ནས་བྱུང་པ་ཞིག་རེད། དེར་བརྟེན། མཐུན་སྒྲིལ་བྱས་ན་ང་ཚོ་ཡང་བསྐྱར་ག་འདྲ་བྱས་ནས་ཐོབ་དགོས་ཀྱི་ཡོད་པ་དེ་ཡང་ཤེས་ཐུབ་ཀྱི་རེད། སྐད་གྲགས་ཡོད་མཁན་ཡིན་ན་མི་ཚང་མས་ངོ་ལེན་དགོས་པའི་ངེས་པ་མེད་པ་དེ། ང་གསོ་མཁན་གྱི་ཨ་ཕ་འདིས་འགྲེལ་རྒྱག་གི་ཡོད་རེད། Donald Trump ཁང་བརྩེགས་ནང་དུ་ངེད་ཕ་བུ་གཉིས་ཀྱིས་ལས་ཀ་མཉམ་དུ་བྱེད་ཀྱི་ཡོད་ལ། མཚམས་འདིར་ང་ཆུང་དུས་ཨ་ཕའི་མདུན་ཅོག་འགྲམ་དུ་རྩེད་མོ་རྩེ་བའི་སྐབས་སུ། ཁོང་གིས་ལས་རོགས་ཚོ་དང་མཉམ་ཁང་པ་བཟོ་སྐྲུན་བྱེད་ཀྱི་ཡོད་པའི་ངང་ཚུལ་དེ་ཡང་དྲན་སོང་།

ངའི་ཨ་ཕས་ག་དུས་ཡིན་ཡང་ང་དང་ངའི་སྤུན་མཆེད་ཚོར་བཟང་སྤྱོད་གལ་ཆེན་ཡིན་པའི་སློབ་གསོ་ནན་ཏན་གཏོང་གི་རེད་ལ། དེ་བཞིན་ཁོང་གིས་ང་ཚོར་དཀའ་ངལ་ལ་གདུང་ལེན་ཇི་ལྟར་བྱ་དགོས་མིན་དང་། བྱ་བ་ཇི་ལྟར་བྱས་ན་ལེགས་གྲུབ་ཡོང་མིན་སྐོར་ལ་སློབ་གསོ་ཡང་ཡང་གཏོང་གི་རེད། ད་དུང་ཁོང་གིས་ང་ཚོར། གལ་སྲིད་ཁྱེད་རང་ཚོར་གང་ཞིག་ལ་སྤྲོ་སྣང་དང་རེ་བ་ཡོད་ན་དེ་མི་འགྲུབ་པ་དང་འབྲས་བུ་མེད་པ་ཡོང་མི་སྲིད་པ་རེད་ཟེར། ངའི་ཨ་ཕར་ཐུན་མིན་གྱི་ནུས་པ་ཞིག་ཡོད་པ་ནི། མི་གཞན་ལ་ནུས་པ་དང་རྩལ་གང་ཡོད་པ་དེ་ཤེས་ཐུབ་པས། ང་ཚོ་འཚར་ལོངས་བྱུང་བའི་བརྒྱུད་རིམ་ཁྲོད་དུ་ཡང་། ཁོང་གིས་དེ་ལྟར་སྔོན་དཔག་དང་ཚོད་བགམ་གྱིས་སོ་སོའི་ནུས་པ་དང་འཇོན་ཐང་ངོས་འཛིན་བྱེད་ཀྱི་འདུག ཁོང་གིས་ང་ཚོར་མི་གང་ཞིག་ལ་འབད་བརྩོན་མེད་པ་ཡིན་ན། མི་གང་དེའི་ནུས་པ་བེད་མེད་དུ་འགྲོ་ཡི་རེད་ཅེས་བཤད་མྱོང་།

དེ་བས་ཁོང་དང་འདྲ་བར་ང་ཚོ་མི་རེ་ངོ་རེར་སོ་སོ་ཙམ་མ་ཡིན་པར། ཚང་མའི་ཆེད་དུ་ལས་ཀ་བྱེད་དགོས་པའི་འགན་ཁྲི་ཡོད་རེད། དེ་ནི་འཛམ་གླིང་འདིའི་ཐོག་གི་འགྲོ་བ་མི་ཡོངས་ཀྱི་ཆེད་དུ་རེད། འདས་ཟིན་པའི་ལོ་ཟླའི་ནང་གནད་དོན་མང་པོ་བྱུང་བའི་ཁྲོད། ཐེངས་གཅིག་མི་གཞན་གྱི་ལོ་རྒྱུས་ཤིག་ངའི་ཨ་ཕས་ཚགས་ཤོག་བརྒྱུད་ནས་ལེན་གྱི་ཡོད་པ་མཐོང་སོང་། མི་དེ་ངའི་ཨ་ཕས་ནམ་ཡང་མཐོང་མྱོང་མེད་ཀྱང་། ཁོང་གིས་དཀའ་ངལ་ཡོད་པའི་མི་དེ་བཙལ་ཏེ་དཀའ་ངལ་སེལ་རོགས་དང་མི་ཚེ་དོན་ལྡན་བཟོས་ཡོད་པ་རེད།
དེ་བཞིན་མི་ཚེ་དང་ལས་ཀ་ལ་དཀའ་ངལ་ཡོད་མཁན་ཚོ་ཁོང་དང་ཐུག་སྟེ་ལམ་སྟོན་དང་དཀའ་ངལ་ཞུས་རྗེས། མི་ཚོས་བསམ་བློ་གཏོང་སྟངས་དང་འཆར་གཞི་གསར་པ་རག་སྟེ་འོད་སྟོང་ལྡན་པའི་མདུན་ལམ་རྙེད་མཁན་མང་པོ་རེད། ངའི་ཨ་ཕར་སྙིང་རྗེ་དང་། གཏོང་ཕོད། ལྷག་པར་དུ་མི་ཉམ་ཐག་ཚོར་རོགས་རམ་བྱ་རྒྱུའི་བསམ་བློ་ཡོད་པ་དེ། ང་ལོ་མང་པོར་ཨ་ཕའི་མཉམ་དུ་བསྡད་པའི་མི་ཚེའི་བརྒྱུད་རིམ་ཁྲོད་ངེས་ཤེས་རྙེད་ཡོད། དེར་བརྟེན། གལ་ཏེ་ཁྱེད་རང་ཉམ་ཐག་རོགས་རམ་དགོས་མཁན་ཞིག་ཡིན་ཚེ། ནམ་ཡིན་རུང་ཁོང་ཁྱེད་ཀྱི་རྒྱབ་ཏུ་ཡོད་ཡོད་པ་རེད། ངའི་ཨ་ཕ་འདི་མ་འོངས་པའི་སྲིད་འཛིན་གྱི་འཇོན་ཐང་དང་ཆ་རྐྱེན་ཡོད་ས་ཙམ་དུ་མ་ཟད། ང་ཚོར་དགོས་པའི་བྱམས་དང་སྙིང་རྗེ་ལྡན་པའི་རྒྱལ་ཁབ་ཀྱི་འགོ་ཁྲིད་ཅིག་ཡོང་གི་རེད།

ཁོང་གིས་ལས་ཀ་གང་བྱས་ཀྱང་སྤྱི་ཚོགས་ཐོག་ཕན་ཐོགས་དང་གྲུབ་འབྲས་ཆེ་བ་ཤ་སྟག་རེད། ང་ལོ་བཅུ་གཅིག་ལྷག་གི་རིང་ཁོང་དང་མཉམ་ལས་ཀ་བྱས་པའི་བརྒྱུད་རིམ་ཁྲོད། མི་ཚེ་དང་ལས་དོན་ལ་འགྱུར་བ་གཏོང་ཡ་དེ་གལ་ཆེན་གྱི་ཐག་ཆོག་ཅིག་ཡིན་པ་ཤེས་སོང་ལ། དེ་བཞིན་ང་ཁོང་དང་མཉམ་དུ་བསྡད་པའི་མི་ཚེའི་གོ་རིམ་ཁྲོད་ངས་འཛམ་གླིང་གི་གནད་དོན་མང་པོ་ཞིག་ངོ་ཤེས་སོང་། ངའི་ཨ་ཕའི་སྤྱི་གཉེར་ཁང་གི་ནང་མི་རིགས་མང་པོའི་ལས་མི་ཡོད་པ་མ་ཟད། བུད་མེད་དང་། རིགས་རུས། མཐོ་དམན་སོགས་ཀྱི་ཁྱད་པར་མེད་པར་ལས་ཀ་བྱ་སའི་སྡིང་ཆ་ཞིག་རེད། ཁོང་གིས་ག་དུས་ཡིན་རུང་མིའི་རྣམ་དཔྱོད་དང་ནུས་པར་གདེང་འཇོག་བྱེད་ཀྱི་རེད་ལ། མི་གཞན་གྱི་ནུས་པ་དང་ཡོན་ཏན་ལ་ངོས་འཛིན་དང་གུས་ཞབས་བྱེད་ཀྱི་རེད།
མ་ཟད་ཁོང་མི་རིགས་དང་ཕོ་མོ་འདྲ་མཉམ་གྱི་ལྟ་བར་དགའ་མཁན་ཞིག་ཀྱང་རེད། མི་མང་པོ་ཞིག་གིས་སོ་སོའི་སྤྱི་གཉེར་ཁང་གཅིག་པུ་ལེགས་གྲུབ་ཡོང་ཆེད་ལས་ཀ་བྱེད་ཀྱི་ཡོད་རུང་། ངའི་ཨ་ཕ་དེ་ལྟ་མ་ཡིན་པར་རྒྱལ་སྤྱིའི་ཐོག་ལེགས་གྲུབ་བྱུང་བའི་ལས་ཀ་དང་གྲུབ་འབྲས་མང་པོ་ཡོད་རེད། ཁོང་ལ་དེ་ལྟར་ལེགས་གྲུབ་བྱུང་བའི་རྒྱུ་མཚན་ནི། ཁོང་གིས་གནས་ལུགས་དང་རྒྱུ་མཚན་ཡོད་པའི་མི་ཚང་མར་ཉན་གྱི་ཡོད་པ་དེས་རེད། སྤྱིར་བཏང་སྤྱི་གཉེར་ཁང་གི་ཕྱུག་བདག་ཚོས་མི་གཞན་པར་ལམ་སྟོན་དང་བློ་འདྲི་ཡི་མེད་ཀྱང་། ངའི་ཨ་ཕས་དེ་ལྟ་མ་ཡིན་པར་ལས་ཀ་གང་བྱས་ཀྱང་ཚང་མར་གྲོས་བྱས་ཏེ་ལེགས་ཆ་ལེན།

ངའི་ཨ་ཕའི་སྤྱི་གཉེར་ཁང་གི་ནང་འགོ་གཙོ་བུ་ལས་བུ་མོ་མང་བ་ཡོད་རེད། ངའི་ཨ་ཕས་དུས་དང་བསྟུན་ཏེ་ངལ་རྩོལ་བའི་ཁྲིམས་ལ་འགྱུར་བ་གཏོང་གི་རེད། བུད་མེད་ཚོ་ངལ་རྩོལ་གྱི་ལས་ཀ་ཁོ་ན་ལས་མཁན་ཞིག་མིན་པས། ངའི་ཨ་ཕས་ཀྱང་ཕྲུ་གུར་ཕ་མ་གཉིས་ཀྱིས་གཉོར་སྐྱོང་བྱེད་དགོས་པར་ཤུགས་རྒྱག་གི་རེད། ང་རང་ཕྲུ་གུ་གསུམ་གྱི་ཨ་མ་ཞིག་ཡིན་པའི་ཆ་ནས། ནང་མི་གསོ་སྐྱོང་བྱ་རྒྱུ་དེ་ལས་སླ་པོ་ཞིག་མིན་པ་ངས་ཤེས་ཡོད་ལ། དེ་བཞིན་ངས་ཁོང་ཚོ་ལས་ང་ལ་ལམ་ཁ་དང་བདམ་ཁ་མང་བ་ཡོད་པ་ཤེས་ཡོད། བུད་མེད་དང་ཕྲུ་གུའི་སྲིད་ཇུས་དེ་བཤད་སྲོལ་ལྟ་བུ་མ་ཡིན་པར་ཁྲིམས་ཀྱི་ངོ་བོར་གནས་དགོས་ཀྱི་ཡོད་རེད།

ཆབ་སྲིད་པ་དེ་ཚོས་གླ་ཆ་འདྲ་མཉམ་དགོས་པ་བཤད་ཀྱི་ཡོད་ཀྱང་ངའི་ཨ་ཕས་མི་ཚེའི་ནང་ལས་དོན་དེ་ཚོ་ལག་བསྟར་བྱས་ནས་ཡོང་ཡོད་པ་རེད། ཁོང་གིས་ག་དུས་ཡིན་རུང་ལས་ཀ་འདྲ་མཉམ་ལ་གླ་ཆ་འདྲ་མཉམ་དགོས་པ་རྩོད་ཀྱི་ཡོད་པ་དང་། དེ་བཞིན་ངས་ཀྱང་ཁོང་དང་མཉམ་དེ་ལྟར་རྩོད་ཀྱི་ཡོད། ད་རེས་ཨ་རིའི་མི་མང་གི་དཔལ་འབྱོར་གྱི་ཚད་གཞི་དེ་ཡང་བསྐྱར་ཡར་འཕར་དགོས་ཀྱི་ཡོད་རེད། (Donald Trump) སྲིད་འཛིན་གྱིས་ཏན་ཏན་འགྱུར་བ་ཞིག་གཏོང་གི་རེད་ལ་དེ་དང་མཉམ་རླབས་ཆེ་བའི་ཨ་རིའི་སྲོལ་རྒྱུན་བསྐྱར་གསོ་བྱས་ཏེ། མི་རབས་གསར་པ་དེ་ཚོར་གོ་སྐབས་གསར་པ་རེ་བསྐྲུན་ཡོང་གི་རེད།

(Donald Trump) ཁྱེད་རང་གི་འོས་མིར་བདམས་པ་ནས་བཟུང་། ཁྱེད་རང་གིས་གང་ཞིག་འབྱུང་རྒྱུ་ཡིན་པ་དང་། གང་ཞིག་བྱུང་ཡོད་པའི་དབྱེ་བ་འབྱེད་ཤེས་པ་རེད། ངའི་ཨ་ཕས་ཁང་བརྩེགས་མཐོན་པོ་ཞིག་བཟོ་དགོས་ཟེར་ན། ཁྱེད་ཀྱིས་ནམ་མཁར་ལྟོས་དང་མཐའ་མི་མངོན་པའི་ཁང་བརྩེགས་མཐོན་པོ་ཞིག་རིམ་གྱིས་མཐོང་ཡོང་གི་རེད། གལ་སྲིད་ངའི་ཨ་ཕས་ཨ་རིའི་རྒྱལ་ཁབ་འདི་ཡང་བསྐྱར་རླབས་ཆེན་ཞིག་བཟོ་རྒྱུ་ཡིན་ཟེར་ན། ཁོང་གིས་ཏན་ཏན་ཨ་རི་ཡང་བསྐྱར་རླབས་ཆེན་བཟོ་ངེས་རེད། ཐེངས་འདིར་ང་ཚོའི་རིགས་རྒྱུད་འདི་ལ་གོ་སྐབས་འདི་བྱུང་པ་རེད།

ང་ཚོས་རེ་བ་ཆེན་པོ་ཞིག་བརྒྱབ་པ་ཡིན་ན་ང་ཚོར་འབྱུང་མི་སྲིད་པ་དེ་འབྱུང་གི་རེད། ང་ཆུང་ཆུང་ཡིན་སྐབས་ཨ་ཕས་ང་ལ་ཉིན་ཞིག ཨིན་ཁ།(Ivanka) ཁྱེད་རང་གིས་ཐག་རིང་པོར་བསམ་བློ་གཏོང་གི་ཡོད་ན་བསམ་བློ་ཆེ་ས་ཞིག་གཏོང་དགོས་རེད་ཟེར་མྱོང་། ཁོང་སོ་སོའི་དམིགས་ཡུལ་དང་མངོན་འདོད་ཆེད་རྩོད་ལེན་བྱེད་རྒྱུར་ནམ་ཡང་མི་ཞེད་མཁན་ཞིག་དང་། ལྷག་པར་དུ་ཁོང་གིས་མདུན་སྐྱོད་ཀྱི་གོམ་པ་ནམ་ཡང་འཚམས་འཇོག་གི་མ་རེད། དེ་བས་དེ་རིང་ངས་ཨ་རིའི་མི་མང་ཚོར། ངའི་ཨ་ཕ་ཁྱེད་རང་ཚོའི་རྒྱབ་ཏུ་ལངས་པ་ནས་བཟུང་། ཁྱེད་རང་ཚོས་ནམ་ཡང་སེམས་ཁྲལ་དང་དངངས་སྐྲག་དགོས་ཀྱི་མ་རེད་ཟེར་རྒྱུ་ཡིན། ཁོང་གིས་ག་དུས་ཡིན་རུང་ཕྱོགས་ཡོངས་ནས་ཁྱེད་རང་ཚོའི་ཆེད་དུ་འཐབ་རྩོད་བྱེད་ཀྱི་རེད།

༢༠༡༦/༡༡/༡༡