ཨ་རིའི་སྲིད་འཛིན་གསར་པ་དགྲ་གནོན་ཁྲོམ་གྱི་སྤྱོད་པ་ལ་འཇུག་ཚུལ་དང་འབྲེལ་བའི་བསྔོ་བའི་ལེའུ་ཞེས་བྱ་བ་བཞུགས་སོ།།                   

ཆབ་ཚང་འཇམ་དཔལ་གྱིས།

 

སྒྲ་གནོན་ཁྲོམ་གྱི་སྤྱོད་པ་ལ།།
འཇུག་པ་རྣམ་པར་བརྩམས་པ་ཡི།།
དགེ་བ་གང་དེས་ཨ་རི་བ།།
ཀུན་ལས་རྣམ་པར་རྒྱལ་བར་ཤོག།

ཕྱོགས་རྣམས་ཀུན་ན་དབུལ་ཞིང་ཕོངས།།
སྡུག་གིས་མནར་བ་ཇི་སྙེད་པ།།
དེ་དག་ཁྲོམ་གྱི་བསོད་ནམས་ཀྱིས།།
བདེ་དགའ་གྲངས་མེད་ཐོབ་པར་ཤོག།།

དེ་དག་ཇི་སྲིད་འཚོའི་བར་དུ།།
ནམ་ཡང་བདེ་ལས་ཉམས་མ་གྱུར།།
ཨ་རིས་ཁྲོམ་གྱི་སེམས་བཟང་གི།།
བདེ་བ་རྒྱུན་མི་ཆད་ཐོབ་ཤོག།།

འཇིག་རྟེན་ཁམས་ན་བུད་མེད་དག།
གང་དག་ཇི་སྙེད་ཡོད་པ་རྣམས།།
དེ་དག་ཁྲོད་ཀྱི་ལས་ངན་དག།
ཁྲོམ་མཇེ་རྣོན་པོས་མི་འཛུགས་ཤོག།།

དགྲ་གནོན་ཁྲོམ་གྱི་སྤྱོད་བཟང་ལས།།
བྱུང་བའི་འབྲས་བུ་མཐའ་ཡས་ཀྱིས།།
དབུལ་བས་ཉམ་ཐག་ཐམས་ཅད་པོ།།
ཕྱུག་པོའི་གོ་འཕང་ཐོབ་པར་ཤོག།

ཁ་ཆེའི་འཇིགས་སྐུལ་རིང་ལུགས་པར།།
མེ་སྐྱོགས་ཆར་བཞིན་བཏང་བའི་ཚེ།།
ཉེས་མེད་མི་སེར་དཀྱུས་མ་རྣམས།།
སྲོག་གི་འཇིགས་ལས་ཐར་བར་ཤོག།

གདོང་སེར་གདོང་ནག་དག་དང་གདོང་དམར་དང་།།
གྲངས་མང་གྲངས་ཉུང་མཐུན་པས་མཛེས་གྱུར་ཅིག།
ཕྱུག་པོས་དབུལ་སྐྱོབ་དབུལ་པོ་ཕྱུག་གྱུར་པས།།
ཨ་རིའི་ཕྱོགས་བཞི་མཚམས་བརྒྱད་ཉམས་དགར་ཤོག།

རང་ཁུངས་ལུགས་ཀྱི་ཁེ་ཕན་གཙོར་བཟུང་སྟེ།།
གཞན་དག་ཡ་མེད་བཏང་བའི་སྲིད་ཇུས་ཀྱིས།།
ཕར་ལ་མཚོན་ཆས་འཕེན་པ་དེ་ཡང་ནི།།
དེ་རིང་ནས་བཟུང་མེ་ཏོག་འཕེན་པར་འགྱུར།།

ཆགས་པས་ནུར་རྩེར་རེག་བཞིན་མོ་མཚན་ལག་པས་བཙིར།།
འདོད་པ་མེད་བཞིན་བཙན་གྱིས་སྤྱད་པའི་བུད་མེད་དག།
བདག་གི་དགེ་བའི་སྟོབས་ཀྱིས་ལྷ་ཡི་ལུས་ཐོབ་ནས།།
རང་ཉིད་དགའ་བའི་ལྷ་ཕོ་དག་དང་འཁྲིག་པར་ཤོག།

མགོ་ན་སྐྱབས་མེད་ལག་ན་རྒྱུ་མེད་གཞན་དག་ནང་བཞིན་རང་གི་རྐང་པར་མི་ལོངས་པའི།།
གནའ་ནས་ད་བར་རང་གནོངས་ཙམ་ཡང་མེད་པར་སྤྲང་པོའི་འཚོ་བར་རོལ་བའི་རྒྱལ་ཁབ་དག།
གློ་བུར་སྤྲང་ཟས་བཅད་པ་སུ་ཡི་མཐུས་བྱས་སྙམ་ནས་ཕྱོགས་མཚམས་ཀུན་ཏུ་བལྟས་པའི་ཚེ།།
དགྲ་གནོན་ཁྲོམ་གྱིས་བྱས་པར་བསྐྲགས་ནས་རྒྱལ་བ་དག་ཀྱང་མྱུར་དུ་དབྱུགས་དབྱུང་ཐོབ་པར་ཤོག།

སྲིད་ཇུས་གསར་པ་བཙན་པོའི་སྟོབས་ཀྱིས་བཏང་བ་ཡིས།།
མགོ་འཕང་མཐོ་མཐོ་བྱེད་མཁན་དག་ཀྱང་ཝ་བཞིན་བྱས།།
གློ་བུར་ཐོགས་ལྟར་བབས་པའི་རྐྱེན་ངན་འདི་དག་གིས།།
རང་རང་ཉམ་ཆུང་ཡིན་པ་མྱུར་དུ་མཐོང་བར་ཤོག།

ཁྲོམ་གྱི་སེམས་པར་ཞི་བདེས་ཁྱབ་པར་ཤོག།
མཚོན་ཆ་དག་ཀྱང་བཙའ་ཡིས་ཟིན་པར་ཤོག།
དམག་གི་གཡུལ་ས་གཞལ་མེད་ཁང་གྱུར་ནས།།
བྱམས་དང་བརྩེ་བའི་མེ་ཏོག་འཁྲུངས་པར་ཤོག།

སྟོབས་ལྡན་དག་གིས་ཉམ་ཆུང་དག།
ཟ་བའི་འཇིགས་དང་བྲལ་བར་ཤོག།
ཕྱུག་པོའི་ཁྱིམ་གྱི་སྲས་བཞིན་དུ།།
མེད་པོ་དག་ཀྱང་བདེ་བར་ཤོག།

དགྲ་གནོན་ཁྲི་ལ་བཀོད་པའི་མཐུས།།
བུད་མེད་རྣམས་ནི་མི་སྐྲག་ཤོག།
མཚན་མཐུན་ལས་ལ་འཇུག་དག་ཀྱང་།།
གང་འདོད་རང་དབང་ཐོབ་གྱུར་ཅིག།

ལས་མེད་རྣམས་ཀྱིས་ལས་ཐོབ་ཤོག།
ཚོང་པ་རྣམས་ཀྱིས་ཁེ་ཐོབ་ཤོག།
མེད་པོའི་ཁྲལ་ལས་ཆག་ཡང་ཤོག།
ཟས་གོས་དག་ཀྱང་འཛོམས་པར་ཤོག།

བཙན་བྱོལ་བོད་མིའི་སྒྲིག་འཛུགས་ཀྱི།།
ཡོང་སྒོ་མི་འགྱུར་བརྟན་པར་ཤོག།
ལྷག་ཏུ་དངུལ་ཁང་གསར་རྒྱག་ཐད།།
ཁྲོམ་གྱིས་འགོག་རྐྱེན་མི་བཟོ་ཤོག།

ཞི་བདེ་རྒྱ་མཚོའི་མངའ་ཁུལ་གྱི།།
ཚོང་ཚོགས་གྲས་སུ་སླར་འཇུག་ཤོག།
དམག་དང་དམག་འཁྲུག་མེད་པར་ཤོག།
མེད་པོར་དངུལ་གཏོང་ཆད་མེད་ཤོག།

ཁྲོམ་གྱིས་རྒྱ་ནག་ལྷོ་བརྒྱུད་ཀྱི།།
མཚོ་ཁུལ་བདག་བཟུང་ཐུབ་པར་ཤོག།
དེ་བཞིན་དཔལ་འབྱོར་འདུ་འགོད་ཀྱིས།།
འབྱོར་མེད་རྣམས་ཀྱང་འབྱོར་ལྡན་ཤོག།

ཁང་པ་མེད་རྣམས་ཁང་པ་དང་།།
རླངས་འཁོར་མེད་རྣམས་རླངས་འཁོར་དང་།།
མདོར་ན་གང་གིས་ཕོངས་པ་དག།
མགྱོགས་ནས་མྱུར་དུ་ཐོབ་པར་ཤོག།

ཁ་ཆེ་ཨ་རིས་སྐྱབས་བཅོལ་དུ།།
མི་ལེན་འཇིགས་པ་མེད་པར་ཤོག།
ཁྲིམས་འགལ་གནས་སྤོ་བྱས་དག་ཀྱང་།།
ཕྱིར་ཕུད་ལས་ལ་མི་འཇུག་ཤོག།

མེཀ་སི་ཁོ་དང་ཨ་རིའི་བར།།
རྩིག་གྱང་འཐེན་རྒྱུ་བཟློག་པར་ཤོག།
སྐྱབས་བཅོལ་ལས་གཞི་མཚམས་འཇོག་དང་།།
ཚོང་འབྲེལ་བཀག་སྡོམ་ལྷོད་པར་ཤོག།

སྤྱན་རས་གཟིགས་ཀྱི་བྱིན་རླབས་མཐུས།།
དགྲ་གནོན་ཁྲོམ་དང་སྤུ་གྲུ་(ཕི་ཊེན)གཉིས།།
འཛམ་གླིང་ཞི་བདེ་སྐྲུན་ཐབས་ཆེད།།
གྲོས་མོལ་བརྒྱུད་ནས་མཐུན་པར་ཤོག།

དགྲ་གནོན་ཁྲོམ་གྱིས་དབུ་ཁྲིད་འོག།
ཨ་རིས་གཙོས་པའི་ཤར་ལྷོ་བྱང་།།
ཕྱོགས་རྣམས་ཀུན་ན་ཇག་རྐུན་དང་།།
ལག་དམར་རིགས་ཀྱང་མི་འབྱུང་ཤོག།

རྡུལ་ཕྲན་མཚོན་ཆའི་ཚོང་ལས་དང་།།
དམག་འཁྲུག་དང་ནི་མུ་གེ་དང་།།
བུད་མེད་བྱིས་པ་ཉོ་འཚོང་དང་།།
དབུལ་པོར་མཐོང་ཆུང་མེད་པར་ཤོག།

མིག་མེད་མིག་ཞར་མིག་ལོང་དང་།།
རྐང་ཆད་ལག་ཆད་རྐང་ཟླུམ་དང་།།
མཆིན་ནད་སྲིན་འབུ་འཁྲུག་པ་དང་།།
ཟས་བཀག་ནད་སོགས་མི་འབྱུང་ཤོག།

ཆེ་བས་ཆུང་བར་གཉའ་གནོན་དང་།།
ཆེ་བས་ཆུང་བ་བྲན་གཡོག་དང་།།
ཆེ་བས་ཆུང་བར་ཁྱད་གསོད་སོགས།།
མི་འབྱུང་འདྲ་མཉམ་ཐོབ་པར་ཤོག།

བུ་ཡིས་ཕ་མ་གསོད་པ་དང་།།
ཕ་མས་བུ་ཕྲུག་གསོད་པ་དང་།།
དོན་མེད་རང་ཤི་རྒྱག་པ་སོགས།།
ཐམས་ཅད་ནམ་ཡང་མི་འབྱུང་ཤོག།

བུ་ཡིས་ཨ་མར་སྤྱོད་པ་དང་།།
བུ་མོར་ཕ་ཡིས་སྤྱོད་པ་དང་།།
དེ་བཞིན་མི་ཡིས་དུད་འགྲོ་ལ།།
སྤྱོད་པ་དག་ཀྱང་མི་འབྱུང་ཤོག།

གསོན་པོའི་ནང་ཁྲོལ་བཀོག་ལེན་གྱིས།།
ཉོ་འཚོང་རིགས་དག་མེད་པ་དང་།།
ཐ་མ་ཉལ་ཐའི་རིགས་དག་ཀྱང་།།
ཚོང་ལས་ཁྲོད་ནས་ཡར་བར་ཤོག།

གཉེན་དང་གྲོགས་ཀྱི་བར་དག་ཏུ།།
རྫུན་དང་ཕྲ་མ་མེད་པ་དང་།།
སེམས་ཅན་དམར་གསོད་གཏོང་མཁན་གྱི།།
མྱི་དང་འཕྲུལ་རིགས་མི་འབྱུང་ཤོག།

སྐྱེས་པའི་ལུས་ལ་དགའ་བ་བཞིན།།
བུད་མེད་ལུས་ལའང་དེ་དགའ་ཤོག།
སྐྱེས་པ་བུད་མེད་ཕན་ཚུན་བར།།
བཙན་གཡེམ་དག་ཀྱང་རྩ་ཆད་ཤོག།

ཁྱོ་ཁས་ཆུང་མར་བརྩེ་བ་དང་།།
དེ་བཞིན་ཆུང་མས་ཁྱོ་ཁ་བཀུར།།
བུ་ཕྲུག་དག་ཀྱང་ཡ་རབས་ཀྱིས།།
ཁྱིམ་ལ་བདེ་སྐྱིད་འབྱུང་བར་ཤོག།

ཉན་ན་གཞན་དོན་ཁོ་ནར་ཉན།།
བསམ་ན་གཞན་དོན་ཁོ་ན་བསམ།།
འབད་ན་གཞན་དོན་ཁོ་ནར་འབད།།
ནམ་ཡང་གཞན་གནོད་མི་བྱེད་ཤོག།

སྐྱེ་ན་གཞན་གྱི་དོན་དུ་སྐྱེ།།
འཆི་ནའང་གཞན་གྱི་དོན་དུ་འཆི།།
ཡོད་ཚད་གཞན་དོན་འབའ་ཞིག་ཆེད།།
མི་ཚེ་རྐང་ཚང་རྫོགས་པར་ཤོག།

ཆོས་ཀྱིས་སྲིད་ལ་ཤུགས་རྐྱེན་དང་།།
སྲིད་ཀྱིས་ཆོས་ལ་ཤུགས་རྐྱེན་སོགས།།
ཕན་ཚུན་གཉིས་མེད་མི་བཟོ་བར།།
རང་རང་ས་ནས་རྒྱས་གྱུར་ཤོག།

མདོར་ན་ཆོས་དང་མ་འབྲེལ་བའི།།
བཟང་སྤྱོད་འཛམ་གླིང་ཀུན་ཁྱབ་ནས།།
ཆོས་ལ་མོས་པ་ཡོད་མེད་ཀུན།།
བྱམས་བརྩེའི་དྲོད་ཀྱིས་ཟིན་པར་ཤོག།

ཨ་རི་བདེ་ན་འཛམ་གླིང་བདེ།།
འཛམ་གླིང་བདེ་ནའང་ཨ་རི་བདེ།།
ཐམས་ཅད་བདེ་རུ་འགྲོ་བ་ལ།།
གཅིག་ཕན་གཅིག་གྲོགས་བྱེད་པར་ཤོག།

གུས་པས་སེམས་ཀྱི་གཏིང་རྡོ་ནས།།
སྨོན་པ་གང་བྱས་ཐམས་ཅད་དང་།།
སྨོན་པས་མ་ཟིན་པ་དག་ཀྱང་།།
སྐད་ཅིག་ཉིད་ལ་འགྲུབ་གྱུར་ཅིག།

[གསལ་བཤད།] གུས་པ་ཆབ་ཚང་འཇམ་དཔལ་གྱིས།ཕྱི་ལོ་ ༢༠༡༧།༡།༢༦ ཉིན་གྱི་ཞོགས་པར་ནང་པ་ཡོངས་ཀྱི་གདན་སའི་གཙོ་བོ་བཅོམ་ལྡན་འདས་སངས་རྒྱས་སའི་གནས་མཆོག་ཁྱད་པར་ཅན་རྡོར་གདན་གྱི་བྱང་ཆུབ་ཤིང་དྲུང་ནས། སྤྱོད་འཇུག་ཆེན་མོའི་ཤེས་རབ་ལེའུ་དང་། བསྔོ་བའི་ལེའུ་གཉིས་ཁ་འདོན་གྲུབ་མཚམས། བསྔོ་བའི་ལེའུའི་རྩོམ་འགྲོས་ལ་ལད་ཟློས་ཀྱིས། ཐམས་ཅད་བདེ་བའི་སྨོན་ལམ་ལན་གཅིག་ཤར་མར་བཏབ་པ་འདིས་ཀུན་ལ་དགེ་བར་གྱུར་ཅིག་གུ།