གཅན་འོད་འབར།
ད་ལྟའི་ཆར་འཛམ་གླིང་གི་གསར་འགྱུར་བརྒྱུད་ལམ་ཁག་དང་མི་མང་གི་འཚོ་བའི་ཁྲོད་དུ་གླེང་གཞི་གཙོ་བོར་གྱུར་བའི་གསར་འགྱུར་ཆེན་པོ་ཞིག་ཡོད་པ་ནི་རྒྱལ་སྤྱིའི་ཆབ་དཔལ་དམག་གསུམ་གྱི་སྡིངས་ཆའི་སྟེང་དུ་སྟོབས་ཆེན་རྒྱལ་ཁབ་ཨང་དང་པོར་འབོད་པའི་ཨ་མེ་རི་ཁའི་སྲིད་འཛིན་འོས་འདེམས་ཀྱི་སྐོར་དེ་རེད། ཨ་མེ་རི་ཁ་འདི་བཞིན་སྐུ་ཚབ་འཐུས་མི་ཅན་གྱི་མང་གཙོའི་ལམ་ལུགས་འོག་གི་སྲིད་འཛིན་ལམ་ལུགས་ཀྱི་མང་གཙོའི་རྒྱལ་ཁབ་ཆེ་ཤོས་ཤིག་ཡིན་ལ་རྒྱལ་ཁབ་འདིའི་གཞུང་གི་འགོ་ཁྲིད་གལ་ཆེ་ཤོས་དེ་ཡང་མི་མང་གིས་གདམས་པའི་སྲིད་འཛིན་དེ་ཆགས་ཡོད། དེར་བརྟེན་སྲིད་འཛིན་ནི་གཞུང་དང་རྒྱལ་ཁབ་གཉིས་ཀྱི་དབུ་འཛིན་ལྟ་བུ་ཡིན་ཞེས་འགྲེལ་བརྗོད་བྱེད་ཀྱིན་ཡོད་ལ། ཐེངས་འདིའི་ཨ་རིའི་ལས་ཐོག་སྲིད་འཛིན་ཨོ་བྷ་མ་ནི་སྲིད་འཛིན་ཐེངས་ ༤༤ པ་ཡིན་ལ། ཡོང་བཞིན་པའི་སྲིད་འཛིན་རྗེས་མ་དེ་ཨ་རིའི་སྲིད་འཛིན་ཐེངས་ ༤༥ དེ་ཆགས་ཡོད་པ་རེད། འུ་ཅག་བོད་པ་ཚོས་རེ་ལྟོས་བྱེད་ས་ཡང་ཨ་རིའི་སྲིད་འཛིན་རྗེས་མ་དེས་རྒྱ་ནག་དང་མཉམ་དུའམ་ཡང་ན་རྒྱལ་སྤྱིའི་སྡིངས་ཆའི་སྟེང་དུ་བོད་དོན་གྱི་སྐད་ཆ་རེ་བཤད་ཨེ་ཡོང་བསམ་པའི་རེ་བ་དང་ཡིད་ཆེས་བྱེད་པའི་ལུགས་སྲོལ་ཞིག་ཡོད་ལ། གལ་ཏེ་བོད་དོན་གླེང་མཁན་ཞིག་དང་བོད་དོན་ལ་རྒྱབ་སྐྱོར་བྱེད་མཁན་ཞིག་མིན་ཚེ་དེ་ཨ་རིའི་སྲིད་འཛིན་གྱི་རྒྱལ་ཁ་མི་ཐོབ་པའི་རེ་བ་བྱེད་མཁན་ཡང་ཡོད་པ་རེད། གང་ལྟར་འདི་ལྟར་རང་དོན་ཁོ་ནའི་ཕྱོགས་ནས་ལངས་སྟེ་བཤད་ན་འདི་ལ་ཡང་དེ་ཚོད་ཀྱི་རྒྱུ་མཚན་ཞིག་ཡོད་པར་བླ་མོད། རང་དབང་ལྡན་པའི་རྒྱལ་ཁབ་ཅིག་གི་འགོ་ཁྲིད་འདེམས་སྐབས་རྒྱལ་ཁབ་དེའི་མི་སེར་མང་པོ་ཞིག་གིས་འཕྲལ་ཕུགས་གཉིས་ལ་བསམ་གཞིགས་ཀྱིས་རང་ཉིད་ཀྱི་མོས་པ་ལྟར་འོས་མི་ཞིག་ལ་སྲིད་འཛིན་གྱི་འོས་ཤོག་བླུགས་དོན་ནི་རྒྱལ་ཁབ་དེའི་མི་མང་གི་འཚོ་བའི་དཀའ་ངལ་དང་། སྤྱི་ཚོགས་བདེ་འཇགས། དཔལ་འབྱོར་ཡར་རྒྱས། རྒྱལ་སྲུང་སྲ་བརྟན་སོགས་མི་རིགས་དེའི་དངོས་ཤུགས་བརྒྱུད་གསུམ་གྱི་ཁེ་ཕན་སྒྲུབ་ཆེད་ཡིན་པ་ལས་མི་རིགས་གཞན་ཞིག་གི་བདེ་དོན་གྱི་ཆེད་དུ་གདམས་པ་ཞིག་ནི་གཏན་ནས་མ་རེད་སྙམ། གོ་ལ་གཅིག་གྱུར་དང་བརྡ་འཕྲིན་ཡར་རྒྱས་ཀྱི་དུས་རབས་འདིར་ཨ་རི་ལྟ་བའི་སྟོབས་ཆེན་རྒྱལ་ཁབ་ཁག་ཏུ་འབྱུང་བཞིན་པའི་ཕྱི་ནང་གསང་གསུམ་གྱི་གསར་འབྱུང་གནས་ཚུལ་ཆེ་མ་ཆུང་གསུམ་ཅི་འདྲ་ཞིག་ཡིན་ཡང་འཛམ་གླིང་རྒྱལ་ཁབ་ཁག་དང་མི་མང་གི་འཚོ་བ་ལ་ཤུགས་རྐྱེན་ངེས་ཅན་ཞིག་སྤྲོད་ངེས་པ་ནི་མིག་མཐོང་ལག་ཟིན་གྱི་སྣང་ཚུལ་ཞིག་ཆགས་ཡོད། འདི་ནི་འཛམ་གླིང་དམག་ཆེན་གཉིས་པ་དང་ཞི་བའི་དམག་འཁྲུག་སོགས་ཀྱི་མཇུག་འབྲས་ལས་ཆབ་དཔལ་རིག་གསུམ་གྱི་བསྟན་པ་དར་ཞིང་རྒྱས་པ་ལ་བརྟེན་ནས་བྱུང་བ་ཞིག་རེད་ཅེས་བརྗོད་ན་ལོ་རྒྱུས་ཀྱིས་འུ་ཚོར་བདེན་དཔང་དང་ར་སྤྲོད་བྱེད་ཐུབ་པ་ཞིག་རེད། དེར་བརྟེན་ང་ཚོས་དེ་རིང་ཁ་སང་འཛམ་གླིང་ཡུལ་གྲུ་གང་སར་ཚ་ཚ་འུར་འུར་གྱིས་གླེང་བཞིན་པ་དང། དཔྱད་ཀྱིན་པ། ལྟ་བཞིན་པ། དེ་བཞིན་ཉན་བཞིན་པའི་ཨ་རིའི་སྲིད་འཛིན་བགྲེས་གཞོན་གཉིས་ཀྱི་འོས་འདེམས་ཐེངས་ ༥༧ པ་དེ་གཤམ་ནས་ཅུང་ཙམ་གླེང་བར་བྱ།
ཨ་རིའི་སྲིད་འཛིན་འོས་འདེམས་ཀྱི་ལོ་རྒྱུས་མདོར་བསྡུས།
ཨ་མེ་རི་ཁའི་སྲིད་འཛིན་འོས་འདེམས་ཀྱི་ལས་གཞི་ཐོག་མ་དེ་ཕྱི་ལོ ༡༧༨༩ ལོ་ནས་བཟུང་འགོ་བཙུགས་པ་དང། དེ་ཡང་ཨ་མེ་རི་ཀའི་རྩ་ཁྲིམས་ཆེན་མོའི་དོན་ཚན་གཉིས་པས་འོས་བསྡུའི་འཐུས་ཚོགས་ཐེ་བའི་སྲིད་འཛིན་འོས་འདེམས་ཀྱི་ཐབས་ལམ་དེ་ཐོག་མར་གཏན་ལ་ཕབས་ཤིང། དེ་ནི་ཨ་རིའི་རྒྱལ་ཡོངས་གྲོས་ཚོགས་ཀྱིས་སྲིད་འཛིན་འདེམས་དགོས་བསམ་པའི་རྩ་ཁྲིམས་བཟོ་མཁན་དང་། ཨ་རིའི་སྲིད་འཛིན་དེ་བཞིན་མི་མང་རང་གིས་འོས་ཤོག་འཕངས་ནས་འོས་འདེམས་བྱ་དགོས་སེམས་མཁན་གཉིས་ཀྱི་བར་ནང་འགྲིག་ཡོང་ཆེད་དུ་གཏན་འབེབས་བྱས་པ་ཞིག་རེད། ཨ་རིའི་སྲིད་འཛིན་ནི་ཐད་ཀར་མིན་པའི་འོས་ཤོག་གི་ལམ་ནས་འོས་འདེམས་བྱེད་ཀྱིན་ཡོད་ལ། དེ་ཡང་ཨ་རིའི་མི་སེར་ཚོས་གསང་བའི་འོས་ཤོག་འཕངས་ནས་འོས་བསྡུའི་འཐུས་མི་གདམས་པ་དང་། འདེམས་ཐོན་བྱུང་བའི་འཐུས་མི་འདི་དག་གིས་སྲིད་འཛིན་དང་སྲིད་འཛིན་གཞོན་པ་གཉིས་ཐད་ཀར་འདེམས་ཀྱི་ཡོད། སྲིད་འཛིན་འོས་འདེམས་ཀྱི་ལས་གཞི་དེ་བཞིན་ལོ་བཞི་རེའི་མཚམས་སུ་བྱེད་ཀྱི་ཡོད་ལ། ཕྱི་ལོ་ ༡༧༨༨ ནས་འགོ་བཙུགས་སྟེ་ཕྱི་ལོ་ ༢༠༠༨ པར་ཁྱོན་བསྡོམས་སྲིད་འཛིན་འོས་འདེམས་ཐེངས་ ༥༦ གནང་ཡོད། ཕྱི་ཟླ་ ༡༡ པའི་ཚེས་ ༢ ནས་ ༨ པར་གྱི་རེས་གཟའ་མིག་དམར་ཉིན་སྲིད་འཛིན་འོས་འདེམས་ཐེངས་ ༥༧ པའི་ཉིན་མོ་ཡིན་པས། སྲིད་འཛིན་གྱི་འོས་འདེམས་དེ་སྤྱི་མཐུན་མངའ་སྡེ་དང། མངའ་སྡེ་ཁག དེ་བཞིན་ས་ཁུལ་སོགས་ཀྱི་རྒྱལ་ཡོངས་འོས་འདེམས་འགྲན་བསྡུར་ཉིན་མོ་དང་མཉམ་དུ་ཁེལ་ཡོད་པ་རེད། ཆེས་ཉེ་དུས་ཀྱི་འོས་འདེམས་དེ་ཕྱི་ལོ་ ༢༠༠༨ ཟླ་ ༡༡ ཚེས་ ༤ ཡིན་ལ། རྗེས་མ་དེ་ནི་ལོ་འདིའི་ཕྱི་ཟླ་ ༡༡ ཚེས་ ༦ ཉིན་མོ་ཡིན། འོས་འདེམས་བྱེད་སྟངས་དེ་བཞིན་སྤྱི་མཐུན་མངའ་སྡེ་དང་མངའ་སྡེའི་གཞུང་གཉིས་ཀྱི་ཁྲིམས་ལུགས་ཀྱིས་སྟངས་འཛིན་བྱེད་ཀྱིན་ཡོད་ལ། མངའ་སྡེ་རེ་ལ་ཨ་རིའི་རྒྱལ་ཡོངས་ཚོགས་ཆེན་ནང་དུ་སོ་སོའི་སྐུ་ཚབ་དང་གྲོས་ཚོགས་གོང་མིའི་ཚོགས་མི་ཅི་ཡོད་ཀྱི་གྲངས་འབོར་དང་མཚུངས་བར་འོས་བསྡུའི་འཐུས་ཚོགས་ཡང་དེ་ལྟར་བགོ་འགྲེམས་བྱེད་ཀྱིན་ཡོད། ཝ་ཤིན་ཌོན་ ཌེ་སེ་ལ་ཆ་མཚོན་ན་མངའ་སྡེ་ཆུང་ཤོས་དང་གཅིག་མཚུངས་ཀྱི་འོས་བསྡུ་བའི་ཐོབ་ཐང་དེ་སྤྲད་ཡོད་ལ། ཨ་རིའི་མངའ་ཁོངས་ས་ཁུལ་ཁག་ལ་འོས་བསྡུའི་འཐུས་ཚོགས་ཀྱི་ནང་དུ་ཆ་ཤས་མེད།
སྲིད་འཛིན་གྱི་འོས་མི་འདེམས་སྟངས།
ད་ལྟའི་ཨ་རིའི་སྲིད་འཛིན་གྱི་འོས་མི་འདེམས་སྟངས་ནི་གཞི་རིམ་འོས་འདེམས་དང་འོས་མི་གཏན་འབེབས་བཅས་ཆ་ཤས་ཆེན་པོ་གཉིས་གྱིས་གྲུབ་ཡོད་ལ། ཨ་རིའི་རྩ་ཁྲིམས་ཀྱི་ནང་དུ་བརྒྱུད་རིམ་ཆེན་པོ་འདི་གཉིས་ཀ་དམིགས་སུ་བཀར་ནས་གསལ་སྟོན་བྱས་མེད་མོད། འདི་ནི་ཆབ་སྲིད་ཚོགས་པ་དང་མངའ་སྡེ་སོགས་ཀྱིས་གོང་སྤེལ་དུ་བཏང་བའི་འོས་འདེམས་ཀྱི་བརྒྱུད་རིམ་རིང་མོ་ཞིག་ཆགས་ཡོད། དེ་ཡང་སྲིད་འཛིན་གྱི་གཞི་རིམ་འོས་འདེམས་དང་ཇུས་སྟོན་ཚོགས་ཆུང་གྲ་སྒྲིག་བྱ་རྒྱུ་ནི་མངའ་སྡེ་དང་ས་ཁུལ་རེ་རེའི་ནང་དུ་ལག་བསྟར་བྱེད་བཞིན་པའི་མུ་འབྲེལ་ལས་དོན་ཞིག་རེད་ལ། འོས་མི་གཏན་འབེབས་དང་འཆར་འགོད་ལས་འགུལ་བཟོ་རྒྱུ་ནི་སྲིད་དོན་ཚོགས་པ་སོ་སོས་སྒྲུབ་ཀྱིན་པའི་བརྒྱུད་སྦྲེལ་གནད་དོན་ཞིག་ཀྱང་ཡིན། འདི་ལྟར་ལོ་གཉིས་ཙམ་ཀྱི་གོང་ནས་བཟུང་དུས་ཚོད་དང་དཔལ་འབྱོར་སོགས་ཀྱི་འགྲོ་སོང་མང་པོ་ཞིག་བེད་སྤྱད་དེ་སྲིད་དོན་ཚོགས་པ་ཁག་གིས་སོ་སོའི་སྲིད་འཛིན་ཀྱི་འོས་མི་འདེམས་སྒྲུག་བྱེད་པ་དང་། འོས་མི་དེ་ཨ་རིའི་སྲིད་འཛིན་ལ་འདེམས་ཐོན་འབྱུང་བར་དངོས་ཤུགས་བརྒྱུད་གསུམ་ནས་འོས་ཤོག་ཐོབ་ཐབས་ཀྱི་འབད་བརྩོན་རབ་དང་རིམ་པ་མང་པོ་ཞིག་བྱེད་ཀྱིན་ཡོད་པ་རེད། འདི་ནི་སྲིད་འཛིན་གྱི་འོས་མི་ངེས་ཅན་ཞིག་འབྱུང་བའི་ཆེད་དུ་ཡིན་པ་འགྲེལ་བརྗོད་བྱེད་ཀྱིན་ཡོད། སྲིད་འཛིན་གྱི་འོས་མི་འདེམས་སྟངས་འདི་ཡང་ཐད་ཀར་མིན་པའི་འོས་འདེམས་བྱེད་ཕྱོགས་ཤིག་སྟེ་འོས་འདེམས་པ་ཚོས་གསང་བའི་འོས་ཤོག་གི་ལམ་ནས་སྲིད་དོན་ཚོགས་པ་གང་གི་འོས་མི་འགའ་གདམས་རྗེས། འོས་མི་ཚོས་ནང་ཁུལ་དུ་བགྲོ་གླེང་དང་འོས་ཤོག་འགྲན་བསྡུར་གྱི་ལམ་ནས་ཚོགས་པ་དེའི་སྲིད་འཛིན་གྱི་འོས་མིར་འོས་ཤོག་མང་ཤོས་ཐོབ་མཁན་དེ་འདེམས་སྒྲུག་གིས་སྲིད་འཛིན་གྱི་འོས་མི་དངོས་དེ་ཐག་གཅོད་བྱེད་པ་ཡིན།
ཨ་རིའི་སྲིད་དོན་ཚོགས་པ་དང་སྲིད་འཛིན་འོས་མིའི་ཆབ་སྲིད་ཉམས་མྱོང།
མང་གཙོའི་རྒྱལ་ཁབ་ཨ་རི་ལ་ཆ་མཚོན་ན་མང་གཙོའི་ཆ་ཤས་གལ་ཆེན་དུ་གྲུབ་པའི་ཆབ་སྲིད་ཀྱི་ཚོགས་པ་གང་མང་ཞིག་ཡོད་ཀྱང་། མི་རིགས་སྣ་མང་དང་རིག་གཞུང་འདྲ་མིན་གྱིས་གྲུབ་པའི་རྒྱལ་ཁབ་འདིའི་ཆབ་སྲིད་དཔལ་ཡོན་ཡར་རྒྱས་ཀྱི་ཁྲོད་དུ་སྲིད་དོན་ཚོགས་པ་ཁག་གཉིས་ཀྱིས་ཨ་རིའི་ཆབ་སྲིད་འཛིན་སྐྱོང་དང་། ཚོང་ལས་དོན་གཉེར། དཔལ་འབྱོར་གོང་འཕེལ། དམག་ཤུགས་རྒྱ་བསྐྱེད། སྤྱི་ཚོགས་སྲ་བརྟན། རིག་གནས་གསར་གཏོད་སོགས་ཀྱི་ཐད་ལ་དབང་བསྒྱུར་བྱས་དང་བྱེད་ཀྱིན་ཡོད། སྲིད་དོན་ཚོགས་པ་དེ་གཉིས་ནི་དམངས་གཙོ་ཚོགས་པ་དང། སྤྱི་མཐུན་ཚོགས་པ་གཉིས་ཡིན་ལ་ཨ་རིའི་སྲིད་འཛིན་འོས་འདེམས་ཀྱི་ལས་གཞི་ཁྲོད་དུ་ཚ་ཚ་འུར་འུར་གྱིས་འགྲན་རྩོད་ཆེ་ཞིང་རྒྱལ་ཕམ་ཐག་གཅོད་བྱེད་མཁན་ཡང་ཚོགས་པ་འདི་གཉིས་ཡིན། སྲིད་དོན་ཚོགས་པ་འདི་གཉིས་ནི་གནའ་ནས་ད་བར་ཨ་རིའི་ཆབ་དཔལ་དམག་དོན་སོགས་ཀྱི་འཛིན་སྐྱོང་བྱ་གཞག་ལ་ལག་རྗེས་ཧ་ཅང་ཆེ་བ་ཞིག་ཡིན་ལ། ཨ་རི་དེ་བཞིན་རྒྱལ་སྤྱིའི་ཁྲོད་དུ་སྟོབས་ཆེན་རྒྱལ་ཁབ་ཅིག་ཏུ་བསྐྲུན་མཁན་ཡང་ཚོགས་པ་འདི་གཉིས་རེད་ཅེས་བརྗོད་ཀྱང་སྒྲོ་འདོགས་ཀྱི་ཚད་དུ་མི་འགྲོ་སྙམ། སྟོབས་ཆེན་རྒྱལ་ཁབ་འདིའི་ཆབ་སྲིད་འཛིན་སྐྱོང་གི་ལོ་རྒྱུས་ཀྱི་གླེགས་བམ་གསེབ་ཏུ་སྲིད་འཛིན་བགྲེས་གཞོན་གཉིས་ཕལ་ཆེ་བ་ཞིག་ཚོགས་པ་འདི་གཉིས་ཀྱི་འོས་མི་དང་སྐུ་ཚབ་ལས་གྲུབ་པ་ཤ་སྟག་ཅིག་ཆགས་ཡོད་པ་རེད། འོན་ཀྱང་ཚོགས་པ་གཞན་ཁག་གི་འོས་མི་ཡང་སྲིད་འཛིན་གྱི་འོས་འདེམས་འགྲན་བསྡུར་ལ་ཞུགས་མ་ཆོག་པ་མེད་པ་རེད་ལ་དངོས་གཞི་འོས་འདེམས་སུ་ཡང་མཉམ་ཞུགས་བྱ་ཆོག་པ་ཞིག་རེད།
དེ་ཡང་སྲིད་འཛིན་ལ་འོས་འདེམས་བྱུང་བའི་འོས་མི་རྣམས་ཀྱི་ཆབ་སྲིད་རྒྱབ་ལྗོངས་ལ་དཔྱད་པ་ཞིག་བྱས་ན། སྲིད་འཛིན་མང་ཆེ་བ་ཞིག་ནི་ཨ་རིའི་གྲོས་ཚོགས་གོང་མིའི་འཐུས་མི་གནང་མྱོང་མཁན་དང། ཡང་ན་མངའ་སྡེའི་སྤྱི་ཁྱབ་བློན་ཆེན་ཟུར་པ། དེ་བཞིན་སྲིད་འཛིན་གཞོན་པ་གནང་མྱོང་མཁན་གྱིས་གྲུབ་ཡོད། དེ་དག་གནང་མ་མྱོང་མཁན་གྱི་སྲིད་འཛིན་གྲངས་འགའ་ཤས་ལས་མེད་པ་རེད། ཨ་རིའི་ཕྱི་སྲིད་བློན་ཆེན་ནི་ཕོ་བྲང་དཀར་པོའི་ཀ་བ་ལྟ་བུ་ཡིན་དུས་བརྒྱད་ཅུ་གྱ་གྲངས་ནང་དེ་སྔོན་ཕྱི་སྲིད་བློན་ཆེན་གནང་མྱོང་བ་དང་རྗེས་སུ་ཨ་རིའི་སྲིད་འཛིན་དུ་འདེམས་ཐོན་བྱུང་བ་ཡོད། གང་ལྟར་འདས་གྲོངས་སུ་གྱུར་བ་དང་རྩ་དགོངས་ཞུས་པ། དེ་བཞིན་བསྐྱར་དུ་གདམས་པ་སོགས་ཨ་རིའི་སྲིད་འཛིན་འོས་འདེམས་ཀྱི་ལོ་རྒྱུས་ཁྲོད་དུ་འདེམས་ཐོན་བྱུང་བའི་སྲིད་འཛིན་མང་ཆེ་བ་ཞིག་ནི་ཆབ་སྲིད་ཀྱི་ཉམས་མྱོང་དང་ཤེས་ཡོན་གྱི་རྒྱབ་ལྗོངས་ངེས་ཅན་ལྡན་པ་ཤ་སྟག་ཅིག་ཆགས་ཡོད་པ་རེད།
ཕྱི་ལོ་ ༢༠༠༨ གྱི་འོས་འདེམས་དེ་མ་བརྩིས་པར་ཉེ་ཆར་གྱི་ཨ་རིའི་སྲིད་འཛིན་འོས་འདེམས་ལ་ཞིབ་ལྟ་ཞིག་བྱས་ན་འོས་འདེམས་ཁྲོད་རྒྱལ་ཁའི་གྲུབ་འབྲས་ཐོབ་མཁན་གྱི་འོས་མི་མང་ཆེ་བ་ཞིག་ནི་མངའ་སྡེའི་སྤྱི་ཁྱབ་བློན་ཆེན་ཁག་ཆགས་ཡོད་པའི་འཕོ་འགྱུར་ཞིག་མངོན་གསལ་དུ་འབྱུང་བཞིན་ཡོད་པ་དང་། དཔེར་ན་སྐབས་སྔོན་མར་འདེམས་ཐོན་བྱུང་བའི་སྲིད་འཛིན་ཁག་དྲུག་གི་ནང་ནས་བཞི་ནི་མངའ་སྡེའི་སྤྱི་ཁྱབ་བློན་ཆེན་ནམ་འགན་འཛིན་ཏག་ཏག་ཆགས་ཡོད་ལ་ས་བབས་གནས་སྟངས་ཀྱི་ཆ་ནས་ཨ་རིའི་མངའ་སྡེ་ཆེ་ཤོས་ཁག་གམ་ཡང་ན་ལྷོ་ཤར་མངའ་སྡེ་ཁག་ནས་ཐོན་ཡོང་བའི་སྤྱི་ཁྱབ་བློན་ཆེན་རྐྱང་ཆགས་ཡོད་པ་རེད། གང་ལྟར་སྲིད་འཛིན་བཅུ་དྲུག་གི་ནང་ནས་བདུན་ནི་ཨ་རིའི་སྲིད་འཛིན་དུ་འདེམས་སྐབས་མངའ་སྡེའི་སྤྱི་ཁྱབ་བློན་ཆེན་ལས་ཐོག་ཡིན་ལ། གཞན་ཁག་ནི་མངའ་སྡེའི་སྤྱི་ཁྱབ་བློན་ཆེན་ཟུར་པ་རྐྱང་ཆགས་ཡོད་པ་རེད། དེ་བཞིན་ཨ་རིའི་སྲིད་འཛིན་གྱི་ལས་ཀ་ནས་འཁྱུར་རྗེས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། གྲོས་ཚོགས་གོང་མའི་འཐུས་མི། ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་སོགས་གནང་མྱོང་མཁན་ཡང་མང་པོ་ཞིག་ཡོད་པ་རེད།
འཕྲུལ་ཆས་བརྒྱུད་ལམ་དང་སྲིད་འཛིན་འོས་འདེམས།
འདས་ཟིན་པའི་ཨ་རིའི་སྲིད་འཛིན་འོས་འདེམས་ཀྱི་རྒྱལ་ཕམ་ལོ་རྒྱུས་ལ་ཕྱིར་ལྟ་ཞིག་བྱས་ན། འཕྲུལ་ཆས་དང་བརྒྱུད་ལམ་གཉིས་ཀྱིས་སྲིད་འཛིན་འོས་འདེམས་ཀྱི་ལས་འགུལ་ལ་དགེ་ཕན་བླ་མེད་ཅིག་བསྐྲུན་ཡོད་པ་རེད། དེ་ཡང་ཕྱི་ལོ་བརྒྱད་ཅུ་གྱ་གྲངས་ནང་དུ་རླུང་འཕྲིན་དང་བརྙན་འཕྲིན་གསར་གཏོད་ཀྱིས་ཨ་རིའི་རྒྱལ་ཡོངས་སུ་སྲིད་འཛིན་འོས་མིའི་ཆབ་སྲིད་ལས་འགུལ་རྣམས་དྲིལ་བསྒྲགས་ཤུགས་ཆེན་བྱེད་ཐུབ་པ་བྱུང་ཡོད་པ་མ་ཟད། ཁྱབ་བསྒྲགས་དེ་དག་བརྒྱུད་སྲིད་དོན་ཚོགས་པ་ཁག་གི་འོས་མི་ངོ་སྤྲོད་དང། ཆབ་སྲིད་ཀྱི་འཆར་གཞི་བརྒྱུད་སྤྲོད་སོགས་ཀྱི་ལས་འགུལ་མང་པོ་ཞིག་ཀྱང་བྱེད་ནུས་ཡོད་པ་རེད། དགུ་བཅུ་ལོའི་ལོ་དཀྱིལ་ནས་བཟུང་དྲ་རྒྱ་ཁྱབ་སྤེལ་དུ་ཕྱིན་པ་དང་བསྟུན། དྲ་རྒྱའི་ནུས་ཤུགས་དེ་བཞིན་སྲིད་འཛིན་འོས་འདེམས་ལས་འགུལ་གྱི་ཆ་ཤས་གལ་ཆེན་ཞིག་ཆགས་པ་རེད། ལྷག་པར་དུ་ ༢༠༠༠ ལོར་རྗོར་རྗི་བྷུ་ཤི་དང་ཨལ་གོར་གཉིས་སྲིད་འཛིན་འོས་མི་ཡིན་སྐབས་སུ་སོ་སོའི་ཆབ་སྲིད་ཀྱི་ལས་འགུལ་གནས་ཚུལ་ཁག་སྤྱི་ཚོགས་དྲ་ཚིགས་བརྒྱུད་དུས་བསྟུན་ཁ་གསབ་བྱེད་ཐུབ་ཡོད་པ་རེད་ལ། ༢༠༠༤ ལོར་བཏོན་པའི་དྲ་རྒྱའི་མྱུལ་ཞིབ་སྐོར་གྱི་སྙན་ཐོ་ཞིག་གི་ནང་དུ་ཨ་རིའི་མི་སེར་གྱི་བརྒྱ་ཆ་བཞི་བཅུ་ཞེར་དགུས་དྲ་རྒྱ་བརྒྱུད་སྲིད་འཛིན་གྱི་འོས་མི་སྐོར་ལ་ཤེས་རྟོགས་བྱེད་ཀྱིན་པ་དང་། བརྒྱ་ཆ་ཉེར་བརྒྱད་ཀྱིས་ཁོང་ཚོས་དུས་རྟག་ཏུ་དྲ་རྒྱ་བརྒྱུད་དེའི་སྐོར་ཀྱི་གནས་ཚུལ་རེག་ཐབས་བྱེད་ཀྱིན་ཡོད་པ་འགྲེལ་བརྗོད་བྱས་ཡོད། དེ་ཡང་ ༢༠༠༨ ལོར་སྤྱི་ཚོགས་དྲ་རྒྱ་ནི་མི་མང་གི་བསམ་ཚུལ་མཚོན་པའི་བརྒྱུད་ལམ་མམ་མི་མང་ཕན་ཚུན་བར་དང་ལས་འགུལ་སོགས་ལ་རྒྱུས་ལོན་བྱེད་སྤྱད་ཀྱི་ལག་ཆ་རུ་གྱུར་བ་རེད། དེ་བཞིན་སྲིད་འཛིན་གྱི་འོས་མི་གལ་ཆེན་ཁག་ཚང་མས་རང་ཉིད་ལ་ལ་ཡོད་པའི་ ༼ངོ་དེབ།༽ དང་ ༼ངའི་མཁའ་དབྱིངས།༽ སོགས་མཚོན་པའི་སྒེར་གྱི་སྤྱི་ཚོགས་དྲ་ཚིགས་ཡོད་པ་དག་བེད་སྤྱོད་བྱེད་ཀྱིན་ཡོད་པ་རེད་ལ། འོས་མི་དེའི་སྐད་གྲགས་ནི་གཟའ་འཁོར་རེར་དྲ་ཚིགས་དེ་དག་གི་སྟེང་དུ་ཁོང་ལ་གྲོགས་པོ་ག་ཚོད་ཡོད་པའི་ཚད་གཞི་དང་དེ་དག་གི་སྟེང་དུ་མྱུལ་ཞིབ་བྱེད་མཁན་ཅི་ཙམ་ཡོད་པའི་གྲངས་ཚད་སོགས་ཀྱིས་ཚད་འཇལ་བཞིན་ཡོད་པ་རེད། ད་དུང་གཟུགས་བརྙན་ལྡན་པའི་དྲ་ཚིགས་གཞན་དག་བརྒྱུད་ནས་འོས་མི་ཚོའི་གསུང་བཤད་དང་། ལས་དོན་སོགས་གླ་མེད་ངང་འགྲེམས་སྤེལ་ཁྱབ་བསྒྲགས་བྱེད་ཀྱིན་ཡོད། ཨ་རི་ལ་ཆ་མཚོན་ན་གཞོན་སྐྱེས་མང་པོ་ཞིག་ཐེ་བའི་མི་སེར་གང་མང་ཞིག་གིས་དྲ་རྒྱའི་ལམ་ཁ་འདི་བརྒྱུད་ནས་བར་སྐབས་ཀྱི་འོས་མིའི་འོས་འདེམས་ཁོངས་སུ་ཡོད་པའི་འོས་མི་ཚོའི་སྐོར་ལ་གནས་ཚུལ་ཤེས་རྟོགས་བྱེད་ཀྱིན་ཡོད་པའི་གྲངས་ཚད་དེ་ཧ་ཅང་གི་ཁྱབ་རྒྱ་ཆེ་བའི་གནད་དོན་ཞིག་ཆགས་ཡོད་དུས། འཕྲུལ་ཆས་དང་བརྒྱུད་ལམ་ཁག་ནི་སྲིད་འཛིན་འོས་འདེམས་ཀྱི་བརྒྱུད་རིམ་ཁྲོད་ཆེས་མེད་དུ་མི་རུང་བའི་ཆ་རྐྱེན་གལ་ཆེན་ཞིག་ཏུ་གྲུབ་ཡོད་པ་ཁས་ལེན་བྱེད་ཀྱི་ཡོད་པ་རེད། ཨ་རི་རྒྱལ་ཁབ་ཀྱི་སྲིད་འཛིན་འོས་འདེམས་དེ་བཞིན་ ༡༧༨༨ ལོར་འགོ་ཚུགས་པ་ནས་བཟུང་སྲིད་འཛིན་འོས་འདེམས་ཀྱི་ལོ་རྒྱུས་ཁྲོད་དུ་དུས་སྐབས་ཐེངས་གཉིས་ལ་སྲིད་འཛིན་གཅིག་མུ་མཐུད་དུ་བསྐྱར་འདེམས་བྱུང་བ་ཧ་ཅང་མང་ལ། དེ་ཡང་ཨ་རིའི་སྲིད་འཛིན་དང་པོ་རྗོར་རྗི་ཝ་ཤིན་ཌོན་ནས་འགོ་ཚུགས་སྟེ་ད་བར་སྲིད་འཛིན་གཅིག་གིས་དུས་སྐབས་གཉིས་བསྟུན་མར་གནང་མཁན་དང་དུས་སྐབས་གསུམ་ལ་གནང་མཁན། དུས་སྐབས་གཅིག་དང་། དེ་བཞིན་ལོ་བཞིའི་དུས་ཡུན་ཆ་ཚང་ལ་གནང་མ་ཐུབ་མཁན་བཅས་ཁྱོན་བསྡོམས་སྲིད་འཛིན་སྐབས ༥༦ འོས་འདེམས་བྱུང་ཡོད་ལ་ཡོང་བཞིན་པའི་འོས་འདེམས་དེ་ནི་ཨ་རིའི་སྲིད་འཛིན་འོས་འདེམས་སྐབས་ ༥༧ པ་དེ་ཆགས་ཡོད་པ་རེད། ཐེངས་འདི་ལ་ཆ་མཚོན་ན་ཡང་ཨ་རིའི་ལས་ཐོག་སྲིད་འཛིན་ཨོ་བྷ་མ་མང་གཙོ་ཚོགས་པའི་འོས་མིར་ལངས་སྟེ་སྲིད་འཛིན་གྱི་གོ་གནས་ལ་བསྐྱར་འདེམས་བྱ་བར་འགྲན་རྩོད་བྱེད་ཀྱིན་ཡོད་ལ། ཁོའི་ཁ་གཏད་གཙོ་བོ་ནི་སྤྱི་མཐུན་ཚོགས་པའི་སྲིད་འཛིན་འོས་མི་མཱ་ས་ཆུད་སེ་ཐུ་མངའ་སྡེའི་སྤྱི་ཁྱབ་བློན་ཆེན་ཟུར་པ་མི་ཊི་རོམ་ནེ་ལགས་ཡིན་པ་རེད།
ཐེངས་འདིའི་སྲིད་འཛིན་འོས་མི་གཉིས་ཀྱི་ལས་འཆར་དང་ལངས་ཕྱོགས་གླེང་བ།
ཡོང་བཞིན་པའི་སྲིད་འཛིན་འོས་འདེམས་ཀྱི་འོས་མི་གཉིས་ནི་དམངས་གཙོ་ཚོགས་པའི་ལས་ཐོག་སྲིད་འཛིན་ཨོ་བྷ་མ་དང་སྤྱི་མཐུན་ཚོགས་པའི་འོས་མི་མེ་ཊི་ རོམ་ནེ་གཉིས་ཡིན་ལ། མེ་ཊི་རོམ་ནེ་ལགས་སྤྱི་མཐུན་ཚོགས་པའི་སྲིད་འཛིན་འོས་མིར་དངོས་སུ་འདེམས་ཐོན་བྱུང་བ་ནས་བཟུང། ཨ་རིའི་སྲིད་འཛིན་གྱི་གོ་གནས་དང་ཕོ་བྲང་དཀར་པོའི་བདག་དབང་ལ་འགྲན་རྩོད་བྱེད་པའི་ལས་འགུལ་དེ་ཡང་དངོས་སུ་འགོ་ཚུགས་པ་ལྟ་བུ་ཞིག་རེད། གང་ལྟར་ལོ་འགའ་ཤས་རིང་གི་ཨ་རིའི་ཕྱི་ནང་གི་གནས་སྟངས་ལ་བལྟས་ན། དཔལ་འབྱོར་གནད་དོན་དང། གཞིས་སྤོས་ཀྱི་དཀའ་ངལ། ཁོར་ཡུག་ཉམས་རྒུད། ཕྱི་སྲིད་ཀྱི་ལངས་ཕྱོགས་སོགས་ནི་སྲིད་འཛིན་འོས་མི་གཉིས་ཀྱིས་གླེང་གཞིར་གཙོ་བོར་གྱུར་ཞིང། ཐེངས་འདིའི་སྲིད་འཛིན་འོས་མིའི་ལས་འཆར་གྱི་གནད་དོན་གལ་ཆེན་ཁག་ཀྱང་ཆགས་ཡོད་པ་རེད། ཉེ་ལམ་ཨ་རིའི་སྲིད་འཛིན་ལས་ཐོག་ཨོ་བྷ་མ་དང་། སྲིད་འཛིན་འོས་མི་མེ་ཊི་ རོམ་ནེ་གཉིས་ཀྱི་གདོང་གཏུགས་བགྲོ་གླེང་ཐེངས་གསུམ་ལྷག་ལ་གནང་བ་དེའི་བརྗོད་གཞི་གཙོ་བོ་ཡང་གོང་གི་གནད་དོན་ཁག་ཆགས་ཡོད་ལ། ཆབ་སྲིད་ཉམས་ཞིབ་པ་ཚོས་འགྲེལ་བརྗོད་བྱས་པ་ལྟར་ན་དཔལ་འབྱོར་དཀའ་ངལ་གྱི་གནས་ཚུལ་དང་དེ་ཇི་ལྟར་གདོང་ལེན་བྱ་རྒྱུ་ནི་ཐེངས་འདིའི་སྲིད་འཛིན་འོས་འདེམས་འགྲན་རྩོད་ཁྲོད་འོས་མི་གཉིས་ཀྱིས་གླེང་སློང་གཙོ་བོར་གྱུར་བའི་གནད་དོན་དང་པོ་དེ་ཆགས་ཡོད་ཚུལ་གླེང་བཞིན་ཡོད། རྒྱུ་མཚན་ནི་ལོ་ཁ་ཤས་ཀྱི་རིང་ལ་ཨ་རིའི་དཔལ་འབྱོར་གནས་སྟངས་དེ་ཉམས་རྒུད་དུ་ཕྱིན་ནས། ཨ་རིའི་ནང་དུ་ལས་མེད་པའི་དཀའ་ངལ་ཆེན་པོ་ཞིག་འཕྲད་ཀྱིན་ཡོད་པའི་རྒྱུ་རྐྱེན་དུ་བྱས་ནས་ཡིན་པ་རེད། དེར་བརྟེན་སྤྱི་ཚོགས་ཀྱི་མིག་སྔའི་དཀའ་ངལ་འདི་དག་སྡོད་ཁང་གསར་རྒྱག་དང་ཡར་རྒྱས། འཕྲུལ་ཆས་དང་གློག་ཀླད་ཅན་གྱི་འཕྲོད་བསྟེན་བདག་གཅེས་བྱེད་ཐབས་རྒྱ་བསྐྱེད། འཕྱ་ཁྲལ་བཏང་སྙོམས་སོགས་ཀྱིས་ལས་ཀའི་མཐུན་རྐྱེན་གསར་བསྐྲུན་བྱ་རྒྱུ་དང་། ཕྱི་སྲིད་ཀྱི་ལངས་ཕྱོགས་ཐད་ནས། འཇིག་སྐུལ་རིང་ལུགས་པར་གདོང་ལེན་བྱ་སྟངས་དང་། ཨེ་ཤ་ཡའི་རྒྱལ་ཁབ་ཁག་གི་ནང་དུ་ཚོང་འབྲེལ་རྒྱ་བསྐྱེད། ཨེ་ཤ་ཡ་དབུས་མའི་གནད་དོན། ཨེ་སུ་རེལ་དང་པཱ་ལེ་སི་ཐན་གཉིས་ཀྱི་དཀའ་རྙོག ཨེ་རན་གྱི་རྡུལ་ཕྲན་མཚོན་ཆའི་སྐོར། དེ་བཞིན་ཨ་ཧྤུ་གྷ་ནི་སི་ཐན་ནང་ནས་ཨ་རིའི་དམག་མི་ཕྱིར་འཐེན་སོགས་ཀྱི་གནད་དོན་ཡིན་པ་རེད། ད་དུང་ཁྲིམས་འགལ་གྱི་གཞིས་སྤོས་དཀའ་ངལ་གྱི་ཐད་དང། མཚན་མཐུན་གཉེན་སྒྲིག་གི་སྐོར། སྔོན་རྩིས་དང་འཕྱ་ཁྲལ། བྱུང་སོང་ག་འཛོལ་སོགས་ཀྱི་ཐད་ལ་འོས་མི་གཉིས་ཀྱི་ལངས་ཕྱོགས་མི་འདྲ་བ་དང་གདོང་ལེན་བྱ་སྟངས་མི་འདྲ་བ་ཇི་ཡོད་སོགས་ཀྱི་ཆབ་དཔལ་རིག་གསུམ་གྱི་གནད་དོན་ཐད་བགྲོ་གླེང་ཞིབ་མོར་གནང་བ་དེས་ཆབ་སྲིད་ཉམས་ཞིབ་པ་དང་ཨ་རིའི་མང་ཚོགས་སོགས་ལ་སྲིད་འཛིན་འོས་འདེམས་ཀྱི་འགྲན་རྩོད་འདི་ལ་ལྟ་སྟངས་དང་སྣང་ཚུལ་མི་འདྲ་བ་མང་པོ་ཞིག་སྤྲད་ཡོད་པ་རེད་ལ། རྗེས་ཀྱི་ཨ་རིའི་སྲིད་འཛིན་དེ་སུ་ཐོབ་ཀྱི་ཐེ་ཚོམ་དང་དངངས་འཚབ་ཀྱི་ཁོར་ཡུག་ཅིག་ཀྱང་བསྐྲུན་ཡོད་པ་རེད།
ད་ལྟའི་གནས་བབས་དང་སྐྱོད་གནད།
ད་ལྟའི་ཨ་རི་ལ་ཆ་མཚོན་ན་དཔལ་འབྱོར་གྱི་དཀའ་ངལ་གཅིག་པོ་མ་ཡིན་པར་མངའ་སྡེ་མང་པོ་ཞིག་གི་ནང་དུ་བྱེ་མའི་རླུང་འཚུབ་སན་ཌེ་ཞེས་པའི་རང་བྱུང་གོད་འཆག་ཅིག་བྱུང་ནས་མི་སེར་ཁྲི་ཕྲག་ལྷག་གི་འཚོ་བ་ལ་དཀའ་ངལ་ཆེན་པོ་ཞིག་འཕྲད་ཀྱིན་པའི་དུས་ཚོད་ཀྱང་རེད། གོད་འཆག་འདིའི་རྐྱེན་གྱིས་མི་གྲངས་ ༥༠ ཙམ་འདས་གྲོགས་སུ་གྱུར་བ་དང་མི་སེར་འབུམ་བདུན་ལྷག་ལ་གློག་མེད་པའི་དཀའ་ངལ་ཁྲོད་ལྷག་ཡོད་ལ། དེ་བཞིན་འགྲུལ་ལམ་དང་སྡོད་ཁང་སོགས་ལ་ཆུ་ལོག་དང་རླུང་འཚུབ་ཀྱི་གནོད་སྐྱོན་ཚབས་ཆེན་ཕོགས་ནས་གཞུང་མང་གཉིས་ལ་དངོས་ཤུགས་བརྒྱུད་གསུམ་ནས་དཀའ་ཁག་གང་མང་ཞིག་འཕྲད་ཀྱིན་པ་རེད། གནས་ཚུལ་ཤེས་རྟོགས་བྱུང་བ་ལྟར་ན་ཐེངས་འདིའི་བྱེ་མའི་རླུང་འཚུབ་ཀྱིས་ཨ་རིའི་དཔལ་འབྱོར་ལ་ཨ་སྒོར་ཐེར་འབུམ་ལྔ་ལྷག་གིས་གྱོང་གུད་སྤྲོད་སྲིད་པའི་ཚོད་རྩིས་བྱེད་ཀྱི་ཡོད་འདུག འབྱུང་བའི་གནོད་འཚེ་འདིས་ཡོང་ལ་ཉེ་བའི་ཨ་རིའི་སྲིད་འཛིན་འོས་འདེམས་ལ་ཡང་ཤུགས་རྐྱེན་ཞིག་སྤྲོད་ངེས་པ་མང་པོ་ཞིག་གིས་བརྗོད་ཀྱི་ཡོད་ལ། ལྷག་པར་དུ་གནད་འགག་གི་དུས་སྐབས་འདི་ལ་མང་གཙོ་ཚོགས་པའི་སྲིད་འཛིན་འོས་མིའམ་ལས་ཐོག་སྲིད་འཛིན་ཨོ་བྷ་མ་མཆོག་གིས་གལ་ཆེའི་ཆབ་སྲིད་ལས་འགུལ་རྣམས་མཚམས་འཇོག་གིས་རང་བྱུང་གོད་འཆག་གི་འོག་ཏུ་མནར་བཞིན་པའི་མི་སེར་རྣམས་འཆག་འཇིག་ལས་སྐྱོབས་པའི་ལས་དོན་ཐོག་ལ་ཤུགས་གནོན་རྒྱག་རྒྱུ་ཡིན་སྐོར་ཕོ་བྲང་དཀར་པོའི་མགྲིན་ཚབ་པས་གསར་འགྱུར་བརྒྱུད་ལམ་ཁག་དུ་འགྲེ ལ་བརྗོད་བྱས་ཡོད་པ་རེད། དེ་བཞིན་ཐེངས་འདིའི་སེན་ཌི་ཞེས་པའི་བྱེ་མའི་དྲག་རླུང་འདིས་ཡོང་བཞིན་པའི་སྲིད་འཛིན་འོས་འདེམས་ཀྱི་ཉིན་མོ་དེ་ཡང་ཕར་འགྱངས་བྱ་སྲིད་པ་ཞིག་ཡིན་པའི་ཚོད་དཔག་ཀྱང་བྱེད་ཀྱི་ཡོད་ལ། ཐེངས་འདིའི་བྱེ་མའི་རླུང་ཚུབ་ཀྱིས་ཨ་རིའི་གཞུང་གི་དཔལ་འབྱོར་དང་མང་ཚོགས་ཀྱི་འཚོ་བ་ལ་སྤྲད་དང་སྤྲོད་ཀྱིན་པའི་གནོད་སྐྱོན་ལ་གདོང་ལེན་ཇི་ལྟར་བྱ་མིན་གྱི་མཇུག་འབྲས་དེས་ལས་ཐོག་སྲིད་འཛིན་ཨོ་བྷ་མའི་ཡོང་བཞིན་པའི་སྲིད་འཛིན་འོས་འདེམས་ཐད་ལ་ཕན་གནོད་ཀྱི་ཤུགས་རྐྱེན་གང་རུང་ཞིག་སྤྲོད་སྲིད་པའི་བསམ་ཚུལ་ཡང་སླེབས་ཀྱི་ཡོད་པ་རེད། གང་ལྟར་མིག་སྔའི་ཨ་རིའི་མི་མང་གི་དཔལ་འབྱོར་དཀའ་ངལ་ལ་མ་ལྟོས་པར་ཐེངས་འདིའི་སྲིད་འཛིན་འོས་འདེམས་ཀྱི་ལས་འགུལ་ཐད་ལ་ལོ་རྒྱུས་ཁྲོད་བྱུང་མ་མྱོང་བའི་འགྲོ་སོང་ཕོན་ཆེན་པོ་ཞིག་བཏང་དང་གཏོང་བཞིན་པའི་ཐད་ལ་མི་མང་པོ་ཞིག་གིས་སྐྱོན་བརྗོད་བྱེད་ཀྱིན་ཡོད་པ་རེད་ལ། དེ་བཞིན་སྲིད་འཛིན་འོས་མི་གཉིས་ཀྱི་བགྲོ་གླེང་ཁག་ཏུ་ཆབ་སྲིད་ཚོགས་པ་གཞན་གྱི་འཐུས་མི་མཉམ་ཞུགས་བྱེད་དུ་མ་བཅུག་པ་དང་། སྤྱི་མཐུན་ཚོགས་པའི་འོས་མི་མེ་ཊི་ རོམ་ནེ་མཆོག་གི་བགྲོ་གླེང་སྐབས་ཀྱི་ཕྱི་སྲིད་དང་འབྲེལ་བའི་ལས་འཆར་གྱི་ཞན་ཆ། དེ་བཞིན་འཛམ་གླིང་གི་ཚ་དྲོད་འཕེལ་བའི་ཁོར་ཡུག་ཉམས་རྒུད་ཀྱི་སྐོར་ལ་འོས་མི་གཉིས་ཀྱིས་གལ་གནད་མ་སྤྲད་པ་སོགས་ཀྱི་གནད་དོན་ཐད་ལ་ཡང་སྐྱོན་བརྗོད་རབ་དང་རིམ་པ་ཞིག་སླེབས་ཀྱིན་ཡོད་པ་རེད། ལྷག་པར་དུ་འོས་བསྡུའི་འཐུས་ཚོགས་ཀྱི་སྐོར་ལ་ཡང་ཕྱོགས་མང་པོ་ཞིག་ནས་འགྱུར་བ་གཏང་དགོས་པའི་བསམ་འཆར་ཤུགས་ཆེན་ཞིག་ཀྱང་ཡོང་བཞིན་པ་རེད།
ཡོང་བཞིན་པའི་ཨ་རིའི་སྲིད་འཛིན་དང་ཨེ་ཤ་ཡ།
ཡོང་བཞིན་པའི་ཨ་རིའི་སྲིད་འཛིན་ཀྱི་གནད་དོན་སྐོར་ལ་གླེང་སློང་བྱ་ན་ཨེ་ཤ་ཡའི་རྒྱལ་ཁབ་ཁག་དང་ཨ་རིའི་བར་གྱི་འབྲེལ་བ། དེ་བཞིན་འབྱུང་ལ་ཉེ་བའི་ཨེ་ཤེ་ཡའི་རྒྱལ་ཁབ་གང་མང་ཞིག་གི་དབུ་ཁྲིད་གསར་འདེམས་ཀྱི་རྗེས་སུ་ཨ་རི་དང་ཨེ་ཤ་ཡའི་ཡུལ་ལུང་ཁག་བར་གྱི་ཆབ་སྲིད་དཔལ་འབྱོར་གྱི་འབྲེལ་ལམ་ལ་འཕོ་འགྱུར་ཅི་ཡོང་སོགས་ཀྱི་གནད་དོན་ནི་ཆབ་སྲིད་ཞིབ་འཇུག་པ་ཚོའི་རྩོད་གཞིར་གྱུར་བའི་གླེང་གཞི་ཞིག་ཆགས་ཡོད་པ་རེད་ལ། འབྱུང་འགྱུར་གྱི་ཨ་རིའི་སྲིད་འཛིན་གསར་པས་དོ་སྣང་ཆེ་ཆེར་སྤྲོད་ངེས་པའི་ལས་དོན་ཞིག་ཀྱང་ཨེ་ཤེ་ཡའི་ས་ཁུལ་ཁག་ཡིན་པ་རེད། འབྱུང་ངེས་ཤིང་སླེབས་ཉེ་བའི་ཨེ་ཤ་ཡའི་འགོ་ཁྲིད་བརྗེ་ལེན་དེས་ཨ་རི་དང་ཨེ་ཤེ་ཡའི་རྒྱལ་ཁབ་ཁག་བར་གྱི་འབྲེལ་ལམ་དེ་སྔར་བཞིན་གནས་ཐུབ་པའི་དབང་དུ་བཏང་ཡང་། འཕོ་འགྱུར་འདིས་ད་ལྟའི་སྲིད་འཛིན་འོས་འདེམས་ཀྱི་འགྲན་རྩོད་ལ་དེ་ཙམ་གྱིས་ཤུགས་རྐྱེན་མེད་པ་ཞིག་རེད། འོན་ཀྱང་ཕྱི་ཟླ་ ༡༡ པའི་ཚེས་ ༦ ཉིན་མོའི་འོས་འདེམས་ཁྲོད་རྒྱལ་ཁ་ཐོབ་པའི་སྲིད་འཛིན་གསར་པ་དེས་རྒྱ་ནག་གཙོ་བྱས་པའི་ཨེ་ཤ་ཡའི་རྒྱལ་ཁབ་ཁག་གི་དངངས་འཚབ་ཆེ་བའི་དཀའ་གནད་ཁག་ལ་འབྲེལ་འདྲིས་ཐག་གཅོད་ཇི་ལྟར་བྱ་མིན་དེ་གནད་དོན་གཙོ་བོ་ནང་གི་གཙོ་བོ་དེ་རེད། འགོ་ཁྲིད་བརྗེ་ལེན་བྱ་ལ་ངེས་པའི་ཤར་ཨེ་ཤ་ཡའི་དཔལ་འབྱོར་སྟོབས་ཅན་གྱི་རྒྱལ་ཁབ་རྒྱ་ནག་དང། ཉི་འོང། ལྷོ་ཀོ་རི་ཡ་རྣམས་ས་ཁུངས་རྩོད་རྙོག་གི་ཀློང་དུ་ལྷག་ཡོད་ལ། རྒྱལ་ཁབ་འདི་དག་གི་ནང་དུ་འདེམས་ལ་ཉེ་པའི་འགོ་ཁྲིད་གསར་པ་ཚོ་ནི་རྗེས་སུ་ཨ་རི་མཉམ་དུ་འབྲེལ་ལམ་ཇི་འདྲ་ཞིག་འཛུགས་མིན་ཐག་གཅོད་མཁན་གྱི་རྒྱུ་རྐྱེན་གཙོ་བོ་ཁག་ཆགས་ཡོད། ཨ་རིའི་སྲིད་འཛིན་འོས་འདེམས་ཆེན་མོ་བྱས་ནས་ཉིན་གཉིས་ཀྱི་རྗེས་སུ་རྒྱ་ནག་གི་ལོ་བཅུ་ཕྲག་ལྷག་སོང་བའི་རྒྱ་ནག་དམར་ཕྱོགས་ཚོགས་པའི་འགོ་ཁྲིད་གསར་འདེམས་བྱ་རྒྱུ་ངེས་པ་རེད་ལ། དེ་བཞིན་ཉི་འོང་གིས་ཀྱང་ཟླ་ངོ་གཉིས་རིང་སྲིད་བློན་ཐེངས་བདུན་པ་འདེམས་རྒྱུ་ཡིན་པ་རེད། དེ་དང་བསྟུན་ཕྱི་ཟླ་བཅུ་གཉིས་ནང་དུ་ལྷོ་ཀོ་རི་ཡའི་རྒྱལ་ཁབ་ཀྱིས་ཀྱང་སྲིད་འཛིན་འོས་འདེམས་ཀྱིས་བྱང་ཀོ་རི་ཡ་དང་ལྷན་དུ་སྔར་ལས་འབྲེལ་བ་ཞི་འདུམ་ཡོང་ཐབས་ལ་འབད་བརྩོན་བྱ་ངེས་པ་སོགས་ཀྱི་ཆབ་སྲིད་ཀྱི་འཕོ་འགྱུར་གལ་ཆེན་མང་པོ་ཞིག་བསྟུན་མར་འབྱུང་གི་ཡོད་དུས། ཨ་རི་དང་རྒྱ་ནག་གི་འབྲེལ་བས་ས་ཁུལ་འདི་དག་ལ་ཤུགས་རྐྱེན་ངེས་ཅན་ཞིག་སྤྲོད་ངེས་པའི་ཚོད་དཔག་བྱེད་ཀྱིན་ཡོད། ཨེ་ཤའི་ཡའི་རྒྱལ་ཁབ་མང་པོ་ཞིག་གིས་རྒྱ་ནག་ནི་ཚོང་འབྲེལ་གྱི་རོགས་པ་གཙོ་བོ་ཞིག་ཏུ་ལྟ་བཞིན་ཡོད་ན་ཡང། ཡུན་རིང་ཞིག་ལ་ཁོང་ཚོའི་མངའ་ཁུལ་དུ་བཅའ་བཞུགས་བྱས་པའི་ཨ་རིའི་རྒྱལ་སྲུང་ནི་རྒྱ་ནག་གིས་ས་ཁུལ་དེ་དག་གི་ནང་དུ་དམག་ཤུགས་རྒྱ་བསྐྱེད་ཤུགས་ཆེན་བྱེད་ཀྱིན་པར་ངོ་རྒོལ་བྱེད་པའི་འགོག་སྲུང་ལྟ་བུར་བརྩི་བཞིན་ཡོད། འབྱུང་འགྱུར་གྱི་ཕྱི་ཟླ་གསུམ་པའི་ནང་རྒྱ་ནག་གི་སྲིད་འཛིན་དུ་གདམས་རྒྱུ་གཏན་འཁེལ་བྱུང་བའི་ཞི་ཅིན་ཕིན་ནི་མང་པོ་ཞིག་ལ་ཆ་རྒྱུས་མེད་པ་ཞིག་ཡིན་ན་ཡང་། འགའ་ཤས་ཀྱི་བཤད་ཚུལ་ལྟར་ན་དྲག་པོའི་འབྲེལ་ལམ་དང་གནམ་དམག་གི་སྟོབས་ཤུགས་སོགས་མཐོ་རིམ་མི་སྣའི་རྒྱབ་སྐྱོར་ལྡན་པའི་ཞིས་ཅིན་ཕིན་ནི་འགྲོ་ལ་ཉེ་བའི་སྲིད་འཛིན་ཧོའུ་ཅན་ཐོ་དང་བསྡུར་ན་ཕྱི་སྲིད་གནད་དོན་གྱི་ཐད་ལ་གདེང་ཚོད་ཆེ་ཆེར་ལྡན་པ་ཞིག་ཡིན་པའི་འགྲེལ་བརྗོད་བྱེད་ཀྱིན་ཡོད། རྒྱ་ནག་རིག་པ་བ་ཞིག་གིས་བརྗོད་དོན་ཨ་མེ་རི་ཁས་པེ་ཅིན་གཞུང་ལ་རྒྱལ་སྤྱིའི་སྒྲིག་ཁྲིམས་དང་ལམ་ལུགས་ཀྱི་ཕྱོགས་ནས་གནོན་ཤུགས་ཇི་འདྲ་ཞིག་སྤྲད་ཀྱང་སྲིད་འཛིན་ཞི་ཅིན་ཕིན་གྱིས་ཨ་རི་དང་ལྷན་དུ་འབྲེལ་ལམ་ཡག་པོ་ཞིག་མུ་མཐུད་དུ་རྒྱུན་སྐྱོང་བྱ་ཐུབ་ན་བཟང་རབས་ཟེར། དེ་ཡང་མོས་ཨ་རིའི་སྲིད་གཞུང་གསར་པས་དཔལ་འབྱོར་ཡར་རྒྱས་དང་རྒྱལ་ནང་བདེ་འཇགས་ཡོང་ཐབས་སུ་རྒྱ་ནག་གི་འགོ་ཁྲིད་གསར་པར་འཐབ་འཛིང་བྱ་བར་རྩོམ་པ་ནི་མ་འོས་པ་ཞིག་ཡིན་པའི་འགྲེལ་བརྗོད་ཀྱང་བྱས་ཡོད་པ་རེད། མོས་མུ་མཐུད་དུ་བཤད་དོན་ཨ་རི་ནི་ཚོར་བ་ཅུང་སྐྱེན་པོ་ཡོད་པའི་རྒྱལ་ཁབ་ཅིག་ཡིན་ན་ཡང། གལ་ཏེ་རྒྱ་ནག་གིས་ཨ་རིའི་ཁེ་ཕན་ལ་གང་དུ་ཡང་གདོང་ལེན་བྱ་པར་གདེང་ཚོད་ཆེ་ན་དེས་ཨ་རིའི་ཕྱི་སྲིད་ལ་འགོག་རྐྱེན་ཞིག་ཏན་ཏན་བཟོ་ངེས་པའི་སྐོར་ཡང་འགྲེལ་བརྗོད་བྱས་ཡོད།
བཀླགས་ཡིན།
རྒྱ་ནག་གཞུང་གིས་ཨ་རིའི་སྲིད་འཛིན་དང་ཁོང་གི་ཁ་གཏད་ལ་བཀའ་བཏང་ནས། ད་ལོའི་སྲིད་འཛིན་འོས་འདེམ་ལས་འགུལ་ནང་ལ། རྒྱ་ནག་ལ་འགྲོ་བ་མིའི་ཐོབ་ཐང་གི་ཐོག་ལ་སྐྱོན་བརྗོད་བྱེད་མི་ཆོག་པ་དང་གཅིག། དེ་བཞིན་དམངས་གཙོའི་ཐོབ་ཐང་ཤོད་མི་ཆོག་པ་དང་གཉིས། ད་དུང་ཉ་འཛིན་གླིང་ཕྲན་སྐོར་ལ་ཤོད་མི་ཆོག་པ་དང་གསུམ་བཅས་བཀའ་རྒྱ་དྲག་པོ་བཏང་ནས། ཨ་རིའི་སྲིད་འཛིན་གྱི་འོས་མི་གཉིས་ཀས་དེའི་ཐད་ལ་ཁས་ལེན་དང་གན་རྒྱ་ལ་མིང་རྟགས་བཀོད་འདུག། གནས་ཚུལ་དེ་ཨི་སི་རལ་གྱི་ཚགས་པར་ཐོག་འདུག་ཟེར།
སུ་ཐོབ་ཀྱང་བོད་དོན་ཐལ་ལ་འགྱུར་བ་ཡོད་གྱི་བསམ་གྱི་མི་འདུག།
བཀླགས་ཟིན། དངོས་གནས་ཡག་པོ་བྲིས་འདུག འདོད་བློ་ཁེངས་པ་ཞིག་བྱུང་།