ཨ་སྐྱབས་རྒྱལ་སྲས་ཚང་གིས་རང་གྲོལ་གྱི་སྙན་ངག་ཇི་ལྟར་བྱོན་ཚུལ་བཀྲལ།

གྲལ་ཟུར་དགུ་རོང་སྤུན་གྲོལ། (རོང་བོ་ཐང་དཀར་གྱིས་འོས་སྦྱོར་བྱས།)

<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་ཇི་ལྟར་བྲིས་པ་དང་ཇི་ལྟར་སྤེལ་པའི་ཐད་ནས་སྐད་འཕྲིན་བརྒྱུད་ཨ་སྐྱབས་རྒྱལ་སྲས་ཚང་ལ་བཅར་འདྲི་བྱས་པ།

མཚམས་སྦྱོར། བཅར་འདྲི་ཞུ་ཡུལ་ནི་མཚོ་སྔོན་མི་རིགས་སློབ་ཆེན་གྱི་གྲངས་ཉུང་མི་རིགས་སྐད་ཡིག་སྡེ་ཁག་གི་གྱ་བཞི་ལོའི་འཛིན་གྲྭའི་སློབ་མ་བསམ་འགྲུབ་ཚེ་རིང་།ད་ལྟ་གསེར་རྟ་མཁན་སློབ་དགོན་པའི་ཨ་སྐྱབས་རྒྱལ་སྲས་སྐུ་ཕྲེང་ལྔ་བ་ཨ་སྐྱབས་རྒྱལ་སྲས་ནམ་མཁའ་ཀློང་ཡངས་ཞེས་ཞུ།

བཅར་འདྲི་བྱེད་མཁན་དང་སྒྲ་ཕབ་ཡི་གེ་བ་ནི་གྲལ་ཟུར་དགུ་རོང་སྤུན་གྲོལ།

བཅར་འདྲིའི་བརྒྱུད་ལམ་ནི་སྐད་འཕྲིན།

[…]རྟགས་འདིའི་ནང་བཅར་འདྲི་བྱེད་མཁན་གྱི་ཁ་གསབ་ཀྱི་ཚིག་བཅུག་ཡོད།

བཅར་འདྲིའི་དངོས་གཞི།

དུས་ཚོད། 2020.1.4.5:00pm

གྲལ་ཟུར་དགུ་རོང་སྤུན་གྲོལ།—— བཀྲ་ཤིས་བདེ་ལེགས། ངེད་ནི་རང་གྲོལ་གྱི་ནུ་བོ་དགུ་རོང་སྤུན་གྲོལ་ཟེར་པ་དེ་ཡིན། རང་གྲོལ་གྱི་ཐད་ནས་སྐད་ཆ་རེ་འགའ་འདྲི་བགྱི་འདུག་པས་སྐུ་ཉིད་ཁོམ་སྐབས་དང་བསྟུན་ནས་འདིར་སྐད་ཅིག་འཇོག་རོགས་ཞུ།

དུས་ཚོད། 2020.1.4.5:40pm

ཨ་སྐྱབས་རྒྱལ་སྲས་ཚང་། ——བཀྲ་ཤིས་བདེ་ལེགས། ཁྱོད་ཀྱིས་འདི་ན་འཚམས་འདྲི་བྱས་ཡོད་ཀི ཡ་ཡ། ངས་ཤེས་ཀྱི་ཡོད། དེ་ནས་ཁྱོད་ལ་འདྲི་བགྱི་ཅི་ཞིག་ཡོད་ན་འདིའི་ནང་ལ་སྐད་རེ་འཇོག་གིས་སྡོད། ང་ཁོམ་པ་ཡོད་དུས་བཤད་ཀོ།

དུས་ཚོད། 2020.1.12.8:50pm

གྲལ་ཟུར་དགུ་རོང་སྤུན་གྲོལ།—— མཚན་མོ་བཀྲ་ཤིས་བདེ་ལེགས། འདི་ན་རང་གྲོལ་དང་འབྲེལ་པའི་དྲི་བ་ཁག་ཅིག་ཡོད། ཁོམ་སྐབས་དང་བསྟུན་ཏེ་ལན་བཏབ་ནས་འདིའི་ནང་སྐད་ཅིག་འཇོག་པར་བཀའ་དྲིན་ཆེ་ཞུ། འདི་ནས་འདྲི་འདོད་པ་ནི་སྔོན་ཆད་ཁྱོད་ཀྱི་སློབ་གྲོགས་སྐོར་ཞིག་ལ་ཐུག་ནས<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་ཇི་ལྟར་བརྩམས་པའི་གནས་ཚུལ་ཁྱོད་ལ་གསལ་ཆ་ཡོད་ཟེར།1.ཁྱོད་ཀྱིས་རང་གྲོལ་ཇི་ལྟར་ངོ་ཤེས་པའི་བརྒྱུད་རིམ། 2.རང་གྲོལ་གྱི་སྙན་ངག<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པ་དེ་ཇི་ལྟར་བྲིས་མིན་ཐད་ནས་ཁྱོད་མ་གཏོགས་གཞན་ལ་གསལ་ཆ་ཆེར་མི་འདུག་པས་དེ་དོན་མིག་མཐོང་ལག་ཟིན་གྱི་ཆ་ནས་གསལ་པོར་གསུང་བགྱི་དང་། གཞན། སྙན་ངག་དེའི་རྩོམ་བྱང་ཆུང་བ་ནི“བདག་ལ་བདུད་རྩི་དྲངས་པའི་གྲོགས་པོ་འགའ་ལ་དྲན་རྟེན་དུ་ཕུལ”ཅེས་འཁོད་འདུག་ཟེར་པས་བདུད་རྩི་འདྲེན་མཁན་གྱི་མི་ནི་སུ་སུ་ཡིན་མིན། 3.སྙན་ངག་དེ་བྲིས་རྗེས་ཁྱོད་ཀྱིས་ཇི་ལྟར་སྤེལ་ཚུལ།

དུས་ཚོད། 2020.1.13.9:02am

ཨ་སྐྱབས་རྒྱལ་སྲས་ཚང་།——འོ། ནངས་སྔ་མོར་འཚམས་འདྲི་བཀྲ་ཤིས་བདེ་ལེགས་ཞུ་བཞིན་ཡོད། བྱ་བའི་བྲེལ་ཟིང་གི་དབང་གིས་ཁྱོད་ཀྱི་སྐད་བཞག་པ་དེ་དུས་ལྟར་ཉན་ཐུབ་མ་སོང་། ཁྱོད་ཀྱི་དྲི་བ་དེའི་ཐད་ནས་ངེད་ལ་གསལ་གསལ་ཏག་ཏག་ཡིན་མོད། ཁ་སང་དེ་རིང་ཁོམ་ཐུབ་ཀྱི་མི་འདུག ལོ་རྙིང་ལ་ཁེལ་འདུག་པས་ཁྱིམ་ཚང་དེ་འདྲས་གདན་འདྲེན་ཞུ་བགྱི་ལ་སོགས་པ་མང་པོ་འདུག་པས་ང་ལྷོད་ལ་བབས་ན་ཁྱོད་ལ་གསལ་གསལ་ཏག་ཏག་ཅིག་བཤད། དེ་ངེད་ལ་གསལ་ནི་ཡིན།

དུས་ཚོད། 2020.1.19.6:30pm

ཨ་སྐྱབས་རྒྱལ་སྲས་ཚང་།——འོ། བཀྲ་ཤིས་བདེ་ལེགས། ཁྱེད་ཀྱི་མིང་དགུ་རོང་སྤུན་གྲོལ་ཅེས་པ་འདི་སྔ་མོ་ནས་གོ་མྱོང་། ཉེ་སྔོན་ཁྱེད་རང་སི་ཁྲོན་གྱི་སྤོས་ལྡན་ལ་ཕྱིན་ནས་ང་བརྩད་བཅད་ཀྱང་འུ་གཉིས་ཐུག་མ་ཐུབ་པས་བཅར་འདྲི་བྱེད་པའི་ལས་དོན་དེ་འགྲུབ་མ་ཐུབ་ཀྱང་། ཁྱེད་ཀྱིས་སྐད་འཕྲིན་བརྒྱུད་ནས་བཅར་འདྲི་བྱས་པ་འདི་ཡང་ལོ་རྙིང་གི་མཚམས་འདི་ནས་བྱ་བ་མང་པོའི་དབང་གིས་ལྷགས་ཏེ་འགོར་འགྱངས་བྱས་འདུག་པས་ཁྱེད་ལ་དགོངས་པ་མ་ཚོམས་ཟེར་པ་ཡིན། དེ་ནས། ཁྱོད་ཀྱི་དྲི་བ་དག་གི་ཁྲོད་ནས་གཅིག་ནི་ངེད་ཀྱིས་དོན་གྲུབ་རྒྱལ་ལམ་རང་གྲོལ་ཇི་ལྟར་ངོ་ཤེས་པའི་བརྒྱུད་རིམ་དེ་རེད། 1985ལོར་ང་རང་མཚོ་སྔོན་མི་རིགས་སློབ་ཆེན་གྱི་ལོ་རིམ་གཉིས་པའི་སློབ་མ་ཡིན་པའི་སྐབས་དེར་མཚོ་སྔོན་ཞིང་ཆེན་གྱི་མི་རིགས་དོན་གཅོད་ཨུ་ཡོན་ལྷན་ཁང་གི་མངའ་འོག་ཏུ་ཚུགས་པའི་མི་རིགས་སྐད་ཡིག་བྱ་བའི་གཞུང་སྒྲུབ་ཁང་གི་ཀྲུའུ་རིན་ཨ་ཁུ་འཕྲིན་ལས་ཀྱིས་གཙོ་སྐྱོང་གནང་སྟེ།བོད་ཀྱི་དགེ་རྒན་རྣམས་ལ“རྩོམ་རིག་ཟབ་སྦྱོང་གི་འཛིན་གྲྭ་ཐེངས་དང་པོ”མཚོ་སྔོན་དགེ་ཐོན་སློབ་གྲྭ་ཆེན་མོ་ནས་བསྡུས་པ་རེད། དེ་ནི་ཕལ་ཆེར1985ལོའི་དབྱར་གནང་གི་སྐབས་ཡིན། ཨ་ཁུ་འཕྲིན་ལས་ལགས་ཀྱིས་ངེད་ལ“ཁྱོད་བྱིས་པ་ཡ་རབས་ཤིག་རེད། དེ་བས། སློབ་ཡོན་ནི་ངས་སྟེར། ཁྱོད་ད་ལོའི་དབྱར་གནང་སྐབས་ཀྱི་བོད་ཀྱི་རྩོམ་རིག་ཟབ་སྦྱོང་གི་འཛིན་གྲྭ་ཐེངས་དང་པོར་ཞུགས”ཞེས་གསུངས་པས། ང་རྩོམ་རིག་ཟབ་སྦྱོང་འཛིན་གྲྭ་དེར་ཞུགས་ཐུབ་པ་བྱུང་། སྐབས་དེར། དོན་གྲུབ་རྒྱལ་ཕེབས་འདུག་པས་ང་ཐེ་བའི་གྲོགས་པོ་བཞི་ཡིས་ཁོང་ལ་བདུད་རྩི་དྲངས་ཤིང་། ཁ་བརྡ་བྱས་ནས་ཁོང་གིས<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་བྲིས་པ་རེད། དེ་འདྲ་བྱས་ནས་ཁོང་ཐེངས་དང་པོར་ངོ་ཤེས་པ་ཡིན། དེའི་རྗེས་ནས་ཕལ་ཆེར་ཁོང་སྐུ་མ་གཤེགས་པའི་སྔོན་ཙམ་ལ་དོན་གྲུབ་རྒྱལ་ནི་ང་ཚོའི་འཛིན་བདག་དགེ་རྒན་དང་ཁོང་གི་གྲོགས་པོ་སངས་རྒྱས་རིན་ཆེན་གྱི་སར་ཕེབས་ཤིང་། སྐབས་དེར། ཁོང་གིས་འགན་བླངས་ཏེ་ང་ཚོར་རྩོམ་རིག་གི་སློབ་ཚན་རེ་གཉིས་ཁྲིད་པ་རེད། སྐབས་དེར་ཁོང་ཐེངས་གཉིས་པར་ངོ་ཤེས་པ་ཡིན། ཐེངས་གསུམ་པའི་ཐད་ནས། ཁོང་གི་ཞལ་མཇལ་མ་ཐུབ། ཁོང་སྐུ་གཤེགས་པར་མྱ་ངན་ཞུ་སླད་ཆབ་ཆ་གྲོང་བརྡལ་ལ་ཕྱིན་པ་ཡིན། སྐབས་དེར་ང་ཚོ་མཚོ་སྔོན་མི་རིགས་སློབ་ཆེན་ནས་དགེ་རྒན་རྣམས་ཀྱི་ཚབ་བྱས་ནས་ཁོང་དང་ཕ་ཡུལ་གཅིག་པ་དང་གྲོགས་པོ་ཡིན་པའི་སངས་རྒྱས་རིན་ཆེན་དང་། ཞིབ་འཇུག་སློབ་མ་རྣམས་ཀྱི་ཚབ་བྱས་ནས་སྙན་ངག་པ་འཇུ་སྐལ་བཟང་དང་། དངོས་གཞི་སློབ་མ་རྣམས་ཀྱི་ཚབ་བྱས་ཏེ་ང་རང་གིས་མྱ་ངན་ཞུ་ཡིག་ཅིག་བྲིས་ནས་དེ་སྒྲོག་འདོན་གྱི་ཆེད་དང་། ངེད་ཅག་གསུམ་པོ་ཁོང་གི་མྱ་ངན་གྱི་རྗེས་དྲན་ཚོགས་འདུ་ལ་ཞུགས་སླད་ཆབ་ཆ་ལ་བསྐྱོད་པ་ཡིན། ང་ཚོ་ཆབ་ཆ་ལ་སོང་ནས་ཉི་མ་མང་པོ་འདུག་དགོས་ཐུག་སོང་། ཁོང་རང་ཤི་བརྒྱབ་པ་རེད་དམ་ཡང་ན་དོན་དག་གཞན་པ་དང་འབྲེལ་ཡོད་མེད་ཐད་ནས་རྩོད་པ་འདྲ་བརྒྱབ་སྟེ་ཕར་བཤད་ཚུར་བཤད་འདྲ་བྱས་པའི་གནས་ཚུལ་དེ་འདྲ་ལ་ཐུག་སོང་། ཁོང་དང་ངོ་ཤེས་པའི་བརྒྱུད་རིམ་ནི་དེ་འདྲ་ཞིག་རེད། དེ་ནས། དགུ་རོང་སྤུན་གྲོལ་ལགས་ཀྱི་དྲི་བ་གཉིས་པ་ནི། <<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་ཇི་ལྟར་བྲིས་པའི་ཐད་ནས་ངེད་མ་གཏོགས་གཞན་གྱིས་གསལ་པོར་དྲན་གྱི་མི་འདུག་ཟེར་པས་དེའི་ཐད་ནས་དྲིས་པ་རེད། ངས་དེའི་ཐད་ནས་ལན་འདེབས་བགྱི་ཡིན། གོང་དུ་བཤད་པ་ལྟར1985ལོའི་དབྱར་གནང་གི་སྐབས་དེར་མཚོ་སྔོན་ཞིང་ཆེན་གྱི་མི་རིགས་དོན་གཅོད་ཨུ་ཡོན་ལྷན་ཁང་གི་མངའ་འོག་ཏུ་ཚུགས་པའི་མི་རིགས་སྐད་ཡིག་བྱ་བའི་གཞུང་སྒྲུབ་ཁང་གིས་གཙོ་སྒྲུབ་བྱས་པའི་བོད་ཀྱི་རྩོམ་རིག་ཟབ་སྦྱོང་འཛིན་གྲྭ་བསྡུས་ཤིང་། དེར་བོད་ཁུལ་གྱི་ས་ཁུལ་སོ་སོའི་དགེ་རྒན་མང་པོ་ཞིག་ཕེབས་ཡོད་པ་དང་། ང་ནི་དམིགས་བསལ་གྱིས་འཛིན་གྲྭ་དེར་ཞུགས་པ་རེད། སྤྱིར་བཏང་ཡིན་ན། ཨ་ལགས་ཚེ་ཏན་ཞབས་དྲུང་ཚང་ཕེབས་ནས་སློབ་ཁྲིད་མཛད་པའི་འཆར་གཞི་བསྒྲིགས་ཡོད་མོད། ཁོང་བླ་བྲང་ནས་སྐུ་གཤེགས་པས་ང་ཚོར་བློ་འགྱོད་ཆེན་པོ་བྱུང་། དེ་ནས་ཨ་ལགས་དོར་ཞི་ཚང་ཕེབས་ཏེ་གྲུབ་མཐའ་རིན་ཆེན་ཕྲེང་བ་དང་སྙན་ངག་གི་ཚིག་རྒྱན་ཐད་ནས་སློབ་ཁྲིད་གནང་བ་དང་། དགེ་རྒན་སངས་རྒྱས་ཚང་གིས་སྒྲུང་རྩོམ་གྱི་ཐད་ནས་སློབ་ཁྲིད་གནང་སྟེ་རྩོམ་རིག་གི་ཟབ་སྦྱོང་འཛིན་གྲྭ་ནི་དེ་ལྟར་བྱས་ནས་བསྒྲུབས་པ་རེད། ཟབ་སྦྱོང་འཛིན་གྲྭ་དེ་འཚོགས་བཞིན་པའི་སྐབས་ཀྱི[1985.7.21]ཉིན་གུང་གི་དུས་ཚིགས་ཤིག་ལ་ལྗང་བུས་དོན་གྲུབ་རྒྱལ་ཁྲིད་ནས་ང་ཚོའི་ཉལ་ཁང་ནང་ལ་བསླེབས་སོང་། ང་ཚོའི་ཉལ་ཁང་དེར་ཉལ་ཁྲི་བཞི་ཡོད་པས་གཅན་ཚ་ནས་ཡིན་པའི་དགེ་རྒན་བཀྲ་བྷོ་དང་། གཅན་ཚ་ནས་ཡིན་པའི་རྟ་མགྲིན་རྒྱལ་དང་། ལྗང་བུ་དང་ང་བཅས་མི་བཞི་ཡོད། དེ་ནས་དོན་གྲུབ་རྒྱལ་ཁོང་གིས་ཆང་བཞེས་ནི་རེད། ད་ལྟར་དྲན་སོས་པ་ལྟར་ན། ཆང་གི་ཆང་དམ་ནི་ལེབ་ལེབ་དང་ལྗང་མདོག་ལྡན་པ་ཞིག་ཡིན་པ་དང་། ཕལ་ཆེར་ཆང་ནི་ལོ་ཀྲུའུ་ཏཱ་ཆིས་ཞེས་པ་དེ་ཡིན་ནི་འདྲ་ཞིག་ཡིན། སྐབས་དེར་ང་ཡིན་ན་ལོ་ཆུང་ནི་རེད། ལོ་བཅུ་དྲུག་བཅུ་བདུན་ཡས་མས་ཡིན་པས་ཆང་ནི་འཐུང་མི་ཤེས། གང་ལྟར་ཀྱང་། ང་ཚོས་ཁ་བརྡ་མང་པོ་ཞིག་བྱས་པ་ཡིན། ཁ་བརྡ་མང་པོ་བྱས་དོན་ནི། སྐབས་དེར་ལོ་རབས་བརྒྱད་ཅུ་པའི་དུས་སྐབས་རེད། སྲིད་ཇུས་ནི་ཡང་དག་པའི་ལམ་དུ་ཕྱིན་ནས་བོད་མི་རིགས་ཀྱི་སྐད་དང་ཡི་གེ་མཐའ་དག་སླར་གསོ་བྱས། སློབ་གྲྭ་ཆེན་མོ་ཡིན་ནའང1983ལོ་ནས་བོད་ཡིག་གི་སློབ་གྲྭ་ཆེན་མོ་བ་ཐེངས་དང་པོ་བསྡུས་པ་རེད། ང་ཡིན་ན་སྐབས་དེར་བསྡུ་ཐེངས་གཉིས་པའི་སྐབས་ཀྱི་སློབ་ཆེན་པ་རེད། སྐབས་དེར། བོད་ཀྱི་ན་གཞོན་མང་པོ་ཞིག་གི་སྡེ་ནས་བོད་མི་རིགས་ཀྱི་སྐད་དང་ཡི་གེ་སྦྱང་བརྩོན་དང་ཁོག་དཔུང་དང་ལ་རྒྱ་ཞེས་པ་དེ་བགྲོ་གླེང་བྱ་རྒྱུ་ནི་ཧ་ཅང་ཁྱབ་བརྡལ་ཅན་ཞིག་རེད་ལ། ང་ཚོ་ཡང་དེའི་ནང་ཞུགས་ནས་ཁ་བརྡ་ཡར་གླེང་མར་གླེང་བྱས་པ་རེད། མདོར་ན། སྐབས་དེར་ངས་འདི་ལྟར་བཤད་པ་ཡིན། “ད་ཆ་ན་གཞོན་རྣམས་ཀྱི་ཁ་ནས་མི་རིགས་ཀྱི་ལ་རྒྱ་ཞེས་མང་པོ་སྒྲོག་གིན་འདུག་མོད། འོན་ཀྱང་། དོན་དངོས་ཀྱི་ལག་ལེན་ལ་བསྟར་བགྱི་ནི་ཧ་ཅང་གལ་ཆེན་རེད། དེ་བས། ཐོག་མར་ང་ཚོར་ཅི་ཞིག་དགོས་སམ་ཞེ་ན། ང་ཚོའི་ན་གཞོན་གྱི་ཁྲོད་ནས་སྲོག་ཤིང་ཞིག་དགོས་འདུག རྒྱ་སྐད་ཀྱིས་བཤད་ན། 核心人物梳理་་་”ཞེས་པའི་ལྟ་ཚུལ་བཏོན་པ་ཡིན། སྐབས་དེར་ང་མྱི་ཆུང་རུང་ཁོང་རྣམ་པས་ངའི་ལྟ་ཚུལ་ལ་རྒྱབ་སྐྱོར་བྱས་ནས་དང་ལེན་འདྲ་བྱས་ཐལ། ཉིན་གུང་གི་ངལ་གསོའི་སྐབས་ཀྱི་དུས་ཚོད་དང་བསྟུན་ནས་ང་ཚོས་ཚ་ཚ་འུར་འུར་གྱིས་ཁ་བརྡ་བྱས་པ་ཡིན། དེ་ནས། ང་ཚོ་ཕྱི་དྲོའི་སློབ་ཁྲིད་ལ་འགྲོ་བའི་དུས་ཚོད་ཟིན་པས། ང་ཚོས་ཁོང་ལ“ཁྱོད་ཀྱིས་ཆང་འདི་འཐུང་ནས་སྡོད་དང་། ཕྱི་དྲོར་ཨ་ལགས་དོར་ཞིའི་སློབ་ཁྲིད་སྐར་མ་བཞི་བཅུ་ཞེ་ལྔ་ཅན་གྱི་སློབ་ཁྲིད་གཅིག་མ་གཏོགས་མེད། ང་ཚོ་སློབ་ཁྲིད་དེར་ཞུགས་ཏེ་ཚར་རྗེས་ཡོང”ཞེས་བཤད་པ་ཡིན། དེ་ནས་ཆང་དེ་ཁོང་གཅིག་པུས་བཏུང་པ་རེད། ང་ཚོ་ཨ་ལགས་དོར་ཞིའི་སློབ་ཁྲིད་དེར་ཉན་ཚར་རྗེས་ཨ་ལགས་དོར་ཞི་དང་མཉམ་དུ་ང་ཚོའི་ཉལ་ཁང་ནང་ཕྱིར་ལོག་པ་ཡིན། ང་ཚོ་ཉལ་ཁང་ནང་སླེབས་དུས་ཁོང་གིས<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་བྲིས་འདུག དེ་ནས་ཨ་ལགས་དོར་ཞི་གཙོ་བྱས་ནས་དོན་གྲུབ་རྒྱལ་ལ་ཐུག་ཅིང་། སྙན་ངག་དེ་ཨ་ལགས་དོར་ཞི་ཚང་གིས་ཐེངས་དང་པོར་གཟིགས་པ་རེད། ཨ་ལགས་དོར་ཞི་ཚང་གིས་སྙན་ངག་དེ་བྲིས་ནོ་ཡག་གི་ཞེས་བསྔགས་བརྗོད་ཅིག་མཛད་ནས་ཕྱིར་ཕེབས་སོང་། དེའི་རྗེས་ནས་དོན་གྲུབ་རྒྱལ་ཁོང་གིས་སྙན་ངག་དེ་གྱེར་འདོན་བྱས་སོང་། གྱེར་འདོན་བྱས་ཏེ[རང་གྲུབ་ཚན་པ་དང་པོའི་ཁྲོད་ཀྱི]“སྙིང་དུ་སྡུག་པའི་བཀའ་བསྟན་གྱི་མཛེས་མ”ཞེས་པའི་མཚམས་དེར་སླེབས་སྐབས་ཁོང་གིས་གསལ་བཤད་འདི་ལྟར་བྱས་སོང་། “ཚང་མས་ང་དོན་གྲུབ་རྒྱལ་ལྟ་ལོག་པ་རེད་ཅེས་ཟེར་གི་འདུག་མོད། ང་ནི་ཆོས་དད་ཡོད་པའི་ཁྱིམ་ཚང་ཞིག་ནས་འཚར་ལོངས་བྱུང་བ་དང་བོད་ཀྱི་རིག་གནས་ཀྱིས་ཤན་ཞུགས་ཡོད་པའི་མི་ཞིག་ཡིན་པའི་རྐྱེན་གྱིས་ངས་འདི་ན“སྙིང་དུ་སྡུག་པའི་བཀའ་བསྟན་གྱི་མཛེས་མ་ཞེས་བྲིས་ཡོད”ཅེས་པའི་སྐད་ཆ་དེ་ད་ལྟ་ད་དུང་ཡང་ངའི་ཡིད་ལ་གསལ་ཐིང་ཐིང་ཞིག་བབས་ཡོད་ཀི བར་སྐབས་ཀྱི་ལོ་གཅིག་གཉིས་ཀྱི་སྔོན་ལ་ལབ་ཙེ་ཇ་ཁང་ཞེས་པའི་སྐད་ཚོམས་དེའི་ནང་ན་ལྗང་བུས་འདིའི་སྐོར་ནས་ཅིག་བཤད་ཀི་འདུག་མོད། དེ་ནི་དྲང་གཏམ་ཞིག་མ་རེད། ལྗང་བུས་སྐད་ཆ་འདི་ཡག་པོ་ཞིག་མ་བཤད་ཐལ། ཁོང་གིས་སྦས་ཐལ། དྲང་མོར་མ་བཤད་ཐལ། ངེད་ལ་དེ་འདྲའི་ཚོར་པ་ཞིག་བྱུང་ཐལ། ཡིན་ནའང་། ལབ་ཙེའི་ཇ་ཁང་གི་ནང་སྐད་འདྲ་བཞག་ནི་མེད། འདི་ནི་ཞོར་ནས་ཅིག་བཤད་པ་ཡིན། དེ་ནས<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་ཁོང་གིས་གྱེར་འདོན་བྱེད་ཞོར་འགྲེལ་རེ་རྒྱག་ཞོར་བྱས་ནས་དེ་འདྲ་གནང་བྱུང་། གྱེར་འདོན་བྱས་པའི་སྒྲ་ཡང་ཕབ་ཡོད་རེད། སྐབས་དེར་སྒྲ་ཕབ་བྱས་པའི་སྒྲ་ཐག་གམ་ཚི་ཐེ་ཞེས་པ་དེ་རྟ་མགྲིན་རྒྱལ་གྱིས་ཁྱེར་ཡོད་པ་དེ་འདྲ་ཞིག་ཡིན་བསམ་ཡོད། རྗེས་ནས་དེ་བརྩད་ཅིག་གཅོད་བསམ་ཡང་བརྩད་མ་ཆོད་ཐལ། དགུ་རོང་སྤུན་གྲོལ་ལགས་ཀྱི་དྲི་བ་གསུམ་པ་ནི། སྙན་ངག་དེ་བྲིས་རྗེས་ངེད་ཀྱིས་ཇི་ལྟར་སྤེལ་ཚུལ་ཐད་ནས་རེད། སྙན་ངག་དེའི་མ་ཡིག་ངས་ཁྱེར་པ་ཡིན། མཚོ་སྔོན་མི་རིགས་སློབ་ཆེན་གྱི་རྒྱུགས་ཤོག་དཔར་སའི་དཔར་ཁང་ཞིག་ཡོད། དེའི་བདག་པོ་ནི་ངའི་བཟང་ས་འདྲ་ཡང་ཡིན། ངས་མ་ཡིག་དེར་ཁྱེར་ནས་སྐབས་དེར་ཡི་གེ་གཏག་པའི་འཕྲུལ་ཆས་ཤིག་ཡོད་པ་དེས་གཏགས་ནས་ཞུ་དག་ཀྱང་བྱས། དེ་ནས་ཅུང་ཟད་མང་པོ་ཞིག་དཔར་ནས་དགེ་རྒན་རྣམ་པའི་ཕྱག་ཏུ་ཡང་བཞག་པ་ཡིན། ངེད་ཀྱིས་དེ་ཁྱེར་ནས<<མཚོ་སྔོན་མང་ཚོགས་སྒྱུ་རྩལ>>གྱི་སྟེང་ལ་འགོད་དུ་བཅུག་པ་ཡིན། དེའི་བརྒྱུད་རིམ་ནི་འདི་འདྲ་ཞིག་རེད། རྩོམ་ཡིག་དེའི་མགོ་ཡི་ཡིག་ཆུང་གི་ནང་ན“བདག་ལ་བདུད་རྩི་དྲངས་པའི་གྲོགས་པོ་འགའ་ལ་དྲན་རྟེན་དུ་ཕུལ”ཅེས་འཁོད་འདུག དེའི་སྐོར་གྱི་གནས་ཚུལ་མདོར་བསྡུས་ནི་འདི་འདྲ་ཞིག་རེད། འདིའི་ཐད་ནས་དེ་རིང་རྒྱ་ཞིང་རྒྱས་པ་ཞིག་བཤད་ཀྱི་འདྲ་མེད་ཀི ཁྱོད་ལ་ད་དུང་དྲི་བ་ཡོད་ན་ཕྲིས་དང་ཁོམ་པ་ཡོད་དུས་ལན་འདེབས།

དུས་ཚོད། 2020.1.19.8:40pm

གྲལ་ཟུར་དགུ་རོང་སྤུན་གྲོལ།——འོ་ལགས་སོ་ལགས་སོ།། ངས་ཞིབ་ཚགས་ཀྱིས་ཉན་པ་ཡིན། བཀའ་དྲིན་ཆེ་ཞུ། ཡིན་ནའང་། ངེད་ལ་དྲི་བ་རེ་འགའ་ཞིག་འདུག ཁྱེད་ཀྱིས་གསལ་པོར་བཀྲལ་པ་ལྟར་ན། དོན་གྲུབ་རྒྱལ་ལ་བདུད་རྩི་འདྲེན་མཁན་གྱི་གྲོགས་པོ་འགའ་ཞེས་པ་དེ་དག་ནི་ཁྱོད་དང་གཅན་ཚ་བཀྲ་བྷོ་དང་། རྟ་མགྲིན་རྒྱལ་དང་། ལྗང་བུ་བཅས་པ་བཞི་པོ་རེད་འདུག དེས་ན། ཁྱེད་ཅག་ཕྱི་དྲོའི་སློབ་ཁྲིད་ལ་ཞུགས་སྐབས་ཁྱེད་ཅག་གི་ཉལ་ཁང་དེའི་ནང་དོན་གྲུབ་རྒྱལ་གཅིག་པུ་བསྡད་པ་རེད་དམ། ཡང་ན། ལྗང་བུ་དང་ཁོང་གཉིས་བསྡད་པ་རེད། སྙན་ངག་དེ་ཁྱེད་ཅག་སློབ་ཁྲིད་ལ་སོང་ཤུལ་ནས་ཁོང་གཅིག་པུས་བྲིས་པ་རེད་དམ། ཡང་ན། ལྗང་བུས་ཁོང་ཁྱེད་ཅག་གི་ཉལ་ཁང་ནང་ཁྲིད་མ་ཡོང་བའི་སྔོན་ནས་བྲིས་ཚར་འདུག ཁྱེད་ཀྱིས་མ་ཡིག་དེ་ཁྱེར་ནས་ཡི་གེ་གཏག་ཆས་ཀྱིས་གཏགས་པ་ཡིན་ན། ཁོང་གིས་ཕྱག་བྲིས་བསྟར་མ་མཛད་པའི་ཡིག་གཟུགས་དེ་དབུ་ཅན་རེད་དམ་ཡང་ན་དབུ་མེད་རེད། ཁོང་གིས་བྲིས་པའི་འབྲི་ཤོག་ནི་ཅི་ཞིག་རེད། ཁྱེད་ཅག་གི་འབྲི་དེབ་གང་རུང་ཞིག་གི་ངོས་སུ་བྲིས་པ་རེད་དམ། ཡང་ན་ཁོང་རང་ཉིད་ཀྱི་འབྲི་དེབ་ངོས་སུ་བྲིས་པ་རེད། དེ་ནས། སྙན་ངག་དེ<<མཚོ་སྔོན་མང་ཚོགས་སྒྱུ་རྩལ>>རྩོམ་སྒྲིག་ཁང་ལ་ཉིད་ཀྱིས་ཁྱེར་ནས་ཕྱིན་ཚེ། སྐབས་དེའི་རྩོམ་སྒྲིག་པའི་མིང་ལ་ཅི་ཟེར་མིན་དྲན་གྱིན་འདུག་གམ།

དུས་ཚོད། 2020.1.19.9:07pm

ཨ་སྐྱབས་རྒྱལ་སྲས་ཚང་།——འོ། བཀྲ་ཤིས་བདེ་ལེགས། ཁྱེད་ཀྱིས་ཡང་བསྐྱར་དྲི་བ་དྲིས་ཡོད་པ་འདིའི་ཁྲོད་ནས་ཞིབ་ཚགས་ཀྱིས་བཤད་དགོས་ཀྱི་ཡོད་ས་རེད། ཆང་རྒྱ་མ་གང་བོ་དེ་ང་ཚོས་ཁ་བརྡ་བྱེད་ཞོར་ཁོང་གཅིག་པུས་བཏུང་པ་རེད། དེ་ནས་ང་ཚོ་དུས་ཚོད་གཉིས་ཀྱི་ཐོག་སློབ་ཁྲིད་ལ་འགྲོ་དགོས་པས་དེར་ཕྱིན་པ་དང་། སྐར་མ་བཞི་བཅུ་ཞེ་ལྔའི་རྗེས་ནས་ང་ཚོ་ཉལ་ཁང་ནང་ཕྱིར་ལོག་པ་རེད། དེ་ནས་ང་ཚོ་ཉལ་ཁང་ནང་ཕྱིར་སླེབས་སྐབས་ཁོང་གིས་སྙན་ངག་དེ་གསར་ཏུ་བྲིས་ནས་བཞག་ཡོད་ཀི དེའི་སྔོན་ཅིག་ལ་བྲིས་ཏེ་ང་ཚོའི་ཉལ་ཁང་ནང་ལ་ཁྱེར་ནས་ཡོང་བའང་མིན། ང་ཚོ་ཉལ་ཁང་ནང་ང་ཚོ་དང་མཉམ་དུ་ཡོད་དུས་འབྲི་བའི་འགོ་བཙུགས་པའང་མིན། ང་ཚོ་ཉལ་ཁང་ནང་ལ་ཕྱིར་ལོག་དུས་ཁོང་གིས་གསར་ཏུ་བྲིས་ཡོད་པ་མ་ཟད། ཨ་ལགས་དོར་ཞི་ཚང་གིས་ཐོག་མར་བཀླགས་པ་རེད་ཅེས་ཁྱོད་ལ་བཤད་ཟིན་པ་དེ་རེད། སྙན་ངག་དེའི་ཀློག་པ་པོ་ཐོག་མ་ནི་ཨ་ལགས་དོར་ཞི་ཚང་རེད། དེ་ནས་ལྗང་བུ་ང་ཚོའི་མཉམ་དུ་སློབ་ཁྲིད་ལ་སོང་ཡོད་དམ་མེད་ཅེས་དྲིས་ན་ངེད་ལ་གསལ་པོ་ཏག་ཏག་ཅིག་བཤད་བགྱི་མི་འདུག་མོད། འདང་བརྒྱབ་ན་གཅིག་ནས་ཁོང་འགྲོ་དགོས་བགྱི་རེད་ལ། ང་ཚོ་ཚང་མ་ཟབ་སྦྱོང་འཛིན་གྲྭ་དེར་ཞུགས་པའི་སློབ་མ་ཡིན་པ་དང་། ལྷག་པར་ཏུ། ཁོ་ཨ་ལགས་དོར་ཞིས་ལན་གྲུ་ནས་ཟབ་སྦྱོང་དེར་ཁྲིད་འོང་བས་ཨ་ལགས་དོར་ཞིའི་སློབ་ཁྲིད་ལ་ཁོ་འགྲོ་དགོས་ནི་རེད། གཉིས་ནས། ང་ཚོས“ཁྱོད་སྡོད་དང་ང་ཚོ་ཕྱི་དྲོའི་སློབ་ཁྲིད་གཅིག་གྲོལ་མཚམས་ནས་ཡོང”ཞེས་བཤད་པ་རེད། སྐད་ཆ་དེ་བཤད་དགོས་དོན་ནི། ང་ཚོའི་ཁྲོད་ཀྱི་མི་སུ་གཅིག་ཀྱང་ཤུལ་ན་ལྷགས་མེད་པས་ཁྱོད་སྡོད་དང་ང་ཚོ་ཕྱི་དྲོའི་སློབ་ཁྲིད་གཅིག་པུ་དེ་གྲོལ་མཚམས་ལོག་ཡོང་ཞེས་བཤད་དགོས་ཐུག་པ་རེད། གལ་སྲིད། ལྗང་བུ་ཤུལ་ན་ལྷག་ཡོད་ཚེ་ལྗང་བུས་ང་ཁོང་གི་མཉམ་དུ་འདུག་རོགས་བྱེད་ཟེར་ངེས་པས་ཁྱོད་སྡོད་དང་ང་ཚོ་སྐར་མ་བཞི་བཅུ་ཞེ་ལྔའི་རྗེས་ནས་ཡོང་ཞེས་པའི་སྐད་ཆ་དེ་བཤད་དགོས་དོན་མེད་ཀཱ། ངས་ད་ལྟ་སེམས་ནས“ཁྱོད་སྡོད་དང་ང་ཚོ་ཕྱི་དྲོའི་སློབ་ཁྲིད་གཅིག་པུ་དེ་གྲོལ་མཚམས་ཡོང”ཞེས་པའི་སྐད་ཆ་དེ་འདྲ་ཞིག་གསལ་པོར་དྲན་གི དེ་མ་གཏོགས། ལྗང་བུ་དམིགས་སུ་བཀར་ནས་ཤུལ་ཏུ་བསྡད་པའམ་ཡང་ན་ང་ཚོའི་མཉམ་དུ་སློབ་ཁྲིད་ལ་སོང་མིན་ཐད་ནས་གསལ་གསལ་ཏག་ཏག་ཅིག་བཤད་བགྱི་མེད་ཀི། ཕལ་ཆེར། ལྗང་བུ་ཤུལ་ནས་བསྡད་ཡོད་བགྱི་མ་རེད། སྙན་ངག་དེའི་ཀློག་པ་པོ་ཐོག་མ་ནི་ཨ་ལགས་དོར་ཞི་འཇོག་བགྱི་ཡི་རྩ་བ་འདྲ་བོ་ཡང་དེ་འདྲ་ཞིག་ཡིན། ཁོང་གི་ཕྱག་བྲིས་བསྟར་མ་དེ་ནི་ཕལ་ཆེར་དབུ་ཅན་ཡིན་ངེས། ངས་སློབ་གྲྭའི་ནང་དུ་ཡི་གེར་གཏག་ཏུ་འཇུག་དུས་དེ་འདྲ་དཀའ་ལས་མྱངས་པའང་དྲན་གྱིན་མི་འདུག དེའི་རྗེས་སོར་དོན་གྲུབ་རྒྱལ་ཁོང་གིས་ང་ཚོ་མཚོ་སྔོན་མི་རིགས་སློབ་གྲྭ་ཆེན་མོར་ཕེབས་ནས་སློབ་ཁྲིད་གནང་བའི་སྐབས་དེར་སྒོ་སམ་ངོས་སུ་དབུ་མེད་ཀྱི་འཁྱུག་ཡིག་ཅིག་བྲིས་པར་ང་ཚོ་ཧ་ལས་མྱོང་། སྐབས་དེར་ཁོང་གིས་དབུ་མེད་ཀྱིས་བྲིས་པ་དེ་གསལ་པོར་དྲན་གྱིན་འདུག སྙན་ངག་དེ་ནི་དབུ་ཅན་གྱིས་བྲིས་ཡོད་རྒྱུ་རེད་བསམ་གི་ཡོད། སྐབས་དེའི<<མཚོ་སྔོན་མང་ཚོགས་སྒྱུ་རྩལ>>གྱི་རྩོམ་སྒྲིག་པ་ནི་ཕལ་ཆེར་ཁྲི་ཀ་ནས་ཡིན་པའི་ཨོ་རྒྱན་ཞུ་བ་དེ་ཡིན་པ་འདྲ་ཞིག་ཡིད་ན་ཡོད་ཀི དེ་མིན། འདིའི་ཐད་ནས་ཏག་ཏག་གསལ་པོ་ཞིག་ཁྱེད་ལ་བཤད་རྒྱུ་མི་འདུག སྙན་ངག་དེ་བྲིས་པའི་འབྲི་ཤོག་ནི་ང་ཚོའི་ཉལ་ཁང་ནང་དུ་ཡོད་པའི་འབྲི་དེབ་གང་རུང་ཞིག་ཡིན་ངེས། ཡིན་ནའང་། འབྲི་ཤོག་གི་མགོ་ན་སྐབས་དེར་གཅིག་གྱུར་གྱིས་འཁོད་པའི་རྒྱ་ཡིག་ཅི་ཞིག་བྲིས་ཡོད་མེད་དྲན་གྱི་མི་འདུག གང་ལྟར། དོན་གྲུབ་རྒྱལ་ཁོང་གི་འབྲི་དེབ་མིན་ཁོ་ཐག་ཡིན། འབྲི་བྱེད་ཀྱི་སྨྱུ་གུ་ནི་ཁོང་གི་སྨྱུ་གུ་ཡིན་ངེས། སྐབས་དེར། ཡོན་ཏན་པ་དག་གིས་བྲང་ཁུག་གློ་ཁུག་ནང་ལ་སྨྱུ་གུ་ཞིག་གསེབ་པའི་དར་སྲོལ་ཞིག་ཁྱབ་ཡོད་པས་སྨྱུ་གུ་ནི་ཁོང་གི་ཡིན་ངེས།

དུས་ཚོད། 2020.1.19.9:13pm

གྲལ་ཟུར་དགུ་རོང་སྤུན་གྲོལ།——འོ་ལགས་སོ།། བཀའ་དྲིན་ཤིན་ཏུ་ཆེ་ལགས། དེ་ནས་ང་ཁོམ་དུས་ཤིག་ལ་སྐད་ཆ་འདི་དག་ཡིག་ཐོག་ལ་དབབ་ངེས་ཡིན། རང་གྲོལ་དང་དངོས་སུ་འཕྲད་མྱོང་བའི་མི་ལ་བཅར་འདྲི་བྱས་པའི་སྒྲ་ཕབ་ཉར་ཚགས་བྱེད་པ་ནི་ངའི་དམིགས་ཡུལ་གཙོ་བོ་ཞིག་ཡིན། ཡིན་ནའང་། ད་ལན་གྱི་བཅར་འདྲི་འདི་དམིགས་བསལ་པ་ཡིན་པས་ཁྱེད་ཉིད་འཐད་པ་ཡིན་ན་ཡིག་ཐོག་ལ་ཕབ་ནས་དྲ་ཐོག་ལ་བཞག་ན་ཆོག་གམ། གལ་སྲིད། འཐད་པ་ཡིན་ན། དྲ་ཐོག་ལ་མ་བཞག་པའི་ཡར་སྔོན་ལ་ཡིག་འབབ་ཅིག་ཁྱེད་ལ་བསྐུར་ངེས་ཡིན། དེ་ནས། ཁྱེད་ཀྱིས་གཟིགས་ཏེ་ཆོག་གི་བསམ་ན་དེ་ནས་སྤེལ་གཏང་ན་འགྲིག་ནི་རེད།

དུས་ཚོད། 2020.1.19.9:15pm

ཨ་སྐྱབས་རྒྱལ་སྲས་ཚང་།——འོ་ལགས་སོ།། ཁྱེད་ཀྱིས་ཟིན་བྲིས་སུ་བཏབ་ན་ང་ནི་ཧ་ལས་པའི་དགའ་སྤྲོ་ཡོད། ངས་བཤད་པ་ཐམས་ཅད་ང་དཔང་པོར་འདུག་ཐུབ། ཁྱེད་ཀྱིས་ཟིན་བྲིས་སུ་བཏབ་ནས་ངེད་ལ་ཅིག་བསྟན་རྗེས་དྲ་ལམ་ལ་བཀོད་ནའང་ཆོག དུས་དེབ་ཀྱི་སྟེང་ལ་བཀོད་ནའང་ཆོག འདི་ཚང་མས་ཤེས་དགོས་རྒྱུ་ཞིག་ཡིན། སྤྱིར་བཏང་ཡིན་ན། ལྗང་བུས་ལབ་ཙེའི་ཇ་ཁང་གི་ནང་ནས་བཤད་པའི་རྗེས་སུ་ངའི་སེམས་ནས་ཅིག་བཤད་ན་འདོད་ཐལ། བཤད་ན་འདོད་ཐལ་མོད། གཅིག་ནས། ང་ལབ་ཙེའི་ཇ་ཁང་ལ་འབྲེལ་པ་ཆེར་མེད། གཉིས་ནས། ང་རྩོད་པ་འདྲ་རྒྱག་རྒྱུ་དགའ་ནི་ཟིག་མིན་པས་རྩོད་པ་འདྲ་མ་བརྒྱབ། དེ་མ་གཏོགས། ངས་ཁྱོད་ལ་ཚིག་ཐུང་ཐུང་ཞིག་གོང་ནས་བཤད་ཡོད་པ་དེ་རེད། སྤྱིར་ལྗང་བུ་སོགས་ཀྱིས་དོན་གྲུབ་རྒྱལ་ནི་ཆོས་ལུགས་ལ་མི་དགའ་བའི་ན་གཞོན་གསར་པའི་དར་ཆ་ལྟ་བུ་ཞིག་ལ་བརྩིས་ནས་ཆོས་ལུགས་ལ་དད་པ་མེད་པའི་བཟོ་འདྲ་ཤོད་ཀྱིན་འདུག་མོད། ང་རང་ཉིད་ཁོང་ལ་དངོས་སུ་ཐེངས་མ་གཉིས་ཐུག་མྱོང་ལ། སློབ་མའི་ཚབ་བྱས་ནས་ཁོང་ལ་མྱ་ངན་ཞུ་ཚིག་སྒྲོག་འདོན་ཞུ་རུ་ཡང་སོང་མྱོང་། ང་ཁོང་ལ་རྒྱུས་ཡོད་སྙམ་གྱིན་ཡོད། ཁོང་དད་པ་ཡོད་ནི་ཞིག་ཡིན། ཁོང་གིས“སྙིང་དུ་སྡུག་པའི་བཀའ་བསྟན་གྱི་མཛེས་མ”ཞེས་པ་འགྲེལ་སྐྱོན་པའི་སྐད་ཆ་དེ་ངའི་ཡིད་ལ་དམ་པོར་བཟུང་བསྡད་ཡོད། ཁྱོད་དགུ་རོང་སྤུན་གྲོལ་ཡིན་ནའང་ཁག་མེད་ཀི རང་གྲོལ་དང་དངོས་སུ་ཐུག་དུས་ཆུང་ནི་རེད། ང་ཁོང་དང་དངོས་སུ་ཐུག་མྱོང་བའི་མི་རྒན་ཞིག་ཡིན། ངས་ཁྱོད་དང་བཅས་པ་ཚང་མས་རང་གྲོལ་ཁོང་ཉིད་འཇོག་ཕྱོགས་འདྲ་བོ་དེ་ཅུང་ཟད་འགྲིག་མི་འདུག་འདོད་ཀི་ཡོད། ཁོང་གི་ཕ་ཡུལ་གྱི་ནང་མི་དང་ཁོང་སྐྱེད་སྲིང་བྱེད་མཁན་བཅས་ནི་རྙིང་མ་བའི་ཁྱིམ་རྒྱུད་ཅིག་རེད། རྙིང་མའི་ཁྱིམ་རྒྱུད་ཀྱི་ནང་ནས་ཀྱང་ཉམས་ལེན་ཡོད་པའི་ཁྱིམ་རྒྱུད་ཡག་པོ་ཞིག་རེད། ཁྱོད་ཀྱི་ལྟ་བ་ནི་ཅི་འདྲ་ཡིན་མིན་མི་ཤེས་མོད། ངའི་སེམས་ཁོང་དུ་ཁོང་གི་ཁྱིམ་རྒྱུད་ནི་སྤྱིར་བཏང་གི་ཁྱིམ་རྒྱུད་ཅིག་མ་ཡིན་པར་སློབ་དཔོན་རིན་པོ་ཆེས་གསུངས་པ་ལྟར་ཆོས་རྒྱུད་གདུང་རྒྱུད་ཀྱིས་མ་སྟོང་བ་དེ་འདྲ་ཞིག་རེད་སྙམ་གྱིན་ཡོད། དེ་བས་ངས་ཁོང་གི་ཆོས་རྒྱུད་དང་གདུང་རྒྱུད་ལ་བལྟ་བགྱི་ཞིག་ཡོད་གི་སྙམ་གྱིན་ཡོད། ཁོང་གི་མིང་ལ་རང་གྲོལ་བཏགས་པ་དེ་ཡང་གསང་སྔགས་ཀྱི་མིང་རེད། འདི་ངས་བཤད་ན་འདོད་སོང་།

2020.1.24ཉིན་ཡི་གེར་ཕབ།

[ གསལ་འདོན། རང་གྲོལ་གྱི་སྙན་ངག<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པ་འདི་ཇི་ལྟར་བྲིས་ཚུལ་ཐད་ནས་འགྲེལ་སྟངས་ཁག་ཅིག་འདུག

1.བོད་ཀྱི་བུད་མེད་རྩོམ་པ་པོ་འཆི་མེད་ལགས་ཀྱིས2015ལོའི་ཟླ6པའི་ཚེས26ཉིན་རྫོགས་པར་བྲིས་པའི་རྩོམ་ཡིག་སྟེ<<བོད་མོས་བོད་མོའི་རྩོམ་རིག་གླེང་བ>>ཞེས་པའི་ནང་རང་གྲོལ་ལགས་ཀྱིས་མཚོ་སྔོན་མི་རིགས་སློབ་ཆེན་ཏུ་ཕེབས་ནས་འཆད་ཁྲིད་གནང་རྗེས་ཁོ་མོའི་འཛིན་གྲྭས་རང་གྲོལ་ལ་དགོང་ཟས་ཤིག་དྲངས་པ་དང་མཉམ་དུ་ཟ་ཁང་དེའི་ནང<<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག>>ཅེས་པའི་སྙན་ངག་དེ་བྲིས་ཚུལ་འཁོད་འདུག འདི་ནི་མཚོ་སྔོན་མི་རིགས་དཔེ་སྐྲུན་ཁང་གིས2017ལོའི་ཟླ11པའི་ནང་དཔར་སྐྲུན་བྱས་པའི་དེབ<<བོད་ཀྱི་རྩོམ་རིག་ཞིབ་འཇུག་དེབ་ཚོགས-བུད་མེད་རྩོམ་པ་པོས་གསར་རྩོམ་གླེང་བ>>ཞེས་པར་འཁོད་འདུག བདག་ཉིད2017ལོའི་ཟླ5པའི་ཚེས11ཉིན་རྨ་ལྷོ་ཁུལ་ཏུ་ཡོད་པའི་ཟ་ཁང(伊丰苑)ཞེས་པའི་ནང་བུད་མེད་རྩོམ་པ་པོ་འཆི་མེད་དང་འཕྲད་སྐབས་ལོ་རབས་བརྒྱད་ཅུ་པའི་སྐབས་ཀྱི་ཁོ་མོའི་ཟིན་བྲིས་འདྲི་དེབ་མཐོང་རེག་བྱུང་པའི་གོ་སྐབས་ལྡན།

སྐབས་དེར། བུད་མེད་རྩོམ་པ་པོ་འཆི་མེད་ཀྱིས1986.6.2ཉིན་གོང་འཁོད་ཀྱི་སྙན་ངག་དེ་ཇི་བཞིན་བཤུ་འབྲི་བྱས་ཡོད་པ་མཐོང་བྱུང་ལ། <<འདི་ནའང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག_བདག་ལ་བདུད་རྩི་དྲངས་པའི་གྲོགས་པོ་འགའ་ལ་དྲན་རྟེན་དུ་ཕུལ>>ཅེས་པ་ཆ་ཚང་བར་འཁོད་འདུག་པས་དགའ་སྤྲོ་ཚད་མེད་སྐྱེས། འདི་ནི་བདག་གིས་བརྩད་གཅོད་བྱས་པའི་ཁྲོད་ནས་དཔང་རྟགས་གསལ་ཤོས་དེ་རེད། བདག་གིས་དེ་མུར་པར་ལེན་པའི་ཆོག་མཆན་ཞུས་ཏེ་འདྲ་པར་བླངས། 2020.2.11ཉིན་བུད་མེད་རྩོམ་པ་པོ་འཆི་མེད་ལགས་སུ་པར་རིས་རེ་ཟུང་དྲ་ལམ་དུ་སྤེལ་ཆོག་པའི་བཀའ་འཁྲོལ་ཞུས་པ་ལྟར་གནང་སྟེ་འདིར་འཁོད་ཡོད། འཆི་མེད་ལགས་ཀྱི་བཤད་ཚུལ་འདི་དཔེ་དེབ་དང་འཕྲིན་སྟེགས་དང་ཐད་གཏོང་བཅས་སུ་ཤུགས་ཆེར་མངོན་ཟིན་པས་བདག་གིས་འཆི་མེད་ལ་བཅར་འདྲི་བྱས་པའི་སྒྲ་ཕབ་ཀྱི་རིང་ཚད་དུས་ཚོད1:09:46ཡོད་པ་དེ་སྤྱི་པའི་མཐོང་ལམ་དུ་དགྲམ་པའི་དགོས་པ་ཆེར་མི་འདུག གང་ལྟར། ངས་ད་ལྟའི་དབར་བསྡུར་དཔྱོད་བྱས་པ་ལྟར་ན། འཆི་མེད་ཀྱི་བཤད་ཚུལ་འདི་ཡང་དོན་དངོས་ཡིན་པ་དང་། རང་གྲོལ་གྱིས་སྙན་ངག་དེ་བྲིས་པའི་རྗེས་སོར་མཚོ་སྔོན་མི་རིགས་སློབ་ཆེན་དུ་ཕེབས་ནས་ཡང་བསྐྱར་ཤོག་ངོས་གཞན་ཞིག་ཏུ་ཕབ་པའི་གནས་ཚུལ་བྱུང་འདུག

2. ལྗང་བུས་ལབ་ཙེ་ཇ་ཁང་ཞེས་པའི་སྐད་ཚོམས་ཀྱི་ནང་བཤད་ཅིང་རྗེས་སོར<<རང་གྲོལ་གྱི་སྙན་ངག་ལྗང་བུས་བཀྲོལ་བ>>ཞེས་པ་ཨ་འཇམ་གྱིས་ཡི་གེར་ཕབ་པར་གྲགས་པའི་ཁ་སྐད་རྩོམ་ཡིག་དེའི་ནང་གསལ་པ་སྟེ། གོང་འཁོད་ཀྱི་སྙན་ངག་དེ་ནི་རང་གྲོལ་གྱིས་ལྗང་བུ་ལ་ཆང་རིན་ཞིག་གི་དོད་དུ་བྲིས་པ་ཡིན་ཚུལ་དང་། ལྗང་བུས་སྙན་ངག་དེའི་རྩོམ་བྱང་ནི་ལྗང་བུ་ཁོ་དང་འབྲེལ་ཡོད་པའི་རྣམ་པ་བསྟན་ཡོད། དེའི་ཕྱིར། ལྗང་བུས་སྔ་མོ་ནས“བདག་ལ་བདུད་རྩི་དྲངས་པའི་གྲོགས་པོ་འགའ་ལ་དྲན་རྟེན་དུ་ཕུལ”ཅེས་པ་དོར་ནས་སྣུམ་པར་ལ་བཏབ་ཚུལ་བཤད་ཡོད། ཡིན་ནའང་། སྙན་ངག་དེ་བྲིས་པའི་གནས་ནི་མཚོ་སྔོན་དགེ་ཐོན་སློབ་ཆེན་ཡིན་པ་དང་། རྩོམ་རིག་གི་ཟབ་སྦྱོང་འཛིན་གྲྭ་ཞིག་བསྡུས་ཡོད་པའི་སྐབས་དེར་གཅན་ཚ་བཀྲ་བྷོ་དང་རྟ་མགྲིན་རྒྱལ་གཉིས་ཀྱི་ཉལ་ཁང་དུ་བྲིས་ཡོད་ཚུལ་བཤད་པ་ནི་ཕལ་ཆེར་དོན་དངོས་ཡིན་པ་འདྲ། གང་ལྟར། ལྗང་བུས་བཤད་པ་ནི་ཚང་མས་ཤེས་ཡོད་ལ་ཐོས་ཀྱང་ཡོད། ཡིན་ནའང་། གོང་གི་ལྗང་བུས་བཤད་པ་དང་། 2010ལོའི་ཟླ10པའི་ཚེས1ཉིན་བདག་ཉིད་ཟི་ལིང་ནས་ལྗང་བུ་ལ་ཐུག་ནས་བཅར་འདྲི་བྱས་པའི་སྒྲ་ཕབ་ནང་བཤད་པ་གཉིས་ནི་མི་འདྲ་བ་སོ་སོ་གཉིས་རེད། སྒྲ་ཕབ་འདིའི་ནང་ལྗང་བུས་ཨ་ལགས་དོར་ཞི་དང་སྐྱེ་བོ་གཞན་ལ་དམའ་འབེབ་ཀྱི་སྐད་ཆ་མང་པོ་བཤད་འདུག་པས་ལྗང་བུའི་མཚན་སྙན་ལ་བསམ་བློ་བཏང་ནས་སྤྱི་པའི་མཐོང་ལམ་ལ་བཀྲམ་མེད། རང་གྲོལ་གྱི་གྲོགས་པོ་དམ་པ་སངས་རྒྱས་རིན་ཆེན་གྱིས2011ལོའི་ཟླ7པའི་ཚེས21ཉིན་བདག་གིས་བཅར་འདྲི་བྱས་པའི་སྒྲ་ཕབ་ནང་སྐབས་དེར་རང་གྲོལ་ནི་རྩོམ་རིག་ཟབ་སྦྱོང་འཛིན་གྲྭ་དེའི་དགེ་རྒན་ལ་གདན་ཞུ་བྱས་ཡོད་ཀྱང་། རང་གྲོལ་དང་ཁྲིན་ཆིན་དབྱིན་གཉིས་ཀྱིས་དབྱར་གནང་གི་དུས་ཚོད་བེད་སྤྱད་ནས་སྔར་ཁོང་གཉིས་ཀྱིས་བརྩམས་པའི<<བོད་ཀྱི་བཙན་པོ་ཁྲི་སྲོང་ལྡེ་བཙན་གྱི་ལོ་རྒྱུས་མདོ་ཙམ་བརྗོད་པ་སྔོན་བྱོན་མཁས་པའི་བཞེད་དགོངས་ཀྱི་བུམ་བཟང་མཛེས་པར་བརྒྱན་པའི་རྨ་བྱ་གཞོན་ནུའི་སྒྲོ་མདོངས་ཞེས་བྱ་བ་བཞུགས་སོ།>>ཞེས་པ་མཐའ་ཞུས་གནང་བའི་དུས་ཐོག་ལ་འཁེལ་པས་མ་ཁོམ་པ་རེད་ཅེས་གསུངས། གང་ལྟར། རང་གྲོལ་ནི་སྐབས་དེར་ཟི་ལིང་ན་ཡོད་པ་དོན་དངོས་རེད་ལ། ཁོང་གི་ཟླ་ཕོགས་བཅད་ནས་ཟླ་གཉིས་ཕྱིན་ཡོད་པའི་སྐབས་སུ་ཡང་ཁེལ་འདུག ཁོང་གིས་རང་སྲོག་མ་བཅད་པའི་སྔོན་དབར་ཟླ་ཕོགས་བཅད་ནས་ཟླ་དྲུག་ཕྱིན་འདུག གནས་ཚུལ་འདི་ཁོང་གི་ཡིག་ཚགས(档案)ནང་ཅུང་ཙམ་གསལ། ལྗང་བུས་དོན་དངོས་ཀྱི་གནས་ཚུལ་སྦས་ནས་འཁྱོག་བཤད་ལུང་བ་གང་བྱས་པ་ནི་རྒྱུས་ཡོད་པ་དག་གིས་ཤེས་སོ།།

3.བསམ་འགྲུབ་ཚེ་རིང་ངམ་ཨ་སྐྱབས་རྒྱལ་སྲས་ཚང་ལ་སྐད་འཕྲིན་བརྒྱུད་ནས་བཅར་འདྲི་བྱས་པ་འདི་རེད། ང་ཚོས་འདི་བརྒྱུད་ནས“བདག་ལ་བདུད་རྩི་དྲངས་པའི་གྲོགས་པོ་འགའ་ལ་དྲན་རྟེན་དུ་ཕུལ”ཅེས་པའི་བདུད་རྩི་འདྲེན་མཁན་ནི་མི་སྣ་བཞི་ཡོད་པ་དང་དེ་དག་ནི་བསམ་འགྲུབ་ཚེ་རིང་དང་། གཅན་ཚ་བཀྲ་བྷོ་དང་། གཅན་ཚ་རྟ་མགྲིན་རྒྱལ། ལྗང་བུ་བཅས་ཡིན་ཚུལ་ཤེས་རྟོགས་བྱུང་། ཨ་སྐྱབས་རྒྱལ་སྲས་ཚང་གིས་ལྗང་བུས་མ་བཤད་པ་མང་པོ་ཞིག་བཀྲལ་ཡོད་པས་མ་འདྲ་བའི་ཁྱད་ཆོས་འདུག་པས་མནོ་བསམ་གཏང་རུང་བའི་ཆ་ནི་མང་། བསམ་འགྲུབ་ཚེ་རིང་ལགས2011ལོར་ཐོག་མར་ངེད་ལ་ངོ་སྤྲོད་བྱེད་མཁན་ནི་ངེད་ཕུ་ནུ་གཉིས་ཀྱི་གྲོགས་པོ་དམ་པ་སངས་རྒྱས་རིན་ཆེན་ལགས་ཡིན། དེ་ནས་བཟུང་བདག་གིས་བརྩད་བཅད་པའི་བརྒྱུད་རིམ་ཁྲོད2017ལོའི་ཟླ6པའི་ནང་བུད་མེད་སྙན་ངག་པ་འཆི་མེད་བརྒྱུད་ནས་རྨ་ལྷོ་ཐུན་རིན་རྫོང་གི་རྫོང་དཔོན་གཞོན་པ་ཟུར་པ་མགར་རྩེ་སྟག་ལྷ་དང་ཐུག་ཅིང་། ཁོང་གིས་སྙན་ངག་དེ་བསམ་འགྲུབ་ཚེ་རིང་གིས་དཔར་ནས་སློབ་མ་རྣམས་ལ་བཀྲམ་པས་དེ་ཇི་ལྟར་སྤེལ་པའི་ཐད་ནས་བསམ་འགྲུབ་ཚེ་རིང་ལ་གསལ་ཆ་ཡོད་ཚུལ་བཤད་སོང་། དེ་ནས་བསམ་འགྲུབ་ཚེ་རིང་གི་ཁ་པར་ཨང་གྲངས་བརྩད་གཅོད་པའི་མངགས་བཅོལ་བྱས་མོད་ལག་སོན་མ་བྱུང་། 2019ལོའི་ཟླ12པའི་ཚེས27ཉིན་བདག་གི་གྲོགས་པོ་ཐེ་བྲག་བསྟན་པ་དང་འཕྲད་ནས་བསམ་འགྲུབ་ཚེ་རིང་ངམ་ཨ་སྐྱབས་རྒྱལ་སྲས་ཚང་གི་སྐད་འཕྲིན་བརྒྱུད་འབྲེལ་གནང་བྱུང་བས་བཅར་འདྲི་འདི་ལེགས་འགྲུབ་བྱུང་ཐུབ་སོང་། དེར་བརྟེན། ཨ་སྐྱབས་རྒྱལ་སྲས་ཚང་གཙོས་པའི་འབྲེལ་ཡོད་ཀྱི་གྲོགས་པོ་རྣམས་ལ་ཐུགས་རྗེ་ཆེ་ཞུ། ཞར་བྱུང་གིས་གཅན་ཚ་བཀྲ་བྷོ་དང་རྟ་མགྲིན་རྒྱལ་གཉིས་ཀྱིས་བདག་གིས་དྲི་བ་ཅི་དྲིས་ཁག་ལ་ལན་བཏབ་པ་དང་། སྒོས་སུ་སྐུ་ཞབས་སྨན་བླ་སྐྱབས་དང་ཕག་མོ་བཀྲ་ཤིས་གཉིས་ཀྱིས་སོ་སོའི་དྲན་སོས་ཚོད་ཀྱིས་བདག་གི་དྲི་བ་ཁག་ལ་ལན་བཏབ་པར་སེམས་གཏིང་ནས་ཐུགས་རྗེ་ཆེ་ཞུ། གཞན། བུད་མེད་རྩོམ་པ་པོ་འཆི་མེད་ལགས་ཀྱིས་ཁོ་མོའི་ཟིན་བྲིས་ཀྱི་འདྲ་རིས་དྲ་ལམ་དུ་སྤེལ་པའི་ཆོག་མཆན་གནང་བར་ཐུགས་རྗེ་ཆེ་ཞུ། སྙན་ངག་འདི་ཇི་ལྟར་བྲིས་པའི་ཐད་ནས་ཨ་ལགས་དོར་ཞི་ཚང་མ་གཏོགས་འབྲེལ་ཡོད་ཀྱི་མི་སྣ་ཚང་མར་ཐུག་ནས་བཅར་འདྲི་བྱས་ཡོད། སྙན་ངག་འདི་ཇི་ལྟར་སྤེལ་པའི་ཐད་ནས་མང་ཚོགས་སྒྱུ་རྩལ་གྱི་སྐབས་དེའི་རྩོམ་སྒྲིག་པ་མ་གཏོགས་གཞན་ཚང་མར་འཕྲད་ཡོད་པས་མ་འོངས་པར་ཨ་ལགས་དོར་ཞི་ཚང་དང་རྩོམ་སྒྲིག་པ་གཉིས་ལ་འཕྲད་ཐུབ་པའི་རེ་སྨོན་བྱེད་ཀྱིན་ཡོད། བསམ་འགྲུབ་ཚེ་རིང་ངམ་ཨ་སྐྱབས་རྒྱལ་སྲས་ཚང་ལ་བཅར་འདྲི་བྱས་པ་འདི་ནི་དམིགས་བསལ་པ་ཞིག་ཡིན་པས་ཁོང་གིས་གསུངས་པ་ཇི་བཞིན་དེང་རབས་ཀྱི་བཅར་འདྲི་བྱེད་ཚུལ་ལྟར་ཡི་གེར་ཕབ་ནས་ཁོང་གི་བཀའ་འཁྲོལ་འོག་སྤྱི་པའི་མཐོང་ལམ་དུ་བཀྲམ་པ་ཡིན།

གྲལ་ཟུར་དགུ་རོང་སྤུན་གྲོལ་གྱིས་ཕ་ཡུལ་གཅན་ཚ་ནས་བྲིས་ཏེ་སྤེལ།
2020.2.11