ཨ་སྒོར་ས་ཡ་གཅིག་དང་ཕྱེད་ཀའི་ཐད་དཔལ་ལྡན་སྲིད་སྐྱོང་གི་གནང་བབ་ལོ་རྒྱུས་ཡིག་ཚང་དུ་བྲིས་པ།

བོད་མི་མང་སྤྱི་འཐུས་བློ་བཟང་ཆོས་འབྱོར།

 

ཆེས་བཀུར་བར་འོས་པའི་མི་མང་རྣམ་པ་ལགས། གུས་པ་མི་མང་གིས་འོས་འདེམས་བྱས་པའི་འགོ་ཁྲིད་གྲས་སུ་སླེབས་རྗེས་ཙམ་མིན་པར། སུ་ཞིག་གིས་༧གོང་ས་མཆོག་གི་ལམ་སྟོན་དང་ཐུགས་རེ་རྣམས་སྣང་མེད་དུ་བཞག་སྟེ། ཡང་ན་ཁ་ནས་སྐྱོར་བ་ཙམ་གྱི་རྣམ་པར་བཞག་སྟེ་འཐུས་ཤོར་ཇི་ལྟར་གཏོང་གི་ཡོད་མེད་ལ་རྟག་ཏུ་རང་ཚོད་ཀྱིས་དོ་སྣང་བྱེད་ཁུལ་ནས། བར་ལམ་མི་མང་གིས་སྤྱི་འཐུས་ཀྱི་མཚན་ཞིག་གནང་བ་ནས། དམིགས་བསལ་དུ་འཛིན་སྐྱོང་གི་ཕྱག་ལས་གནང་སྟངས་ལ་དོ་སྣང་ཤུགས་ཆེར་བྱེད་དགོས་བྱུང་བ་ཁྲིམས་སྒྲིག་གིས་སྐུར་པའི་འོས་འགན་དང་། ལས་དང་སྨོན་ལམ་གྱིས་བགོས་པའི་ལས་ཀར་གྱུར། ཕལ་ཆེར་འདས་པའི་ལོ་ ༣ རིང་གསལ་བོ་མ་ཆགས་པའི་ཨ་སྒོར་ས་ཡ་ ༡་༥༠ སྐོར་གྱི་ལབ་གླེང་གིས། ང་ཚོའི་ཆིག་སྒྲིལ་ལ་མི་དགོས་ས་ནས་འགལ་རྐྱེན་སྣ་མང་བསྐྲུན་ཡོད་ཅིང་། དབང་ཆ་ལོག་སྤྱོད་དང་། རྒྱུས་ཡོད་རྒྱུས་མེད་ཀྱི་དངོས་དོན་ཧམ་པ་སུ་ཆེའི་འོག་ཟགས་ནས། དངོས་དོན་ཇི་བཞིན་མི་མང་གིས་མཁྱེན་རྒྱུར་སྒོ་གང་ས་ནས་བར་ཆད་སྣ་མང་འཕྲད་ཡོད་པ་བློ་ཕམ་གྱི་གནས་སུ་ཆེ་ཡང་། ད་ལྟ་གཞི་ནས་ལབ་གླེང་ཤུགས་ཆེར་བྱུང་པའི་གནས་ཚུལ་འདིའི་སྐོར་ཁུངས་ཡང་དག་པ་དང་བཅས་ཁྱེད་རྣམ་པར་ཞུ་རྒྱུ་བྱུང་བ་འདི་སྐལ་བ་བཟང་པོ་རེད་སྙམ། གནས་ཚུལ་འདི་ཞིབ་ཏུ་བཀླགས་རྗེས། སྨྱུག་འཛིན་པས་རེ་བ་གང་ཞིག་རྒྱག་གི་ཡོད་ཞུ་ན། ཀློག་པ་པོ་སྐུ་ཉིད་མཆོག་ལ། གང་ཟག་ཅིག་མ་རབས་ཐ་ཤལ་དུ་ངོས་འཛིན་ཡོང་བའི་འདུ་ཤེས་བསྐྲུན་ཐབས་མིན་ཞིང་། མང་གཙོའི་འབབ་ས་ཁྲིམས་སྒྲིག་དང་། ཁྲིམས་སྒྲིག་གིས་སྒྲིག་འཛུགས་ཇི་ལྟར་དབང་བསྒྱུར་གྱི་ཡོད་མེད་ལ་ཤེས་རྟོགས་གཏིང་ཟབ་འབྱུང་ཆེད་དང་། རྨང་གཞི་དེ་བརྒྱུད་མང་གཙོའི་ལམ་ནས་བདམས་ཐོན་བྱུང་བའི་དབུ་ཁྲིད་ཚོས་མི་མང་ལ་དབུ་སྐོར་གཏོང་མི་ཐུབ་ཆེད་དང་། འགོ་ཁྲིད་ཀྱིས་ལས་དོན་ནོར་འཁྲུལ་ཅན་བྱེད་སྐབས་མི་མང་གིས་དེ་མ་ཐག་ཐེར་འདོན་ཚར་གཅོད་རྗེས་འཛིན་བྱ་ཐུབ་པ་བཅས་ཀྱི་ཉམས་མྱོང་བསགས་ཆེད་བཅས་སུ་དམིགས་པ་ཞིག་ཡིན། དེས་ན་ཨ་སྒོར་ས་ཡ ༡་༥༠ སྐོར་དོན་ཚན་ལྔར་དབྱེས་ཏེ་གོ་བདེ་བར་ཞུ་བ་ལ།།

གཅིག སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་པས་ཨ་རི་དོན་ཁང་གི་རྩིས་ཁྲར་ཅི་ལྟར་ཞིབ་འཇུག་བྱས་སམ། གཉིས། ཨ་རི་བོད་ཀྱི་ཐེབས་རྩས་གན་རྒྱ་དེ་དང་འབྲེལ་ནས་བཀའ་ཤག་ལ་གསལ་བཤད་གང་དག་ཞུས་སམ། གསུམ། སྲིད་སྐྱོང་བློ་བཟང་སེང་གེ་དང་དབུ་དཀར་ཚང་སྐལ་བཟང་རྡོ་རྗེ་རྣམ་གཉིས་ནས་ཨ་རིའི་རོགས་དངུལ་ལེན་ས་གཞན་ཞིག་བཟོ་འཆར་གནང་དོན་ཅི་ཡིན་ནམ། བཞི། དོན་གཅོད་ཟུར་པ་སྤེན་པ་ཚེ་རིང་གིས་བུ་ལོན་གྱི་གན་ཡིག་དེ་ནག་ཁུང་ནང་སྣང་མེད་དུ་འཇོག་མི་ཐུབ་དོན་ཅི་ཡིན་ནམ། ལྔ། ཨ་སྒོར་ས་ཡ་ ༡་༥༠ བོད་མི་མང་སྤྱི་འཐུས་ལྷན་ཚོགས་ལ་བཀའ་འཁྲོལ་ཞུ་སྐབས་དབུ་སྐོར་ཅི་ལྟར་ཞུས་མིན། བཅས་གནད་དོན་ ༥ ཐད་ཁ་གསལ་གོ་བདེར་འབྲི་བའི་ངལ་བ་དང་དུ་ལེན་ན། གཟུར་གནས་གཞུང་སེམས་ཅན་དག་གི་ཐུགས་འདོད་ཚིམ་རེ་ཤིན་ཏུ་ཆེ།

གཅིག སྤྱི་ཁྱབ་རྩིས་ཞིབ་ལས་ཁང་གི་རྩིས་ཞིབ་པས་ཨ་རི་དོན་ཁང་གི་རྩིས་ཁྲར་ཅི་ལྟར་ཞིབ་འཇུག་བྱས་སམ།

༢༠༡༧ ཟླ་ ༣ ཚེས་ ༢༧ ཉིན་ཨ་རིའི་དོན་ཁང་གི་རྩིས་ལོ་ ༢༠༡༤་་་ ༡༦ ལོའི་རྩིས་ཁྲར་རྩིས་ཞིབ་པ་ཆེད་བཅར་གྱིས་ཞིབ་འཇུག་བྱ་འགོ་བརྩམས། ༢༠༡༧ ཟླ་ ༤ ཚེས་ ༥ ཉིན་རྩིས་ཞིབ་པས་རགས་ཟིན་སྙན་ཐོ་འབྲི་འགོད་ཞུས་པ་ཉིན་རྒྱབ་དོན་གཅོད་ལས་ཁང་གི་འགོ་ལས་ཡོངས་དང་མཉམ་སྙན་སྒྲོན་གོ་བསྡུར་གནང་། སྐབས་དེར་རྩིས་སྙན་ནང་ཨ་རིའི་བོད་ཀྱི་ཐེབས་རྩ་ལ་སྤྲོད་བསྡད་གསལ་མིན་སྐོར་དོན་གཅོད་ནས་རྩིས་ཞིབ་པར་དྲི་བ་བཏང་། རྩིས་ཞིབ་པས་གསལ་གྱི་མི་འདུག་ཅེས་ལན་ཕུལ། དོན་གཅོད་ནས་གཞི་རྩའི་རྩིས་ཀྱི་འགྲོ་ལུགས་ལྟར་བྱས་ན་ཕྱོགས་གཅིག་ནས་ཡོང་བསྡད་ཡོད་ན་གཞན་དེའི་ནང་སྤྲོད་བསྡད་གསལ་དགོས་པར་སོང་། ཨ་རི་བོད་ཀྱི་ཐེབས་རྩའི་རྩིས་ནང་ཨ་རི་དོན་ཁང་གི་མཚན་ཐོག་བུ་ལོན་ཡོང་བསྡད་འདུག་པ་དང་། དེའི་དཔང་རྟགས་སུ་གན་རྒྱ་ཞིག་ཀྱང་བཞག་འདུག དོན་ཁང་གི་རྩིས་ཁྲའི་ནང་དེ་མཚུངས་སྤྲོད་བསྡད་དགོས་པ་ཞིག་མ་གསལ་ཚེ་ཁྲིམས་ཐོག་ནས་དཀའ་ངལ་འཕྲད་ཉེན་ལ་བརྟེན་དངོས་ཡོད་གནས་སྟངས་ལྟར་རྩིས་འཁུར་དགོས་ཀྱི་མེད་དམ་ཞེས་གསུངས། དེར་རྩིས་ཞིབ་པས་རྩིས་ལོ་ ༢༠༡༣ ་་་ ༡༤ ལོའི་སྙན་ཐོའི་ནང་དུའང་བུ་ལོན་ཡིན་པ་གསལ་གྱི་མེད་སྐོར་ཞུས་འཕྲལ། དོན་གཅོད་ནས་ཚང་འཛོམས་ཡོད་མུས་ཐོག་བོད་ཀྱི་ཐེབས་རྩར་ཁ་པར་བཏང་སྟེ་གན་ཡིག་གི་ངོ་བཤུས་ཤིག་སྐུར་རོགས་གསུངས་པར། དེ་མ་ཐག་གློག་འཕྲིན་ Email བརྒྱུད་འབྱོར་བ་རྩིས་ཞིབ་པར་ཕུལ། རྩིས་ཞིབ་པས་དཔྱད་ཞིབ་སྐབས། བུ་ལོན་ཡིན་པ་གསལ་ར་འཕྲོད་རྗེས་གོང་རིམ་ལ་སྙན་གསེང་ཞུ་རྒྱུ་གནང་སྟེ་ཚོགས་འདུ་གྲོལ།

༢༠༡༧ ཟླ་ ༤ ཚེས་ ༡༧ ཉིན་རྩིས་ཞིབ་པ་ཨ་རི་ནས་ཕྱིར་ཕེབས་ཏེ་ལས་བཅར་ཞུས་འཕྲལ། ཨ་སྒོར་ས་ཡ་ ༡་༥༠ སྐོར་སྙན་ཐོའི་སྐྱོན་གནད་ནང་འབྲི་རྒྱུ་གལ་ཆེར་དགོངས་པ་བཞིན་དངོས་སུ་ཕྱག་བསྟར་གྱིས་བྲིས་གནང་སྟེ་ཨ་རི་དོན་ཁང་གི་རྩིས་ལོ་ ༢༠༡༤ ་་་ ༡༦ ལོའི་རྩིས་ཞིབ་སྙན་ཐོ་རགས་ཟིན་གྲུབ་པར་བྱས། ༢༠༡༧ ཟླ་ ༤ ཚེས་ ༢༠ ཉིན། སྤྱི་ཁྱབ་རྩིས་ཞིབ་འགན་འཛིན་མགོན་པོ་ལགས་དང་། དྲུང་ཚབ། དྲུང་འཕར། ཟུང་དྲུང་། འབྲེལ་ཡོད་རྩིས་ཞིབ་པ་བཅས་ལྷན་འཛོམས་སར། འབྲེལ་ཡོད་རྩིས་པས་ཨ་སྒོར་ས་ཡ་ ༡་༥༠ སྐོར་གན་རྒྱ་ཞིག་བཞག་འདུག་པའི་ནང་བུ་ལོན་ཡིན་ཚུལ་གསལ་བཀོད་བྱས་ཡོད་པའི་གནས་ཚུལ་རྣམས་ཞིབ་ཏུ་ཞུས་འབྲས། གན་རྒྱ་འཇོག་མཁན་གྱི་དེ་སྔའི་དོན་གཅོད་དབུ་དཀར་ཚང་སྐལ་བཟང་རྡོ་རྗེ་ལགས་ད་ལྟ་དཔལ་འབྱོར་ལས་ཁུངས་སུ་ཡོད་གཤིས། དེར་གསལ་བཤད་ཉན་ཞིབ་དགོས་རྒྱུ་ཐག་བཅད། ༢༠༡༧ ཟླ་ ༤ ཚེས་ ༢༡ ཉིན་གྱི་ཕྱི་དྲོ་ཆུ་ཚོད་ ༥ ། རྩིས་ཞིབ་པ་དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་ལ་ཐུག་འཕྲད་གནང་། སྐབས་དེར་རྩིས་ཞིབ་པས། རྩིས་ལོ་ ༢༠༡༣ ་་་༡༤ ལོའི་ནང་ཨ་རི་བོད་ཀྱི་ཐེབས་རྩ་ནས་དོན་ཁང་གི་ས་ཁང་སྤུས་གཟིགས་ཆེད་བོད་མིའི་སྤྱི་ཚོགས་ཡར་རྒྱས་ཐེབས་རྩའི་རྩིས་ནང་ཨ་སྒོར་ས་ཡ་ ༡་༥༠ གནང་འདུག་པ་དེ་རོགས་དངུལ་ཡིན་ནམ་ཞེས་འདྲི་རྩད་ཞུས་སྐབས། སྐལ་རྡོར་ལགས་ནས་རོགས་དངུལ་རང་ཆགས་ཡོད་གསུངས། ཡང་རྩིས་ཞིབ་པས། དེ་ཡིན་ན། སྐུ་ཉིད་དང་ཨ་རི་བོད་ཀྱི་ཐེབས་རྩའི་བར་ ༢༠༡༤ ཟླ་ ༣ ཚེས་ ༣༡ ཉིན་བུ་ལོན་ཡིན་པའི་གན་རྒྱ་ཞིག་བཞག་འདུག་པ་འདི་ཅི་ཡིན་ཞེས་བཀའ་འདྲི་གནང་བར། ཡང་སྐལ་རྡོར་ལགས་ནས། གན་རྒྱ་དེ་ག་བ་ནས་བྱུང་སོང་ཞེས་གསུངས། དེར་རྩིས་ཞིབ་པས་བརྒྱུད་རིམ་ཆ་ཚང་འགྲེལ་བཤད་ཞུས། དེར་མུ་མཐུད་སྐལ་རྡོར་ལགས་ནས། ཁྲིམས་ཐོག་ནས་དཀའ་ངལ་མི་འཕྲད་སླད་བོད་ཀྱི་ཐེབས་རྩས་བཟོས་པ་ཞིག་ལས་དོན་ལ་བུ་ལོན་མིན། གན་རྒྱའི་ནང་ཅི་ལྟར་འཁོད་ཡོད་རུང་རོགས་དངུལ་རང་ཡིན་གསུངས། རྩིས་ཞིབ་པས། གན་རྒྱར་ཁྱོད་ཀྱིས་མཚན་རྟགས་བཀོད་ཡོད་པ་དང་། འབྲུ་དོན་དུའང་བུ་ལོན་ཡིན་གནས་གསལ་འདུག་སྟབས་འདི་ལོར་རྩིས་ཁྲར་རྩིས་བཅོས་ཀྱིས་བུ་ལོན་གྱི་ངོ་བོར་རྩིས་འཁུར་ཞུས་པ་ཡིན་གསུངས་པར། སྐལ་རྡོར་ལགས་ནས། ཨ་རི་བོད་ཀྱི་ཐེབས་རྩའི་མཉམ་གན་རྒྱ་དེ་དགོས་དབང་གིས་བཞག་པ་ལས་དེ་ལྟར་ཕྱིར་སློག་དགོས་ཀྱི་མེད་པ་ཕྱོགས་གཉིས་ཀས་གསལ་བོ་ཤེས་ཀྱི་ཡོད་ཅེས་ཨུ་ནན་གནང་། དེར་རྩིས་ཞིབ་པས། ཅི་སྟེ་དེ་ལྟར་ཡིན་ཚེ་བུ་ལོན་མིན་སྐོར་བོད་ཀྱི་ཐེབས་རྩས་ཡིག་ཐོག་ཏུ་བཀོད་པ་ཉིན་གྲངས་ ༡༠ ནང་གནང་རོགས་གསུངས་ཏེ་ཐུག་འཕྲད་མཇུག་གྲུབ།

སྐལ་རྡོར་ལགས་ནས་ཨ་སྒོར་ས་ཡ་ ༡་༥༠ ལས་སྔ་འདོན་ཨ་སྒོར་ཆིག་ཁྲི་ལྔ་སྟོང་ ༡༥༠༠༠། ཨ་རི་དོན་ཁང་གི་དམིགས་བསལ་རྩིས་འགོ་༧གོང་ས་མཆོག་གི་ཆིབས་བསྒྱུར་གྱི་རྩིས་འགོའི་ནང་བཅུག་བཏོན་བྱས། འདི་ནི་ཧ་ཅང་ཚབས་ཆེན་ཞིག་ཡིན། རྩིས་འགོ་དེར་༧དཔལ་ལྡན་དགའ་ལྡན་ཕོ་བྲང་གི་བཀའ་འཁྲོལ་མེད་པར་དངུལ་སྐར་གང་ཡང་བཅུག་བཏོན་བྱས་ཆོག་གི་མེད་ཀྱང་། དཔལ་ལྡན་༧དགའ་ལྡན་ཕོ་བྲང་ཡིག་ཚང་གིས་མཁྱེན་རྟོགས་གང་ཡང་མེད་པར་རང་སྣང་གང་ཤར་གྱིས་བཅུག་བཏོན་བྱས་འདུག ཉིན་གྲངས་ ༡༠ རྗེས་སུ་སྐལ་རྡོར་ལགས་ནས་ལན་གང་ཡང་མ་འབྱོར་སྟབས། འབྲེལ་ཡོད་རྩིས་ཞིབ་པ་ལགས་ནས་ ༢༠༡༧ ཟླ་ ༥ ཚེས་ ༢༡ ཉིན་ཨ་སྒོར་ས་ཡ་ ༡་༥༠ དེ་བཞིན་བུ་ལོན་ཡིན་པའི་གན་ཡིག་ལྟར། དོན་ཁང་གི་རྩིས་ལོ་ ༢༠༡༤་་་༡༦ ལོའི་རྩིས་ཞིབ་སྙན་ཐོའི་ནང་རྩིས་བཅོས་ཀྱིས་སྐྱོན་གནད་ནང་བཀོད་པ་གོང་རིམ་ཟུང་དྲུང་ལ་རྩིས་འབུལ་ཞུས། ༢༠༡༧ ཟླ་ ༥ ཚེས་ ༢༢ ཉིན་སྐལ་རྡོར་ལགས་ནས་ཡི་གེ་ཞིག་སྤྱི་ཁྱབ་རྩིས་ཞིབ་ལས་ཁང་དུ་ཕུལ། ཁ་ཕྱེས་ནས་ལྟ་སྐབས་དེ་ནི་བོད་ཀྱི་ཐེབས་རྩའི་ཡི་གེ་མིན་པར། ཁོང་གི་གསལ་བཤད་ཅིག་སྟེ། ཨ་སྒོར་ས་ཡ་ ༡་༥༠ བུ་ལོན་མིན་ཚུལ་དང་། ནེའུ་ཡོག་བོད་ཀྱི་ཐེབས་རྩའི་ཁང་ཁོངས་ནས་བོད་མིའི་སྒྲིག་འཛུགས་ལ་ཐོབ་སྐལ་ཡིན་གནས་འཁོད་ཡོད་འདུག ༢༠༡༧ ཟླ་ ༨ ནང་། སྤྱི་ཁྱབ་རྩིས་ཞིབ་འགན་འཛིན་མགོན་པོ་མཆོག་ནས། ཨ་སྒོར་ས་ཡ་ ༡་༥༠ སྐོར་བཀའ་ཤག་ནས་ནང་གནས་ཐོག་གསལ་བཤད་ལན་འདེབས་དང་། བོད་ཀྱི་ཐེབས་རྩས་སྲིད་སྐྱོང་མཆོག་ལ་དབྱིན་ཡིག་ནང་ཕུལ་བའི་ཡིག་ཆུང་གི་ངོ་བཤུས་གནང་འབྱོར་ལ་དཔྱད་ཞིབ་རྗེས། སྙན་ཐོ་ནས་ཕྱིར་འཐེན་གནང་རྒྱུ་ཡིན་ཞེས་ཐག་བཅད་པའི་བཀའ་བསྒྲགས། ཐག་གཅོད་དེ་ནི་གཤམ་འོག་ལས་བྱེད་རྣམས་ཀྱང་ཡི་མ་རངས་པའི་གཞི་ཆེན་པོར་གྱུར་ཡོད། གལ་སྲིད་སྤྱི་ཁྱབ་རྩིས་ཞིབ་པས་དངོས་དོན་དུ་དྲང་པོ་གནང་འདོད་ན། སྐབས་དེར་ཨ་རི་བོད་ཀྱི་ཐེབས་རྩ་ལ་བཀའ་རྩད་ཙམ་ཡང་མི་གནང་བར། གན་རྒྱ་ཕར་བཞག སྒྲིག་གཞི་ཚུར་བཞག རྩིས་ཀྱི་འགྲོ་ལུགས་ལ་ལྟོས་མེད་ཀྱིས་ཡང་སྙིང་ཅི་ཞིག་གལ་ཆེར་བཟུང་བ་ཡིན་ནམ། གང་ཞིག་ལ་རྩ་འཛིན་གནང་བ་ཡིན་ནམ། བཀའ་དེ་ལྟར་གནང་འདུག

འོན་ཏང་བདེན་པ་རིམ་གསལ་དངོས་པོའི་གཤིས་ལ་སོང་། ༢༠༡༩ ལོའི་དེང་གི་དུས་གངས་ཅན་སྐྱིད་གཤོངས་གཙོས་དོ་སྣང་ཅན་དང་། དབུ་འཚོས་པོ་བཞུགས་སའི་ས་ཁུལ་མང་པོར་སྐབས་དེའི་སྤྱི་ཁྱབ་རྩིས་ཞིབ་འགན་འཛིན་མཆོག་དང་དཔལ་ལྡན་སྲིད་སྐྱོང་མཆོག་རྣམ་གཉིས་ལན་འགར་ཟུར་མཇལ་གནང་བའི་གནས་ཚུལ་ཕྱི་གྱར་གྱིས་ཤེས་རྟོགས་བྱུང་ཡོད་ཅིང་། སྐབས་དེར་ཡང་སྙིང་བཀའ་མོལ་ཅི་ཞིག་གནང་ཡོད་མེད། གཅིག་ཕན་གཅིག་གྲོགས་ཀྱི་ཐག་གཅོད་ཅི་ལྟར་གནང་ཡོད་མེད་ལ་བསམ་ཚུལ་སྤུངས་བཞིན་པ་རེད། སྨྱུག་འཛིན་པ་ཁོ་བོར་ཡང་སྐབས་དེ་དུས་འོས་འགན་ཞིག་ཡོད་པའི་ཆ་ནས། གནད་དོན་འདིའི་ཆེད་སྐབས་དེའི་རྩིས་ཞིབ་འགན་འཛིན་མགོན་པོ་མཆོག་ལ་ཐེངས་གཉིས་བཅར་ཏེ་དངོས་དོན་བཀའ་འདྲི་ཞུས་ཀྱང་། ད་ལྟ་བསྡོམས་བརྒྱབས་དུས་བཀའ་ལན་དྲང་པོ་གནང་མི་འདུག་པ་གསལ་རུ་འགྲོ་བཞིན་འདུག་ཀྱང་། ངའི་རེ་བར་འགན་འཛིན་ཟུར་པ་མཆོག་གིས་སྐབས་དེར་དཔལ་ལྡན་སྲིད་སྐྱོང་མཆོག་གིས་ཟུར་མཇལ་བྱས་ཏེ་གནས་ཚུལ་ཅི་བྱུང་དྲང་པོ་དྲང་བཞག་གིས་༧གོང་ས་མཆོག་ལ་ཞུ་ངེས་ཤིང་། མི་མང་ལའང་སྙན་གསེང་ངེས་པར་ཞུ་གི་རེད་སྙམ། དེ་ནི་གཏམ་ཚེ་རིང་བ་ཞུ་བ་དེ་མེད་པ་བཟོ་ཐུབ་ཙམ་མིན་པར། མ་འོངས་པར་དབང་ཆ་ལོག་སྤྱོད་ཀྱིས་ཁྲིམས་སྒྲིག་བརྡལ་བཤིག་མི་གཏོང་བར་ཤིན་ཏུ་ཕན་ངེས་སྙམ་ལ། དེ་ནི་སྒྲིག་འཛུགས་སྲུང་སྐྱོབ་ཞུ་ཕྱོགས་ཚད་ལྡན་དེ་ཡང་རེད། ཀློག་པ་ཚོས། གནས་ཚུལ་འདི་ལྗགས་ཀློག་གནང་སྐབས་ཐུགས་ལྷོད་ལྷོད་ཀྱིས་བསམ་ཞིབ་གནང་ན། ཕྱོགས་ཡོངས་ཀྱི་གནས་ཚུལ་རྣམས་གུས་ནས་གོ་བདེ་བར་འབྲི་བའི་ངལ་བ་དང་དུ་ལེན་བཞིན་ཡོད་པས། རྔམ་དྲག་མ་གནང་བར། ཡང་ན་ལམ་སེང་གནས་ཚུལ་ཆ་ཚང་ཤེས་རེ་མི་གནང་བར་ངང་རྒྱུད་རིང་པོས་རང་གི་སྤྱི་ཚོགས་ལ་ཤ་ཚ་བའི་ཀུན་སློང་གིས་རྩོམ་བྲིས་འདི་ལ་ལྷོད་གཟིགས་གནང་དགོས།

གཉིས། ཨ་རི་བོད་ཀྱི་ཐེབས་རྩས་གན་རྒྱ་དེ་དང་འབྲེལ་ནས་བཀའ་ཤག་ལ་གསལ་བཤད་གང་དག་བྱས་ཡོད་དམ།

སྐབས་འདིར་ཐོག་མར་ཤེས་དགོས་པ་ནི། གན་རྒྱ་དེ་བཞིན་བོད་ཀྱི་ཐེབས་རྩ་དང་བོད་མིའི་སྤྱི་ཚོགས་ཡར་རྒྱས་ཐེབས་རྩའི་ TCDF བར་བཞག་མེད་པར། ཨ་རི་དོན་ཁང་དང་བོད་ཀྱི་ཐེབས་རྩའི་བར་བཞག་ཡོད་པས། དེ་སྔ་ཝ་ཞིན་ཀྲོན་ཌི་སིར་དོན་ཁང་གསར་ཉོ་སྐབས་ཁྲིམས་རྩོད་པ་སྐུ་ཞབས་ Varley ལགས་ནས་བཏོན་པའི་དོན་ཚན་ཁག་དང་འགལ་ཟླར་གྱུར་ཡོད་ལ། གཙོ་བོ་དོན་ཁང་གི་ཆེ་མཐོང་ལྡན་པའི་ངོ་བོར་དོ་ཕོག་ཡོང་ཉེན་དང་མཉམ། དེའི་དོན་གྱི་བདག་པོ་༧གོང་ས་མཆོག་ལ་མཚན་ཤོས་ཡོང་གཞི་གཉིས་ཀར་ལྟོས་མེད་ཀྱིས་མུ་མཐུད་གན་རྒྱ་འཇོག་མཁན་དོན་ཁང་དང་། ༧གོང་ས་མཆོག་གི་སྐུ་ཚབ་ཅེས་པ་གན་རྒྱ་སྔ་ཕྱི་གཉིས་ཀྱི་ནང་བཀོད་དེ་དོན་གཅོད་སྔ་ཕྱི་གཉིས་ཀྱིས་མཚན་རྟགས་བསྐྱོན་ཡོད། ད་ནི་གཞུང་ལ་ཞུགས་ན། བོད་ཀྱི་ཐེབས་རྩས་ཐོག་མ་ནས་གན་རྒྱ་དེ་ནུས་ལྡན་ཅན་དུ་ངོས་འཛིན་བྱས་ཡོད་ལ། དཔལ་ལྡན་སྲིད་སྐྱོང་གིས་གན་རྒྱ་དེ་དང་འབྲེལ་བའམ། ཡང་ན་དེ་དང་འབྲེལ་ཏེ་བོད་ཀྱི་ཐེབས་རྩའི་སྐོར་དྲང་མིན་འགྲེལ་བཤད་ཅི་གནང་ལ་སྐབས་དུས་སོ་སོར་ལན་འདེབས་གསལ་བཤད་ཕུལ་འདུག་ལ། གན་རྒྱ་དེ་ནི་ ༢༠༡༤ ཟླ་ ༤ ཚེས་ ༥ ཉིན་གསར་དུ་བཞག ༢༠༡༨ ཟླ་ ༣ ཚེས་ ༢༠ ཉིན་ཕྱོགས་གཉིས་མོས་མཐུན་ཐོག་ཆ་རྐྱེན་སྔ་མ་སོར་བཞག(ཟུར་སྦྱར ༡ ) ༢༠༡༨ ཟླ་ ༣ ཚེས་ ༢༠ ཉིན་ཕྱོགས་གཉིས་མོས་མཐུན ཐོག་གན་ཡིག་བསྐྱར་བཅོས་གནང་། (ཟུར་སྦྱར ༢ )

འདིའི་སྐོར་ཐོག་མར་གོ་རིམ་ངེས་དགོས་པ་ནི། བོད་ཀྱི་ཐེབས་རྩའི་འགན་ལྷན་ཚོགས་གཙོ་སྐུ་ཞབས་ Mickey Lemle ལགས་ཀྱིས་ ༢༠༡༧ ཟླ་ ༡༢ ཚེས ༡ ཉིན་སྲིད་སྐྱོང་གི་མཚན་ཐོག་ལ་ཡི་གེ་ཕུལ་བ་དང་། ༢༠༡༧ ཟླ་ ༡༢ ཚེས་ ༦ ཉིན་གན་ཡིག་དེ་བཞིན་ནེའུ་ཡོག་ཁྱབ་ཁོངས་ཁྲིམས་མཐུན་ཡིག་ཆ་ཚད་ལྡན་ཡིན་པའི་གསར་འགོད་གསལ་བསྒྲགས་སྤེལ། ༢༠༡༧ ཟླ་ ༡༢ ཚེས་ ༡༠ ཉིན་སྲིད་སྐྱོང་ནེའུ་ཡོག་ཏུ་ཕེབས་ཏེ་བོད་ཀྱི་ཐེབས་རྩའི་འགན་ལྷན་ལ་ཕྱི་ཟླ་ ༣ གྲོས་ཚོགས་གོང་རྩིས་བསུབ་གཏོང་དགོས་པའི་སྡིགས་ར་བསྐུལ། ༢༠༡༨ ཟླ་ ༡ ཚེས་ ༡༠ ཉིན་སྐལ་རྡོར་མངགས་ནས་ཕྱེད་ཀ་གནང་སྦྱིན་བཟོས་ཏེ། ༢༠༡༨ ཟླ་ ༣ ཚེས་ ༢༠ ཉིན་ཆ་རྐྱེན་སོར་བཞག་ཐོག་གན་ཡིག་བསྐྱར་བཅོས་གནང་། ༢༠༡༩ ཟླ་ ༦ ཚེས་ ༡༠ ཉིན་དོན་ཟུར་རིན་ཆེན་དར་ལོ་ལགས་ནས་ཨ་སྒོར་ས་ཡ་ ༡་༥༠ བུ་ལོན་ཡིན་ཁར། ཕྱིར་སློག་དགོས་མིན་སྐོར་ཐེབས་རྩའི་འགན་ལྷན་ནང་ཁུལ་དུ་བཀའ་མོལ་བྱུང་མེད་སྐོར་འཁོད་པའི་ཡི་གེ་བཏང་། ༢༠༡༩ ཟླ་ ༦ ཚེས་ ༡༡ ཉིན་ཐེབས་རྩའི་འགན་འཛིན་བཀའ་ཟུར་བློ་བཟང་སྙན་གྲགས་ལགས་ཀྱིས་འགན་ལྷན་ཚོགས་གཙོ་ལགས་ཀྱིས་དཔལ་ལྡན་སྲིད་སྐྱོང་མཆོག་ལ་ཕུལ་བའི་ཡི་གེར་བསྐྱར་ནན་གནང་བ་དང་། མ་འོངས་པར་རྩིས་གསུབ་མ་བཏང་བའི་ཨ་སྒོར་བདུན་འབུམ་ལྔ་ཁྲི་ ༧༥༠༠༠༠། ༠༠ སྐོར་བྱ་རིམ་ཅི་ཡིན་གྱི་བརྒྱུད་རིམ་བཅས་འཁོད་ཡོད་པ་ཅུང་ཞིབ་ཙམ་སྤྲོས་ན། དཔལ་ལྡན་སྲིད་སྐྱོང་མཆོག་གིས་ཁ་ན་ཌར་ ༢༠༡༧ ཟླ་ ༡༡ ཚེས་ ༡༩ ཉིན་ནང་ཤེས་གཉིས་ཀྱི་བཀའ་བློན་ལྷན་བཞུགས་ཐོག་དོན་ཚན་ ༡༠ སྐོར་མི་མང་ལ་གསལ་བཤད་གནང་རྗེས། བོད་ཀྱི་ཐེབས་རྩའི་འགན་ལྷན་ཚོགས་གཙོ་ Mickey Lemle གྱིས་ ༢༠༡༧ ཟླ་ ༡༢ ཚེས ༡ ཉིན་སྲིད་སྐྱོང་གི་མཚན་ཐོག་ཡི་གེ་བཏང་བའི་ནང་དོན་རགས་ཙམ་བཀོད་ན། དེར་གསལ་དོན་གནད་ཁ་ཤས་ཞུ་བ་ལ།

༡ སྲིད་སྐྱོང་སྐུ་ཉིད་ནས་མི་མང་ལ། བོད་ཀྱི་ཐེབས་རྩ་དེ་ཨ་རིའི་རོགས་དངུལ་ཚོགས་པ་ཞིག་ཡིན་སྟབས། བོད་མིའི་སྤྱི་ཚོགས་ཡར་རྒྱས་ཐེབས་རྩའི་ TCDF དམིགས་ཡུལ་དང་མ་མཚུངས་པས། བོད་ཀྱི་ཐེབས་རྩས་ TCDF གནང་སྦྱིན་ཕོན་ཆེ་སྤྲོད་ཐུབ་ཀྱི་མེད་ཚུལ་གསུངས་པ་དེ་ཞལ་རྫུན་རེད། བུ་ལོན་གན་ཡིག་བཞག་པ་དེའི་ཐོག་ང་ཚོའི་རྩིས་པའམ་ཁྲིམས་རྩོད་པའི་ངོས་ནས་ཁྲིམས་ཀྱི་ཆ་རྐྱེན་དེ་ལྟ་བུ་ཚང་དགོས་པའི་སློབ་སྟོན་གང་ཡང་གནང་མྱོང་མེད།ཅེས་དང་། ༢ སྲིད་སྐྱོང་སྐུ་ཉིད་ནས་མི་མང་ལ། བོད་ཀྱི་ཐེབས་རྩས་ལོ་ ༥། ༦། ༧། བསྐྱར་དུ་ལོ་ ༤། ༥། ༦། ཅེས་གསུངས་ཏེ་དུས་ཡུན་དེའི་ནང་རྩིས་གསུབ་གཏང་རྒྱུ་ཡིན་སྐོར་གསུངས་སོང་། བོད་ཀྱི་ཐེབས་རྩའི་འགན་ལྷན་ནས་དེ་ལྟ་བུའི་ཁས་ལེན་ཡིག་ངག་གཉིས་ཐོག་ནས་དུས་ཚོད་ངེས་ཅན་ནང་རྩིས་གསུབ་གཏང་རྒྱུ་ཡིན་པ་བརྗོད་མེད། ང་ཚོས་ཁྱེད་རང་ལ་ཡིག་འབྲེལ་བྱས་པ་མཐའ་མ་ ༢༠༡༧ ཟླ་ ༧ ཚེས་ ༦ ཡིན་པ་དང་། ཡི་གེ་དེའི་ནང་ཐེབས་རྩའི་འགན་ལྷན་ནས་མ་འོངས་པའི་དུས་ཚོད་གང་རུང་ཞིག་ལ་བུ་ལོན་དེ་མེད་པ་བཟོ་རྒྱུའི་འདོད་པ་ཡོད་ཚུལ་བརྗོད་མེད་རུང་། གན་ཡིག་ནང་གི་ཆ་རྐྱེན་ལྟར་ཕྱོགས་གཉིས་བར་གྱི་འབྲེལ་བ་གུས་ཞབས་དང་གཅིག་ཕན་གཅིག་གྲོགས་ཡོད་པའི་ངང་གནས་དགོས་གལ་ཞུས་ཡོད། ༣ ཡང་སྲིད་སྐྱོང་སྐུ་ཉིད་ནས་མི་མང་ལ། འདས་པའི་ལོ་ ༣ ནང་བོད་ཀྱི་ཐེབས་རྩས་བུ་ལོན་ཡིན་སྐོར་བཤད་མྱོང་མེད་པས། བུ་ལོན་དུ་བརྩི་གི་མེད་པ་དང་། ང་ཚོའི་ངོས་ནས་ཀྱང་བུ་ལོན་ཡིན་པ་ངོས་འཛིན་བྱེད་ཀྱི་མེད་ཅེས་པ་དེ་དངོས་ཡོད་གནས་ཚུལ་དང་རྒྱབ་འགལ་ཆགས་འདུག ང་ཚོའི་དེབ་དང་ཡིག་ཚགས། རྩིས་ཞིབ་སྙན་ཐོ་བཅས་ཚང་མའི་ནང་། ཨ་སྒོར་ས་ཡ་ ༡་༥༠ དེ་བུ་ལོན་ཡིན་པ་དང་། འགན་ལྷན་ནས་ཀྱང་དུས་ནམ་ཡང་བུ་ལོན་མིན་པ་ངོས་འཛིན་བྱེད་ཀྱི་མེད།

༤ མུ་མཐུད་སྲིད་སྐྱོང་སྐུ་ཉིད་ནས་མི་མང་ལ། བུ་ལོན་གྱི་གནད་དོན་དེ་ཁྱབ་བསྒྲགས་བྱས་པའི་རྐྱེན་གྱིས་བོད་ཀྱི་ཐེབས་རྩ་དཀའ་ངལ་ཆེན་པོའི་ནང་ལྷུང་སྲིད་པ་རེད་ཅེས་དང་། ཡང་གན་ཡིག་དེས་བོད་ཀྱི་ཐེབས་རྩ་ལ་ཁྲིམས་ཀྱི་ཉེན་ཁ་འཕྲད་སྲིད་པ་རེད་ཅེས་གསུང་འདུག་ཐད། ཁྱེད་རང་གིས་མཁྱེན་དགོས་པ་ཞིག་ལ། ང་ཚོས་བུ་ལོན་གན་ཡིག་དེ་བཟོས་པ་དང་། ལག་བསྟར་འགན་ལྷན་ནས་དོ་ནན་ཆེན་པོས། གཞུང་འབྲེལ་མ་ཡིན་པའི་ཁེ་མེད་ཚོགས་པའི་ཐད་མཁས་པའི་རྒྱལ་སྤྱིའི་ཁྲིམས་ཀྱི་ལས་ཁུངས་ཤིག་ནས། ལམ་སྟོན་དང་འབྲེལ་ཡིག་ཆ་བཟོས་ཡོད་པ་དང་། ང་ཚོས་རྒྱལ་ཁབ་ཀྱི་ཁྲིམས་སྒྲིག་ཁག་གི་དགོངས་དོན་ཡིག་ཆ་ཚང་མ་ཕྱི་གསལ་ནང་གསལ་ཉར་ཚགས་བྱས་ཡོད། དེའི་རྐྱེན། ང་ཚོར་བུ་ལོན་གན་ཡིག་འདི་འབྲེལ་ཉེན་ཁ་ཡོང་གཞི་གང་ཡང་མཐོང་གི་མེད་ལ། ཡོད་པའང་མ་རེད། ༥ བུ་ལོན་འདི་དང་འབྲེལ་བོད་ཀྱི་སྤྱི་ཚོགས་ནང་དོ་སྣང་ཅི་ཆེར་བྱུང་འདུག་པས། མང་ཚོགས་ནང་མུ་མཐུད་གླེང་སློང་ཡོང་ངེས་པར། ང་ཚོའི་ངོས་ནས་གོ་ནོར་མི་ཐེབས་ཆེད་གསལ་བཤད་ཞུ་དགོས་པ་གལ་ཆེར་མཐོང་གི་ཡོད། ཅེས་སོགས་གནད་དོན་ཆེ་ཁག་གོང་བཀོད་ ༥ ཅན་སྲིད་སྐྱོང་ལ་ཕུལ་ཡོད། ཡིན་ནའང་། དཔལ་ལྡན་སྲིད་སྐྱོང་མཆོག་གིས་ཁེ་ན་ཌར་དོན་ཚན་ ༡༠ གསལ་བཤད་ཀྱིས་མཚོན། གྲོས་ཚོགས་དང་མི་མང་གཉིས་ཀར་དོན་དངོས་གསུངས་ཡོད་མེད་རྒྱ་ཆེ་མི་མང་གི་དྲན་ལམ་ན་གསལ་བོ་ཡིན་དུས། བརྡར་ཤ་སོ་སོས་གཅོད་རོགས། གོང་གི་གཏོང་ཡིག་དེའི་ནང་གསལ་བཞིན་ ༢༠༡༧ ཟླ་ ༡༢ ཚེས་ ༦ ཉིན་གན་ཡིག་དེ་བཞིན་ནེའུ་ཡོག་ཁྱབ་ཁོངས་ཁྲིམས་མཐུན་ཡིག་ཆ་ཚད་ལྡན་ཡིན་པའི་གསར་འགོད་གསལ་བསྒྲགས་སྤེལ། གསར་འགོད་གསལ་བསྒྲགས་དེ་ཀུན་གྱིས་མཐོང་གསལ་ལྟར་ཡིན་པས་ཞིབ་ཆ་མི་དགོས་ཀྱང་། མདོ་དོན་བུ་ལོན་མིན་སྐོར་ཟུར་ཙམ་ཡང་ཐོན་མེད།

དེའི་རྗེས་མི་མང་གིས་གནས་ཚུལ་དེ་ཅུང་ཙམ་མཁྱེན་ཏེ་ངོ་རྒོལ་ལས་འགུལ་འཕྲོ་རིམ་འཕྲོར་བྱུང་བས། ༢༠༡༧ ཟླ་ ༡༢ ཚེས་ ༡༠ ཉིན་སྲིད་སྐྱོང་ནེའུ་ཡོག་ཏུ་ཕེབས་ཏེ་བོད་ཀྱི་ཐེབས་རྩའི་འགན་ལྷན་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཕྱི་ཟླ་ ༣ གྲོས་ཚོགས་གོང་རྩིས་གསུབ་གཏོང་དགོས་པའི་སྡིགས་ར་སྐུལ། མཚམས་འདིར་སྡིགས་ར་ཅི་ལྟར་སྐུལ་ཞེས་ཚིག་འདི་སྤྱོད་དགོས་དོན་ཚོར་བ་ཙམ་མིན་པར་དངོས་དོན་འདི་ཡིན་ཏེ། དེ་ནི་ཧ་ཅང་གལ་ཆེན་རེད། དཔལ་ལྡན་སྲིད་སྐྱོང་མཆོག་གིས་ཕྱི་ཟླ་ ༣ གྲོས་ཚོགས་གོང་རྩིས་གསུབ་མ་བཏང་ན། ངེད་ནས་༧དགའ་ལྡན་ཕོ་བྲང་ནས་ཞུས་ཏེ་བུ་ལོན་སྤྲོད་ཀྱི་ཡིན། དེ་ཁྱེད་ཚོས་ལེན་ཐུབ་ས་རེད་དམ་ཞེས་གསུངས་འདུག བཀའ་མོལ་དེ་བོད་ཀྱི་ཐེབས་རྩའི་སྐབས་དེའི་ཚོགས་འདུའི་ཚིག་ཐོར་གསལ། ༢༠༡༨ ཟླ་ ༡ ཚེས་ ༡༠ ཉིན་སྐལ་རྡོར་ལགས་མངགས་གཏོང་བྱས་ཏེ་བོད་ཀྱི་ཐེབས་རྩས་ཕྱེད་ཀ་གནང་སྦྱིན་བཟོས་ཏེ། ༢༠༡༨ ཟླ་ ༣ ཚེས་ ༢༠ ཉིན་ཆ་རྐྱེན་སོར་བཞག་ཐོག་གན་ཡིག་བསྐྱར་བཅོས་གནང་། གན་ཡིག་བསྐྱར་བཅོས་ལ་གོང་ཞུས་བཞིན། དོན་ཁང་གི་མཚན་ཐོག་ཏུ་མུ་མཐུད་བཞག་ཡོད་ལ། དོན་གཅོད་ཀྱི་མཚན་རྟགས་འོག་ཏུ་སྐུ་ཚབ་ཅེས་པའང་བྲིས་ཡོད། སྐུ་ཚབ་ཅེས་པའི་དོན་ནི་༧གོང་ས་ཆེན་པོའི་སྐུ་ཚབ་ལས་གོ་ས་གཞན་མེད། (ཟུར་སྦྱར། ༤)

༢༠༡༩ ཟླ་ ༦ ཚེས་ ༡༠ ཉིན་དོན་ཟུར་རིན་ཆེན་དར་ལོ་ལགས་ནས་ཨ་སྒོར་ས་ཡ་ ༡་༥༠ བུ་ལོན་ཡིན་ཁར། ཕྱིར་སློག་དགོས་མིན་སྐོར་ཐེབས་རྩའི་འགན་ལྷན་ནང་ཁུལ་དུ་བཀའ་མོལ་བྱུང་མེད་སྐོར་དང་། བར་ལམ་ཕྱོགས་གཉིས་ཀྱི་འབྲེལ་བར་དོ་ཕོག་བྱུང་ཡོད་ཚུལ་བཅས་ཡིག་ཐོག་ནས་བཏང་ཡོད་ལ། ༢༠༡༩ ཟླ་ ༦ ཚེས་ ༡༡ ཉིན་ཐེབས་རྩའི་འགན་འཛིན་བཀའ་ཟུར་བློ་བཟང་སྙན་གྲགས་མཆོག་གིས་ཀྱང་བུ་ལོན་༢༠༢༡ ལོར་རྩིས་གསུབ་གཏོང་འཆར་དེ་ཡང་། གན་ཡིག་བསྐྱར་བཅོས་ཀྱི་ཚིག་བརྗོད་ཀྱི་ནང་བཀོད་པ་ཞིག་མིན་པར། ཐེབས་རྩའི་འགན་ལྷན་གྱི་ཚིག་ཐོར་འཁོད་ཡོད་ཚུལ་བཅས་བཏང་གནས་ནང་གསལ་འདུག དེ་ཡིན་ན། འགན་ལྷན་གྱི་ཐག་གཅོད་ལ་འགྱུར་བ་གཏོང་དབང་འགན་ལྷན་དེར་ཡོད་སྟབས། མ་འོངས་པར་ཅི་གནང་ཐམས་ཅད་མཁྱེན་པ་ཞིག་མིན་ན། སུས་ཀྱང་བཤད་ཚོད་དཀའ་བ་ཞིག་མ་རེད་དམ། གང་ཡིན་ཞེ་ན། བོད་ཀྱི་ཐེབས་རྩས་དོན་ཁང་གི་ཐོབ་སྐལ་ཡིན་དགོངས་ཀྱི་ཡོད་ན། ཨ་སྒོར་ས་ཡ་ ༡་༥༠ དེར་གན་ཡིག་སོགས་རྔ་མ་གང་ཡང་མ་བཏགས་པར་ངོ་ཡོད་ཤུལ་ཡོད་ཀྱི་ལམ་ནས་མི་ཕུལ་དོན་ཅི་ཡིན་ནམ། ཕུལ་བ་ཡིན་ན་ཁྲིམས་ཐོག་ནས་དཀའ་ངལ་ཅི་ཞིག་འཕྲད་ཀྱི་ཡོད་དམ། ཕྱོགས་གང་ནས་དཔྱད་ཀྱང་། ཐེབས་རྩ་ལ་ཁྲིམས་ཐོག་ནས་དཀའ་ངལ་འཕྲད་གཞི་ཞིག་སུས་ཀྱང་གསལ་བརྗོད་གནང་ཐུབ་མེད། ཡང་གཅིག་ཞུས་ན། ཐེབས་རྩས་གན་ཡིག་དེ་མ་བཞག་ན་ཁྲིམས་ཐོག་ནས་རང་ལ་དཀའ་ངལ་འཕྲད་ཚུལ་དང་། གན་ཡིག་དེ་ཕྱིར་བསྒྲགས་གནང་བ་ཡིན་ནའང་རང་ཉིད་ལ་དཀའ་ངལ་འཕྲད་ངེས་ཚུལ་རྩ་བ་ནས་ཞལ་བཞེས་གནང་གི་མེད་པ་གོང་གསལ་འགན་འཛིན་གྱི་གཏོང་ཡིག་ལྟར་རེད་འདུག་པས། དོན་གྱི་མདོ་རྩ། གན་ཡིག་ནང་ཆ་རྐྱེན་གལ་ཆེན་ཞིག་བཀོད་ཡོད་པ་ཇི་བཞིན། ( ཟུར་སྦྱར། ༥) བོད་ཀྱི་ཐེབས་རྩས་དབུས་བོད་མིའི་སྒྲིག་འཛུགས་ཀྱིས་ཨ་རིའི་རོགས་དངུལ་ལེན་སྐབས་ངེས་པར་ཐེབས་རྩ་རང་ཉིད་བརྒྱུད་ནས་མུ་མཐུད་ལེན་དགོས་ཚུལ་ཆ་རྐྱེན་དུ་བཞག་པ་དེ་རང་ལ་ཐུག་འདུག

དེའི་རྐྱེན། བོད་ཀྱི་ཐེབས་རྩ་ནས། དཔལ་ལྡན་སྲིད་སྐྱོང་མཆོག་དང་སྐལ་རྡོར་ལགས་རྣམ་གཉིས་ནས་ཐེབས་རྩ་མ་བརྒྱུད་པའི་རོགས་དངུལ་ལེན་དོགས་ལ་དེ་འདྲའི་ནན་པོ་བྱེད་དགོས་དོན་དང་། དེ་བཞིན། དཔལ་ལྡན་སྲིད་སྐྱོང་མཆོག་དང་སྐལ་རྡོར་ལགས་རྣམ་གཉིས་ཀྱིས་ཀྱང་། བྱུང་ན་སྒེར་བཟང་སྤྱི་བཟང་།། མ་བྱུང་སྤྱི་བཟང་སྒེར་གྱོང་།། བྱེད་འདོད་ཡོད་མེད་ཅི་ལྟར་ཡང་། ཕྱོགས་གཉིས་སུ་མཚན་གནས་འདྲ་མིན་འོག་ཡོད་པའི་མི་སྣ་ཁ་ཤས་ཤིག་གི་གནང་སྟངས་འདི་བཞིན། དོན་ལ་བོད་སྤྱི་པའི་ཆེད་དུ་རེད་དམ་སོ་སོ་སྒེར་གྱི་ཆེད་དུ་རེད་དམ་ཞེས་མི་རབས་གསར་པ་ཚོས་ཏན་ཏན་དྲི་བ་རྣོ་ངར་ཅན་ཇེ་མང་དུ་གཏོང་ངེས་ཤིང་། རྒྱ་ཆེ་མི་མང་གི་ངོས་ནས་ཀྱང་ཐུགས་བསམ་བཞེས་ཕྱོགས་ལ་གསལ་ཁ་ཞེ་དྲག་ཡོང་དགོས་པ་རེད་ལ། ཡོང་གི་རེད་ཀྱང་སྙམ། གོང་གི་གཏམ་དཔེ་བྱུང་ན་སྒེར་བཟང་སྤྱི་བཟང།། མ་བྱུང་སྤྱི་བཟང་སྒེར་གྱོང་།། ཞེས་པའི་དོན་ནི། བཙན་བྱོལ་བོད་མིའི་ཆབ་སྲིད་དང་འབྲེལ་ནས་ཁོ་བོས་བྲིས་པ་ཞིག་སྟེ། ལམ་འགྲོ་རྒྱུགས་ན་མཐོན་པོ་རྫིག་པོ་ཚོས་དང་པོར་སྒེར་ཚོན་པོ་བཟོས། ཞོར་དུ་སྤྱི་པའི་དར་ཆ་འཕྱར། གཉིས་ཀར་མཉམ་དུ་ཤ་ཚ་མདོག་དྲག་མོ་གནང་། ཕུགས་རང་ཉིད་བརྟན་ཐག་ཆོད་བཟོ་མཁས་པ་མཐོང་གསལ་ལྟར་དང་།། ལམ་འགྲོ་མ་རྒྱུགས་ན། སྒེར་དོན་ལམ་ལྷོང་མ་བྱུང་བ་དེ་སྤྱི་པའི་ཆེད་དུ་སྒེར་གྱོང་ཕྱིན་ཚུལ་བཏང་ཚུལ་དང་། ཐོག་མ་ཉིད་ནས་རང་གི་དབུགས་གཏོང་ལེན་ཚུན་སྤྱི་པའི་དོན་དུ་རང་ཡིན་པ་འདྲ་ཞིག་གནང་ལམ་ཡོད་ཀྱང་། ས་རྒྱུས་རྡོ་ཡིས་ལོན།། ཕ་རྒྱུས་ཨ་མས་ལོན།། ཟེར་པ་ལྟར། དཔལ་ལྡན་སྲིད་སྐྱོང་དང་སྐལ་རྡོར་ལགས་རྣམ་གཉིས་ལ་དེ་དོན་སྤྱི་པའི་ཆེད་དུ་ཡིན་གནས་ཀྱི་འགྲེལ་བཤད་ལས་གཞན་རྒྱུ་མཚན་ལྷག་མེད་སྟབས། བཤད་རྒྱུ་ཕ་བསད་བུ་ལའང་ཡོད་ཅེས་པ་བོད་ཀྱི་གཏམ་དཔེར་ཡོད་ཙང་གང་གསུངས་ཀྱང་ཁྱད་པར་དེ་ཙམ་མེད་པས། ཏག་ཏག་གཏམ་དཔེ་འདི་ནི་ཧ་ཅང་ལན་པོར་མཐོང་།།

གསུམ། སྲིད་སྐྱོང་བློ་བཟང་སེང་གེ་དང་དབུ་དཀར་ཚང་སྐལ་བཟང་རྡོ་རྗེ་རྣམ་གཉིས་ནས་ཨ་རིའི་རོགས་དངུལ་ལེན་ས་གཞན་ཞིག་བཟོ་འཆར་གནང་དོན་ཅི་ཡིན་ནམ།

མུ་འགོད།