རི་སྤྱང་ཁེར་འགྲོ
ཨ་མི་རི་ཀའི་གླིང་ཆེན་འདིའི་སྟེང་མི་རིགས་དཀར་པོ་དང་མི་རིགས་ནག་པོ་སོགས་མ་སླེབས་སྔོན་ས་འདིའི་ས་བདག་དང་གནས་འདིའི་གནས་བདག་ངོ་མ་ནི་དེང་སང་དབྱིན་སྐད་ནང་ཨིན་ཊི་ཡན་(རྒྱ་གར་བ་ཞེས་བའི་དོན། གྲུ་དཔོན་གླེན་རྒན་ཀ་ལམ་སྦི་སི་དང་ཁོའི་ལག་དམར་འཁོར་བཅས་༡༤༩༢་ལོར་ཨ་རི་གླིང་ཆེན་གྱི་རྐེད་མཚམས་མཚོ་གླིང་སྦ་ཧ་མ་སི་ཟེར་བར་འབྱོར་སྐབས་ཁོང་རྣམས་རྒྱ་གར་གྱི་ས་ཐོག་ཏུ་སླེབས་བར་རྨོངས་ནས་གནས་འདིའི་ཡུལ་མི་ཚོར་རྒྱ་གར་བ་ཞེས་ཁོང་གི་ཉིན་ཐོ་དང་བྲིས་འདུག)་ཞེས་འབོད་པའི་གདོད་མའི་མི་རིགས་ཤ་མདོག་སྨུག་པོ་ཅན་འདི་ཡིན་འདུག
མཁས་པ་མང་ཆེ་བས་མི་རིགས་འདི་ལོ་ངོ་སྟོང་ཕྲག་བཅུ་ཚན་གཅིག་གམ་ཡང་ན་བཅུ་ཕྲག་ཁ་ཤས་ཡར་སྔོན་ཞིག་ནས་ཤར་གླིང་ཨེ་ཞི་ཡའི་སོག་ཡུལ་བྱང་རྒྱུད་ཀྱི་འབྲོག་ཐང་སེ་སྦུར་རི་ཡ་ནས་མཆེད་པར་བཞེད་ལ། སྐབས་དེར་ཨ་རིའི་ནུབ་བྱང་གི་མཚམས་ཨ་ལ་སི་ཀ་དང་སོག་པོའི་བྱང་ཐང་གི་ཡུལ་སེ་སྦུར་རི་ཡའི་བར་དེང་སང་ནང་བཞིན་རྒྱ་མཚོས་བར་ཆོད་མེད་པར་སྐམ་སའམ་ཡང་ན་ཤིན་ཏུ་མཐུག་པའི་འཁྱག་རོམ་གྱིས་སྦྲེལ་ཡོད་པ་ཚན་རིག་དང་མཐུན་པའི་ཚོད་དཔག་བྱེད ། དུས་སྐབས་དེ་ཙམ་ཞིག་ལ་ཨིན་ཊི་ཡན་མི་རིགས་ཀྱང་ཁོང་ཚོའི་འཚོ་བའི་འཁར་རྟེན་གནག་ཕྱུགས་ཀྱི་རྗེས་འདེད་བྱེད་ཀྱིན་དང་ཐོག་ཨ་རིའི་གླིང་ཆེན་འདིའི་ནུབ་བྱང་གི་མཐའ་སྣེར་ཡོད་པའི་ཡུལ་ཨ་ལ་སི་ཀ་ལ་འབྱོར། དེ་ནས་ཨ་རིའི་གླིང་ཆེན་འདིའི་ཡུལ་གཞན་དག་ཏུ་ཁྱབ་འདུག། ཁོང་རྣམས་སྐབས་དེར་ཚོ་ཁག་ཆེན་པོ་ཁྱུ་གཅིག་བྱས་ནས་སླེབས་པའི་བཤད་ཚུལ་ཡོད་ལ། ཚོ་ཁག་ཆེན་པོ་གསུམ་སྔ་ཕྱི་བྱས་ཏེ་སླེབས་པའི་འདོད་ཚུལ་ཡང་མཆིས། དེ་ནས་རིམ་གྱིས་ལོ་རྒྱུས་ཀྱི་་ཆུ་རྒྱུན་རིང་མོའི་ཁྲོད་ཨིན་ཊི་ཡན་མི་རིགས་འདི་ཚོ་ཁག་བརྒྱ་ཕྲག་ཁ་ཤས་སུ་གྱེས་ནས་སྐད་རིགས་དང་ཡུལ་གོམས་ཀྱང་སྣ་ཚོགས་སུ་གྱུར་ཡོད་འདུག
ཡང་མི་རིགས་འདིའི་འབྱུང་ཁུངས་ཐད་བཞེད་ཚུལ་གཞན་དག་ཀྱང་མཆིས་ཏེ། མཁས་པ་ཁག་ཅིག་གིས་ལྷོ་ཨ་མི་རི་ཀར་འཚོ་སྡོད་བྱེད་པའི་ཨིན་ཊི་ཡན་གྱི་ཤེས་རིག་དང་རྒྱ་ནག་གི་་གནའ་བོའི་སྒྱུ་རྩལ་ཤེས་རིག་བར་འདྲ་ས་ཡོད་པས་རྒྱ་ནག་གམ་ཉི་ཧོང་ནས་གྲུ་གཟིངས་ལ་བསྡད་དེ་ཡོང་ཞེས་དང་། ད་དུང་ཨེ་བཟི་རལ་གྱི་ཡུལ་ནས་གདོད་མའི་དུས་ཤིག་ལ་བོར་བརླག་ཕྱིན་པའི་མི་རིགས་ཚོ་བ་བཅུ་ཅན་ཞིག་ཡོད་པ་དེའི་བུ་རྒྱུད་དུ་སྨྲ་མཁན་ཡོད་ལ། ཡོ་རོབ་དང་ཨ་ཧྥུ་རི་ཀའི་གླིང་ནས་མཆེད་པའི་བསམ་ཚུལ་འདོད་མཁན་སོགས་ཀྱང་མཆིས་མོད་ད་བར་ཚན་རིག་དང་མཐུན་པའི་དཔང་རྟགས་ཡིད་ཆེས་རུང་བ་གསར་རྙེད་བྱུང་མི་འདུག ཨིན་ཊི་ཡན་ཁོ་བ་ཚོའི་ངག་རྒྱུན་ལོ་རྒྱུས་ནང་གླིང་གཞན་ནས་ཡོང་བ་མི་འདོད་པར་ཁོང་ཚོའི་ཡབ་མེས་ཀྱི་འབྱུང་ཁུངས་ངོ་མ་དང་ཕ་ཡུལ་འཁྲུལ་མེད་ནི་ཨ་རིའི་གླིང་ཆེན་འདི་རང་ཡིན་པའི་བཤད་རྒྱུན་འདུག ཡང་ཁ་ཤས་ཀྱིས་ཨིན་ཊི་ཡན་མི་རིགས་ཤར་གླིང་ནས་ཚུར་ཡོང་བ་མིན་པར་ཨ་རིའི་གླིང་ཆེན་ནས་ཕར་སོག་པོའི་བྱང་ཐང་སེ་སྦུར་རི་ཡའི་ཕྱོགས་ལ་མཆེད་ཀྱང་ཟེར། གང་ལྟར་ཨན་ཊི་ཡན་མི་རིགས་ཀྱི་གདོང་དབྱིབས་དང་ཤ་མདོག གཟུགས་བྱད། གཤིས་སྤྱོད་སོགས་བོད་སོག་བྱང་ཐང་གི་འབྲོག་པ་དང་འདྲ་ས་མང་པོ་འདུག ཞུང་ནུའུ་ འམ ་ཧུང་སི་ ཞེས་བའི་ ཤར་གླིང་གི་གདོད་མའི་འབྲོག་པ་དེ་ཚོའི་གདུང་རྒྱུད་དུ་ཚོད་དཔག་བྱེད་མཁན་ཡང་མཆིས།
དེང་སྐབས་ཨིན་ཊི་ཡན་མི་རིགས་ཀྱི་སྐོར་འཁྲབ་སྟོན་གློག་བརྙན་དང་བརྩམས་སྒྲུང་དཔེ་དེབ་ཐོན་པ་མང་ཞིང་། གློག་བརྙན་དང་བརྩམས་དེབ་དེ་ཚོའི་ནང་ཨིན་ཊི་ཡན་རྣམས་ཀྱི་ལག་ཏུ་མདུང་ཐོགས། རྒྱབ་ལ་མདའ་གཞུ་འཁུར་ནས་རི་ས་དང་འབྲོག་ཐང་ནས་རི་གླང་གི་རྗེས་སུ་འཇབ་རྒོལ་བྱེད་པ་དང་རི་སྐྱེས་སྲོག་ཆགས་རྔོན་པ། གཏུམ་དྲག་ཆེ་བའི་གཡུལ་འགྱེད་བྱེད་པ་སོགས་རང་ཡན་ཆེ་ཞིང་དྲེད་པོའི་རྣམ་པ་ཁོ་ན་སྟོན་ཐབས་བྱས་ཡོད་ནའང་། དོན་དངོས་སུ་ཁོང་ཚོ་རི་དང་ནགས་གསེབ་ཁོ་ནར་གནས་སྡོད་བྱས་ཏེ་རི་གླང་རྗེས་འདེད་བྱེད་པ་དང་རྔོན་རྒྱག་པ་ཁོ་ན་ཙམ་གྱིས་མ་ཁྱབ་པར། ཁོང་རྣམས་རང་བྱུང་སྣོད་བཅུད་ཀྱི་མཐུན་རྐྱེན་ཤིན་ཏུ་ཕྱུག་བའི་གླིང་ཆེན་འདིའི་སྟོད་སྨད་བར་གསུམ་དུ་ཁྱབ་ནས་ཐང་གཞུང་གཤིན་པོར་གནས་བ་རྣམས་ཀྱིས་འཇིམ་པ་དང་ཤིང་ལས་བཟོས་བའི་ཁང་བ་ནང་སྡོད་ཅིང་། ཟས་སུ་མ་རྨོས་ལོ་ཏོག་གཙོས་འབྲུ་རིགས་འདེབས་པ་དང་། འབྲོག་ས་ན་འཚོ་བ་རྣམས་ཊི་ཕི་ཟེར་བའི་སྦྲ་གུར་གང་སར་གནས་སྤོ་ཆོག་པའི་ནང་སྡོད་ལ། འཚོ་ཐབས་སུ་རི་གླང་གསོད་པ་དང། རི་དགས་དང་འདབས་ཆགས་རྔོན་པ། རི་སྐྱེས་ཤིང་འབྲས་དང་སྔོ་ཚོད་འཐུ་བ་སོགས་བྱེད་ལ། མཚོ་དང་མཚེའུ་གཙང་བོའི་འགྲམ་རྒྱུད་དུ་མི་ཚེ་སྐྱེལ་མཁན་རྣམས་གཙོ་ཆེར་ཉ་དང་ཆུ་གནས་ཀྱི་སྲོགས་ཆགས་ལ་བརྟེན་པ་སོགས་ཨིན་ཊི་ཡན་རྣམས་འཚོ་སྡོད་ཀྱི་ཡུལ་གྱི་ཁྱད་པར་ལས་སྐད་དང་ཤེས་རིག ལག་ཤེས་སྒྱུ་རྩལ་དང་འཚོ་བ་རོལ་སྟངས་། གྱོན་གོས་དང་སྡོད་ཁང་། རྒྱུན་སྤྱོད་ཀྱི་བཟའ་བཏུང་སོགས་སྣ་ཚོགས་སུ་སྣང་ནས་གཅིག་ཏུ་ཁ་ཚོན་གཅོད་དཀའ་འདུག
སྡོད་ཁང་དང་རྒྱན་གོས། མཚོན་ཆ།
ཨིན་ཊི་ཡན་གྱི་སྡོད་ཁང་ཡང་ཊི་པི་སྤྲ་གུར་གཅིག་པོ་མ་ཡིན་པར་སྣ་ཚོགས་སུ་སྣང་སྟེ། ལྗོན་ཤིང་གི་ཤུན་པགས་དང་ཡལ་འདབ་ལས་བྱས་པ། ས་རྡོ་དང་འཇིམ་པ་ལས་བྱས་པ། ས་འོག་ན་བསྐྲུན་པའི་སྡོད་ཁང་། བྲག་སྐྱིབས་སུ་རྩ་འཇིམ་གྱིས་བསླངས་བའི་སྡོད་ཁང་། ས་སྤུངས་དེིའུ་འབུར་རྩེར་བཞེངས་བའི་སྡོ་ཁང་དང་ཁ་བའི་འཁྱག་རོམ་ལེབ་ཆེན་ལས་བྱས་པའི་གངས་འཁྱག་གི་སྡོད་ཁང་སོགས་ཡུལ་དུས་ཀྱི་གནམ་གཤིས་དང་ཁོར་ཡུག་གི་མཐུན་རྐྱེན། སྲོལ་རྒྱུན་གྱི་འདུ་ཤེས་དང་མཐུན་པར་དབྱིབས་བཀོད་དང་རྒྱུ་སྤུས་ཅི་རིགས་སུ་མཆིས།
ཨིན་ཊི་ཡན་རྣམས་ཕྲེང་བར་བརྒྱུུས་བའི་རྒྱན་ཆ་འདོགས་པར་སྤྲོ་ཞིང་། རྒྱན་ཆ་མང་ཆེ་བའི་རྒྱུ་ནི་སྐམ་གནས་སྲོག་ཆགས་ཀྱི་ར་དང་རུས་པ་།སོ་དང་སྡེར་མོ་དང་། ཆུ་གནས་སྲོག་ཆགས་ཀྱི་ཤུན་སྐོགས། གཞན་འཇིམ་རིལ་ལས་བྱས་པ། ཟངས་དང་རྡོ་རིགས་ལས་བཟོས་པ་སོགས་ཡོད་ལ། ལྷག་པར་དུ་ཨ་རིའི་ལྷོ་ནུབ་ཏུ་གཞི་སྡོད་པ་ཚོའི་ཁྲོད་དངུལ་དང་གཡུ་བྱུར་གྱི་རྒྱན་ཆ་འདོགས་སྲོལ་ཆེན་པོ་ཡོད་འདུག དུས་རབས་སྔོན་མའི་མཇུག་ཏུ་བོད་མི་ཚོ་ཨ་རིར་དང་ཐོག་འབྱོར་སྐབས་ཨིན་ཊི་ཡན་གྱི་བོད་མི་དང་འདྲ་བའི་གདོང་དབྱིབས་དང་བཞིན་མདངས། ཁོང་ཚོིའི་གཡུ་ཡི་རྣ་ལུང་དང་སྐེ་རྒྱན་མཐོང་ནས་ཁོང་ཚོ་བོད་མིའི་རིགས་རྒྱུད་མིན་ནམ་གང་ཡིན་ཟེར་མཁན་ཡང་བྱུང་འདུག ༡༩༧༩ལོར་ཏ་ལའི་བླ་མ་སྐུ་ཕྲེང་བཅུ་བཞི་བ་མཆོག་ཐེངས་དང་པོར་ཨ་རིར་ཡུལ་སྐོར་བྱེད་རིང་ཨིན་ཊི་ཡན་ཚོ་བ་གསུམ་གྱི་ཚོ་དཔོན་དང་ལྷན་དུ་མཇལ་འཕྲད་ཅིག་སྟེང་ཁོང་ཚོའི་གཡུ་ཡི་འདོགས་རྒྱན་གྱིས་ཡིད་འཕྲོག་ནས་དེ་གང་ནས་བྱུང་། ང་ཚོའི་ཡུལ་མི་རྣམས་ཀྱང་གཡུ་ཡི་རྒྱན་ཆ་འདོགས་རྒྱུར་ཧ་ཅང་སྤྲོ་བོ་ཡོད་ཅེས་གསུངས་འདུག
གདོད་མའི་དུས་སུ་ཁོང་རྣམས་ཀྱི་གྱོན་ཆས་ཀྱི་རྒྱུ་ལྟེ་བ་ནི་འདབ་ཆགས་ཀྱི་སྒྲོ་དང་རི་སྐྱེས་སྲོགས་ཆགས་ཀྱི་སྤུ་དང་པགས་པ། ཤིང་གི་ཤུན་པ་དང་འདམ་རྩ་སོགས་ཡིན་འདུག་ལ། བྱང་འཁྱག་རོམ་གྱི་ཡུལ་དང་གྲང་ས་ན་འཚོ་བ་རྣམས་ཀྱིས་པགས་པ་དང་སྤུ་རིགས་མཐུག་པོ་དྲོད་དང་ལྡན་པས་ལུས་ཀྱི་ཆ་ཤས་གང་ཡོང་ཁེབས་པར་གྱོན་ལ། ལྷོ་ཡུལ་དང་དྲོ་ས་ན་སྡོད་མཁན་ཚོས་གྱོན་པ་སྲབ་ཅིང་བསིལ་བའི་རིགས་བསྟེན་པའི་ཐོག་ལུས་ཀྱི་ཆ་མང་ཆེ་བ་རྗེན་པར་སྡོད་པ་ཡིན་འདུག
འོག་དཀྲིས་ནི་གདོད་མའི་ཨིན་ཊི་ཡན་སྐྱེས་བ་ཚོའི་རྒྱུན་བསྟེན་གྱོན་ཆས་གཙོ་བོ་ཞིག་ཡིན་འདུག་ལ། མཉེས་འཕུར་མཐིལ་ཕྱིན་བྱས་པའི་རི་དགས་ཤ་བའི་པགས་པ་ནི་འོག་དཀྲིས་ཀྱི་རྒྱུ་ཆ་ཕུལ་དུ་བྱུང་བར་བརྩི། འོག་དཀྲིས་ལེབ་རིང་མ་གྱོན་དུས་ཧ་ཅང་སྟབས་བདེ་ཞིང་ཕོ་མཚན་དང་བཤང་ལམ་ཁེབས་པར་བྱས་ཏེ་འོག་ནས་ཡར་དཀྲིས་ཏེ་འོགདཀྲིས་མདུན་རྒྱབ་ཀྱི་སྣེ་མོ་ཟུང་རྐེད་མཚམས་སུ་བཅིངས་བའི་ཀོ་བའི་སྐ་རགས་ཀྱི་བར་ནས་བླངས་ཏེ་མདུན་རྒྱབ་ནས་ཐུར་དུ་དཔྱངས།། ལུས་ཀྱི་ཆ་ཤས་གཞན་རྣམས་གཅེར་ཧྲེང་ངེར་གོས་ཀྱི་གཡོགས་མེད་འདུག གྲང་བའི་དུས་དང་ཚེར་ལོག་དང་རྩི་་ཤིང་གི་གསེབ་ནས་རི་དགས་རྔོན་དུས་བརླ་ནས་རྐང་བའི་ལོང་ཚིགས་བར་སླེབས་པའི་པགས་ཁེབས་གྱོན་ལ་དེའི་སྣེའང་འོག་དཀྲིས་བཞིན་ཀོ་བའི་རྐེད་བཅིངས་དེའི་བར་དུ་བསྣོལ་འཆིང་བྱེད།
ནམ་ཟླ་འཁྱག་པས་བསྡམས་པའི་གྲང་ལྷག་ནང་རི་སྐྱེས་ཤ་བ་སོགས་པགས་རིགས་ཀྱི་སྟོད་གཡོགས་སྒྱེ་ལུག་མ་ཟེར་བ་ཞིག་ཀྱང་གྱོན་རྒྱུ་ཡོད་འདུག སྟོད་ལ་འདི་སྒྱེ་མོ་ཞབས་བརྡོལ་ཞིག་དང་འདྲ་བར་མགོ་ནང་དུ་འཛུལ་ནས་གྱོན་ཆོག་ལ། དེའི་ཕྱི་ངོས་སུ་པགས་རིགས་ཀྱི་མཐའ་རྒྱན་དང་འདབ་ཆགས་ཀྱི་སྒྲོ་རྒྱན།ཕྲེང་བའི་ཕྲ་རྒྱན་སོགས་ཡོད་འདུག
གཞན་ཁོ་བ་ཚོས་དུས་ཆེན་དང་ཆོས་འབྲེལ་གྱི་བྱེད་སྒོ་སྤེལ་དུས་མགོ་ལ་བྱ་གླག་དང་འདབ་ཆགས་གཞན་ཀྱིས་བྱ་སྒྲོས་བསླས་པའི་དབུ་རྒྱན་དང་། ལུས་ལ་རྒྱུ་ཆ་དང་བཟོ་དབྱིབས་ཚོན་མདོག་འདྲ་མིན་ཡིན་པའི་གོས་གྱོན་ཞིང།གདོང་ལ་འབག་དང་ཚོས་འབྱུག་པ། ངག་ནས་མགུར་སྐྱོར་བ་དང་གླུ་ལེན་པ།། ལགས་པས་རྔ་བརྡུངས་བ་དང་གླིང་་བུ་འབུད་པ། རྐང་བས་ཞབས་བྲོ་རང་བྱུང་མ་འཁྲབ་པ་སོགས་ཀྱིས་ལམ་ནས་སྟེང་གི་ལྷ་ཆེན་པོ་ལ་ཆེ་བསྟོད་དང་སྐྱེད་མ་ལྟ་བའི་འབྱུང་ཁམས་ཆེན་པོར་གུས་བརྩི་ཞུ་བ། ལུས་སེམས་དག་སྦྱངས་དང་བགེགས་སེལ་གཡང་འབོད། དགྲ་བཟློག་དཔའ་བསྐྱེད་སོགས་མཚོན་པའི་པའི་ཆོ་ག་བཅོས་མ་མ་ཡིན་པ་བྱེད།
རི་དགས་རྔོན་དུས་མདའ་གཞུའི་མཚོན་ཆ་མ་ཟད། གཡུགས་མདུང་དང་འཕེན་མདུང་། འུར་ཆ་དང་། རྡོ་དང་རུས་པ་ཤིང་ལས་བྱས་པའི་མཚོན་ཆ། རྙི་དང་ཞགས་པ་སོགས་འཁྱེར་ལ།
མདའ་རྩེད་དང་མདུང་རྩེད། རི་དགས་རྔོན་པའི་རྩེད་མོ། རི་གླང་འཇུ་བཟུང་། རྒོད་པོར་ཞགས་འཕེན་སོགས་སྟོབས་དང་དཔའ་ངོམས་་པའི་རྩེད་མོའི་རིགས་ལ་དགྱེས་ཤིང་། སྐྱེས་བ་ཕོ་རྣམས་དཔའ་བོའི་དགྲ་འཐབ་ལ་མཁས་ཤིང་ཆུང་དུས་ནས་དཔའ་རྒོད་ཀྱི་ལམ་དུ་གཞོལ་བའི་རྩེད་རིགས་དང་དཔའ་རྩལ་ལ་སྦྱངས་བ་བྱེད། བྱིས་པའི་ན་ཚོད་ཡོལ་ནས་དར་མིའི་ལམ་དུ་རྐང་བ་སྤོ་དུས་སྙུང་གནས་སྲུང་བ་དང་བཅད་སྒོམ་ལ་བཞུགས་པ། དཀའ་ཐུབ་སྤྱོད་པ། ལུས་སེམས་དག་སྦྱང་གི་ཆོ་ག་བསྟེན་པ་སོགས་བྱས་ཏེ་དཔའ་རྒོད་ཀྱི་ལམ་དུ་རབ་ཏུ་འཇུག་པ་ཡིན།
གཡུལ་ལ་འཇུག་དུས་གདོང་ལ་ཤིང་དང་རྡོ་དང་། རྩི་ཤིང་ལས་བྱུང་བའི་ཚོན་འབྱུག་ལ། གདོང་ཚོན་དམར་པོ་ལ་དགའ་སྣང་ཆེན་པོ་བྱེད། དགྲ་ལ་འཐབ་དུས་དཔའ་བོའི་ཁྱད་རྩལ་ཐོན་པ་ཡིན་ན་ཚོ་སྐོར་སྤྱི་མཐུན་ནས་བྱ་གླག་རྒོད་པོའི་སྒྲོ་ཡི་དཔའ་སྐྱེས་སྤྲོད། གཡུལ་སར་དཔའ་རྒོད་ཀྱི་ཁྱད་རྩལ་ཐོན་མིན་དེ་དགྲ་བོ་བསད་མིན་དང་དགྲ་ཕམ་པར་བྱས་མིན་གལ་ཆེར་མི་འཛིན་པར་དགྲ་ལ་ཇི་ལྟར་འཐབ་པ་དང་དགྲ་ཇི་ལྟར་འཇོམས་མིན་ལ་བལྟ་བ་ཡིན། དཔེར་ན་ཐག་རིང་ནས་མདའ་འམ་མདུང་འཕངས་ཏེ་དགྲ་བསད་པ་ལས། དགྲ་གསོད་མ་ཐུབ་ཀྱང་གཡུལ་སར་ཞུགས་པའི་ཕ་རོལ་བོའི་གཡུལ་དཔོན་སྟེང་རྒྱུག་ཏེ་ཁོའི་ལུས་ལ་ལག་པ་འཆང་བའམ་ཁུ་མཚུར་གཞུས་བ།ཡང་ན་རང་གིས་མཚོན་ཆས་ཁོིའི་ལུས་ལ་རག་ཙམ་བྱེད་པ་དཔའ་རུ་བགྲང་། གཡུལ་དུ་ཕ་རོལ་དགྲའི་གཡུལ་དཔོན་གྱི་ལུས་ཉིད་ལ་ལག་འཆང་མ་ཐུབ་ཡ་བཞོན་རྟའམ་མཚོན་ཆ་ལ་རེག་པ་ཙམ་གྱིས་ཀྱང་དཔའ་བོའི་ཁྱད་དུ་བགྲང་ནས་སྒྲོ་རྒྱན་འཛུགས།
དཔའ་བོ་ལ་སྒྲོ་བརྒྱན་སྤྲོད་སྲོལ་འདི་ཨིན་ཊི་ཡན་སྐྱེས་བ་ཕོ་རབ་འབྲིང་ཐ་གསུམ་གྱིས་གཙིགས་སུ་མཆོད་ཅིང་ཡིད་སྨོན་བྱེད། དགྲ་ཕམ་པར་བྱས་མིན་གང་ལྟར་ཡང་ལུས་ལ་རག་ནས་སླར་ལོག་ན་དཔའ་བོའི་སྒྲོ་རྒྱན་གཅིག་ཐོབ། དགྲ་ལ་མཚོན་ཆས་བསྣུན་པར་མ་ཟད། དགྲ་བསད། མགོ་པགས་བཤུས་ནས་སླེབས་ན་དཔའ་བོའི་སྒྲོ་རྒྱན་གསུམ་མཉམ་དུ་ཐོབ། འདི་ལྟར་མི་ཚེ་ནང་དཔའ་རྒོད་ཀྱི་སྒྲོ་རྒྱན་གཅིག་མ་གཏོགས་མ་ཐོབ་པའི་ཕོ་རྒོད་ཡོད་ལ། སྒྲོ་རྒྱན་མང་པོ་བླངས་ནས་བྱ་གླག་རྒོད་པོའི་སྒྲོ་ཡི་དབུ་ཞ་ལོང་བའང་ཡོད། ཨིན་ཊི་ཡན་གྱི་སྐྱེས་རབ་ཞིག་ལ་མཚོན་ན་གཡུལ་ས་ནས་དགྲ་བོས་རང་གི་ལུས་ལ་རག་ཐུག་བྱུང་བ་དེ་ལས་ངོ་ཚ་ཆེ་བ་དང་དེ་ལས་ལ་རྒྱ་ཤོར་བ་ཞིག་མེད། སྐབས་འདིར་བདག་གི་དྲན་འཛིན་གྱི་ངོགས་སུའང་ཚོར་རླབས་འདི་འདྲ་ཞིག་འཕྱོ་སྟེ།
ཨིན་ཊི་ཡན་གྱི་དཔའ་རྒོད་མཐོང་བས་བདག་ཀྱང་ཕོ་རྒོད་བྱེད་ན་འདོད་།།
ལྕགས་མཁྲེགས་ཁོག་སྟོད་གཅེར་བུར་ཕྱུང་ནས་འབྲོང་གཡག་ར་རྩེར་འབྱར་ན་འདོད།།
ཐུབ་མེད་ཅང་ཤེས་སྒ་མེད་ཀླད་ནས་དམིགས་མེད་ཀི་ལྡིར་བྱེད་ན་འདོད།།
མི་ཤིགས་ཉག་ཕྲན་མཁའ་མཐར་འཕེན་ཞིང་རྒོད་པོར་ཐོགས་ཞགས་འཕེན་ན་འདོད།།
རྩལ་ཆེན་མཁའ་ལྡིང་གྲོགས་སུ་བཀུགས་ཏེ་གནམ་གྱི་བང་ཆེན་བྱེད་ན་འདོད།།
འབྲོག་ཁྱི་བཙན་པོ་རྗེས་སུ་འཁྲིད་དེ་ས་ཆེན་སྐོར་སྲུང་བྱེད་ན་འདོད།།
དྲ་གྲོགས་རི་སྤྱང་གིས་ཡང་ཀློག་རིན་ཡོད་པའི་དཔྱད་རྩོམ་རིང་མོ་ཞིག་སྤེལ་འདུག་པར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་ཆབས་ཅིག ད་དུང་མུ་མཐུད་ནས་འདི་འདྲ་རེ་དུས་ནས་དུས་ལྟར་དྲ་ཐོག་ཏུ་སྤེལ་རོགས་ཞུ།
གཞན་དྲ་དཔོན་རྡོར་དབང་ལགས། ངས་བསམ་ཚུལ་ཞིག་ལ། ཁ་བརྡ་དྲ་ཐོག་ཏུ་རྩོམ་ཡིག་འགོད་སྐབས། སྡེ་ཚན་དེ་ལ་ངེས་མེད་འདྲ་ཞིག་མཐོང་གིན་འདུག རྒྱུ་མཚན་ནི། གོང་གི་རྩོམ་འདི་ཡང་དཔེ་འཇོག་གཅིག་རེད་པས། རྩོམ་ཡིག་ཚན་པ་དང་པོ་གཉིས་པ་གཉིས་ཀ གཅིག་གསར་འགྱུར་དང་ཡང་གཅིག་དེ་སྣ་ཚོགས་ཀྱི་གྲས་སུ་བཞག་འདུག ངས་བསམས་ན་འདི་གཉིས་ཀ་རྩོམ་ཡིག་གཅིག་ལ་ཚན་པ་གཉིས་སུ་བཀར་འདུག་སྙམ་བྱུང་བས་ཡིན་ན་གཉིས་ཀ་གསར་འགྱུར་དང་ཡང་མིན་ན་གཉིས་ཀ་སྣ་ཚོགས་ཀྱི་གྲས་སུ་འཇོག་དགོས་པར་འདོད། ཡང་གཅིག་བཤད་ན་རི་སྤྱང་ལགས་ཀྱི་རྩོམ་ཡིག་འདི་ནི་དཔྱད་རྩོམ་མམ་ཆེད་རྩོམ་ཀྱི་གྲས་སུ་འཇོག་ན་འོས་ཤིང་འཚམས་པར་སྙམ། དེ་བཞིན་སྔོན་ཆད་བདག་གི་རྩོམ་ཡིག་རེ་ཟུང་ཡང་ལ་ལ་སྙན་ངག་དང་ལ་ལ་སྒྲུང་རྩོམ། ཡང་རེ་ཟུང་གསར་འགྱུར་གྱི་གྲས་སུ་བཞག་འདུག་ན། ངའི་རྩོམ་ཡིག་བཀོད་མཁན་ཁྱོད་མིན་ཡང་རྩོམ་ཀྱི་སྡེ་ཚན་འདི་ཁོངས་སོ་སོར་གསལ་བོར་བཀོད་ན་ཧ་ཅང་བཟང་བར་མཐོང་། འདི་བསམ་ཚུལ་ཙམ་ཡིན་པས་དགོངས་འགལ་མེད་པ་ཞུ།
གཅན་བཟོད་རྒྱམ་ལགས།
ཁྱེད་རང་ཅི་མ་བདེན། ངས་གོང་གི་རྩོམ་ཡིག་འདི་དྲ་དེབ་སྟེང་ནང་འཇུག་བྱེད་སྐབས། སྣ་ཚོགས་ཞེས་པའི་ཁོངས་སུ་འཇུག་རྩིས་ཡིན་ནའང་། གཅིག་དེ་འདམས་ཉེས་བྱུང་སྟེ། གསར་འགྱུར་གྱི་ནང་ཕྱིན་འདུག དགོངས་དག་ཞུ། ད་ལྟ་རང་བསྐྱར་ཞུས་ཏེ། གཉིས་ཀ་སྣ་ཚོགས་ཀྱི་སྡེ་ཚན་དུ་བཅོས་ཡོད། རྗེས་མར་ང་ཚོས་རྩོམ་ཡིག་འགོད་སྐབས་གཟབ་ནན་ཞུས་ཆོག དེ་རིང་ཁྱེད་རང་གིས་དྲན་སྐུལ་ཡག་པོ་ཞིག་གནང་སོང་། ཐུགས་རྗེ་ཆེ་ཞུ་རྒྱུ་ཡིན།