དཔལ་དགྱེས་པ་རྡོ་རྗེ།
ཕྱོགས་དུས་རྒྱལ་བ་ཀུན་གྱི་ཡེ་ཤེས་སྐུ།།
དཔལ་ལྡན་རྫོགས་པའི་སངས་རྒྱས་པདྨ་སྐྱེས།།
འཇམ་དཔལ་ཡིད་བཞིན་ནོར་བུ་གསོལ་འདེབས།།
བཀྲ་ཤིས་དོན་ཀུན་འགྲུབ་པར་བྱིན་གྱིས་རློབས།།
དེ་ལ་འདིར་བཀྲ་ཤིས་དོན་ཀུན་འགྲུབ་པའི་སྨོན་གསོལ་སྔོན་དུ་བསུ་ནས་ཕྱོགས་སོ་སོ་སོར་ནས་ཕེབས་པའི་སྐུ་མགྲོན་ཡོངས་ལ་སྐུ་བཀྲ་ཤིས། གསུང་བདེ་ལེགས། ཐུགས་ཕུན་སུམ་ཚོགས་པའི་འཚམས་འདྲི་དང་བཅས་ངས་རྒྱང་རིང་མགྲིན་པའི་དབྱངས་གསལ་གྱིས་མཆོད་པ་ཁྱེད་རྣམ་པར་འབུལ། ཁྱད་པར་དུ་ཨེ་ཝྃ་ཆོས་སྨན་གླིང་གི་ཨེ་ཝྃ་ལས་རིགས་ལག་རྩལ་སློབ་གླིང་གི་སྒོ་འབྱེད། འཚོགས་ཁང་ཨེ་ཝྃ་ཕྱོགས་ལས་རྣམ་རྒྱལ་གྱི་རྟེན་དང་བརྟེན་པ་ལེགས་གྲུབ་བྱུང་བའི་རྟེན་འབྲེལ་ལ་དགའ་སྤྲོ་དུང་ཕྱུར་གྲངས་མེད་ཀྱིས་དགེ་བའི་ལེགས་ཚོགས་མངོན་པར་བརྟས་བའི་ཉི་མ་ཤར་བ་དགའ་བ་ཡི་རང་གིས་བསྟོད་བསྔགས་བརྗོད་པའི་མེ་ཏོག་སྙིང་ནས་ཐོར།
ང་ཚོ་གནམ་འོག་ཏུ་འཚོ་གན་པའི་འཛམ་བུ་གླིང་གི་མི་རྣམས་ལ་དུས་རབས་ཉེར་གཅིག་པའི་སྐབས་སུ་སྔོན་གྱི་དུས་རབས་ཉི་ཤུ་ཡན་གྱི་གནས་སྟངས་དང་མི་འདྲ་བར་བརྡ་འཕྲིན་དང་དུས་རབས་ཀྱི་དགེ་མཚན་ཆེན་པོ་ལེགས་ཆར་ཕན་ཚུན་གཅིག་གིས་གཅིག་ལ་ཐག་ཇེ་ཉེ་ནས་ཇེ་ཉེར་ཕྱིན་ཏེ་གངས་ཅན་ཤར་ཕྱོགས་ཀྱི་ཆོས་རིག་གི་འོད་སྣང་རླབས་ཆེན་ནུབ་ཀྱི་ཕྱོགས་སུ་འཚེར་ཞིང་། ནུབ་ཀྱི་ཚན་རིག་གི་དཔལ་ཡོན་ཤེས་རིག་ཤར་གྱི་ཕྱོགས་སུ་ཁྱབ་ནས་ཕན་ཚུན་མ་འདྲེས་ཚུལ་བཞིན་འཛིན་སྐྱོང་སྤེལ་བའི་གནའ་དེང་ཟུང་དུ་འབྲེལ་ནས་དགེ་སྒྲུབ་སྡིག་སྤོངས་དང་གཞན་ཕན་བརླབས་ཆེན་འབྱུང་བའི་དུས་སུ་བབས་ཡོད་པ་དང་། འགྲོ་འདུག་སྤྱོད་ལམ་རྣམ་བཞི་གང་གི་སྐབས་སུ་ཡིན་ན་ཡང་དྲན་ཤེས་བག་ཡོད་ཀྱིས་ང་ཚོས་ཕ་མེས་རིག་གཞུང་ལ་རོགས་དན་ཚན་རིག་སྒྱུ་རྩལ་གྱིས་མཁོ་བའི་བེད་ཡོད་དུ་སྤྱོད་ན་དགེ་མཚན་ཤིན་ཏུ་ཆེའོ།
དེས་ན་ངོས་ཀྱང་ས་ཐག་རིང་བོ་དབྱིན་ཡུལ་དུ་མཆིས་ན་ཡང་སེམས་ཐག་ཉེ་བོ་བདག་གི་གཉེན་ཉེ་བ་དབྲ་རིགས་པ་སྤྱི་དང་། ཁྱད་པར་ཨེ་ཝྃ་ཆོས་སྨན་སློབ་གླིང་དུ་དགེ་སློབ་ཡོངས་ལ་རེ་འདོད་ལྟར་ཚིག་གསུམ་གྱི་འབེལ་གཏམ་བཤད་རྒྱུ་དེ་ཡིན། ང་རང་དངོས་སུ་དེར་ཡོང་ན་ཡང་དེས་ལྷག་ཅི་ཡང་ཞུ་བྱ་དབེན། ངོས་ནི་མི་ལོ་བཅོ་བརྒྱད་ཀྱི་རིང་ལ་ལུས་ས་མཐར་འཁྱམས་ནས་ཆོས་དཔལ་རིག་གནས་ནང་ལ་འདྲེན་པའི་འབད་འབུངས་དང་སྤྱི་ཕན་ཞིག་གི་དོན་དུ་ལྷག་བསམ་ཡང་དག་གིས་བསིལ་ལྡན་ཁ་བ་རུ་བ་སྤྱི་དང་། ཁྱད་པར་ངེད་ཅག་ས་ཁུག་ལུང་ལྕོག་གི་ཞིང་འབྲོག་གི་ཉམ་ཆུང་རྒན་བྱིས་རིགས་ལ་བཅུ་ཕྲག་རིག་པའི་གནས་དང་། གསོ་སྐྱོང་གནང་བ་མཁན་པོ་ཨ་ཝྃ་རིག་པ་མཆོག་གི་སྐུ་དྲིན་དང་ངའི་རྨི་ལམ་གྱི་སྣང་བ་འདི་རེད། དེ་ཡང་རང་ཡུལ་སྲོལ་ངན་ཕྱོགས་ཞེན་གྱི་མགོ་རྙོག་ཏུ་འགྲོ་བཞིན་པའི་ངན་ལོང་གི་ལྷགས་གཤིས་ཤོར་བའི་ཉེན་ཁ་ལས་ངེས་པར་ལྡོག་ཐུབ་པ་དང་། དྲང་བདེན་རིག་པས་མི་རབ་ལ་རང་ཚུགས་ཆོས་དང་མཐུན་པའི་བདེན་ལ་སྐྱེས། དྲང་པོ་ལ་བརྒས་པའི་མི་ཚེའི་སྲོག་དབུགས་ལ་གཅེས་སྲུང་དགོས་པ་ང་ཚོ་ཚང་མའི་ལས་ཀ་རེད།
དེས་ན་རྒྱུ་མཚན་གསུམ་གྱིས་ལས་རིགས་ལག་རྩལ་གྱི་སྒྱུ་འཕྲུལ་ལ་ལོ་རྒྱུས་ཀྱི་ཕུགས་ཐག་རིང་བའི་སྲོལ་རྒྱུན་ལ་རྒྱུན་འཛིན་གནང་ནས་ང་ཚོའི་ཚེ་འདི་ཕྱིའི་ཚེ་སྲོག་ལ་བདག་སྐྱོང་གིས་ཕན་བདེའི་འཚོ་ལ་སྤེལ་ནས་དག་གཙང་རྣམ་གསུམ་གྱི་ཕྱག་ལས་ལ་འབུང་རྒྱུ་ནི་དེ་བས་ཀྱང་གལ་འགངས་ཆེན་པོ་རེད།
གཅིག གཤིས་གཙང་རྣམ་གསུམ་དགོས་པ།
ཕྱིའི་འཁོར་ཡུག་དང་། ནང་གི་གནས་ཁང་། གསང་བ་སེམས་ཀྱི་དག་གཙང་ལ་འབད་དགོས་པ་ལས་དང་པོ་འཁོར་ཡུག་ལ་འབག་རྩོག་མེད་པར་རྩི་ཤིང་དང་ཆུ་གཙང་གནས་ཐུབ་ཀྱི་ས་གནས་སྲུང་སྐྱོབ་དང་། གཉིས་པ་ནང་ཁང་ཁྱིམ་དུ་ཕྱི་དོར་དང་མེ་ཆུ་གློག་གི་གནོད་པ་མེད་པར་ཡིད་འོང་གི་སློབ་བརྩོན་གྱི་སྤྲོ་དགའ་སྟེར་བའི་གཞི་ཁྱིམ་དུ་ལྷ་ཁང་མི་ཁྱིམ་གང་ཡིན་ཡང་དྲི་ཞིམ་དང་གཟི་འོད་འཕྲོ་བ་ཞིག་འབད་པ་དང་། གསུམ་པ་གསང་བ་སེམས་ཀྱི་བདེ་སྐྱིད་ནི་འདོད་ཆུང་ཆོག་ཤེས་དང་། དད་གུས་དག་སྣང་གི་རྩི་དང་མི་འབྲལ་བར་དམ་པ་གོང་མ་དང་ལྷག་བསམ་རྣམ་དག་གི་ཕ་མེས་ལྷན་སྐྱེས་ཀྱི་བག་ཆགས་བཟང་པོ་ཡ་རབས་ཁོ་ནའི་དག་གཙང་གི་མི་ཚེ་ཞིག་ལ་འབད་བརྩོན་གནང་བར་མཛོད་ཅིག་ཅེས་སྐུལ་བ་ནི་ངའི་རེ་བ་དང་པོ་ཡིན་ནོ།
གཉིས། ཡང་དག་རྣམ་གསུམ་གནང་བ།
ལུས་ཀྱི་གོས་དང་ཁ་ཡི་ཟས། ལྷག་བསམ་ཡང་དག་གནང་བ་ལ་དང་པོ་གྲང་ངར་གྱི་བསིལ་ལྗོངས་སུ་ཉེར་འཚེ་མེད་པའི་གོས་བཟང་ལ་གནོད་མེད་ཕན་པའི་འགྲིགས་གོས་ཚུལ་བཞིན་གྱོན་གནང་བ་དང་། གཉིས་པ་དམར་དུག་ཆུ་ལྷད་རིགས་ལ་བག་གཟོན་གྱིས་མི་རོལ་བ་དང་། བཟའ་གཏུང་འཕྲོད་བརྟེན་དང་རྩ་རླུང་ཐིག་ལེ་ལ་ཕན་པའི་རྩམ་པ་དང་གྲོ་འབྲས་རོ་བཅུད་ལྡན་པའི་ཟབ་པའི་ཟས་རིགས་མཐོ་སྒང་གི་ཚེ་སྲོག་གི་གསོ་སྨན་རིགས་ལ་བརྟེན་ནས་ཚེ་ཐག་རིང་དུ་གནང་བ་དང་། གསུམ་པ་ལྷག་བསམ་ཡང་དག་གིས་རང་དང་རང་གི་ཁྱིམ་ཚང་། སློབ་གྲོགས་དང་དགེ་རྒན་སོགས་ལ་ཕན་ཐོག་ཅི་ནུས་ཀྱི་བསམ་པ་རྒྱ་ཆེ་རུ་གཏོང་ནས་རང་འདོད་ཉི་ཚེ་ཞིག་ལ་མགོ་བོ་མི་འཁོར་བ་སྤྱི་ཕན་གྱི་ལྷག་བསམ་ཡང་དག་གི་ཕྱུག་པའི་མི་ལུས་ཚད་ལྡན་ཞིག་གནས་ཐུབ་གནང་བར་མཛོད་ཅིག་ཅེས་སྐུལ་བ་ནི་ངའི་རེ་བ་གཉིས་པ་ཡིན་ནོ།།
གསུམ། དོན་ཆེན་རྣམ་གསུམ་སྒྲུབ་པ།
རང་གཞན་གཉིས་དོན་སྒྲུབ་པའི་དོན་ལ་སྙིང་པོ་ལོན་དགོས་པ་ནི་ང་ཚོ་ནི་སྲོག་ལྡན་མི་རུ་སྐྱེས་ཤིང་ཁྱད་དུ་འཕགས་པའི་རྣམ་དཔྱོད་ལ་བེད་སྤྱོད་གནང་ནས་དང་པོ་རང་དོན་དུ་ཐོས་བསམ་སྒོམ་པས་ཆོས་ཚན་གྱི་སྙིང་པོ་ལེགས་ཉེས་ཤེས་པའི་མི་རབ་ཀྱི་ས་ཟིན་པ་ཞིག་ལ་འབད་ནས་སྒེར་སྤྱོད་དང་གྲགས་རྒྱུགས་ཀྱིས་རང་སྲོག་མི་གཅོད་པར་བཟང་ངན་ཤེས་པའི་བསམ་སྤྱོད་དོན་མཐུན་ཞིག་སྒྲུབ་ནུས་པ་དང་། གཉིས་པ་གཞན་དོན་དུ་འཆད་རྩོམ་ཕན་དུས་རབས་ཀྱི་འགྲོས་དང་མཐུན་པར་བརླབས་ཆེན་གྱིས་གཞན་སྲོག་སྐྱབས་པ་དང་ཁྱད་པར་ཉམ་ཆུང་དུད་འགྲོ་རྣམས་ལ་བྱམས་སྐྱོང་ཚུལ་བཞིན་ཕན་བདེ་སྒྲུབ་པ་དང་། གསུམ་པ་གཉིས་དོན་དུ་སངས་རྒྱས་ཀྱི་བསྟན་པ་རིན་པོ་ཆེ་འདི་ནི་སྐྱ་སེར་དང་སྔགས་བཙུན་ལ་ཁྱད་པར་མེད་པར་རང་མགོ་ཉི་མ་ཆོས་ཀྱིས་ཐོན་ནུས་པས་ཚེ་འདི་ཕྱིའི་སྙིང་དོན་སྒྲུབ་ནུས་པ་ཞིག་ངེས་པར་དུ་གནང་བར་མཛོད་ཅིག་ཅེས་སྐུལ་བ་ནི་ངའི་རེ་བ་གསུམ་པ་ཡིན་ནོ།།
རྩ་བརྒྱུད་བླ་མས་བྱིན་རླབས་སྙིང་ལ་ཞུགས།།
ཡི་དམ་ལྷ་ཡིས་རྗེས་བཟུང་དངོས་གྲུབ་ཐོབ།།
མཁའ་འགྲོ་དམ་ཅན་ལུས་དང་གྲིབ་བཞིན་འགྲོགས།།
གང་བསམ་ལྷུན་གྱིས་འགྲུབ་པའི་བཀྲ་ཤིས་ཤོག།
མཐར་དོན་ཡང་འདིར་ཨེ་ཝྃ་ལས་རིགས་ལག་རྩལ་ཟབ་སྦྱོང་ས་ཚིགས་ལ་ལྷག་བསམ་རྣམ་དག་གི་གཏོང་ཕོད་ཅན་གྱི་སྦྱིན་བདག་རྣམ་པ་དང། ཡབ་མེས་ཤེས་རིག་ལ་དུང་བརྩེ་ཆེན་པོ་མངའ་བའི་དགེ་སློབ་ཡོངས་དང་། ཕྱག་ལས་བཟོ་ཡི་སྒྱུ་རྩལ་དང་སྨྱུ་གུའི་གར་སྟབས་ལ་རོལ་བའི་རྩོམ་པ་པོ་དང་། གསོ་སྤྱད་རིག་པའི་ཕན་བདེ་སྒྲུབ་པའི་སྨན་པ་དང་། དཀའ་ལས་ཚེགས་ལ་མི་འཛེམས་པས་གཡོས་སྦྱོར་འཁན་གྱི་ཟས་དཔོན་དང་ལས་རོགས་ཀུན་ལ་བཀའ་དྲིན་ཆེ་ཞུ་བ་དང་མུ་འཐུད་ནས་རྒྱལ་ཁབ་དམ་པའི་རྩ་ཁྲིམས་དང་མཐུན་པར་དར་རྒྱས་ཕུན་སུམ་ཚོགས་པས་ཧུར་བརྩོན་གནང་ནས་ཚེ་འདིའི་ལེགས་ཚོགས་ཐམས་ཅད་ཡར་ངོས་ཟླ་བ་བཞིན་འཕེལ་བའི་རེ་བའི་སྨོན་འདུན་དང་ཕྱི་མ་ཡང་ངེད་ཅག་ཚང་མ་ནུབ་ཕྱོགས་བདེ་བ་ཅན་དུ་སྐྱེ་བའི་རྟེན་འབྲེལ་སྨོན་གསོལ་བཅས་མཁན་ཆེན་བླ་མ་དཔལ་དགྱེས་པ་རྡོ་རྗེ་འམ་ཤྲྰིཿསྨྱོན་ཨེ་མ་ཧོས་དབྱིན་ཡུལ་ཨེ་ཝྃ་རྫོགས་ཆེན་དུས་འཁོར་འོད་གསལ་རི་ཁྲོད་ནས་བགྱིས་པར་དེ་དེ་བཞིན་དུ་འགྲུབ་པར་གྱུར་ཅིག་གུ།།