ཨེ་ཤི་ཡ་རང་དབང་རླུང་འཕྲིན་ལ་ཉན་པའི་རྗེས་སུ།

སྣང་རྒྱལ་ཤེས་དགེ

 
སྟོབས་ཆེན་ཨ་རིའི་རྒྱལ་ས་ན།།
རླབས་ཆེན་རླུང་འཕྲིན་ཁང་ཞིག་ཡོད།།
རླུང་འཕྲིན་ཁང་དེའི་ལས་ཁུངས་ན།།
རྫབ་ཆེན་མདོ་འཛིན་ཁྱུ་གཅིག་ཡོད།།

གློ་ལུ་རྒྱག་ལ་འཚེར་སྣང་མེད།།
གད་མོ་ཤོར་ལ་འཛེམས་སྣང་མེད།།
གསན་པ་པོ་ལ་བརྩི་འཇོག་མེད།།
མེད་པ་གསུམ་འདི་ནད་ཅིག་ཡིན།།

ཚིག་གི་གཅོད་མཚམས་ཁྱོས་མི་ཤེས་།།
གནས་ཚུལ་ཞིབ་ཚགས་ཁྱོས་མི་ཤེས།།
རང་གི་འགན་འཁྲི་ཁྱོས་མི་ཤེས།།
མི་ཤེས་གསུམ་འདི་སྐྱོན་ཞིག་ཡིན།།

སྒམ་ཉམས་སྟོན་ལ་ཁྱོད་ཅག་དགའ།།
མཁས་མདོག་སྟོན་ལ་ཁྱོད་ཅག་དགའ།།
རྫིག་རྫིག་བྱེད་ལ་ཁྱོད་ཅག་དགའ།།
དགའ་བ་འདི་གསུམ་སྲོལ་ཞིག་ཡིན།།

པཎ་ཆེན་འཁྲུངས་ཡུལ་ཁྱོས་མི་ཤེས།།
བོད་ལུགས་ཟླ་ཚེས་ཁྱོས་མི་ཤེས།།
གུས་ཞབས་བརྩི་བཀུར་ཁྱོས་མི་ཤེས།།
མི་ཤེས་གསུམ་འདི་ལམ་ཞིག་ཡིན།།

གཞུང་གི་ཕོག་ལ་བསམ་ཤེས་མེད།།
གཞིས་ལུས་དམངས་ལ་ཆེ་མཐོང་མེད།།
རང་གི་ངན་ལ་ངོས་ཟིན་མེད།།
མེད་པ་འདི་གསུམ་སྨག་ཅིག་ཡིན།།

སྐད་ཆ་བཤད་དུས་གདངས་ཤིག་ཡོད།།
མིད་ཐག་ནང་ལ་འགག་ཅིག་ཡོད།།
བཤད་མཚམས་བརླག་པའི་མིག་ཅིག་ཡོད།།
ཡོད་པ་འདི་གསུམ་རྡོ་ཞིག་ཡིན།།

སྔོན་ལ་གྲ་སྒྲིག་བྱེད་མི་ཐུབ།།
བཤད་དུས་ཤར་སེ་ཀློག་མི་ཐུབ།།
ནོར་འཁྲུལ་རྒྱུན་དུ་བཅོས་མི་ཐུབ།།
མི་ཐུབ་འདི་གསུམ་དམ་ཚིག་ཡིན།།

ཆོལ་གསུམ་རང་སྐད་བཤད་མཁན་དཀོན།།
བོད་ཡིག་རང་མགོ་ཐོན་མཁན་དཀོན།།
བོད་ཀྱི་གནས་བབ་བསམ་མཁན་དཀོན།།
དཀོན་པ་འདི་གསུམ་དཀོན་མཆོག་ཡིན།།

སྙན་རྩོམ་འདི་འདྲ་ཞིག་འབྲི་རྒྱུའི་འདུན་མ་སྔར་ནས་ཡོད་ཀྱང་བྲེལ་བ་དང་ལེ་ལོ་གཉི་གའི་རྐྱེན་གྱིས་དེ་རིང་བར་དུ་མངོན་འགྱུར་བྱེད་མ་ཐུབ། དེ་རིང་ལོ་སར་གྱི་གུང་གསེང་དང་བསྟུན་ངལ་གསོའི་ཚུལ་དུ་ཨེ་ཤི་ཡ་རང་དབང་རླུང་འཕྲིན་ཁང་གི་ཨམ་སྐད་སྡེ་ཚན་ལ་ཉན་སྐབས་”པཎ་ཆེན་རིན་པོ་ཆེ་སྐུ་ཕྲེང་བཅུ་བ་ཨ་མདོ་རྡོ་སྦིས་ས་ཁུལ་དུ་སྐུ་འཁྲུངས་”ཞེས་བཤད་སོང་ཞིང་། གནས་ཚུལ་འདི་ལྟ་བུ་ནི་བོད་པའི་སྤྱི་ཚོགས་ལ་ཆ་རྒྱུས་ཡོད་པའི་གཞུང་འབྲེལ་གསར་ཁང་ཞིག་ཕར་བཞག་བོད་མི་ཕལ་བ་ཞིག་གིས་ཀྱང་ཤེས་པའི་རྒྱུན་ཤེས་ལྟ་བུ་ཞིག་ཡིན།
དེ་འདྲའི་དོ་སྣང་མེད་པ་དང་རང་གི་ལས་གནས་ལ་བརྩི་བཀུར་མེད་པའི་བྱེད་སྟངས་དེས་བདག་གི་ལ་སྔར་ནས་ཡོད་པའི་བསམ་ཚུལ་དེ་ཡིག་ཐོག་ཏུ་ཕབས་བཅུག་སོང་། སྙན་རྩོམ་འདིའི་ནང་གི་སྐྱོན་ཆ་རྣམས་ཨེ་རླུང་RFA ཚང་ཁོ་ནའི་སྐྱོན་མ་ཡིན་པར་ཨ་རིའི་བོད་སྐད་རླུང་འཕྲིན་VOA ལའང་གཅིག་མཚུངས་སུ་ཡོད་པ་ཡིན། ཤེས་དགོས་པ་ཞིག་ལ་ཁོང་ཚོའི་སྐྱོན་དང་ཡོན་ཏན་གཉིས་ལས་ཡོན་ཏན་དང་ཕན་པའི་ཆ་རྣམས་ལྗིད་ཆེ་བ་ཡིན་ནའང་ཡག་ཐོག་ཡག་རྩེགས་ཡོང་ཕྱིར་འདི་བྲིས་པ་ཡིན།