སྤོབས་པ་མཐའ་ཡས།
ཉེ་ཆར་བོད་དུ་རྒྱ་ནག་གཞུང་ལ་ངོ་རྒོལ་གྱི་ལས་འགུལ་ལ་དྲག་གནོན་བྱས་འཕྲལ་ཕྱི་རྒྱལ་ཁག་ཏུ་ཡོད་པའི་བོད་མི་དང་བོད་དོན་རྒྱབ་སྐྱོར་བ་ཚོས་རྒྱ་ནག་གཞུང་གིས་བོད་མིའི་ངོ་རྒོལ་ལ་དྲག་གནོན་བྱས་པས་རིང་མིན་རྒྱ་ནག་ཏུ་ཚུགས་རྒྱུའི་ཨོ་ལེམ་པིག་གི་རྩེད་འགྲན་གྱི་དབུ་འབྱེད་སྒྲོན་མེ་གང་དུ་འབྱོར་བའི་ས་གནས་དག་ཏུ་ངོ་རྒོལ་གྱི་ལས་འགུལ་འཁྲུག་པོ་བྱུང་བར་བརྟེན། རྒྱ་ནག་གཞུང་གིས་སྐུལ་སློང་བརྒྱུད་ཕྱི་རྒྱལ་དུ་ཡོད་པའི་རྒྱ་ནག་གི་སློབ་ཕྲུག་གཙོ་བོར་གྱུར་པའི་རྒྱ་མི་སྟོང་ཕྲག་མང་པོས་རིང་མིན་རྒྱ་ནག་ཏུ་ཚུགས་རྒྱུའི་ཨོ་ལེམ་པིག་གི་རྩེད་འགྲན་ལ་རྒྱབ་སྐྱོར་དང་བོད་མིའི་རང་དབང་ལས་འགུལ་ལ་ངོ་རྒོལ་གྱི་ཁྲོམ་སྐོར་ཆེན་པོ་བྱས། དེས་ཀྱང་རྒྱ་ནག་ནི་མི་རིགས་ལྔ་བཅུ་ང་དྲུག་གི་མཐུན་སྒྲིལ་གྱི་ཞིང་ཁམས་ཤིག་མ་ཡིན་པར་མི་རིགས་ཁག་གི་འཐབ་འཛིངས་གྱི་གཡུལ་ས་ཞིག་ཏུ་འགྱུར་བཞིན་ཡོད་པ་བཤམ་སྟོན་བྱས་པ་ལྟར་གྱུར། ཁོག་རྒྱ་ཅན་གྱི་མི་ཞིག་གིས་བལྟས་ན་བོད་མིས་རྒྱ་ནག་དང་རྒྱ་ནག་པ་ལ་ངོ་རྒོལ་བྱེད་བཞིན་མེད་པ་མ་ཟད་རྒྱ་ནག་གུང་ཁྲན་ཏང་གི་གཞུང་ལ་ཡང་ངོ་རྒོལ་བྱེད་པའི་རྒྱུ་མཚན་མེད། འོ་ན་གང་ཞིག་གི་ཆེད་དུ་ལས་འགུལ་སྤེལ་གྱིན་ཡོད་ཅེ་ན། རྒྱ་ནག་གཞུང་གིས་བོད་འཛིན་སྐྱོང་བྱེད་པའི་སྲིད་ཅུས་ལ་འགྱུར་བ་ཞིག་གཏོང་དགོས་པར་རེ་འདུན་གྱི་རྣམ་འགྱུར་བཏོན་པ་ཙམ་ཡིན། དེའི་ཕྱིར་རྒྱ་ནག་གིས་བོད་ལ་བཙན་འཛུལ་བྱས་ཞེས་པ་དང་རྒྱ་ནག་པས་བོད་མི་དམར་གསོད་གཏོང་བཞིན་ཡོད་སོགས་ཀྱི་འབོད་ཚིག་བསྒྲགས་པ་དག་ནི་འཛམ་གླིང་གི་ཁྱོན་གང་སར་འཚོ་ཞིང་གཞེས་པའི་རྒྱ་ནག་པ་ཐེར་འབུམ་གཅིག་དང་ཕྱེད་ལ་ཉེ་བ་ཚང་མས་ཐུན་མོང་དུ་འཁུར་དགོས་པའི་ཉེས་པ་ཞིག་ཏུ་ག་ལ་འགྱུར། རྒྱ་ནག་པས་ངེས་དགོས་པ་ཞིག་ནི་འཛམ་བུའི་གླིང་གི་གནད་ཡོད་མི་སྣ་དང༌། གསར་འགྱུར་བརྒྱུད་ལམ། ཤེས་ཡོན་ཅན་དག་གིས་རྒྱ་ནག་ལ་དོ་སྣང་ཆེས་ཆེར་བྱེད་པ་དེ་རྒྱ་ནག་ལ་དགྲ་རུ་འཛིན་པ་དང་ཕྲག་དོག་གི་བསམ་པས་མ་ཡིན་ཞིང་དེ་ལས་ལྡོག་སྟེ་རྒྱ་ནག་ནི་འཛམ་གླིང་ན་མི་འབོར་ཆེས་ཆེ་བའི་རྒྱལ་ཁབ་གཅིག་པོ་དེ་ཡིན་སྟབས་དེ་ཉིད་གཞུང་ཡག་པོ་ཞིག་གི་སྣེ་ཁྲིད་རྒྱུ་དེ་རྒྱ་ནག་པ་ལ་གལ་ཆེ་བ་ཙམ་དུ་མ་ཟད་ཨེ་ཤ་ཡ་གཙོས་པའི་འཛམ་གླིང་གི་ཞི་བདེ་བརྟན་ལྷིངས་ལ་ཤུགས་རྐྱེན་ཆེན་པོ་ཡོད་པས་ཡིན། དུས་རབས་ཉི་ཤུ་པའི་དཀྱིལ་ཡས་མས་སུ་མི་ལ་ལས་རྒྱ་མི་ལ་ཤར་ཕྱོགས་ཀྱི་གྲོག་མ་སྔོན་པོ་ཞེས་འབོད་མྱོང་བ་བཞིན་རྒྱ་མི་ནི་གྲངས་མང་བས་མ་ཟད་གཅིག་རྗེས་གཅིག་གིས་འབྲངས་བ་ལས་རང་རང་གི་ས་ནས་རང་སྟོབས་ཀྱིས་བདེན་དོན་འཚོལ་ནུས་མཁན་ཆེས་ཆེར་ཉུང་བས་ད་དུང་ཡང་གྲོག་མའི་ཆོ་ལོ་དེ་སྦྱར་འོས་པར་སེམས།
ནུབ་ཕྱོགས་པ་ཚོས་བསམ་བཞིན་བསླངས་པའི་ཆག་སྒོ་སྟེ་ཧོང་ཀོང་རྒྱ་ནག་ལ་བཙོངས་པ་དང་ཚོང་འབྲེལ་གྱིས་རྒྱ་ནག་གོང་འཕེལ་དུ་བཏང་ནས་རྒྱ་ནག་མི་དམངས་རང་དབང་གི་ལམ་དུ་འཁྲིད་པར་རློམ་པའི་འཐབ་བྱུས་དེར་གྲུབ་འབྲས་ལྡོག་ཕྱོགས་ནས་སྨིན་ཏེ་དེ་རིང་གི་རྒྱ་ནག་པ་ཕལ་མོ་ཆེ་ནི་གུང་ཁྲན་ཏང་གི་དྲག་ཤུགས་དང་ཕྱི་རྒྱལ་ལ་ཚོང་འབྲེལ་གྱི་ཁེ་སྤོགས་ཁོ་ནས་ཡི་རངས་ཆོག་ཤེས་ཀྱི་ཚོར་བས་བཟི་སྟེ་ནུབ་ཕྱོགས་པས་མི་ཚེའི་སྙིང་པོར་ལྟ་བའི་ཆབ་སྲིད་རང་དབང་དང༌། དམངས་གཙོའི་ལམ་ལུགས། འཛམ་གླིང་ཞི་བདེ། འགྲོ་བ་མིའི་ཐོབ་ཐང་སོགས་ལས་ཌོ་ལར་གཅིག་གི་རིན་ཐང་མཐོ་བར་ལྟ་བ་ནི་དེ་རིང་གི་རྒྱ་ཕྲུག་ཚོའི་བྱེད་སྟངས་ལས་གསལ་སྟོན་བྱས་སྟབས་ནུབ་ཕྱོགས་པའི་མཁས་པར་རློམས་པ་ཚོས་བསམ་བློ་བསྐྱར་གཏོང་གིས་རྒྱ་ནག་ལ་རྒྱ་མི་དང་མཐུན་པའི་འཐབ་ཅུས་ཀྱི་ལམ་སྣ་གཞན་ཞིག་གསར་བཏོད་མ་ཐུབ་ཚེ་རང་མགོ་རྡུང་བའི་ཐོ་བ་རང་ཉིད་ཀྱིས་བསྐྲུན་བཞིན་ཡོད་ཚུལ་ཤེས་དགོས་ངེས་རེད། དེ་ཡང་ནུབ་ཕྱོགས་པ་ཚོས་རྒྱ་མིའི་བསམ་བློའི་རང་གཤིས་སམ་བག་ཆགས་ཀྱིས་བསྐྱེད་པའི་ནད་གཞི་སྟེ་ཕ་མེས་ལས་བྱུང་བའི་ཤན་ཤུགས་གཅིག་ངོས་ཟིན་མ་ཐུབ་པའི་གནད་ལ་ཐུག་སྟེ་དེ་ཡང་རྒྱ་ནག་པའི་ཆེས་རིང་བའི་ལོ་རྒྱུས་ཀྱི་ནང་དུ་འཇིག་རྟེན་ཡོངས་ཁྱབ་ཀྱི་འགན་ཁུར་བའི་མཚན་ཉིད་རིག་པ་བ་དང༌། བསམ་བློ་བ། གསར་བཏོད་པ་རླབས་ཆེན་སོགས་བྱུང་བ་ཧ་ཅང་ཉུང་བས་འཛམ་གླིང་བསྐོར་མཁན་གྱི་རྒྱ་ནག་པ་ཕལ་མོ་ཆེ་ཡང་དོན་དུ་ལྟོ་གོས་ཀྱི་རྗེས་སུ་བརྒྱུགས་པ་ཙམ་ལས་མ་འདས། རླབས་ཆེན་རྒྱ་ནག་རྒྱལ་གྱུར་ཅིག་ཅེས་པའི་འབོད་ཚིག་ཇི་ཙམ་མཐོ་ཡང་དེ་རིང་གི་རྒྱ་ཕྲུག་ཚོ་གུང་ཁྲན་ལག་དམར་བའི་ལག་ཆར་གྱུར་ཅིང་རྒྱབ་རྩར་འགྲེངས་ཏེ་བོད་མིའི་རང་དབང་ལས་འགུལ་ལ་ངོ་རྒོལ་ཁྲོམ་སྐོར་བྱས་པ་དེ་ཡང་རྒྱ་ནག་གི་མི་རབས་གསར་པའི་རྒལ་ཚིགས་ལ་གས་ཆག་ཤོར་ཟིན་པའི་དཔང་རྟགས་སུ་གྱུར་སྟབས་རྒྱ་ནག་དང་རྒྱ་ནག་པ་ལ་དུང་མཁན་ཚོར་འདི་ལས་ཕངས་སེམས་སྐྱེ་འོས་པ་ཞིག་གང་ན་ཡོད། དེ་རིང་གི་རྒྱ་ཕྲུག་ཚོས་གུང་ཁྲན་གྱི་དབང་བསྒྱུར་ལ་རྒྱབ་སྐྱོར་གྱི་འབོད་ཚིག་བསྒྲགས་པ་ནི་བཙན་འཛུལ་དང་དམར་གསོད་ལ་རྒྱབ་སྐྱོར་བྱས་པ་ཡིན་སྟབས་༡༩༨༩ལོའི་གནམ་བདེ་སྒོ་མོའི་ཐང་ཆེན་དུ་སྡེབས་གསོད་བྱས་པའི་མཐོ་རིམ་སློབ་མའི་རྣམ་ཤེས་འཁྱམས་པོ་ཚོ་གཅིག་གིས་ངུ་འབོད་བྱེད་བཞིན་མེས་པོ་དམ་པ་ཁུང་ཙི་འཚོལ་བཞིན་འདུག་ཟེར། རྒྱ་ནག་གི་ལོ་རྒྱུས་ཀྱི་སྟེང་དུ་ཁྲིམས་དཔོན་དང་བློན་ཆེན་ལ་ལས་འབངས་ཕལ་བ་ལ་ཁྲིམས་འཁྱོགས་ཕོག་བཞིན་པ་སེམས་ཀྱིས་མ་བཟོད་དེ་བདེན་པའི་རྒྱབ་རྩར་འགྲེངས་ཏེ་རང་ཉིད་ཀྱི་མགོ་བོ་ཤོར་བའི་གཏམ་རྒྱུད་མང་དུ་ཐོས་ཀྱང་ཆེས་ཡིད་ཕམ་འོས་པ་ཞིག་ལ་རྒྱ་ནག་དམར་ཤོག་པས་དབང་བསྒྱུར་བའི་ཉིན་མོ་ནས་མི་སྐྱེས་སར་ཁྱི་སྐྱེས་ཏེ་རྒྱ་རིགས་ཆེན་པོའི་འདུ་ཤེས་ཀྱིས་རྒྱགས་ཏེ་མི་རིགས་ཆུང་གྲས་དང་རྒྱལ་ཁབ་ཆུང་གྲས་ཁག་ལ་དྲག་གནོན་བྱེད་ཐབས་ལ་བསམ་གཞིག་བྱེད་མཁན་ཤ་སྟག་ལས་གྲངས་ཉུང་མི་རིགས་ཀྱི་ཚབ་བྱས་ཏེ་བདེན་པའི་སྐད་ཆ་ཤོད་མཁན་དང་ཉམ་ཆུང་མིའི་བདེན་པའི་དོན་ལ་རྒྱབ་སྐྱོར་བྱེད་མཁན་གྱི་རྒྱ་མི་ག་ཚོད་བྱུང་ཡོད་དམ། རྒྱ་ཕྲུག་ཚོས་ཕྱི་རྒྱལ་ཞི་བདེ་དང་རང་དབང་གི་ཡུལ་དུ་ཡང་ལྡོག་ཕྱོགས་ཀྱི་མི་སྣ་ཚོར་རྡུང་འཚོགས་དང་ཚིག་ངན་གྱིས་གཤེ་བ་སོགས་བྱས་པ་དེས་དམར་གསོད་མཁན་དང་བཙན་འཛུལ་བ་ནི་ངའོ་ཞེས་པའི་ངོ་སྤྲོད་སྟེ་གུང་ཁྲན་ཚོགས་པའི་རང་གཟུགས་འཁྲབས་སྟོན་གྱི་ལམ་ནས་རྒྱལ་ཡོངས་ལ་གཟིགས་མོར་བཤམས་པ་ནི་བོད་མིའི་ངོས་ནས་ཐུགས་རྗེ་ཆེ་ཞེས་ཞུ་བར་འོས།
སྤྱིར་བཏང་རྒྱ་ནག་པ་ཕལ་མོ་ཆེ་ཡུལ་གང་དུ་གནས་ཀྱང་དཔལ་འབྱོར་འཚོལ་སྒྲུབ་ལ་ཧ་ཅང་གྲུང་པོ་ཡོད་ཀྱང་དམངས་གཙོ་དང༌། ཆབ་སྲིད་ཀྱི་རང་དབང༌། ཆོས་དད་རང་དབང༌། འགྲོ་བ་མིའི་ཐོབ་ཐང༌། མིའི་འདྲ་མཉམ་གྱི་གནད་དོན་སོགས་ཀྱི་སྐོར་གུང་ཁྲན་ཚོགས་པའི་ལད་ཟློས་རེ་ལས་གཞན་མི་གླེང་བས་རྒྱ་ནག་པ་ཚོས་ལྟོ་གོས་ཀྱི་རིན་ཐང་ཙམ་ལས་གང་ཡང་ཤེས་ཀྱིན་མེད་པ་འདྲ། གུང་ཁྲན་བཅིངས་དམག་གིས་བོད་མིའི་དད་དམ་ལ་རྡོག་རོལ་ཀྱིས་དགོན་སྡེ་ཁག་ཏུ་དགེ་འདུན་པ་གསོད་རྡུང་དང་དགོན་པ་སྔོགས་བཤེར། ྋགོང་ས་རྒྱལ་བ་སྐུ་ཕྲེང་བཅུ་བཞི་པའི་སྐུ་ཐང་གཙོས་པའི་སྐུ་གསུངས་ཐུགས་རྟེན་ལ་བཅག་བཅོམ། སྤྱི་སྒེར་གྱི་རྒྱུ་དངོས་རྐུ་འཕྲོག་གི་བྱ་བཞག་ལ་བལྟས་ཚེ་ད་དུང་ཡང་རིག་གནས་གསར་བརྗེ་གསོན་པོར་གནས་པ་གསལ་སྟོན་བྱས་པས་གཙོ་འཛིན་མའོ་རྒན་དམྱལ་བའི་ཟངས་གཏིངས་ནས་འཛུམ་ཆུང་འཚེར་འཚེར་བྱེད་བཞིན་ཡོད་ངེས། སྤྱི་ལོ་༢༠༠༨ ཟླ༤ པའི་ཚེས་༢༤ ཉིན་ཨོ་ལེམ་པིག་གི་དབུ་འབྱེད་སྒྲོན་མེ་ཨོ་ས་ཁྲི་རལ་ལི་ཡའི་རྒྱལ་ས་ཁན་པེ་རར་འབྱོར་ཉིན་བྲིས།་