སྐུའི་འཁྲུངས་སྐར་དུས་ཆེན་ཐེངས་ ༧༨ ལ་འཚམས་འདྲིའི་བཀྲ་ཤིས་བདེ་ལེགས་ཞུ།
རོང་པོ་སྒང་ནེ་ཡེ་ཤེས་འཇིགས་མེད།
ལྷ་གཅིག་ཕྱག་ན་པདྨོ་ངུར་སྨྲིག་འཛིན།། སྐྱབས་གཅིག་འཛམ་གླིང་ཞི་བདེའི་དེད་དཔོན་ཆེ།། རྩེ་གཅིག་ཞབས་པད་བསྐལ་བརྒྱར་བརྟན་པ་ཡི།། ཁ་ཙམ་མིན་པར་སྙིང་ནས་སྨོན་ལམ་འདེབས།།
ལུགས་གཉིས་ཤེས་བྱའི་རྣམ་གཞག་གང་ལ་ཡང་།།
སྒྲིབ་གཉིས་དྲི་མ་ཙམ་ཡང་མ་གོས་པར།།
རྒྱལ་གཉིས་དབུ་མའི་ལམ་གྱིས་འདུམ་མཛད་པ།།
རྐང་གཉིས་འགྲོ་བའི་ཚུལ་བྱོན་འཇིག་རྟེན་མགོན།།
ཁམས་གསུམ་སྐྱེ་འགྲོ་ཀུན་གྱི་གཉེན་གཅིག་པུ།།
དུས་གསུམ་རྒྱལ་བ་ཀུན་གྱི་སྙིང་རྗེའི་གཏེར།།
ཆོལ་གསུམ་བོད་མིའི་སྐྱབས་མགོན་པད་དཀར་འཆང་།།
སྒོ་གསུམ་གུས་པའི་ཡུལ་དུ་རྟག་བརྟན་ཤོག།།
དུས་བཞིར་དབྱེ་བ་མེད་པར་གཞན་དོན་ཆེད།།
ཕྱོགས་བཞིའི་རྒྱལ་ཁམས་ཀུན་ལ་ལེགས་བྱོན་ནས།།
བདེན་བཞིའི་ཆོས་ཀྱི་འཁོར་ཆེན་སྐོར་མཛད་པ།།
སྐུ་བཞིའི་བདག་ཉིད་བསྟན་འཛིན་རྒྱ་མཚོར་འདུད།།
འབྱུང་ལྔའི་ཚ་གྲང་མི་སྙོམས་འཁྲུགས་པ་དང་།།
ཕུང་ལྔའི་འགྲོ་རྣམས་རྒུད་ཚོགས་ཀྱིས་མནར་བའི།།
སྙིགས་ལྔའི་དུས་འདིར་མགོན་པོ་གང་ཉིད་ཀྱིས།།
རྒྱུད་ལྔའི་འགྲོ་བ་རིས་མེད་སྐྱོང་འདི་བསྔགས།།
གདུང་དྲུག་བོད་མིའི་ཤ་ཚུགས་ལེགས་འཛིན་ཅིང་།།
ས་དྲུག་བོད་ཀྱི་དོན་གཉིས་ཐུགས་སུ་བཞེས།།
འགྲོ་དྲུག་སེམས་ཅན་ཀུན་ལ་མ་ལྟར་བརྩེ།།
ཕྱིན་དྲུག་རྒྱལ་སྲས་སྤྱོད་ལ་ཞི་ལྷ་དངོས།།
སྤོང་བ་བདུན་སོགས་རིང་ནས་སྤངས་པ་ཡིས།།
ང་རྒྱལ་བདུན་གྱི་ར་རི་མ་གོས་པར།།
འཕགས་ནོར་བདུན་གྱི་དབང་ཕྱུག་ལྷའི་བླ་མ།།
འཇིག་རྟེན་བདུན་ལས་རྒྱལ་མཛད་རྒྱལ་བའི་མཆོག།
མི་ཁོམ་བརྒྱད་ཀྱི་འཁོར་བའི་བཙོན་ར་འདིའི།།
ཕྱོགས་མཚམས་བརྒྱད་ཀྱི་ཉམ་ཐག་འགྲོ་བའི་ཚོགས།།
སྡུག་བསྔལ་བརྒྱད་ཀྱི་འཇིགས་པ་ཡོངས་སེལ་ཕྱིར།།
འཕགས་ལམ་བརྒྱད་ཀྱི་ལམ་གནད་སྟོན་ལ་དཔའ།།
རིམ་དགུའི་ཐེག་སོགས་རིས་མེད་གྲུབ་མཐའ་དང་།།
མཁས་དགུའི་གདམས་ངག་དཔྱད་ཅིང་ཉམས་སུ་བཞེས།།
འདོད་དགུའི་གཏེར་གྱིས་འགྲོ་རྣམས་ཚིམ་མཛད་པ།།
སྐྱེ་དགུའི་གཙུག་རྒྱན་བསྟན་འཛིན་རྒྱ་མཚོར་འདུད།།
ས་བཅུའི་བདེ་གཤེགས་ཀུན་གྱི་སྙིང་རྗེའི་གཏེར།།
སྟོབས་བཅུའི་ཡོན་ཏན་མ་ལུས་ལེགས་མངའ་བ།།
ཕྱིན་བཅུའི་ལམ་བཟང་དུས་ལྟར་སྟོན་མཛད་པོ།།
ཕྱོགས་བཅུའི་འགྲོ་བའི་མགོན་པོས་རྗེས་གཟུང་ཤོག།
བྱང་ཕྱོགས་གངས་རིའི་རྭ་བས་བསྐོར་བའི་རྒྱུད།
བོད་ཡུལ་ཆོས་ལྡན་ཞིང་གི་རྒྱལ་ཁམས་སུ།
སྐྱེ་དགུ་ཕན་དང་བདེ་བ་མ་ལུས་པ།
འབྱུང་བའི་ཡོན་གནས་དམ་པ་ཐུགས་རྗེའི་གཏེར།
འཕགས་མཆོག་སྤྱན་རས་གཟིགས་དབང་མི་གཟུགས་ཅན།
ཐུབ་བསྟན་འཛིན་པ་རྒྱ་མཚོ་ལྟ་བུ་ཡི།
གཙུག་གི་རྒྱན་གྱུར་བླ་མའི་ཞབས་སྐྱེས་པད།
སྲིད་མཐའི་བར་དུ་གཡོ་མེད་བརྟན་གྱུར་ཅིག།
སྤོང་བ་བདུན་སོགས་རིང་ནས་སྤངས་པ་ཡིས།། ཟེར། འབྲི་མ་ཤེས་ནི་ཡིན་བགྱི་རེད། སྙིང་བརྗེ་འོ་ཟེར་ན་ཡང་རོང་པོ་སྒང་ནེ་ཡི་ཤེས་འཇིགས་མེད་དགའ་བགྱི་མ་རེད་པ།
འཛམ་གླིང་ཞི་བདེའི་དེད་དཔོན་འགྲོ་བ་ལྷ་དང་བཅས་པའི་མགོན་དུ་གྱུར་བ༧གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་པ་མཆོག་གི་སྐུ་ཡི་འཁྲུངས་སྐར་ལ་འཚམས་འདྲི་བཀྲ་ཤིས་བདེ་ལེག་ཞུ་བ་དང་ཆབས་ཅིག གང་གི་སྐུ་གསུང་ཐུགས་ཀྱི་མི་མཐུན་འགལ་རྐྱེན་ཐམས་ཅད་མིང་མེད་དུ་ཞི་སྟེ། འགྲོ་ཀུན་འདྲེན་པའི་དཔལ་དུ་སྐུ་ཚེ་མི་བཤིག་གཡུང་དྲུང་གི་ཁམས་སུ་བསྐལ་པ་བརྒྱ་ནས་བརྒྱ་རུ་ཞབས་པད་བརྟན་ཅིང་འགྲོ་བའི་བསོད་ནམས་ཀྱི་དཔལ་དུ་ནམ་ཡང་ནུབ་པ་མེད་པའི་སྨོན་ལམ་ཞུ།
དྲན་དཀར་དཔལ་ཡོན་ལགས། ཁྱེད་ཀྱིས་ལེགས་བཅོས་གནང་ནས་གཅིག་གསུང་རོགས་གནང་།