ྋརྒྱལ་དབང་མཆོག་གི་མཚན་བསྟོད་ཀུན་བཟང་མཆོད་སྤྲིན།

ཨེ་མ་ཧོ།

 
ན་མོ་གུ་ར་ཝེ།
དགེ༵་ལེགས་ཡོན་ཏན་བྱེ་བས་བསྐྲུན་པའི་སྐུ།།
དགེ་འདུན༵་འདུས་པ་རྒྱ་མཚོའི་གཙུག་གི་ནོར།།
མཁས་གྲུབ༵་རྒྱལ་བའི་གདུང་འཛིན་རིན་པོ་ཆེ།།
ྋརྒྱལ་དབང་དང་པོས་བཀྲ་ཤིས་བདེ་ལེགས་སྩོལ།།
དགེ༵་ལྡན་བསྟན་པ་འཛིན་ལ་ཟླ་བྲལ་བའི།།
དགེ་འདུན༵་རིག་གྲོལ་རྒྱ༵་མཚོ༵འི་སྙིང་གི་ནོར།།
ཕན་བདེའི་ལེགས་ཚོགས་འགྱེད་པའི་གཉེན་གཅིག་པུ།།
ྋརྒྱལ་དབང་གཉིས་པའི་གསེར་གྱི་པདྨོ་བཞད།།
བསོད༵་ནམས༵་ཡེ་ཤེས་རྒྱ༵་མཚོ༵་མཐར་ཕྱིན་ཀྱང་།།
མ་ལུས་འགྲོ་ཁམས་ཐུགས་རྗེ་སྐྱོང་བའི་ཕྱིར།།
ཁྱད་པར་རིང་ལུགས་འཛིན་པའི་དགེ་བའི་བཤེས།།
ྋརྒྱལ་དབང་གསུམ་པའི་གསང་གསུམ་བླ་ན་མཐོ།།
ཕུལ་བྱུང་ཡོན༵་ཏན༵་རྒྱ༵་མཚོ༵འི་དཔལ་ལ་དབང་།།
ཀུན་ཕན་བསླབ་གསུམ་ནོར་བའི་མཛོད་ཀྱིས་ཕྱུག།
ཡང་དག་བསྙེན་པར་རྫོགས་པའི་དགེ་སློང་ཆེ།།
ྋརྒྱལ་དབང་བཞི་བའི་ངོ་མཚར་ཟློས་གར་བསྒྱུར།།
བློ༵་བཟང༵་རྒྱལ་བ་རྒྱ༵་མཚོ༵འི་བསྟན་པ་ལ།།
ཕྱི་ནང་གསང་བས་འཛིན་སྐྱོང་སྤེལ་བ་ལ།།
འགྲན་པའི་ཟླ་མེད་ཆོས་ཀྱི་རྒྱལ་པོ་ཆེ།།
ྋརྒྱལ་དབང་ལྔ་བའི་མཛད་བཟང་མཚུངས་ཟླ་དབེན།།
ཚངས༵་དབྱངས༵་སྙན་པའི་མགུར་གླུ་རོལ་མོ་དཀྲོལ།།
གསང་ཆེན་བསྟན་པ་རྒྱ༵་མཚོ༵འི་གནད་ལ་དབང་།།
ཡང་གསང་བླ་མེད་དོན་གྱི་རྣལ་འབྱོར་པ།།
ྋརྒྱལ་དབང་དྲུག་པའི་ཟླ་གཞོན་མཁའ་ལ་བཀྲ།།
བསྐལ༵་བ་བཟང༵་པོའི་རྫོགས་ལྡན་མགྲོན་དུ་ཁུག།
ཕྲིན་ལས་རྒྱ༵་མཚོ༵་དབྱར་གྱི་སྤྲིན་ལྟར་རྒྱས།།
མདོ་སྔགས་ལུང་རྟོགས་བསྟན་པའི་བདག་པོ་མཆོག།
ྋརྒྱལ་དབང་བདུན་པའི་ཉི་གཞོན་འོད་སྣང་འཕྲོ།།
འཇམ༵་དཔལ༵་གཞོན་ནུའི་མཁྱེན་རབ་གཏེར་ལ་དབང་།།
སྤྱན་རས་གཟིགས་ཀྱི་ཐུགས་རྗེ་བདག་གིར་བཞེས།།
བཤད་སྒྲུབ་རྒྱ༵་མཚོ༵འི་ཕྲིན་ལས་ཕྱོགས་ཀུན་ཁྱབ།།
ྋརྒྱལ་དབང་བརྒྱད་པའི་ཐུགས་རྗེའི་སྐལ་བཟང་ཤར།།།
མདོ་སྔགས་ལུང༵་རྟོགས༵་རྒྱ༵་མཚོ༵འི་གཏེར་མཛོད་འཛིན།།
རྣམ་དག་འཕགས་པའི་ནོར་བདུན་ཚུལ་བཞིན་སྐྱོང་།།
ྋརྒྱལ་དབང་དགུ་བའི་མཛད་བཟང་མངོན་པར་བསྟོད།།
ཚུལ༵་ཁྲིམས༵་རྣམ་དག་སྡེ་སྣོད་རིག་པ་འཛིན།།
ལེགས་བཤད་རྒྱ༵་མཚོ༵འི་མཛོད་ལ་དབང་འབྱོར་བའི།།
ལུགས་གཉིས་སྨྲ་བའི་རྗེ་བཙུན་དམ་པ་ཉིད།།
ྋརྒྱལ་དབང་བཅུ་བའི་རྣམ་ཐར་སྲིད་ན་མཛེས།།
མཁས་ཞིང་གྲུབ་པ་བརྙེས་པའི་དགེ་བའི་བཤེས།།
ལྷག་བསམ་རྒྱ༵་མཚོ༵འི་གཏེར་མཛོད་མངའ་བདག་མཆོག།།
ཕན་བདེའི་ལེགས་ཚོགས་རྒྱན་པའི་སྤྲུལ་པའི་སྐུ།།
ྋརྒྱལ་དབང་བཅུ་གཅིག་འགྲོ་དོན་རྨད་དུ་བྱུང་།།
རབ་འབྱམས་འཕྲིན༵་ལས༵་སྣ་ཚོགས་དགྱེས་པའི་དཔལ།།
གང་འདོད་ཆོས་འཁོར་བསྐོར་བས་མཛད་པ་ཅན།།
བསྟན་སྲིད་རྒྱ༵་མཚོ༵འི་མཛད་པ་བརླབ་ཆེན་པོ།།
ྋརྒྱལ་དབང་བཅུ་གཉིས་འཛིན་མའི་རྒྱན་དུ་བཞུགས།།
ཐུབ༵་བསྟན༵་སྤྱི་དང་གངས་ཅན་རྒྱལ་བའི་བསྟན།།
ལུགས་གཉིས་རྒྱ༵་མཚོ༵འི་དགའ་བ་བརྒྱ་ལྡན་པའི།།
ཕུན་སུམ་ཚོགས་པའི་འཕྲིན་ལས་མངའ་བརྙེས་པ།།
ྋརྒྱལ་དབང་བཅུ་གསུམ་བོད་ཁམས་མགོན་དུ་ཕེབས།།
བསྟན༵་འཛིན༵་ཀུན་ལས་ཐུགས་བསྐྱེད་ཟབ་རྒྱས་ཅན།།
བརླབ་ཆེན་རྒྱ༵་མཚོ༵་ཞི་བདེའི་དེད་དཔོན་མཆོག།
འཛམ་གླིང་རྒྱན་གཅིག་ཡིད་བཞིན་ནོར་བུ་བཞིན།།
ྋརྒྱལ་དབང་བཅུ་བཞིའི་གསང་གསུམ་མཁའ་དང་མཉམ།།
ྋརྒྱལ་དབང་མཚན་བསྟོད་ཀུན་བཟང་མཆོད་པའི་སྤྲིན།།
རྒྱལ་ཀུན་མཆོད་དང་འགྲོ་ལ་ཕན་བདེར་འབུལ།།
རྒྱལ་ཀུན་སྤྱི་གཟུགས་ྋརྒྱལ་བའི་དབང་པོ་ཉིད།།
རྒྱལ་བསྟན་དཔལ་དུ་དགྱེས་བཞིན་རྟག་བཞུགས་གསོལ།།

ཞེས་པ་རབ་གནས་ཤིང་རྟའི་རྒྱལ་ཟླའི་རྒྱལ་བ་དང་པོར་རྨི་ལམ་ཞིག་གི་ཚོར་སྣང་གིས་རིག་འཛིན་ཨེ་མ་ཧོས་ཀུན་བཟང་ཆོས་གླིང་ནས་གསོལ་བ་འདེབས་པར་དགེའོ།།