སེམས་ཀྱི་འཁུན་སྒྲ

ཆང་སྐྱེས།
 
མི་གཙང་ཁ་དབུགས་སྟུག་པའི་ཁོར་ཡུག་ན།།
བསླུ་བྲིད་དམར་བོའི་རླུང་བུ་ཕྱོགས་སུ་ལྡང་།།
བརྩེ་སེམས་འོ་མཚོ་རུལ་བའི་གྲོང་ཚོ་ན།།
ཉམས་ཆུང་མི་བུའི་སེམས་པ་གང་ལ་གླན།།

ཡོད་ཚད་སྒོར་ལ་ཐུག་པའི་དུས་ཚིགས་ལ།།
མི་སེམས་རློན་པ་བདུད་ཀྱིས་དབང་དུ་བསྒྱུར།།
གནས་ལུགས་འགྲོ་ས་མེད་པའི་ལམ་ཁ་ནས།།
ཉམས་ཆུང་མི་བུའི་གོམ་པ་གང་ལ་སྤོ།།

འདོད་པའི་དབང་རྩ་འཁྲུགས་པའི་ཞེན་ཆགས་ཀྱིས།།
རང་བཞིན་གཤིས་ཀྱི་མེ་ཏོག་རྙིད་དེ་སྐམ།།
ཡིད་ཆེས་ཟེར་ན་རིན་གོང་མེད་ས་ནས།།
ཁེར་རྐྱང་མི་ཡི་སྙིང་གཏམ་སུ་ལ་བཤད།།

སྤྲེལ་ལེད་ཟློས་གར་འཁྲབ་པའི་ཧྲག་བར་ནས།།
གཡོ་སྒྱུ་ཚིག་གི་མེ་ཏོག་ཕྱོགས་སུ་གཏོར།།
གལ་དང་གནད་ལ་ཐུག་པའི་དུས་ཚོད་ལ།།
ཉམས་ཆུང་མི་ཡི་བདེ་སྡུག་སུ་ལ་ཞུ།།

དུས་ཀྱི་བུ་མོ་འཛུམ་པའི་གུར་ཁང་ནས།།
ཁྲམ་པ་རྣམས་ཀྱིས་འཁྲབ་སྟོན་ཚོང་ལ་བྲིན།།
མེས་པོའི་སྲོལ་བཟང་བོར་བའི་གླེན་རྟགས་ཀྱིས།།
རང་ཉིད་རང་གིས་ཕོང་བའི་གཞི་ལ་སྦྱར།།

རྒྱུ་དང་འབྱོར་བ་ངེས་པར་མཁོ་མོད་ཀྱང་།།
སེམས་ཀྱི་རྩ་བ་བརླག་ན་ཤིན་ཏུ་ཁྲེལ།།
བདེ་བ་འདོད་པ་འཇིག་རྟེན་ཆོས་ཉིད་དེ།།
ལུགས་དང་མཐུན་པར་བྱེད་རྒྱུ་ཤིན་ཏུ་གལ།།