ཨ་རིར་བོད་ཀྱི་ཆོས་རིག་ལྟེ་གནས་ཁང་གསར་འཛུགས།

ཤམ་བྷ་ལའི་ཕོ་ཉ་དྲ་བ་ནས་འདྲེན། (http://www.shambalapost.com)

ཤམ་བྷ་ལའི་ཕོ་དྲ་བས་ཟླ་༠༢་ཚེས་༡༡ཉིན་སྤེལ། ཨ་རིའི་མངའ་སྡེ་ཝར་ཇི་ནི་ཡའི་ནང་རྟེན་གཞི་བྱས་ཡོད་པའི་གཙུག་ལག་སློབ་གྲྭ་ཆེན་མོའི་ནང་བོད་ཀྱི་རྩ་ཆེའི་ཆོས་དང་རིག་གཞུང༌། དེ་བཞིན་བོད་རྒྱལ་རབས་ལོ་རྒྱུས་སོགས་བོད་ཀྱི་ཐུན་མོང་མ་ཡོན་པའི་སྲོལ་རྒྱུན་ཆོས་རིག་དར་སྤེལ་གཏོང་སའི་ལྟེ་གནས་ཁང་ཞིག་དངོས་སུ་གསར་འཛུགས་གནང་སྟེ་དབུ་འབྱེད་གནང་ཡོད་པ་དང་དབུ་འབྱེད་མཛད་སྒོའི་སྐབས་ྋགོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་ཆེད་ཕེབས་གནང་ཡོད་པ་རེད།

དེ་ཡང་ཨ་རིའི་མངའ་སྡེ་ཝར་ཇི་ནི་ཡའི་མཐོ་རིམ་སློབ་གྲྭ་ཆེན་མོའི་ནང་བོད་ཀྱི་ལྟེ་གནས་ཁང་ཞིག་༢༠༠༩ལོའི་ཕྱི་ཟླ་༠༡པོའི་ཚེས་༣༠ཉིན་དངོས་སུ་གསར་འཛུགས་ཞུས་གནང་སྟེ་དབུ་འབྱེད་གནང་ཡོད་པ་དང༌། བོད་ཀྱི་ལྟེ་གནས་ཁང་དེས་གཙོ་བོ་བོད་ཀྱི་ཆོས་དང་རིག་གཞུང་བོད་མིའི་སྤྱི་ཚོགས་བོད་ཀྱི་རྒྱལ་རབས་ལོ་རྒྱུས་དར་འཕེལ་གཏོང་རྒྱུ་ཙམ་མ་ཟད། བོད་རྒྱ་གཉིས་ཀྱི་འབྲེལ་ལམ་གཙོས་བོད་ཀྱི་གནད་དོན་སྐོར་དོན་ཕན་སོན་པའི་དཔྱད་ཞིབ་བྱ་རྒྱུའི་སྡིང་ཆ་ཞིག་བསྐྲུན་རྒྱུའིེ་ཆེད་དུ་ཡིན་པ་རེད།

ཕྱི་ལོ་༡༩༦༠ཡས་མསན་ནས་བཟུང་ཝར་ཇི་ནི་ཡའི་མཐོ་སློབ་དེའི་ནང་བོད་བརྒྱུད་ནང་བསྟན་ཆོས་རིག་གི་སློབ་གཉེར་དེ་ཉིད་སྤེལ་གནང་ས་ཞིག་ཡིན་པ་མ་ཟད། ཕྱི་ལོ་༡༩༧༩ནས་༡༩༨༩བར་ྋགོང་ས་མཆོག་གི་གསུང་བསྒྱུར་ཡིན་པ་སློབ་དཔོན་ཇེ་ཕི་རི་ཧོབ་ཀིན་སི་ལགས་ཀྱིས་ཕྱི་ལོ་༡༩༧༠འགོ་སྟོད་དུ་ནང་ཆོས་སློབ་གཉེར་གནང་རྒྱུའི་སློབ་གཉེར་ལས་གཞི་གཞི་རྒྱ་ཆེ་ལ་ཆེས་སྙན་གྲགས་ལྡན་པ་ཞིག་གསར་འཛུགས་གནང་ཡོད་ལ།

དེ་རྗེས་ཕྱི་ལོ་༡༩༩༨ལོར་མཐོ་སློབ་དེས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དབུས་པའི་ནོ་བྷེལ་ཞི་བདེའི་གཟེངས་རྟགས་བཞེས་མཁན་ལྷན་ཚོགས་ཆེན་པོ་ཞིག་གོ་སྒྲིག་ཞུས་ཡོད་པ་རེད།

ལྟེ་གནས་ཁང་དེའི་ཟུང་འབྲེལ་འགན་འཛིན་ཇར་མ་ནོ་ཡིས་ཕྱི་ལོ་༡༩༩༠ཡས་མས་སུ་མཐོ་སློབ་དེའི་དཔེ་མཛོད་ཁང་དང་མཉམ་འབྲེལ་གནང་སྟེ་བོད་དང་ཧི་མ་ལ་ཡའི་དཔེ་མཛོད་ཁང་ཞིག་གསར་བཙུགས་གནང་བ་དང༌། དཔེ་མཛོད་དེའི་ནང་བོད་དང་འབྲེལ་ཡོད་ཀྱི་པར་རིས་དང་བརྙན་པར། བོད་དོན་ཞིབ་འཇུག་གནང་མཁན་ཚོས་སྤེལ་བའི་ཡིག་ཆ་ཁག་མང་པོ་ཞིག་ཞལ་འདེབས་ཕུལ་ཡོད་པ་དང༌། བོད་ཀྱི་ཆོས་རིག་ལྟེ་གནས་དེའི་འགན་འཛིན་ནི་བཀྲ་ཤིས་རབ་རྒྱས་ལགས་དང་ཌེ་ཝི་ཌི་ཇར་མ་ནོ་ལགས་གཉིས་ཡིན་པ་རེད།།