སློབ་དེབ་བསྐྱར་ཞིབ།

གནས་ཚུལ་མཁོ་འདོན་པ། བསམ་གླིང་ཚེ་རིང་ལྷ་མོ།

༢༠༡༣ ལོའི་ཕྱི་ཟླ་༡༠ པའི་ཚེས་༡༤’༡༥’༡༦’ཉིན་གསུམ་རིང་ཤེས་རིག་ལས་ཁུངས་ཀྱི་སློབ་དེབ་རྩོམ་སྒྲིག་པའི་གོ་སྒྲིག་འོག།   གཞི་རིམ་འོག་མའི་སློབ་དེབ་བསྐྱར་ཞིབ་ཀྱི་ལས་གཞི་དེ་སྤེལ་ཡོད་པ་དང་། ཉིན་གསུམ་ནང་ཐོག་མར་འཛིན་རིམ་དང་པོའི་སློབ་དེབ་ལ་སླར་ཡང་ཞིབ་འཇུག་གིས་གཏན་འབེབ་དང་། དེ་རྗེས་འཛིན་རིམ་གསུམ་པའི་སློབ་དེབ་ལ་བསྐྱར་ཞིབ་གནང་བ་རེད།  སློབ་དེབ་བསྐྱར་ཞིབ་ཀྱི་ལས་རིམ་ནང་ཤེས་རིག་ཤེས་ཡོན་སྡེ་ཚན་གྱི་འགན་འཛིན་རྒན་བཀྲ་ཤིས་དོན་གྲུབ་ལགས་དང་། རྩོམ་སྒྲིག་རྒན་བཀྲ་ཤིས་རྡོར་རྗེ་ལགས་དང་། རྒན་དགེ་འདུན་དོན་ཡོད་ལགས།  དེ་བཞིན་རྒྱ་གར་ལྷོ་ཕྱོགས་དང་བྱང་ཕྱོགས་ཤར་ཕྱོགས་། དེ་བཞིན་བཞུགས་གར་རྡ་ས་བཅས་ནས་ཁྱོན་བསྡོམས་དགེ་རྒན་མི་གྲངས་བཅུ་ཙམ་ཡོད་པ་རེད།

སྐབས་རེ་ཚོགས་མི་ཚོའི་བསམ་ཚུལ་མི་མཐུན་པ་སོགས་ཀྱི་གནས་ཚུལ་ཡང་ཡོང་གི་ཡོད་ལ།  སྤྱི་ཡོངས་ནས་གྲོས་གླེང་ཧ་ཅང་གི་ལྷུག་པོ་བྱུང་ཞིང་། མདོར་བསྡུས་ན་ཚང་མས་སློབ་དེབ་དེ་སྤུས་དག་པོ་དང་ཡག་པོ་ཞིག་ཡོང་བའི་རེ་བ་ཆེན་པོ་གནང་གི་འདུག །

སྤྱིར་ན་སློབ་མ་དབུས་བཞག་གི་སློབ་འཁྲིད་ཐབས་ལམ་ནང་སློབ་དེབ་བེད་སྤྱོད་དེ་ཙམ་མེད་པ་རེད་གསུང་མཁན་ཡོད་ལ།  ཡང་སློབ་དེབ་ནི་རྒྱལ་ཁབ་ཅིག་གི་ཤེས་དཔལ་གྱི་ཚད་གཞི་ཇི་ལྟར་ཡོད་མེད་ཀྱི་འཚབ་མཚོན་དཔང་ཡིག་ཅིག་ཏུ་བརྩི་མཁན་ཡང་ཡོད་པ་རེད།

ལྷག་པར་དུ་སློབ་གྲྭ་ཁག་ནང་སློབ་དེབ་མེད་ན་དཀའ་ངལ་ཆེ་ཤོས་དེ་དགེ་རྒན་གྱི་ཤེས་ཚད་ལ་རག་ལུས་ཡོད་པར་ཡིད་ཆེས་བྱས་ཆོག་པར་སྙམ། དགེ་རྒན་གྱི་ཤེས་ཚད་འདང་ངེས་ཡོད་ན་སློབ་མའི་ཤེས་ཚད་དང་མཐུན་པར་དུས་ཐོག་ཏུ་བསླབ་གཞི་བསྡུ་སྒྲིག་དང་གསར་རྩོམ་བྱེད་ཐུབ།  འོན་ཀྱང་དགེ་རྒན་གྱི་ཤེས་ཚད་འདང་ངེས་མེད་ན་སློབ་དེབ་ཁོ་ནར་མ་གཏོགས་བརྟེན་ས་མེད་པ་ནི་བརྗོད་མི་དགོས་པ་ཞིག་རེད།

དེས་ན་སློབ་དེབ་བསྐྱར་ཞིབ་དེ་ནི་ཉེན་ཁ་ཆེ་བའི་ལས་འགན་ཞིག་རེད་ལ།  འབྱུང་འགྱུར་མིས་ཁ་རྡུང་གཏོང་ཡུལ་ཞིག་ཏུ་མི་འགྱུར་བ་བྱེད་རྒྱུ་ནི་ཚོགས་མི་ཚང་མའི་འོས་འགན་ཉག་ཅིག་རེད་ཨང་སྙམ་མོ།