རྩོམ་པ་པོ། William Bennett
སྒྱུར་མཁན། རེབ་ཐོག་མདའ།
ང་ཚོས་འཚོ་གནས་ཀྱི་རིན་ཐང་མང་པོ་ཞིག་རང་གི་བུ་དང་བུ་མོ་ལ་བརྒྱུད་སྤྲོད་བྱེད་པ་ནི་སྤྱི་ཚོགས་ཧྲིལ་བོ་འདིའི་གལ་གནད་ཆེ་ཤོས་ཀྱི་གནད་དོན་ཞིག་རེད་སྙམ། ཕྲུ་གུ་ཚོའི་འཚོ་བའི་ནང་དུ། རང་ཉིད་ཀྱི་མི་ཚེ་དོན་ལྡན་ཞིག་ཡོང་བར་འཚོ་གནས་རིན་ཐང་དང་། ནང་སེམས་ཀྱི་ཡིད་ཆེས། བདེན་རྫུན་འབྱེད་པའི་བློ་སོགས་བརྒྱུད་རིམ་འདི་ལས་ལྷག་པའི་རྣམ་དཔྱོད་ཁྱད་དུ་འཕགས་ཤིང་ཐག་གཅོད་ཀྱི་ནུས་པ་ལྡན་པའི་བློ་རིག་ཅིག་མེད། མ་ཟད་ཕྲུ་གུ་ཞིག་གི་ལས་དབང་ལ་ཐག་གཅོད་པ་ཡང་འཚོ་གནས་རིན་ཐང་ལས། ཁོ་བོ་དག་གི་རིགས་རྒྱུད་དང་རུས་གདུང་། རྟགས་དང་ཆོས་ལུགས། འཛིན་གྲྭ་དང་ཉེ་འབྲེལ། འབྱུང་ཁུངས་དང་རྒྱབ་ལྗོངས་སོགས་ནི་དེ་འདྲའི་གལ་ཆེན་པོ་མིན། རིན་ཐང་དེས་ཁྱིམ་ཚང་རྣམས་ལ་ཡང་ཁྱད་དུ་འཕགས་པའི་རིན་ཐང་ཞིག་ཡོད་པ་ར་སྤྲོད་བྱེད་ཐུབ།
དགེ་རྒན་ཡོད་ཚད་ཕ་མ་ཡིན་མི་སྲིད་ཀྱང་ཕ་མ་ཡོད་ཚད་ནི་དགེ་རྒན་ཡིན་ལ། ཕྲུ་གུ་ཚོའི་ཐོག་མའི་དགེ་རྒན་ཡིན། ཕྲུ་གུ་ཚོར་དགེ་རྒན་ནི་མེད་དུ་མི་རུང་བ་ཞིག་ཡིན་པ་དང་ཕ་མ་ཚོས་ཀྱང་ཕྲུ་གུ་སློབ་གྲྭར་འཇོག་ཐུབ་དགོས་པ་ནི་ཕ་མ་མི་རེ་ངོ་རེ་ནས་བསམ་བློ་གཏིང་ཟབ་མོ་དང་བློ་ཐག་ཆོད་པོ། ཕུགས་རྒྱང་རིང་པོའི་ཐོག་ནས་བསམ་གཞིགས་བྱེད་དགོས། ཕ་མའི་དབང་བསྒྱུར་གྱི་ལམ་ལུགས་དེ་ལ་ཤེས་ལྡན་པས་ངོས་ལེན་བྱེད་དཀའ་བ་ཞིག་ཡིན་པས་ན། ཕྲུ་གུ་ལ་བཙོན་རའི་ཁོར་ཡུག་དང་འདྲ་བའི་སློབ་གསོ་མི་སྤྲོད་པར། ཕྲུ་གུ་ནི་དཀོན་མཆོག་གིས་ཕ་མ་ཚོར་ཡིད་རྟོན་བྱེད་འོས་པའི་ལེགས་སྐྱེས་ཤིག་ལ་ངོས་འཛིན་དགོས་པས་ན། ང་ཚོའི་སློབ་གྲྭའི་སྤྱི་ཚོགས་དང་ཁོར་ཡུག་གང་ཞིག་ཡིན་རུང་། ང་ཚོས་གཞོན་རབས་པ་ཁོང་ཚོ་ནི་དཀོན་མཆོག་གི་ལེགས་སྐྱེས་སུ་གནང་བ་བཞིན་ལྟ་སྐྱོང་བྱེད་དགོས་པ་ལས་ཚ་དྲོད་ཀྱི་གདུང་བའི་འོག་གི་དུད་འགྲོ་བཞིན་སྤྱི་ཚོགས་འདིའི་ཚོད་ལྟ་བྱེད་སྤྱད་ལྟར་བྱ་མི་རུང་།
ཨ་ཕའི་འགན་འཁྲི་ནི་བུད་མེད་ཅིག་ལ་མངལ་ཆགས་པའི་དུས་སུ་ལྟ་རྟོག་བྱེད་པ་ཙམ་མ་ཡིན་པར་དེ་ལས་ཀྱང་ལྷག་པའི་འགན་འཁྲི་མང་ཙམ་འཁུར་དགོས། ཕ་འབྲེལ་གྱི་དངོས་དོན་ནི། རང་ཉིད་ཀྱི་བུ་བུ་མོ་དང་རྒྱང་ཐག་བཀྱེད་རྒྱུ་དེ་མ་ཡིན་པར། རང་ཉིད་ཀྱིས་བརྩེ་བའི་ངང་ནས་ཁོང་ཚོའི་ཆེད་དུ་བློས་གཏོང་གི་དམ་བཅའ་བརྟེན་དགོས་པ་མ་ཟད། རང་ཉིད་དང་དོད་ཆེན་པོའི་ངང་ནས་འགན་འཁུར་གྱི་འདུ་ཤེས་ལྡན་པ་ཞིག་ཡིན་དགོས། ལོ་ན་གཞོན་པའི་ཕྲུ་གུ་ཞིག་གི་འཚར་ལོངས་ཀྱི་ཆ་ནས་ཀྱང་། ཕ་མ་གང་རུང་ནི་ཁོང་ཚོའི་འཚོ་བའི་བརྒྱུད་རིམ་ཁྲོད་མེད་དུ་མི་རུང་། གལ་སྲིད་ཕ་མ་གཅིག་རང་གི་བུ་བུ་མོ་དང་རྒྱང་ཐག་བཀྱེད་དེ་གནས་པ་ཡིན་ན། ཕྲུ་གུ་ཚོ་སློབ་བྱོལ་ལ་འགྲོ་བ། རང་ཚུགས་མི་བརྟན་པ། བདེ་སྐྱིད་དང་བྲལ་བ། མྱོས་རྫས་ཀྱི་རིགས་གོམས་པ་དང་ནག་ཉེས་བཟོ་བ་སོགས་འབྱུང་སྲིད།
མ་ཟད་རང་ཉིད་ཀྱི་བུ་བུ་མོ་སུ་ཞིག་འཇིག་རྟེན་མཐུན་འཇུག་གི་དུས་སུ་ཡང་ཕ་མའི་འབྲེལ་བ་ནི་ཧ་ཅང་དགོས་ངེས་ཤིག་ཡིན། གང་ཡིན་ཟེར་ན། ཁྱོ་ཤུག་སུ་ཡིན་ཡང་རང་ཉིད་གཉེན་སྒྲིག་དུས་ཕ་མའི་རྒྱབ་རྟེན་དང་ཁ་གཡང་སྒྲོག་པ་ནི་བྱ་དངོས་གང་གིས་ཀྱང་འགྲན་དུ་བྲལ་བ་ཞིག་ཡིན།
བདག་གིས་ཁྱིམ་གཞི་ནི་ཧ་ཅང་གི་གལ་འགངས་ཆེ་བའི་མཐུན་ཚོགས་ཤིག་ཡིན་པ་ཡིད་ཆེས་བྱེད་ཀྱིན་ཡོད། ང་ཚོས་སྐབས་དེ་ལ། ཁྱིམ་གཞིས་གཅིག་བདག་གཅེས་བྱེད་པ་དང་ནུས་སྟོབས་ལྡན་པར་འགྱུར་བ་ནི་ཁྱིམ་གཞིས་དེའི་འབད་པ་ལ་བརྟེན་ནས་བྱུང་བ་ཡིན་པས། གལ་སྲིད་དགོས་གལ་བྱུང་ན་དཔའ་ངར་ཞུམ་མེད་ཀྱི་འབད་པ་ལ་བརྟེན་དགོས། བདག་གིས་སྲོལ་རྒྱུན་རང་བཞིན་ཅན་གྱི་མི་ཚེའི་འཚོ་གནས་ཀྱི་རིན་ཐང་གླེང་དུས། བདག་གིས་ཆོས་ཉིད་ཅན་གྱི་ཐ་སྙད་དག་བེད་སྤྱོད་ཀྱིན་མེད་ལ། ཆབ་སྲིད་ཀྱི་འགྲོ་ལུགས་ཤིག་ཀྱང་གླེང་གི་མེད། ལྷག་པར་དུ་དོན་མེད་ཉོག་གཏམ་དང་གཞན་ལ་མཐོང་ཆུང་དེ་བས་ཀྱང་བཤད་གི་མེད། བདག་གིས་ང་ཚོ་ལ་ཅི་ཞིག་ལེགས་པ་དེ་གུས་བཀུར་དང་དྲང་བདེན་བྱེད་དགོས་པར་རེ་སྙེགས་བྱེད་ཀྱིན་་ཡོད། དེར་བརྟེན་བདག་གིས་ཤེས་ཡོན་དངོས་དེ་ནི་འཚོ་གནས་རིན་ཐང་གི་་སྲོག་ལྟ་བུ་ཡིན་པའི་བདེན་པ་དེ་ནམ་ཡང་འདོར་མི་སྲིད།།
( William Bennett ) མཆོག་ནི་ཨ་མེ་རི་ཁའི་ཤེས་ཡོན་སྡེ་ཚན་གྱི་དྲུང་ཡིག་ཟུར་པ་ཡིན་པ་དང་། ཁོང་ནི་(A treasury of great moral stories)་ཞེས་པའི་དེབ་ཀྱི་རྩོམ་པ་པོ་དང་དེབ་དེ་ནི་ཨ་རིའི་སྤྱི་ཚོགས་ནང་འགྲེམས་རྒྱུག་ཆེ་ཤོས་གྲས་ཤིག་ཡིན་པར་བཤད།