སྤོབས་པ་མཐའ་ཡས།
—–MH370 བོར་ནས་ལོ་ཕྱེད་འཁོར་བའི་ཉིན་བྲིས།
༢༠༡༤ལོའི་ཟླ་༥ པའི་ཚེས་༨ ཉིན་ལ་མ་ལའེ་ཤི་ཡའི་མཁའ་འགྲུལ་གྱི་གནམ་གྲུ་MH370 ལོ་ཕྱེད་ལྷག་གི་གོང་དུ་གར་སོང་ཆ་མེད་དུ་གྱུར་པར་བསྒྲགས། ལོ་ཕྱེད་འགོར་བའི་དེ་རིང་གི་ཉིན་བར་དུ་ཚོགས་པ་ལས་ཁུངས་མང་པོས་མི་ཤུགས་རྒྱུ་ཤུགས་ཕངས་མེད་བཏང་ནས་འཚོལ་བཞིན་ཡོད། འགྲོ་སོང་ཚབ་ཆེ་ཤོས་ཀྱི་གནམ་གྲུ་བོར་སྟོར་དོན་རྐྱེན་ཞིག་ཏུ་གྱུར་ཡོད་ཟེར། ཡིན་ན་ཡང་། གནམ་གྲུ་དེར་དོན་རྐྱེན་གང་བྱུང་ཤེས་མེད། དོན་དངོས་ཡོད་ལ་མ་ལའེ་ཤི་ཡའི་གཞུང་གིས་ཆེད་དུ་སྦས་ནས་གཡོ་ཐབས་བྱེད་བཞིན་པ་མ་གཏོགས་དོན་དུ་གནམ་གྲུ་གར་སོང་མ་གོ་བ་གཏན་ནས་མིན་པ་འདྲ།
རྩོམ་ཐུང་འདིའི་ནང་ལ་ངས་གནམ་གྲུ་དེ་འཇིགས་སྐུལ་རིང་ལུགས་པས་གཏོར་བཅོམ་བྱས་པའམ་ཡང་ན་འཕྲུལ་ཆས་ལ་སྐྱོན་བྱུང་ནས་ཆག་སྒོ་དེ་ལྷགས་པ་ཡིན་ཡང་། མ་ལའེ་ཤི་ཡའི་གཞུང་གིས་སྦས་སྐུང་བྱས་སྲིད་པའི་རྒྱུ་མཚན་ཁ་ཤས་ཤིག་དྲངས་ཡོད།
དེ་ཡང་གནམ་གྲུ་བརྡབ་སྐྱོན་གྱི་གནས་ཚུལ་དྲང་པོར་བསྒྲགས་ན་ཡུལ་དེའི་དཔལ་འབྱོར་ལ་གྱོང་ཕོག་སྲིད་པ། ཨ་མེ་རི་ཁ་དང་རྒྱ་ནག་གིས་གཙོས་པའི་ཕྱིའི་སྤྱི་ཚོགས་ཀྱི་ཞི་དྲག་གནོན་ཤུགས་ནང་དུ་སླེབས་སྲིད་པ། ཡུལ་དེའི་སྤྱི་ཚོགས་ཀྱི་མཚན་མཐོང་ལ་གནོད་པ། ཨི་ཟི་ལམ་གྱི་ཆོས་ལུགས་ཀྱི་མཚན་སྙན་ལ་གནོད་སྐྱོན་ཐེབས་ངེས་པ་སོགས་ཀྱི་འཇིགས་སྣང་ལ་བརྟེན་ནས་ཁོང་ཚོས་སྦས་སྐུང་བྱས་པ་ཡིན་ནམ།
དང་པོ། མཁའ་འགྲུལ་དང་ལྟ་སྐོར་ཡོང་སྒོ་ལ་གྱོང་ཕོག་རྒྱུ་ཡིན་པ། མ་ལའེ་ཤི་ཡ་ནི་ཡུལ་སྐོར་དང་འགྲིམ་འགྲུལ་གྱི་ས་ཚིགས་གལ་ཆེན་ཞིག་ཡིན་སྟབས་འགྲིམ་འགྲུལ་དང་ལྗོངས་རྒྱུ་བའི་ཡོང་སྒོས་ཡུལ་དེའི་དཔལ་འབྱོར་འཕར་སྣོན་ཆེན་པོ་ཡོང་གིན་ཡོད། ཡུལ་དེའི་སྐད་གྲགས་དང་ཁྱབ་རྒྱ་ཆེ་བའི་མཁའ་འགྲུལ་གྱི་གནམ་གྲུ་ལ་འཇིགས་སྐུལ་རིང་ལུགས་པས་གཏོར་རྒོལ་བྱས་པའམ་འཕྲུལ་ཆས་ལ་སྐྱོན་བྱུང་ཆག་སྒོ་ལྷགས་པའི་མིང་ཆད་ངན་པ་ཕོག་ན་དེ་ནི་མ་ལའེ་ཤི་ཡའི་མཁའ་ལམ་ལ་སྲུང་སྐྱོབ་མི་བཟང་བ་དང་། གལ་སྲིད་གནམ་གྲུའི་འཕྲུལ་ཆས་ལ་སྐྱོན་བྱུང་ནས་བརྡབ་བསིག་བྱུང་བ་ཡིན་ན་འཕྲུལ་ཆས་ལ་བརྟག་དཔྱད་དང་སྤུས་ཚད་ཞན་པའི་མཐོང་ཕྱོགས་བསྐྲུན་པར་ཐག་ཆོད་པ་རེད།
དེར་བརྟེན་འགྲུལ་བ་དང་ལྗོངས་རྒྱུ་བ་ཚོར་རང་བཞིན་གྱིས་འཇིགས་སྣང་སླེབས་ངེས་པས་འགྲིམ་འགྲུལ་བས་ཡུལ་དེའི་མཁའ་འགྲུལ་བེད་སྤྱོད་པ་ཉུང་དུ་འགྲོ་བ་དང་། ལྗོངས་རྒྱུ་བ་ཡུལ་དེར་བསྐྱོད་ཚད་ཉུང་དུ་འགྲོ་བ་གཏན་ཁེལ་བ་རེད། མ་ལའེ་ཤི་ཡའི་ཕྱོགས་ནས་ཡུལ་དེའི་དཔལ་འབྱོར་ཡོང་སྒོ་ལ་གྱོང་མི་ཕོག་པའི་ཆེད་དུ་གནམ་གྲུ་གར་སོང་མ་ཤེས་ཁུལ་བྱས་ནས་གནས་ཚུལ་ངོ་མ་སྦས་པ་ཡིན་ནམ།
གཉིས་པ། ཡུལ་དང་ཡུལ་དེའི་སྤྱི་ཚོགས་ཀྱི་མཚན་མཐོང་ལ་གནོད་པ། འཇིགས་སྐུལ་རིང་ལུགས་པ་ནི་དེང་དུས་སུ་ཨ་མེ་རི་ཁས་སྣེ་ཁྲིད་པའི་མཐུན་ཕྱོགས་ཁག་དང་། བྱང་ཨ་ཊི་ལན་ཊའི་སྒྲིག་འཛུགས། རྒྱལ་ཚོགས་མཉམ་འབྲེལ་གྱི་ཞི་བདེའི་སྲུང་དམག་སོགས་ཀྱིས་རྒོལ་རྡུང་གཏོང་ཡུལ་ཡོད་ན་མེད་ན་དེ་ཡིན། མ་ལའེ་ཤི་ཡ་ནི་ལྟོས་འཇོག་གིས་བལྟས་ན་ཅུང་ཞི་བདེ་ཡོད་པའི་ཡུལ་ལུང་གི་གྲས་ཡིན། འོན་ཀྱང་གློ་བུར་དུ་ཉེས་མེད་ཀྱི་འགྲུལ་བཞུད་པ་སྐྱེལ་བྱེད་ཀྱི་གནམ་གྲུ་ཞིག་ལ་ཡུལ་དེའི་འཇིགས་སྐུལ་བས་གཏོར་སྐྱོན་བཏང་བའི་གནས་ཚུལ་ཁྱབ་ན་རྒྱལ་སྤྱིའི་སྤྱི་ཚོགས་ཀྱི་ངོར་མ་ལའེ་ཤི་ཡའི་ཡུལ་དང་དེའི་དེའི་མི་མང་ལ་ཡང་འཇིགས་སྣང་ངམ་མཐོང་ཚུལ་ངན་པ་རང་ཤུགས་ཀྱིས་སླེབས་ཡོང་ངེས་ཡིན་པས་དེ་མི་འབྱུང་བའི་ཆེད་དུ་དོན་དངོས་སྦས་གསང་བྱས་པ་ཡིན་ནམ།
གསུམ་པ། ཆབ་སྲིད་ལངས་ཕྱོགས་ཐད་ནས་རྒྱལ་སྤྱིའི་དོག་ཟོན་བྱ་ཡུལ་དང་ནང་སྲིད་ལ་ཇུས་གཏོགས་ཡོང་བའི་ཉེན་ཁ་ཡོད་པ། མིས་ཆེད་དུ་གཏོར་བཅོམ་བྱས་པ་ཡིན་སྲིད། དེ་ལྟར་ན་འཇིགས་སྐུལ་རིང་ལུགས་པས་ཡུལ་དེའི་ཉེས་མེད་འགྲུལ་སྐྱེལ་བའི་གནམ་གྲུ་གཏོར་བཅོམ་བྱས་ཚུལ་གྱི་གནས་ཚུལ་དེས་ཡུལ་དེ་ན་རྒྱལ་སྤྱིའི་སྤྱི་ཚོགས་ཀྱི་ངོར་རྒྱལ་སྤྱིའི་བདེ་འཇགས་ལ་ཉེན་ཁ་ཡོད་པའི་ཚོགས་སྡེ་ཞིག་ཡོད་པར་ངོས་འཛིན་པར་ཐག་ཆོད་པ་རེད།
ཞི་བདེ་རྒྱ་མཚོའི་མངའ་ཁུལ་ཁག་ལ་ཨ་མེ་རི་ཁའི་ཞི་དྲག་གི་ནུས་ཤུགས་ཁྱབ་རྒྱ་ཆེན་པོ་ཡིན་ཐོག་དེའི་མཐུན་ཕྱོགས་ཡུལ་ལུང་སྤྱི་ཚོགས་མང་པོས་ཀྱང་དགྲ་དོག་དང་དོ་སྣང་གི་གྲང་རླུང་བསིལ་པོ་ཞིག་ཡུལ་འདིར་སླེབས་ཐག་ཆོད་པ་རེད། ལྷག་པར་ཐེངས་འདིར་གནམ་གྲུའི་ནང་གི་འགྲུལ་བ་མང་ཆེ་བ་རྒྱ་ནག་གི་མི་སེར་ཡིན་པས་རྒྱ་ནག་གིས་ཀྱང་ལག་པ་འཇུ་བར་ཐག་ཆོད་པ་རེད།
ཉེ་བའི་དུས་འདིར་རྒྱ་ནག་གིས་ཐབས་བརྒྱ་ཇུས་སྟོང་གིས་ཞི་བདེ་རྒྱ་མཚོའི་མངའ་ཁུལ་མང་པོར་ཞི་དྲག་གཉིས་ཀྱི་ཤུགས་རྐྱེན་སྤེལ་བཞིན་ཡོད། ཐེངས་འདིར་རྒྱ་ནག་གི་མི་སེར་བརྒྱ་ཕྲག་ལྷག་ཅིག་མ་ལའེ་ཤི་ཡའི་འཇིགས་སྐུལ་རིང་ལུགས་པས་བསད་སོང་ཟེར་བའི་གནས་ཚུལ་ཁྱབ་ན་རྒྱ་ནག་གིས་མ་མཐའ་ཡང་ཡུལ་འདིའི་བདེ་འཇགས་སྲུང་སྐྱོབ་ལ་ཁ་གཡར་བ་སོགས་ཀྱིས་ཤུགས་རྐྱེན་གསར་པ་ཞིག་སྤེལ་ཐབས་བྱེད་ངེས་པ་རེད། དེར་བརྟེན་མ་ལའེ་ཤི་ཡས་གནམ་གྲུར་རྐྱེན་ངན་ཅི་བྱུང་གི་དོན་དངོས་སྦས་པ་ཡིན་ནམ།
བཞི་པ། ཁ་ཆེའི་ཆོས་ལུགས་ཀྱི་མཚན་མཐོང་ལ་གནོད་པ། མ་ལའེ་ཤི་ཡ་ནི་ཁ་ཆེའི་མི་འབོར་གྱིས་བརྒྱ་ཆ་ཕལ་ཆེ་བ་ཟིན་པའི་སྤྱི་ཚོགས་ཤིག་ཡིན། ཁ་ཆེའི་ཆོས་ལུགས་གི་ལྟ་བ་འཛིན་པའི་ཡུལ་མི་ཚོར་གཞུང་ངོས་ནས་ལྟ་རྟོག་དང་ཐོབ་ཐང་ཡང་དམིགས་བསལ་ཡོད། སྐབས་འདིར་གལ་སྲིད་མིས་ཆེད་དུ་མ་ལའེ་ཤི་ཡའི་མཁའ་ལམ་ལ་གཏོར་བཤིག་བྱས་པ་ཡིན་ན་བྱེད་མཁན་གྱི་མི་སྣ་དེ་ཚོ་ཡང་གཅིག་བྱས་ན་ཁ་ཆེའི་ཆོས་ལུགས་པའི་མིང་ཁྱེར་མཁན་ཡིན་སྲིད་པ་རེད།
ཨ་མེ་རི་ཁ་དང་དེའི་མཐུན་ཕྱོགས་ཚོས་ཁ་ཆེའི་ལྟ་བ་འཁྲེགས་འཛིན་ཅན་དང་འཇིགས་སྐུལ་རིང་ལུགས་པ་ངོ་བོ་གཅིག་ཏུ་བསྒྲུབ་ཅི་ཐུབ་བྱེད་ཀྱིན་ཡོད་པ་དང་། དགུ་བཅུ་གཅིག་གི་དོན་རྐྱེན་གྱི་རྗེས་སུ་ཨ་མེ་རི་ཁ་ཆེའི་ཆོས་ལུགས་ལ་དད་པའི་ཡུལ་ལུང་དུ་མར་བཙན་འཛུལ་བྱས་པ་དང་། མི་གསོད་ཁྲག་སྦྱོར་གྱི་དོན་རྐྱེན་མང་པོ་ཞིག་ཁ་ཆེའི་ཆོས་ལུགས་པའི་མགོར་འཇོག་པ། འཇིགས་སྐུལ་རིང་ལུགས་པར་བསྙད་དེ་ཁ་ཆེའི་ཆོས་ལུགས་དང་འབྲེལ་བའི་ཚོགས་སྡེ་མང་པོར་དྲག་པོའི་ཐབས་ཤེས་ཡོད་རྒུས་རྒོལ་རྡུང་གཏོང་བཞིན་ཡོད།
རྒྱ་ནག་གིས་ཀྱང་གོ་སྐབས་དེ་བཟུང་ནས་ཁྱི་རྐུན་འོ་ཟོའི་ཁ་ན་མཐུན་པའི་དཔེ་བཞིན་དུ་ཤིན་ཅང་གི་རང་དབང་དོན་གཉེར་བ་ལ་རྒོལ་རྡུང་གཏོང་ཆེད་དུ་རྒྱ་ནག་ཀྱང་འཇིགས་སྐུལ་རིང་ལུགས་པའི་གནོད་སྐྱོན་ཕོག་པའི་ཡུལ་ལུང་ཡིན་ཚུལ་བསྒྲགས་ནས་ནམ་ཡིིན་ཡང་ཤིང་ཅང་གི་ཁ་ཆེའི་ཆོས་ལུགས་ལ་དམ་དྲག་རྩུབ་མོ་བྱེད་ཀྱིན་ཡོད། དེར་བརྟེན་མ་ལའེ་ཤི་ཡའི་གཞུང་གིས་ཁ་ཆེའི་ཆོས་ལུགས་པ་ཞིག་གིས་གནམ་གྲུ་གཏོར་རྒོལ་བྱས་སོང་ཞེས་དྲང་པོར་བསྒྲགས་ན་ཨ་མེ་རི་ཁ་དང་རྒྱ་ནག་གཉིས་ཆར་གྱི་ཕྱོགས་ནས་ཁ་ཆེའི་ཆོས་ལུགས་ལ་སྒྲོ་བཏགས་སྐུར་འདེབས་ཀྱིས་མཚན་མཐོང་གཅོག་པའི་འབད་བརྩོན་བྱེད་པར་ཞེད་ནས་དོན་དངོས་དེ་སྦས་པ་ཡིན་སྲིད།
མཇུག་བསྡུ་བ། གོང་དུ་བགྲང་པ་བཞིན་ཡུལ་དེའི་དཔལ་འབྱོར་དང་། ཆབ་སྲིད་བརྟན་ལྷིང་། སྤྱི་ཚོགས་ཀྱི་ཆེ་མཐོང་། ཆོས་ལུགས་ཀྱི་མཚན་སྙན་བཅས་ལ་བསམ་གཞིག་དང་ཁེ་གྱོོང་ལ་གཞིག་ནས་ཐེངས་འདིར་གནམ་གྲུ་དེར་རྐྱེན་ངན་བྱུང་བའི་་གནས་ཚུལ་ངོ་མ་མ་ལའེ་ཤི་ཡའི་གཞུང་གིས་སྦས་སྐུང་བྱས་པ་ཞིག་ཡིན་པ་འདྲ། གནད་དོན་དེ་དང་བསྟུན་ནས་རྒྱལ་སྤྱིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གིས་མ་ལའེ་ཤི་ཡའི་མཁའ་ལམ་སྟངས་འཛིན་ཚོགས་སྡེ་དང་སྲིད་གཞུང་ལ་གནས་ཚུལ་གསལ་སྟོན་ཡོང་བའི་གནོན་ཤུགས་སྤྲོད་རྒྱུ་དང་། ཆེད་ལས་པས་མངོན་ལྐོག་བརྒྱུད་གསུམ་གྱིས་རྩད་གཅོད་རྒྱུན་མ་ཆད་པ་བྱ་རྒྱུ་གལ་ཆེན་རེད་སྙམ་མོ།།
ཇུས་མེད་ཇུས་གཏོགས་རང་རེད།
ཡག་པོ་འདུག ཕྱིས་སུ་ཡང་བསྐྱར་ཡུཀ་རན་དུ་མ་ལེཤི་ཡ་གནམ་གྲུ་འཐོར་ནས་བཟུང་། ཡུལ་དེའི་འགྲུལ་བསྐྱེལ་གནམ་གྲུའི་ཚོང་ལ་གྱོང་གུད་་བྱུང་བཞིན་པ་གནས་ཚུལ་ཞིག ཟླ་བ་རེ་ཟུང་སྔོན་ལ་འཐོན་འདུག
འབྲེལ་མེད་དོན་གཞན་དང་ཇུས་མེད་ཇུས་གཏོགས་ཞེས་པའི་དཔེ་མཚོན་ཡག་ཤོས་ཤིག་རེད།
ང་ཡང་འཛམ་གླིང་སྤྱི་ཚོགས་ཀྱི་ཚོགས་མི་ཞིག་ཡིན་སྟབས་འཛམ་གླིང་སྤྱི་ཚོགས་ཀྱི་གནད་དོན་ལ་ཐེ་གཏོགས་བྱེད་པའི་ཐོབ་ཐང་དང་འོས་འགན་གཉིས་ཆར་ཡོད་པ་ཤེས་པར་གྱིས།