<<བདག་དང་ཐ་སྙད་ཅིག་གི་གཏམ་རྒྱུད།>>

ལོ་མ་རྒྱལ།

 
ལོ་གསུམ་གྱི་ཡར་སྔོན་ལ། ཡིག་བསྒྱུར་གྱི་ལས་གཞི་འདི་མགོ་ཚུགས་ནས་མཚམས་ཤིག་ཏུ། ང་རང་(sadism) ཟེར་བའི་དབྱིན་ཇིའི་ཐ་སྙད་འདི་དང་ཐོག་མར་འཕྲད། དེའི་སྐབས་དོན་ནི་གཞན་གྱི་སྡུག་བསྔལ་མཐོང་དུས། རང་སེམས་དགའ་བ་དང་སྐྱིད་པའི་དོན་རེད། ཡིན་ན་ཡང་། བོད་སྐད་ནས་དེའི་སྐད་དོད་ཅི་ཡིན་པ་མ་ཤེས་པའམ། ཡང་ན། དེའི་དོན་ལ་འཕྲོད་ཅིང་འབྱོར་བའི་ཐ་སྙད་ཅིག་མ་རེག་པར། ངས་ལོ་གསུམ་ལ་ས་སློག་སློག་དང་བལ་གསེད་གསེད་བྱས་ཏེ། ཚིག་མཛོད་ཁག་ཏུ་ཡང་བཙལ་ཡིན་ལ། དཔེ་རྙིང་ཁག་ཏུ་ཡང་ལྟ་ཁུལ་བྱས་ཡིན།

དེ་ཡང་། ཚིག་མཛོད་ཁག་ཏུ་”sadism” ཟེར་བའི་ཐ་སྙད་འདིའི་དོན་ནི་འདི་ལྟར་བསྒྱུར་འདུག་སྟེ།
དང་བོ། བཀྲ་ཤིས་ཚེ་རིང་གིས་བརྩམས་པའི་<<དབྱིན་བོད་རྒྱ་གསུམ་ལྷན་སྦྱར་གྱི་ཚིག་མཛོད།>> ་དུ། གནག་པའི་འཁྲིག་སྤྱོད། ཅེས་བསྒྱུར་འདུག །

གཉིས་པ། བོད་གཞུང་ཤེས་རིག་ལས་ཁུང་གི་<<དབྱིན་བོད་ཚིག་མཛོད་གསར་མ།>> ་ཞེས་པའི་ནང་དུ། རྩུབ་སྤྱོད་འཁྲུག་སྦྱོར། ཞེས་བསྒྱུར་འདུག །

གསུམ་པ། གདོང་ཐོག་གི་<<དབྱིན་བོད་ཤན་སྦྱར་གྱི་ཚིག་མཛོད་སྣང་བ་གསར་པ།>> ་ཞེས་པའི་ནང་དུ། མནར་གཅོད་ཀྱི་འཁྲུག་བདེ། ཞེས་བསྒྱུར་འདུག །

བཞི་བ། <> : n .1 a from of sexual perversion characterized by the enjoyment of inflicting pain or suffering on others . 2. The enjoyment of cruelty to other .ཞེས་བཀོད་འདུག །

དབྱིན་ཇིའི་ཚིག་མཛོད་ལ་གཞི་བཞག་ན། བོད་ཡིག་གི་མཛོད་ཁག་ཏུ་”sadism ” ཟེར་བའི་ཐ་སྙད་འདིའི་གོ་བ་དང་བོ་དེ་མ་གཏོགས་བསྒྱུར་མི་འདུག ། ཡིན་ན་ཡང་། ང་རང་ལ་དགོས་པ་ནི་གོ་བ་གཉིས་པ་སྟེ། གཞན་གྱི་སྡུག་བསྔལ་མཐོང་དུས། རང་སེམས་དགའ་བའི་དོན་དེ་ཡིན་པས། ང་རང་གིས་བསྔོགས་པའི་རང་རེའི་ཚིག་མཛོད་ཁག་ཏུ་དེ་འབྲེལ་གྱི་ཐ་སྙད་བསྒྱུར་ཡོད་པ་གང་ཡང་གསལ་ཁ་མ་བྱུང་།

དེ་ནས། ཁ་དཔེ་ལ། མི་ཤེས་ན་མྱི་ལ་དྲིས། མི་རིག་ན་སྒང་ང་བུད། ཟེར་བ་ལྟར། ཉམས་མྱོང་ཅན་གྱི་རྒན་པ་དང་། རིག་རྩལ་ཅན་གྱི་གཞོན་པ་རྣམས་ཀྱི་རྣ་རྩར་ཡང་བཞག་སྟེ། སེམས་ལ་འཛིན་རྒྱུའི་ལན་ཞིག་ཡོང་བར་སྒུག་ནས་བསྡད། ད་རུང་། ཁྱོས་མི་ཟ་ན། ངས་མི་འཐུང་། ཟེར་བའི་རོགས་གའི་ནང་ལ་ཡང་། དྲིས་དྲིས་ནས་སུན་རག་དང་། བཤད་བཤད་དེ་རྣ་ལ་གཤགས་རག་ཏུ་གླེང་གླེང་ཡང་། དེ་ལ་འཕྲོད་ཅིང་འབྱོར་བའི་ཐ་སྙད་ཅིག་མ་རེག།

དེ་ནས། ཆད་པ་དང་ཉོབ་བ། སུན་པ་དང་སྐྱོ་བ་བཅས་ཀྱིས་མུ་ནས་དེ་ཡི་ཐད་ལ་མ་ཁ་སོ་བཏབས་ཀྱིས་ཨུ་ཚུགས་ཀྱང་མ་བྱས་པར། ཕྱུག་ཟོག་རི་རྒྱག་བྱེད་པ་ལྟར། རེ་ཞིག་(sadism)་ཟེར་བའི་ཐ་སྙད་དེ་ལོགས་སུ་བཞག་སྟེ། མཐོང་ན་ཡང་། མ་རིག་ཁུལ་བྱས་ནས་ཚིག་འབྲུ་རྗེས་མ་དག་བསྒྱུར་བའི་ཕྱོགས་ལ་བརྟུན་པ་སྤྱད་ཡིན།

མཚམས་ཤིག་གི་ཞུ་དག་གི་སྐབས་སུ། སླར་ཡང་ཐ་སྙད་དེ་དང་འཕྲད་བྱུང་། སྐབས་དེར་ངས་བསམ་བློ་བཞི་གསུམ་བཅུ་གཉིས་བཏང་ཏེ། (sadism)་ཟེར་བའི་ཐ་སྙད་འདི་(བསམ་ནག་པ་) ་ཞེས་བསྒྱུར་བ་ཡིན། འོན་ཏེ། ད་རུང་། དེ་ཡིས་འདོད་བློ་ཁེངས་པ་དང་། མ་ཡིག་གི་གོ་བ་རྣལ་མ་ཞིག་ཡོང་མེད་པ་ཡང་ཚོར་ཚོར་བྱུང་མོད། ངས་དེ་ལྟར་མི་བསྐྱུར་རང་བསྐྱུར་དུ་གྱུར། རྒྱུ་མཚན། ངས་རང་ཉིད་ཀྱི་གློ་སྙིང་བྲང་གསུམ་ནས་བསློགས་བསློགས་ནས་ཅིག་བུད་པ་དང་། བཙལ་བཙལ་ནས་ཅིག་རྙེད་པ་ནི། དེ་ཁོ་ནའོ།།

དེའི་རྗེས་ནས། རང་ཉིད་ཀྱི་ཡིག་བསྒྱུར་ལས་གཞི་ཆུང་ཆུང་འདི་རང་ངོས་ནས་རགས་ཟིན་ཞིག་བསྒྱུར་གྲུབ་ཏེ། ཞུ་དག་བྱེད་པའི་གོ་རིམ་དུ་བསླེབས། ཞུ་དག་བྱེད་མཁན་མི་གསུམ་ལ་རེ་བ་ཞུས་ཡིན། མཐའ་མ་དེ། <<མེ་ཏོག་ཕྲེང་རྒྱུད།>> ་གྱི་སྒྱུར་བ་བོ་ཟླ་བ་གཞོན་ནུའམ། རྡོ་རྗེ་སྐྱབས་ཡིན།

ཁ་ཉིན། ཁོས་ངང་མོའི་འགྲོས་ལྟར་ཡིག་འབྲུ་རེ་རེར་ཞུ་དག་བྱས་ཟིན་པ་རྣམས་ངའི་ལག་ཏུ་སོན་བྱུང་། སྐབས་དེར། ཁོས་ང་ལ་(sadism)ཟེར་བའི་ཐ་སྙད་འདིའི་སྐོར་གླེང་བྱུང་། ད་ནི། སླར་ཡང་ང་རང་ཐ་སྙད་དེ་འཕྲད་བྱུང་། ཡིན་ན་ཡང་། ཐེངས་འདིར་སེམས་ལ་འཛིན་རྒྱུའི་ཚིག་ཅིག་དང་། རུམ་མ་འཛིན་རྒྱུའི་བྲོ་ཞིག་ཡོད་པའི་སྣང་བ་ཡིས་དགའ་ལྷང་ལྷང་གིས་སེམས་རྩར་སྐྱིད་པའི་དྲོད་ཅིག་འཁྱིལ་སོང་།

ཁོས་འདི་ལྟར་ཟེར། (sadism)་ཟེར་བ་འདི་ཕལ་ཆེར་”སྙིང་ཚིམ།”ཞེས་པ་དེ་ཡིན་པ་འདྲ། སྙིང་ཚིམ་ཟེར་བའི་ཐ་སྙད་འདི་<<མི་ལ་རས་པའི་པའི་རྣམ་ཐར།>> ་ན་ཡོད་རབ་བཤད་བྱུང་། དེ་ནས། ང་རང་གིས་མྱུར་དུ་དཔེ་མཛོད་དུ་སོང་ནས། མི་ལ་རས་པའི་རྣམ་ཐར་དུ་བལྟས་ཡིན། ཏག་ཏག་ཁོས་བཤད་པ་བཞིན། སྙིང་ཚིམ་ཞེས་པའི་ཐ་སྙད་འདི་ཐེངས་མ་ཁ་ཤས་ལ་མཐོང་སོང་། དོན་ཡང་། སྐབས་བབ་ཀྱི་(sadism) ཟེར་བ་དང་ཐག་ཉེ་ཞིང་། འབྱོར་མོ་འབྱོར་མོ། འཕྲོད་པོ་འཕྲོད་པོ་ཞིག་རེད་འདུག།

དེ་ཡང་མི་ལའི་རྣམ་ཐར་ལས། ཐོས་པ་དགའ་ཡིས་མཐུ་བརྒྱབས་ཏེ། ཨ་ཁུ་དང་ཨ་ནེའི་ཁྱིམ་གཏིབས་ནས་མི་རྟ་སོ་ལྔ་ཤི་བ་གྲགས་རྗེས། ཡུམ་མྱང་ཚ་དཀར་རྒྱན་གྱིས་འདི་ལྟར་བཤད་ཡོད་དེ། ༼དང་པོ་ཨ་ཁུ་དང་ཨ་ནེ་གཉིས་ན་རེ་མ་སྨད་ཚོ་མང་ན་དམག་དྲོངས། ཉུང་ན་མཐུ་ཐོངས་ཟེར་བྱས་སོ། ། ད་ཉུང་བའི་མཐུ་བཏང་བས་མང་བའི་དམག་ལས་ལྷག་པ་ཞིག་བྱུང་ངོ། ། སྟེང་གི་མི་ལ་ལྟོས། འོག་གི་ཕྱུག་ལ་ལྟོས། བར་གྱི་ནོར་ལ་ལྟོས། ལར་མ་ཤི་ཚེ་རིང་ཙ་ན། བུས་བསྟན་པའི་ལྟད་མོ་འདི་འདྲ་མཐོང་བའི་དུས་བྱུང་བ་ཡིན། ང་མྱང་ཚ་དཀར་རྒྱན་ལ་ད་ལན་ལས་ཉམས་དགའ་བ་ཨེ་འོང་ལྟོས་དང་ཟེར། “སྙིང་ཚིམ”་དང་གཤགས་བདར་བ་ཁྱིམ་དུ་མ་ཚུད་པ་ཀུན་གྱིས་ཐོས།༽

སྐབས་དོན་གྱི་སྙིང་ཚིམ་གྱི་གོ་བ་ཡང་། གཞན་གྱི་སྡུག་བསྔལ་མཐོང་ཏེ། རང་སེམས་དགའ་བ་དང་སྐྱིད་པའི་ཉམས་དང་རྣམ་འགྱུར་ཞིག་ལ་གོ་བ་གསལ་བོར་མངོན། གཞན་ཏུ་ན། འདི་ལྟར་ཡང་གོ་སྟེ། ཤ་འཁོན་དང་སྙིང་ནད་དྭངས་པའམ། སངས་པའི་ཉམས་ལ་ཡང་གོ་ཆོག་སྙམ། དྲིལ་ན། སྐབས་དོན་གྱི་སྙིང་ཚིམ་ཞེས་པ་ནི་དབྱིན་ཇིའི་(sadism) ་ཟེར་བའི་སྐབས་དོན་དང་ཤིན་ཏུ་ཉེ་བར་འདོད་དོ།

དེ་ནས། ང་རང་གིས་སྙིང་ཚིམ་ཟེར་བའི་ཐ་སྙད་འདི་<<དག་ཡིག་གསར་སྒྲིག>> ་ཏུ་བཙལ་ཡིན། ཡིན་ན་ཡང། དེ་དག་ཡིག་གསར་སྒྲིག་ན་མི་འདུག ། དེ་ནས། ཁ་པར་སྒང་ན་ཡོད་པའི་ཚིག་མཛོད་གཞན་ཞིག་གི་ནང་དུ་བཙལ་ཡིན། དེ་ཡི་<< ཚིག་མཛོད་ཆེན་མོ་>> ཞེས་པའི་ནང་ན། ད་གཟོད་སྙིང་ཚིམ་ཞེས་པའི་ཐ་སྙད་འདིར་མཆན་འགྲེལ་བྱས་འདུག། དེ་ཡང་། སྙིང་ཚིམ་དང་སྙིང་ཚིམ་འདེབས་པ། སྙིང་ཚིམ་བགྲངས་པ། སྙིང་ཚིམ་བདར་བ། སྙིང་ཚིམ་རྒྱག་པ་ཞེས་པའི་ཐ་སྙད་འདི་དག་མིག་སྔུན་དུ་ལྷིང་ངེར་ཐོན་སོང་།

ཚིག་མཛོད་དེ་ན། “སྙིང་ཚིམ”ཁོ་ན་ཡི་མཆན་འགྲེལ་ནི། ཡིད་དགའ་བ་དང་འདོད་པ་གང་བའི་དོན། ཞེས་བཀོད་ཡོད་ཅིང་། སྙིང་ཚིམ་འདེབས་པ། སྙིང་ཚིམ་བགྲངས་པ། སྙིང་ཚིམ་བདར་བ། སྙིང་ཚིམ་རྒྱག་པའི་མཆན་འགྲེལ་དེ་ནི། གཞན་ལ་སྡུག་བསྔལ་བྱུང་བ་ལ་དགའ་བའི་ཚིག་བརྗོད་པ། ཞེས་བཀོད་འདུག་པས། དབྱིན་ཇི་ཡི་(sadism) ་ཟེར་བའི་ཐ་སྙད་འདིའི་སྐབས་དོན་དང་འཕྲོད་ཅིང་འབྱོར་མོ་འབྱོར་མོ་ཞིག་རེད་འདུག །

མི་ལའི་རྣམ་ཐར་ན། སྙིང་ཚིམ་གྱི་གོ་བ་ནི། ཚིག་མཛོད་དེ་ལྟར་གྱི། ཡིད་དགའ་བ་དང་འདོད་པ་གང་བའི་དོན་ནི་གཞར་ཡང་མི་གདའ་ཞིང་། ཕྱི་མའི་སྙིང་ཚིམ་འདེབས་པ་ལ་སོགས་ཀྱི་གོ་དོན་དང་ཡོངས་སུ་ཆ་འདྲ་བས། ང་རང་གིས་(sadism)་ཟེར་བའི་དབྱིན་ཇིའི་ཐ་སྙད་འདི་བོད་དུ་”སྙིང་ཚིམ་” ཞེས་བསྒྱུར་བ་ཡིན།

མཐར། ལོ་ངོ་གསུམ་གྱི་རིང་ལ་ས་སློག་རྡོ་སློག་བྱས་ནས་བཙལ་བའི་དབྱིན་ཇིའི་(sadism) ་ཟེར་བའི་སྐད་དོད་དེ། “སྙིང་ཚིམ”་ཞེས་པའི་ཐ་སྙད་འདི་དེ་ལྟར་ང་ལ་རེག་བྱུང་། འདི་ནི་ཡིག་སྒྱུར་བས་དབྱར་རྩ་དགུན་འབུ་བཙལ་བཙལ་ལྟར། ཐ་སྙད་འཚོལ་བའི་གོ་རིམ་ཞིག་རེད། །

25/01/2014