བྱ་མདོ་སྐལ་རྒྱམ།
དེ་སྔོན་བདག་གིས་དཔེ་བཀླགས་ཟིན་ཐོ་ཞིག་ངོ་དེབ་ཏུ་བཀོད་པ་དེར་དཔྱོད་ལྡན་འགའ་རེས་དང་གླེང་མོལ་བྱུང་སྐབས་སླར་ཡང་གོ་བ་མི་འདྲ་བ་རེ་བསྐྱེད་པས་དེ་རིང་བསྐྱར་ཏུ་བསམ་བློ་གཏོང་དགོས་བྱུང་། དེ་ཡང་ཡོངས་འཛིན་གླིང་རིན་པོ་ཆེའི་རྣམ་ཐར་དུ། ཅོ་ནེ་བླ་མ་རྒྱ་མཚོ་སྤྲིན་གྱིས་པྲ་ཏིའི་སུམ་རྟགས་ཀྱི་ཁྲིད་གསུངས་སྐབས། བསམ་གཏན་དང་བོ་ན་ཐམས་ཅད།།ཅེས་པའི་ན་སྒྲ་དེ་ཉིད་ཡིན་པར་གསུངས་ཤིང་། འབྲས་སྤུངས་ཁྲི་ཆེན་མཆོག་གི་སུམ་རྟགས་དཀའ་གནད་ལས་ཀྱང་།།བསམ་གཏན་དང་བོ་ན་ཐམས་ཅད།།མི་ལྕོགས་མེད་ན་དགའ་མ་གཏོགས།།གཉིས་པ་ན་ནི་རྟོག་མ་གཏོགས།།གཉིས་ན་དེ་གཉིས་མ་གཏོགས་པ།། ཞེས་པའི་ན་སྒྲ་རྣམས་ནི་གཞུང་ཆེན་མོ་ནས་བྱུང་བའི་དེ་ཉིད་ཀྱི་ཕྲད་ཡིན་པར་གསུངས།
འདི་ལ་སྔོན་གྱི་འགྲེལ་མཛད་རྣམས་ཀྱང་མི་མཐུན་པར་སི་ཏུ་པཎ་ཆེན་ནི་སྨྲ་སྒོའི་རྗེས་སུ་འབྲངས་ནས་ན་ལ་གཉིས་དེ་ཉིད་ལ་མི་འཇུག་པར་བཤད་ཀྱང་། ཕྱིས་ཀྱི་འགྲེལ་བ་མང་བོར་དཔེར་བརྗོད་དང་བཅས་བཀོད་དེ་ན་ལ་གཉིས་དེ་ཉིད་ལ་འཇུག་པར་བཤད་པ་ནི་རྩ་བ་རང་གི་དགོངས་པ་ཡིན་ལ། འོ་ན་གོང་གི་མཛོད་རྩའི་ན་སྒྲ་དེ་རྣམས་དེ་ཉིད་ཡིན་ནམ་ཞེ་ན། རྣམ་འགྲེལ་ལས། བརྡ་ཡི་བྱེ་བྲག་རྟོགས་པ་པོའི།།འདོད་པའི་རྗེས་སུ་བྱེད་པའི་གཞི།། ཞེས་པ་ལྟར་རྗོད་བྱེད་ཀྱི་སྒྲ་རྣམས་དངོས་དབང་གིས་འཇུག་པ་མིན་པར་སྨྲ་བ་བོའི་བརྗོད་ཀྱི་དབང་གིས་དོན་དེ་དང་དེ་སྟོན་པར་གསུངས་པ་ལྟར། སྐབས་འགར་ཕྱོགས་གཉིས་ཀར་ཡང་གོ་བ་བླངས་ཆོག་པའི་གཞུང་གི་དོན་ནི་དུ་མ་ཞིག་ཡོད་ལ།
མཁས་པ་སོ་སོའི་རྣམ་དཔྱོད་ཀྱི་འཆར་སྒོ་མ་འདྲ་བའི་དབང་གིས་ཕྱོགས་སོ་སོར་བཀྲལ་ནས་འཐད་སྒྲུབ་ཀྱི་རིགས་ལམ་སྤྲོ་བ་ནི་རྒྱ་བོད་ཀྱི་མཁས་པ་རྣམས་ལ་སྔོན་ནས་དར་བའི་སྲོལ་དུ་ངེས་ཤིང་། མཛོད་རྩ་བར། བསམ་གཏན་དག་ནི་རྣམ་གཉིས་་་་་།། ཞེས་པའི་སྐབས་སུ་བསམ་གཏན་ལ་རྒྱུ་སྙོམས་འཇུག་དང་འབྲས་བུ་སྐྱེས་བའི་བསམ་གཏན་གཉིས་ཡོད་པས། དང་བོ་ནི་གཙོ་བོ་ཏིང་ངེ་འཛིན་གྱི་རང་བཞིན་ཡིན་ལ། གཉིས་པ་ནི། བསམ་གཏན་ས་ནི་གསུམ་པ་ཡིན།། བཞི་བ་ས་ནི་བརྒྱད་པ་ཡིན།། ཞེས་གཟུགས་ཁམས་གནས་རིགས་བཅུ་བདུན་གྱིས་ཕྱེས་པའི་གནས་ལ་བཤད་པ་ཡིན་པས།
ཕྱི་མ་འདི་ལྟར་ན། བསམ་གཏན་དང་བོའི་གནས་ན་བྱང་ཆུབ་ཡན་ལག་དུ་ཡོད་ཅེས་དྲི་བའི་མཚམས་སྦྱར་ནས།དེའི་ལན་སྟོན་པ་ལ། བསམ་གཏན་དང་བོ་ན་སོ་བདུན་པོ་ཐམས་ཅད་ཡོད་དོ།།ཞེས་སྦྱར་རྒྱུ་ཡིན་པས་རྣམ་དབྱེ་བདུན་པ་གནས་གཞི་ལས་འོས་མེད་ལ།
དཔེ་མཚོན་གཞན་ཡང་། འདོད་དང་བསམ་གཏན་དང་བོ་ན།།གཡོ་སྒྱུ་་།། ཞེས་དང་། རྨུགས་རྒོད་རྒྱགས་པ་ཁམས་གསུམ་ན།། ཞེས་སོགས་ཀྱི་ན་ཡིག་ཀྱང་གནས་གཞི་ཁོ་ན་ཡིན་ནོ།། འོན་ཀྱང་འདི་སྔ་མ་དང་མི་འདྲ་ས་ནི། འདི་ནི་ཁམས་དེ་དང་དེའི་སས་བསྡུས་སུ་གྱུར་པ་ཡོད་མེད་ལ་བཤད་ཅིང་། སྔ་མ་ནི་བསམ་གཏན་དང་བོའི་ངོ་བོར་གྱུར་བའི་བྱང་ཕྱོགས་སོ་བདུན་ཡོད་པ་ལའང་གོ་ཆོག་པས་དེ་ཉིད་དུ་གོ་བ་ལེན་རུང་ཙམ་ཡོད་མོད། གཞུང་ཆེན་མོ་ལ་སྦྱངས་མ་མྱོང་བ་ཞིག་ཡིན་ན་དེ་ཉིད་དུ་འགྲོ་ཚུལ་བློ་ངོར་འཆར་དཀའ་བའི་ཚོད་ཡིན།
ཁང་ཐོག་ཏུ་རྩྭ་སྐྱེས་ཞེས་པའི་སྐྱེས་བྱ་ཚིག་ཡིན་ཡང་ཉན་པ་པོས་ཡོད་པ་ཙམ་གོ་བས་གནས་གཞི་ཡིན་པར་གསུངས་པ་ལྟར། ཐ་སྙད་རྒྱུགས་ཆེ་ཆུང་གི་དབང་གིས་ཁོ་བོས་གོང་གི་ན་སྒྲ་དེ་དག་ཀྱང་གནས་གཞིར་ཁས་ལེན་ནོ།།
མཁས་པའི་དབང་པོ་ཨ་ཁུ་དམུ་དགེ་ཚང་གིས་ཀྱང་དེ་ཉིད་སྐོར་དཔེ་ཁྲིད་གནང་སྐབས་དཔེར་བརྗོད་འདི་ལས་ན་ཡིག བསམ་གཏན་དང་བོ་ན་ཐམས་ཅད།།མི་ལྕོགས་མེད་ན་དགའ་མ་གཏོགས།། ན་དེ་དེ་ཉིད་ཡིན་པར་གཞུང་ཆེན་པོའི་དགོངས་པ་ལེན་སྟངས་དང་པྲ་ཏི་དགེ་བཤེས་ཁོང་ནི་གཞུང་ཆེན་མོའི་སྦྱངས་པ་མཐོན་པོར་སླེབས་པའི་མཁས་པ་ཞིག་ཡིན་རབས་སོགས་གསུངས་པ་རྣ་བར་གཤགས་འདུག
འོ་ན་ཁྱོད་ཀྱིས་ན་ལ་གཉིས་མཐའ་གཅིག་ཏུ་དེ་ཉིད་ཀྱི་དོན་ལ་མི་འཇུག་པར་འདོད་པ་ཡིན་ནམ། དགའ་སྐྱིད་ལ་རོལ་བ་དང་བདེ་འཚམ་ངང་ན་རྒྱུ་བའི་ན་ལ་དག་ཀྱང་དེ་ཉིད་དུ་མི་འདོད་དམ། མི་འདོད་ན་མི་འདོད་པའི་རྒྱུ་མཚན་གོ་དོན་དང་སྦྱར་ནས་ཤོད།
ངས་ན་ཡིག་དེ་ཉིད་ལ་མི་འཇུག་ཟེར་གི་མེད། གོང་དུ་བཀོད་པའི་དཔེར་བརྗོད་དེ་དག་ཐ་སྙད་གཙོ་རྒྱུགས་ཀྱི་དབང་དུ་བྱས་ན་དེ་ཉིད་ལས་གནས་གཞིར་ཉེ་ཟེར་བ་ཡིན། ཞིབ་ཏུ་ཀློགས།
ན་ནི་གར་དང་སྣན་པའི་སྒྔ་་།
ཧ་ཧ་དུས་ཚོདའཕྲོ་ལྷག་མི་གཏོང་ངོ་།།
རྒྱུ་སྙོམས་འཇུག་གི་བསམ་གཏན་ནི་གཙོ་བོ་ཏིང་ངེ་འཛིན་གྱི་རང་བཞིན་ཡིན། ཞེས་པའི་སྐབས་ གཙོ་བོ་ཞེས་པའི་ཚིག་སྦྱར་བའི་དགོས་པ་གང་ཡོད། བསམ་གཏན་ཐམས་ཅད་ཏིང་ངེ་འཛིན་གྱི་རང་བཞིན་ཡིན་ཟེར་ན་དོན་ལེགས་པར་རྟོགས་ཐུབ་ཀྱི་འདུག ལན་ཞིག་གསུང་གནང་བར་ཞུ