ཨ དོན་ཉིས་བསྒྱུར།
སྙན་ངག་འདི་ངའི་སྤུན་གྲོགས་སལ་མེན་ལཱ་ཁ་བཱལ་ངེད་གཉིས་( Guantanamo Bay) དམག་སྒར་བཙོན་ཁང་ནས་ཕན་ཚུན་ངོ་ཐུག་ཏུ་མ་བཅུག་པར་རྒྱུན་རིང་བོར་བཙོན་བཀག་བྱས་རྗེས་བྲིས་པ་ཡིན། ཨ་རིས་ང་ཅག་ཡུན་རིང་ལ་ཁ་བྲལ་བཏང་བས། ཟླ་བ་བཞིའི་རྗེས་སུ་ཁོང་གིས་སྤུན་ཟླ་རྣམས་ལ་འཚམས་འདྲིའི་ངག་འཕྲིན་ཞིག་བཏང་འདུག ཁོ་ན་རེ། “དཀོན་མཆོག་གིས་ཁྱེད་ལ་ཞི་བདེ་དང་བྱིན་རླབས་གནང་བར་སྨོན། ངས་ཁྱེད་རང་ཧ་ཅང་དྲན་པས་བདག་གིས་ཁྱེད་ལ་སྙན་ངག་ཅིག་འབྲི་རྩིས་ཡོད།” ཅེས་བཤད་འདུག ཁོ་སྙན་ངག་པ་མིན་བཞིན་དུ་ང་ལ་སྙན་ངག་འབྲི་དོན་ཅི་ཡིན་ནམ། ང་རེ་ཞིག་མཚར་ཞིང་རྨོངས་པར་གྱུར། འོ་ན་ང་ལ་སྙན་ངག་པ་ཞིག་གི་ཆོ་ལོ་ཙམ་ཡོད་བཞིན་དུ་ཁོ་ལ་སྙན་ངག་མི་འབྲི་དོན་ཅི་ཡིན་བསམས་ནས་ངའི་སེམས་པ་གནོང་འགྱོད་ཀྱིས་བརྟས།
ངས་ཁོ་ལ་སྙན་ངག་མ་བྲིས་སྔོན་དུ་ཁོས་ང་ལ་སྙན་ངག་བྲིས་ནས་བསྐུར་ན། དུས་ཀྱི་མཐམ་མ་མ་བསླེབ་དབར་དུ་གཞན་པས་ང་ལ་འཕྱ་སྨོད་བྱེད་འོང་དྲན་ནས་ངས་སྙན་ངག་འབྲི་འགོ་བརྩམས། འོན་ཀྱང་ངས་སྙན་ངག་འབྲི་བར་རིག་པ་རྣལ་ཐུབ་མ་ནུས། དེ་ནས་སྙན་ངག་འབྲི་རྒྱུ་བསྐྱུར་ནས་ཆོས་ཀྱི་བསྟན་བཅོས་ལ་འདང་བརྒྱབ་པ་ཡིན། དེ་ལའང་རིག་པ་རྣལ་ཐུབ་མ་སོང་། གང་ལ་ཞེ་ན། སྙན་ངག་གིས་ངའི་དྲན་ཤེས་ལ་བཙན་འཛུལ་བྱས་འོང་གི་འདུག དེ་བས་ངས་དུས་ཀྱི་འགྲོ་འོང་ལ་ཁ་ཡ་མ་བྱས་པར་དེ་གང་འདོད་དུ་འགྲོ་རུ་བཅུག་པ་ཡིན། བར་མཚམས་ཤིག་ནས་ང་ལ་སྙན་ངག་འབྲི་བའི་སྤོབས་པ་རྒྱས་བྱུང་།
བདག་གི་སེམས་པ་མཚར་འདོད་རྨ་ཁས་ཁྱབ། །
ད་ནི་སྙན་ངག་ཡོམ་ཡོམ་འགུལ་བྱུང་སྟེ། །
བདག་གི་ཕུ་ཐུང་སྒུལ་ཅིང་ལག་པ་འཐེན། །
དུས་ཀྱི་འགྲོས་ནི་ཕར་ལ་བཞུད་ཅིང་འགྲོ །
ཆུ་ཚོད་འཁོར་ལོའི་ལག་པས་བསླུ་བྲིད་གཏོང་། །
ཡིད་འོང་དུས་ཀྱི་ཆ་ལ་ཚད་བཀག་ཐེབས། །
ཁྱེད་ཀྱི་ཡུལ་ནས་ཐོན་པའི་སྙན་ངག་པར། །
སྐྱོན་དང་འཁང་ར་མ་འཛུགས་ག་ལེར་བཞུགས། །
སེམས་ལ་སྤོབས་པ་སྟེར་བའི་སྙན་ངག་འབྲི། །
མིང་གྲགས་མི་དགོས་བདག་གི་སྤུན་ཟླ་ཀྱེ། །
བདག་གིས་ཁྱེད་ལ་འཚམས་འདྲིའི་ལེགས་སྐྱེས་སྤྲིངས། །
ཆར་བ་དྲག་ཏུ་བརྒྱབ་པའི་རྒྱུན་ཡང་བསྐུར། །
ཁྱེད་ཀྱི་བཀྲེས་སྐོམ་སེལ་བའི་སྨན་མཆོག་ཏུ། །
བདག་གིས་བཀའ་དྲིན་བསམ་ཤེས་ཁྱེད་ལ་བསྐུར། །
བདག་གི་སྙན་ངག་འདི་ཡིས་ཁྱེད་ཀྱི་སེམས། །
གསོ་ཞིང་ཁུར་བོ་ཡང་དུ་གཏོང་བར་ཐུབ། །
ཁྱེད་ཀྱིས་རང་ལ་འཁང་ར་བྱེད་པའི་དུས། །
བདག་གི་སྙན་ངག་ཁྱེད་ཀྱི་སེམས་གསོ་ཡིན། །
བདག་གི་བསམ་པའི་ནང་ན་སྡང་བ་ཆུང་། །
ཁྱེད་ལ་རང་དབང་ཐོབ་ན་བདག་སེམས་བྲོད། །
བདག་ནི་ཁྱེད་ལ་བཅར་ཞིང་འཁྱུད་པར་བྱ། །
བདག་གི་སྙིང་ནས་བརྩེ་བའི་སྤུན་ཟླ་ལགས། །
གནས་འདིར་ཞི་ཁྲོ་གང་ཡང་ཡོད་མ་ཡིན། །
བདག་གིས་ལྷག་བསམ་དག་པའི་བསླབ་བྱ་རྒྱག །
མི་སྲིད་མི་འབྱུང་གང་དེའི་མདུན་ལ་ཞུ། །
ཁྱེད་ཀྱི་སེམས་འདུན་ཡོད་ཚད་མི་འགྲུབ་ཀྱང་། །
སྣ་རེ་འགྲུབ་ལ་སྣ་རེ་འགྲུབ་ལེ་མིན། །
མི་ཡིས་ཅི་བཤད་ཐམས་ཅད་བརྗེད་བྱས་ཏེ། །
རང་ཉིད་སུ་ཡིན་དེ་ལ་མགུ་བར་གྱིས། །
བྱོལ་སོང་རུས་གོག་ཅན་དེས་ཤའི་ཕྱོགས་སུ། །
ཁྱེད་རང་འཁྲིད་པས་བཟོད་སེམས་རྟེན་པར་བྱ། །
གཞན་ལ་ཤོང་ཡངས་བྱེད་དགོས་སྤུན་ཟླ་ལགས། །
འདོད་རྔམ་ཆེ་བའི་སེམས་ཉིད་རྒྱབ་ཏུ་སྤོངས། །
ཁྱེད་ཀྱི་སྤུན་ཟླ་སེམས་ལ་ཕོག་སོང་ན། །
ཁོ་བོའི་མཛངས་སྤྱོད་ཡིད་ལ་དྲན་པར་གྱིས། །
དེ་ནས་ཁྱེད་ཀྱི་གདུང་སེམས་ཞི་བར་འགྱུར། །
ཁྱེད་ཀྱི་སེམས་སྐྱོ་ལུང་པའི་ཕུ་ལ་སྦས། །
དེ་ཡིས་ཞི་ཞིང་གློད་དུ་གཏོང་འགྱུར་ན། །
རང་སེམས་བཙོན་མ་ཇི་བཞིན་སྡོམ་པར་བྱ། །
དེ་ལྟ་མིན་ན་ཁྱེད་ལ་དྲན་གདུང་འཕོག །
རང་གཉིས་བྲལ་ནས་རིང་པོ་འགྲོ་དགོས་ཀྱང་། །
ངས་ཁྱོད་བརྗེད་སྲོལ་མེད་པ་ཡིད་ལ་ཆོངས། །
འུ་གཉིས་སེམས་སུ་ཅི་ཞིག་སྦས་པ་དེས། །
བདག་གི་སྐད་ཆར་བྲེལ་འཚུབ་ཡང་ཡང་བསླངས། །
ཁྱེད་ནི་ཡིད་དུ་འོང་ཞིང་འཚར་ལོངས་ཡག །
བདག་ལ་ཁྱེད་བཞིན་བྱེས་གྲོགས་མང་པོ་ཡོད། །
བདག་གིས་ཁྱེད་ཀྱི་གཟི་བརྗིད་བརླག་མི་བྱ། །
ཁྱེད་ཀྱི་མཚན་མོ་རྟག་ཏུ་བདེ་བར་སྨོན། །
ཁྱེད་ཀྱི་བོར་སྟོར་དེ་ལ་ལྷ་ཆེན་གྱིས། །
གུན་གསབ་སྟོང་འཇལ་རྒྱག་ལ་ག་ལེར་བལྟ། །
བྱམས་དང་སྙིང་རྗེའི་བདག་པོ་གང་ཉིད་ཀྱིས། །
ཁྱེད་ཀྱི་ལམ་ཆེན་ལྷ་ཡིས་བཟོ་བྱས་ཏེ། །
ཁྱེད་རང་ཞི་བདེའི་ལམ་ལ་འཇུག་པར་ཞུ། །
བདག་གིས་སྙན་ངག་མཇུག་བྱང་འདི་ལྟར་འབྲི། །
ལྷ་ཡིས་བསྐོས་པའི་ཕོ་ཉ་ཨཱ་ཝེམ་བརྒྱུད། །
གསོལ་འདེབས་ཐལ་སྦྱར་ཀློང་ནས་བྱིན་རླབས་ཞུ། །
ཨ དོན་ཉིས་དམག་སྒར་བཙོན་ཁང་གི་སྙན་ངག་(Poems from Guantanamo) ཅེས་པའི་དེབ་གཅིག་ལས་བསྒྱུར།
ཚིག་བརྗོད་ལེགས་པར་མངོན་བསྟོད།
་
ཆོ་ལོ། ཟེར་ན། ལ་དྭགས་པའི་སྐད་དུ། ཤོ་ལ་ཟེར།
་
ཆོ་ལོ་རྩེ་ན་འཆོལ་བ་ཡིན། རྟགས་རྩེ་ན་དཔའ་བོ་ཡིན།
ང་ལོ་ཆུང་སྐབས་ཆོ་ལོ། ཤོ་རྒྱབ་པར་དགའ་བ་ཆེ།
་
འདང་བརྒྱབ་པ་ཡི།་ཞེས་པའི་དོན་ཅི་ཡིན། དོན་དག་ལབ་ཨེ་ཐུབ།