བསེ་རུ།
ཁྱེད་རང་ཕེབས་ཤིག་ཕེབས་ཤིག།
ལ་མོའི་རྒྱབ་ལ་ཕེབས་ཤིག།
ང་རང་ཐང་ཆེན་ཡངས་པོར།།
ཟླ་བར་བསྒུགས་ནས་བསྡད་ཆོག།
ནམ་མཁའ་མཐོན་པོའི་ཉི་མ།།
འཇིག་རྟེན་ཀུན་ལ་གསལ་ཡང་།།
ང་དང་ཁྱེད་ཀྱི་གྲང་ངར།།
སེལ་བའི་ནུས་པ་མི་འདུག།
དགུང་གི་ཟླ་བ་དཀར་པོ།།
སེམས་པའི་སྐྱོ་རོགས་གཅིག་ཡིན།།
སྐར་མ་སྨིན་དྲུག་པ་སངས།།
ག་ལེ་བཞུགས་རོགས་གནང་དང་།།
ཆུ་འཛིན་གདུག་རྩུབ་ཅན་ཁྱོད།།
ངོ་ནག་ཁྲོ་གཉེར་མ་སྟོན།།
བཅོ་ལྔའི་ཟླ་བ་ལྷ་མོས།།
འཛུམ་མདངས་ང་ལ་བསྟན་བྱུང་།།
སྐར་ཚོགས་ཁྲི་མ་འབུམ་གྱིས།།
ཟླ་བར་སྐོར་བ་བརྒྱབ་འདུག།
ང་དང་ཟླ་བ་ལྷ་མོར།།
བསྟོད་སྨད་གླུ་དབྱངས་ལེན་གྱི།།
ཡ་གིའི་ནམ་མཁའ་ཡངས་པ།།
མ་གིའི་ས་གཞི་ཡངས་པ།།
ནམ་མཁའ་ས་གཞིའི་བར་ལ།།
ཀུ་མུད་སེམས་བག་ཡངས་པ།།
ཉི་མས་པདྨ་བསྐྱངས་འདུག།
ཟླ་བས་ཀུ་མུད་བསྐྱངས་བྱུང་།།
ཉི་ཟླ་བརྩེ་བ་ཅན་ལ།།
ཀུན་གྱིས་མིག་དཔེ་མཛོད་དང་།།