སྐྲན། [ སིཌི་ནིས། ]
མི་འདི་ཚོའི་རིགས་ཀྱིས་དང་པོར་སྔ་འདང་ཕྱི་འདང་མི་བྱེད་པར་ཅི་ཡང་བྱུང་རྒྱལ་དུ་སྨྲས། བར་དུ་ཨུ་ཚུགས་ཀྱི་གཡག་ཤེད་བསྐྱང་རྒྱུ་ལས་ཐབས་ཤེས་ཟད་པས། ཐ་མར་འཛུལ་སའི་ཨུ་ཁུང་མི་རྙེད་པར་མི་མདངས་ལ་རྫུན་བཤད་ཅིང་མགོ་སྐོར་གཏོང་ཐབས་བྱེད།
སྔར་ཡང་། ང་ཚོར་དེ་འདྲ་མང་པོ་བྱུང་མྱོང་ཡོད། གནད་ལ་ཐུག་ཅིང་འགྲེལ་བཤད་དང་གནས་ལུགས་ཟད་དུས། དཔེར་ན། “མདང་ནུབ། ང་བཟི་སོང་པས་” ཟེར་མཁན་དང་། ཡང་། “སྒྱུ་རྩལ་གྱི་ཁྱབ་ཁོངས་ནས་བཤད་ཀྱི་ཡོད་”ཟེར་བ་ལྟ་བུ་སོགས་སོ།། ད་ལན་ཡང་། སྤྲུལ་སྐུའི་མིང་འཛིན་ཨོ་སྟོབས་ཟེར་བ་དེས་༧གོང་ས་མཆོག་ལ་མཚད་སྨོད་ཞུས་པར། གཞུང་འབྲེལ་མི་སྣ་ཆོས་རིག་བཀའ་བློན་གྱིས་གཞུང་གི་ལས་ཤོག་བེད་སྤྱོད་ཀྱིས་ད་དུང་ཨོ་སྟོབས་འགྲིག་འདུག་མདོག་མདོག་གིས་འགྲེལ་བཤད་ཡ་མ་བརླ་ཞིག་བྱས་པ་ནི་དོན་ངོ་མར་ “གསེར་ཀོང་རྐུན་མས་བརྐུས་ན་འཛུམ་དམུལ་དམུལ། མར་མེ་རླུང་གིས་གཡོས་ན་འཛུམ་དམུལ་དམུལ།” ཟེར་བ་ལས་མ་འདས་སྟབས། ཨོ་སྟོབས་ཀྱིས་ཆོས་རིག་བཀའ་བློན་ལ་ཐུགས་རྗེ་ཆེའི་ཞུ་ཡིག་སྤེལ།
ཡང་། དེའི་རྗེས་སུ་ <ཆོས་རིག་ལས་ཁུངས་> ཞེས་པའི་ངོ་དེབ་སྟེང་དུ་ “ཕྲན་རང་ནད་དགོངས་ཐོག་ཡོད་ཀྱང་ཆོས་ཕྱོགས་དང་འབྲེལ་བའི་གནས་ཚུལ་ཚབས་ཆེན་ཞིག་གློ་བུར་ཐོན་པར་སེམས་ཀྱིས་མ་བཟོད་པར་” སོགས་དང་། ཡང་། “སྒེར་གྱི་བསམ་ཚུལ་ཡིན་པ་ལས་གཞུང་གིས་མིན་” ཟེར་བ་སོགས་གང་ཡིན་འདི་ཡིན་མེད་པར་སྨྱོ་བཤད་བཟི་བཤད་ཀྱིས་མི་དམངས་ལ་ཉམས་ཚོད་ལེན་གྱི་ཡོད་རེད། མགོ་སྐོར་གཏོང་གི་ཡོད་རེད། དེ་ཟེར་བཞག་ན་གང་དྲགས། འདི་ལབ་བཞག་ན་གང་དྲགས་བསམ་བཞིན་ཉམས་ཚོད་འདྲ་རྐྱང་རྐྱང་བླངས་བསྡད་པས་མི་མང་གཞུང་ལ་ཡི་ག་ལོག་བྱེད་དག་འདི་དང་འདི་འདྲ་ནས་བྱུང་དང་འབྱུང་གི་ཡོད་པ་མ་ཡིན་ནམ། ལག་པ་བྲང་ཁར་ཞོག་ལ་ག་ལེར་སོམས་དང་སུས་མི་ཤེས་ཨང་།
མདོར་ན། ང་ཚོ་ཉམ་ཆུང་བའི་མི་དམངས་ལ་ཡིད་ཆེས་བློས་འགེལ་བྱ་སའི་གཞུང་དེ་དགོས་ཀྱི་ཡོད་རེད། དབུས་བོད་མའི་སྒྲིག་འཛུགས་དགོས་ཀྱི་ཡོད་རེད། སྲ་བརྟན་འགྱུར་མེད་གྱི་དམངས་སེམས་ཁེན་སའི་གཞུང་དེ་འདྲ་ཞིག་དགོས་ཀྱི་ཡོད་རེད། ཡིན་ཡང་། མི་ངན་སྤྱོད་ངན་རེ་ཟུང་གིས་དམངས་དང་གཞུང་གི་དབར་ལ་དབྱེན་བྱས་ནས། ནང་ཁུལ་ཕུ་དཀྲུག་མདའ་དཀྲུག་བྱེད་ཀྱིན་པར་བོད་ཀྱི་བཀའ་ཤག་གིས་ཐུགས་འགན་ལེགས་པར་བཞེས་དགོས་པར་མ་ཟད། རྟ་ཤུལ་སྒྲོག་ཏུ་མི་འགྲོ་ཆེད་དང་། དམངས་གཞུང་ཡིད་ཆེས་མི་བརླག་ཆེད། ཀརྨ་དགེ་ལེགས་ལྟ་བུར་མི་ཐེག་པའི་ཁལ་ལ་ཨུ་ཚུགས་བྱེད་དུ་མི་འཇུག་པར་གོ་གནས་གལ་འགངས་ཆེ་བ་དེ་ལས་གནས་དབྱུང་གཏོང་འོས་ཞེས་ཞུས་པ་ལགས་སོ།།
ཚང་མས་འདི་ལ་གསན་ཨ། https://www.youtube.com/watch?v=Ti8-552Q6as