ས་དཀར་བས།
ཨོ་རྒྱན་སྟོབས་རྒྱལ་ཟེར་བའི་མི་འདི་ཉིད་སྐྱག་པ་ག་ཚོད་བསྔོག་ན་དེ་ལྟར་སྐྱག་དྲི་ཁ་བ་ནང་བཞིན་ཁོའི་བྱས་ཉེས་རེ་རེ་ནི་ས་རིས་ཐང་གསལ་ལྟར་ཡིན་པས་གླེང་རྒྱུ་ཞེ་མེར་ལངས་ཤིང་རྣམ་རྟོག་ཟ་བའི་རྒྱུ་རུ་འགྲོ་བཞིན་འདུག་པས་གླེང་འདོད་མ་བྱུང་ལ་གླེང་ཡང་རང་ཉིད་ཀྱི་མཐོང་ཡང་ཆུང་རུ་འགྲོ་བར་དོགས་ནས་འདི་ཙམ་གྱིས་ཀྱང་ཁོ་ཉིད་མི་ག་འདྲ་ཞིག་ཡིན་པ་གསལ་བསྐྲོད་ཀྱིས་སྡོམ་ཚིག་ཐེངས་གཅིག་བཀོད་ཡོད་པར་སྙམ།
ངས་གླེང་བར་བྱ་བ་ནི་ཤར་ཕྱོགས་ཁུག་རྟས་གསུང་བ་ལྟར་བདུད་སྡིག་ཏོ་ཅན་ལྷས་བྱིན་དེ་ཉིད་མ་ཡིན་པར། ༧གོང་ས་མཆོག་གི་མཚན་གནས་དང་ཆེས་འབྲེལ་བ་ཆེ་བའི་ཆོས་རིག་བཀའ་བློན་གྱི་མིང་འཛིན་པ་གཡུ་ཐོག་དེ་ཉིད་ཡིན། དེ་ཉིད་ཆོས་རིག་བཀའ་བློན་གྱི་ལས་འཁུར་ཞུ་བཞིན་པའི་ཉིན་དང་པོའི་སྐབས་སུ།ཆོས་སྐྱོང་སྲུང་མ་གཉིས་དང་མཆོག་གསུམ་དཔང་དུ་བཙུགས་ནས་དྲང་བོ་དྲང་བཞག་དང་འཛེམ་ཟོན་སྤུ་ཙམ་མེད་པའི་སྒོ་ནས་བཅའ་ཁྲིམས་རིན་པོ་ཆེ་གཙིག་ཏུ་བཀུར་ནས།ལས་དོན་འཐུས་ཤོར་མེད་པ་ཞིག་བྱེད་ངེས་ཡིན་པའི་དམ་བཅའ་དེ་དག་ལོ་ལྔ་ཚན་འདི་རིང་དུ་ཆུ་ནང་དུ་རྟུག་དྲི་བཏང་བ་བཞིན་དུ་གྱུར་སོང་བ་མིན་ནམ།
ཁྱོད་ནི་ཁྱོད་ཀྱིས་བཤད་པ་ལྟར་རླུང་རྟ་རྒུད་པའི་བར་ཆད་ཀྱིས་ཆོ་འཕྲུལ་བྱུང་བ་ལྟར་ཟེར་བ་བཞིན་གཅིག་མིན་གཉིས་མིན་མ་ཡིན་པར་ནོར་འཁྲུལ་གཅིག་འཕྲོས་གཅིག་ལ་ཤོར་ནས་མིའི་སེམས་སུ་རྨ་ཁ་ག་ཚོད་ཅིག་བཟོས་པ་ཡོད་ཚད་རླུང་རྟ་རྒུད་པའི་བར་ཆད་ལ་ཁ་གཡར་ས་ཨེ་འགྲོ་འམ།འགྲོ་བའི་དབང་དུ་བཏང་ནས་མི་མང་ལྐུགས་པ་བཟོ་འདོད་ཀྱིས་འཁྲུལ་སྣང་དེ་དག་མ་འཆང་བར་ནོར་འཁྲུལ་ཡོད་ན་ནོར་འཁྲུལ་བྱུང་བའི་དགོངས་དག་ཡིན་གཅིག་མིན་གཅིག་མི་མང་ལ་ཞུ་དགོས་ལས་རེད།
དེ་མིན་ན་བདེན་པའི་ཁུངས་དང་རིག་པས་བསྒྲུབ་དགོས་པ་རེད།དེ་ལྟར་ཡང་བསྒྲུབ་རྒྱུ་མ་བྱུང་བར་སྐུལ་ལྕགས་དེ་ཉིད་བློས་གཏོང་མི་ཐུབ་ན་དེ་དེ་བཞིན་ལྷ་དགོངས་མི་སེམས་དྭངས་ནས་ཤིག་ཅི་ནས་བྱེད་དགོས་པ་རེད་ལ་དེ་ཡང་བཟོད་གསོལ་ཞུ་དགོས་ན་རེད།ཞུ་བ་འཐེན་དགོས་ན་རེད།གང་ལྟར་གནམ་མཁའ་གཡའ་དག་ས་གཞི་རྡུལ་དག་ཟེར་བཞིན་རང་ཉིད་རང་གིས་གཙང་མ་ཞིག་བཟོ་དགོས་པ་རེད།དེ་མིན་པར་འཇགས་འགྲོ་གི་རེད་སྙམ་པའི་དགོངས་གཞི་ཞིག་ཡོད་ན་ནི་ནོར་འཁྲུལ་ཆེན་པོ་ཞིག་ཏུ་འདོད།
སྤྱིར་བཏང་ཁྱེད་ནི་མ་གཞི་ནས་སྙིང་རྗེ་སྐྱེས་ཡུལ་ཞིག་ཏུ་འདོད།ཉེ་སྔོན་ཨ་རི་གཞུང་ཚབ་ཚོགས་ཟུར་སྐུ་ངོ་སྤེན་ཚེ་མཆོག་ལ་མ་ཉེས་ཁ་གཡོག་གིས་གསར་འགོད་གསལ་བསྒྲགས་ཀྱི་བཅར་འདྲི་སྐབས་སུའང་ལྡ་བ་ལྡིབ་བེ།ལྐོག་ལྐོག་སུད་སུད་ཀྱིས་བྲོས་མ་འགྲོ་ལྟ་བུའི་སྣང་ཚུལ་འདི་དག་ལས་ཁྱོད་འདི་སྡུག་ལ་སུན་པ་མེད་ན་ཨ་ཐང་ཆད་ནས་ཤིག་མ་རེད་དམ།བདེན་པ་དང་གདེངས་སྤོབས་མེད་ན་མི་དཀར་དཀར་ལ་ཞྭ་མོ་ནག་པོ་གཡོག་རྒྱུ་དེ་འདྲའི་སླ་མོ་ཞིག་ག་ལ་ཡིན་ཨང་།དེ་ལས་ཀྱང་ཁྱེད་ལ་བསླབ་བྱ་ཐེངས་གཅིག་དང་མྱོང་ཚོར་ཞིག་རེག་ཡོད་ན་ཡང་ཁྱོད་འདིར་ཅི་ཞིག་བྱུང་བ་ཡིན་ནམ།སྐབས་དེར་ཡང་རླུང་རྟ་རྒུད་པའི་བར་ཆད་ཅིག་ཏུ་འདོད་དམ།
མི་ཞིག་ཡིན་ན་འདས་པའི་ཉམས་མྱོང་དང་ཕམ་ཁའི་ཁྲོད་ནས་བསླབ་བྱ་ཐོབ་དགོས་ངེས་ཡིན་ཀྱང་ཁྱོད་འདི་ཅི་རེད།ཐང་ཐང་མི་འདུག་ཟེར་ན་ག་ནས་འགྲིག་སྟེ་ཁྱོད་བླ་ན་མེད་པ་གོང་ན་མེད་པའི་ཆོས་རིག་བཀའ་བློན་གྱི་ཞབས་སྟེགས་དེ་ཉིད་བདག་འཛིན་གནང་མཁན་གྱི་གང་ཟག་ཅིག་རེད།ཡིན་ཡང་ལས་ཀ་ལས་ཕྱོགས་ཐམས་ཅད་ཐོབ་དང་མིིང་ལས་ལྡོག་ཕྱོགས་གནང་མཁན་གྱིས་མི་བསམ་མེད་ཀླད་སྟོང་རྒྱུ་དག་མེད་པ་ཅིག་ཏུ་འདོད།འདི་ལྟར་བརྗོད་ཚེ་གུས་མེད་ལུགས་མེད་བྱས་སོང་ཟེར་ནས་ཁ་སྤོ་ཁ་ནས་ལངས།ཞེ་སྤོབས་གཏིང་ནས་ལངས་ནས་མ་དགའ་བའི་རྣམ་འགྱུར་སྟོན་སྲིད་ཀྱང་།དེ་ནི་མགོ་ན་ན་ཆང་རང་གིས་འཐུང་ནི་རེད་ཟེར་བཞིན་ལས་སྟངས་བྱེད་སྟངས་་ནས་བཤད་མི་དགོས་པར་བཤམས་ཡོད་པ་འདི་རེད།
མི་རློམ་པར་སྙམ་ན་ཁྱེད་རང་གིས་གསལ་བསྒྲགས་དང་པོའི་དོོན་ཚན་གསུམ་ཙམ་དེར་ཞིབ་ཏུ་གཟིགས་དང་།བསམ་བློ་བཏང་གིན་བཏང་གིན་ཧ་ལས་ཤིང་ཧོན་འཐོར་དུ་བཅུག་ཏུ་མི་འཇོག་གམ།ཁྱེད་ཀྱི་ཚིག་འབྲུ་རེ་རེ་ལས་ཨོ་རྒྱན་སྟོབས་རྒྱལ་དཀར་འདོན་གྱི་རྒྱབ་དཔུང་ཞིག་ལས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ན་༧གོང་ས་མཆོག་གི་མཚན་གནས་སྲུང་སྐྱོབ་ཅེས་འཁོད་ཡོད་པ་དེ་དང་རྒྱབ་འགལ་དུ་གྱུར་མི་འདུག་གམ།ནོར་འཁྲུལ་འདི་ནི་རང་ག་བ་ཞིག་མ་ཡིན་པར་བརྟེན་བོད་མི་ཡོད་དོ་ཅོག་གིས་ག་ས་གང་ནས་མ་བཟོད་པར་སྐད་ཤོར་དགོས་ཆགས་པ་འདི་རེད།
ཁྱེད་ཀྱི་གསལ་བསྒྲགས་དེ་ནི་མེ་ལ་མེ་གྲོགས་ཀྱིས་ཚུལ་དུ་སོང་ནས་ཨོ་རྒྱན་སྟོབས་རྒྱལ་གྱི་རེ་འདོད་ལྟར་དུ་སོང་བ་དེ་ནི་ཨོ་རྒྱན་སྟོབས་རྒྱལ་ལས་ལྡབ་འགྱུར་གྱིས་ཚབས་ཆེ་བའི་ནག་ཉེས་ཤིག་ཏུ་འཁུམས་པ་མ་ཟད།བོད་མི་ཡོད་དོ་ཅོག་གི་རྨ་ཐོག་ལ་ཚ་བཏབ་པ་བཞིན་ཁྱེད་ཀྱིས་ཡོད་ཚད་ཟིང་ཟིང་དུ་བཟོས་ནས་མིག་ནང་གི་ཚེར་མ་རུ་གྱུར་སོང་བ་མིན་ནམ།
ཁྱེད་ཀྱིས་བསམ་བློ་ཐོངས་དང་ཁྱོད་གནད་ཡོད་མི་སྣ་ཞིག་རེད།དེ་ལས་ཀྱང་ཆོས་རིག་བཀའ་བློན་རེད།སྤྱིར་ན་ཁྱོད་༧གོང་ས་མཆོག་གི་གསུངས་ཀྱི་གསུངས་ཚབ་དང་ཐུགས་ཀྱི་ཐུགས་ཚབ་ཀྱི་གང་ཟག་དེ་ཉིད་ཡིན་དགོས་པ་རེད ་དེ།མ་བསམ་ས་ནས་༧གོང་ས་མཆོག་ལ་ཟུར་ཟ་དང་དམའ་འབེབས་བྱེད་མཁན་དང་ལག་པ་བཏང་ནས་དད་ལྡན་བོད་མི་དག་ལ་བརྙས་བཅོས་དང་མཐོང་ཆུང་བྱས་པ་དག་ནི་ཧ་ལས་པའི་ཚོད་དུ་འདུག་པ་དེ་རེད།
མ་གཞི་ནས་ཁྱེད་རང་ལ་དད་པ་ཡོད་མིན་དང་༧གོང་ས་མཆོག་ལ་གུས་བརྩི་ཞུས་མིན་ནི་ཁྱེད་ཀྱི་སྒེར་ངོས་ཀྱི་དོན་དག་ཅིག་ཏུ་ཡིན་པ་ལས་མཐའ་གཅིག་ཏུ་༧གོང་ས་མཆོག་ལ་གུས་བརྩི་ཞུས་དགོས་ཞེས་ནམ་ཡང་སུ་ཞིག་གིས་ཀྱང་སྨྲ་མི་སྲིད་དེ།ཡིན་ཡང་ཁྱེད་ནི་བོད་རིགས་མི་མང་གིས་མགྲིན་ཚབ་དང་༧གོང་ས་མཆོག་གིས་དགུང་ལོ་དྲུག་ནས་ཤར་ནུབ་ཀུན་ཏུ་ལག་ཟུང་ཐལ་མོ་སྦྱར་ནས་ད་བར་གཡས་སྐྱོར་གཡོན་སྐྱོར་གནང་ནས་བཙུགས་པའི་བཙན་བྱོལ་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་ཞིག་གིས་བསམ་སྦྱོར་དེ་འདྲ་ཞིག་ཡིན་ན་ནི་རེ་བ་ཞིག་འཆང་རྒྱུ་མེད་པའི་ཁར་ལས་རྒྱུ་འབྲས་དང་མཐུན་གྱིས་འདུག་གམ།སྔ་དྲོ་རྟ་ཕོ་ཆས་ཀྱི་གསོས་ན་ཕྱི་དྲོ་དྲིན་ལན་འཕྲ་ཡིས་འཇལ་ཟེར་བ་བཞིན་ཁྱེད་ཀྱི་བྱ་སྤྱོད་དེ་དག་ལ་ཡིད་ཐང་ཆད་ནས་ཤིག་རེད།
ལྷག་པར་དུ་ཁྱེད་ཀྱིས་གསལ་བསྒྲགས་སྒང་ལ་གསལ་བསྒྲགས་བཏང་ནས་མི་མང་རྨོངས་སུ་བཅུག་འདོད་ཀྱིས་སྣང་ཚུལ་དེར་ད་ནི་ཉོབ་ཏུ་བཅུག་སོང་།ཞེ་མེར་གཏིང་ནས་ལངས་སུ་བཅུག་སོང་།མཐོ་བོང་སྡོམ་ཡོད་པ་ལྟར་ཅི་བྱེད་འདི་བྱེད་མེད་པ་དང་།བཤད་པའི་སྐད་ཆ་དག་ལ་ཆ་འཇོག་སྤུ་ཙམ་མེད་པའི་ཁར་མི་མང་གི་སེམས་ཁམས་རྨང་ནས་བཅོམ་ཟིན་པས་སླར་གསོས་ཤིག་ཡོང་རེ་དཀའ་རྒྱུ་རེད།མི་ཞིག་གི་སེམས་ཁམས་ཤིག་ཚར་བའི་རྗེས་སུ་ད་ཅི་ཞིག་བཤད་ཀྱང་དཀའ་རྒྱུ་རེད་ལ་དེ་ཡདྲ་ཞིག་གིས་དགོངས་དྭངས་ཡོང་ས་མ་རེད་དོ།།
ད་ནི་ཁྱེད་ལ་ཐབས་ལམ་གཅིག་ཡོད་པ་ནི་རྩ་དགོངས་ཞུ་རྒྱུ་ལས་ལྷག་མི་འདུག་པ་འདི་རེད།ཐབས་ལམ་འདི་ལ་འགྲོ་ཐུབ་ན་རང་གཞན་ཀུན་ལ་ཕན་པའི་སྨན་མཆོག་དེ་ཉིད་རེད།དེ་ལས་ཐབས་ཤེས་གཞན་ཞིག་ལྕེ་བརྒྱ་སྤྲུལ་ནས་སྨྲས་ཀྱང་ཡོད་རེ་དཀོན།རྒྱུ་མཚན་ནི་ཁྱེད་རང་མུ་མཐུད་ནས་ཨུ་ཚུགས་བསྡད་ནས་བཞུགས་ཀྱང་མི་མང་གིས་ཡིད་ཆེས་བརླག་ཚར་སོང་བས་ཁྱེད་ཀྱིས་ཅི་བཤད་ལ་ཆ་འཇོག་དང་རིན་ཐང་མེད་དུས་ཁྱོད་ཉིད་ཁྱོད་ལ་ན་ཟུག་དང་མི་རིགས་ལས་དོན་ལ་ཡང་འཐུས་ཤོར་དུ་འགྲོ་ཉེན་ཆེ་བས།ད་ནི་རང་སེམས་རང་གིས་གཅུན་ཐུབ་ན་རྩ་དགོངས་ཞུ་རྒྱུ་དེ་ནི་ཡག་ཤོས་ཤིག་ཏུ་འདོད་པས་གང་མགྱོགས་ལག་ལེན་དུ་བསྟར་བར་སྨོན་ཞེས་ཆེས་མཐའ་མའི་རེ་སྐུལ་ཞུ་འདོད་པ་དེ་ཉིད་དོ།།
ཁྱོད་གྲྭ་བ་གྲྭ་རྐྱང་ཞིག་ལ་དཀའ་ངལ་ཅི་ཞིག་ཡོད་ཨང་། སྐེ་མི་ཚུད་སར་ལུས་འཚང་བས་མཇུག་འབྲས་འདི་ལས་ཅི་ཞིག་ཡོད་ཨང་། སྔོན་མའི་སྔོན་མ་བཞིན་ཤེས་རིག་ལས་ཁུངས་ནས་བཞུགས་ཡོད་ན་ནི་འདི་འདྲའི་ལོ་རྒྱུས་ནག་པོ་ཞིག་ཅི་ལྟར་ཡོད་ཨང་། ད་ནི་ཚེ་མཇུག་དེ་ཉིད་རིན་ཐང་ཅན་ཞིག་ཏུ་འབད་བརྩོན་གནང་རོགས་ཀྱེ།
2020/5/28ཉིན།
དྲྭ་གྲོགས་ཚོ། རང་རེ་བོད་ཀྱི་རིག་གཞུང་ནང་། གྲོགས་བཟང་བསྟེན་དགོས་པ་དང་།
གྲོགས་ངན་སྤང་དགོས་ཞེས་གསུངས་པ་ནི་ཤིན་ཏུ་བདེན། ད་རེས་གྲོགས་ངན་པའི་དབང་གིས་མི་ཚེ་ཧྲིལ་པོ་གཞུང་ཞབས་ཞུས་ཤིང་། ཉམས་མྱོང་ཕུན་སུམ་ཚོགས་པའི་གཡུ་ཐོག་ཀརྨ་དགེ་ལེགས་གྲྭ་བ་རྒད་པོ་མ་ཤི་བར་དུ་སྨན་ཟོས། འཆི་ཁ་ལ་ཁར་དུག་ཟོས་ཟེར་བ་ལྟར་སྙིང་པོ་ཅི་ཡང་མེད་པར་གྱུར་སོང་། སྙིང་རྗེ། ལར་ནས་བློ་བཟང་སེངྒེ་ཞེས་དུད་འགྲོའི་མིང་ཅན་འདི་ནི། ༧གོང་ས་མཆོག་གིས་ཆོལ་གསུམ་གཅིག་ཏུ་བསྒྲིལ་བའི་བཙན་བྱོལ་བོད་མི་ཞེས་པའི་སྒྲིག་འཛུགས་ཤིག་སྐུ་ངལ་སྟོང་ཕྲག་ཁྱད་དུ་བསད་ཏེ་གསར་འཛུགས་བསྐྱངས་པ་འདི་གཏོར་བཤིག་སྟོང་མཁན་གྱི་དམ་སྲི་ཞིག་ཏུ་བསམ་བཞིན་སྐྱེས་པ་ཡིན་ནམ་སྙམ། མི་འདི་ཤེས་ཡོན་ཅན་དུ་བརྫུས་ཏེ་བཙན་བྱོལ་སྤྱི་ཚོགས་ནང་གི་མི་ཤེས་ཡོན་ལྷག་བསམ་དང་། སེམས་ཤུགས་ཅན་མང་པོའི་གྲོགས་བཟང་དུ་ཡང་བརྫུས་ཏེ་འཕྲོ་རླག་བཏང་དང་གཏོང་བཞིན་པ་རེད། དང་པོར་བདེ་སྐྱིད་ཆོས་དབྱངས། དེ་ནས་ཤར་གླིང་ཟླ་སྒྲོན་དང་སྤེན་པ་ཚེ་རིང་། ད་རེས་གཡུ་ཐོག་ཀརྨ་དགེ་ལེགས་བཅས་འཕྲོ་བརླག་བཏང་སོང་། གཞན་ཡང་ལྷག་བསམ་སེམས་ཤུགས་ཅན་་པོ་ཞིག་འཕྲོ་བརླག་བཏང་ཡོད་ཀྱང་། མིང་འདོན་བྱ་འདོད་མེད། རིམ་པས་ཤེས་ཀྱི་རེད། ད་ཀརྨ་ཡེ་ཤེས་འཕྲོ་བརླག་གང་འདྲ་བྱས་ཏེ་གཏོང་དགོས་མིན་སློབ་སྟོན་པ་རྣམས་དང་ཡང་གོ་བསྡུར་བྱེད་ཀྱིན་་ཡོད་པ་ཐག་གིས་ཆོད།