ཤི་མེད་ཚོར་མེད་།
མ་སུ་རི་བོད་ཁྱིམ་གྱི་སློབ་མའི་འཁྲིག་སྤྱོད་ཀྱི་གནད་དོན་དེས་མི་རྣམས་ལྷིང་འཇགས་ཀྱི་གཉིད་ལས་དཀྲོགས་པ་བཞིན་ཁ་ཐོགས་ཚད་ཀྱིས་རང་རང་གི་དྲན་ཚུལ་ལྟ་ཚུལ་མང་དག་ཅིག་དྲ་ངོས་སུ་བཀོད་ཅི་ཐུབ་ལ་ལྟ་བ་དང་། གནད་དོན་ཆེན་པོ་ཆེན་པོ་ཞིག་ཏུ་བརྩིས་ཏེ་གནད་དོན་དེའི་རྐྱེན་པས་མི་རྣམས་ཀྱིས་མི་རིགས་གླེང་བ་དང་། གསར་རྙིང་འབྱེད་པ། ཆབ་སྲིད་དཀྲུག་པ་སོགས་གཞུང་དམངས་གཉི་ག་བྲེལ་བྲེལ་འཚབ་འཚུབ་ཀྱི་འཚུབ་མ་ལངས་ཚུལ་ལ་བལྟས་ན་སྤྱི་ཚོགས་ཡར་རྒྱས་མར་རྒུད་ཀྱི་རྣམ་པ་ཅི་ཞིག་ཡིན་མིན་ད་དུང་ཁ་ཚོན་གཅོད་རྒྱུ་དཀའ་མོ་ཞིག་རེད། ངས་བལྟས་ན་ད་ལྟའི་སློབ་མའི་འཁྲིག་སྤྱོད་ཀྱི་གནད་དོན་འདིའི་ཐད་ང་ཚོ་ཇི་ལྟར་འཕག་ འཚག་བརྒྱབ་ཀྱང་སློབ་མ་དེ་དག་ཕྱིར་སློབ་གྲྭ་ལ་བཅུག་ཀྱང་རུང་མ་བཅུག་ཀྱང་ རུང་ཇི་སྲིད་འཚོ་བའི་བར་དུ་དབུགས་མ་ཆད་གསོན་དགོས་པའི་བོད་མི་རིགས་འདིའི་ཁེ་གྱོང་ཆེན་པོ་ཞིག་རྩ་བ་ནས་མ་རེད་སྙམ། སྤྱིར་བཏང་ནས་གནད་དོན་འདི་ལྟ་བུའི་རིགས་ནི་སྤྱི་ཚོགས་ནང་ད་དུང་ཉུང་ནས་མང་དུ་འགྲོ་རྒྱུ་ལས་།ཉུང་ནས་ཇེ་ཉུང་དང་དེ་ནས་མེད་པར་ཆགས་རྒྱུ་མི་སྲིད་པ་ཞིག་རེད་། འོ་ན་གནད་དོན་ཆེན་པོའི་ཆེན་པོ་དེ་འདྲ་གང་ཞིག་ཏུ་ཡོད་ཅི་ལྟ་བུ་ཡིན་ཟེར་ན། ང་ཚོས་རྒྱུན་དུ་དོ་སྣང་བྱེད་དགོས་པའི་གནད་དོན་ཆེན་པོ་དེའི་རིགས་ནི་གནད་དོན་ཆུང་ཆུང་འབྱུང་སའི་སློབ་གྲྭ་དེ་ཚོའི་ནང་དུ་ཡོད་ལ། མདོར་ན་འཛིན་སྐྱོང་གི་གནད་དོན། དགེ་རྒན་གྱི་གནད་དོན། སློབ་མའི་གནད་དོན། ཁྱིམ་བདག་གི་གནད་དོན། ཁོར་ཡུག་གི་གནད་དོན་སོགས་ཡིན།
༡༽སློབ་གྲྭའི་འཛིན་སྐྱོང་གི་གནད་དོན།
འཛིན་ སྐྱོང་གིས་གང་དགེ་ཅི་ལེགས་ཀྱིས་སློབ་གྲྭའི་ཕྱི་ནང་གསང་གསུམ་དུ་ཉེ་རིང་མེད་ པར་འཛིན་སྐྱོང་སྤེལ་གསུམ་གནང་རྒྱུའི་ཚབ་ཏུ་ཤོག་ཀ་ཤོག་ཁག་བཟོས་ཏེ་རང་ཉིད་ཀྱི་ཁེ་ཕན་སྒྲུབ་ཕྱིར་རང་ཕྱོགས་ཀྱི་བྱས་ཉེས་མིག་གིས་མ་མཐོང་ཞ་ར་ཡིན་མདོག་མདོག་དང་། གཞན་ཕྱོགས་ཀྱི་བྱས་རྗེས་རྣ་བས་མ་གོ་འོན་པ་ཡིན་མདོག་མདོག རྒྱུ་ཆེན་ངོ་ཆེན་ལྷན་དུ་ཤག་པོ་དང་འགྲིག་པོ་བཟོས་ཏེ་ལྐོག་བཟའ་རུལ་སུང་མང་ནོ། རྒྱུ་མེད་འཁོས་ཆུང་རིགས་ཀྱིས་ལྕེ་སྣེ་ས་ལ་ལྷུང་ལྷུང་། འདར་འདར་ས་ལ་འགྱེལ་འགྱེལ། རང་ དོན་ཆུང་ཆུང་ཞིག་ལ་བཀའ་བཀྱོན་ཐོ་བས་རྡུང་རྡུང་བྱེད་པ་འདིའི་རིགས་ནི་ང་ཚོ་གསོན་ས་ནས་འཆི་ས་ལ་འདེད་པའི་གནད་དོན་ཆེན་པོ་ཡིན་པས་སྨྲ་ལྕེ་བདེ་བོར་བཤད་རྒྱུ་ཞིག་ཡོད་ཚེ་འདིའི་སྐོར་ཤོད་དང་། སྒྱུ་རྩལ་མཁན་པོར་འབྲི་རྒྱུ་ཞིག་ཡོད་ན་འདིའི་་སྐོར་ཕྲིས་དང་།
༢༽སློབ་གྲྭའི་དགེ་རྒན་གྱི་གནད་དོན།
བོད་ མི་རིགས་ཀྱི་འཆི་གསོན་གང་ཡིན་མ་ངེས་པའི་དུས་སྐབས་འདིར་དུས་རབས་ཀྱི་རྗེས་ ཟིན་ཞིང་ཤེས་སྤྱོད་ལེགས་པའི་དགེ་རྒན་ནི་གལ་ཆེན་ནང་གི་དོན་ཆེན་ཞིག་ཆགས་བསྡད་ ཡོད་ཀྱང་། ཁ་ཁོག་པའི་མ་གསང་། གློ་རྒྱུ་མས་མ་བསྐུངས་བར་དྲང་པོར་བཤད་ན་དགེ་རྒན་ཚོའི་ནང་དུའང་ནད་དགོངས་ཚ་དགོངས་རེ་འབྲི་རྒྱུར་ཡང་དཀའ་ངལ་རྒྱུན་འཕྲད་ཀྱིས་རང་གི་དགའ་ས་འགྲོགས་ས་རེ་ལ་ཞུ་བའི་མཐེ་བོང་ཀེར་བཞིན་པའི་གནས་སྟངས་ངོ་མ་ངས་མངོན་སུམ་མིག་གིས་མཐོང་མྱོང་ཡོད་། དགེ་རྒན་འགའ་རེ་དོན་དངོས་ཐོག་སློབ་སྦྱོང་ལ་དོ་སྣང་ཡོད་མཁན་མཆིས་ཀྱང་། ཕལ་མོ་ཆེས་སློབ་ཕྲུག་གི་མདུན་དུ་བཅོས་མས་ཟློས་གར་འཁྲབ་མཁན་ཡིན། རང་ ཉིད་དགེ་རྒན་ཞིག་ཡིན་པའི་ཆ་ནས་རང་གི་ཤེས་ཚད་གོང་མཐོར་ཇི་ཙམ་གཏོང་ཐུབ་ཚེ་དེ་ ཙམ་གྱིས་སློབ་མའི་རྒྱུད་ལ་ཤེས་ཡོན་གྱི་ལེགས་སྐྱེས་ཆེན་པོར་འབུལ་ཐུབ་རྒྱུ་ གདོན་མི་ཟ་ཡང་། དེ་ལས་ལྡོག་སྟེ་ཟླ་བའི་ཞབས་གླ་ཐོབ་པར་ཉིན་མོ་མཛུབ་མོས་བགྲང་བཞིན་ཉིན་རེའི་སློབ་འཁྲིད་དེ་བཞིན་ངལ་མེད་དལ་གྱིས་སྐྱེལ་མཁན་ཡང་ཧ་ཅང་མང་། འཛིན་གྲྭ་འགྲོ་ སྐབས་ཆང་རག་བཏུང་སྟེ་འཛིན་གྲྭའི་ནང་དུ་བཟི་སྐྱོན་སྤེལ་མཁན་དང་། ལས་བྲེལ་ཡོད་མདོག་ཐ་མག་མུ་ཟི་སློབ་མའི་ལག་ཏུ་འཛིན་དུ་འཇུག་མཁན། ཆགས་པའི་རྩ་རླུང་རྒྱས་དུས་རང་གི་ཆུང་མ་བརྗེད་དེ་བཞིན་བཟང་སློབ་མའི་འགྲམ་དུ་ཆགས་ པའི་གཏམ་རྒྱུད་འཆད་ཅིང་མི་བཟོད་ཚོར་བ་བྱུང་དུས་སྐེད་དང་ནུ་མ་བཟུང་སྟེ་གསང་རྒྱབ་ལྐོག་ལྐོག་གསེབ་ནས་མི་ལས་དགུ་ལས་བྱེད་མཁན་ཡང་ཡོད་པའི་གནས་ཚུལ་འདིའི་རིགས་ནི་སྤྱི་ཚོགས་ཉམས་རྒུད་ཀྱི་གནད་དོན་ཆེན་པོ་ཡིན་ན། དེ་བས་སྨྲ་ལྕེ་བདེ་བོར་བཤད་རྒྱུ་ཞིག་ཡོད་ཚེ་འདིའི་སྐོར་ཤོད་དང་། སྒྱུ་རྩལ་མཁན་པོར་འབྲི་རྒྱུ་ཞིག་ཡོད་ན་འདིའི་སྐོར་ཕྲིས་དང་།
༣༽སློབ་ཕྲུག་གི་གནད་དོན།
མི་རབས་གོང་མ་ཚོས་བཙན་བྱོལ་གྱི་བོད་ཕྲུག་འདི་དག་ལ་རེ་ལྟོས་བཅོལ་རྒྱུ་མང་དྲགས་པས་མིང་བྱང་སྙན་པོ་འདི་ལྟར་བཏགས་ཡོད་། མ་འོངས་བོད་སླར་གསོ་བྱེད་མཁན་གྱི་སོན་རྩ། རང་ལས་གཞན་གཅེས་པར་འཛིན་མཁན་གྱི་ཤཱཀྱའི་རྗེས་འཇུག འཛམ་གླིང་ཞི་བདེའི་ས་བོན་སོགས་ཧ་མི་གོ་མཁན་ཞིག་གིས་གོ་ན་ཧོན་འཐོར་དགོས་པ་ཞིག་ཡིན་མོད། འོན་ཀྱང་དོན་དངོས་ཐོག་སློབ་ཕྲུག་འདི་དག་གི་ཤེས་སྤྱོད་དང་འཇོན་ཐང་སོགས་གང་གི་ཆ་ནས་ཀྱང་དྲི་མ་ཙམ་ཡང་མི་བྲོ་བའི་མིང་བྱང་འདི་དག་དེ་ལྟར་བཏགས་ན་འཚམ་པོ་རན་པོ་ཞིག་རྩ་བ་ནས་མ་རེད་སྙམ། ཉེ་ཆར་བྱུང་བའི་སློབ་མའི་འཁྲིག་སྤྱོད་ཀྱི་གནད་དོན་འདི་ལྟ་བུ་ནི་ཧ་མི་གོ་ ལྐོག་ལྐོག་གསེབ་གསེབ་ན་ཉིན་རེ་བཞིན་མང་ཉུང་གང་རུང་རེ་བྱུང་དང་འབྱུང་བཞིན་པ་ནི་དགེ་རྒན་ལས་བྱེད་ཡིན་ཡང་རྒྱུན་ལྡན་གྱི་གནད་དོན་ཞིག་ལ་ངོས་འཛིན་མི་བྱེད་རང་བྱེད་ལས་ཧ་ལས་ཧོན་འཐོར་དགོས་པའི་གནད་དོན་ཞིག་ཏུ་བརྩི་གིན་མི་འདུག་སྙམ། འོན་ཀྱང་ང་ཚོས་ཐབས་བརྒྱ་ཇུས་སྟོང་གིས་གནད་དོན་འདིའི་རིགས་གང་མང་མི་འབྱུང་སྔོན་འགོག་གི་ཐབས་ཤེས་ཕྱོགས་ཡོངས་ནས་གནང་དགོས་པ་དེ་ཡང་གལ་ཆེན་པོ་རེད་སྙམ། བཙན་བྱོལ་སློབ་གྲྭ་ཁག་གི་ནང་དུ་ད་ལྟའི་དུས་འདིར་ཛ་དྲག་ཅན་གྱི་གནད་དོན་འགའ་ཤས་འབྱུང་གི་ཡོད་པ་དཔེར་ན། སྔར་ནས་བཙན་བྱོལ་སློབ་གྲྭ་ཁག་གི་ནང་དུ་མྱོས་རྫས་ལོངས་སུ་སྤྱོད་མཁན་གྱི་ སློབ་མ་རེ་ཟུང་འབྱུང་གི་ཡོད་ཀྱང་ད་ལྟའི་ཆར་ཕྱིའི་དཔལ་འབྱོར་གྱི་གནས་སྟངས་བཟང་དུ་ཕྱིན་པ་ཡིན་ནམ་གང་ལྟར་མྱོས་རྫས་ངན་གོམས་ལ་ཕྱིན་པའི་སློབ་མའི་གྲངས་འབོར་གྱི་འཕེལ་ཁ་མང་དུ་འགྲོ་གི་ཡོད་པ་དང་གཅིག སློབ་མས་སློབ་གྲྭའི་སྒྲིག་གཞི་དང་འགལ་བའི་བྱ་ངན་སྤེལ་བ་མངོན་སུམ་མིག་གིས་མཐོང་བའི་དགེ་རྒན་ལས་བྱེད་ཡིན་ཡང་གཡས་གཞའ་གཡོན་གཟུར་གྱིས་མ་གོ་མ་ཐོས་མདོག་མདོག་མ་བྱས་གཤེ་གཤེ་ཚིག་སྐམ་ཞིག་གིས་རང་གི་རྒྱུ་དངོས་ཡོད་ཚད་རྡུང་གཅོག་བྱེད་པའི་བྱ་སྤྱོད་ཐ་ཆད་འདིའི་རིགས་བྱུང་དང་འབྱུང་བཞིན་པའི་གནད་དོན་དང་གཉིས། སློབ་མས་རྒྱུན་ལྡན་ནས་སློབ་སྦྱོང་ལ་བརྩོན་པའི་གོམས་གཤིས་རྩ་བ་ནས་མེད་ལ་ཡིག་ཚད་ཀྱི་བརྒྱ་ཆ་ལོངས་ཐབས་ཁོ་ན་ལ་དམིགས་ཏེ་ནེ་ཙོ་བཞིན་གྱི་སློབ་སྦྱོང་བྱེད་པའམ་བརྐུ་བཤུས་བྱེད་པར་རྣམ་རིག་བཀྲ་ལ་ཐབས་མཆོག་ཏུ་གྱུར་བའི་སྲོལ་ངན་གྱི་བག་ཆགས་ཧ་ཅང་མཐུག་པས་ཕལ་ཆེར་སྤྱིར་བཏང་གི་དགེ་རྒན་ཞིག་གིས་བཟང་ཕྱོགས་ཀྱི་སློབ་གསོ་བརྒྱབས་ཏེ་ལེགས་བཅོས་བྱ་ཐུབ་རྒྱུ་ཧ་ཅང་དཀའ་མོ་ཞིག་རེད་སྙམ། ངས་གོ་ཐོས་ལྟར་ན་སློབ་གྲྭ་རེ་ཟུང་ནང་འཛིན་གྲྭའི་སློབ་མ་ཡོངས་རྫོགས་ཀྱིས་རྒྱུགས་མ་འཕྲོད་པའི་གནས་ཚུལ་ཐེངས་མང་བྱུང་ཡོད་ཚུལ་འདུག གནས་སྟངས་འདིའི་རིགས་ནི་ང་ཚོ་བཙན་བྱོལ་བ་ཞིག་ལ་མཚོན་ན་མི་སྲིད་པའི་གནས་སྟངས་ཐབས་སྡུག་ཅིག་རེད་སྙམ་པས་སྨྲ་ལྕེ་བདེ་བོར་བཤད་རྒྱུ་ཞིག་ཡོད་ཚེ་འདིའི་སྐོར་ཤོད་དང་། སྒྱུ་རྩལ་མཁན་པོར་འབྲི་རྒྱུ་ཞིག་ཡོད་ན་འདིའི་སྐོར་ཕྲིས་དང་།
༤༽ཁྱིམ་བདག་གི་གནད་དོན།
བཙན་བྱོལ་བོད་མིའི་སློབ་གྲྭ་ཁག་གི་ཕ་ཚབ་མ་ཚབ་ཚོ་ཐོག་མར་ཡོང་དུས་ངོ་གདོང་སྡུག་གི་གཉེར་མས་ཁེངས་ཤིང། ལྟོགས་དུས་ཟས་ཀྱིས་མ་འགྲངས། འཁྱགས་དུས་གོས་གྱིས་མ་དྲོ་བའི་བཟོ་འདྲ་བོ་ཞིག་གི་ངང་ནས་སློབ་གྲྭའི་ཡིག་ཚང་མདུན་དུ་བཅར་ཏེ་ད་ནས་བཟུང་ཞེ་བསམ་པའི་གཏིང་ནས་ལྷག་བསམ་སྟོན་རྒྱུའི་གོ་སྐབས་རག་སོང་མདོག་མདོག་གིས་རྣ་ལ་མི་ཤོང་བའི་ཁས་ལེན་དམ་བཅའ་མང་པོ་མང་པོ་ཞིག་འཇོག་གི་ཡོད་ཚོད་འདུག་མོད་། འོན་ཀྱང་དེ་ཚོ་ཅང་མ་འགོར་བར་བལྟས་བལྟས་རིག་རིག་ལ་སྐྱིད་ཀྱི་ཚོ་བུད། མཆོར་ལྭ་གྱོན་པའི་སྐུ་དྲག་བཞིན་དུ་ལག་གདུབ་སོར་གདུབ་གསེར་གྱིས་བརྒྱན་ཞིང་། གཟིམ་ཤག་ཏུ་ཟས་གཡོ་མཁན་གྱི་མ་བྱན། གད་རྒྱག་མཁན་གྱི་གད་པ། ཐ་ན་ཁྱི་ལྟོ་སྦྱིན་མཁན་གྱི་ཁྱི་གཡོག་ཀྱང་སློབ་ཕྲུག་ཆུང་ཆུང་དེ་འདྲ་ཉར་གི་ཡོད་ཚོད་འདུག རྒྱ་གུང་ཁྲན་གྱིས་བོད་ཀྱི་སྤྱི་ཚོགས་རྙིང་པ་རོ་ལངས་རྒྱག་པ་ཟེར་བ་འདི་རྒྱུ་མཚན་མེད་པ་མཁའ་སྟོང་མདའ་འཕེན་ལྟ་བུ་ཞིག་རྩ་བ་ནས་མ་རེད་སྙམ། ད་དུང་བསམ་སྦྱོར་ཐུ་བ་རེ་ཟུང་གིས་རང་གི་དབང་ཐང་དང་དཔལ་འབྱོར་གྱི་སླུ་བྲིད་ སྤྱད་དེ་འདུ་ཤེས་ལ་ནག་ནོག་གི་དྲི་མས་མ་གོས་པའི་སློབ་མའི་ལྷན་དུ་གསང་རྒྱབ་ལྐོག་རྒྱབ་ན་གཅེར་བུར་བུད་དེ་འཁྲིག་སྤྱོད་ཀྱི་རྒྱལ་པོ་སྐྲ་སེར་སྤྲེའུ་ཡི་ལད་ཟློས་གསོན་པོའི་སྒྱུ་རྩལ་ངོམ་མཁན་ཡང་ཉུང་ནས་མང་དུ་འགྲོ་བའི་ཛ་དྲག་གི་གནད་དོན་ཆེན་པོ་མང་དག་ཅིག་འབྱུང་གི་ཡོད་ན་སྨྲ་ལྕེ་བདེ་བོར་བཤད་རྒྱུ་ཞིག་ཡོད་ཚེ་འདིའི་སྐོར་ཤོད་དང་། སྒྱུ་རྩལ་མཁན་པོར་འབྲི་རྒྱུ་ཞིག་ཡོད་ན་འདིའི་སྐོར་ཕྲིས་དང་།
༥༽ཁོར་ཡུག་གི་གནད་དོན།
༧ གོང་ས་མཆོག་གཙོས་པའི་བོད་མི་རིགས་ཀྱི་ལས་དབང་སེམས་ལ་རྣོག་པའི་ལ་ཞེན་ཅན་མང་དག་ཅིག་གིས་བཙན་བྱོལ་བོད་མིའི་ཤེས་ཡོན་ཉམས་ཆག་གི་ཐོག་ལ་ཨ་ཆད་འུ་ཐུག་གི་སྨྲེ་ སྔགས་ཤོར་དགོས་པའི་འགག་རྩ་གཙོ་བོ་དེ་སློབ་གྲྭའི་ཁོར་ཡུག་གི་ཐོག་ནས་ཡོང་གི་ཡོད་། སློབ་གྲྭའི་ཉེ་འཁོར་ན་སློབ་མའི་ལུས་སེམས་འཚར་ལོངས་ལ་གནོད་གཞི་ཅན་གྱི་ལས་རིགས་སམ་བྱ་བ་སྣ་ཚོགས་ཡོད་པ་དཔེར་ན། རྒྱ་གར་པའི་ཚོང་ཁང་། ཟ་ཁང་། གློག་ཀླད་ཁང་སོགས་ཡིན། ཚོང་པས་རང་གི་ཁེ་ཕན་གྱི་དོན་དུ་སློབ་གྲྭའི་སྒྲིག་གཞི་ལ་གནོད་མ་གནོད་ཀྱི་ཁྱད་པར་མེད་པར་ལག་ཐོགས་ཁ་པར། ཐ་མག འཕྲོད་བསྟེན་ལ་གནོད་གཞི་ཅན་གྱི་ཚོང་རྫས་འདྲ་མིན་བཤམས་ཤིང་བླུ་ཉོ་བྱེད་དུ་འཇུག་གི་ཡོད་། ཟ་ཁང་འགའ་ཤས་ནང་ཆང་རག་དང་མྱོས་རྫས་རིགས་ལྐོག་ནས་ངན་གོམས་ལ་ཕྱིན་པའི་སློབ་ཕྲུག་དེ་དག་ལ་འཚོང་སྒྱུར་བྱེད་ཀྱིན་ཡོད་ལ། མྱོས་རྫས་སྤྱོད་ཐལ་ཆེ་དྲགས་པས་མཚམས་རེ་སྨན་ཁང་དུ་ལྷག་པའི་སློབ་ཕྲུག་སྔོན་ལོ་ལས་ཁ་གྲངས་མང་དུ་འགྲོ་བཞིན་ཡོད། གློག་ཀླད་ཁང་སོགས་ཀྱི་ནང་དུ་དུས་ཚོད་ངེས་མེད་འཛིན་གྲྭ་འཚོགས་བཞིན་པའི་སྒང་ཡིན་ཡང་མཐོ་དམའ་སུ་ལའང་སྐྲག་སྣང་འཚེར་སྣང་མེད་པར་གླང་ཆེན་ཁྲོ་བོ་བཞིན་དུ་འགྱང་ནས་འགྲོ་མཁན། རྨ་བྱས་སྟངས་སྟབས་ངོམ་འདྲའི་སྒེག་ནས་འགྲོ་མཁན་ཡང་ཧ་ཅང་མང་། དམིགས་བསལ་གུང་གསེང་སྐབས་སུ་སློབ་ཕྲུག་གི་འཛིངས་བརྒྱབས་ཏེ་རྐང་པ་ཐར་སའི་ལམ་ཞིག་ཀྱང་མི་རྙེད་ལ། སློབ་ཕྲུག་ཕོ་མོ་དབྱེར་མེད་ཀྱིས་དྲ་ངོས་ལས་ཅི་ཞིག་རྙེད་མི་རྙེད་དང། གང་ཞིག་ལོན་མི་ལོན་བྱེད་པའི་རྩ་ཆེན་གོང་ཆེན་ཀྱི་རིགས་ནི་དེབ་དང་སྨྱུ་གུ་མིན་པར་བརྒྱ་ཆ་90%རྩེད་མོ་རྩེ་མཁན་གྱི་གྲགས་ཅན་བརྙན་པར། གཞས་དང་ཞབས་བྲོ་རྒྱག་མཁན་གྱི་གྲགས་ཅན་འདྲ་པར། ད་དུང་གལ་ཆེན་ནང་གི་རྩ་ཆེན་ཞིག་ཡོད་པ་ནི་མགོ་སེར་ཚོས་འཁྲིག་སྤྱོད་ཀྱི་སྒྱུ་རྩལ་ངོམ་པའི་ལྟད་མོ་ངོ་མཚར་ཅན་བརྒྱ་ཕྲག་མང་པོ་སློབ་མའི་ལག་ནས་རྙེད་རྒྱུ་ཡོད་ལ། བོད་མི་རིགས་ཀྱི་ལས་དབང་ཇེ་ཐུ་ཇེ་སྡུག་ཏུ་འགྲོ་བའི་ཛ་དྲག་ཅན་གྱི་གནས་སྐབས་འདིར་སྨྲ་ལྕེ་བདེ་བོར་བཤད་རྒྱུ་ཞིག་ཡོད་ཚེ་འདིའི་སྐོར་ཤོད་དང་། སྒྱུ་རྩལ་མཁན་པོར་འབྲི་རྒྱུ་ཞིག་ཡོད་ན་འདིའི་སྐོར་ཕྲིས་དང་།
ད་ཐེངས་ད་ངོ་མ་བྲིས་ཡོད་ཀི་ཀོ
རྩོམ་ཡིག་འདི་ནང་དུ་མཐོ་དམའ་ཚང་མར་ཁབ་གཙགས་ཀྱི་ཞོར་དུ་ཤེས་ཡོན་པའི་མིང་འཛིན་མཁན་ཚོར་ཡང་འབིག་གཙགས་ཤིག་བྱས་འདུག་ལ། སྤྱི་ཚོགས་དང་སློབ་ཕྲུག་གི་གཤིས་སྤྱོད་ཀྱི་ཁ་ཐུར་དུ་འགྲོ་བའི་གནད་འགག་ཅིག་བསྟན་ཡོད་པར་འདོད། དེར་བརྟེན། སྨྱུག་ཐོགས་པ་ཀུན་གྱི་གོ་ལོབས་ཐོས་ལོབས་ཙམ་མ་ཡིན་པར་སྤྱི་ཚོགས་ལ་དངོས་སུ་ཞིབ་འཇུག་བྱས་ཏེ་ན་ཚ་ཕྱིར་བཏོན་པའི་སྨན་པ་དངོས་མ་ཞིག་བྱེད་རྒྱུ་ནི་ཁ་ཚ་དགོས་གཏུགས་རེད། ཁོ་ཡིས་བཤད་སོང། དེ་ཡིས་ཟེར་གོ་གི་ཟེར་བའི་ཚིག་དེ་ནི་སྤྱི་ཚོགས་ལ་དཀྲུག་ཤིང་དང་བརྡབ་གསིག་ལས་ཕན་ཐོགས་གང་ཡང་མི་འདུག
དེ་རིང་སྔོན་གྱི་རྩོམ་རྙིང་དེ་ཚོར་བསྐྱར་ལྟ་རེ་བྱས་པ་ཡིན། རྩོམ་ཡིག་འདིས་དངོས་གནས་དོན་དངོས་ཐོག་ནས་སྐད་ཆ་རེ་འགའ་བཤད་འདུག་སྙམ། དངོས་ཡོད་འབྲི་ན་འདི་ལྟར་འབྲི་དགོས་པ་ལོས་ཡིན་འདོད་ཀི