ཆོས་རིག་བཀའ་བློན་གཡུ་ཐོག་ཀར་མ་དགེ་ལེགས་གང་དེར།

ཧོར་གཙང་འཇིགས་མེད།
 
ད་ལྟའི་འཛམ་གླིང་ཧྲིལ་བོ་ཏོག་དབྱིབས་ནད་དུག་གིས་བསྒྲིབས་ནས་མི་རྒྱུ་སྲོག་གསུམ་ལ་གོད་ཆག་ཆེན་པོ་ཕོག་ནས། ཟླ་ངོ་ནས་ཟླ་ངོའི་བར་མི་མང་ས་ཡ་མང་བོས་ཁྱིམ་གྱི་སྒོ་ཐེམ་བརྒལ་བགྲོད་ཙམ་བྱེད་རྒྱུ་ལའང་འཇིགས་སྣང་སྐྱེ་དགོས་པའི་དུས་ཚོད་ཉམ་ང་བ་འདི་འདྲའི་ནང་དུ། འཛམ་གླིང་གི་ས་ཕྱོགས་གང་ས་ན་ཡི་མུག་ཅིང་རེ་ཐག་ཆད་ལ་ཉེ་བའི་སྐྱེ་བོ་མང་བོ་ཞིག་གིས་གསོལ་འདེབས་ཞུས་དོན་ལ། མགོན་པོ་བརྩེ་བའི་གཏེར་ཆེན་མཆོག་ཉིད་ཀྱིས་ཞལ་བཞེས་བཟང་བོ་ཐོབ་སྟེ། ཟླ་བ་འདིའི་ཚེས་༡༦ དང་༡༧ གཉིས་ལ་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་དང་འབྲེལ་ཏེ། འཇིགས་སྐྲག་གི་གནས་སྐབས་སུ་བསམ་བློ་གང་འདྲ་ཞིག་ལ་བརྟེན་ནས་སེམས་ཀྱི་དཀའ་ངལ་སེལ་ཐབས་བྱ་དགོས་པའི་ལམ་སྟོན་ཧ་ཅང་གལ་ཆེན་མང་བོ་བསྩལ་ཡོད་པ་དང་། དྲ་ལམ་ནས་ཐད་གཏོང་ཞུ་མཁན་གྱི་མི་གྲངས་ཆིག་འབུམ་ཆིག་ཁྲི་བརྒལ་བ་དེ་དག་ལ་དབུགས་དབྱུང་གནང་བ་ཙམ་ཞིག་མིན་པར། མི་གྲངས་ཆིག་འབུམ་བརྒལ་བ་དེ་དག་གིས་རང་རང་ལ་དྲ་འབྲེལ་ཡོད་མཁན་དག་ལ་བརྒྱུད་གཏོང་བྱས་པ་སོགས་གཅིག་ལ་གཅིག་བརྒྱུད་ཀྱིས་ད་རེས་ཀྱི་དྲ་ལམ་གསུང་ཆོས་ལ་ཉན་བསམ་བྱེད་མཁན་མི་གྲངས་ས་ཡ་མང་བོ་བྱུང་ཡོད་པ་ལ་ཚོད་དཔག་བྱེད་ཆོག་པ་དེ་ནི་ཤིན་ཏུ་ནས་ཀྱང་ཡི་རང་ཞུ་འོས་པ་ཞིག་ཡིན།

འོན་ཀྱང་ཆོས་རིག་བཀའ་བློན་གྱིས་གོང་ས་རྒྱལ་དབང་མཆོག་གིས་འཁོར་དང་ཟང་ཟིང་ལ་རེ་བའི་འདུ་འདོད་ལྟ་བུར་སྒྱུར་ཐབས་བྱས་འདུག་པ་དེ་ཧ་ཅང་མ་རུང་བའི་བཤད་སྟངས་ཐབས་རྡུགས་ཤིག་ཡིན་ཀྱང་། དོན་གྱིས་ནི་བྱང་ཆུབ་སེམས་དཔའི་སྡོམ་པ་ལེན་པའི་སྐབས་ཀྱི་གཞན་དོན་ལ་དམིགས་པའི་དམ་བཅའ་གལ་ཆེན་ཞིག་ནི། སྐྱེ་བོ་དབུགས་མ་འབྱིན་པ་རྣམས་དབུགས་དབྱུང་དགོས་པར་གསུངས་པའང་འདི་འདྲ་ལས་ལྷག་པའི་དཔེ་མཚོན་ཞིག་གང་ན་ཡོད།

དེ་ནས་ཡང་བསྐྱར་འཛམ་གླིང་ས་ཕྱོགས་མང་བོ་ནས་རེ་བསྐུལ་གསོལ་འདེབས་ནན་ཞུས་ལ་དགོངས་ནས། འདི་ཟླའི་ཚེས་༢༩ དང་༣༠ གཉིས་ལ་སྤྱན་རེས་གཟིགས་ཀྱི་དབང་ཆེན་གནང་རྒྱུའི་ཞལ་བཞེས་བཟང་བོ་ཐོབ་དོན་ལྟར། དགའ་ལྡན་ཕོ་བྲང་ཡིག་ཚང་གིས་གསལ་བསྒྲགས་བསྐྱངས་པའི་གོ་སྐབས་དང་བསྟུན་ཏེ། སྤྲུལ་སྐུ་ཨོ་རྒྱན་སྟོབས་རྒྱལ་གྱིས་ཏཱ་ལའི་བླ་མས་སངས་རྒྱས་ཀྱི་བསྟན་པ་བཤིག་པའི་སྟ་རེ་བཟོ་བཞིན་ཡོད་ཚུལ་དང་། བདུད་ཀྱི་ལས་ངོ་མ་གནང་གི་ཡོད་ཚུལ། གསང་སྔགས་ཀྱི་ཆོས་ཟབ་མོ་དྲ་ལམ་བརྒྱུད་ནས་འཛམ་གླིང་གི་སྐྱེ་བོ་ས་ཡ་མང་བོ་ལ་བསྒྲགས་ནས་གསང་སྔགས་ཀྱི་བསྟན་པ་ཉམས་ཉེས་སུ་གཏོང་གིན་ཡོད་ཚུལ་སོགས་བཤད་སྐབས་ཀྱི་སྐད་ཀྱི་གདངས་དང་། བཀོལ་སྤྱོད་བྱས་པའི་ཐ་སྙད་དང་བཅས་པ་ལ་བོད་མི་བསམ་ཡོད་སུ་ཞིག་གིས་ཀྱང་དང་ལེན་བྱེད་མི་སྲིད།

སྤྲུལ་སྐུ་ཨོ་རྒྱན་སྟོབས་རྒྱལ་ནི་ཕྱིར་མི་ལྡོག་པའི་ནག་ཕྱོགས་ཀྱི་གཡང་ལ་ལྷུངས་པའི་སྐྱེ་བོ་ཞིག་ཡིན་པ་རང་རེའི་སྤྱི་ཚོགས་ལ་རྒྱུས་མངའ་ཟབ་མོ་ཡོད་པས། ད་རེས་བསྟན་པའི་ཁུར་ཆེན་འདེག་པའི་ཟོལ་གྱིས་ཡང་བསྐྱར་ཁོང་སྐྲན་གྱི་ཐིོགས་པ་ཁ་ཤས་ཕྱི་ལ་སྐྱུགས་པ་ཡིན་པས་བསམ་ཡོད་རྣམས་དངངས་འདྲོག་ལངས་དོགས་མ་མཆིས་སྙམ།

འོན་ཀྱང་ང་ཚོ་ཧང་སངས་དགོས་པ་དེ་ནི། བྱ་སྤུ་གནོན་གྱི་ཧམ་པ་བཤད་པའི་འབྲས་བུར་ཁྲིམས་ཀྱི་ཉེས་ཆད་ཕོག་མཁན་ཆོས་རིག་བཀའ་བློན་གཡུ་ཐོག་ཀར་མ་དགེ་ལེགས་ཀྱིས་བཀའ་བློན་གྱི་ལས་ཤོག་སྤྱད་དེ། ཕྱིའི་རྣམ་པ་གཞུང་འབྲེལ་ལྟ་བུ་ལ། ནང་གི་བརྗོད་བྱ་ཀརྨ་དགེ་ལེགས་ཁོང་རང་གི་ཆབ་སྲིད་ཀྱི་ལང་ཕྱོགས་གསལ་སྟོན་བྱེད་ཆེད་ངོ་དགའ་སྤྲེལ་ལད་འཁྲབ་པའི་ཡི་གེ་ཞིག་བོད་མིའི་སྤྱི་ཚོགས་སུ་བཀྲམས་ནས། ཨོ་རྒྱན་སྟོབས་རྒྱལ་གྱིས་རྒྱལ་བ་རིན་པོ་ཆེའི་མཛད་ཕྱོགས་ལ་ངོ་རྒོལ་བྱས་པ་ལ་དག་འབུད་ཀྱི་དགོངས་འགྲེལ་བརྩམས་པ་དེར་བོད་མི་ཕལ་མོ་ཆེ་ཧ་མི་ལས་པ་ག་ལ་སྲིད།

འཇིག་རྟེན་གྱི་འགྲོ་ལུགས་སུ་བྱས་ན། ད་རེས་ཨོ་རྒྱན་སྟོབས་རྒྱལ་གྱི་གཏམ་བཤད་ཚན་པ་དེའི་ནང་དུ། གསང་སྔགས་ལ་ཁག་དཀྲིས་ཏེ། བསྟན་བཤིག་ཡིན་པ་དང་། བདུད་ཀྱི་ལས་རྩོམ་མཁན་ཡིན་པ། སངས་ཀྱི་བསྟན་པ་ཉམས་དམས་སུ་གཏོང་མཁན་ཡིན་པ་སོགས་ནི་བློ་ཡུལ་ལས་འདས་དགོས་པ་སྟེ། རང་ཅག་ལ་དུས་རབས་ཉི་ཤུ་བའི་ནང་གི་རི་སྒུལ་མཚོ་སྐྱོམས་ཀྱི་དྲག་འཁྲུག་གཏོར་བཤིག་ཉམ་ང་བའི་ཆག་འཕྲོ་མཐུད་བསྒྲུགས་གནང་སྟེ། ས་མཐའི་ཡུལ་ནས་ཆོས་རྒྱུད་ཆེན་པོ་བཞི་དང་། གཡུང་དྲུང་བོན་དང་བཅས་པའི་རྒྱལ་བསྟན་སླར་གསོའི་མཛད་འཁུར་ཅི་ཙམ་བསྣམས་པ་དང་། གཞུང་ཆེན་བཀའ་པོད་ལྔ་སྔགས་དང་བཅས་པ་ལ་གཞན་དྲིང་མི་འཇོག་པའི་མཁས་པའི་སྐྱེ་བོ་ཅི་ཙམ་སྐྱེད་སྲིང་གནང་བ་ཙམ་མིན་པར། རི་བོ་ཧི་མ་ལ་ཡའི་རི་རྒྱུད་ཀྱི་ནང་བའི་བསྟན་པ་ཉམ་ཆག་ཏུ་ཕྱིན་པ་ལ་གསོན་ཤུགས་བསྐྲུན་པ་ཙམ་ཞིག་ཀྱང་མ་ཡིན་པར། འཛམ་གླིང་རིས་མེད་ཀྱི་སྐྱེ་བོ་ས་ཡ་མང་བོའི་སེམས་ཀྱི་དཀའ་སྡུག་སེལ་བའི་སྨན་མཆོག་ཏུ་གྱུར་པའི་ལེགས་བཤད་ལམ་སྟོན་ཐང་མར་བརྡལ་བ་བརྒྱུད་དེ། རྒྱལ་བསྟན་ཡུན་རིང་གནས་པ་ལ་འགྱུར་བ་མེད་པའི་གཟེར་བཏབ་པ་ཙམ་ཞིག་ཀྱང་མིན་པར། བོད་དང་བོད་ཀྱི་ཆོས་རིག་ལེགས་བྱང་མི་རིགས་དང་བཅས་པའི་ཆེ་མཐོང་ལ་རྒྱ་དགུང་ལ་བསྟད་པ་ཙམ་ཞིག་ཀྱང་མིན་པར། ཕྱིའི་ཚན་རིག་དང་བོད་ཀྱི་ནང་ཆོས་གཉིས་དཔུང་བ་མཉམ་གཤིབ་གནང་སྟེ། འཛམ་གླིང་གི་ཤེས་རིག་སློབ་གསོའི་ཁ་ཕྱོགས་ལ་ཁྲིད་སྟོན་གསར་བ་མཛད་པ་སོགས་བསྟན་པའི་སྲོག་ཤིང་ཉག་ཅིག་ཏུ་བཞེངས་པ་ལ་ལེགས་གསོལ་དང་བསྔགས་བརྗོད་འབུལ་རྒྱུའི་ཚབ་ལ། བསྟན་པ་བཤིག་རབས་ཀྱི་སྡིགས་ར་དམོད་ཚིག་དེ་ཚོ་ལ། ཆོས་རིག་བཀའ་བློན་གྱི་ངོས་ནས། ཆོས་དོན་ལས་ཁུངས་ཀྱི་ངོས་ནས། བོད་མིའི་སྒྲིག་འཛུགས་ཀྱི་ངོས་ནས་མོས་མཐུན་མེད་པའི་རྣམ་འགྱུར་ཙམ་ཅིས་ཀྱང་བསྟན་འོས་པ་ལ་དེ་ལས་ལྡོག་སྟེ། བསྔགས་བརྗོད་ཀྱི་རྩོམ་ཡིག་འགྲེམས་སྤེལ་གནང་བ་ལ་མགོ་ཡུ་མི་འཁོར་རང་འཁོར་རེད།

ཨུ་རྒྱན་སྟོབས་རྒྱལ་གྱིས་ག་རེ་བཤད་ཡོད་པ་བོད་སྐད་ཤེས་མཁན་ཚང་མས་གོ་ཐུབ་པས། ཆོས་རིག་བློན་ཆེན་མཆོག་དེའི་རྒྱབ་དཔུང་དུ་བཞེངས་ཏེ། ཨོ་རྒྱན་སྟོབས་རྒྱལ་གྱི་ཁ་ནས་ཚིག་ངན་ཐལ་བ་ཙམ་ལས་བསམ་བློའི་རྒྱབ་ལྗོངས་ལ་དོགས་གནས་མེད་ལུགས་དང་། ཀུན་སློང་རྣམ་དག་ཡིན་ཚུལ་དྲིལ་བསྒྲགས་བྱ་རྒྱུ་དེ་ཆོས་རིགས་བཀའ་བློན་ལ་འཁྲི་བའི་ལས་འགན་ཡིན་དོགས་མེད། ཡང་ན་སྐུ་ངོ་བཀའ་བློན་མཆོག་ལ་གཞན་གྱི་སེམས་ཤེས་པའི་མངོན་ཤེས་ཡོད་པ་ཡིན་ནམ།

གང་ལྟར་ང་ཚོས་ནན་ཏན་གྱི་སྒོ་ནས་སྐུ་ངོ་ཁྱེད་ལ་འདྲི་རྒྱུ་ནི། ཁྱེད་ཆོས་རིག་བཀའ་བློན་མཆོག་ཨོ་རྒྱན་སྟོབས་རྒྱལ་གྱི་སྐུ་ཁོག་ལ་ཞུགས་ནས་ང་ཚོའི་མདུན་དུ་ལྷ་བ་འཁྲབ་དགོས་དོན་ཅི་ཡིན་ནམ་ཞུ་རྒྱུ་དེ་ཡིན།

བཀའ་བློན་མཆོག་གིས་“སྤྲུལ་སྐུ་ཨོ་རྒྱན་སྟོབས་རྒྱལ་རིན་པོ་ཆེ་ནི་རྣམ་ཀུན་རང་ལ་གཟིགས་ཚོར་ཇི་བྱུང་འཛེམ་ཟོན་མེད་པར་གསུང་མཁན་ཞིག་ཡིན།” ཞེས་སོགས་ད་རེས་ཀྱི་སྡིག་སྨོད་དེ་རིགས་ལ་ལེགས་གསོལ་གྱི་གཏང་རག་མཚོན་པའི་ཚིག་སྦྱོར་སྤྱད་དེ་དགོངས་འགྲེལ་བརྩམས་པ་དང་། ཨོ་རྒྱན་སྟོབས་རྒྱལ་གྱི་མི་གཤིས་དང་ཀུན་སྤྱོད་སོགས་ཡ་རབས་དྲང་བདེན་ཡིན་ཚུལ་ང་ཚོར་རྒྱུས་སྟོན་གནང་བ་འོ་བརྒྱལ་ཏེ། གོང་ས་རྒྱལ་དབང་མཆོག་ལ་དད་དམ་གཙང་བའི་མི་དམངས་ཀྱིས་བསམ་འདུན་ལ་སྣང་ཆུང་ཁྱད་གསོད་ཀྱི་རྣམ་པ་བསྟན་ཏེ། “མང་ཚོགས་ཁྲོད་དོན་མེད་བློ་ཕམ་” འབྱུང་དོགས་ཡོད་ཀྱང་དེ་ནི་ཅི་ཡང་མ་ཡིན་པ་ལྟ་བུར་སྒྱུར་ཐབས་བྱས་པ་དེས་ཁྱེད་ཀྱི་ཞལ་གང་ལ་ཕྱོགས་པ་མཐོང་ཐུབ་ཀྱང་། ཁྱོད་ལ་“དོན་མེད་”ཡིན་པའི་དབང་དུ་བཏང་ཡང་ང་ཚོ་ལ་དོན་མེད་གཏན་ནས་མིན།

མ་གཞི་ནས་སྐུ་ངོ་བཀའ་བློན་མཆོག་སྒེར་ངོས་ནས་གོང་ས་རྒྱལ་བའི་དབང་བོ་བཅུ་བཞི་བ་མཆོག་རྩ་བརྒྱུད་ཀྱི་བླ་མར་འཛིན་མིན་དང་། དད་གུས་ཞུ་མིན་སོགས་སྐྱེ་བོ་སྒེར་གྱི་བསམ་འདུན་དང་འབྲེལ་བ་མེད་པར། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་དང་བོའི་ནང་འཁོད་གསལ་ལྟར། “བོད་ཀྱི་ལྷ་སྐལ་སྤྱན་རས་གཟིགས་དབང་མིའི་གཟུགས་སུ་བྱོན་པའི་ཁམས་གསུམ་ཆོས་ཀྱི་རྒྱལ་པོ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནི་འཇིག་རྟེན་ཞི་བདེའི་དེད་དཔོན་དང༌། ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད། བླང་དོར་ལམ་སྟོན་པ། བོད་མིའི་ངོ་བོ་དང༌། དེའི་ཆིག་སྒྲིལ་གྱི་མཚོན་རྟགས། བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ་བཅས་ཡིན།” ཅེས་སོགས་འཁོད་འདུག་པ་ཡིན་སྟབས། སྒེར་གྱི་ངོས་ནས་གུས་བརྩི་མེད་པའི་དབང་དུ་བཏང་རུང་། ཁྲིམས་ལུགས་ཀྱིས་བསྐུར་བའི་འགན་འཁྲིའི་འདུ་ཤས་ཙམ་ནི་ངེས་པར་དུ་ཡོད་དགོས་པ་མ་ཡིན་ནམ།

དོན་ངོ་མར་དྲ་ལམ་ནས་དབང་ལུང་གི་རྒྱུན་ངོ་མ་འཐོབ་དང་མི་འཐོབ་གསུང་བའི་འོས་བབ་ཡོད་མཁན་དག་ནི། སྐུ་ཚེ་སློབ་གཉེར་ལ་སྟིམ་པ་དང་། མི་ཚེ་འཆད་ཉན་བཤད་སྒྲུབ་ལ་སྟིམ་པའི་དགོན་སྡེ་ཁག་གི་མཁས་དབང་ཉམས་མྱོང་གིས་ཕྱུག་པ་དེ་ཚོ་ཡིན་པ་ལས། ཆབ་སྲིད་ཀྱི་གར་སྟེགས་སྟེང་ན་རས་དམར་བོ་གྱོན་མཁན་སྐུ་ངོ་རྣམ་པ་ལ་འོས་བབ་ག་ནས་ཆེ། དོན་གནད་འདི་རིགས་བཤད་པ་ལ་གཅིག་ནས་མདོ་སྔགས་གཉིས་ཀྱིས་བསྡུས་པའི་གསུང་རབ་སྤྱི་དང་བྱེ་བྲག་ལ་སྦྱངས་ཡོན་དང་རྒྱུས་མངའ་ཟབ་མོ་དགོས་པ་དང་། གཉིས་ནས་འདས་པའི་ལོ་ངོ་༢༥༠༠ ལྷག་གི་རིང་ལ་ནང་བའི་བསྟན་པ་ཇི་ལྟར་འཕེལ་རྒྱས་སུ་སོང་བའི་བྱུང་རབས་ལ་གཟིགས་རྒྱ་ཡངས་པ། གསུམ་ནས་ཀླུ་སྒྲུབ་ཡབ་སྲས་ནས་བཟུང་སྟེ་རྒྱལ་བའི་གསུང་རབ་ལ་དྲང་ངེས་ཀྱི་དབྱེ་བ་ཕྱེས་ཏེ་གཏན་ལ་དབབ་པའི་རིགས་པའི་ལམ་སྲོལ་ལ་གཞིགས་ཏེ། སངས་རྒྱས་ཀྱི་ཆོས་ཚན་རེ་རེ་འགྲོ་བ་མིའི་རིགས་ཀྱི་ཁམས་དང་བསམ་པ། དབང་བོ་བག་ལ་ཉལ་སོགས་བསམ་པ་དང་མོས་པ་ཐ་དད་པའི་སྐྱེ་བོ་སྣ་ཚོགས་པ་རྣམས་དབུགས་དབྱུང་བའི་ཕྱིར་དུ་གསུངས་པ་ཤ་སྟག་ཡིན་སྟབས། བསྟན་པ་སྤྱིའི་དབང་དུ་བྱས་པ་དང་། གང་ཟག་སྒེར་གྱི་བསམ་ངོ་ལ་བསྟུན་ནས་གསུངས་པར་མཛད་པ་སོགས་སྤྱི་བྱེའི་གནས་ཚུལ་ལ་རྒྱུས་མངའ་མེད་པར། དངུལ་སྟོབས་ཀྱིས་ཅི་ཡང་བཤད་ཕོད་པ་དང་། དབང་སྟོབས་ཀྱིས་ཅི་ཡང་བསྒྲུབ་ཆོག་པར་འདོད་པའི་ང་རྒྱལ་གྱི་ལྟ་སྤྱོད་དེ་རིགས་ཀྱིས་ཐག་ཆོད་པ་ཞིག་ག་ལ་ཡིན།

ཉི་མ་འདི་དག་གི་རིང་ལ་འབྲས་སྤུངས་བློ་གསལ་གླིང་གྲྭ་ཚང་གི་ལྷ་རམས་པ་འཇམ་དབྱངས་ནོར་བུ་(དྲ་མིང་ངམ་སྨྱུག་མིང་ལ་ལོག་སྨྲ་ཚར་གཅོད།)ལགས་དང་། སེ་ར་བྱེས་པ་གྲྭ་ཚང་གི་དགེ་བཤེས་དྲ་མིང་ལ་གསེར་མདོག་ལྷ་སྲས་སུ་འབོད་པ་དང་། རྣམ་རྒྱལ་གྲྭ་ཚང་གི་དགེ་རྒན་ཟུར་བ་ངག་དབང་སྟོབས་ལྡན་ལགས་སོགས་ལོ་མང་ཐོས་པ་བསྐྱལ་བའི་མཁས་པ་དེ་དག་ནི། རྒྱལ་བའི་གསུང་རབ་སྤྱིའི་ཐུན་མོང་ལམ་སྦྱང་གི་རིམ་པ་ལ་མྱོང་བྱང་ཟབ་པ་དང་། རྒྱུད་དང་རྒྱ་གཞུང་གི་གདམས་པ་མན་ངག་ལ་རྒྱུས་མངའ་ཡོད་པ། དུས་ཡུན་རིང་མོའི་བསྟན་པའི་བྱུང་རབས་ལོ་རྒྱུས་ལ་གཟིགས་རྒྱ་ཡངས་པའི་མཁས་པ་གཟུར་བོར་གནས་པ་མང་དག་གིས་ལུང་དང་རིགས་པ། རྟགས་དང་གཏན་ཚིགས་ལ་བརྟེན་ནས་འགྲེལ་བ་ལེགས་སྤེལ་ཉེས་འགོག་གི་དཔྱད་པ་ཞིབ་ཚགས་སྐྱོན་འདུག་པ་ལ་ཡི་རང་ཞུ་བཞིན་ཡོད།

༡། མི་འབོར་མང་བོ་ལ་གསང་སྔགས་གྱི་དབང་སྐུར་ན། གསང་སྔགས་ཁྲོམ་བསྒྲགས་ཀྱི་ཉེས་ལྟུང་མི་འབྱུང་བ་དང་བསྟན་པ་བཤིག་པའི་ཉེས་པ་མི་འབབ་པའི་ཚུལ་བཀོད་པ་ནི། རི་བོ་དགེ་ལུགས་པའི་ཟབ་ཆོས་གོང་ན་མེད་པ་དཔལ་གསང་བ་འདུས་པའི་རྒྱུད་དེ་ཉིད། ཨུ་རྒྱན་གྱི་ཡུལ་དུ་རྒྱལ་བོ་ཨིནྡྲ་བོ་དྷི་འཁོར་དང་བཅས་པ་མི་འབོར་ལྟོས་ཆེ་བ་ལ་གསུངས་ཏེ། མི་ཚོགས་རྒྱས་ཆེས་ནས་གྲོང་ཁྱེར་ལ་མ་ཤོང་བ་ལྟ་བུའི་སྔོན་གྱི་བྱུང་རབས་དང་སྦྱར་ནས་གསུངས་འདུག་པ་དང་།

༢། རྒྱང་ཐག་རིང་བོར་གནས་པ་དང་། དྲ་ལམ་བརྒྱུད་ནས་དབང་ལུང་གི་རྒྱུན་འཐོབ་རྒྱུ་ཡོད་མེད་སོགས་ལ། ཕྱི་ལོ་༢༠༡༧ ལོའི་ཟླ་༡ ཚེས་༢ -༡༤ བར་སྔོན་འགྲོའི་གསུང་ཆོས་དང་བཅས་ཏེ་དུས་འཁོར་དབང་ཆེན་ཐེངས་༣༤ བ་གནང་ལ་ཉེ་བའི་སྐབས་ཏེ། ༢༠༡༦ ལོའི་ཕྱི་ཟླ་༡༢ ཚེས་༡༩ ཉིན་བོད་ལ་ཕྱིར་ལོག་བྱ་དགོས་པའི་གནས་སྐོར་བ་ཁག་ཅིག་ལ། ༢༠༡༧ ལོའི་བོད་ཟླ་༡༡ ཚེས་༡༣-༡༥ བར་དང་། ཕྱི་ཟླ་༡ ཚེས་༡༠-༡༣ བར་གྱི་ཉིན་གསུམ་ནི་དབང་ཆེན་དངོས་གཞི་ཡིན་པས། ངོས་ཀྱིས་རྡོ་རྗེ་གདན་ནས་ཁྱེད་རང་ཚོ་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན། ཏན་ཏན་དབང་ཐོབ་ཀྱི་རེད། ཅེས་ཞལ་བཞེས་མཛད་པ་དང་།

ཡང་ཟླ་དེའི་ཚེ་༢༥ ཉིན་རྒྱ་གར་གྱི་རྒྱལ་ས་ལྡིར་ལིར། ཨུ་རུ་སུའི་ནང་བའི་ཡུལ་ཁམས་ཏེ། ཐུའུ་ཝ་དང་། ཁལ་མུག བྷུ་རི་ཡ་ཐི་སོགས་ཀྱི་ཆོས་ཞུ་བ་མང་བོ་ཞིག་སྐབས་དེའི་སྤྱོད་འཇུག་ཆེན་མོའི་གསུང་ཆོས་གྲུབ་མཚམས་ཕྱིར་སྐྱོད་བྱ་དགོས་པས་དུས་འཁོར་དབང་ཆེན་ལ་སྡོད་ལོངས་མ་བྱུང་བ་དེ་རྣམས་ལའང་གྱེས་མཇལ་སྐབས་ཞལ་བཞེས་སྔར་བཞིན་མཛད་པ་དང་།

ཟླ་དེའི་ཚེས་༢༨ ཉིན་བྷི་ཧར་པར་ཎ་གྲོང་ཁྱེར་དུ་བོད་ནས་གནས་སྐོར་ལ་འབྱོར་བ་ཁག་ཅིག་དབང་ཆེན་ལ་སྡོད་སྟབས་མ་འགྲིག་ནས་ཕྱིར་ལོག་གྱེས་མཇལ་གྱི་སྐབས་སུ་ཞལ་བཞེས་མཛད་པའང་། ངོས་ནས་བོད་ནང་གི་བོད་མི་དད་པ་དང་དམ་ཚིག་གཡོ་བ་མེད་པ་ཡོད་པ་རྣམས་ངོས་ཀྱིས་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན། ཁྱེད་རང་ཚོར་དབང་ཐོབ་ཀྱི་རེད། དེར་བརྟེན་ཁྱེད་རང་ཚོ་བློ་བདེ་བོ་བྱས་ནས་སྡོད། ཅེས་སོགས་བོད་ནང་ནས་རྐྱེན་དབང་གིས་དབང་ཆེན་ལ་བཅར་མ་ཐུབ་པའི་མི་གྲངས་ཧ་ཅང་མང་བོ་དང་། དེ་མིན་འཛམ་གླིང་གི་ཡུལ་ཕྱོགས་སོ་སོར་གནས་པའི་སྐྱེ་བོ་འབོར་ཆེན་ཡུལ་དུས་ཀྱིས་བསྐལ་བའི་མོས་འདུན་ཅན་རྣམས་ལ་བླ་སློབ་གཉིས་ཀྱི་དད་དམ་གྱི་ཤུགས་ལ་བརྟེན་ནས་དབང་ཐོབ་ཐུབ་པའི་ཞལ་བཞེས་མཛད་འདུག་པ་ལ་དད་ལྡན་གྱི་སྐྱེ་བོ་ཕལ་མོ་ཆེས་ཚད་མར་འཛིན་བཞིན་ཡོད།

འོན་ཀྱང་ཨོ་རྒྱན་སྟོབས་རྒྱལ་གྱིས་གཏམ་བཤད་སྔོན་མ་ལ་གསལ་བཤད་བྱས་པའི་ནང་དུ། “ཏཱ་ལའི་བླ་མ་ཁོ་རང་དབང་ཆེན་པོ་རེད། ག་རེ་བཤད་འདོད་ན་དེ་རེད་ཟེར་དགོས་ཀྱི་རེད་པ།” སོགས་ཧ་ཅང་མ་རངས་པའི་སྒོ་ནས་བཤད་འདུག་པ་ལྟར་ན། རྒྱལ་བ་རིན་པོ་ཆེས་གོང་གི་བོད་སོག་མི་དམངས་དེ་དག་ལ་ཡུལ་གྱིས་བསྐལ་མིན་ལ་མ་ལྟོས་པར་དབང་ཐོབ་པའི་ཞལ་བཞེས་གནང་བ་དེ་ཡང་“དབང་ཡོད་བཤད་པ་”ལ་ངོས་འཛིན་བྱས་པ་ཡིན་ན་བརྗོད་གཞི་འདི་དག་ལ་གཞི་རྟེན་མེད་པར་གྱུར་པ་ཞིག་ཡིན།

མཁས་པ་དུ་མ་ཞིག་གིས་ལུང་ཚད་མ་ལ་གཏུགས་ནས་སྒྲུབ་བྱེད་གནང་འདུག་པ་ནི། དབང་གི་བླ་མ་ཚད་ལྡན་གྱི་ནུས་པའི་སྟོབས་ཀྱིས། དབང་གནང་ཡུལ་གྱི་ས་ཐག་རིང་ཐུང་ལ་ཁྱད་པར་མེད་པ་དང་། དབང་གནང་ཡུལ་དེ་ཉིད་འགྲོ་བ་རིགས་དྲུག་གང་ཞིག་ལ་གཏོགས་པ་ལའང་ཁྱད་པར་མེད་པར་མ་ཟད། སེམས་མེད་པའི་ས་དང་རྡོ་ལ་སོགས་པའི་བེམ་པོར་གྱུར་པའི་དངོས་པོ་ལའང་དབང་གི་ནུས་མཐུ་སྨིན་ཐུབ་ཚུལ་སོགས་ར་ལོ་ཙཱ་བའི་རྣམ་ཐར་དང་། དུས་འཁོར་གྱི་རྒྱུད་ལ་གཏུགས་ནས་འགྲེལ་བཤད་སྐྱོན་འདུག་པ་ལྟ་བུ་དཔེ་དང་ཁུངས་ཀྱིས་ཕྱུག་ཅིང་། ལུང་དང་རིགས་པ་སྣོལ་རྩེག་ཏུ་སྦྲེལ་ནས་ནམ་ལངས་ལངས་དང་ཉི་མ་ཤར་ཤར་གནང་འདུག་པས། རས་དམར་བོའི་འོག་གི་ཁྱིམ་པ་ཚོས་སྐུ་ངལ་འོ་བརྒྱལ་གནང་གལ་མ་ཆེ་འདུག

ལར་ནས་ཆོས་རིག་བཀའ་བློན་གྱིས། གོང་ས་སྐྱབས་མགོན་ཆེན་པོ་མཆོག་དང་བླ་ཆེན་གཞན་སུ་ཞིག་གིས་ཀྱང་དྲ་བརྙན་བརྒྱུད་ནས་དབང་ལུང་གནང་ན་ཞུ་མཁན་སུ་ལའང་དབང་དང་བྱིན་རླབས་ངོ་མ་ཐོབ་མེད་པར་ཐག་བཅད་ནས་བཤད་པའི་གོ་དོན་ངོ་མ་ནི། ད་རེས་སྤྱན་རས་གཟིགས་ཀྱི་དབང་ཆེན་གནང་རྩིས་མཛད་ཀྱིན་ཡོད་པ་དེ། ཞུ་མཁན་ཚོར་དབང་ལུང་དངོས་སུ་མི་ཐོབ་པ་མཁྱེན་བཞིན་དུ་མ་མཁྱེན་པའི་ཟོལ་གྱིས་གནང་རྒྱུ་ཡིན་ཚུལ་བཤད་ནས་ཟུར་ཟ་ཞུས་པ་ཞིག་ཡིན་ནའང་། མགོན་པོ་མཆོག་གིས་ཆེས་ཉེ་ཆར་དྲ་ལམ་བརྒྱུད་ནས་གསུང་ཆོས་གནང་བའི་སྐབས་སུ་གསལ་བོར་གསུངས་པ་འདུག་པ་ནི།

དབང་དང་རྗེས་གནང་བྱེད་པའི་སྐབས་སུ་དྲ་རྒྱའི་ནང་ནས་ཡུལ་ལུང་མི་འདྲ་བ་མང་བོ་ལ་འགྲོ་བཞིན་ཡོད་པ་དང་། ད་རེས་ཀྱང་དྲ་རྒྱའི་ཐོག་ཏུ་དོ་སྣང་བྱས་ནས་ཉན་སྡོད་མཁན་མང་བོ་ཞིག་ཡོད་པ་ཡིན་དུས། བླ་མའི་ངོས་ནས་མཐའ་གཅིག་ཏུ་ཕན་པའི་སེམས་ཀྱི་འདུན་པའི་ཤུགས་དང་། འཇིག་རྟེན་གྱི་ས་ཕྱོགས་དང་ཡུལ་ལུང་མི་འདྲ་བར་གནས་པའི་སྐད་དང་ཡི་གེ་མི་གཅིག་པའི་དད་ལྡན་དོན་གཉེར་བ་རྣམས་ཀྱིས་ཀྱང་འདུན་པ་རྩེ་གཅིག་ཏུ་མཉན་པ་ཡིན་ན་དབང་དང་རྗེས་གནང་སོགས་ཐོབ་ངེས་ཡིན་ཏེ། དཔེར་ན་སངས་རྒྱས་ཞལ་བཞུགས་པའི་སྐབས་སུའང་འགལ་རྐྱེན་ཡོད་པའི་ཡུལ་ལུང་ན་གནས་པའི་བསྙེན་པར་རྫོགས་འདུན་ཡོད་ཀྱང་། དངོས་སུ་སངས་རྒྱས་ཀྱི་དྲུང་དུ་བཅར་མི་མཁན་དེ་ཚོར་ཕྲིན་ཡིག་གི་ལམ་ནས་བསྙེན་པར་རྫོགས་སྲོལ་བྱུང་ཡོད། སྐབས་དེའི་ཕྲིན་ཡིག་གཏོང་རྒྱུ་དེར་དུས་ཚོད་འགོར་གཞི་ཆེན་པོ་འབྱུང་གིན་ཡོད་ཤག་ཀྱང་ལམ་སྲོལ་དེ་བྱུང་ཡོད། ད་ལྟ་ང་ཚོར་གློག་ཕྲིན་གྱི་ཐོག་ནས་ས་ཁད་ཉེ་འགྱང་ལ་ཁྱད་པར་མེད་པར་ཁྱབ་ནས་ཡོད་དུས། ཕྱོགས་དང་མཚམས་སུ་འཁོད་པའི་དད་པ་དག་སྣང་ཅན་དག་ལ་དབང་དང་བྱིན་རླབས་དེ་དག་འཐོབ་ཀྱི་རེད། དེའི་རྒྱུ་མཚན་ནི། སངས་རྒྱས་ཞལ་བཞུགས་པའི་སྐབས་སུ་འདུལ་བའི་ལག་ལེན་ཞིབ་ཚགས་པོ་ཡོད་ཀྱང་། སྐབས་དེར་ཕྲིན་གྱི་སྒོ་ནས་བསྙེན་པར་རྫོགས་ཆོག་ན། ད་རེས་འདིར་སྔགས་བླ་མེད་དང་འབྲེལ་བའི་དག་སྣང་གི་ཆོས་སྐོར་དུ་གཏོགས་པ་ཞིག་ཡིན་ལ། ཁྱེད་རང་ཚོ་ལ་དབང་དང་བྱིན་རླབས་དེ་ཚོ་ངེས་པར་དུ་འཐོབ་ཀྱི་རེད། དེ་ལུགས་ཀྱི་བསམ་བློ་ཐོངས་ཤོག་ཨང་། ཞེས་ཧ་ཅང་གསལ་བོར་གསུངས་འདུག་པ་དེ་ཡང་རྒྱལ་བ་རིན་པོ་ཆེ་ལ་དབང་ཆེ་དྲགས་ནས་“དབང་ཡོད་གནང་བ་”ལ་ངོས་འཛིན་བྱ་རྩིས་ཡིན་ནམ།

དབང་གནང་མཁན་གྱི་བླ་མ་རྡོ་རྗེ་འཛིན་པ་ཆེན་པོས་ཚིག་ཐག་ཆོད་པོའི་སྒོ་ནས་གསུངས་པ་དེ་རིགས་མ་གསན་པའི་ཚུལ་གྱིས། ཆོས་རིག་བཀའ་བློན་གྱིས་ཞིབ་ཆ་ཆེ་མདོག་གནང་སྟེ། “དྲ་ལམ་ནས་ཆོས་ཞུ་མཁན་ཚོར་དབང་ངོ་མ་མི་ཐོབ་ཀྱང་བྱིན་རླབས་ཁྱད་པར་ཅན་རེ་འཇུག་ཐུབ་པར་ཐེ་ཚོམ་མེད།” ཅེས་སོགས་ཡང་བསྐྱར་ཚིག་ཐག་བཅད་འདུག་པའི་སྙིང་བོར། དབང་ཞུ་མཁན་ཚོ་ལ་ཞུ་རྒྱུའི་དབང་མི་ཐོབ་པར་བྱིན་རླབས་སུ་བཏགས་པའི་དངོས་པོ་ཁྱད་པར་བ་གཞན་གང་ཞིག་ཐོབ་རྒྱུ་ཡོད་དམ། དངོས་པོ་གང་ཞིག་རེད་དམ།

ད་དུང་ཆོས་རིག་བཀའ་བློན་གྱིས་དམའ་རླབས་ཆེན་ཞིག་ཕབ་འདུག་པ་ནི། “དབང་ཆེན་གྱི་མཚན་གྲགས་ལ་བརྟེན་ནས་སློབ་མ་མང་བོ་འདུ་བ་དང་། དེའི་གོ་སྐབས་བཟུང་སྟེ་ཆོས་ཀྱི་གཞི་རིམ་གནས་ལུགས་དང་བསླབ་བྱ་རྣམས་ངོ་སྤྲོད་མཛད་ཀྱི་ཡོད་སྐོར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་ཀྱང་ཕེབས་མྱོང་ཡོད།” ཅེས་པ་འདི་རེད། འདིའི་གོ་དོན་ནི་གོང་ས་སྐྱབས་མགོན་ཆེན་པོ་མཆོག་གིས་གདུལ་བྱའི་མོས་ངོ་དང་བསྟུན་ཏེ་དུས་འཁོར་དབང་ཆེན་ལན་མང་བསྐུར་བ་ནི། དོན་གྱིས་གསང་སྔགས་ཀྱི་སྨིན་བྱེད་དབང་དང་གྲོལ་བྱེད་གདམས་པ་ལ་བརྟེན་ནས་གདུལ་བྱ་ལས་དག་རྣམས་ཀྱི་སེམས་རྣམ་པར་གྲོལ་བའི་ཆེད་དུ་སྐུ་ངལ་འོ་བརྒྱལ་མང་བོ་སྐྱོན་པ་ཞིག་མིན་པར། མི་ཚོགས་འདུ་བའི་ཕྱིར་དུ་དབང་སྐུར་མཛད་ཀྱིན་ཡོད་པའི་ཞྭ་མོ་གཡོགས་པ་དེ་ཡིན་ལ། བཤད་སྟངས་འདི་ནི་ཆེས་མ་གུས་པའི་རྣམ་འགྱུར་ཐབས་རྡུགས་ཤིག་རེད།

འོན་ཀྱང་རྒྱལ་བ་དོན་གྱི་བདག་པོས་གསུང་ཆོས་གང་ཞིག་གནང་ཡང་མི་ཚཽགས་རྒྱས་དྲགས་ནས་བཀོད་སྒྲིག་བྱེད་དཀའ་བ་ཆགས་ཀྱིན་ཡོད་པ་ལས། གསུང་ཆོས་ལ་ཉན་མཁན་མ་རག་ནས་དབང་སྐུར་ལ་ཁ་གཡར་ཏེ་མི་ཚོགས་བསླུ་འགུག་བྱེད་ཐབས་གནང་དགོས་པའི་འུ་ཐུག་ཐབས་ཟད་ཀྱི་ལས་ལ་འབད་བརྩོན་གནང་མི་དགོས་པ་སུས་མི་ཤེས།

ད་དུང་ཆོས་རིག་བཀའ་བློན་གྱིས་སྔར་བྱུང་ལོ་རྒྱུས་ཐོག་གསང་སྔགས་ཁྲོམ་བསྒྲགས་བྱས་པས་བསྟན་པ་ལ་ཉམ་ཆག་ཆེན་པོ་སོང་ཟིན་རབས་སོགས་བཤད་པའི་གོ་དོན་ངོ་མ་ནི། ད་ལྟ་མི་ཚོགས་མང་བོ་ལ་གསང་སྔགས་ཀྱི་དབང་བསྐུར་གནང་གིན་ཡོད་པའང་སྔར་གྱི་གནས་སྟངས་ལས་མ་འདས་པས། གོང་ས་རྒྱལ་དབང་མཆོག་འདི་བའང་གསང་སྔགས་ཁྲོམ་བསྒྲགས་གནང་ནས་བསྟན་པ་ལ་གནོད་སྐྱོན་གཏོང་མཁན་གྱི་ཆ་ཤས་ཤིག་ཡིན་པ་ལས། ཉམ་ཆག་གནོད་སྐྱོན་བཟོ་མཁན་གྱི་སྒོ་མོ་ཐོག་མར་བཏོད་མཁན་དེ་མིན་པས། ལོ་རྒྱུས་ཀྱི་ནག་ཉེས་ཆ་ཚང་བཀལ་ན་འོས་འཚམ་མིན་པ་སོགས་བློ་གཟུ་བོར་གནས་ཁུལ་གྱིས་འཁྱོག་བཤད་བྱས་འདུག་པ་དེ་ནི་མཚན་སྨོད་ཧ་ཅང་རླབས་ཆེན་ཞིག་ཡིན།

ད་རེས་སྐུ་ངོ་བཀའ་བློན་མཆོག་གིས་ཆབ་སྲིད་ཀྱི་ལངས་ཕྱོགས་གསལ་བོར་མཚོན་ཕྱིར། ཐལ་ཆ་ཅན་གྱི་ཐག་གཅོད་གནང་འདུག་པ་དེར་བོད་རྒྱ་ཆེའི་མི་དམངས་ཀྱིས་དགའ་མོས་བྱེད་མི་སྲིད་ཀྱང་། ཨོ་རྒྱན་སྟོབས་རྒྱལ་གྱིས་ཁྱེད་ཀྱི་བྱས་པ་ལ་དྲིན་བཟོའི་ཚུལ་དུ། “སྐུ་ཉིད་ཀྱིས་བཀའ་སློབ་ལམ་སྟོན་གང་ཕེབས་པ་ཚང་མར་མོས་མཐུན་དང་ལེན་ཞུ་ངེས་ཡིན་” ཞེས་སོགས་བཤད་འདུག་པ་དེ་བཀའ་བློན་མཆོག་ལ་ཐོབ་པའི་དཔའ་དར་ངོ་མ་དེ་ཡིན་འདུག

མདོ་དོན་ང་ཚོས་གསལ་བོར་བསྒྲག་འདོད་པའི་ཐ་ཚིག་དེ་ནི། ཁྱེད་ཅག་གིས་རྒྱལ་བ་དོན་གྱི་བདག་པོ་ལ་མོས་གུས་ཞུ་དགོས་པ་རེད། དད་པ་བྱེད་དགོས་པ་རེད། གུས་བརྩི་ཞུ་དགོས་པ་རེད་སོགས་ནམ་ཡང་ཞུ་བཞིན་མེད་ལ། བོད་མི་ས་ཡ་དྲུག་གི་ངོས་ནས་རྒྱུ་མཚན་ཅི་ཡང་མེད་པར་རྒྱལ་བ་རིན་པོ་ཆེ་ལ་དད་པ་དང་ཡིད་ཆེས་བྱ་དགོས་པའི་འབོད་སྐུལ་སྦྲང་སྒྲ་ཙམ་ཡང་ཞུ་མི་སྲིད།

འོན་ཀྱང་ལྷན་རྒྱས་ཀྱིས་བསྟན་པ་སྐྱོང་མཁན་དང་བཤིག་མཁན་གཉིས་ཨ་མ་དང་རྐུན་མ་ནོར་བའི་བརྟུལ་ཞུགས་བཟུང་སྟེ། དཀར་ནག་གོ་ལྡོག་གི་བཙན་གཏམ་བསྒྲགས་པ་དེ་རིགས་ལ་ང་ཚོ་མི་དམངས་ཉམ་ཆུང་ཚོར་ནུས་པ་མེད་ཀྱང་ཡི་རང་བྱེད་མི་སྲིད་པ་དང་། མོས་མཐུན་དེ་བས་ཀྱང་མེད་པའི་མངོན་འདོད་གསལ་བོར་སྟོན་གྱིན་ཡོད།།

ཞེས་བྱང་ཨ་མི་རི་ཁའི་ནགས་ཁྲོད་དུ་འཚོ་བའི་རྒྱལ་ཁམས་པ་ཧོར་གཙང་འཇིགས་མེད་དུ་འབོད་པས་སྤྱི་ལོ་༢༠༢༠ ལོའི་ཟླ་༥ ཚེས་༢༧ གྱི་མཚན་མོར་བྲིས་ཏེ་ཕུལ།།