ཏོག་དབྱིབས་རྒྱ་ནད་དང་འཛམ་གླིང་གི་བོར་བརླག་སོང་བའི་བོད་རྙེད་ཐབས།

རྟ་འགྲིན་སྐྱབས།

གཅིག

ཏོག་དབྱིབས་ནད་དུག་དང་བཙལ་བྱོལ་ཁྲོད་ཀྱི་ཀུ་ཅོ།
སྔོན་གླེང་གི་ཚུལ་དུ་ཅུང་ཙམ་མོལ་ན་རྒྱ་ནད་ཏོག་དབྱིབས་ཅན་གྱི་འཛམ་གླིང་སྤྱི་ཡོངས་སུ་དཀའ་ངལ་བཟོ་དང་བཟོ་བཞིན་པའི་དུས་སྐབས་འདིར་འཛམ་གླིང་ཤར་ནུབ་ཀྱི་སྟོབས་ཆེན་རྒྱལ་ཁབ་དག་གིས་རྒྱ་ནག་གཞུང་ལ་དངོས་ཤུགས་རྒྱུད་གསུམ་ནས་གནོད་ཤུགས་ཡ་ལན་གང་ཐུབ་ཅི་ཐུབ་ལ་འབད་པ་བྱེད་བཞིན་པའི་དུས་སུ་འུ་ཚོ་བཙན་བྱོལ་གཞུང་མང་གཉིས་ནས་ནང་ཁུལ་ཕྱོགས་ཞེན་གྱི་ཀུ་ཅོ་རྐྱང་རྐྱང་སྒྲོག་ནས་འདུག ལྷག་ཏུ་ཁ་སང་དེ་རིང་གི་གནས་སྐབས་སུ་སྤྲུལ་མིང་བ་ཞིག་གི་༧གོང་ས་མཆོག་ལ་མཚན་དམོད་བྱས་རྐྱེན་ལ་བརྟེན་བོད་མི་ཚོས་ནང་ཁུལ་གྱི་ཕྱོགས་རེས་འཐེན་འཁྱེར་གྱི་གླེན་རྟགས་འདི་དག་ལ་མགོ་འཁོར་ནས་གནས་འདུག་པ་ལས་བར་སྐབས་ཀྱི་དུས་སུ་རང་དབང་ལུང་བ་བཞུགས་ཡོད་པའི་བོད་མི་དག་གིས་དངོས་ཤུགས་རྒྱུད་གསུམ་ནས་འཛམ་གླིང་མི་མང་གི་སྔུན་དུ་རྒྱ་ནག་གཅེར་བུར་འཕུད་པའི་སྣེ་ཁྲིད་དམ་ཡང་ན་རམ་འདེགས་གང་ཡིན་ཡང་གནས་བབ་ཀྱི་ཆ་ནས་གོ་སྐབས་ཤིག་ཏུ་གྱུར་ཡོད། ཡིན་ན་ཡང་བཙན་བྱོལ་ན་འདི་ལྟར་ཞེན་ཁོག་དང་འཐེན་འཁྱེར་ཁོ་ནར་མགོ་འཁོར་ནས་འདུག་པ་འདི་ཡང་རྒྱ་ནག་དམར་པོའི་གཞུང་གི་བྱིན་རླབས་ཤིག་དང་དབང་བདུད་ཅིག་ཡིན་པ་འདྲ། འདི་ལྟར་བྱས་ན་ང་ཚོ་རང་ངོས་ནས་འདི་ལྟར་མི་མངོན་པའི་ཚུལ་གྱིས་རྒྱ་ནག་གཞུང་ལ་རོགས་འདེགས་ཤིག་ང་ཚོ་རང་གིས་སྒྲུབ་བཞིན་པ་མ་ཡིན་ནམ།

སྐབས་འདི་འདྲ་ཞིག་ལ་ཨོ་རྒྱན་སྟོབས་རྒྱལ་གྱིས་སྐད་ཆ་འདི་འདྲ་ཞིག་གིས་དཀྲུགས་རྐྱེན་བཟོ་དགོས་པའང་ཁོ་རང་ལ་༧གོང་ས་མཆོག་ལ་སྡང་སེམས་ཙམ་ལས་བོད་སྤྱི་དོན་ལ་སེམས་ཁུར་བྱེད་མ་ཤེས་པ་དེ་བོད་མི་མང་གི་ཚབ་བྱེད་མྱོང་བའི་སྤྱི་ཟུར་ཞིག་ཡིན་པ་དེ་ཡང་དངོས་གནས་ཡིད་སྐྱོ་དགོས་པ་ཞིག་མ་རེད་དམ། དེ་བས་ཀྱང་ཆོས་རིག་བཀའ་བློན་གྱི་ཐོག་མིའི་སྐད་ཆ་ཞིག་གིས་བོད་མི་མང་ཕྱོགས་ཤིག་གི་སེམས་ལ་ཕོག་ཐུག་དཀྲོགས་རྐྱེན་ཆེ་རུ་བཏང་བ་ནི་དེ་ལས་ཀྱང་ཡིད་ཆད་སྐྱོ་སྣང་སྐྱེ་ཡོང་བ་ཞིག་རེད། ཁོ་གཉིས་སུ་ཡིན་ན་ཡང་སྐད་ཆ་འདི་ལྟ་བུས་བོད་མི་ཚོ་ནང་ཁུལ་ཚ་ཚ་འུར་འུར་དང་ནང་ཁུལ་རྩོད་ཉོག་བྱུང་བ་དེ་གསལ་བོ་ཧ་གོ་གི་ཡོད་རེད་འདོད། རྒྱུ་མཚན་ཁོ་གཉིས་ཀྱི་མགོ་སྐྲ་ཕྱེད་དཀར་རག་བར་དུ་བོད་པའི་སྤྱི་ཚོགས་ནས་བསྡད་པ་རེད། ད་དུང་མི་མང་གི་འཐུས་ཚབ་བྱས་ཏེ་གཞུང་གི་ལས་ཁུར་དང་ལེན་བྱས་དང་བྱེད་བཞིན་པ་རེད། འདི་དང་འདི་ལྟ་བུ་དག་གིས་ང་ཚོའི་སྤྱི་ཚོགས་དང་འབྱུང་འགྱུར་བོད་ཀྱི་རྩ་དོན་ལ་སེམས་ཁུར་བྱེད་མ་ཤེས་པར་སེམས་གྱི་ང་རྒྱལ་ཁོ་ན་ཁུར་ཏེ་འདི་ལྟ་བུའི་དཀྲོགས་རྐྱེན་བཟོ་རྐྱང་བྱས་པས་བཙན་བྱོལ་སྤྱི་ཚོགས་སུ་བཤད་སྲོལ་ཞིག་ལ་བཙན་བྱོལ་བའི་ཁྲོད་དུ་རྒྱ་ནག་གཞུང་གི་གླ་བ་མང་རབས་ཀྱི་ཤོད་རྒྱུན་ཅིག་བྱུང་ཡོད་དེ་རེད། ནམ་རྒྱུན་བཙན་བྱོལ་སྤྱི་ཚོགས་སུ་རྒྱ་ནག་གི་གླ་བ་མང་རབས་ཀྱི་སྐད་ཆ་འདི་འདྲ་བཤད་མཁན་གྲས་ལ་རང་ཉིད་ཞེ་གཏིང་ནས་སུན་གིན་ཡོད་མོད་དེ་རིང་ཁ་སང་གི་སྣང་ཚུལ་ལ་བསམ་ན་ཁོ་ཚོར་དེ་ལྟའི་བཉམ་ཚུལ་བྱུང་བ་དེ་ཡང་ཁག་མི་འདུག་སྙམ་པ་ཞིག་བྱུང་།

སྤྱིར་བྱས་ན་བོད་མིའི་ཁྲོད་དུ་༧གོང་ས་མཆོག་ལ་དད་པ་ཡོད་མེད་གཉིས་ཀ་ཡོད་ལ་དེ་ཡོང་ཆོག་པ་ཞིག་ཀྱང་ཡིན། མང་ཤོས་དེ་ནི་དད་གུས་གཉིས་ལྡན་བོད་མི་བྱིངས་ཡིན་ལ། ཁག་ཅི་གུས་བཀུར་ལས་དད་པ་མེད་མཁན་ཡིན། ཁག་ཅིག་དད་གུས་གཉིས་ཀ་མེད་མཁན་ཡིན། འོན་ཀྱང་བོད་མིའི་སྤྱི་ཚོགས་སུ་གནས་ཆོག་པ་ཞིག་དང་དེ་འདྲ་ཡོད་ཆོག་པ་ཞིག་རེད། དད་པ་མེད་ཀྱང་བཀའ་དྲིན་བསམ་ཤེས་ཟེར་བ་ཞིག་ཡོང་དགོས་པ་འདྲ་མོད་དེ་ཡང་མེད་ཟེར་མཁན་ལ་སྡང་སེམས་དང་དགྲ་རུ་ལྟ་དགོས་དོན་ནི་མི་འདུག་སྙམ། འོན་ཀྱང་སེམས་རྒྱུད་ཕྱོགས་རེས་ཁོ་ནས་བསླུས་ཡོད་མཁན་དང་ཀུན་སྤྱོད་རྒྱ་གཞུང་གི་དངུལ་ལོས་ཉོས་ཡོད་མཁན་དེ་དག་ནི་མི་རིགས་ཤིག་གི་བྱིངས་བླུན་རྨོངས་ཡིན་པའི་འུ་ཚོར་མཚོན་ན་ཉེན་ཚབ་ཆེན་པོ་ཡིན་པ་རེད།

སྐབས་འདི་ལྟ་བུ་ཞིག་ལ་ཨོ་རྒྱན་སྟོབས་རྒྱལ་དང་ཀརྨ་དགེ་ལེགས་གཉིས་ཀྱིས་དེའི་ཕྱོགས་སུ་སེམས་ཁུར་བྱེད་མ་ཤེས་པའམ་མ་བྱས་པ་དེ་ནི་བོད་མིའི་སྤྱི་ཚོགས་སུ་མི་མང་པོ་ཞིག་གི་འགོ་འཁྲིད་ཀྱིན་ཡོད་ཟེར་མཁན་ཁྲོད་ཀྱི་གཉིས་ཡིན་པ་དེ་དངོས་ནས་བློ་ཕམ་རེད།

དེ་རིང་ཁ་སང་གི་གནས་སྟངས་ནི་ཅི་འདྲ་རེད་ཞུས་ན་འཛམ་གླིང་ཁྱོན་ཡོངས་རྒྱ་ནད་ཀྱི་ནང་མགོ་འཐོམ་ནས་འདུག་ཡོད་པ་རེད། སྐབས་དེར་རྒྱ་ནག་གཞུང་གིས་ཁོང་སང་ལ་གནོད་པའི་རྒྱལ་ཁབ་དང་ཡུལ་ལུང་དག་ལ་དངོས་ཤུགས་རྒྱུད་གསུམ་ནས་སུན་པོ་བཟོ་བཞིན་དམར་ཕྱོགས་གཞུང་ཁོ་རང་ཡང་ཁོམ་ལོང་མེད་པའི་དུས་སྐབས་ཤིག་རེད། ཕྱི་ཚུལ་ནས་ས་མཚམས་སོགས་སུ་སུན་པོ་བཟོ་བ་དང་མི་མངོན་པའི་ཐོག་ནས་གསང་ཉུལ་བ་བཀོལ་ཏེ་དཀྲུགས་ཤིང་བཟོས་ཤིང་རྒྱལ་ཁབ་དང་ཡུལ་ལུང་དེ་དག་གི་ཕྱི་ནང་གསང་གསུམ་ཕམ་པར་འབད་བཞིན་པའི་གནས་བབ་ཅིག་རེད། གནས་བབ་འདི་འདྲ་ཞིག་ལ་བཙན་བྱོལ་བོད་མི་འཇམ་ཇག་གེར་ཁྱིམ་སྡོད་བཀག་རྒྱ་ཁོ་ནར་མགོ་སྒུར་ནས་སྡོད་དུས་ཤིག་ཡིན་ནམ།

དེ་བས་ང་རང་ངོས་ནས་བསམ་ན་ཏོག་དབྱིབས་ཅན་གྱི་ནད་དུག་དེ་རྒྱ་གཞུང་གིས་བསམ་བཞིན་དང་བསམ་བཞིན་མ་ཡིན་པའི་ཐོག་ནས་བཏང་བའི་ལག་ཆ་ཞིག་ལ་དངོས་འཛིན་བྱེད་ཀིན་ཡོད་ལ་དེ་ལྟར་ཡིན་པར་ཡིད་ཆེས་ཀྱང་བྱེད་བཞིན་ཡོད། ཅི་ཞིག་ལ་བསམ་བཞིན་དང་བསམ་བཞིན་མ་ཡིན་པ་ཟེར་བཞིན་ཡོད་ཟེར་ན། ནད་དུག་དེ་ཚོད་ལྟ་ཁང་ནས་ཕྱིར་ཤོར་སོང་བ་ཞིག་ལས་ཚོད་ལྟ་ཁང་དང་མ་འབྲེལ་བར་སེམས་ཅན་ག་གེ་མོ་ཞིག་དང་འབྲེལ་ནས་ཤ་བཙོང་ར་བ་ཞིག་ལས་བྱུང་བ་མ་ཡིན་པ་དེ་མངོན་གསལ་དོད་པོ་རེད། དེ་ནི་བོའུ་ཧན་ད་ཡོད་པའི་ཚོད་ལྟ་ཁང་ནས་ཐོན་པའི་ནད་དུག་ཅིག་ཡིན་པ་ཕྱོགས་ཡོངས་ནས་ཁ་ཇེ་གསལ་དང་ཁུངས་ཇེ་མཐུག་ལ་འགྲོ་བཞིན་ཡོད་པ་དེ་དབྱེ་ཞིབ་པ་དག་གི་སྐད་ཆ་དག་ཁོ་ན་མ་ཡིན་པར་དམར་ཕྱོགས་གཞུང་གི་བྱེད་སྟངས་དེ་དག་ལས་ར་འཕྲོད་ཡོང་བ་ཞིག་རེད། གཞན་ད་སྐབས་གར་སོང་ཆ་མེད་དུ་གྱུར་བའི་བོའུ་ཧན་གྲོང་ཁྱེར་གྱི་རྒྱ་མི་སྐོར་ཞིག་གིས་ཀྱང་བཤད་ཡོད་པ་རེད། དེ་བས་བསམ་བཞིན་མ་ཡིན་པར་ཤོར་སོང་བའི་ཟོལ་གྱི་ནད་དུག་ཅིག་ཆགས་ཀྱིན་ཡོད་པ་རེད་མོད། ང་རང་ཉིད་སྒེར་གྱི་བསམ་ཚུལ་ལ་དེ་ནི་དམར་ཕྱོགས་གཞུང་གིས་ཟློས་གར་ཞིག་འཁྲབ་པ་ལས་བསམ་བཞིན་དུ་འཛམ་གླིང་ལ་ཁ་གཏད་པའི་མཚོན་ཆ་ཞིག་ཏུ་ངོས་འཛིན་བྱེད་བཞིན་ཡོད། ཡིན་ཡང་མཐར་ཐུག་གི་དམུགས་ཡུལ་དེ་འགྲུབ་མིན་བཤད་དཀའ་ཚོད་ཅིག་ཡིན་པའི་རྒྱུ་རྐྱེན་མང་དག་བྱུང་ཡོད་ཚོད་ལ་སྒེར་ངོས་ནས་ཚོད་དཔག་བྱེད་བཞིན་ཡོད།

ཅི་ཞིག་གིས་རྒྱ་ནག་གཞུང་གིས་ཟླ་གཉིས་མ་ཟིན་ཙམ་གྱི་ནང་དུ་ནད་ཡམས་དེ་ལས་སླ་བོས་སྟངས་འཛིན་བྱེད་ཐུབ་སོང་བ་རེད། དེ་ནི་སྔ་མོ་ནས་གྲ་སྒྲིག་ཅིག་ཡོད་སོང་བ་རེད་འདོད། ཕྱི་ཕྱོགས་ཀྱི་གསར་འགྱུར་ལ་འདྲ་མིན་ཅི་རིགས་ཀྱང་རྒྱ་ནག་ཏུ་ནད་ཡམས་ཛ་དྲགས་ཀྱི་གནས་སྟངས་ནི་ཟླ་གཅིག་ལྷག་གི་དུས་ཡུན་ཙམ་ལས་སོང་མེད། དེའི་རིང་མི་གྲངས་ག་ཚོད་ཅིག་གི་ཚེ་སྲོག་ཤོར་བ་དེ་དམར་ཕྱོགས་གཞུང་ཁོ་ན་ལས་རྒྱ་ནག་གི་ཕྱི་ནང་གང་ནས་ཡང་གྲངས་འབོར་གསལ་ཐག་ཆོད་ཅིག་ཤེས་མཁན་མེད། ནད་དུག་ག་ཚོད་ཅིག་ལ་འགོས་པ་དང་ཅི་ཙམ་ཞིག་ཤི་བ་དེ་དམར་ཕྱོགས་གཞུང་ལ་མཚོན་ན་ཅི་ཡང་མ་ཡིན། བློས་གཏོང་དེ་ནི་དམར་གཞུང་ལ་མཚོན་ན་ཅི་གང་མིན། སད་རྒྱུ་མེད་པའི་རྒྱ་ནག་མི་མང་ལ་མཚོན་ན་སྲིད་གཞུང་དེ་ལྟ་བུ་ཞིག་ནི་ཁོང་ཚོར་ཏག་ཏག་འོས་ཤིང་འཚམས་པ་ཞིག་ཡིན་པ་རེད། ཅིག་བྱས་ན་ནད་དུག་དེའི་འགོག་སྨན་ཐོག་མར་བཟོ་ཐུབ་མཁན་དེ་རྒྱ་ནག་ཡིན་སྲིད་པ་རེད། དེ་འདྲ་ཡིན་བསམ་བཞིན་དུ་བཟོས་པ་དེ་ར་འཕྲོད་སོང་བ་རེད། གལ་སྲིད་འགོག་སྨན་བཟོ་མཁན་དེ་རྒྱ་ནག་མ་ཡིན་ན་ཁོ་སང་གི་ནད་དུག་བཟོས་རྗེས་ཚོད་ལྟ་བྱེད་སྐབས་དུས་ལ་མ་སླེབས་གོང་ཤོར་སོང་བ་ཡིན་པར་ཚོད་དཔག་བྱེད་པ་དེ་ལ་ཐག་ཉེ་རུ་ཕྱིན་པ་རེད། གང་ལྟར་འོལ་ཚོད་ནི་འོལ་ཚོད་རང་ཡིན་པས་མང་པོ་གླེང་དགོས་དོན་མི་འདུག་མོད། ནད་དུག་དེ་རྒྱ་ནག་གཞུང་གིས་བཟོས་པ་ཞིག་ལ་ངོས་འཛིན་དང་ཡིད་ཆེས་བྱེད་ཆོག་པ་ལྟ་བུ་ཞིག་ཡིན། ལྷག་ཏུ་ང་ཚོ་བོད་ནས་སྐྱེས་ཤིང་བོད་ནས་འཚར་བའི་མི་ཞིག་ལ་མཚོན་ན་རྒྱ་ནག་གཞུང་གི་བྱེད་སྟངས་དེ་ཧ་ཅང་རྒྱུས་མངའ་ཡོད་ཡོད་པ་ཞིག་རེད། དེ་ནི་ང་ཚོའི་ཕ་མེས་ཡང་མེས་རྣམས་ཀྱིས་གསུངས་མྱོང་བ་དེ་དག་དང་སོ་སོའི་བྱིས་དུས་ནས་བཟུང་རྒྱ་ནག་དམར་གཞུང་གིས་གཡོ་རྒྱུ་འཁྲབ་སྟངས་དེ་དག་དང་ལྷན་དུ་ནར་སོན་ཡོང་མཁན་དག་ལ་མཚོན་ན་མྱོང་གྲུབ་ཡིན་པས་དོགས་པ་ཆེན་པོ་ཞིག་ཟ་དགོས་དོན་མེད་པ་རེད། ཡིན་ཡང་ནུབ་ཕྱོགས་ཀྱི་རྒྱལ་ཁབ་དག་ལ་མཚོན་ན་བོད་དང་ཡུ་གུར་གྱི་མི་རྣམས་དང་མི་འདྲ་བར་རྒྱ་ནག་དམར་གཞུང་གི་ངོ་གདོང་མངོན་སུམ་དེ་མཐོང་མྱོང་མེད་ཙང་རྒྱ་ནག་གི་ཁྲེལ་མེད་ཕྱི་ཐག་ཡོངས་སུ་རྫོགས་པ་དེ་ཁོ་ཚོས་གསལ་ཐག་ཆོད་ཅིག་ཤེས་ཀིན་མེད་པ་དེ་རེད། གལ་སྲིད་ཁོང་ཚོས་བོད་མི་དང་ཡུ་གུར་བ་ནང་བཞིན་རྒྱ་ནག་ཟེར་བ་དེ་གསལ་བོ་ཁེད་པོ་ངོ་ཤེས་པ་ཡིན་ན་ཁོང་ཚོས་ཕྱི་ཚུལ་ནས་རྒྱ་ནག་ཕྱོགས་ནས་ཁེ་བཟང་ཞིག་ལོན་གི་ཡོད་པ་དེ་ཁོ་ན་ཙམ་གྱིས་རང་གི་རྒྱལ་ཁབ་དང་འཛམ་གླིང་གི་ཕྱི་ཐག་ལ་བསམ་བློ་མི་གཏོང་བ་དེ་འདྲ་ཡིན་མི་སྲིད། འོན་ཀྱང་ནུབ་ཕྱོགས་རྒྱལ་ཁབ་དག་གིས་རྒྱ་ནག་ནས་ཁེ་ཕན་སྒྲུབ་པར་འབད་འབད་པའི་ཐ་མར་དེ་རིང་ཁ་སང་གི་གྱོང་གུད་འདི་ཉོས་ཡོད་པ་རེད། ད་ནི་རྒྱ་ནག་གི་ངོ་གདོང་ཕྱེད་ཙམ་འཛམ་གླིང་གིས་མཐོང་ཡོང་གིན་པའི་དུས་སུ་འུ་ཚོ་བོད་མི་དག་གིས་ཁ་ནང་དུ་འཁོར་ནས་ཕྱོགས་ཞེན་དང་འཐེན་འཁྱེར་ཁོ་ནར་མགོ་འཁོར་ནས་མི་འདུག་པར་གཞུང་དང་མི་མང་གཉིས་ནས་འཛམ་གླིང་མི་མང་གི་མཐོང་ལམ་དུ་གང་ཐུབ་ཐུབ་ཀྱིས་དོན་དངོས་སུ་རྒྱ་ནག་གཞུང་ཟེར་བ་དེ་ཅི་འདྲ་ཞིག་ཡིན་པ་གསལ་བོར་གོ་བརྡ་སྤྲད་པའི་དུས་ཤིག་ལ་སླེབས་འདུག་སྙམ།

འདི་ནི་རང་གཞན་གཉིས་ཀར་ཁེ་བཟང་ཡོད་པའི་ལས་ཀ་དེ་ཡིན་པས་དེ་དོར་ནས་བསམ་བཞིན་མཁན་དང་བསམ་མ་ཤེས་མཁན་གྱིས་ནང་ཁུལ་དཀྲུགས་ཤིང་བཟོས་དེ་དག་ལ་མགོ་འཁོར་ནས་མི་སྡོད་པ་དེ་དོན་དངོས་ཀྱི་བཙན་བྱོལ་བ་ཞིག་ཡིན་དགོས།

གཉིས།

རྒྱ་ནག་དམར་གཞུང་གི་དགོས་དོན་སྒྲུབ་མཁན་གྱི་ཁེ་ལས་པ་དང་བཟོ་ཚོང་ལས་གཉེར་ཁང་དེ་དག་གི་དཔལ་འབྱོར་གནོད་ཤུགས་ལ་ཡ་ལན།
བོད་དོན་ལས་འགུལ་ཟེར་དུས་དར་ཞིག་ཕྱར་སྐད་འབོད་རྒྱག་པ་དེ་ཁོ་ན་མིན་པ་ཀུན་གྱིས་ཤེས་གསལ་རེད། དེ་མི་ཤེས་མཁན་ཡོད་ན་དེ་ཚོས་བོད་དོན་ཟེར་ནས་ཁ་ལ་ཁྱེར་མ་ཁྱེར་ཁྱད་པར་ཅི་ཡོད། ནམ་རྒྱུན་ང་རང་གི་ལྟ་ཚུལ་ལ་དར་ཕྱར་སྐད་འབོད་རྒྱག་པ་ནི་གོ་བ་ཅན་གྱི་གཞུང་ཞིག་ལ་རེ་སྐུལ་བྱེད་པའི་ལས་འགུལ་ཞིག་ལས་གོ་བ་མེད་པའི་གཞུང་ཞིག་ལ་ཡ་ལན་སྤྲོད་སྟངས་ཤིག་ལ་ངོས་འཛིན་བྱེད་ཀྱིན་མེད། དེ་བས་དེང་གི་ཆ་འཕྲིན་ཅན་གྱི་དུས་སུ་ལས་འགུལ་ཟེར་བ་དེ་ཁྱིམ་དུ་ལྷོད་ལྷོད་བྱས་ནས་སྤེལ་ཆོག་པ་ཞིག་དང་ཉལ་སའི་ནང་ནས་ཀལ་སྐྱལ་དུ་ཉལ་ནས་སྤེལ་ཆོག་པ་ཞིག་ཀྱང་རེད་འདོད། དེང་གི་ཆ་འཕྲིན་ཅན་གྱི་དུས་སུ་ལས་འགུལ་ཟེར་བ་དེ་ཁྱིམ་དུ་ལྷོད་བྱས་ནས་སྤེལ་ཆོག་པ་ཞིག་དང་ཉལ་སའི་ནང་ནས་ཀལ་སྐྱལ་དུ་ཉལ་ནས་སྤེལ་ཆོག་པ་ཞིག་ཀྱང་རེད་འདོད། ཁྱོད་རང་ཁྱོམ་དུ་བསྡད་ནས་ཁྱོད་ཀྱིས་སྤྱི་ཚོགས་དྲ་བ་ཁག་གི་སྒོ་ཕྱེས་པ་ནས་ལས་འགུལ་ཟེར་བ་དེའི་འགོ་གང་ནས་འགོ་རྩོམ་ཡང་ཆོག་པ་ཞིག་རེད། དེ་བས་ཀྱང་དེང་གི་ཁྱིམ་སྡོད་བཀའ་རྒྱའི་འོག་ཡོད་པས་དུས་སུ་བོད་དོན་ལས་འགུལ་ཟེར་བ་དེ་དཀའ་ལས་གང་ཡང་མེད་པའི་ཐོག་ནས་སྤེལ་ཆོག་པ་ཞིག་རེད་འདོད། དེ་བཞིན་ང་ཚོའི་སྤུན་ཟླ་སྐོར་ཞིག་གིས་དུས་དང་ནམ་པ་ཀུན་ཏུ་རྒྱ་ཆེ་ཆུང་ལ་མ་ལྟོས་པར་དྲ་ཐོག་ཏུ་དུས་རྒྱུན་ལས་འགུལ་འདྲ་མིན་སྤེལ་བཞིན་འཛམ་གླིང་མི་མང་ལ་བོད་དོན་གླེང་ཀྱིན་ཡོད། འོན་ཀྱང་མང་དག་ཅིག་གིས་དེ་ཚོར་དུས་ནམ་ཡང་ཁ་རྡུང་དང་སྡང་མིག་ལྟ་བཞིན་དེ་དག་ནི་བོད་ཡིག་མི་ཤེས་མཁན་དང་ཕྱི་རྒྱལ་གྱི་ལྟ་བ་ཡོད་མཁན་ཚོ་ཡིན་པར་བཤད་མཁན་དག་རེད། ཁོ་ཚོས་བོད་ཡིག་གིས་རྩོམ་ཉོག་རེ་བྲིས་ཏེ་དུས་ནམ་ཡང་བོད་ཡིག་གི་དྲ་བ་རེ་འགའ་དང་ངོ་དེབ་ཙམ་གྱི་ར་བ་ལས་བརྒལ་ཐུབ་ཀྱི་མེད་པ་དེ་རེད་མོད་སྐབས་འདིར་འདི་དག་བཤད་དགོས་མི་འདུག
འདིར་བཤད་བྱ་དངོས་དེ་རྒྱ་ནད་ཏོག་དབྱིབས་ཅན་གྱིས་འཛམ་གླིང་སྲིལ་བོར་ཁྱིམ་ལ་དགུན་གྱི་ཕྱི་བ་འཛུལ་སྡོད་པའི་སྐབས་དང་ཨ་རིའི་གཙོའི་འཛམ་གླིང་གར་སར་ཁྱོན་མི་འབུམ་བཞི་མ་ཟིན་བམ་གྱི་ཚེ་སྲོག་འཕྲོག་ཟིན་པའི་གནས་བབ་འདི་ལྟ་བའི་དུས་སུ་རྒྱ་ནག་མི་མང་ཕུད་པའི་འཛམ་གླིང་གི་མི་མང་བརྒྱ་ཆ་དགུ་བཅུ་རྒྱ་ནད་དང་རྒྱ་ནག་ལ་སྡང་སེམས་སྐྱེད་བཞིན་ཡོད་པའི་དུས་སྐབས་ཤིག་རེད། སྐབས་འདི་དང་བསྟུན་ནས་བཙན་བྱོལ་བོད་མི་གཞུང་མང་གཉིས་ལ་ནི་གོ་སྐབས་ཤིག་རེད་འདོད། དེ་བས་ང་ཚོས་བཙན་བྱོལ་གཞུང་ནས་རྒྱ་གར་དང་ཨ་རི་གཙོའི་རྒྱ་ནག་ལ་སྡང་བཞིན་པའི་རྒྱལ་ཁབ་དག་དང་ལྷན་དུ་རྒྱ་ནག་གཞུང་གི་སྐྱོན་ཐེར་འདོད་དང་མི་མང་གིས་ངོས་ནས་རྒྱ་ནག་གཞུང་དང་འབྲེལ་བའི་རྒྱ་ནག་གི་དཔལ་འབྱོར་དབང་ཤུགས་འཛམ་གླིང་ལ་སླེབས་བཞིན་པའི་བཟོ་ཚོང་དག་ལ་གནོད་ཤུགས་སྤྲོད་རྒྱུ་དེ་རེད་འདོད།

གཤམ་ནས་རང་གིས་ནུས་ཚོད་ཀྱི་རྒྱ་ནག་གཞུང་གི་རྒྱབ་རྟེབ་ལན་བྱས་ཡོད་པའི་བརྡ་འཕྲིན་དང་འབྲེལ་བའི་བཟོ་ཚོང་ཁང་ཁག་ཅིག་གི་གོ་ལ་འདིར་ག་ལེར་དབང་བསྒྱུར་བྱེད་བཞིན་ཡོད་པ་དང་དེའི་དག་གི་རྒྱབ་ལྗོངས་སུ་རྒྱ་ནག་དམར་གཞུང་གི་དམུགས་ཡུལ་དགོས་དིན་དང་འབྲེལ་ནས་ཡོད་པ་དག་ཅུང་ཙམ་གླེང་འདོད་བྱུང་། རྒྱ་ནག་ནས་ཐོན་པའི་བཟོ་ཚོང་ལས་རིགས་དང་ཐོན་རྫས་མང་པོ་ཞིག་གིས་འཛམ་གླིང་གི་ཁྲོམ་རར་མངོན་གསལ་མ་ཡིན་པའི་ཐོག་ནས་བཙན་གཡེམ་བྱེད་བཞིན་ཡོད། དེ་དག་གི་སྣེ་ཁྲིད་པའི་ཁེ་ལས་པ་སྐོར་ཞིག་གི་དཔེར་མཚོན་ཙམ་ཞུས་ན།马化腾, 马云, 任正非ནང་མི, 宿华 , 张一鸣 , 沈伟, 陈明永, 雷军 སོགས་འདི་དག་ནི་རྒྱ་ནག་གི་ཁེ་མི་སྣའི་ཁྲོད་ཀྱི་འཇོན་ཆེན་མི་སྣའི་དཔེ་མཚོན་ཙམ་རེད། ཁོང་ཅག་ནི་རྒྱ་ནག་གི་མི་ཕྱིངས་དང་འདྲ་བར་ཁེ་བཟང་རེག་སོང་ན་རྒྱུ་འབྲས་དང་བདེན་རྫུན་ལ་ཅི་སྙམ་མཁན་གྱི་རྒྱ་ནག་པའི་ལེགས་གྲུབ་མཁན་ཆེ་གེ་མོ་དག་རེད། འདི་དག་གི་བྱེད་ལས་ནི་རྒྱ་ནག་ཕྱི་ལོགས་ཀྱི་འཛམ་གླིང་གི་ཁྲོམ་རར་ཤུགས་རྐྱེན་ཆེ་བའི་རྒྱ་ནག་དམར་གཞུང་གི་གཅེས་ཕྲུག་སྐོར་ཞིག་རེད། དི་དང་འདི་འདྲ་བའི་མི་སྣ་ཧ་ཅང་མང་པོ་རྒྱ་ནག་གཞུང་གིས་བསྐྱེད་བསྲིང་བྱེད་བཞིན་ཡོད་མོད་དེ་དག་གི་ཁྲོད་ནས་འགའ་རེར་ལམ་སློང་མ་བྱུང་བར་རྒོད་ཤོར་སོང་བ་ཡང་ཡོད་པ་རེད། 郭文贵 ནི་དཔེ་མཚོན་ཡག་ཤོས་ཤིག་ཡིན། གང་ལྟར་མི་ལོ་བཅུ་གྲངས་ལྷ་གི་ནང་དུ་རྒྱ་ནག་པ་ཁོ་རང་སང་གིས་བཤད་པ་ལྟར་འཕུར་མཆོང་ལྟ་བའི་རྣམ་པའི་ཐོག་ནས་འབྱོར་ཆེན་མི་སྣ་ཧ་ཅང་མང་པོ་ཞིག་བྱུང་ཡོད་ལ་འབྱུང་བཞིན་ཡོད་པ་ནི་རྒྱ་ནག་དམར་གཞུང་གི་རོགས་དངུལ་དང་འབྲེལ་བ་ཡོད་པ་ཤ་སྟག་ཡིན། ཐ་ན་ཕྱིའི་རྒྱལ་ཁབ་ཁག་ཏུ་སོང་ནས་ཚོང་ལས་ཙག་ཙིག་གཉེར་མཁན་དག་ལ་ཡང་རོགས་དངུལ་སྤྲད་ནས་དེ་གར་ས་འཛིན་ཐབས་ཀྱིས་སྐུལ་མ་བྱེད་བཞིན་ཡོད། གང་ན་རྒྱ་ནག་པ་མང་ན་དེ་རུ་རྒྱ་གཞུང་གི་ཤུགས་རྐྱེན་སླེབས་ཐུབ་ཀྱི་ཡོད་པ་ཡིན། ཨེ་ཤ་ཡའི་རྒྱལ་ཁབ Cambodia དང་ Bangladesh Pakistan Nepal Iran བཅས་ཀྱི་མཚོན་པའི་རྒྱལ་ཁབ་འདི་དག་གི་ནང་རྒྱ་ནག་དམར་གཞུང་གིས་ཤུགས་རྐྱེན་ཏེ་གཞུང་འབྲེལ་ཙམ་ཁོ་ན་མིན་པར་རྒྱ་ནག་མི་སེར་ལ་སྒེར་ངོས་ནས་རོགས་རམས་ཀྱིས་ཐོག་ནས་མི་སེར་སྤེལ་ཡུལ་དུ་གཏོང་གིན་ཡོད། རྒྱབ་གཞན་དག་གི་ནང་དུ་ཡོད་པའི་རྒྱ་མི་དག་གི་ས་ནས་གནས་ཚུལ་ཞིབ་ཕྲ་དེ་ཙམ་མ་རྟོགས་མོད། བལ་ཡུལ་དང་ཀམ་པོ་ཊི་ཡའི་ནང་དུ་རྒྱ་མི་ཚོང་ལས་གཉེར་མཁན་དག་ལ་རང་ཚུགས་མ་ཤོར་བའི་ཐོག་ནས་ཚོང་ལས་གཉེར་ཏེ་ས་འཛིན་ཐུབ་པ་བྱུང་བ་ཡིན་ན་རྒྱ་ནག་གཞུང་གི་ལྟ་རྟོག་ཡོད་པ་རེད་ཅེས་རྒྱ་མོ་ཞིག་གིས་བཤད་བྱུང་། ངས་ཧ་གོ་ན་ཡང་བསམ་བཞིན་རང་ཚུགས་མ་ཤོར་བའི་ཐོག་ནས་ཟེར་བ་དེ་ཅི་ཡིན་དྲིས་སྐབས་ཁོ་མོས་རྒྱ་ནག་གཞུང་གི་རྩ་དོན་མ་བོར་བའི་ནས་ཟེར་གིན་ཡོད་པ་རེད་ཟེར། དེ་ལས་ཀྱང་རྒྱལ་ཁབ་དར་དག་གི་ནང་དུ་གསར་རུ་ཚོང་ལས་གཉེར་བར་བསྐྱོད་པའི་མི་སེར་དག་ལ་འང་རྒྱབ་གཉེར་རོགས་དངུལ་གཡར་གྱི་ཡོད་པ་རེད་ཟེར། དེ་ལྟར་རྒྱལ་ཁབ་ལ་དགོས་པའི་གནས་ཚུལ་དག་ཀྱང་མི་དེ་དག་གི་ས་ནས་བསྡུ་རུབ་བྱེད་ཆོག་གིན་ཡོད་པ་རེད་ཟེར། ཆུང་ས་འདི་ལྟ་བུའི་ཐོག་ནས་ཀྱང་རྒྱ་ནག་གཞུང་གི་ལྐོག་བྱུས་ངན་པ་དེ་དག་གིས་འཛམ་གླིང་ཡུན་གྱི་ཟ་བཞིན་ཡོད་པ་རེད། ཆེ་ས་ནས་གོང་གི་མིང་སྨོས་མི་སྣ་དེ་དག་གི་བཟོ་ཚོང་ཐོན་སྐྱེད་དང་འབྲེལ་ནས་ཡོད་པ་ཞིག་རེད། རྒྱ་ནག་གི་ཤུགས་རྐྱེན་དེ་དག་ད་ནི་ཧྥེ་གླིང་དང་ཨེ་ཤ་ཡ་ཁོ་ན་ཙམ་མ་ཡིན་འཛམ་གླིང་ཁྱོན་ཡོངས་ཀྱི་ཉིན་རེའི་འཚོ་བ་ཐེ་བའི་དཔལ་འབྱོར་ལ་ཤུགས་རྐྱེན་ཐེབས་བཞིན་ཡོད་པ་དེ་རེད། ཆེ་བ་དེ་དག་གི་དཔེ་མཚོན་ནི 马云ནམ Jack Ma ནི་་འཛམ་གླིང་ཤར་ནུབ་ཀྱི་དཔལ་ཡོལ་སྤྱི་ཚོགས་ཁྲོད་དུ་ཤུགས་རྐྱེན་ཐེབས་ཚད་ཆེས་ཆེ་བའི་རྒྱ་ནག་གི་ཁེ་ལས་པ་ཞིག་ཡིན། མ་ཡོན་དང་ཁོའི་Alibaba ཚོང་གཉེར་ཁང་གིས་དམུགས་ཡུལ་ནི་Amazon ཕམ་པར་བྱས་ནས་འཛམ་གླིང་གི་ཚོང་གཉེར་ཁང་ཆེས་ཕྱུགས་ཤོས་ཀྱི་གོ་སར་བསྙེག་རྒྱུར་འབད་བཞིན་ཡོད།མ་ཡོན་གྱི་སྐད་ཆ་དང་ཀླད་པའི་རྩལ་ལས་འཛམ་གླིང་ཤར་ནུབ་ཀྱི་ཡུལ་གྲུ་ཁག་ཏུ་མིག་འཁྲུལ་ཞིག་སྟོན་བཞིན་ཡོད་ལ་ཁོའི་མིག་འཁྲུལ་དེའི་ལྟག་རྒྱབ་དུ་རྒྱ་ནག་དམར་གཞུང་གི་དམུགས་ཡུལ་ངེས་ཅན་ཞིག་སྦས་སྐུང་བྱས་ནས་ཡོད། ཕྱོགས་གཞན་ཞིག་ནི་任正非ནང་མིའི་རེད། 任正非་ནང་མིའི 华为ཚན་རྩལ་བཟོ་ཚོང་ཁང་གི་ཤུགས་རྐྱེན་དང་དེའི་ལྟག་རྒྱབ་ཀྱི་རྒྱ་ནག་གཞུང་གི་ངོ་གདོང་དེ་དག་ལོ་འགའི་སྔོན་ནས་གསར་འགྱུར་རྒྱུད་ལམ་གླེང་སློང་མང་པོ་བྱས་ཡོད་པ་དང་། ལྷག་དུ་དེ་རིང་ཁ་སང་ཡང་ཨ་རིས་རྒྱ་ནག་ལ་གཞུ་བྱེད་ཀྱི་ཆབ་སྲིད་ལག་ཆ་དེ་དག་གི་ཁྲོད་དུ་ཡོད་པ་ཀུན་གྱིས་ཤེས་གསལ་ལྟར་འདི་སང་གི་སྐོར་མང་པོ་གླེང་མ་དགོས་མི་འདུག

དེ་ལས་ཀྱང་ང་ཚོ་བོད་མི་དང་འབྲེཔ་བ་ཆེས་ཆར་ཡོད་པ་ནི་སྐད་ཕྲིན་ནམ་wechat ཁ་པར་མཉེན་འདི་རེད། འདི་ནི་མཐོ་བ་བོད་ཀྱི་བཀའ་ཤག་ནས་བླ་ཆེན་ཁག་དང་བོད་མི་བརྒྱ་ཆ་གོ་དགུས་བེད་སྤྱོད་གཏོང་གིན་པ་དེ་རེད། འདི་ནི་རྒྱ་ནག་གི་ཕྱུགས་ཆེན་ཨང་དང་པོ་马化腾 དང་ཁོང་གི་tencent 腾讯 ཚན་རྩལ་བཟོ་ཚོང་ཁང་གིས་བཟོས་པའི་དེང་གི་དུས་སུ་ཨེ་ཤ་ཡའི་ནང་འཛད་སྤྱོད་པ་ཆེས་མང་པའི་བརྡ་འཕྲིན་མ་ལག་ཅིག་ཆགས་ཡོད་པ་འདི་རེད། མ་དཔའ་ཐན་དང་ཁོའི་བཟོ་ཚོང་ཁང་ལ་སྐད་འཕྲིན་ཁོ་ན་མ་ཡིན་དྲ་བ་དང་འབྲེལ་བའི་ཚོང་ལས་ཆེ་བ་བཅུ་གྲངས་ཤིག་ཡོད་མོད་དེ་དག་གི་རེ་འགའ་ནི་འཛམ་གླིང་ནང་ཤུགས་རྐྱེན་དེ་ཙམ་མི་སླེབས་པ་དང་གཏན་ནས་མི་སླེབས་པ་ཡང་ཡོད། སྐད་འཕྲིན་ནི་腾讯བཟོ་ཚོང་ཁང་གི་རྒྱ་ནག་ཕྱི་རུ་ནུས་པ་ཐོན་ཤོས་དེ་ཆགས་ཡོད་པ་རེད། ཁོ་ཚོས་བཤད་ན་རྒྱ་ནག་ཕྱི་ལོག་ཁོ་ནར་འཛད་སྤྱོད་པ་དུང་ཕྱིར་བརྒལ་པའི་ཡོད་པར་བཤད་ཀིན་ཡོད། གང་ལྟར་ནུབ་གླིང་དུ་རྒྱ་ནག་མི་རིགས་དང་བོད་མི་ལས་མགོ་སེར་པོ་ཅན་གྱི་འཛད་སྤྱོད་པ་དེ་ཙམ་མེད་པ་རེད། འོན་ཀྱང་སྐད་འཕྲིན་འདི་ནི་རྒྱ་ནག་གཞུང་ལ་མཚོན་ན་བོད་མི་གཞུང་སྒེར་གཉིས་ཀྱི་གསང་བ་ལེན་བྱེད་ལག་ཆ་གལ་ཆེན་ཞིག་ཏུ་གྱུར་ཡོད་པ་རེད། རེད་དེ་བོད་པ་ཚོས་དེ་ལ་དགའ་བསུ་ཞུ་གིན་ཡོད་པ་ནང་བཞིན་མགོ་བཀའ་ཤག་ནས་བཟུང་འདིའི་ནང་དུ་ཚོགས་པ་བཙུགས་ནས་བགྲོ་གླེང་དང་གཏམ་བཤད་བྱེད་བཞིན་པ་དེ་རེད། བོད་གཞུང་གི་ལངས་ཕྱོགས་དབུ་མིའི་ལམ་དེ་ཕྱི་གསལ་ནང་གསལ་ཡིན་པར་བཤད་བཞིན་རྒྱ་མ་ནག་ལ་དུས་དང་ནཀ་པ་ཀུན་ཏུ་དྲང་བཤད་བྱེད་བཞིན་ཡོད་ན་ཡང་། བོད་ནང་ཁུལ་དང་འབྲེལ་བའི་མི་སྒེར་བ་དག་ལ་མཚོན་ཉེན་ཁ་དེ་མེ་རི་སྐོར་ནས་ཡོད་ཡོད་པ་ཞིག་ཡིན་པས་འུ་ཚོས་བསམ་བཞིན་དུ་ཉེན་ཁའི་མེ་རི་དེར་ཨུ་ཚུགས་ཀྱིས་མགོ་ཕར་འཚང་ཀ་རྒྱག་བཞིན་ཡོད།

དེ་བས་སྐད་འཕྲིན་འདིའི་ཤུགས་རྐྱེན་དེ་འཛམ་གླིང་རང་བཞིན་ཅན་གྱི་ཤུགས་རྐྱེན་དེ་ཙམ་ཆེན་པོ་ཞིག་མ་ཡིན་མོད་བོད་ཕྱི་ནང་བར་ལ་མཚོན་ན་འབྱོང་བོ་རོ་ལངས་ཤིག་དང་འདྲ་བ་ཡིན། མིག་སྔར་འཛམ་གླིང་ཤར་ནུབ་ཡུལ་གྲུ་དག་ཏུ་ཆེས་ཤུགས་རྐྱེན་ཆེ་བ་ཞིག་ནི 张一鸣དང་ཁོའི་Byte Dance 字节跳动 ཚན་རྩལ་བཟོ་ཚོང་ཁང་དེ་ནས་ཐོན་པའི་ནས་ཐོན་པའི་ཁ་པར་མཉེན་ཆས་抖音 ཟེར་བ་དེ་2016 ལོར་TikTok བསྐྱར་དུ་སྐད་ཡིག་མི་འདྲ་བ་ཞེ་གཉིས་ཡོད་པ་བྱས་ནས་རྒྱ་ནག་གི་ཕྱི་རུ་ཡོད་པའི་འཛད་སྤྱོད་མཁན་ལ་བཟོས་པ་ནས་བཟུང་ཆེས་ཆེ་བའི་འཛད་སྤྱོད་ཚོང་ར་དེ་རྒྱ་གར་ཆགས་ཡོད། དེའི་རྐྱེན་གྱིས་རྒྱ་གར་ནང་དུ་མཉེན་ཆས་འདི་དང་འབྲེལ་བའི་བུད་མེད་སྐོར་གྱི་རྙོག་དྲ་ཡང་བྱུང་ཡོད། ད་དུང་རྒྱ་གར་གྱིས་ཨེ་ཤ་ཡའི་རྒྱལ་ཁབ་མང་དག་ཅིག་གི་འཛད་སྤྱོད་པ་མང་དག་ཅིག་གིས་མཉེན་ཆས་དེ་རྒྱ་ནག་ཐོན་པ་ཡང་ཧ་གོ་གི་མེད་པ་རེད། ལྷོ་ཤར་ཨེ་ཤ་ཡ་དང་ཤར་ཨེ་ཤ་ཡ་ལྷོ་ཨེ་ཤ་ཡའི་རྒྱལ་ཁབ་ཁག་གི་འཛད་སྤྱོད་པ་དག་གིས་སྣེ་ཁྲིད་པ་ལྟ་བའི་ད་ལྟ་ཉིས་སྟོང་བཅུ་དགུ་ཉི་ཤུའི་ནང་དུ་ཨ་རའི་མཚོན་པའི་ནུབ་ཕྱོགས་རྒྱལ་ཁབ་དག་དུ་ཉིན་རེར་འཛད་སྤྱོད་མཁན་ས་ཡ་མང་པོ་གསར་དུ་འབྱུང་ཡོད། ད་ལོ་ཁྱིམ་སྡོད་བཀག་རྒྱའི་ཁྲོད་ཟླ་གཅིག་གི་ནང་དུ་ཨ་རི་རྒྱལ་ཁབ་གཅིག་པོའི་ནང་དུ་འཛད་སྤྱོད་མཁན་ས་ཡ་སུམ་ཅུ་ལྷག་གསར་དུ་བྱུང་ཡོད། དེ་ལྟར་ཉིས་སྟོང་ཉི་ཤུ་ལོ་འདིའི་ནང་དུ་མཉེན་ཆས་དེའི་དུས་ཚོད་ཉེར་བཞིའི་སྤྱོད་ཚད་དེ་instagram ལས་བརྡབ་འགས་ཡན་ལ་སླེབས་ཡོད་པ་རེད། འདི་ནི་དེང་བླངས་དགོས་འཛམ་གླིང་མི་མང་གིས་བསམ་བཞིན་དུ་རྒྱ་ནག་ནས་ཐོན་པའི་རྒྱ་གཞུང་དང་འབྲེལ་ཡོད་ཀྱི་དཔལ་འབྱོར་དག་ལ་རྒྱབ་སྐྱོར་བྱེད་བཞིན་པ་ཞིག་དང་ཁྱད་པར་ཅི་ཞིག་འདུག་གམ།

དེ་ནས་མཉེན་ཆས་གཞན་ཞིག་ནི་宿华་དང་ཁོའི་བཟོ་ཚོང་ཁང་གི་རྒྱ་མིང་ལ་快手དང་དཔྱིན་མིང་ལ་Kwai ཟེར་བདེ་རེད། འདི་ལ་རྒྱ་ནག་ཕྱིའི་རྒྱལ་ཁབ་ཁག་ནང་དུ་ཤུགས་རྐྱེན་དེ་ཙམ་ཆེཇ་པོ་མིན་ན་ཡང་TikTok གི་ཁ་གཏད་ཀྱི་འགྲན་འཛིན་མཁན་དེ་ཡིན་པས་གང་ཐུབ་ངང་ཕྱི་ལ་ཤུགས་རྐྱེན་སླེབས་པར་འབད་པ་བྱེད་བཞིན་ཡོད། སྤྱིའི་ཆ་ནས་བཟོ་ཚོང་ཁག་འདི་དག་ལ་འགྲན་བསྡུར་གྱི་རྣམ་པའི་ཐོག་ནས་གཅིག་གཅིག་གི་གཏད་ཡིན་མོད་ཀྱང་རྒྱ་གཞུང་གི་ལག་ཆ་བྱེད་ཚུལ་གཅིག་པ་ཡིན། 快手སམ་མགྱོགས་འཕྲིན་ཟེར་བ་འདི་མས་དེང་སང་བོད་ནང་ལོག་ཐད་གཏོང་མཁན་དག་ལ་བོད་སྐད་ཡིག་རྐྱང་བ་བེད་སྤྱོད་གཏོང་མི་ཆོག་པ་བྱས་ཡོད། གལ་ཏེ་ཐད་གཏོང་སྐབས་རྒྱ་སྐད་གཅིག་ཀྱང་མ་བཤད་པར་བོད་སྐད་རྐྱང་བ་དང་། གཞན་བོད་ཡིག་གི་མཆན་བུ་རྐྱང་བ་ཡིན་ན་ལམ་སང་ཐད་གཏོང་སྒོ་རྒྱག་པ་དང་བེད་སྤྱོད་གཏོང་མི་ཆོག་པ་བཟོ་བཞིན་ཡོད།

དེ་བཞིན་རྒྱ་ནག་ནས་ཐོན་པའི་维沃Vivo དང་欧珀OPPO སོགས་ལ་མཚོན་ན་ནི་བྱང་ཤར་ཨེ་ཤ་ཡའི་རྒྱལ་ཁབ་ཁག་ནང་དུ་སླེབས་པའི་ཤུགས་རྐྱེན་དེ་ཚད་ཧ་ཅང་གི་མཐོན་པོར་སླེབས་ཡོད། དེ་ནི་རྒྱལ་ཁབ་དེ་དག་ནང་གི་ཁེ་ལས་མི་སྣས་ཁ་པར་དེ་དག་ཕྱིར་ཚོང་གི་ཚོང་ལས་དེ་སྒེར་གི་ཁེ་ཕན་ཁོ་ན་ལས་ཆབ་སྲིད་ཀྱི་མིག་རྒྱང་ཐུང་བས་སམ་ཆབ་སྲིད་ཀྱི་མིག་རྒྱང་ཐུང་དྲགས་པས་རང་རྒྱལ་མི་རིགས་ཀྱི་མ་འོངས་དཔལ་འབྱོར་གནས་བབ་ལ་བསམ་བཞིན་མ་ཡིན་པར་གནག་པའི་ལས་ཀ་ཞིག་ཡིན་པར་འདོད། དཔེར་ན་VIVO དང་OPPO ཀྱིས་རྒྱ་གར་ནང་གི་བརྙན་འཕྲིན་རྒྱུད་ལམ་ཁག་གི་ཁྱབ་བསྒྲགས་ལས་ཚོང་བརྒྱ་ཆ་ལྔ་བཅུ་ཡར་མར་བཟུང་ཡོད་ཚུལ་དང་། རྒྱུག་ཆེས་ཆེ་བའི་ཁ་པར་ནི་རྒྱ་ནག་ནས་ཐོན་པའི་Vivo, Oppo, Xiaomi འདི་དག་ཆགས་ཡོད། འདས་པའི་དུས་སུ་རྒྱ་གར་ནང་དུ་ལག་ཐིག་ཁ་པར་གྱི་ཚོང་ར་ཆེ་ཤོས་དེ་ཀུ་ཤུ་དང་སམ་སོན་གཉིས་བཟུང་ཡོད་ནའང་ལོ་འགའི་སྔོན་ནས་རྒྱ་ནག་ནས་ཐོག་པའི་ཁ་པར་འདི་དག་གིས་ཡོངས་སུ་མི་མངོན་པའི་ཚུལ་གྱིས་བཙན་འཕྲོག་ལྟ་བུ་་བྱས་ཡོད། རྒྱ་ནག་གི་ལག་ཐོག་ཁ་པར་འདི་དག་གི་ཚོང་ར་བཙན་འཕྲོག་བྱེད་ཚུལ་དཔེ་མཚོན་ཙམ་ཞུས་ན་ཁྱོད་ཀྱི་ཚོང་ཁང་ནང་དུ་ཁ་པར་འདི་དག་གང་རུང་བཙོང་བའི་བརྡ་ཁྱབ་སྒོ་བྱང་དང་ལེན་བྱས་ནས་ཁྱབ་བསྒྲགས་བྱས་ན་ཁ་པར་བཙོང་མ་ཐུབ་ཀྱང་ཁྱབ་བསྒྲགས་དེ་བྱས་པ་དེ་ཀ་ཙམ་གྱི་བྱ་དགའི་དངུལ་འབབ་ཀྱིན་ཡོད། དེ་ལྟར་རྒྱ་གར་གྱིས་མཚོན་ཨེ་ཤ་ཡའི་རྒྱལ་ཁབ་མོང་བོར་ཁ་པར་དེ་དག་གིས་ཚོང་ར་དག་ཧམ་འཛིན་བྱེད་བཞིན་ཡོད། དེ་བས་དཔྱིན་ཡིག་མི་ཤེས་མཁན་གྱི་རྒྱ་གར་བ་གང་མང་མང་གིས་ཁ་པར་འདི་དག་རྒྱ་ནག་གི་བཟོ་ཚོང་ཁང་ཞིག་ནས་ཐོན་པ་མ་ཤེས་པ་ལྟ་བུ་ཆགས་ཀྱི་ཡོད།

དེང་གི་ཆ་འཕྲིན་གྱི་དུས་སུ་རྒྱ་ནག་གི་ཐོན་ཟོག་དེ་དག་དང་མཉེན་ཆས་དེ་དག་འཛད་སྤྱོད་བྱས་པ་ནི་འཛམ་གླིང་གིས་རྒྱ་ནག་གི་དཔལ་འབྱོར་དམག་འཁྲུག་བསམ་བཞིན་མ་ཡིན་པར་མགོ་འབུལ་བྱས་ཏེ་རང་ཉིད་ཁ་ནང་ལ་མེ་འབར་བཞིན་བའི་རྒྱ་འབྲུག་དམར་པོའི་ཁ་ཟས་སུ་མགོ་བོ་སྔུན་ལ་སྲིང་དེ་ལེགས་སོ་བྱས་དང་ཁྱད་པར་ཅི་ཡང་མེད། དེ་དག་འཛད་སྤྱོད་བྱས་པ་ནི་དེ་དག་ལ་རྒྱབ་སྐྱོར་བྱས་པ་སྟེ་དེ་དག་གི་མ་རྐང་དཔལ
འབྱོར་ཤུགས་ཆེན་གཏོང་བཞིན་པ་དང་དེ་དང་བསྟུན་ནས་དེ་དག་གིས་འཛམ་གླིང་ཤར་ནུབ་ཀྱི་མ་རྐང་ཚོང་རར་དབང་ཤུགས་ཆེན་རུ་གཏོང་གིན་ཡོད། དེ་ནི་རྒྱ་ནག་དམར་གཞུང་གི་དགོས་དོན་དེ་ཡིན་ལ་མ་འོངས་འཛམ་གླིང་དབང་དུ་བསྡུ་སྙམ་གྱི་ཧམ་སེམས་ཀྱི་གོམ་པ་གཅིག་སྤོ་གཉིས་སྤོ་བྱེདཚུལ་ཞིག་ཀྱང་ཡིན།

དེ་ལྟར་རྒྱ་ནག་ལ་རྒྱབ་སྐྱོར་མེད་པར་གླེང་མཁན་དག་གིས་རང་ཉིད་ཀྱི་མ་རྟོགས་པར་རྒྱ་ནག་ལ་ཕྱོགས་མང་པོ་ཞིག་ནས་རྒྱབ་སྐོར་བྱེད་ཀྱིན་པ་རེད། མ་གཞི་བྱས་ན་འདི་དག་རྒྱ་གཞུང་གིས་བཟོས་པ་མ་ཡིན་ལ་གཞུང་དང་དངོས་སུ་འབྲེལ་ཡོད་ཀྱི་བཟོ་ཚོང་ཁང་ཡང་མ་ཡིན་མོད། དོན་ལ་རྒྱ་གཞུང་གི་དགོས་དོན་སྒྲུབ་མཁན་རྐྱང་རྐྱང་ཡིན་པས་ད་ནི་རྒྱ་ནག་གི་དཔལ་འབྱོར་གནོད་ཤུགས་ལ་འཛམ་གླིང་མི་མང་གི་ཡ་ལན་སྤྲོད་པའི་དུས་སུ་སླེབས་པ་རེད་འདོད། དེ་བས་བཙན་བྱོལ་བ་དག་གིས་འཛམ་གླིང་གླིང་མི་མང་ལ་རྒྱ་ནག་ནས་ཐོན་པའི་ཁ་པར་དེ་དག་མི་ཉོ་བ་དང་། མཉེན་ཆས་དེ་དག་བེད་སྤྱོད་མི་གཏོང་བར་ཁ་པར་ནང་ནས་ཕྱིར་ཕུད་གཏོང་བའི་ལས་འགུལ་ཞིག་སྤེལ་དགོས་པ་རེད་འདུག དེ་ནི་ཕྱི་སྡོད་བོད་མི་ཚོས་བྱེད་ཆོག་ཆོག་གི་ལས་ཀ་ཞིག་ཡིན་པར་འདོད། སྤྱིར་ཡིན་ན་ལས་འགུལ་དང་འབོད་སྐུལ་འདི་ཙམ་ལ་འཛམ་གླིང་མི་མང་གི་རྣ་བ་དེ་ཙམ་གཡར་མི་སྲིད་པ་ལྟ་བུ་ཞིག་ཡིན་མོད། མིག་སྔར་གྱི་འཛམ་གླིང་མི་མང་གི་དཀའ་ངལ་ལས་བྱུང་བའི་རྒྱ་ནག་ལ་བཟུང་བའི་སྡང་སེམས་དེ་དང་། རྒྱ་ནག་དམར་གཞུང་གི་བྱེད་སྟངས་དག་ག་ལེར་ཇེ་གསལ་དང་དོགས་པ་ཇེ་ཆེར་འགྲོ་བཞིན་པའི་སྐབས་འདིར་འུ་ཚོར་མ་མཐར་རྣ་བ་དོག་ཙམ་གཡར་བའི་རེ་བ་ཞིག་ཡོད་པར་མཐོང་གིན་འདུག ལྷག་ཏུ་ཨ་རི་དང་ཨོ་གླིང་རྒྱ་གར་གྱི་མཚོན་པའི་རྒྱལ་ཁབ་མང་དག་ཅིག་གི་གཞུང་གི་ལངས་ཕྱོགས་དེ་ཉིན་རེ་བཞིན་རྒྱ་ནག་ལ་ཇེ་སྡང་དུ་འགྲོ་བཞིན་པས་ང་ཚོར་མ་མཐའ་ཡང་རྒྱ་ནག་སུན་པོ་བཟོ་བའི་གོ་སྐབས་ཤིག་ཡོད་པ་རེད་སྙམ། ལྷག་ཏུ་ཨ་རའི་གྲོས་ཚོགས་འོག་མའི་འཐུས་མི་Scott Perry ཡི་H.R. 6948 ཁྲིམས་འཆར་མཚོན་དེ་དག་གིས་ང་ཚོར་ཚུར་འབོད་སྐུལ་གཏོང་བཞིན་པ་ལྟ་བུའི་སྣང་ཚུལ་ཞིག་ཀྱང་ཡོང་བཞིན་འདུག མ་གཞི་ཨ་རི་གཙོ་རྒྱལ་ཁབ་སུ་དང་གང་ཞིག་ཡིན་ན་ཡང་བྱང་ཚུབ་སེམས་དཔའ་ལྟ་བུའི་བྱམས་སེམས་ཅན་དང་། ཆ་རྐྱེན་གང་ཡང་མེད་པའི་སྒོ་ནས་དྲང་བདེན་རྩོད་མཁན་ནི་གཅིག་ཀྱང་མེད་པ་དེ་འདས་པའི་བོད་ཀྱི་ལོ་རྒྱུས་ལས་གསལ་བོར་རྟོགས་ཡོང་། དེ་བས་ཐེངས་འདིར་ཨ་རིའི་མཚོན་པའི་རྒྱལ་ཁབ་དེ་དག་གི་རྒྱ་ནག་ལ་ཉེས་འཛུགས་བྱེད་པར་འདོད་པའི་སྐབས་འདིར་བོད་ཀྱི་བདེན་པ་ལ་བསམ་བཞིན་མ་ཡིན་རྒྱབ་སྐྱོར་ཡོང་སྲིད་པ་ཞིག་དང་། ཐ་ན་ལས་འགུལ་དེ་དག་ལ་ནུས་པ་དོག་ཙམ་ཐོན་ཨེ་ཡོང་སྙམ་པའི་དུས་སྐབས་ཤིག་མ་རེད་དམ།

རང་ཉིད་ཀྱིས་ཐེངས་འགར་ངོ་དེབ་དང་instagram གཉིས་སུ་དེ་ལྟར་བྱེད་པའི་འབོད་སྐུལ་བྱེད་འདོད་མོད་རྒྱ་ནད་འདིས་བཀག་རྒྱ་གྲོལ་ན་ཕྱིར་ཕ་ཡུལ་དུ་ལོག་རྒྱུ་སྒུག་བསྡད་ཡོད་པས་དེ་ལྟར་བྱེད་མ་ཕོད་པར་རང་རིགས་སྤུན་ཟླ་དག་གི་དེ་ལྟར་བྱེད་པར་ངང་སྒུག་བྱས་ནས་བསྡད་པ་ཡིན་མོད། དེ་ལྟར་མ་བྱུང་ཁར་ལྷག་ཏུ་ཁ་སང་དེ་རིང་ཨོ་སྟོབས་ཀྱིས་དཀྲོགས་རྐྱེན་དེ་ལ་ཡོད་ཚད་མགོ་འཐོམ་ནས་ཡོད་པའི་སྣང་ཚུལ་ཞིག་མཐོང་བས་འདི་འདྲ་ཞིག་མི་འབྲི་ཐབས་མེད་བྱུང་།

འབྲི་ཐེངས་གཅིག་ལས་བསྐྱར་བཅོས་དང་ཞི་སྒྲིག་སོགས་གང་ཡང་བྱེད་མ་ཐུབ་པས་ནོར་བ་ཐ་དག་དགོངས་དག་ཞུ།