བློ་བཟང་རིན་ཆེན།
ཀྱེ་ཀྱེ་སྙིང་གི་གྲོགས་པོ།།
རྒྱ་གར་འཕགས་པའི་ཡུལ་ལ།།
འབྱོར་བའི་སྐལ་བཟང་ཉི་མ།།
སེམས་ལ་ཉར་རྒྱུ་བྱུང་ངམ།།
འདིར་འབྱོར་ལོ་ཟླའི་ནང་ལ།།
བྱ་བཞག་གང་ཞིག་སྒྲུབ་པའི།།
སློབ་འབྲས་སྟོན་གྱི་ལོ་ཏོག།
གཞན་ལ་ངོམ་རྒྱུ་བྱུང་ངམ།།
བཤེས་གཉེན་བཟང་པོའི་དྲུང་ནས།།
གང་ཞིག་བསླབས་པའི་གཞི་ལ།།
ཐོས་བསམ་སྒོམ་པ་བྱས་པའི།།
མྱོང་བ་འཆད་རྒྱུ་བྱུང་ངམ།།
སྙན་གྲགས་གླིང་ན་ཁྱབ་པའི།།
གཙུག་ཁང་སློབ་གཉེར་ཁང་ནས།།
ནང་བསྟན་གཞུང་ལུགས་ཆེན་མོར།།
བརྩོན་པ་བསྐྱེད་རྒྱུ་བྱུང་ངམ།།
སྔོན་བསགས་ལས་ཀྱིས་དབང་གིས།།
ཁམས་དང་མོས་པ་མི་འདྲ།།
རང་རང་དགའ་བའི་གཞི་ལ།།
སློབ་གཉེར་བྱེད་རྒྱུ་བྱུང་ངམ།།
ནང་མི་སྤུན་མཆེད་རྣམས་ལ།།
ཁ་པར་གཏོང་བའི་སྐབས་ལ།།
ཁྱེད་ཀྱི་སློབ་སྦྱོང་སྐོར་ནས།།
དྲི་བ་འདོན་པ་བྱུང་ངམ།།
གཞིས་ལུས་སྤུན་ཟླ་རེ་ལ།།
འཕྲིན་པ་སྤྲིངས་པའི་སྐབས་སུ།།
རྟོག་འཆར་གཟུགས་སུ་ཕབ་དུས།།
ཡིད་ལ་དཀའ་ངལ་བྱུང་ངམ།།
ཡུལ་འདིར་ཡོང་བའི་སླད་དུ།།
ཕ་མ་སྤུན་མཆེད་གཙོས་པའི།།
སུ་ལ་དཀའ་ངལ་སྤྲད་པ།།
མཛུབ་མགོར་རྩི་རྒྱུ་བྱུང་ངམ།།
འདས་པའི་ལོ་ཟླའི་ནང་ལ།།
དཔལ་འབྱོར་མཐུན་རྐྱེན་འཛོམས་པོ།།
གང་ནས་འབྱུང་བའི་གནས་ལ།།
མནོ་བསམ་གཏོང་བ་བྱུང་ངམ།།
དྲ་རྒྱའི་དུས་རབས་འདི་ནས།།
རྒྱུས་མེད་དྲ་གྲོགས་རྣམས་ལ།།
སྙིང་གཏམ་བཤད་པའི་ཟོལ་གྱིས།།
དུས་ཚོད་བརླག་རྒྱུ་བྱུང་ངམ།།
སློབ་གཉེར་བར་གསེང་ཁྲོད་ནས།།
སླད་མེད་བརྩེ་སེམས་མངའ་བའི།།
གཞིས་ལུས་ནང་མི་རྣམས་ལ།།
སེམས་གཏམ་བཤད་རྒྱུ་བྱུང་ངམ།།
སློབ་མཐར་ཕྱིན་པའི་རྗེས་ལ།།
རང་ཡུལ་སྐྱིད་པའི་ཕྱོགས་སུ།།
སློབ་འབྲས་གསེར་གྱི་འཁོར་ལོ།།
འཁྱེར་བའི་གྲ་སྒྲིག་བྱུང་ངམ།།
མི་ཚོགས་མང་པོ་དཀྱིལ་ནས།།
རང་གིས་འཁྲིས་ཀྱི་གྲོགས་ལ།།
ལྷད་མེད་བརྩེ་སེམས་ཤིག་གིས།།
སེམས་ནས་གཅེས་རྒྱུ་བྱུང་ངམ།།
ཤ་ཁྲག་རུས་རྒྱུད་གཅིག་པའི།།
བོད་རིགས་སྤུན་ཟླ་རྣམས་ལ།།
ཆོལ་གསུམ་དབྱེ་འབྱེད་དོར་ནས།།
གཅིག་སྒྲིལ་འདུན་པ་བྱུང་ངམ།།
2020/6/12 གྱི་མཚན་མོར་ཆོས་གྲོགས་ཚོར་ཀུ་རེ་ཚུལ་དུ་བྲིས་པའོ།།