རིག་རྣམ། དཔེ་སྟོན་སློབ་གྲྭ། འཛིན་རིམ་༦ ཁ རང་ལོ་༡༡
ད་ཆ་རྒྱལ་ཡོངས་ཀུན་ཏུ་ནད་ཡམས་ཁྱབ་གདལ་སོང་བའི་རྐྱེན་གྱིས་ཕྱི་རོལ་དུ་འགྲོ་རྒྱུ་མེད་ཅིང། ཁྱིམ་ཁོ་ནར་སྡོད་དགོས་པས་ཉོབ་སྣང་གིས་དུས་ཚོད་ཀྱང་འཁྱོལ་བ་དཀའ། ང་འདྲ་བའི་བུ་ཞིག་རྒྱལ་ཡོངས་སྒོ་བརྒྱབ་ནས་སློབ་གྲྭར་འགྲོ་མ་ཐུབ་པར་བརྟེན་ལེ་ལོའི་དྲྭ་བར་ཚུད་དེ་ཉིན་མཚན་ཀུན་ཏུ་མུན་ནག་གི་ཁྲོད་དུ་ལུས་པའི་ཁེར་རྐྱང་གི་ཚོར་སྣང་སྐྱེས་ནས་དུས་ཚོད་མ་འཁྱོལ་བར་ཉི་མ་ལོ་ལས་རིང་བ་ལྟ་བུར་གྱུར་བའི་སྐབས། བདག་གི་ཕ་མ་དང་འདྲ་བའི་མུན་སེལ་སྒྲོན་མེ་བཀའ་དྲིན་ཅན་གྱི་དགེ་བའི་བཤེས་གཉེན་གྱིས་ངའི་དྲིན་ཅན་ཨ་མ་ལགས་ཀྱི་ཞལ་པར་ཐོག་གསུང་སྐད་སྙན་འཇམ་ལྡན་པའི་ངང་ཚེ་འདི་ཕྱི་གཉིས་ལ་བཀའ་དྲིན་འགྲན་ཟླ་མ་མཆིས་པའི་གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་བུ་བོད་མི་རྣམས་ཡང་སྒོས་འཛམ་གླིང་ཞི་བདེར་ཕན་པའི་སྐུ་ལས་མཛད་མཐའ་མེད་པ་བསྐྱོན་པའི་བཀའ་དྲིན་རྗེས་དྲན་ཐོག་རྩོམ་ཡིག་ཅིག་འབྲི་རྒྱུའི་སྐུལ་མ་གནང་བྱུང། སྐབས་དེར་ངས་སུན་སྣང་སྤུ་ཙམ་མེད་པར་ཤོག་དཀར་སྟེང་དུ་ལག་པ་འགུལ་འགོ་བརྩམས། གང་ཡིན་ཟེར་ན། འཛམ་གླིང་ཞི་བདེའི་དབུ་ཁྲིད་བོད་མི་ཡོངས་ཀྱི་ཁོག་པའི་སྙིང་དང་ལྟ་བའི་མིག་ལྟ་བུ་ཚེ་འདི་ཕྱི་གཉིས་ཀྱི་དབུ་ཁྲིད་སྐྱབས་གནས་ཁོང་ལ་བཀའ་དྲིན་རྗེས་དྲན་ཞུ་རྒྱུའི་གོ་སྐབས་འདི་འདྲ་ཐོབ་རྒྱུ་དཀའ་བས་ཁོ་བོས་རྒན་ལགས་ཀྱི་རེ་བ་ཆུད་ཟོས་སུ་མ་བཏང་པར་རང་ཉིད་ནས་གང་ཐུབ་ཀྱིས་རྩོམ་ཡིག་འདི་འབྲི་འགོ་བརྩམས་པ་ཡིན། ཐོག་མར་བོད་ཁ་བ་ཅན་འདི་རྒྱལ་ཁབ་གཞན་ལྟར་རང་བཙན་གཙང་མའི་རྒྱལ་ཁབ་ཅིག་ཡིན་པ་མཁྱེན་གསལ་རེད། འོན་ཀྱང་༡༩༤༩ལོར་རྒྱ་དམར་གྱིས་བོད་ས་ཡོངས་རྫོགས་ཡར་རྒྱས་འཛུགས་སྐྲུན་རོགས་ཕན་ཡིན་ཁུལ་གྱིས་དམག་མི་སྟོང་ཕྲག་མང་པོ་བོད་ཡུལ་དུ་འཁྲིད་ནས་བཙན་འཛུལ་བྱེད་སྒོ་བརྩམས། མཐར་ཕྱི་ལོ་༡༩༥༩ལོར་རྒྱ་དམར་ཇག་པས་བོད་རང་བཙན་འཕྲོག་པ་དང་ཆབས་ཅིག་བོད་མི་ཚོའི་ལྷ་ཡུལ་ལྟ་བུའི་ཞིང་ཁམས་ཀྱི་བདེ་སྐྱིད་ལོངས་སྤྱོད་རིམ་པས་འཕྲོག་པ་དང་རྩ་མེད་བཏང་འགོ་བཙུགས། བོད་ཀྱི་བླ་ཆེན་དང་མི་ཆེན། དེ་བཞིན་མི་དམངས་ཡོངས་ལ་བཙན་གནོན་དང་བརྙས་བཅོས་དྲག་པོ་བཏང་བས། བོད་མི་ཉིས་འབུམ་ལྷག་དང་མཉམ་དུ་བརྩེ་བའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཁྱིམ་མཚེས་རྒྱལ་ཁབ་རྒྱ་གར་གྱི་ས་ཁུལ་ས་ཐག་རིང་པོ་མང་དག་ཅིག་ལ་ཞབས་ཐང་བརྒྱུད་ཕེབས་ནས་མཐར་རྒྱ་གར་འཕགས་ཡུལ་མ་སུ་རིར་སྐུ་བདེའི་ངང་ཕེབས་འབྱོར་བྱུང། སྐབས་དེར་ཁོང་ལ་རྒྱ་གར་གྱི་སྲིད་བློན་ནེ་རུ་མཆོག་ནས་ཕེབས་བསུ་ཟབ་རྒྱས་གནང་བ་དང་ལྷན་ཅིག་ཁོང་རྣམ་གཉིས་མ་འོངས་བོད་ཀྱི་གནད་དོན་དང་བོད་དེ་རང་དབང་སླར་གསོ་ཡོང་ཆེད་བཀའ་མོལ་མང་དག་གནང་ནས་མཐར་སྲིད་བློན་ནེ་རུ་མཆོག་ནས་༸གོང་ས་མཆོག་དང་བོད་མིའི་སྐུ་ངལ་མཁྱེན་རྗེས་ཁོང་གིས་ལྷག་བསམ་སྙིང་རྗེའི་སྒོ་ནས་བོད་མི་རིགས་དང་༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་ལ་རོགས་རམ་གང་ཐུབ་ཞུ་རྒྱུའི་ཞལ་བཞེས་གནང། དེ་རྗེས་༸གོང་ས་སྐྱབས་མགོན་ཆེན་པོ་མཆོག་གིས་མ་འོངས་པར་རང་དབང་སླར་གསོ་ཡོང་ཆེད་བོད་མིའི་སྒྲིག་འཛུགས་གསར་འཛུགས་དང་མང་གཙོའི་ཀ་བ་གསུམ་བཅས་ཆེད་འཛུགས་གནང།དེ་དག་ནི། ཆོས་མཐོའི་ཁྲིམས་ཞིབ་ཁང་དང། བཀའ་ཤག བོད་མི་མང་སྤྱི་མཐུས་ལྷན་ཚོགས་བཅས་ཡིན། ད་དུང་ལས་བྱེད་པ་རྣམས་མུ་མཐུད་གནས་ཆེད་ལས་བྱེད་བདག་གཉེར་ཁང་སོགས་ཆེད་འཛུགས་གནང། མ་འོངས་བོད་མིའི་རྩ་དོན་དང་སོན་རྩའི་ཆེད་དུ་བོད་པའི་སློབ་གྲྭ དགོན་སྡེ་ཁག་གསར་འཛུགས་གནང།དེ་ནས་བཙན་བྱོལ་བོད་མིའི་ས་གནས་གཞིས་ཆགས་ཁག་དང་འཚོ་རྟེན་ཆེད་དུ་ལག་ཤེས་བཟོ་གྲྭ་སོགས་གསར་བཞེངས་གནང། དེ་དག་ལ་ལྟ་རྟོག་བྱེད་པར་ནང་སྲིད་ལས་ཁུངས་དང། བོད་ནས་གསར་དུ་ཕེབས་མཁན་བོད་མི་རྣམས་ལ་རོགས་རམ་སྲུང་སྐྱོབ་ཡོང་ཆེད་བདེ་སྲུང་ལས་ཁུངས། བོད་མིའི་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོ་ཡོང་ཆེད་ཆོས་རིག་དང་ཤེས་རིག་ལས་ཁུངས། བོད་མིའི་སྒྲིག་འཛུགས་ཀྱི་འགྲོ་གྲོན་དང་ཡོང་འབབ་རྣམས་དོ་དམ་བྱེད་པར་དཔལ་འབྱོར་ལས་ཁུངས། བོད་དོན་སྐོར་འཛམ་གླིང་ཡོངས་ལ་དྲིལ་བསྒྲགས་དང་རྒྱལ་ཁབ་གཞན་དང་འབྲེལ་བ་བྱེད་པར་ཕྱི་དྲིལ་ལས་ཁུངས།བོད་མི་རྣམས་ཀྱི་འཕྲོད་བསྟེན་དང་དེ་ཡར་རྒྱས་གཏོང་ཆེད་འཕྲོད་བསྟེན་ལས་ཁུངས་སོགས་མ་འོངས་ཕུགས་རྒྱང་རིང་པོའི་དགོངས་པ་རྒྱ་ཆེ་བཞེས་པའི་འབྲས་བུར་ད་ལྟའི་བོད་མིའི་ཆབ་སྲིད་གནས་སྟངས་འཛམ་གླིང་ཡོངས་ལ་གྲགས་པ་དང། བཙན་བྱོལ་བོད་མིའི་སྒྲིག་འཛུགས་མང་གཙོ་ཚད་ལྡན་ཐོག་འགྲོ་བཞིན་པ་དེ་༸མགོན་པོ་གང་གིས་དབུ་ཁྲིད་གནང་བར་བརྟེན་ནས་བྱུང་བ་རེད། དེ་བཞིན་༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་ཕྱི་ཡི་རྒྱལ་ཁབ་ཁག་ལ་ནང་པ་སངས་རྒྱས་པའི་ཆོས་དང་མིའི་སྤྱི་ཚོགས་ནང་མི་སྤྱོད་བཟང་པོ་དང་མི་དང་མིའི་བར་ཕན་ཚུན་འཆམ་མཐུན་དགོས་པ་སོགས་བཀའ་སློབ་གནང་བ་མ་ཟད། ཕྱིའི་རྒྱལ་ཁབ་དང་འབྲེལ་མཐུད་གནང་འགོ་བཙུགས་ནས་བོད་མི་འཛམ་གླིང་གང་སར་གནས་འཁོད་བྱེད་ཆོག་པ་མ་ཟད། བོད་མི་ཚོར་དམིགས་བསལ་ཆེད་མཐོང་རྩིས་འཇོག་སོགས་གང་ལེགས་བྱེད་པ་དང། ཁོང་གིས་བོད་རང་གཙང་མའི་རྒྱལ་ཁབ་དེ་སྤྱི་ལོ་༡༩༥༩ལོར་རྒྱ་དམར་གྱིས་བཙན་འཕྲོག་བྱས་རྗེས་ཁྱིམ་མཚེས་རྒྱལ་ཁབ་རྒྱ་གར་དུ་བཙན་བྱོལ་ལ་གནས་པ་སོགས་བོད་མིའི་གནས་སྟངས་ཕྱི་རྒྱལ་མི་རིགས་ལ་འབྲེལ་ལམ་ཐོག་ནས་ཡང་ནས་ཡང་དུ་ཁྱབ་བསྒྲགས་གནང། མཐའ་དོན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་མགོན་པོ་རང་ཉིད་ཀྱི་རང་དོན་སྤུ་ཙམ་མེད་ཅིང་མཚན་མོའི་སྐར་ཚོགས་ཀྱིས་ཀྱང་འགྲན་མི་ཐུབ་པ་ལྟར་ཡིན་པས། ༸གོང་ས་མཆོག་ཁོང་གི་བཀའ་དྲིན་དང་བཀའ་སློབ་རྣམས་རྡོ་ལ་རི་མོ་བརྐོས་པ་ཇི་བཞིན་སེམས་ནང་བཞག་དགོས་པ་ཡིན། ཁོང་གི་བཀའ་སློབ་རྣམས་ཉན་ནས་ཡར་རྒྱས་བཏང་དགོས་པ་མ་ཟད། ཁ་གཡེང་མིག་གཡེང་ནམ་ཡང་བྱེད་རྒྱུ་མེད། ཡིན་ནའང། དེང་དུས་ཕྲུ་གུ་རྣམས་ནས་ཁོང་གི་བཀའ་དྲིན་དང་མི་རབས་གོང་མ་རྣམས་ཀྱིས་སྐུ་ངལ་ཁྱད་བསད་ཀྱིས་འབད་བརྩོན་གནང་བའི་མཇུག་འབྲས་བཀའ་དྲིན་སེམས་ནང་མ་བཞག་པར་དེ་ལས་ལྡོག་སྟེ་མིག་འཁྲུལ་སྒྱུ་མའི་ཁྲ་ཁྲ་ཟིང་ཟིང་ལ་མགོ་འཁོར་ནས་གསེར་ལས་དཀོན་པའི་དུས་ཚོད་ཆུད་ཟོས་སུ་གཏོང་བའི་བྱེད་སྟངས་མཐོང་སྐབས་དངོས་གནས་ངོ་གནོང་དགོས་པ་ཞིག་རེད།
ལྔ་བཅུ་ང་དགུའི་ལོ་ལ་རྒྱ་ཡིས་བཙན་འཛུལ་བྱས།།
རྩ་ཆེན་བོད་ཀྱི་སྣོད་བཅུད་རྩ་གཏོར་བཏང།།
སྒང་པ་ཚང་གི་ལྷ་སྐལ་ཡིད་བཞིན་ནོར།།
བསྟན་དང་འགྲོ་བའི་དོན་དུ་རང་ཡུལ་བསྐྱུར།།
ལ་ལུང་ཀྱག་ཀྱོག་གྲངས་མེད་བརྒལ་བའི་རྗེས།།
རྒྱ་གར་འཕགས་པའི་ཡུལ་ལ་སྐུ་བདེར་འབྱོར།།
མཐོ་རིམ་མི་དྲག་མང་པོས་དགའ་བས་བསུས།།
མ་འོངས་བོད་ཀྱི་རྩ་དོན་སླར་གསོའི་ཆེད།།
ཐུགས་ཀྱི་དགོངས་པར་ཤེས་ཡོན་དང་པོར་དགོངས།།
ཕྱོགས་མཐའ་ཀུན་ནས་བཤེས་གཉེན་རྩེ་སྒྲུག་གིས།།
དུས་དང་མཚམས་པའི་མ་འོངས་སོན་རྩ་བསྐྱངས།།
དེ་དག་དུས་དང་མཚམས་པའི་སློབ་མཐར་སོན།།
ད་ལྟའི་དུས་སུ་མི་རབས་གཉིས་གསུམ་རྗེས།།
དགུང་ལོ་བཅུ་དྲུག་སོན་དུས་དགོངས་བཞེས་བཞིན།།
བཙལ་བྱོལ་བོད་གཞུང་དམངས་གཙོའི་འགྲོ་ལམ་ཐོག།
མང་མོས་འོས་བསྡུར་ཤར་སྐྱོད་བྱེད་འགོ་བཙུགས།།
བསྟན་པའི་གཞུང་དེ་འཕགས་པའི་ཞིང་ཁམས་འདིར།།
སླར་ཡང་ཡར་ཟླའི་དཔལ་བཞིན་གོང་འཕེལ་མཛད།།
ཆོས་ཀྱི་བཀའ་ཁྲིད་རྒྱུན་ཆད་མེད་པར་གནང།།
འཛམ་གླིང་ཡོངས་སུ་མཚན་སྙན་རྟ་བདུན་གྲགས།།
རྙེད་དཀའི་རླབས་ཆེན་མཛད་འཕྲིན་དེ་དག་ནི།།
སེམས་ཁོང་རུས་པའི་གཏིང་ནས་མ་བརྗེད་པར།།
རྡོ་ལ་རི་མོ་བརྐོས་བཞིན་ཡིད་ལ་འཛིན།།
ཚེ་རབས་ཀུན་ཏུ་བཀའ་དྲིན་རྗེས་དྲན་ཞུ།།