བློ་བཟང་རིན་ཆེན།
མཁས་དབང་དངུལ་ཆུ་དྷརྨ་བྷ་དྲ་ཡིས།།
ཀུ་ཤའི་རྩེ་མོས་བླངས་པའི་ཆུ་ཐིགས་ལས།།
ཁོ་བོས་པིར་གྱིས་བླངས་པའི་ཆུ་རྡུལ་གྱིས།།
མངོན་བརྗོད་ལྷ་མོའི་བཞིན་རས་འབྲི་བར་བྱ།།
འོག་ཕྱོཊ་ལྷ་མོས་འཁོན་སེམས་མ་བཅངས་ཀྱང་།།
ནོར་འཛིན་བུ་མོས་ཉམ་ཐག་གཙེས་པ་ཡིས།།
གཞུང་ལུགས་ཀུན་ཏུ་བསྟོད་བསྔགས་བྱེད་པའི་གཞི།།
སུམ་རྩེན་ལྷ་ཡི་ཞིང་ཁམས་དྲན་དུ་བཅུག།
ཆུ་བདག་རྒན་མོའི་སེམས་པ་མ་གཙེས་ཀྱང་།།
ཉལ་འགྲོ་བུ་མོའི་གཤིས་རྒྱུད་གྱོང་པོ་དེས།།
རྒྱུ་སྐར་ལྷ་མོ་ཐང་ལ་བསུས་འདྲ་བའི།།
ཁྲི་ཤོར་རྒྱལ་མོའི་ངང་རྒྱུད་དྲན་དུ་བཅུག།
རྟ་དམར་ཅན་གྱི་སེམས་པ་མ་དཀྲུགས་ཀྱང་།།
འཁྱོག་འབར་སྟོབས་ཤུགས་རབ་ཏུ་རྒྱས་པ་ཡིས།།
ཁ་བའི་འདབ་མ་ས་ལ་བཏིང་འདྲ་བའི།།
རང་ཡུལ་གངས་ལྗོངས་ལུང་པ་དྲན་དུ་བཅུག།
གཡོ་བྱེད་མགོན་པོས་སྟངས་འཛིན་མ་བྱས་ཀྱང་།།
རྟག་འགྲོ་བུ་མོར་སེར་སྣ་ཆེ་བ་འདིས།།
ཁ་བའི་འདབ་མ་བརྩེགས་ནས་བཞེངས་འདྲ་བའི།།
གངས་དཀར་ཏི་སེའི་བསིལ་རླུང་དྲན་དུ་བཅུག།
2020/7/2 བློ་བཟང་རིན་ཆེན་གྱིས་བྲིས།