གནས་ཚུལ་མཁོ་གཏོང་བ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ།
སྤྱི་ལོ་ ༢༠༢༠ ཟླ་ ༨ ཚེས་ ༡༣ ཉིན། ཐའེ་ཝན་དུ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་གོ་སྒྲིག་འོག་རིས་མེད་ཆོས་བརྒྱུད་ཁག་གི་མཁན་སྤྲུལ་དགེ་བཤེས་དགེ་འདུན་པ་བརྒྱ་ཕྲག་བརྒལ་བ་མཉམ་ཞུགས་གནང་བའི་བོད་བརྒྱུད་ནང་བསྟན་དར་སྤེལ་བྱེད་སྐོར་གྱི་བགྲོ་གླེང་ཚོགས་འདུ་སྐབས་དགུ་པ་དེ་འཚོགས། ཚོགས་འདུ་དེར་ད་ཆ་ཐའེ་ཝན་དུ་བཞུགས་བཞིན་པའི་བཀའ་ཟུར་༧སྐྱབས་རྗེ་རོང་ཆེན་ཀིརྟི་སྐྱབས་མགོན་རིན་པོ་ཆེ་དང་། རྣམ་གླིང་དབུ་འཛིན་༧སྐྱབས་རྗེ་གྱང་ཁང་རིན་པོ་ཆེ། ཇོ་ནང་རྒྱལ་ཚབ་༧སྐྱབས་རྗེ་མཁན་སྤྲུལ་ཆོས་སྣང་རིན་པོ་ཆེ། ཐའེ་ཝན་རྒྱལ་ཡོངས་ནང་བསྟན་ཐུན་ཚོགས་ཀྱི་ཚོགས་གཙོ་རྒྱའི་བླ་ཆེན་ཅིན་ཡའོ་ཧྥ་ཧྲི་སོགས་སོགས་དམིགས་བསལ་ཆེད་ཕེབས་གནང་ཡོད་པར་མ་ཟད། གལ་ཆེའི་བརྗོད་གཞི་དུ་མ་ཞིག་གི་ཐོག་བཀའ་སློབ་ལམ་སྟོན་ཟབ་རྒྱས་གནང་ཡོད་འདུག དེ་ཡང་ཉིན་དེའི་མཛད་སྒོ་དབུ་འཛུགས་དང་འབྲེལ་ཐོག་མར་ཚོགས་འདུའི་གཙོ་སྐྱོང་བ་སེར་སྨད་ལྷ་རམས་པ་ཧ་ཤེན་རིན་པོ་ཆེ་མཆོག་གིས་ཚོགས་འདུའི་ལས་རིམ་དང་འབྲེལ་བའི་ངོ་སྤྲོད་དང་ཚོགས་གཙོ་མཁན་པོ་འཇིགས་མེད་རྣམ་རྒྱལ་གྱིས་ཞིབ་འཇུག་ཚོགས་པའི་དམིགས་ཡུལ་ངོ་སྤྲོད་དང་འབྲེལ་བའི་འཚམས་འདྲིའི་གསུང་བཤད་གནང་རྗེས་བླ་ཆེན་རྣམ་པས་དམིགས་བསལ་བཀའ་སློབ་གནང་ཤིང་། དེ་རྗེས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས་ཀྱི་ལས་འཛིན་ཚོགས་གཙོ་ཟུར་བ་ཁག་ཅིག་དང་། ཐའེ་ཝན་རྒྱལ་ཡོངས་ནང་པའི་མཐུན་ཚོགས་ཀྱི་ཚོགས་གཙོ་ཅིན་ཡའོ་ཧྥ་ཧྲི་མཆོག་བཅས་ལ་ཞིབ་འཇུག་ཚོགས་པའི་སློབ་སྟོན་པའི་མཚན་གནས་ཀྱང་དང་ཕྱག་རྟེན་ཁ་བཏགས་བཅས་གནང་། དངོས་གཞིའི་བགྲོ་གླེང་གི་བརྗོད་གཞིའི་ཐོག ལྷ་རམས་པ་བློ་བཟང་ཆོས་འཕེལ་དང་མཁན་པོ་གཡུལ་རྒྱལ། མཁན་པོ་བསོད་ནམས་སེང་གེ་དང་སྤྲུལ་སྐུ་ཐུབ་བསྟན་ནོར་བུ། དེ་བཞིན་ཀཿཐོག་རིག་འཛིན་ཆེན་པོ་བཅས་ཀྱིས་རིམ་པ་བཞིན་ལོ་རྒྱུས་དང་འབྲེལ་བའི་སྒོ་ནས་བོད་བརྒྱུད་ནང་བསྟན་གྱི་མཐུན་ལམ་གྱི་གལ་ཆེའི་རང་བཞིན་དང་། དགེ་འདུན་པས་དེང་རབས་དང་མཐུན་པའི་ནང་ཆོས་ངོ་སྤྲོད་བྱེད་སྟངས། བོད་བརྒྱུད་ནང་བསྟན་དགེ་འདུན་པ་ཚོས་ས་གནས་ཀྱི་སྤྱི་ཚོགས་ལ་ཕན་པའི་ཕྱག་ལས་གནང་ཕྱོགས། ཐའེ་ཝན་ནང་བཞུགས་དགེ་འདུན་པ་ཚོས་རྒྱ་ཡིག་ཆུ་ཚད་གོང་མཐོར་གཏོང་རྒྱུའི་གལ་གནད་དང་དེའི་ཐབས་ལམ། སྤྱི་ཚོགས་ཐོག་བོད་བརྒྱུད་ནང་བསྟན་ལ་ལྟ་སྟངས་ཡང་དག་བསྐྲུན་ཐབས་བཅས་ཀྱི་བརྗོད་གཞིའི་ཐོག་གཏམ་བཤད་གནང་ཞིང་། ཞིབ་འཇུག་ཚོགས་པའི་ཚོགས་གཙོ་ལས་ཐོག་པ་མཁན་པོ་འཇིགས་མེད་རྣམ་རྒྱལ་མཆོག་གིས་ཐའེ་སྡོད་བོད་མིའི་ཆོས་དང་རིག་གཞུང་གོང་འཕེལ་གཏོང་ཐབས་དང་ཐའེ་བཞུགས་དགེ་འདུན་པ་ཚོའི་ཐོང་མཆན་སྐོར་ལ་གསལ་བཤད་དང་། འབྲེལ་འབྱུང་འགྱུར་ཕྱག་ལས་གནང་ཕྱོགས་སོགས་སྙན་སྒྲོན་ཞུས་རྗེས་དེར་བཞུགས་ཚང་མས་གོང་གསལ་བརྗོད་གཞིའི་ཐོག་ལ་རེ་རེ་བཞིན་དགོངས་ཚུལ་དང་དྲི་བ་དྲིས་ལན་ལྷུག་པོར་གནང་བ་བཅས་བྱུང་ཡོད།
ཁྱད་པར་དུ་བཀའ་ཟུར་༧ཀིརྟི་སྐྱབས་མགོན་རིན་པོ་ཆེས་ཁོང་ཉིད་དགོང་ལོ་བདུན་ཅུ་དོན་དགུ་ལ་ཕེབས་པའི་ཉམས་མྱོང་གི་བརྒྱུད་རིམ་ནས་གསུངས་ཏེ། ཐོག་མར་རྒྱ་གར་དུ་འབྱོར་སྐབས་བོད་ཀྱི་དགེ་འདུན་པ་དག་ཁྱིམ་པ་མི་ནག་དག་དང་མཉམ་དུ་འོག་ནས་ཡར་ཁ་འཁོར་ནས་འདུག་དགོས་པ་དང་། ལྷོ་བརྒྱུད་ནང་པའི་དགེ་འདུན་པ་དེ་ཚོ་སྒང་ནས་མར་བཞུགས་ཀྱི་ཡོད་པ་ལྟ་བུ། བོད་ཀྱི་དགེ་འདུན་པ་ལ་བླ་མའི་ཆོས་ལུགས་ལབ་པ་ལས་རྒྱལ་སྤྱིའི་ཁྲོད་དུ་ནང་པ་དངོས་གནས་ཤིག་ཡིན་པའི་ངོས་ལེན་ཡང་མེད་པ་ལྟ་བུའི་གནས་སྟངས་ཤིག་ཡོད་ན་ཡང་། ཕྱིས་སུ་རིམ་གྱིས་༧གོང་ས་རྒྱལ་བའི་དབང་པོའི་བཀའ་སློབ་མཛད་འཕྲིན་ལ་བརྟེན་ནས་ད་ཆ་ལྷོ་བརྒྱུད་ནང་པའི་དགེ་འདུན་པ་དེ་ཚོའང་ང་ཚོའི་སར་ཚུར་ཆོས་ཞུ་རུ་ཡོང་བ་ཞིག་བྱུང་བ་འདི་༧གོང་ས་མཆོག་གི་བཀའ་དྲིན་ཡིན་པ་དང་། ང་ཚོའི་མི་རབས་འདི་དང་། འབྱུང་འགྱུར་གྱི་མི་རབས་ཚང་མས་འདིའི་ཕྱོགས་ལ་ངེས་པར་དུ་མུ་མཐུད་འབད་བརྩོན་དགོས་པ། ཁྱད་པར་དུ་ཐའེ་ཝན་ནི་ཆོས་དད་ཆེན་པོ་ཡོད་པའི་ས་ཁུལ་ཞིག་ཡིན་པའི་ཆ་ནས་ཀྱང་དགེ་འདུན་པའི་སྤྱོད་ལམ་གལ་ཆེན་ཡིན་པ་འདིར་དམིགས་བསལ་ཐུགས་སྣང་གནང་དགོས་པའི་བཀའ་གནང་མཛད་སོང་། དེ་བཞིན་༧སྐྱབས་རྗེ་གྱང་ཁང་རིན་པོ་ཆེས་ཀྱང་ཞིབ་འཇུག་ཚོགས་པའི་ངོ་ནས་དེང་གི་དུས་འདིར་ནད་ཡམས་ཀྱི་རྐྱེན་གྱིས་འགྲོ་བ་མིའི་རིགས་སྤྱིའི་ལུས་སེམས་ལ་དཀའ་ངལ་ཆེན་པོ་འཕྲད་བཞིན་པའི་སྐབས་འདིར་འགྲོ་བ་བདེ་ཐབས་དང་། བསྟན་པ་རྒྱས་ཐབས་ལ་དམིགས་པའི་གསོལ་སྨོན་དང་བགྲོ་གླེང་གོ་སྒྲིག་གནང་བ་འདི་ཧ་ཅང་དོན་སྙིང་དང་ལྡན་པ་ཞིག་ཡིན་པར་མ་ཟད། སྐབས་འདིའི་གྲོ་གླེང་གི་གྲུབ་དོན་ཡོད་ཚད་མ་འོངས་པར་བོད་དང་ཧི་མ་ལ་ཡའི་ཁུལ་གྱི་ནང་བསྟན་གཙོ་བོར་གྱུར་པའི་བསྟན་པ་སྤྱིའི་འཛིན་སྐྱོང་སྤེལ་གསུམ་དང་འབྲེལ་བ་ཡོད་པའི་རྒྱུ་ཆ་གལ་ཆེན་ཞིག་ཆགས་ངེས་ཡིན་པ་སོགས་གསུངས་ཡོད། དེ་བཞིན་ཇོ་ནང་༧རྒྱལ་ཚབ་རིན་པོ་ཆེའི་ངོས་ནས་ཀྱང་། ཆོས་བརྒྱུད་བར་གྱི་མཐུན་ལམ་གལ་ཆེན་ཡིན་པ་དང་། ནང་བསྟན་ཡུལ་གྲུ་སོ་སོར་དར་རྒྱས་ཡོང་བར་བསྡུ་བ་རྣམ་པ་བཞིའི་སྒོ་ནས་བསྟན་པ་སྤེལ་རྒྱུ་གལ་ཆེན་ཡིན་པ་བཅས་ཀྱི་ཐད་བཀའ་སློབ་གནང་ཡོད།
དེ་རྗེས་ཐའེ་ཝན་ནང་བསྟན་མཐུན་ཚོགས་ཀྱི་ཚོགས་གཙོ་ཅིན་ཡའོ་ཧྥ་ཧྲི་མཆོག་གིས། ཁོང་ཉིད་ཀྱིས་སྔར་༧གོང་ས་མཆོག་ཐའེ་ཝན་དུ་ཆིབས་བསྒྱུར་སྐབས་སོགས་སུ་དམིགས་བསལ་གོ་སྒྲིག་ཚོགས་ཆུང་གི་གསར་འགོད་དང་འབྲེལ་བའི་ལས་དོན་ཡོངས་རྫོགས་ཀྱི་འགན་ཁུར་གྱི་ཞབས་ཞ་ཞུས་མྱོང་ཡོད་ཚུལ་དང་། ཁོང་ཉིད་ཐའེ་ཝན་ནང་སྲིད་ལས་ཁུངས་ཀྱི་ཆོས་དོན་ལག་བསྟར་གྱི་རྒྱུན་ལས་ཡིན་པའི་ངོས་ནས། འབྱུང་འགྱུར་གྱི་ཆར་ཡང་ཐའེ་བཞུགས་བོད་ཀྱི་དགེ་འདུན་པའི་ཐོང་མཆན་དང་འབྲེལ་བའི་དཀའ་ངལ་སེལ་ཐབས་ཐད་ཁོང་ཉིད་ཞིབ་འཇུག་ཚོགས་པའི་ཚོགས་གཙོ་མཁན་པོ་འཇིགས་མེད་རྣམ་རྒྱལ་མཆོག་དང་བཀའ་མོལ་བྱུང་ཡོད་པ་ལྟར་ནུས་ཤུགས་གང་ཡོད་ཀྱིས་རྒྱབ་སྐྱོར་གནང་ངེས་ཡིན་པ། ཁོང་གིས་ཐའེ་ཝན་མི་མང་དང་ཐའེ་ཝན་གྱི་ནང་པ་ཡོངས་ཀྱི་ཚབ་བྱས་ནས་བོད་ཀྱི་དགེན་འདུན་པས་ཐའེ་ཝན་དུ་ཆོས་ཀྱི་བདུད་བརྩིས་ཐའེ་ཝན་གྱི་ས་གཞི་འདིར་ཕན་པའི་ཕྱག་ལས་རྒྱ་ཆེར་གནང་དང་གནང་བཞིན་པར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན་པ། ཁྱད་པར་དུ་ད་ཆ་བརྒྱུད་ནང་བསྟན་དང་བསྡུར་ན་བོད་བརྒྱུད་ནང་བསྟན་ཧ་ཅང་རྒྱལ་སྤྱིའི་ཅན་དུ་གྱུར་ཡོད་པ་དང་། དེའི་རྩ་བ་ནི་༧གོང་ས་ཏཱ་ལའི་བླ་མ་མཆོག་གིས་བོད་ཀྱི་ནང་ཆོས་ཀྱི་སྲོག་མ་དོར་བའི་ཐོག་ནས་རྒྱལ་སྤྱིའི་སྤྱི་ཚོགས་ཀྱི་དངོས་ཡོད་དང་མཐུན་པའི་གཟིགས་རྒྱང་རིང་པའི་དབུ་ཁྲིད་ཁོ་ནའི་བཀའ་དྲིན་ཡིན་པས་ཁོང་ལ་སྙིང་ཐག་པ་ནས་བཀའ་དྲིན་ཆེ་ཞུ་དགོས་པ་ཞིག་ཆགས་ཡོད་པར་མ་ཟད། ཁོང་ཉིད་སྒེར་ངོས་ནས་རྒྱ་གར་དུ་ཐེངས་ཉི་ཤུ་ཙམ་ལ་གནས་སྐོར་དུ་ཕེབས་སྐབས་སོགས་སུ་༧གོང་ས་མཆོག་ཞལ་མཇལ་དང་འབྲེལ་ལམ་བཟང་པོ་བྱུང་ཡོད་པ་དང་། ཁྱད་པར་རྒྱ་གར་དུ་གནས་གཟིགས་ལ་ཕེབས་སྐབས་བོད་ཀྱི་བླ་མ་རེ་རེས་ཕྱི་རྒྱལ་བ་བརྒྱ་ཕྲག་མང་པོ་མཉམ་དུ་ཁྲིད་ནས་གནས་སྐོར་དང་འགྲུལ་བཞུད་གསུང་ཆོས་སོགས་གནང་བཞིན་པ་མཇལ་མྱོང་བ་དེ་དག་ཀྱང་བོད་ཀྱི་དགེ་འདུན་པ་དང་རིན་པོ་ཆེ་རྣམ་པས་དབྱིན་ཇིའི་སྐད་ཡིག་དང་ནུབ་ཕྱོགས་ཀྱི་རིགས་གནས་ལ་སྦྱང་གོམས་ཡག་པོ་བྱུང་ཡོད་པའི་གྲུབ་འབྲས་ཀྱང་ཡིན་པར་ངོས་འཛིན་བྱ་བཞིན་ཡོད་པས། མ་འོངས་པར་གལ་ཏེ་ཐའེ་ཝན་དུ་བོད་བརྒྱུད་ནང་བསྟན་འདི་ཉིད་སྔར་ལས་དར་རྒྱས་ཡོང་དགོས་ཕྱིན་དེ་བས་ཀྱང་དགེ་འདུན་པ་དག་གིས་རྒྱ་སྐད་རྒྱ་ཡིག་གཏིང་ཟབ་མཁྱེན་རྒྱུ་དང་། ས་གནས་ཀྱི་རིག་གནས་སོགས་ལ་མཁྱེན་རྟོགས་སྔར་ལྷག་དགོས་པ།
ཐའེ་ཝན་དུ་སྔར་ནས་བོད་བརྒྱུད་ནང་བསྟན་ལ་གཞི་མེད་སྐུར་འདེབས་བྱེད་མཁན་གྱི་ཚོགས་པ་ཞིག་གི་ཁྱབ་བསྒྲགས་སོགས་ཀྱི་རྐྱེན་བྱས་ནས་ཐའེ་ཝན་མི་མང་ཁྲོད་བོད་བརྒྱུད་ནང་བསྟན་ལ་གོ་ནོར་ཐེབས་ཡོད་པ་དེ་རིགས་ལ་དགོས་ངེས་ཀྱི་བརྡ་ལན་དགོས་གལ་བྱུང་ན་ཁོང་དང་ཐའེ་ཝན་ནང་བསྟན་མཐུནཚོགས་ཀྱི་ངོས་ནས་ངེས་པར་དུ་རྒྱབ་སྐྱོར་དང་མཉམ་ཞུགས་གནང་ངེས་ཡིན་ཚུལ་སོགས་གསུངས།
དེ་ནས་དགེ་འདུན་པ་ཡོངས་ཀྱིས་མཉམ་དུ་ཏོག་དབྱིབས་ནད་དུག་གི་གནོད་འཚེ་ལས་མྱུར་དུ་ཐར་ཆེད་དམིགས་པའི་ཞལ་འདོན་དང་སྨོན་ལམ་གྲུབ་མཚམས་མུ་མཐུད་གདན་ཞུས་གཏམ་བཤད་པ་དག་གི་གསུངས་བཤད་དང་འབྲེལ་ཉིན་གང་གི་བགྲོ་གླེང་དང་དྲི་བ་དྲིས་ལན་སོགས་གང་ཅིར་ཧ་ཅང་ལྷུག་པོར་བྱུང་ཡོད་པ་རེད། བཞུགས་གྲལ་གྱི་གོ་རིམ་ཡང་ཞིབ་འཇུག་ཚོགས་པའི་རྩ་བའི་ལངས་ཕྱོགས་བཞིན། ནམ་རྒྱུན་ཚོགས་པ་དེ་འདྲ་མཉམ་ཞུགས་སྐབས་མང་པོ་ཞིག་ལ་གྲལ་མཐོ་དམན་སྒྲིག་སྟངས་ཐད་དགོས་མེད་ཀྱི་རེ་དོགས་སྣ་ཚོགས་ཡོང་བཞིན་པ་དེ་ཚོར་འགྱུར་བ་གཏོང་ཆེད་དང་། ཚོགས་ཞུགས་པ་ཚང་མ་འདྲ་འདྲ་མཉམ་ཡོང་ཆེད། ཚོགས་འདུའི་དམིགས་བསལ་སྐུ་མགྲོན་ལས་གཞན་ཚོགས་ཞུགས་པ་ཡོངས་རྫོགས་ཐོ་འགོད་ཀྱི་ཨང་གྲངས་གོ་རིམ་མེད་པར་སྣོད་དུ་བླུགས་ནས་བཞག་པའི་ཁྲོད་ནས་སོ་སོའི་ལག་ཏུ་གང་ཐོབ་པ་ཁོ་ན་གཞིར་བཟུང་གིས་བཞུགས་གྲལ་དུ་འཁོད་རྒྱུ་ཕྱག་ལེན་དུ་བསྟར་ཡོད།
དེ་རྗེས་བགྲོ་གླིང་དངོས་གཞི་གསུང་བཤད་གནང་མཁན་དག་གི་ངོས་ནས། ཐོག་མར་ལྷ་རམས་པ་བློ་བཟང་ཆོས་འཕེལ་གྱིས་བརྗོད་གཞི་དང་འབྲེལ་ནས་ང་ཚོས་དུས་རྒྱུན་ཆོས་བརྒྱུད་ཕན་ཚུན་ཕྱོགས་རིས་མེད་པའི་དད་པ་དང་དག་སྣང་དགོས་པ་དང་། མི་མང་གི་ཁྲོད་དུ་ངེས་པར་དུ་ཕན་ཚུན་གྱི་མཐུན་ཆ་དང་མཐར་ཐུག་གི་དོན་གནད་གཅིག་ཏུ་འབབ་པའི་ཚུལ་རྩལ་འདོན་བྱས་ནས་བཤད་དགོས་པ་དེ་གནད་འགག་ཡིན་པ། དེ་དང་མཉམ་དུ་སོ་སོའི་བཤད་གྲྭ་སོགས་སུ་ཡིག་ཆ་ཁྲིད་སྐབས་རང་རང་གི་ལུགས་ཐུན་མོང་མ་ཡིན་པ་དེ་འཛིན་སྐབས་འཛིན་མཚམས་མི་མཐུན་པའི་ཆ་ཡོད་པ་དེ་ཚོ་དེ་ནང་བཞིན་སོ་སོའི་ལུགས་བཞིན་བཤད་དགོས་པ། དེ་ནི་སྤྱིར་བཏང་གི་རིས་མེད་ལ་དད་པ་དང་དག་སྣང་ཡོད་མེད་སོགས་ལ་འབྲེལ་བ་ཡོད་པ་ཞིག་མིན་པས་ལྟ་ཚུལ་འདི་གཉིས་ངེས་པར་དུ་དབྱེ་བ་ཡག་པོ་ཞིག་ཕྱེ་ཤེས་དགོས་པ་སོགས་གསུངས།
དེ་བཞིན། ཚོགས་གཙོ་མཁན་པོ་འཇིགས་མེད་རྣམ་རྒྱལ་མཆོག་གིས་ཀྱང་ཞིབ་འཇུག་ཚོགས་པའི་ངོས་ནས་ཐའེ་ཝན་བོད་རིགས་ཚོགས་པ་དང་དམིགས་བསལ་མཉམ་འབྲེལ་གྱིས་ཐའེ་ཝན་གྱི་བོད་རིགས་རྒན་པ་ཚོར་ནང་ཆོས་ཉམས་ལེན་གྱི་ཁོར་ཡུག་བསྐྲུན་རྒྱུ་དང་། ས་གནས་འདིར་སྐྱེས་པའི་བུ་ཕྲུག་ཚོ་ལ་ཆོས་དང་རིག་གཞུང་ཁྱད་པར་བོད་སྐད་བོད་ཡིག་སློབ་རྒྱུ་སོགས་དང་འབྲེལ་བའི་ཁ་ཡོད་ལག་ཡོད་ཀྱི་ཞབས་ཏོག་ལས་འཆར་དུ་མ་ཞིག་བསྒྲིགས་བཞིན་ཡོད་པ་དང་། ཞིབ་འཇུག་ཚོགས་པའི་ངོས་ནས་དམིགས་བསལ་ལས་འཆར་འདི་དང་འབྲེལ་བའི་ཐོག་ནས་ཐའེ་བཞུགས་དགེ་འདུན་པ་ཚང་མས་མུ་མཐུད་རྒྱབ་སྐྱོར་ཤུགས་ཆེན་དགོས་པའི་འབོད་སྐུལ་ཞུས་གནང་སོང་།
དེ་བཞིན་མཁན་པོ་གཡུལ་རྒྱལ་མཆོག་གིས་ཆོས་ཚོགས་ཁག་གི་དགེ་འདུན་པ་དག་གིས་ཆོས་དང་འབྲེལ་བའི་ལམ་སྟོན་གནང་སྐབས་སྤྱི་ཚོགས་ཀྱི་དཀའ་ངལ་དང་ཕ་རོལ་པོའི་སེམས་ཀྱི་དཀའ་ངལ་དང་དེའི་རྒྱབ་ལྗོངས་སོགས་ཤེས་པའི་ཐོག་ནས། བཀའ་མོལ་གནང་སྟངས་ཐད་དུས་དང་མཐུན་པ། གནད་ལ་ཁེལ་བ། ཁ་གསལ་བ་བཅས་ཀྱི་ཐོག་ནས་མི་མང་ལ་ནང་ཆོས་འགྲེལ་བཤད་གནང་སྟངས་ཀྱི་ཐབས་ལམ་ལ་སློབ་སྦྱོང་གནང་དགོས་པ། དེ་ནི་དཔེར་ན། ཁྲོམ་རའི་ཅ་ལག་ཚད་ལྡན་ཞིག་ཡིན་ན་ཆ་རྐྱེན་གཉིས་ཡོད་པ་སྟེ། གཅིག་ནི་ཅ་ལག་དེ་རང་ངོས་ནས་སྤུས་དག་ཅིག་ཡིན་དགོས་པ། གཉིས་པ་དེ་དེ་ཉིད་མི་མང་གི་བློ་དང་འཚམས་པའི་ངོ་སྤྲོད་དང་མཚམས་སྦྱོར་ཡག་པོ་ཞིག་བྱེད་དགོས་པ་དང་འདྲ་བ་ཞིག་རེད་ཅེས་གསུངས།
དེ་ནས་མཁན་པོ་བསོད་ནམས་སེང་གེ་མཆོག་གིས་ལྟ་གྲུབ་དང་འབྲེལ་བའི་ཆོས་ཀྱི་བསླབ་བྱ་དང་། ཆོ་ག་ཕྱག་ལེན་དང་འབྲེལ་བའི་ཆོས་ཕྱོགས་ཀྱི་ལག་ལེན་སོགས་གཉིས་ཆར་བྱ་ནམ་མཁར་འཕུར་བའི་གཤོགས་པ་གཡས་གཡོན་བཞིན་དུ་ཧ་ཅང་གལ་ཆེན་ཡིན་པ་དང་། མིའི་དཀའ་ངལ་མང་ཆེ་བ་སེམས་ཀྱི་དཀའ་ངལ་ཡིན་པ་དང་། དེ་ཉིད་བསལ་བའི་ཐབས་ལམ་ཡག་ཤོས་ནང་ཆོས་ལས་བྱུང་བའི་བསླབ་བྱ་དང་ཉམས་ལེན་དག་གིས་མི་མང་ལ་ཕན་འདོགས་དགོས་ཚུལ་གྱི་ཐད་ལ་བཀའ་མོལ་གནང་།
དེ་ནས་སྤྲུལ་སྐུ་ཐུབ་བསྟན་ནོར་བུ་རིན་པོ་ཆེས་བརྗོད་གཞི་དང་འབྲེལ་བའི་ཐད་ནས་ཐའེ་ཝན་དུ་ཕེབས་ནས་ལོ་བཅུ་ཕྲག་གཅིག་གཉིས་འགྲོ་བཞིན་ཡོད་པ་དག་གི་ནང་དུའང་ད་དུང་རྒྱ་ཡིག་ཡག་པོ་མི་ཤེས་པ་ཧ་ཅང་མང་པོ་ཡོད་པ་ནི་ཞན་ཆ་ཆེན་པོ་ཞིག་ཡིན་པ་དང་། དེ་ཡང་གཙོ་བོ་སོ་སོས་དགོས་ངེས་ཀྱི་དོ་སྣང་མ་བྱས་པའི་ལན་པ་ཡིན་པ། དེ་ཡང་སྐད་བསྒྱུར་ཁོ་ནར་བརྟེན་བསྡད་པ་ནི་རང་ཉིད་ཆོས་ཀྱི་སློབ་སྦྱོང་ཡག་པོ་ཡོད་པ་ཞིག་ཡིན་ཡང་། མཐར་རང་ཉིད་ནུས་མེད་དུ་བསྒྱུར་བ་ཞིག་ཡིན། དེ་ཡང་ལས་ཀ་གང་འདྲ་ཞིག་ཡིན་ཡང་ཚང་མ་གཞན་ལ་བརྟེན་པ་ནི་རང་ཉིད་ནུས་མེད་དུ་བསྒྱུར་བྱེད་ཀྱི་རྩ་བ་ཡིན་པ་དང་། སྐད་ཀྱང་དེ་དང་འདྲ་བ་ཡིན་པས་ངེས་པར་དུ་རྒྱ་ཡིག་འདི་ཉིད་སློབ་གྲྭ་ཚད་ལྡན་གྱི་ཁོར་ཡུག་ནས་སྦྱོང་དགོས་པ་དང་། ཁ་པར་སོགས་ཀྱང་འགའ་ཞིག་གིས་བདུད་ཀྱི་ཆོ་འཕྲུལ་རེད་ཅེས་ཟེར་ན་ཡང་། ལྷའི་ཕོ་ཉ་ཡིན་ནམ་བདུད་ཀྱི་ཆོ་འཕྲུལ་ཡིན་རང་ཉིད་ཀྱི་བཀོལ་སྤྱོད་བྱེད་སྟངས་ལ་རག་ལས་པས་བརྡ་འཕྲིན་གྱི་ཆ་རྐྱེན་འདི་དག་སློབ་སྦྱོང་གི་མཐུན་རྐྱེན་དུ་བེད་སྤྱོད་གནང་དགོས་པ་གལ་ཆེན་ཡིན་པ་སོགས་གསུངས།
དེ་ནས་ཀཿཐོག་རིག་འཛིན་ཆེན་པོ་མཆོག་གིས་བརྗོད་གཞི་དང་འབྲེལ་བའི་སྒོ་ནས་ཐའེ་ཝན་གྱི་མི་མང་གིས་བོད་བརྒྱུད་ནང་བསྟན་ལ་མཐོང་སྣང་ཡག་ཏུ་འགྲོ་བ་ལ་གལ་ཆེ་ཤོས་ཏེ། ཕྱོགས་ནས་བོད་བརྒྱུད་ནང་བསྟན་ལ་སྐྱོན་བརྗོད་ཡོང་གིན་ཡོད་པ་དང་། སྐྱོན་བརྗོད་དེ་ཡང་གང་ནས་ཡོང་གིན་ཡོད་པ། དེ་ཡང་ཐའེ་ཝན་དུ་ཡོད་པའི་བླ་གྲྭ་འགའ་ཞིག་དང་འབྲེལ་བ་ཙམ་མིན་པར་བསྟན་པ་སྤྱི་དང་འབྲེལ་བ་ཞིག་ཡིན་པ་འདི་ངོས་ཟིན་དགོས་པ་གལ་ཆེན་ཡིན་པ་སོགས་དཔེ་མཚོན་དང་བཅས་པའི་སྒོ་ནས་གསུངས་ཡོད།
མཇུག་ཏུ། ཞིབ་འཇུག་ཚོགས་པའི་ཚོགས་གཞོན་སྒྲུབ་དཔོན་བསོད་ནམས་ཉི་མ་མཆོག་གིས་གོ་སྒྲིག་ཚོགས་པའི་ཚབ་ཞུས་ནས་དགེ་འདུན་པ་རྣམ་ཚོགས་འདི་ལ་གལ་ཆེན་དོན་ཆེན་དུ་གཟིགས་ནས་སྒེར་གྱི་ཕྱག་ལས་མང་པོ་བཏང་སྙོམས་སུ་བཞག་ནས་ནས་ཆེད་ཕེབས་གནང་བ་དང་། དེ་བཞིན་ཐའེ་ཝན་གྱི་སྐྱབས་རྗེ་མགར་ཆེན་རིན་པོ་ཆེའི་ཆོས་ཚོགས་ཀྱིས་བརྙན་ལེན་ཐད་གཏོང་སོགས་ཀྱི་ཞབས་ཏོག་མཐུན་སྦྱོར་གནང་བ་སོགས་ཚོགས་འདུ་དང་འབྲེལ་ཡོད་ཚང་མར་ཐུགས་རྗེ་ཆེ་ཞུས་རྗེས་ཐེངས་འདིའི་བགྲོ་གླེང་ཕུན་སུམ་ཚོགས་པའི་ངང་ནས་མཇུག་གྲོལ་ཡོད།
དེ་ཡང་ཞིབ་འཇུག་ཚོགས་པའི་བགྲོ་གླེང་ཚོགས་འདི་འདིར་དགེ་འདུན་པ་མང་པོ་ཞིག་གིས་སྔར་ལས་ལྷག་པའི་ཐུགས་སྣང་དང་གདེངས་འཇོག་གནང་བར་མ་ཟད། ཆེད་དུ་ཕེབས་མཁན་དག་གིས་ཀྱང་བསམ་ཚུལ་དང་དྲི་བ་དྲིས་ལན་སོགས་ཧ་ཅང་ལྷུག་པོར་གནང་ཡོད་པ་དང་། ཁོང་རྣམ་པའི་ངོས་ནས་ཀྱང་མང་ཆེ་བས་ཞིབ་འཇུག་ཚོགས་པས་ཐའེ་ཝན་དུ་བསྟན་པ་སྤྱི་དང་འབྲེལ་བ་ཡོད་པའི་ཕྱག་ལས་གང་ལེགས་གནང་བཞིན་ཡོད་པའི་གཟིགས་ཚུལ་དང་ངོས་འཛིན་གྱི་ཐོག་ནས་བཅར་བ་ཡིན་ཚུལ་གསུངས་ཡོད། དེ་བཞིན་དྲ་ལམ་ཐད་གཏོང་ལ་གཟིགས་མཁན་ཡང་སྔ་ཕྱིར་ཁྲི་གཉིས་ལ་ཉེ་བ་བྱུང་ཡོད་པ་དང་། འབྲེལ་ཡོད་གསར་ལམ་སོགས་ཀྱིས་ཀྱང་དོ་སྣང་ཤུགས་ཆེར་གནང་ཡོད།
དེ་ཡང་ཐའེ་ཝན་རྒྱལ་སྤྱིའི་བོད་བརྒྱུད་ཞིབ་འཇུག་ཚོགས་པ་ནི་ཉིས་སྟོང་དགུའི་ལོར་ཐོག་མར་ཐའེ་ཝན་དུ་ཚུགས་པ་དང་། ༧གོང་ས་མཆོག་གིས་དབུས་པའི་རིས་མེད་ཆོས་བརྒྱུད་ཁག་གི་བླ་ཆེན་དང་སྐྱེས་བུ་དམ་པ་མང་པོས་རྒྱབ་གཉེར་དང་གདེངས་འཇོག་ཆེན་པོ་གནང་བའི་ད་ལྟའི་ཆར་ཐའེ་ཝན་གྱི་བོད་བརྒྱུད་ནང་བསྟན་རྗེས་འཇུག་པ་ཐུན་མོང་གིས་ངོས་འཛིན་ཡོད་པའི་ཚོགས་པ་གལ་ཆེ་ཤོས་དེ་ཆགས་ཡོད།
བགྲོ་གླེང་ཧྲིལ་པོ་ཞིབ་ཚོགས་ངོ་དེབ་བརྒྱུད་གཟིགས་ཐུབ། https://www.facebook.com/itbsi