གངས་དཀར་རྒྱལ་སྲས།
དར་རྒུད་དང་རྒྱལ་ཕམ་རེ་བ་དང་ཡར་རྒྱས་གང་ཞིག་ལ་འགྲོ་མིན་ནི་ལས་གཞི་འགོ་འཛུགས་ལ་འབྲེལ་བ་ཡོད་པ་ལས་འགོ་བཙུགས་ཚར་བའི་རྗེས་ལ་ལེ་འདེད་གཏམ་གྱི་མཐའ་མ་ཞེས་པ་ལས་མེད་པས་སྣ་ངོ་ན་ཡོད་དུས་བདག་རྒྱོབ། དབང་ལག་ན་ཡོད་དུས་འདང་རྒྱོབ།
འོས་བསྡུ་ཆེ་ཆུང་གང་ཞིག་འགོ་བཙུགས་པ་དང་ལྷན་ཉོག་གླེང་དང་འཐེན་འཁྱེར་མང་བོ་ཞིག་ཀྱང་འགོ་བཙུགས་ཡོང་གི་ཡོད། དེའང་སྤྱི་འཐུས་གྲོས་ཚོགས་གཙོ་བྱས་པའི་གླེང་སྟེགས་མང་བོ་དང་སྐད་འཕྲིན་གྱི་ཚོམས་མང་བོ་ནས་ཉོག་གླེང་གི་འགོ་བཙུགས་ཏེ་རིམ་བཞིན་གླེང་སྟེགས་དེ་དག་ལས་ཕྱི་ལ་གྱར་ཏེ་སྤྱི་ཚོགས་ཁྲོད་དུ་འགོས་ནད་བཞིན་ཁྱབ་འོང་གི་ཡོད་ལ་དེའང་བསམ་བློ་བ་དང་སྤྱི་སེམས་པ་དེ་དག་ཁོ་ཆད་བྱེད་ཁོ་ན་ལས་སྤྱི་སྒེར་གང་ལའང་ཕན་ཐོགས་མེད་པ་ནི་དོན་དངོས་རང་རེད། འོས་མི་འཐེན་འཁྱེར་དང་ཆོལ་ཁའི་འཐེན་འཁྱེར་ཡང་ན་ཆོས་ལུགས་ཀྱི་འཐེན་འཁྱེར་གྱི་ནད་རྙིང་འདི་ལ་གནོད་པ་ལས་ཕན་ཕ་ཞིག་མེད་པ་ནི་འཐེན་འཁྱེར་ཅན་དང་དགོས་དབང་གིས་འཐེན་འཁྱེར་བྱེད་མཁན་ཚང་མས་ཤེས་ཤེས་པ་རེད། ཡ་མཚན་པ་ཞིག་ལ། འཐེན་འཁྱེར་བྱེད་མཁན་དེ་དག་གིས་ཆོལ་ཁ་དང་ཆོས་ལུགས། ལུང་ཚན་དང་ཡང་ན་འོས་མི་དེ་དག་སུ་ཞིག་གི་ཆེད་དུ་གྲི་འགོ་མདུང་འགོ་བུད་ནའང་ཁྱོད་ལ་དེ་ལ་དཔག་པའི་ཁེ་བཟང་ཏིལ་འབྲུ་ཙམ་ཡང་མེད། མ་ཟད་དཔེར་ན་སྲིད་སྐྱོང་ཞིག་གི་ཆེད་དུ་འཐེན་འཁྱེར་བ་ཁྱོད་ཀྱིས་དྲང་བཞག་རྡོག་རོལ་ལ་བཏང་ནས་ཁོས་སྲིད་སྐྱོང་མི་འཇོན་པ་ཤེས་བཞིན་དུ་སྲོག་བསྡུས་ཀྱིས་ཁོའི་རྒྱབ་རྩར་ལངས་ནས་ཁོ་ཁྱབ་བསྒྲགས་བྱེད་པ་དང་ཁོ་ལ་འོས་འཕེན་པ་ནི་ཁྱོད་ཀྱིས་སྤྱི་ཚོགས་ལ་འགན་མ་ཁུར་བ་ཡིན་ལ་ཁྱོད་ཀྱིས་རང་གི་ཆོལ་ཁ་དང་ཆོས་ལུགས་ཡང་ན་རང་གི་ལུང་ཚན་ལ་འགན་མ་ཁུར་བ་རང་ཡིན།
འདི་ནས་ཁྱོད་ལ་ལྡོག་འདྲི་ཞིག་བྱ་སྟེ། ཁྱོད་ཀྱིས་དྲང་བདེན་རྡོག་རོལ་ལ་བཏང་། མི་རིགས་ཀྱི་བདེ་སྡུག་ལ་འགན་མ་ཁུར་བར་ཕྱོགས་ཞེན་གྱི་དབང་ལ་སོང་སྟེ་ཁོ་ལ་འོས་བླུག་ན་ཁྱོད་དང་ཁྱོད་ཀྱི་ཆོལ་ཁ་དང་གྲུབ་མཐའ་ལ་ཕན་པ་ཅི་ཞིག་འདུག མ་གཞི་འོས་འཕེན་པ་ནི་ཁེ་བཟང་ཞིག་གམ་ཕན་པ་ཞིག་གི་ངོས་ནས་འཕེན་དགོས་པ་ནི་རྩ་དོན་རེད། ཁྱོད་ཀྱིས་ཆོལ་ཁ་དང་ཆོལ་ལུགས་གྲུབ་མཐའི་དབང་ལ་སོང་སྟེ་འོས་བླུགས་ན་ནོར་འཁྲུལ་ཚབ་ཆེན་ཡིན་ཏེ། ཁོས་སྲིད་སྐྱོང་སོགས་འོས་གང་ཡིན་པ་དེ་མ་འཇོན་པའི་སྒང་ལ་འཐུས་ཤོར་མང་བོ་རང་བཞིན་གྱིས་ཡོང་གི་ཡོད་པ་རེད། མ་ཟད་ཁོས་སྤྱི་དོན་གང་ཡིན་པ་དེ་མ་འགྲུབ་པའི་སྒང་ལ་ཁྱོད་རང་ཆོལ་ཁའི་དབང་ལ་སོང་སྟེ་འདམས་པ་ཡིན་པར་ཆ་བཞག་ན་ཁོས་ཁྱོད་ཀྱི་ཆོལ་ཁ་ལ་དེ་བས་ཀྱང་ཕན་མི་ཐོག་ཁོ་ཐག་ཡིན། རྒྱུ་མཚན་ནི་ཁྱོད་ཀྱི་འོས་མི་དེ་སྲིད་སྐྱོང་ཡིན་པར་ཆ་བཞག་ན་ཁོའི་འགན་འཁྲི་ནི་ཆོལ་གསུམ་གྱི་སྐྱིད་སྡུག་མཉམ་མྱོང་གི་ལས་ཀ་ཡིན་པ་ལས་ཁྱོད་ཀྱི་འདོད་པ་ལྟར་ལུང་ཚན་བྱེ་བྲག་བ་ཞིག་ལ་ལས་ཀ་སྒྲུབ་སྟངས་ཡོད་པ་མ་རེད། གལ་ཏེ་ཡོད་ན་ཁོ་རང་ལམ་ལོག་དང་ཁྲིམས་འགལ་རང་བཞིན་དུ་འགྲོ་གི་ཡོད་པ་རེད། དཔེར་ན་༸གོང་ས་མཆོག་ཨ་མདོ་ནས་ཡིན་ནའང་ཨ་མདོ་ལ་ཆོལ་ཁ་གཞན་གཉིས་དང་མ་འདྲ་བའི་མཛད་རྗེས་ཅི་ཞིག་བཞག་སོང། ཆོལ་ཁ་དང་ཆོལ་ཁའི་བར་ལ་ཁྱད་པར་ཅི་ཞིག་བཏོད་སོང་། ད་བར་དུ་སྐྱིད་ན་སྐྱིད་ཆ་མཉམ་དང་སྡུག་ན་སྡུག་ཆ་མཉམ་བྱས་ནས་ཡོང་བ་རེད།
ཉེ་ཆར་བློ་བཟང་སེང་གེ་འཐེན་འཁྱེར་དང་རྩོད་ཉོག་མང་བོའི་ཁྲོད་ནས་ཐར་ཏེ་སྲིད་སྐྱོང་བ་བསྡད་པ་རེད། ཁོས་སྲིད་སྐྱོང་འཇོན་ན་འདྲ་ལ་མ་འཇོན་ནའང་འདྲ་ཆོལ་ཁ་གཉིས་བསྐྱུར་ནས་གཅིག་གི་ཆེད་དུ་ལས་ཀ་སྒྲུབ་སྲིད་གི་མ་རེད་ལ། ཁོ་སྲིད་སྐྱོང་ལ་བསྡད་ནས་ཁམས་པ་ལ་དམིགས་བསལ་ཆོལ་ཁ་གཞན་གཉིས་དང་མ་འདྲ་བའི་ལས་ཀ་ཅི་ཞིག་སྒྲུབ་སོང། ལི་ཐང་ལ་དམིགས་བསལ་གྱི་ཕན་ཅི་ཞིག་བཏགས་སོང། ངོ་མ་བཤད་ན་ངས་ནི་སྲིད་སྐྱོང་གིས་ཆོལ་ཁའི་དབྱེ་བ་ཕྱེ་སྟེ་ཁམས་པ་ལ་ཕན་བཏགས་པ་ལུང་ཚན་གྱི་དབྱེ་བ་ཕྱེ་སྟེ་ལི་ཐང་ལ་ཕན་བཏགས་པ་ཅི་ཡང་མཐོང་ཐོས་མ་བྱུང། གལ་ཏེ་དེ་འདྲ་བྱུང་ཡོད་ན་དེ་ནི་ཁྲིམས་འགལ་ཡིན་པ་ཅོལ་ཆུང་ཡང་ཡིན་པ་མ་ཟད་བོད་མི་རིགས་ཀྱི་ཞབས་འདྲེན་ཡང་རེད། དེའི་རྐྱེན་གྱིས་ཁྱོད་རང་འཐེན་འཁྱེར་གྱི་དབང་ལ་འགྲོ་ནའང་ཆོལ་ཁ་དང་ཆོས་ལུགས་ཡང་ན་ལུང་ཚན་ཕྱེ་བྲག་རེའི་དབང་ལ་འགྲོ་བ་ནི་རང་མགོ་རང་གིས་རྡུང་བ་རེད། དེ་ལས་སྤྱི་སེམས་པ་དང་འཇོན་ཐང་ཅན་ལྷག་བསམ་ཅན་དེ་འདྲ་གང་ན་སུ་ཡོད་ན་རང་གི་རྣམ་དཔྱོད་ཀྱིས་དཔྱད་ཅིང་བརྟགས་ཏེ་འོས་ལ་རྒྱབ་སྐྱོར་བྱས་ན་ཁྱོད་རང་ཆོལ་ལ་ཕན་པ་ཞིག་ཐོགས་ན་འདོད་མཁན་ཞིག་ཡིན་ན་རང་བཞིན་གྱིས་ཆོལ་ཁ་ལ་ཕན་ཐོགས་པར་རེ་བ་ཆེན་པོ་ཡོད་པ་བཞིན་ཆོས་ལུགས་གྲུབ་མཐའ་དང་ལུང་ཚན་གང་གི་ཕྱོགས་ཡིན་ནའང་ཡར་རྒྱས་ལ་ཡོང་བར་རེ་བ་ཆེན་པོ་ཡོད། ཁ་དཔེ་ལའང་། རྒྱལ་པོའི་ཉལ་ས་མ་བདེ་ན་སྤངས་བོའི་ཉལ་ས་མི་བདེ་ཟེར་བས་སྤྱི་ཡར་རྒྱས་ལ་འགྲོ་ས་ཞིག་ནས་ཆོལ་ཁ་བྱེ་བྲག་པ་ཞིག་དང་ལུང་ཚན་བྱེ་བྲག་ཅིག་ཡང་ན་གྲུབ་མཐའ་བྱེ་བྲག་པ་ཅིག་ཡར་རྒྱས་ལ་མི་འགྲོ་ཅི་ལ་སྲིད། དེའི་རྐྱེན་གྱིས་གོ་མི་ཆོད་པའི་ཉོག་གླེང་དང་ཕྱོགས་ལྷུང་སྤངས་མི་འཇོན་ཐང་ཅན་གང་ན་སུ་ཡོད་ཀྱང་རང་གི་དགྲ་ཁ་གཏད་ཡིན་ཡང་སྲིད་སྐྱོང་ལ་འོས་ན་ཁྱོད་ཀྱིས་ངེས་པར་དུ་རང་གི་དགྲ་ཁ་གཏད་དེ་འོས་འཕེན་དགོས། དེ་ནི་དྲང་བདེན་ལ་རྒྱབ་སྐྱོར་དང་སྤྱི་དོན་ལ་འགན་འཁུར་བ་མ་ཟད། རང་གི་མི་བུའི་རིན་ཐང་ཡང་ལྡབ་དང་ལྡབ་ཀྱིས་འཕར་བཅུག་པ་རེད་ལ་དེ་ནས་བཟུང་སྟེ་ཁྱོད་རང་སྤྱི་ཚོགས་ཁྲོད་ཀྱི་ཆ་འཇོག་བྱེད་འོས་ལ་བྱེད་ངེས་པའི་མི་རྩིས་ཆེན་ཞིག རླབས་ཆེན་ཞིག་ཆགས་པ་རེད།
མདོ་དོན་སྙིང་བོར་ཁྱོད་ཀྱིས་སུ་ཞིག་སྲིད་སྐྱོང་ལ་འོས་མི་ལ་ཐག་གཅོད་ན་དང་པོ་མི་དེའི་ལོ་རྒྱུས་དང་འཇོན་ནུས་རང་གཤིས་སོགས་ལ་གང་ཐུབ་ཅི་ཐུབ་ཀྱིས་རྩད་གཅོད་ཀྱིས་ཧ་གོ་དགོས་པ་ནི་རྩ་བའི་གནད་འགག་རེད། ཁྱོད་ཀྱི་ཡིད་ལ་འཛིན་རྒྱུ་ཞིག་ནི་ཕྱོགས་སུ་ལྷུང་བའི་བསམ་བློ་འདོར་དགོས་པ་དང་མི་གཞན་གྱིས་དེ་དང་འདིའོ་ཞེས་བཤད་པ་དེ་བདེན་མིན་ལ་དཔྱད་དགོས་ལ་ཁུངས་བཙན་དགོས། གཞི་ནས་ཁྱོད་ཀྱིས་སྲིད་སྐྱོང་འོས་མི་ཐག་གཅོད་བྱས་ན་དེ་ནི་སྤྱི་དོན་ལ་འགན་ཁུར་བ་ཡིན་ལ་མི་རིགས་དང་རིག་གཞུང་ལ་འགན་ཁུར་བའང་ཡིན། ཞེས་གངས་དཀར་རྒྱལ་སྲས་ཀྱིས་ཆོལ་གསུམ་སྤུན་ཟླ་ཡོངས་ལ་བློ་ཐག་ཉེ་མོས་ཁ་ཚིག་བཟང་བོ་གསེར་དང་ལག་ཚིག་བཟང་བོ་དར་བྱས་ནས་ཁ་སེམས་ཇ་དང་འོ་མ་ཁ་ཁོག་ཟྭ་དང་ལྡེ་མིག་བྱས་ནས་རུམ་ན་ཡོད་ནོ་བསྟན་ནས་སེམས་ན་ཡོད་ནོ་བཤད་པའི་ཁུལ་ཡིན་པས་ཚང་མས་སྤྱི་དོན་ལ་འགན་ཞིག་འཁུར་བའི་རེ་བ་ཆེ།