མེས་པོའི་ཤུལ་བཞག་འཆི་མེད་རྡོ་རྗེའི་ལྟ་གྲུབ།

ཁ་བའི་རྣམ་ཤེས།
 
རིན་ཆེན་གསེར་ཁྲི་མཐོ་པོའི་ཕ་རོལ་ན།།
རྣམ་གསུམ་ངུར་སྨྲིག་གོས་ཀྱི་ཕ་རོལ་ན།།
རྡོས་བཅས་ཤ་ཁྲག་ཕུང་པོའི་ཕ་རོལ་ན།།
རིགས་ཀུན་ཁྱབ་བདག་བླ་མ་སངས་རྒྱས་ཡོད།།

གཏི་མུག་མུན་ནག་འཐིབ་པའི་ཕ་རོལ་ན།།
འདོད་ཆགས་ཆུ་འཛིན་གཡོ་བའི་ཕ་རོལ་ན།།
ཞེ་སྡང་གློག་དམར་འཁྱུག་པའི་ཕ་རོལ་ན།།
སྤྲོས་བྲལ་བདེ་གཤེགས་སྙིང་པོའི་ངོ་བོ་ཡོད།།

སྐྱེ་འཆིའི་ལྦུ་བ་རྡོལ་བའི་ཕ་རོལ་ན།།
སྡུག་བསྔལ་རྦ་རླབས་འཕྱུར་བའི་ཕ་རོལ་ན།།
ངམ་གནག་འཁོར་བ་རྒྱ་མཚོའི་ཕ་རོལ་ན།།
རྣམ་གྲོལ་འཛད་མེད་ནོར་གྱི་བང་མཛོད་ཡོད།།

གཉེན་ལ་ཞེན་ཆགས་སྐྱེ་བའི་ཕ་རོལ་ན།།
དགྲ་ལ་ཁྲོ་སེམས་འབར་བའི་ཕ་རོལ་ན།།
ཕྱོགས་རིས་ལས་ཀྱིས་སྒྲིབ་པའི་ཕ་རོལ་ན།།
ཡུན་རིང་འགྲོགས་པའི་ཕ་མ་སེམས་ཅན་ཡོད།།

རང་དོན་ཁོ་ནར་རྩོན་པའི་ཕ་རོལ་ན།།
རང་རྒྱལ་གཞན་ཕམ་རྩོད་པའི་ཕ་རོལ་ན།།
རང་སྡུག་རང་གིས་སྒྲུབ་པའི་ཕ་རོལ་ན།།
རང་གཞན་ཀུན་ལ་ཕན་པའི་བྱང་སེམས་ཡོད།།

ཚུལ་གསུམ་འབྲུག་སྒྲ་ལྡིར་བའི་ཕ་རོལ་ན།།
ཐལ་ངག་རྣམ་ལྕགས་འབེབས་པའི་ཕ་རོལ་ན།།
སྔ་རྒོལ་ཐལ་བར་རློག་པའི་ཕ་རོལ་ན།།
བརྗོད་བྲལ་དོན་གྱི་གནས་ལུགས་ངོ་མ་ཡོད།།

ཚོགས་དྲུག་འདབ་མ་བཞད་པའི་ཕ་རོལ་ན།།
འདོད་ཡོན་སྦྲང་རྩི་འཁྱིལ་བའི་ཕ་རོལ་ན།།
འཁྲུལ་སྣང་བུང་བ་རྩེན་པའི་ཕ་རོལ་ན།།
མི་འགྱུར་བདེ་བ་ཆེན་པོའི་ཕོ་བྲང་ཡོད།།

རྫས་ངན་སོ་དྲུག་འདུས་པའི་ཕ་རོལ་ན།།
དྲི་ངན་སྣ་ཚོགས་འཐུལ་བའི་ཕ་རོལ་ན།།
ལས་ངན་མ་དག་སྣང་བའི་ཕ་རོལ་ན།།
ཕུང་ཁམས་དག་པ་རང་ལུས་ལྷ་སྐུ་ཡོད།།

འདབ་བརྒྱད་སྙིང་གི་ཟེ་འབྲུའི་ཕ་རོལ་ན།།
རྩ་གསུམ་ལྷ་ཚོགས་འདུས་པའི་ཕ་རོལ་ན།།
རླུང་སེམས་དབུ་མར་འཐིམ་པའི་ཕ་རོལ་ན།།
ལྷུན་གྲུབ་སྐུ་གསུམ་གདོད་མའི་ཕ་ཁྱིམ་ཡོད།།

རྩེ་གཅིག་དད་པའི་སྙིང་གི་ཁུང་བུ་རུ།།
ཡིད་གཉིས་ཐེ་ཚོམས་མེད་དོ་བླ་མ་ལྷ།།
དུག་གསུམ་ནད་ཀྱིས་ཉེན་པའི་མ་གྱུར་འགྲོ།།
སྐུ་བཞིའི་ས་བོན་སྨིན་ཅིང་འགྲོལ་བར་མཛོད།།

དཔག་ཚད་སྟོང་ལ་ཞབས་ཀྱིས་རི་མོ་བྲིས།།
རིན་ཆེན་གསེར་དངུལ་དེ་ཡི་ཡོན་དུ་ཕུལ།།
དཀའ་བའི་གནད་ཀུན་རིགས་པས་གཏན་ལ་ཕབ།།
མེས་པོའི་ཤུལ་བཞག་མ་བརྗེད་ཡིད་ལ་ཟུངས།།

སྨྲས་པ།

ཆོས་ཀྱི་ཉིང་ཁུ་མེས་པོའི་ཞལ་གདམས་འདི།།
ཆོས་མེད་ལོག་ལྟ་ཅན་གྱིས་མཐོང་གྱུར་ན།།
ཆོས་ལ་མི་མཁས་བདག་གི་སྐྱོན་ཡིན་པས།།
ཆོས་སྐྱོང་སྲུང་མ་རྣམས་ལ་བཟོད་པར་གསོལ།།