ཨཱཙཱརྱ་ཨག་ལོ།
རང་གི་རིགས་ལ་ཞེན་པ་དཀར་བ་འབྲོང་ཆུང་ཡིན། །
ལྷག་བསམ་གཙང་མའི་རི་རབ་རྩེག་མཁན་འབྲོང་ཆུང་ཡིན། །
གཞན་ཕན་ཁུར་གྱི་དཀའ་སྡུག་ཐེག་མཁན་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་འཚམ་ཤོས་འབྲོང་ཆུང་ཡིན། །
ཞི་དུལ་ག་ཤལ་རྒྱན་དུ་སྤྲས་པ་འབྲོང་ཆུང་ཡིན། །
བབ་ལྷིང་བརྟན་གསུམ་གཙུག་ཏུ་བཀུར་མཁན་འབྲོང་ཆུང་ཡིན། །
འཇམ་རྩུབ་མདའ་མོའི་སྟངས་འཛིན་ཤེས་མཁན་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་རན་ཤོས་འབྲོང་ཆུང་ཡིན། །
ཕོད་པ་གསུམ་ལྡན་གཤིས་སུ་འཇགས་པ་འབྲོང་ཆུང་ཡིན། །
རྣམ་དཔྱོད་སྤུ་གྲི་རྣོ་དབལ་ལངས་པ་འབྲོང་ཆུང་ཡིན། །
ཞུམ་མེད་སྙིང་སྟོབས་ཀ་བར་སྒྲེང་པ་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་འོས་ཤོས་འབྲོང་ཆུང་ཡིན། །
སྲོལ་རྒྱུན་རིག་པའི་དྲི་བཟང་འཐུལ་ས་འབྲོང་ཆུང་ཡིན། །
དེང་རབས་ཤེས་བྱའི་གོ་ལག་རྒྱས་པ་འབྲོང་ཆུང་ཡིན། །
གནའ་དེང་རིག་པའི་ཉི་ཟླ་འཆར་བ་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མིར་བཏུབ་པ་འབྲོང་ཆུང་ཡིན། །
ཡ་རབས་སྲོལ་བཟང་ཆས་སུ་བཀླུབས་པ་འབྲོང་ཆུང་ཡིན། །
དུས་རབས་ཤིག་གི་རྗེས་སྙེག་ཐུབ་མཁན་འབྲོང་ཆུང་ཡིན། །
མཛའ་མཐུན་གསང་ཐག་འཐེན་ལ་མཁས་པ་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མིར་ནུས་པ་འབྲོང་ཆུང་ཡིན། །
གོང་མར་བཀུར་སྟིའི་མཆོད་པ་འབུལ་མཁན་འབྲོང་ཆུང་ཡིན། །
མཉམ་ལ་མཛའ་མཐུན་ལག་རྡང་སྦྲེལ་མཁན་འབྲོང་ཆུང་ཡིན། །
དམན་ལ་བྱམས་པའི་གཟིགས་པ་ཡངས་པ་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མིར་ལྕོགས་པ་འབྲོང་ཆུང་ཡིན། །
ཡིད་བཞིན་ནོར་བུའི་སྲུང་མི་ཐུ་བོ་འབྲོང་ཆུང་ཡིན། །
གཞིས་བྱེས་གཉིས་ཀྱི་འབྲེལ་བའི་གསེར་ཟམ་འབྲོང་ཆུང་ཡིན། །
དམར་པོ་གུང་ཁྲན་བླ་སྲོག་འདར་ས་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་ཐུབ་པ་འབྲོང་ཆུང་ཡིན། །
མི་ལོ་བཞི་བཅུའི་མྱོང་བའི་རྒད་པོ་འབྲོང་ཆུང་ཡིན། །
བྱས་པ་ཅན་གྱི་དཔག་བསམ་ལྗོན་པ་འབྲོང་ཆུང་ཡིན། །
བླ་མའི་སྤྱན་དུ་གཟིགས་པ་བདེ་ཤོས་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་ལེགས་ཤོས་འབྲོང་ཆུང་ཡིན། །
གཞིས་བྱེས་རེ་བའི་ས་བོན་འཛུགས་ས་འབྲོང་ཆུང་ཡིན། །
གཞུང་ཞབས་རྣམས་ཀྱི་ཡིད་ཆེས་རྩ་བ་འབྲོང་ཆུང་ཡིན། །
ཆོལ་གསུམ་སྤུན་ཟླའི་མཐེ་བོང་སྒྲེང་ས་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་བཟང་ཤོས་འབྲོང་ཆུང་ཡིན། །
རྒྱ་བོད་གནས་ཚུལ་གཏིང་མཐའ་དཔོག་མཁན་འབྲོང་ཆུང་ཡིན། །
དཔོན་གྱི་ཁྲི་རུ་དམ་ཚིག་གཙང་ཤོས་འབྲོང་ཆུང་ཡིན། །
དམ་ཆོས་གཙང་མར་རྗེས་འཛིན་བྱེད་མཁན་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་ཡག་ཤོས་འབྲོང་ཆུང་ཡིན། །
རང་དོན་རི་བོ་རྒྱབ་ཏུ་སྐྱུར་མཁན་འབྲོང་ཆུང་ཡིན། །
གཞན་དོན་ཕྲ་མོ་པང་དུ་ལེན་མཁན་འབྲོང་ཆུང་ཡིན། །
མཛད་པ་ཀུན་ལ་བསྔགས་པ་ཐོབ་མཁན་འབྲོང་ཆུང་ཡིན། །
ཐེག་པ་རིམ་གྱིས་ཁྲི་ལ་འཛེགས་མཁན་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་ཡང་དག་འབྲོང་ཆུང་ཡིན། །
དྲང་བདེན་རྒྱ་མའི་ཚངས་ཐིག་ལང་མཁན་འབྲོང་ཆུང་ཡིན། །
རྫུན་ཟོག་དྲི་མ་དྲུངས་ནས་སྤོང་མཁན་འབྲོང་ཆུང་ཡིན། །
གཞུང་ཞབས་གཞོན་པའི་ལམ་སྟོན་དམིགས་བུ་འབྲོང་ཆུང་ཡིན། །
མདའ་ཤོང་མདུང་ཤོང་ཕོ་རབ་དཀྱེལ་ཡངས་འབྲོང་ཆུང་ཡིན། །
ཉེར་གཅིག་སྲིད་སྐྱོང་འོས་མི་ལེན་ཤོས་འབྲོང་ཆུང་ཡིན།། །།
2020/9/15ཉིན་ཨཱཙཱརྱ་ཨག་ལོ་ཡིས།
མངྒལཾ། །
བསྟོད་རྒྱུ་སྔ་མི་ཉན་ལ་སྨད་རྒྱུ་ཕྱི་མི་ཉན།
བསྟོད་སྨད་གཉིས་ཀྱི་ས་མཚམས་ན།
འགྱུར་ལྡོག་མང་པོ་མཐོང་ཡོང་ངོ།
བབས་ལྷིངས་བརྟན་གསུམ་གལ་ཆེར་མངོན།
འབྲོང་ཆུང་མཆོག་ནི།
འགན་འཁུར་མ་ཐེག་བྲོས་མཁན་འབྲོང་ཆུང་རེད། །
བཀའ་ཤག་རྒྱབ་གཏད་དགོངས་ཞུ་འབྲོང་ཆུང་རེད། །
གཞིས་བྱེས་གཉིས་ཀྱི་སྐུ་སྲུང་འབྲོང་ཆུང་རེད། །
ཉེར་གཅིག་སྲིད་སྐྱོང་འོས་མིན་ངས་མི་ཤེས། །
སྤེན་ཚེ་ལགས་ནི།
་
ལས་བྱེད་རིམ་འཛེགས་རྒན་གྲས་སྤེན་ཚེ་རེད། །
སྐྱེས་ཕོ་མདའ་གྲི་མདུང་གསུམ་ཤོང་མཁན་རེད། །
ཁྲིམས་རྩོད་རྒྱལ་རྔ་གསར་པ་རྡུང་མཁན་རེད། །
ཉེར་གཅིག་སྲིད་སྐྱོང་ཁོང་ལྷག་འོས་མཁན་སུ། །
་
ཀརྡོས།
སྙན་ངག་པའི་བསྟོད་བསྔགས་ལ་ས་མཚམས་མེད་ན་ཡང་ས་བོན་ཞིག་ཅིས་ཀྱང་ཡོད་ངེས། སྙན་ངག་འདིར་ས་བོན་འཛོམས་པོ་ཞིག་འདུག