གཡུ་སྒང་དགེ་འདུན་གྱིས།
ཁ་བའི་འདབ་མར་ཞེན་ཀྱང་། བདག་ཏུ་མ་ཐོབ་པའི་སྐྱོ་སྣང་ཁ་པོ་ལྕེ་རྩེར་འཁྱིལ། རེ་བའི་སྤྲིན་གསེབ་ནས་ངུ་ངག་གི་ཆར་རྒྱུན་བར་མེད་འབབས་ཀྱང་། སྐོམ་གདུང་གིས་གཙེས་པའི་རྣམ་ཤེས་དག་སྨིག་རྒྱུ་རུམ་པའི་ནམ་ཟླར་ཡང་ཡང་འགྲོགས། ཡོད་ཚད་བུ་བཞིན་སྐྱོང་བའི་གངས་སེང་དཀར་མོས། དཀའ་སྡུག་ཡོད་ཚད་བདག་གིར་བཞེས་ཏེ་བགྲང་བྱ་བདུན་ཅུར་མངར་ཁ་སྐྱུར་གསུམ་གྱི་བྲོ་བ་མྱངས། དཀའ་སྡུག་གྲངས་མེད་ཀྱི་ཐུ་འོག་ནས་མཐོ་སྒང་དང་ཁ་བའི་ཆེད། མཛེས་སྡུག་གི་གངས་ལྷ་མེ་ཏོག་གོང་བུ་གཅིག་གྱུར་གྱིས་ཞི་བདེ་དང་ལྷིང་འཇགས། གཉིས་ཕན་གྱི་ལམ་ཁ་ཞིག་ཏུ་ཁྲིད། འོན་ཀྱང་། ལས་དབང་གི་ཁུར་པོ་ལྕི་མོས་གཉའ་ནས་མནན་པའི་གངས་ལྷ་ཚོས། ང་དང་ཁྱོད་ཀྱི་ཁ་དབང་ཆེད། ཕྲག་དོག་དང་གནག་སེམས་ཀྱིས་རང་གིས་རང་ལ་འགྲམ་ལྕག་གཞུ་པ་ལས་གྲང་ངར་དང་ལྷག་རླུང་གིས་ཅི་འདྲས་གཅུན་ཡང་ཚོར་ཤེས་བྲལ།
ལུགས་གཉིས་ཀྱི་གཡུ་རལ་གཉའ་རུ་ཁུར་བའི་གདོང་ལྔ་བ་དེ། དགུང་ལོ་གྱ་གྲངས་ལ་བསྙེགས་ཀྱང་། ད་དུང་མཐོ་སྒང་དང་ཁ་བའི་ཆེད་ཉིན་མཚན་དུས་དྲུག་ཏུ་ལྷོད་ལྷོད་ཀྱི་སྟོང་ཆ་དབེན། འོན་ཀྱང་། དྲན་ཤེས་བག་ཡོད་ཀྱིས་སྟོང་པའི་གངས་ལྷ་ཚོས་ང་དང་ཁྱོད་ཅེས་ཕྲག་དོག་གི་སྨག་རུམ་ནས། མི་ཡུལ་གྱི་ལོ་ངོ་དྲུག་ཅུའི་འབད་འབྲས་ཡོད་ཚད་ས་ཆུ་མེ་རླུང་ལ་བསྟིམས་ཏེ་ཐོབ་ཤོར་གྱི་གནས་སུ་བསྙལ་ཞིང་། ཤན་འདན་ནང་འཁྲུག་གི་གཏམ་རྒྱུད་ཀྱིས་ཡོད་ཚད་གད་སྙིགས་སུ་བསྒྱུར། ལྷག་བསམ་དང་དྲང་བདེན་གྱིས་ཕྱུག་པའི་མི་བུ་དག མིག་ནང་གི་ཚེར་མར་གྱུར་པའི་ཁོར་ཡུག་ན། ཡོད་ཚད་རང་རྒྱལ་གཞན་ཕམ་གྱི་ཀུན་སྤྱོད་རབ་རིབ་ཀྱིས་འདས་པའི་ལོ་ཟླའི་བསྡོམས་ཚིག་ཁྲོད། ལེགས་འགྲུབ་མ་བྱུང་བའི་བྱ་གཞག་ཡོད་ཚད་གཞན་མགོར་དཀྲི་བཞིན། ལག་ངོས་ཀྱི་བཙོག་དྲི་ཡོད་ཚད་ཕ་མའི་གོས་མཐུར་ཕྱི་བའི་རླབས་ཆེན་པ་ཚོས། གཉོམ་ཆུང་ཆུང་གི་བྱེའུ་ཁྱུ་ཚོར་འཇིགས་དངངས་བསྐུལ་བཞིན་སྲིན་པོའི་བགྲང་བྱ་ཁད་ཀྱིས་རྫོགས།
འབྱུང་འགྱུར་གྱི་གད་པ་ཚོས་གཏོར་ཟིན་པའི་གད་སྙིགས་བསྐྱར་བསྒུམ་བྱེད་བཞིན་འཚོ་ལམ་གསར་བར་གོམ་པ་སྤོ་དགོས། འདི་ནི་རང་གིས་རང་ལ་འགྲམ་ལྕག་གཞུས་པས་མཇུག་འབྲས་ཏེ། དེ་ལའང་ཁག་དཀྲི་དང་ལག་པ་ཕྱི་ས་མེད། དེར་བརྟེན་འབྱུང་འགྱུར་གྱི་གད་པ་ནི་ལྷག་བསམ་དང་དྲང་དོན་གཙོ་བའི་གད་པ་བློ་ལྡན་ཞིག་ཅིས་ཀྱང་འཚོལ་དགོས། ཨེ་རེད་ལགས།
ཞེས་གཡུ་སྒང་དགེ་འདུན་གྱིས། ༢༠༢༠།༠༩།༡༨ ཉིན།