ཆང་སྐྱེས།
___ གླུ་ཆུང་འདི་སུ་ལ་ཕོག་ན་དེ་ལ་ཡིན།
ཀ་ཡེ་ཁོ་བོས་གཏམ་ཞིག་བཤད་ཙམ་གྱིས།།
ཁ་ཕྱོགས་མི་མཐུན་ཁ་ཤས་སྨྱོ་ལ་ཁད།།
ག་ཞའི་ལས་ལ་དགའ་བའི་ཆ་ལུགས་འདི།།
ང་རྒྱལ་ཅན་གྱི་རང་གཤིས་ཨ་ཡིན་ནམ།།
ཅ་ཅོ་མེད་པའི་རྟུལ་ཞུགས་འཛིན་ཁུལ་གྱིས།།
ཆ་རྒྱུས་ཡོད་མེད་གཉིས་ལ་འཛུབ་མོ་ཀེར།།
ཇ་ཆང་གཏམ་ལ་རོལ་སའི་ཁོར་ཡུག་ན།།
ཉ་ཉོག་མང་པོ་མ་བཤད་ཟ་འཐུང་བྱོས།།
ཏ་རིན་མཁས་པའི་ཆོ་ལོ་བསྣམས་ཡོད་ཞེས།།
ཐ་ཤལ་ཚིག་གིས་གཞན་ལ་སྨད་པ་འདི།།
ད་ལྟའི་མཁས་པའི་ཕྱག་རྒྱ་ཡིན་རྒྱུ་རེད།།
ན་ཟུག་མེད་ཀྱང་བློ་ལ་མ་བབས་ཐལ།།
པ་སངས་ལྟ་བུའི་སེམས་ཞིག་ཡོད་ན་ཡང་།།
ཕ་རོལ་པ་ལ་དམན་པར་བཟུང་ཙམ་གྱིས།།
བ་གཤིས་མི་ལ་ལྡན་པའི་རང་གཟུགས་དེ།།
མ་གཞི་སོ་སོས་བསྟན་པ་ཤེས་པར་གྱིས།།
ཙ་ཀི་ཙི་ཀེ་ཙམ་ཞིག་ཤེས་མདོག་གིས།།
ཚ་ཚུགས་རྫིག་པོ་མ་སྟོན་དྲིན་ཆེན་ཚོ།།
ཛ་རག་ལྟོ་ལྡིར་ཡིན་པ་སུས་ཀྱང་ཤེས།།
ཝ་མོའི་ཧབ་ཆ་དེ་ལ་སུ་ཞིག་འཇིགས།།
ཞྭ་མོ་གསར་བ་ཟུར་གོན་བྱེད་མཁན་དང་།།
ཟ་འོག་གོས་ཆེན་ལུས་ལ་བཀླུབས་མཁན་སོགས།།
འ་ཅག་བོད་པ་ཚང་ལ་མང་དྲག་པས།།
ཡ་རབས་སུ་ཞིག་ཡིན་མིན་མི་ཤེས་ཐལ།།
རྭ་ཅོ་ལྟ་བུའི་རང་གཤིས་གྱོང་བོ་དེ།།
ལ་ལ་ཞིག་ལ་ཕན་ཐོགས་ཡོད་ཀྱང་སྲིད།།
ཤ་ཤེད་ཞན་པའི་བུ་ཆུང་ང་འདྲ་དག།
ས་ནས་བླངས་ཏེ་ཐང་ལ་མ་རྒྱག་ཅིག།
ཧ་ནེ་ཧོན་ནེ་ཚུལ་གྱི་གླུ་ཆུང་འདི།།
ཧ་ཅང་སྙན་པོ་མེད་པ་བདེན་མོད་ཀྱང་།།
ཨ་མཚར་དགུ་མཚརཅན་གྱི་མི་རྣམས་ལ།།
ཨ་མདོ་གསེར་ཆེན་ཉི་མས་བླངས་པ་ཡིན།།