ཆང་སྐྱེས།
ལྷག་རླུང་ང་རོ་རྒོད་པོ་ཕྱོགས་སུ་ལྡང་།།
ལྔ་རྩེ་སྐར་མ་མཚན་མོའི་མཁའ་ན་འདར།།
ཁྱི་ཚོགས་ཟུག་སྐད་ཕྱི་རོལ་ཁྲོམ་ན་འཕུར།།
ཅེ་སྤྱང་སོ་བ་རི་བོའི་ཕག་ན་འཇབ།།
གློ་རྡེག་སྤྲིན་པ་ནག་པོ་ལང་ལོང་འཁྲུགས།།
ཐན་བྱ་འུག་པའི་ཧབ་ཆ་བྲག་ལ་འཁོར།།
ལྕགས་ཀྱི་མདའ་མོ་འཕུར་བའི་སྟངས་སྟབས་ཀྱིས།།
ཕུག་རོན་ཁྱུ་ཡི་ཚང་མལ་རྨང་ནས་གཏོར།།
པོ་ཏ་ལ་ཡི་སྒོ་གླེགས་འདྲེ་ཡིས་རྡུང་།།
གསེར་གྱི་གླེགས་བམ་མེ་ཡི་ཞལ་ཏུ་མཆོད།།
ལྷ་སའི་སྐྱིད་ཆུ་སྔོན་མོ་ཙག་གིས་བསྡམས།།
ལྷ་བྱ་དཀར་མོ་ལྷོ་མཐའི་ཡུལ་ལ་སྤྱུགས།།
ནོར་བུ་གླིང་གའི་མེ་ཏོག་ས་ལ་ཐོར།།
མེ་ཏོག་ལོ་མ་རླུང་བུས་རྒྱང་ལ་འཁུར།།
ཝ་གཤེད་མཛེས་མར་བརྫུས་པའི་ཆོ་འཕྲུལ་གྱིས།།
རིག་པའི་དཔག་བོ་གཤེད་ཀྱི་འབངས་ལ་བཀུག།།
གངས་དཀར་རི་བོའི་དབུ་འཕང་བྲང་ལ་སྨད།།
རྨ་འབྲི་གཙང་བོའི་སྨྲེ་ངག་རྒྱང་ལ་འཐེན།།
རྩྭ་ཐང་ཡངས་པའི་ངོ་གདོང་ཁྲག་ལ་སྦྱར།།
ལུག་རྫི་བུ་མོ་བཙན་གྱིས་བག་ལ་འཕྲོག།
བསམ་གཞིག་མགོ་བོ་ལྕི་མོ་ལག་པས་བསྐྱོར།།
སྙིང་གི་འཕུར་ལྡིང་མགྱོགས་མོ་སྟོད་ལ་འཚངས།།
ཐ་མག་ཚེ་སྲོག་རེ་རེ་ཤུགས་ཀྱིས་རྔུབ།།
ཤུགས་རིང་གཅིག་གིས་འཁོར་ཡུག་ལྷིང་འཇཊ་དཀྲོཊ།།