བྱས་རྗེས་ཅན་དང་འཆར་སྣང་ཅན་ནི་ང་དང་ཁྱོད་ཀྱི་སྲིད་སྐྱོང་ཡིན།

ཁྲིམས་ལུགས་སློབ་མ་ཉི་འོད། (སྦེང་ལོར།)

སྔོན་གླེང་།

ཕྱི་ལོ་ ༢༠༢༡ ལོའི་བོད་མིའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་སླེབས་ལ་ཉེ་བ་རེད། འདི་ནི་བོད་མི་རིགས་ཀྱི་མ་འོངས་པའི་མདུན་ལམ་ཐག་གཅོད་དང་འབྲེལ་བའི་ལས་དོན་གནད་འགག་ཅན་ཞིག་ཡིན། ད་ལྟའི་རྒྱལ་སྤྱིའི་ཆབ་སྲིད་ཀྱི་ཁ་ཕྱོགས་ལ་བལྟས་ན་འཛམ་གླིང་ཤར་ནུབ་ཀྱི་སྟོབས་ཆེན་རྒྱལ་ཁབ་ཕལ་མོ་ཆེས་རྒྱ་ནག་གི་དབང་ཤུགས་ལ་ཁ་གཏད་ནན་པོ་གཅོག་བཞིན་པའི་སྐབས་ཡིན། རྒྱའི་བཙན་གནོན་འོག་ཏུ་གནས་པའི་ཡུ་གུར་བ་དང་ལྷོ་སོག ཧོང་ཀོང་། ཐེ་ཝན་སོགས་ཀྱི་ཞུ་གཏུག་དང་འཐབ་རྩོད་ལ་ནུས་པ་ཅུང་ཙམ་ཐོན་བཞིན་ཡོད་ལ། འདིས་ཚོའི་བར་ནུས་ཤུགས་གཅིག་སྒྲིལ་གྱི་བསམ་བློ་ཡང་བསྐྱེད་བཞིན་པའི་སྒང་ཡིན།

རང་ཅག་ལ་མཚོན་ན་བོད་ནང་དུ་དམ་དྲག་སྔར་ལས་ཇེ་ཆེ་དང་སྲིད་ཇུས་སྔར་ལས་ཇེ་མཁྲེགས་རེད། བཙན་བྱོལ་བོད་མིའི་སྤྱི་ཚོགས་ཀྱི་གནས་བབ་ལའང་ཉེ་བའི་ལོ་འགའི་རིང་གནམ་ས་ལྟ་བུའི་འགྱུར་ལྡོག་ཐེབས་ཡོད། ད་ལྟའི་ཆར་བཙན་བྱོལ་བ་བརྒྱ་ཆ་ལྔ་བཅུ་ཙམ་རྒྱ་བལ་འབྲུག་གསུམ་གྱི་ཕྱི་ལོགས་ཤར་ནུབ་རྒྱལ་ཁབ་སུམ་ཅུ་(དབུས་བོད་མིའི་སྒྲིག་འཛུགས་ཀྱི་ཉམས་ཞིབ་སྙན་ཐོ་ལྟར་)ཙམ་ལ་ཁྱབ་ཟིན་པ་ཡིན་པས། བོད་མིའི་རང་དབང་འཐབ་རྩོད་ཀྱི་ལས་འགུལ་གོ་ལའི་ཁྱོན་ཡོངས་སུ་སྙོབ་ཐུབ་པའི་རེ་བ་བཟང་ས་ནས་རྒྱག་ཆོག་ཀྱང་། ཕྱོགས་གཞན་ཞིག་ནས་བལྟས་ན། འཐབ་རྩོད་ཀྱི་ནུས་པ་ཁ་འཐོར་དགུ་འཐོར་དུ་འགྲོ་ཉེན་ཡང་ཆེ་བས་གྲ་སྒྲིག་སྡུག་ས་ནས་བྱེད་དགོས་ངེས་ཡིན། གང་ལྟར་ང་ཚོའི་མ་འོངས་པ་ནི་ཉེན་ཁ་མང་ལ་གོ་སྐབས་ཀྱང་དེ་བས་མང་བར་ཚོད་དཔག་བྱེད་ཐུབ། དེར་བརྟེན། ང་ཚོའི་མ་འོངས་པའི་སྲིད་སྐྱོང་ལ་གནས་བབ་འདི་འདྲ་ཞིག་གི་འོག་ནས་ཕྱག་ལས་གནང་ཐུབ་པའི་འཇོན་ཐང་ཡོད་མེད་དང་འཆར་གཞི་ཡོད་མེད་སོགས་ཁ་ཡོད་ལག་ཡོད་ཀྱི་ཆ་རྐྱེན་གཞི་ལ་བཞག་ནས་འདེམས་དགོས་པ་ལས། སུ་ཞིག་དད་པ་ཆེ་རབས་དང་གང་ཞིག་དྲང་པོ་ཡོད་རབས་སོགས་ཚད་དུ་གཞལ་མི་ནུས་པའི་ཆ་རྐྱེན་འགའ་ཞིག་བསླངས་ནས་བསྡད་ན་ང་ཚོ་ནམ་ཡང་གནད་དོན་གྱི་སྟེང་དུ་འབབ་མི་ཐུབ།

དང་པོ། མ་འོངས་པའི་སྲིད་སྐྱོང་གི་དགོས་ངེས་ཀྱི་ཆ་རྐྱེན་གླེང་བ།

ཉེ་སྔོན་སྤྱི་ཟླ་ ༨ པའི་ཚེས་ ༥ ཉིན་ ༢༠༢༡ ལོའི་སྲིད་སྤྱིའི་འོས་བསྡུ་ཆེན་མོའི་དབུ་འཛུགས་གསལ་བསྒྲགས་གནང་བ་ནས་བཟུང་ད་བར་དྭང་བླངས་ཀྱིས་སྲིད་སྐྱོང་ལ་བཞེངས་པ་དང་སྔོན་འགྲོའི་འོས་བསྡུའི་ཁྲོད་མི་མང་གི་རྒྱབ་སྐྱོར་ཐོབ་མིན་ཆ་རྐྱེན་ལ་བཞག་པའི་སྒོ་ནས་འོས་གཞིའི་ཁོངས་སུ་བཞུགས་མཁན་བཅས་ཁྱོན་འོས་མི་བརྒྱད་བྱུང་ཡོད། སྤྱིའི་ཆ་ནས་སྲིད་སྐྱོང་གི་འོས་མི་ཁོང་རྣམ་པ་ཕལ་ཆེ་བ་རང་རེའི་བཙན་བྱོལ་སྤྱི་ཚོགས་ཀྱི་ཨ་ཡོད་ནང་གི་ད་ཡོད་རྐྱང་རྐྱང་རེད། འོས་མི་བརྒྱད་ལས་བརྒྱ་ཆ་ལྔ་བཅུ་ལྷག་གིས་༧གོང་ས་མཆོག་གི་སྐུ་ཚབ་དོན་གཅོད་དང་བཀའ་ཤག་སོགས་ཀྱི་ཐུགས་འགན་བཞེས་མྱོང་མཁན་ཤ་སྟག་རེད། དེར་བརྟེན། འདས་པའི་ཕྱག་ལས་ཀྱི་ཉམས་མྱོང་བསྡུར་ན་ཁོང་རྣམ་གཅིག་བཟང་གཉིས་བཟང་རེད། འོན་ཀྱང་། ང་ཚོས་བོད་མིའི་སྲིད་དབང་མཐོ་ཤོས་ཀྱི་འགོ་ཁྲིད་འདེམས་པ་མ་གཏོགས་རླངས་འཁོར་གྱི་ཁ་ལོ་བ་འདེམས་ཀྱི་མེད་པས་འདས་པའི་ཕྱག་ལས་ཀྱི་ཉམས་མྱོང་ཁོ་ན་གཞི་ལ་འཇོག་མི་རུང་།

རང་གིས་བསམས་ན་ང་ཚོས་འདས་པའི་ཕྱག་ལས་ཀྱི་སྒང་གི་གྲུབ་འབྲས་དང་མ་འོངས་པའི་ཕྱག་ལས་གནང་ཕྱོགས་ཀྱི་འཆར་གཞི་གཉིས་ལ་གཙོ་བོར་ལྟ་དགོས། འདས་པའི་ཕྱག་ལས་ཀྱི་སྒང་གི་གྲུབ་འབྲས་ལས་གང་ཟག་དེའི་འཇོན་ནུས་དཔོག་ཐུབ་ལ་ལྷག་བསམ་ཀྱང་དཔོག་ཐུབ། མ་ཟད་བླ་མའི་བཀའ་དགོངས་དང་མཐུན་མིན་དང་དབུ་མའི་ལངས་ཕྱོགས་དང་འགྲིག་མིན་སོགས་ཀྱང་རང་བཞིན་གྱིས་ཤེས་ཐུབ། མ་འོངས་པའི་ལས་དོན་གནང་ཕྱོགས་ཀྱི་འཆར་གཞི་ནི་ད་ལྟའི་དུས་སུ་ལྷག་ཏུ་གལ་ཆེ། གོང་དུ་བཤད་པ་ལྟར་སྲིད་སྐྱོང་གསར་པས་ཁོར་ཡུར་གྱི་འགྱུར་ལྡོག་གསར་པ་ཞིག་གི་ཁྲོད་དུ་ཕྱག་ལས་གནང་དགོས་པ་ཡིན་པས་མ་འོངས་པའི་འཆར་གཞི་གསལ་པོ་དང་དམིགས་གཏད་ངེས་ཅན་ཞིག་ཡོད་དགོས་པ་ལས་སྔོན་ལས་རིགས་གཞན་ཞིག་བསྒྲུབས་མྱོང་བའི་རྒྱུ་མཚན་གྱིས་ཡོད་ཚད་འགྲིག་ཤག་ཤག་བྱས་ན་དངོས་གནས་འགྲིག་ཡོད་མེད་བཤད་ཚོད་མི་ཐིག འཆར་གཞི་དང་དམིགས་ཡུལ་གསལ་པོ་གང་ཡང་མེད་ཀྱང་ད་དུང་ཨུ་ཚུགས་ཀྱིས་འོས་མིའི་ཁོངས་སུ་བཞུགས་འདུག་པ་ནི་ཕྱོགས་གཅིག་ནས་ལྷག་བསམ་ལ་བརྩི་འོས་ཀྱང་། ཡང་ཕྱོགས་གཞན་ནས་བལྟས་ན། དེ་ནི་འགན་མ་ཁུར་བའི་བྱ་སྤྱོད་ཅིག་ལ་བརྩིས་ཀྱང་རྒྱུ་མཚན་མེད་པ་གང་ཡང་མིན།

སྤྱིར་བཏང་ད་ཡོད་འོས་མི་ཕལ་ཆེ་བ་རང་གི་རྒྱབ་སྐྱོར་བས་སྲིད་སྐྱོང་ལ་བཞེངས་རྒྱུའི་སྐུལ་མ་དང་རེ་བ་ཡང་ཡང་བྱས་པ་ལ་བརྟེན་ནས་བཞེངས་པ་ཡིན་རབས་ཁོང་རྣམ་པས་ལན་མང་གསུངས་སོང་བས། ད་བར་འཆར་གཞི་གསལ་པོ་ཞིག་བཏིང་ཐུབ་མེད་པའང་ཁག་ཅི་ཡོད་སྙམ། རེ་ཟུང་གིས་ད་དུང་དེའི་ཕྱོགས་ལ་བསམ་བློ་ཡང་ཞེ་དྲག་བཏང་མེད་ཚུལ་གསུངས་སོང་། མི་མང་པོ་ཞིག་གི་རེ་བ་སྟོང་ཟད་དུ་གཏོང་མ་ཐུབ་ནི་བཟང་སྤྱོད་ཅིག་ལ་བརྩིས་ཀྱང་ཆོག་མོད། ཕྱོགས་གཞན་ནས་བསམ་བློ་བཏང་ན་རང་ངོས་ནས་སྲིད་སྐྱོང་གི་ལས་འགན་ཕྱོགས་ལ་བསམ་བློ་དང་། འཆར་གཞི། གྲ་སྒྲིག་སོགས་གང་ཡང་མེད་ནའང་གཞན་གྱི་སྐུལ་མ་ཙམ་ལ་ཉན་ནས་སྲིད་སྐྱོང་གི་འོས་མིར་བཞེངས་ཡོང་བ་དེར་མ་མཛེས་པའི་ཆ་ཧ་ཅང་ཆེན་པོ་འདུག

ང་ཚོར་མཁོ་བའི་སྲིད་སྐྱོང་འོས་མི་ནི་གཞན་གྱིས་སྐུལ་མའི་འོག་ནས་བཞེངས་ཡོང་མཁན་ཞིག་མ་ཡིན་པར་སོ་སོས་ལོ་མང་རིང་ཕྱག་ལས་གནང་བའི་ཉམས་མྱོང་བརྒྱུད་སྤྱི་ཚོགས་ཆུང་ཆུང་འདིའི་འདས་པའི་སྟོང་ཆ་དང་ད་ལྟའི་གནས་བབ། མ་འོངས་པའི་གོ་སྐབས་ཅི་ཡོད་སོགས་ཚུལ་བཞིན་དགོངས་ནས་དེ་དག་ལ་དཔག་པའི་དམིགས་ཡུལ་དང་འཆར་གཞི་གསལ་པོ་ཡོད་མཁན་གྱི་སྐྱེ་བུ་སྤོབས་པ་དང་ལྡན་པ་ཞིག་ཡིན་དགོས། ལྷག་པར་དུ་ད་ལྟའི་ང་ཚོའི་གནས་བབ་ལ་བལྟས་ན་འོས་མི་འཆར་གཞི་མེད་མཁན་ཞིག་སྲིད་སྐྱོང་ལ་ལངས་ཡོང་བ་ནི་དམག་དཔོན་གོ་ལག་མེད་མཁན་ཞིག་གཡུལ་ས་ལ་མཆོང་རྩིས་བྱེད་པ་དང་ཀུན་ནས་མཚུངས།

ད་ལྟའི་གནས་སྟངས་ལ་བལྟས་ན་རྒྱ་ཆེའི་མི་མང་གིས་འོས་མི་ཕལ་ཆེ་བའི་འདས་པའི་ལོ་རྒྱུས་ཁོ་ན་ལ་བལྟས་ནས་འོས་བླུག་དགོས་པའི་ཚད་ལ་ལྷུང་འདུག རྒྱ་ཆེའི་མི་མང་ཚོར་མ་འོངས་པའི་དབུ་ཁྲིད་ཀྱིས་རང་ཉིད་ལམ་སྣེ་གང་འདྲ་ཞིག་ཏུ་འཁྲིད་འཆར་ཡོད་པའི་སྐོར་ནས་ཤེས་རྟོགས་ཐུབ་པའི་གཞི་རྩའི་ཐོབ་ཐང་ཡོད། དེ་ལྟ་བུའི་གཞི་རྩའི་ཐོབ་ཐང་དེ་མཁོ་སྤྲོད་བྱ་རྒྱུ་ནི་སྲིད་སྐྱོང་འོས་མི་རྣམ་པའི་དོར་དུ་མེད་པའི་འགན་འཁྲི་ཡིན། འགན་འཁྲི་དེ་ཚུལ་བཞིན་སྒྲུབ་དགོས་པ་ལས། མི་མང་ལ་རང་གི་མ་འོངས་པའི་ལས་དོན་བྱེད་ཕྱོགས་སྐོར་ནས་གསལ་པོ་གང་ཡང་མ་བཟོས་ཀྱང་ད་དུང་རྒྱབ་སྐྱོར་ཡོད་ཤག་བྱེད་པ་ནི་ཅུང་ཙམ་འགྲིག་མེད་པར་སྣང་། ཕྱི་ཡི་ཆབ་སྲིད་ཀྱི་འཁྲུག་ཆ་རབ་ཏུ་དོད་ཅིང་ནང་གི་སྤྱི་ཚོགས་ཀྱི་འགྱུར་འགྲོས་ཧ་ཅང་རྒོད་པའི་དུས་འདིར་ང་ཚོས་རང་གི་སྲིད་སྐྱོང་གིས་དུས་དང་འཚམ་པའི་ཕྱག་ལས་གང་འདྲ་ཞིག་གནང་འཆར་ཡོད་མེད་གང་ཡང་ཤེས་རྟོགས་མེད་པའི་སྒང་ནས་འོས་འཕེན་དགོས་ན་བོད་མིའི་འོས་བསྡུ་ཆེན་མོ་འདི་ཉིད་མུན་ནག་གི་འོས་བསྡུ་ཞིག་འགྱུར་འགྲོ་བ་མ་ཡིན་ནམ། འོས་བསྡུའི་ལས་རིམ་འགོ་བཙུགས་ནས་ཟླ་བ་གཉིས་ལྷག་སོང་ཡང་ད་དུང་འོས་མི་ཕལ་མོ་ཆེར་འོས་གཞིར་བཞེངས་རྒྱུའི་གསལ་བསྒྲགས་དེ་མ་གཏོགས་གྲགས་འགུལ་ཞེ་དྲག་མེད་པ་ནི་མང་གཙོ་ཡང་དག་ཅིག་གི་འགྲོ་ལུགས་དང་མཐུན་པ་ཨེ་ཡིན་སྙམ་པའི་ཐེ་ཚོམ་སྐྱེས།

གཉིས་པ། བྱས་རྗེས་ཅན་དང་འཆར་སྣང་ཅན་ནི་ང་དང་ཁྱོད་ཀྱི་སྲིད་སྐྱོང་ཡིན།

སྟབས་ལེགས་པ་ཞིག་ལ་ད་ཐེངས་ཀྱི་འོས་མི་བརྒྱད་པོའི་ནང་ནས་འདས་པའི་ཕྱག་ལས་ཀྱི་སྒང་ནས་འབུར་དུ་ཐོན་པའི་གྲུབ་འབྲས་ཡོད་པ་ཙམ་མ་ཟད། ཕྱག་ལས་དེ་དག་གི་ཉམས་མྱོང་དང་མཐོང་ཐོས་གཞིར་བཞག་ཐོག ད་ལྟའི་རང་རེའི་སྤྱི་ཚོགས་དང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་སོགས་ཕྱི་ནང་གཉིས་ཀྱི་གནས་བབ་ལ་ཧ་ཅང་འཚམ་པའི་ལས་འཆར་དང་དམིགས་ཡུལ་ཡོད་མཁན་ཡང་རེ་གཉིས་ཤིག་འདུག དེའི་ནང་ནས་ཆེས་གཟེངས་སུ་ཐོན་པ་ནི་བྱང་ཨ་རིའི་སྐུ་ཚབ་དོན་ཟུར་དང་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་ཟུར་པ་དབུ་དཀར་ཚང་སྐལ་བཟང་རྡོ་རྗེ་ལགས་རེད། སྐལ་རྡོར་ལགས་ནི་མི་གཞན་གྱིས་སྐུལ་མ་དང་རེ་བ་བྱས་པ་ཙམ་གྱིས་སྲིད་སྐྱོང་ལ་བཞེངས་པ་མ་ཡིན་པར་རང་ངོས་ནས་ཚོར་ཤུགས་དྲག་པོ་དང་ཆོད་སེམས་བརྟན་པོས་སྒང་ནས་བཞེངས་ཡིན་པ་ཁོང་གི་སྲིད་སྐྱོང་དུ་ལངས་དགོས་པའི་རྒྱུ་མཚན་ཞེས་པ་ལས་གསལ་པོར་རྟོགས་ཐུབ། ཁོང་གིས་འདས་པའི་ལོ་དགུའི་རིང་དབུས་བོད་མིའི་སྒྲིག་འཛུགས་ཀྱི་གནད་ཡོད་ལས་གནས་ཁག་གསུམ་གྱི་འགན་ཁུར་བཞེས་ཤིང་། དཔལ་འབྱོར་མཁོ་སྒྲུབ་དང་ལས་འཆར་གསར་པ་སྣ་མང་ཞིག་གི་སྒང་ལ་གཙོ་འགན་བཞེས་པའི་ཉམས་མྱོང་ཐོབ་ཡོད་པས། ང་ཚོས་མ་འོངས་པར་ཅི་ཞིག་རྒྱུན་སྐྱོང་དགོས་པ་དང་གང་ཞིག་ལེགས་བཅོས་དགོས་པ། གང་དུ་གསར་གཏོད་དགོས་པ་སོགས་ཚུལ་བཞིན་གཟིགས་པའི་ཐོག་དེ་དག་གི་ཕྱོགས་ལ་དགོངས་པ་ཟབ་བཞེས་ཀྱིས་ལས་འཆར་ལག་ལེན་དུ་འདེབས་འོས་པ་དུ་མ་ཞིག་བསྒྲིགས་ཡོད་པ་ཁོང་གི་“ཤུགས་སྣོན་བརྒྱག་དགོས་སའི་གནད་དོན་ཆེན་མོ་ལྔ་”ཞེས་པར་ཧ་ཅང་གསལ།

འཆར་གཞི་དང་དམིགས་ཡུལ་ལྡན་པའི་སྒོ་ནས་འོས་མིར་བཞེངས་ཡོང་བ་ནི་ཧ་ཅང་རིན་ཐང་ལྡན་པ་ཞིག་རེད་ལ། བོད་མིའི་མང་གཙོ་ལ་བརྩི་མཐོང་དང་འགན་ཁུར་ཆེན་པོ་བཞེས་ཡོད་པའི་རྟགས་མཚན་ཁྱད་དུ་འཕགས་པ་ཞིག་རེད། སྐལ་རྡོར་ལགས་ཀྱིས་དཀའ་ཉེན་མང་པོ་ཞིག་གདོང་ལེན་གནང་བཞིན་ཁོང་ཉིད་སྲིད་སྐྱོང་དུ་བདམས་པ་ཡིན་ན་མ་འོངས་པར་བོད་མི་རྣམས་ལམ་ཁ་གང་འདྲ་ཞིག་དུ་འཁྲིད་འཆར་ཡོད་པའི་སྐོར་ནས་དམངས་ཚོགས་ལ་གོ་རྟོགས་ཀྱི་ལས་འགུལ་ཚ་ཚ་འུར་འུར་དུ་དང་གོ་རིམ་ལྡན་པའི་ངང་ནས་སྤེལ་བཞིན་པ་འདི་ནི་ཧ་ཅང་མིག་དཔེར་འོས་པ་ཞིག་རེད། ཁོང་གིས་བསྒྲགས་གཏམ་ནང་དུ་རང་ངོས་ནས་འོས་བསྡུའི་དྲིལ་བསྒྲགས་ལས་འགུལ་འདི་ཉིད་བོད་མིའི་མང་གཙོའི་གཟི་བརྗིད་ངོམ་སའི་གོ་སྐབས་ཤིག་ཏུ་བསྒྱུར་ཐུབ་པ་བྱེད་རྒྱུ་ཡིན་ཞེས་དམ་བཅའ་གནང་བ་ལྟར་དོན་ལ་གནས་འདུག་སྙམ།

གསུམ་པ། མ་འོངས་སྲིད་སྐྱོང་གི་ཁྱད་དུ་འཕགས་པའི་ལས་འཆར་དང་དམིགས་ཡུལ།

སྐལ་རྡོར་ལགས་ཀྱི་མ་འོངས་ལས་འཆར་རྣམས་ཁོང་གི་དྲྭ་ཚིགས་དང་གསུང་བཤད་ལས་རིམ་ཁག་ལས་གསལ་པོར་མཇལ་ཐུབ། ཁོང་གིས་“གནད་དོན་ཆེན་པོ་ལྔ་”ཞེས་པ་ལས་དང་པོ་“བོད་མིའི་རང་དབང་འཐབ་རྩོད་ཀྱི་སྟོབས་ཤུགས་གོང་མཐོར་གཏོང་ཐབས”ཞེས་པའི་ནང་སྲིད་སྐྱོང་གསར་པས་པེ་ཅིན་གྱི་རྔ་བརྔུང་སྟངས་ལ་དཔག་པའི་གར་འཁྲབ་ནས་དབུས་བོད་མིའི་སྒྲིག་འཛུགས་དེ་ཉིད་“འཛིན་སྐྱོང་ཉུང་ཙམ་དང་ལས་འགུལ་མང་ཙམ”སྤེལ་བའི་“འཐབ་རྩོད་པའི་སྒྲིག་འཛུགས་”ཤིག་ཏུ་བསྒྱུར་རྒྱུའི་དམིགས་ཡུལ་ཡོད་པ་གསུངས་འདུག མ་ཟད་བོད་རྒྱལ་ཁབ་རྒྱ་ནག་དམར་ཤོག་སྲིད་གཞུང་གིས་བཙན་བཟུང་བྱས་པ་མ་གཏོགས་ལོ་རྒྱུས་ཐོག་ནས་རང་བཙན་གཙང་མ་ཡིན་པའི་བདེན་དཔང་རྒྱལ་སྤྱིའི་སྟེང་དུ་ར་སྤྲོད་གསལ་པོ་བྱས་ཏེ། དབུ་མའི་ལམ་ནི་བསམ་ཤེས་དང་རྒྱུ་མཚན་ལྡན་པའི་ཐབས་ལམ་ཡང་དག་ཅིག་ཡིན་པ་གསལ་འདོན་གནང་འཆར་ཡོད་པ་རེད།

དེ་དང་འབྲེལ་བའི་གནད་དོན་གཉིས་པ་“དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བྱེད་སྟངས་དེང་རབས་ཅན་དུ་བསྒྱུར་ཐབས་”ཞེས་པའི་ནང་བོད་མིའི་སྒྲིག་འཛུགས་ཀྱི་ལས་གཞི་གལ་ཆེན་ཁག་དང་ཞབས་ཞུའི་ལས་རིགས་རྣམས་“བོད་མིའི་སྤྱི་ཚོགས་ཆེན་མོ་གསུམ་”(བོད་ནང་ལོགས། རྒྱ་བལ་འབྲུག་གསུམ། རྒྱལ་ཁབ་གཞན་དུ་གནས་པའི་བཙན་བྱོལ་བོད་མིའི་སྤྱི་ཚོགས)ལ་སྙོབ་ཐབས་དང་འཛིན་སྐྱོང་ཚགས་ཚུད་ཡོང་ཐབས་སུ་སྒྲིག་འཛུགས་ཀྱི་ལས་དོན་བྱེད་ཕྱོགས་བརྡ་འཕྲིན་འཕྲུལ་ཆས་ཀྱི་སྤྱོད་སྒོ་ལ་མང་ཙམ་བརྟེན་པའི་དེང་རབས་རང་བཞིན་ཅན་དུ་བསྒྱུར་དགོས་ཚུལ་གསུངས་འདུག དེའི་ཕྱོགས་ལ་ཁོང་གིས་ད་ལྟའི་བཀའ་ཤག་གི་འོག་ནས་ཕྱག་ལས་མང་པོ་གནང་གྲུབ་པ་ཡིན་པས་ཉམས་མྱོང་དང་གདེང་ཚོད་ཀྱང་གང་འཚམ་ཐོབ་ཡོད་པ་གདོན་མི་ཟ་བ་ཡིན། བཙན་བྱོལ་བོད་མི་བརྒྱ་ཆ་ལྔ་བཅུ་ལྷག་ཙམ་རྒྱ་བལ་འབྲུག་གསུམ་གྱི་ཕྱི་ལོགས་སུ་སླེབས་ཟིན་པ་ཡིན་པས་བོད་མིའི་སྒྲིག་འཛུགས་དེ་ཉིད་“རྒྱལ་མཚམས་མེད་པའི་སྒྲིག་འཛུགས་”ཤིག་ཏུ་བསྒྱུར་ཏེ། དེའི་ཁྱབ་ཁོངས་རྒྱ་བསྐྱེད་གཏོང་ཐབས་ཀྱི་འཆར་གཞི་བཏིང་བ་ནི་ཅི་འདྲའི་ཁ་ཚ་དགོས་གཏུག་ཅིག་རེད་ཨང་།

གནད་དོན་གསུམ་པ་“བོད་མིའི་ཤེས་ཡོན་ལེགས་བཅོས་”ཞེས་པའི་ནང་བོད་པའི་སློབ་ཕྲུག་རྣམས་ལ་སྤུས་ཚད་གཙོ་བོར་འཛིན་པའི་ཤེས་ཡོན་སྤྲོད་ཐབས་སུ་ད་ལྟའི་ཤེས་ཡོན་ལམ་ལུགས་ལ་ལེགས་བཅོས་དང་མཐུན་རྐྱེན་ཁ་འཐོར་དུ་སོང་བའི་བོད་མིའི་སློབ་གྲྭ་རྣམས་ཁ་གྲངས་བཅོ་ལྔ་ཙམ་ལས་མི་དགོས་པར་ཟླ་སྒྲིལ་གཏོང་རྒྱུ་ཡིན་ཞེས་འཁོད་འདུག བཙན་བྱོལ་བོད་མིའི་སློབ་མ་ ༡༥༠༠༠ ཙམ་ལ་སློབ་གྲྭ་༦༤ (དབུས་བོད་མིའི་སྒྲིག་འཛུགས་ཀྱི་སྙན་ཐོ་ལྟར་)ཙམ་ཡོད་པས་སྤྱི་སྙོམ་བྱས་ན་སློབ་མ་ ༢༠༠ ཙམ་ལ་སློབ་གྲྭ་རེ་ཐོབ་པ་ཡིན། མ་ཟད་སློབ་གྲྭ་ཆེ་ཁག་ཚང་མའི་ནང་བོད་པའི་སློབ་ཕྲུག་ཉུང་དྲགས་ནས་མི་རིགས་གཞན་པའི་སློབ་མ་མང་པོ་བསྡུ་བཞིན་ཡོད་ལ་བོད་ཡིག་དང་ཚན་རིག་སོགས་ཀྱི་དགེ་རྒན་ཧ་ཅང་རག་དཀའ་བའི་ཚོད་ལ་སླེབས་ཡོད། སློབ་མའི་ཁ་གྲངས་ལ་དཔག་པའི་སློབ་གྲྭ་རྣམས་ཟླ་སྒྲིལ་གཏོང་ཐུབ་པ་ཡིན་ན། དགེ་རྒན་སོགས་མཐུན་རྐྱེན་ཕྱོགས་ཡོངས་ནས་ཇེ་བཟང་དུ་གཏོང་ཐུབ་ཅིང་སྤུས་ཚད་ལ་དམིགས་པའི་སློབ་སྦྱོང་སྤྲོད་ཐུབ་པ་ཡིན་པས། འདི་ཡང་ཧ་ཅང་དུས་ལ་བབས་ཤིང་གང་མགྱོགས་ལག་བསྟར་དགོས་པའི་འཆར་གཞི་གལ་འགངས་ཅན་ཞིག་རེད། མ་ཟད་ལོ་ལྔ་མན་གྱི་བྱིས་པ་རྣམས་ཀྱི་འཚར་ལོངས་ལ་དཔག་པའི་སློབ་གསོའི་ལས་གཞི་དང་མི་རབས་རྗེས་མའི་མ་དངུལ་གསོག་འཇོག་གནང་འཆར་ཡོད་པ་ནི་དེང་རབས་ཡར་ཐོན་རྒྱལ་ཁབ་མང་པོའི་གནད་དུ་སྨིན་པའི་སློབ་གསོའི་མན་ངག་ཅིག་ཡིན།

གནད་དོན་བཞི་པ་“བོད་མིའི་སྐད་ཡིག་དང་རིག་གཞུང་རྒྱུན་འཛིན་དར་སྤེལ་གཏོང་རྒྱུ་”ནི་ང་ཚོའི་འཐབ་རྩོད་ཀྱི་དམིགས་གཏད་གཙོ་བོ་ཞིག་ཡིན་པས། དེའི་ཕྱོགས་ནས་ཁོང་གིས་ཆོས་རིག་ལས་ཁུངས་ལ་དུས་དང་འཚམ་པའི་ལེགས་བཅོས་གཏོང་རྒྱུ་དང་། སྐད་ཡིག་དང་རིག་གཞུང་གཅེས་འཛིན་ཐད་མ་རྩ་ཇེ་མང་གཏོང་རྒྱུ། སྐད་ཡིག་དང་རིག་གཞུང་གི་ཆགས་འཇིགས་ཆེ་ཤོས་ཐེབས་ས་ནི་ནུབ་ཕྱོགས་བོད་མིའི་སྤྱི་ཚོགས་དག་ཡིན་པས་དེ་དག་ལ་སྙོབ་ཐུབ་པའི་ལས་དོན་ཡང་རབ་དང་རིམ་པ་ཞིག་བསྒྲིགས་གནང་འདུག མ་ཟད་བོད་མིའི་སྒྲིག་འཛུགས་ཀྱི་སྤྱི་ཚོགས་ཡར་རྒྱས་དང་འབྲེལ་བའི་ལས་འཆར་ཀུན་གྱི་ཁྲོད་རིག་གཞུང་དང་སྐད་ཡིག་སྲུང་སྐྱོབ་ལ་དམིགས་བསལ་ཐུགས་སྣང་སྤྲོད་འཆར་འདུག

གནད་དོན་ལྔ་པའི་ནང་ཁོང་གིས་“བོད་མིིའི་དཔལ་འབྱོར་རྒྱུན་གནས་གོང་སྤེལ་གཏོང་ཐབས་”སུ་རོགས་ཚོགས་ཁག་དང་འབྲེལ་ལམ་ཇེ་བཟང་དུ་གཏོང་རྒྱུ་དང་ལྷག་པར་དུ་དཔལ་འབྱོར་སྒང་ནས་གཞན་བརྟེན་གྱི་བསམ་བློ་དོར་ཐབས་སུ་གཞུང་སྒེར་མཉམ་འབྲེལ་ཐོག་ཁེ་ལས་ཚོང་གཉེར་གནང་ཐབས་དང་གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་མ་རྩ་འཇོག་མཁན་གྱི་བུན་གཏོང་དངུལ་ཁང་ཞིག་ཏུ་བསྒྱུར་ཐབས་སོགས་འཆར་གཞི་སྣ་མང་ཞིག་བཏིང་འདུག འདིའི་ཕྱོགས་ནས་སྐལ་རྡོར་ལགས་ལ་ཉམས་མྱོང་ཕུན་སུམ་ཚོགས་ཤིང་གྲུབ་འབྲས་ཀྱང་ཆེན་པོ་ཐོབ་མྱོང་ཡོད་པས། མ་འོངས་པར་སྲིད་སྐྱོང་གི་ཞབས་སྟེགས་སྟེང་ནས་རེ་བ་དེ་བས་ཀྱང་ཆེ་བ་ཡོད། ཧ་ཅང་དུས་དང་འཚམ་ཞིང་གནད་ལ་འཁེལ་བའི་གོང་གི་འཆར་གཞི་ཁག་རེ་རེའི་སྒང་ལ་བསམ་བློ་བཏང་ན་སྐལ་རྡོར་ལགས་ཀྱིས་ནམ་རྒྱུན་ཕྱག་ལས་གནང་བའི་རིང་སོ་སོའི་ལས་འགན་དག་སྒྲུབ་ཐུབ་པ་ཙམ་མ་ཡིན་པར་ང་ཚོའི་སྤྱི་ཚོགས་ཀྱི་ད་ལྟའི་གནས་བབ་དང་གནད་དོན་ཕྱོགས་ཡོངས་ལ་ཐུགས་སྣང་གཏིང་ཟབ་གནང་བཞིན་ཡོད་པ་གསལ་པོ་རྟོགས་ཐུབ།

བཞི་པ། འདས་པའི་ཕྱག་ལས་ལ་གྲུབ་འབྲས་ཆེ་ཞིང་ཉམས་མྱོང་གིས་ཕྱུག་པའི་སྲིད་སྐྱོང་འོས་མི།

སྐལ་རྡོར་ལགས་ཀྱིས་བོད་མིའི་སྤྱི་ཚོགས་སུ་མི་ལོ་ ༢༣ རིང་ཕྱག་ལས་གནང་བའི་བརྒྱུད་རིམ་ཁྲོད་ཁོང་ལ་ཤར་ནུབ་གཉིས་ཀའི་བོད་མིའི་གནས་བབ་ཐད་རྒྱུས་མངའ་ཆེན་པོ་ཡོད། དེ་ནི་སྲིད་སྐྱོང་གསར་པར་དགོས་ངེས་གྱི་ཆ་རྐྱེན་གལ་ཆེན་ཞིག་ཡིན་ལ། ལྷག་པར་དུ་དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་རྒྱ་བསྐྱེད་གཏོང་ཐབས་སུ་མེད་དུ་མི་རུང་བ་ཡིན། ཁོང་གིས་སྲིད་སྐྱོང་གི་དམིགས་བསལ་སློབ་སྟོན་པ་ལོ་གསུམ་གནང་བའི་རིང་སྲིད་སྐྱོང་གི་ཉིན་རེའི་ལས་འགན་མཐའ་དག་ལ་རྒྱུས་ལོན་ཟབ་མོ་ཐོབ་ཡོད་པ་སྨྲོས་མེད་རེད།བྱང་ཨ་རིའི་སྐུ་ཚབ་དོན་གཅོད་གནང་བའི་རིང་ཨ་རིའི་དོན་ཁང་རྒྱལ་ས་ཝ་ཤིན་ཊོན་དུ་སྤོས་ནས་ཨ་རིའི་གཞུང་དང་དབུས་བོད་མིའི་སྒྲིག་འཛུགས་བར་ཟམ་པ་ལྟ་བུའི་ཕྱག་ལས་མང་པོ་གནང་ཡོད། ལྷག་པར་དུ་ལོ་གཉིས་ཙམ་གྱི་དུས་ཡུན་རིང་༧གོང་ས་མཆོག་ཨ་རིར་ཐེངས་བདུན་ཙམ་གདན་ཞུའི་གོ་སྒྲིག་གནང་ཡོད་ཅིང་༧གོང་ས་མཆོག་དང་ཨ་རིའི་སྲིད་འཛིན་བར་མཇལ་འཕྲད་ཐེངས་གཉིས་གོ་སྒྲིག་གནང་ཡོད།

ཉེ་དུས་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་གནང་བའི་རིང་ཁོང་གིས་དཔལ་འབྱོར་འཚོལ་སྡུད་ཀྱི་སྒང་ནས་བྱས་རྗེས་རླབས་ཆེན་བཞག་ཐུབ་པ་བྱུང་ཡོད། ལོ་བཞིའི་རིང་ཨ་རིའི་གཞུང་གི་རོགས་དངུལ་ལྡབ་བཞི་(ཨ་སྒོར་ས་ཡ་ ༢.༩ ནས་ས་ཡ་ ༡༢.༥)ལྷག་འཕར་ཐབས་དང་རོགས་དངུལ་ཐད་ཀར་ལེན་ཐབས་སུ་ཞབས་འདེགས་ཆེན་པོ་བསྒྲུབས་ཡོད་ཅིང་སྤྱི་ཚོགས་ཡར་རྒྱས་ཐེབས་རྩའི་མ་དངུལ་ལྡབ་སུམ་ཅུ་མ་ཟིན་(ཨ་སྒོར་འབུམ་ ༡.༧ ནས་ས་ཡ་༤.༩༥) ཙམ་འཕར་ཐུབ་པ་བྱུང་ཡོད། ད་དུང་ཁོང་གིས་དབུས་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་དང་བོད་མིའི་དྭང་བླངས་ཁྱད་ལས་པའི་ཞབས་ཞུའི་ལས་གཞི། གངས་ལྗོངས་དཔལ་འབྱོར་ཞབས་ཞུ་ཁང་སོགས་སུ་འགན་ཁུར་གཙོ་བཞེས་གནང་སྟེ། མིག་མཐོང་ལག་ཟིན་གྱི་གྲུབ་འབྲས་མང་པོ་བླངས་ཡོད་པ་བཅས་ལས་ཁོང་ལྷག་བསམ་དང་འཇོན་ནུས་སོགས་ང་ཚོས་བཤད་མི་དགོས་པར་དོན་གྱིས་བསྟན་ཡོད་པ་ཡིན།

དབུ་དཀར་ཚང་སྐལ་རྡོར་ལགས་ལ་གཟེངས་སུ་ཐོན་པའི་འདས་པའི་ཕྱག་ལས་ཀྱི་གྲུབ་འབྲས་དང་མ་འོངས་པའི་འཆར་གཞི་གསལ་པོ་ཡོད་པ་ཙམ་མ་ཟད། མ་འོངས་སྲིད་སྐྱོང་ལ་མཁོ་བའི་ཆ་རྐྱེན་གཞན་དག་ཀྱང་ཧ་ཅང་མང་། དེ་དག་ལས་འགའ་ཞིག་ཚིག་ཉུང་དོན་བསྡུས་ཀྱི་ལམ་ནས་ཅུང་ཙམ་བརྗོད་པར་བྱ།

ལྔ་པ། ད་ལྟའི་འཛིན་སྐྱོང་གི་ལས་དོན་རྒྱུན་སྐྱོང་ཐུབ་པ།

མང་གཙོའི་སྒྲིག་འཛུགས་ཀྱི་ཞན་ཆ་ཆེ་ཤོས་ཤིག་ནི་འོས་བསྡུ་བྱེད་ཐེངས་རེར་གཞུང་འཛིན་པ་བརྗེ་པོ་ཐེབས་འགྲོ་བར་བརྟེན། གཞུང་འཛིན་གསར་རྙིང་བར་བསམ་ཚུལ་མི་མཐུན་པའི་རྐྱེན་གྱིས་གཞུང་གི་ལས་དོན་གལ་ཆེན་མང་པོ་ཞིག་རྒྱུན་སྐྱོང་མི་ཐུབ་པའི་ཉེན་ཁ་ཡོད་པ་དེ་ཡིན། འོན་ཀྱང་། ང་ཚོ་ལ་ཉེན་ཁ་དེ་ལས་གཡོལ་ཐུབ་པའི་ལམ་ཁ་ཧ་ཅང་བཟང་པོ་ཞིག་ཡོད་པར་མཐོང་། སྐལ་རྡོར་ལགས་ཀྱི་མ་འོངས་ལས་འཆར་ཁག་ནི་འདས་པའི་ཕྱག་ལས་དང་ཧ་ཅང་འབྲེལ་བ་ཟབ་མོ་ཡོད་པ་མ་ཟད། དེ་དག་གི་ཉམས་མྱོང་དང་མཐོང་ཐོས་ལ་བརྟེན་ནས་བཀོད་སྒྲིག་གནང་བ་གསལ་པོ་རེད། ཁོང་ནི་ད་ལྟའི་བཀའ་ཤག་གི་ལས་དོན་གལ་འགངས་ཅན་ལྔ་དང་ལྔ་བཅུའི་འཆར་སྣང་གི་འཆར་འགོད་པ་དང་འཆར་སྣང་ལག་བསྟར་བྱེད་མཁན་གྱི་ལས་བྱེད་པ་གཙོ་གྲས་ཤིག་ཡིན། ལྔ་དང་ལྔ་བཅུ་ནི་ད་ལྟའི་བཀའ་ཤག་དང་རབ་བྱུང་ན་མ་འོངས་པའི་བཀའ་ཤག་གི་བོད་མིའི་འཕྲལ་ཕུགས་གཉིས་ལ་དམིགས་པའི་སྲིད་ཇུས་གལ་འགངས་ཅན་ཞིག་རེད། ད་ལྟའི་བཀའ་ཤག་གི་ལས་དོན་ཕལ་མོ་ཆེ་འཆར་སྣང་དེ་ཡི་ཆ་ཤས་སུ་གཏོགས་ཡོད། དེར་བརྟེན་སྐལ་རྡོར་ལགས་ནི་ད་ལྟའི་བཀའ་ཤག་གི་གྲུབ་འབྲས་ལྡན་པའི་ལས་དོན་སྤྱི་དང་ལྷག་པར་དུ་ལྔ་དང་ལྔ་བཅུའི་འཆར་སྣང་རྒྱུན་སྐྱོང་བྱེད་མཁན་གྱི་གང་ཟག་ཨང་དང་པོ་དེ་ཡིན། ཁོང་གིས་ཤུགས་སྣོན་བརྒྱག་སའི་གནད་དོན་ཆེན་པོ་ལྔའང་ཞིབ་མོར་བརྟག་ན་ལྔ་དང་ལྔ་བཅུའི་དགོངས་དོན་ཡིན།

དྲུག་པ། བོད་མི་མཉམ་འཁྲིད་ཀྱི་ནུས་པ་ལྡན་པ།

སྐལ་རྡོར་ལགས་ལ་ཤར་ནུབ་གཉིས་སུ་གནས་པའི་བོད་མི་རྒན་གཞོན་བར་གསུམ་ཚང་མ་མཉམ་འཁྲིད་ཐུབ་པའི་དམིགས་བསལ་གྱི་ནུས་པ་ཡོད། དེ་ནི་ཁོང་གི་མི་གཞི་ཀུན་སྤྱོད་དང་། ཁྱིམ་ཚང་གི་སློབ་གསོ། སློབ་སྦྱོང་གི་བརྒྱུད་རིམ། ལས་ཀའི་ཉམས་མྱོང་སོགས་རྒྱུ་རྐྱེན་སྣ་མང་ཞིག་ལ་བརྟེན་ནས་བྱུང་བ་ཡིན། སྐལ་རྡོར་ལགས་ཀྱི་བསྒྲགས་གཏམ་ནང་དུའང་མི་རབས་རྒན་པ་རྣམས་ཀྱི་རྒྱལ་ཞེན་སྙིང་སྟོབས་རྒྱུན་སྐྱོང་གནང་རྒྱུ་དང་མི་རབས་གསར་པ་རྣམས་ལ་འགན་འཁྲི་མང་ཙམ་སྤྲོད་རྒྱུའི་དམིགས་ཡུལ་ཡོད་པ་གསུངས་ཡོད། ན་གཞོན་རྣམས་ཀྱང་སྐལ་རྡོར་ལགས་ལ་ཧ་ཅང་དགའ་མོས་ཆེ་བ་ཁོང་གི་འོས་བསྡུའི་ལས་འགུལ་གྱི་ཁྲོད་ནས་གསལ་པོར་མཐོང་ཐུབ།སྐལ་རྡོར་ལགས་ཀྱི་བསྒྲགས་གཏམ་ནང་གི་“མི་རིགས་གཅིག་དང་རྒྱལ་ཁབ་གཅིག འཐབ་རྩོད་གཅིག་”སོགས་ཀྱི་འབོད་ཚིག་དང་“ང་ཚོས་བསམ་བློ་རྒྱ་ཆེ་སར་བཏང་ནས་ནུས་པ་མཉམ་སྤུངས་ཐོག་བོད་མིའི་རང་དབང་དང་ཐོབ་ཐང་སླར་གསོ་བྱེད་དགོས་”ཞེས་པ་སོགས་ལས་ཁོང་གིས་བོད་མིའི་ཆིག་སྒྲིལ་ཇི་ཙམ་གལ་གནད་དུ་བཟུང་ཡོད་པ་གསལ་པོར་རྟོགས་ཐུབ་པས་ནང་ཁུལ་གྱི་དགོས་མེད་རྩོད་རྙོག་ལ་སེམས་གཏིང་ནས་སུན་སྣང་སྐྱེ་བཞིན་པའི་བོད་མི་བྱིངས་དང་ལྷག་པར་དུ་ན་གཞོན་ཚོས་ཁོང་ལ་དགའ་མོས་བྱེད་པའི་རྒྱུ་མཚན་ཆེ་ཤོས་ཤིག་ཀྱང་དེ་ལོས་ཡིན་སྙམ། ད་དུང་ཁོང་གིས་དྲིལ་བསྒྲགས་ཡིག་ཆའི་སྟེང་དུ་རང་བཙན་འཐབ་རྩོད་པ་སོགས་ཆབ་སྲིད་ཀྱི་ལངས་ཕྱོགས་མི་མཐུན་པ་ཀུན་ལ་གུས་བརྩི་དང་ཆེ་མཐོང་ལྡན་པའི་ཁོར་ཡུག་ཅིག་བསྐྲུན་ངེས་ཡིན་པ་གསུངས་ཡོད། འདི་ཡང་ཧ་ཅང་གནད་འགག་ཅིག་རེད། ང་ཚོས་ནམ་རྒྱུན་རང་དང་ཆབ་སྲིད་ཀྱི་ལངས་ཕྱོགས་མི་མཐུན་པ་ཚོར་ཁ་གཏད་གཅོག་ཐབས་སུ་རང་ཉིད་ནི་ངེས་པ་དོན་གྱི་༧རྒྱལ་བའི་བཀའ་དགོངས་སྒྲུབ་མཁན་ཡིན་ཞེས་དད་མོས་ངོམ་སོ་(དད་པ་འགྲན་བསྡུར་)བྱེད་པའི་གོམས་གཤིས་ཤིག་འདུག་པ་དེས་དགོས་མེད་ཀྱི་རྙོག་གླེང་མང་པོ་ཞིག་ནང་འདྲེན་བྱེད་ཀྱི་ཡོད།

སྐལ་རྡོར་ལགས་ཀྱི་མི་གཞི་ཀུན་སྤྱོད་ལ་བརྟག་ན་ཁོང་གིས་ང་ཚོའི་ནང་ཁུལ་འཐེན་འཁྱེར་གྱི་རྙོག་གྲའི་རིགས་ལ་དོ་སྣང་སྤུ་ཙམ་ཡང་གནང་རྒྱུ་མིན་པ་ཁག་ཐེག་བྱེད་ཐུབ། གལ་ཏེ་ཁོང་སྲིད་སྐྱོང་དུ་ཕེབས་པ་ཡིན་ན་སྔ་མའི་འོས་བསྡུ་དང་དེའི་རྗེས་ཀྱི་རྙོག་གླེང་ཐམས་ཅད་རྙིགས་རོ་བཞིན་དུ་འདོར་ངེས་རེད། མ་གཞི་ཁོང་ལྟ་བུའི་“བསམ་བློ་རྒྱ་ཆེ་སར་”གཏོང་ཐུབ་མཁན་གྱི་སྐྱེ་བུ་རང་ཚུགས་ཅན་ཞིག་ལ་མཚོན་ན་ནང་ཁུལ་གྱི་དགོས་མེད་རྩོད་རྙོག་དེའི་རིགས་སྤང་རྒྱུ་ནི་དཀའ་ལས་ཤིག་ཏུ་བརྩི་མི་སྲིད་སྙམ།

བདུན་པ། རྒྱལ་སྤྱིའི་མཐོང་རྒྱ་དང་རྒྱ་ནག་གི་སྲིད་ཇུས་ལ་རྒྱུས་མངའ་ཟབ་པ།

སྐལ་རྡོར་ལགས་ཀྱིས་རྒྱལ་སྤྱིའི་རྩ་འཛུགས་ཁག་དུ་མའི་ནང་ཕྱག་ལས་གནང་མྱོང་ཞིང་ཡར་ཐོན་ཅན་གྱི་སྲིད་ཇུས་བཟོ་འགོད་དང་ལས་འཆར་བཀོད་སྒྲིག་གི་ཕྱོགས་ལ་ཉམས་མྱོང་ཟབ་པོ་ཡོད་པ་མ་ཟད་ཧིན་བོད་དབྱིན་གསུམ་གྱི་སྐད་ལ་བྱང་ཆ་ལྡན། མ་ཟད་ཁོང་གི་གཙུག་ལག་རབ་འབྱམས་པའི་སྦྱང་བྱ་ནི་རྒྱ་ནག་གི་ཕྱི་འབྲེལ་སྲིད་ཇུས་དང་རྒྱལ་སྤྱིའི་ཚོང་འབྲེལ་རེད། ད་ལྟའི་རྒྱལ་སྤྱིའི་ཆབ་སྲིད་ཀྱི་གནས་བབ་མཐར་གཏུག་ན་སྟོབས་ཆེན་རྒྱལ་ཁབ་ཚོའི་བར་གྱི་ཚོང་འབྲེལ་ལ་རག་ལས་ཡོད་པས། ང་ཚོའི་སྲིད་སྐྱོང་གིས་རྒྱལ་སྤྱིའི་ཚོང་འབྲེལ་དང་རྒྱ་ནག་གི་ཕྱི་འབྲེལ་སྲིད་ཇུས་ལ་བརྟེན་ནས་ཕྱག་ལས་གནང་དགོས་པ་སྨྲོས་མེད་ཡིན་པས་དེ་གཉིས་ཀྱི་སྒང་ལ་མཁྱེན་རྟོགས་དགོས་པའང་ཧ་ཅང་གལ་འགངས་ཆེ། ཆ་རྐྱེན་དེ་དག་ཙམ་མ་ཟད་མཐའ་ན་གཟུགས་བབ་ལང་ཚོ་དང་ན་ཚོད་ཀྱི་སྒང་ནས་བལྟས་ཀྱང་སྐལ་རྡོར་ལགས་ནི་ད་ལྟའི་སྲིད་སྐྱོང་འོས་མི་ཚོའི་ཁྲོད་ཀྱི་ཐོ་རེངས་སྐར་ཆེན་ལྟ་བུ་རེད།

མཐའ་དོན།

ད་ལྟའི་དུས་ཚོད་འདི་ནི་རང་ཅག་བཙན་བྱོལ་དུ་ཡོང་ནས་མི་ལོ་དྲུག་ཅུའི་ནང་གི་ཕལ་ཆེར་ལོ་དུས་གནད་འགག་ཆེ་ཤོས་ཤིག་རེད། ང་ཚོས་རི་བོ་གངས་ཅན་པ་ཚང་གི་འཕྲལ་ཕུགས་རྒྱང་གསུམ་གྱི་ཆེད་དུ་ཤེས་འཇོན་ལྡན་ཞིང་ལྷག་བསམ་གྱིས་ཕྱུག་པ། དུས་མཐུན་གྱི་འཆར་སྣང་ཕུན་སུམ་ཚོགས་པའི་དབུ་ཁྲིད་ཅིག་འདེམས་དགོས་པ་ནི་རང་གཞན་ཀུན་གྱི་འོས་འགན་ཡིན། རང་གི་རྩ་ཆེའི་འོས་ཤོག་སུ་ལ་བླུག་མིན་ནི་སོ་སོའི་ཐུགས་འདོད་ཡིན་མོད། འོན་ཀྱང་། ང་ཚོས་ད་ཡོད་འོས་མི་རྣམ་པའི་འདས་པའི་བྱས་རྗེས་དང་ལྷག་ཏུ་མ་འོངས་འཆར་གཞི་ཚུལ་བཞིན་རྟོགས་པའི་སྒང་ནས་འོས་མི་ལེགས་ཤོས་དེ་འདེམས་དགོས་པ་ལས་གཞན་ཟེར་རྗེས་འབྲངས་དང་དགོས་མེད་འཐེན་འཁྱེར་གྱི་དབང་གིས་འོས་ཤོག་བླུགས་པ་ཡིན་ན་འཆི་གསོན་གྱི་མཚམས་སུ་ལུས་པའི་མི་རིགས་འདི་ལ་གནོད་ཆེན་པོ་བསྐྱལ་བ་ཡིན་ལ་རང་ཉིད་བོད་མི་ཞིག་ཡིན་པའི་འགན་ཡང་ཡོངས་སུ་མ་འགྲུབ་པ་ཡིན་པ་སེམས་ལ་འཛིན་དགོས། བོད་རྒྱལ་ལོ།