ཁྱེད་ཕེབས་ཤུལ་དུ།

གངས་དཀར་སེམས།
 
ཁྱེད་ང་ཚོ་དང་ཁ་བྲལ་སོང་།
ལོ་རྒན་ ༩༤ མི་ཡུལ་འདིར་བཞུགས་རྗེས།
ཁ་སང་སྟེ་ཕྱི་ལོ་ ༢༠༢༠ ཟླ་ ༡༠ ཚེས་ ༡༧ ཉིན།
ཁྱེད་ཕྱིའི་རྒྱལ་ཁབ་ཏུ་སྐུ་གྲོངས་པ་རེད།
ངས་མ་ཎི་ཁ་ནས་འདོན་བཞིན།
སླར་མིག་ནས་མཆི་མ་ཤོར་བཞིན།
དགུང་ལོ་གོ་བཞིའི་ནང་གི་བགྲང་བྱ་སོ་གྲངས་ཙམ།
མུན་ནག་གི་བཙོན་དུ་ཚུད་མྱོང་བའི་ཁྱེད་ཀྱི་ལོ་རྒྱུས་ལ།
ཕྱི་དྲན་ཐེངས་ཤིག་བྱས།

ངས་དཀར་གཙང་གི་གུས་བཀུར་མཐོན་པོས།
ཁྱེད་ཡུལ་གྱར་གྱི་ལྟེ་གནས་སུ་མཇལ་བའི་བསྐལ་བ་བྱུང་མྱོང་།
ངས་ཁྱེད་ཀྱི་ལོ་རྒྱུས་རྒྱ་རྩོམ་དུ་བསྒྱུར་བསམ་པ་ཞིག་ཡོད་ཀྱང་།
དེ་མངོན་འགྱུར་མ་བྱུང་བ་དེ་ངའི་འགྱོད་ས་གཅིག་ཡིན།

རང་རིགས་ལ་བཞག་པའི་བྱས་རྗེས་རླབས་ཆེན་དེའི་རྗེས་སུ།
ཁྱེད་ཞལ་ཟོལ་མེད་ཀྱི་འཛུམ་མདང་དེ་དང་།
ཁྱེད་ཐུགས་གངས་དཀར་ལྟ་བུའི་ལྷག་བསམ་རྨ་མེད་དེ།
སྔར་བཞིན་ཉམས་མེད་པ་ནི།
ང་ལ་མཚོན་ན་ཁྱེད་སྐུའི་རིན་ཐང་ཆེ་ཤོས་ཡིན།

ཚང་མས་ཆབ་སྲིད་ཀྱི་རླུང་གཡུག་ཕྱོགས་དང་འབྲེལ།
རང་སོ་སོའི་ཁུངས་ལུང་བཙལ་ནས།
ཕྱོགས་གཏོགས་ཀྱི་ཁེ་བཟང་ལ་འུར་ཆེ་ཞིང་།
རིགས་སྤྱིའི་མཐུན་མོང་གི་མཐུན་སྒྲིལ་ལ་རྨ་བཟོ་སྐབས།
ཁྱེད་ཀྱིས་རྒྱལ་བའི་དགོངས་བཞེས་ལྟར།
ནུབ་ཕྱོགས་པའི་ཤེས་བྱར་འཇོན་པའི་གཞོན་དར་ཞིག
ང་ཚོའི་དཔོན་ལ་བསྐོས་ན་བཟང་ལུགས་གསུངས་སོང་།

ཁྱེད་སླར་ཕྱི་རྒྱལ་གཉིས་པ་ཞིག་ལ་ཕེབས།
ངུ་བྲོ་བའི་གནས་སྟངས་ཤིག་གིས།
ཡང་ངའི་སེམས་པར་རྨ་ཁ་བཟོས།
དགོང་ལོའི་བབས་དང་།
སྐུ་ཚེའི་མྱོང་ཚོར་དེ་དག་གིས།
ཁྱེད་ལ་སླར་རང་དབང་ལུང་པ་ཟེར་བ་འདི་ནས།
དཀའ་ངལ་དེ་འདྲ་ཞིག་མྱོང་དགོས་པ་རྩ་བ་ནས་མེད།
གནས་སྟངས་དེ་ལེགས་ཉེས་ཅི་ཞིག་ཡིན་ཡང་།
ངས་རྒྱུ་མཚན་གང་ཡང་རྩད་གཅོད་འདོད་མེད།
ཁྱེད་ལ་སླར་ཐུགས་ཕམ་བཟོས་པ་དེར་ངས་བཟོད་མ་ཐུབ།
ངས་སྐད་ངག་འདར་ཞིང་།
གྲོས་ཚོགས་ཀྱི་ར་སྐོར་དེར་ཁྱེད་ཀྱི་ངལ་བའམ།
ཁྱེད་ཐུགས་ཕམ་དགོས་བཟོས་པ་ཚོར།
ངར་སྐད་ཀྱིས་འཁང་ར་ཐེངས་གཅིག་བསྒྲགས།

ཁྱེད་ལ་ངོ་མ་ཁག་མེད།
ངས་ཀྱང་ད་ལྟའི་ཆར།
ཕྱི་རྒྱལ་མགོ་སེར་ལུང་པ་འདི་ནས།
རང་རིགས་ཀྱི་བཟང་སྤྱོད་དང་ལ་རྒྱ་ངོ་མ་དེ།
སྤྲིན་ཕུང་ལྟར་ཡལ་བཞིན།
ཕྱོགས་རྟོགས་ཚོའི་དགོས་མཁོ་དང་།
ཆབ་སྲིད་ཀྱི་ལག་ཆར་བསྒྱུར་བའི།
གནས་སྟངས་སྐྱུར་མོ་དེ་མྱོང་བཞིན་ཡོད།
ཡ་རབས་བཟང་སྤྱོད་ཁ་ཙམ་ལ་འཁྱེར་ནས།
རྒྱ་བཙོན་དུ་བསྡད་མྱོང་ཞེས་བགྲང་བྱ་བརྩིས་ཏེ།
ཁེངས་དྲེགས་ཀྱི་རང་མདོག་བཏོན་མཁན།
སྒེར་གྱི་འདོད་དོན་སྒྲུབ་ཕྱིར།
མ་རབས་སྤྱོད་ངན་ལུས་ཀྱིས་ངོམས་ཅིང་།
དོན་དམ་པའི་རང་རིགས་ཀྱི་ལ་རྒྱ་དང་བཟང་པོར།
གཏོར་གཤིགས་གཏོང་མཁན་ད་དུང་ཡང་།
ང་ཚོའི་སྤྱི་ཚོགས་སུ་ཡོད་པ་ཁྱེད་ཀྱིས་མཁྱེན་ཡོད་ངེས།

དེའི་རྐྱེན་གྱིས།
ངས་ཁྱེད་ཀྱི་དྲང་བདེན་གཡོ་ཟོལ་བྲལ་བའི།
མི་གཤིས་ཀྱི་རིན་ཐང་དེ།
སླར་ཡང་གསེར་གྱི་ལྷུན་པོ་ཡིན་པ་རྟོགས་བྱུང་།
ཁྱེད་ཕེབས་ཤུལ་དུ།
ངས་མ་ཎི་འབྲུ་དྲུག་བགྲང་བཞིན།
ངས་སེམས་ཀྱི་སྡུག་ཚོར་མྱོང་བཞིན།
ཅིའང་ཞུ་མི་ཐུབ་པ་འདི།
ངའི་ཐ་ཤལ་གྱི་གནས་སྟངས་གསོན་པོ་ཡིན།
ཁྱེད་ཀྱང་རྒན་རབས་ལྷག་བསམ་ཟོལ་མེད་ཅན་གཞན་ལྟར།
སླར་ཡང་ང་ཚོའི་རྩ་བའི་བླ་མ་དང་མཉམ།
གངས་ཅན་པའི་ཕ་ས་མ་གཞིས་སུ།
ཕྱིར་བདེ་བའི་སྒོ་ནས་ཕེབས་མ་ཐུབ་པ་དང་།
རང་རིགས་ཀྱི་དོན་དམ་པའི་བྱང་སེམས་ཀྱི་ཤུལ་འཛིན་ནས།
བླ་སྲོག་འཁོར་ས་གངས་ཅན་པའི་ཞིང་དུ།
བདེ་སྐྱིད་དང་རང་དབང་གི་སྐུ་ཚེའི་མཇུག་སྐྱོང་མ་ཐུབ་པ་ནི།
ཕྱི་ནས་མཐོང་མི་ཐུབ་ཅིང་།
གཞན་གྱིས་ཚོར་མི་ཤེས་པའི།
གཏིང་རིམ་ནས་མྱོང་བཞིན།
བཟོད་མི་ཐུབ་པའི་ང་ཚོའི་སྡུག་གི་ཟུག་གཟེར་གཞན་ཞིག་ཡིན།

༢༠༢༠ ཟླ་ ༡༠ ཚེས་ ༡༨ ཉིན་བོད་ཀྱི་རྒྱལ་གཅེས་པ་ཆབ་སྲིད་བཙོན་ཟུར་དོན་དམ་གྱི་དཔའ་བོ་སྟག་སྣ་འཇིགས་མེད་བཟང་པོ་མཆོག་སྐུ་གྲོངས་པའི་སྐྱོ་གནས་ཐོས་རྗེས་ཨོ་གླིང་རང་ཤག་ཏུ་བྲིས།