སྐྱོ་བྲག་དགའ་དབང་།
སྐྱེ་བ་སྔོན་མའི་སྐྱེས་ཐོབ་དང་། ད་ལྟའི་སྦྱོར་བྱུང་གི་ནུས་པས་ལུས་ངག་ཡིད་ཀྱི་བྱ་བ་གང་ཞིག་ཡིན་ནའང་ཆོས་མཐུན་གྱི་སྤྱོད་པ་འབའ་ཞིག་པ་ལས་འཇིག་རྟེན་གྱི་ཆོས་ཀྱིས་གཏན་ནས་མ་གོས་པའི་སྐྱེས་བུ་ངོ་མཚར་ཅན། མཁན་སྤྲུལ་ཨ་བསྟན་ཕུན་ཚོགས་རིན་པོ་ཆེ་མཆོག་གིས།
༡ ཕྱག་ཆེན་ངེས་དོན་རྒྱ་མཚོའི་ནང་ལུས་གནད་སྐབས་རྗེ་བཙུན་མར་པས་ཆེད་དུ་བསྔགས་པ་བླ་མ་ཞང་གིས་བཀྲལ་བའི་བསམ་གཏན་གྱི་ཆོས་ལྔ་ཡི་ནང་ཚན། ལྀ་རྀ་ལྟར་བསྒྲིམ་ཞེས་པ་སྙན་བརྒྱུད་ཀྱི་ཡིག་ཆར་རྩྭ་དྲས་མའི་མདུད་པ་ལ་དཔེར་མཛད་འདུག་པ། རྩྭ་དྲས་མ་འདི་གང་ལ་ངོས་འཛིན་ལགས།
༢ རྐང་པའི་ལོང་བུ་རེ་མིག་ལྟར་བསྣོལ་ཞེས་པའི་བསྣོལ་སྟངས་དེ་སྟེང་འོག་སྐྱིལ་ཀྲུང་གི་དོད་གང་རུང་ངམ། སེམས་སྐྱིལ་ལམ་ཆེད་དུ་ལོང་བུ་ཕྱིར་བསྣོལ་ལྟ་བུ་གང་ལ་གོ་ལགས།
༣ ཁྲིད་ཐུང་བརྒྱ་རྩའི་ནང་བཞུགས་བྱང་ཆུབ་ཀྱི་སེམས་གཉིས་ཀྱི་མན་ངག་ཟབ་རྒྱས་སྣང་བའི་ནང་བླ་རྣལ་ཨང་གསུམ་པར། རྗེ་བཙུན་ཆེན་པོ་སངས་རྒྱས་མཉན་པ་གྲུབ་ཐོབ་དགེ་སློང་དུར་ཁྲོད་པ་མི་སྡུག་པའི་བསམ་གཏན་གྱི་ཕྱག་རྒྱ་ཅན། ཞེས་གསུངས་པའི་བཞུགས་སྟངས་དེ་ཅི་འདྲ་ཞིག་ལ་ངོས་འཛིན་པ་བཅས་རྨོངས་པའི་བློ་ཅན་རང་གིས་ངེས་འདྲོངས་ཆེད་ནང་སྟབས་སུ་ཞུས་པ་ལགས་ན་གསལ་འདེབས་གནང་བར་མཁྱེན།
ཞེས་མཁན་པོ་དཔའ་བརྟན་གྱི་དྲ་བའི་བརྒྱུད་ནས་བཀའ་འདྲི་གནང་སོང་བ་ལ་བཀའ་ལན་ཞིག་འབུལ་བར་སྤྲོ་མོད་དེ། ཆོས་ད་བྱེད་ངང་ནས་མི་ཚེ་རྫོགས། ཞེས་པའི་དཔེ་བཞིན། ལན་ད་འབུལ་ངང་ནས་ལོ་མང་ལྷོད་གཡེང་དུ་ཤོར་བ་ལ་ཐོག་མར་མཐོལ་བཤགས་ཞུ་བ་ལགས་སོ། །
རེ་ཞིག་སྙན་བརྒྱུད་ཀྱི་ཡིག་ཆར་གསལ་བའི་རྩྭ་དྲས་མའི་མདུད་པ་ནི། འགྲེང་བུ་ཡོད་མེད་ཙམ་ལས་དོན་རང་ཡུལ་སྐྱོ་བྲག་གི་རི་ལུང་གང་སར་སྐྱེས་པའི་རྩྭ་དྲེས་མ་སྟེ། དེའི་མདུད་ཁུག་སྒོར་མོར་འདུག་པ་དཔེར་མཛད་པའོ། །
རྐང་པའི་ལོང་བུ་རེ་མིག་ལྟར་བསྣོལ་བ་ནི། མར་པ་ལོ་ཙཱའི་སྐུ་བརྙན་བྲིས་འབུར་རྣམས་སུ་གསལ་བ། སྐུ་ཤ་ཚོན་པོའི་རྡོ་རྗེ་སྐྱིལ་ཀྲུང་། རྐང་པའི་ལོང་བུ་གཡོན་འོག་དང་གཡས་སྟེང་དུ་བྱས་ནས་བཞུགས་པ་དེ་ཀའོ། །
མཉན་པ་གྲུབ་ཐོབ་དགེ་སློང་དུར་ཁྲོད་པ་མི་སྡུག་པའི་བསམ་གཏན་གྱི་ཕྱག་རྒྱ་ཅན་ནི། སྤྱིར་སངས་རྒྱས་མཉན་པའི་སྐུ་བརྙན་གྲགས་ཆེ་ཤོས་དངུལ་སྐུ་བར་སྣང་མ། དུས་འཁོར་འགྲེལ་ཆེན་ལས། སྐྱིལ་ཀྲུང་ལ་ལག་པ་གཡོན་པའི་སྟེང་དུ་ལག་པ་གཡས་པ་གན་རྐྱལ་མཉམ་པར་གནས་པ་ནི་ཕྱག་ན་པདྨ་སྟེ། སྣང་བ་མཐའ་ཡས་ཀྱི་ཏིང་ངེ་འཛིན་གྱི་ཕྱག་རྒྱའོ། །ཞེས་པ་མཉམ་གཞག་གི་ཕྱག་རྒྱ་ཅན་དུ་ཡོད་མོད་དེ། ཟབ་རྒྱས་སྣང་བར་གསལ་བ་ནི། བཀའ་བརྒྱུད་གསེར་ཕྲེང་གི་ཞལ་ཐང་གྲས་སུ་ཡོད་པ་སངས་རྒྱས་མཉན་པ་དགེ་སློང་གི་ཆ་ལུགས་སྐྱོ་བའི་ཉམས་ཅན་ཕྱག་གཉིས་ཁུ་ཚུར་སྐྱིལ་ཀྲུང་གི་བར་དུ་བཅུག་ནས་བཞུགས་པ་དེ་ཀ་ཡིན། བཞུགས་སྟངས་འདི་ཉིད། དུས་འཁོར་འགྲེལ་ཆེན་ལས། མཐེ་བོ་སྲིན་ལག་གི་རྩར་བཞག་པའི་ཁུ་ཚུར་གཉིས་བརླ་གཡས་པ་དང་གཡོན་པའི་སྟེང་དུ་བཞག་པ་ནི་རྡོ་རྗེ་སེམས་དཔའི་འདུག་སྟངས་སོ། །ཞེས་པ་ལས་ལོགས་ཀ་ཡིན་པ་ཤེས་དགོས་སོ། །
དཔེ་ཆའི་ནང་ལ་ང་ཚོའི་མིག་གི་དབང་པོ་དེ་ཡང་། རྩྭ་དྲས་མའི་མེད་ཏོག་ལྟར་ཡོད་གསུངས་འདུག རྩ་དྲས་མ་ནི། རི་མཐོར་སྤང་ཐང་དུ་ལོ་ལེབ་མོ་ཁ་ཤས་ཡར་དྲངས་ནས་སྐྱེས་པའི་དཀྱིལ་དུ་རྩྭའི་སྡོང་པོ་གཉེན་མོ་ཞིག་གི་རྩེར་དྲིལ་བུ་ཁ་བཤགས་པ་ལྟར་ཤིན་ཏུ་མཛེས་པ་ཞིག་ཡོད་རེད། ཆུང་དུས་ང་ཚོ་སྤུན་མཆེད་ཚོས་སྣེ་གཤང་རི་མགོར་རྩྭ་དེ་ཡི་ལོ་རིང་མོ་དེ་དག་གི་སྐྲ་ལྷས་མ་ལྷས་པ་ལྟར་ལྷས་པ་ཡང་དྲན་བཞིན་འདུག