སྙན་བཟང་གཡུང་དྲུང་ཚེ་རིང་།
ས་འགུལ་རྒྱལ་པོས་རྟ་དམག་བྱེ་བ་དེད་པའི་འཕྲུལ་གྱིས་སྐྱེ་དགུའི་འཛིན་མ་དྲག་ཏུ་བསྒུལ།།
མཁར་དང་གྱང་རྩིག་ཉིལ་བའི་རྡུལ་སྤྲིན་ལང་ལོང་ཟོལ་གྱིས་ཉི་ཟླའི་དཔུང་པར་དལ་གྱིས་སྐྱོད།།
འབྱམས་སུ་ྐླས་པའི་ས་ཆེན་འོག་ཏུ་མི་བཟད་སྔངས་སྐྲག་ན་ཟུག་ཆོ་ངེའི་སྒྲ་ཡིས་ཁེངས།།
སྟོན་པའི་དམག་དཔུང་ཧོབ་ཀྱིས་བརྒྱུགས་ཏེ་ས་རྒོད་བྲུས་ཀྱང་སྐྱོབ་པའི་ཐབས་ནི་རྙེད་མ་གྱུར།།
ས་ཁར་དྲངས་པའི་བདག་མེད་བེམ་པོར་མྱ་ངན་མེད་པར་ཕྱོགས་དང་ཕྱོགས་སུ་འཕྲེད་དུ་ཉལ།།
འདྲེན་མེད་རྣམ་ཤེས་སྐོར་དང་སྐོར་ཚོ་འཁྲེང་བའི་ཉམས་ཀྱིས་སྐྱེ་དགུའི་གྲོང་ན་ཤིག་ཤིག་འགུལ།།
མ་ཡུམ་རྣམས་ཀྱིས་ཤི་བའི་གཅེས་ཕྲུག་པང་དུ་བཀྱགས་ཏེ་གནམ་མཁའི་གདོང་ལ་མཆིལ་ཞགས་འཕེན།།
ནུ་ཞོས་སྐྱེད་པའི་དྭ་ཕྲུག་དག་གིས་ཨ་མ་མ་རྙེད་སྲང་ལམ་ཀུན་ཏུ་སྔངས་རྒྱུག་བྱེད།།
ཤ་གཟན་རྒོད་དག་དུར་ཁྲོད་ནམ་མཁར་འཕྲུལ་དུ་འཁོར་བས་སྡེར་མོ་རྣོན་པོའི་རྔམས་ཟིལ་སྟོན།།
གསར་དུ་འཕྱོ་བའི་ནང་ཁྲོལ་ཀེང་རུས་ཟོས་པས་མ་འགྲང་ད་དུང་རྩིབས་རུས་འདྲེད་ཅིང་འཐེན།།
ས་ཡི་གཤོང་དུ་བརྩིགས་པའི་རོ་རྣམས་མེ་ཡི་དཀྱིལ་དུ་མ་སྐྲག་སྤོབས་པའི་གཟུགས་ཀྱིས་འབར།།
དལ་བུར་འཕྱུར་བའི་དུད་པ་ནག་པོ་རླུང་གིས་བཀྱགས་ཏེ་བདེ་ཆེན་སྤྲིན་དཀར་རྗེས་སུ་སྙེག།
གང་ཟག་གླིང་འདི་གློ་བུར་ཉིད་དུ་ཁྲག་ཏུ་འཕྱོ་བས་འཇིག་རྟེན་སྙིང་ལ་སྔངས་སྐྲག་སྐྱེད།།
སྲིད་པའི་ལྷ་ཆེན་རྨ་རྒྱལ་སྦོམ་རས་ཅི་འདི་མ་ཤེས་མགོ་བོས་བྲག་ལ་ཤུགས་ཀྱིས་རྡེབ།།
ཤ་ཟའི་གླིང་འདིའི་བདེ་སྐྱིད་སྣང་བ་མྱ་ངན་དང་བཅས་ས་ཡི་ྐློང་དུ་ཁད་ཀྱིས་འཐིམས།།
ད་ནི་ཤུལ་ལུས་སེམས་ཅན་དག་གིས་ཤུགས་རིང་འབྱིན་བཞིན་དམར་པོ་མིག་ཆུ་སྙིང་ལ་འཐུང་།།
༼༢༠༡༠ཟླ་བ་༤པའི་ཚེས་༢༡ཉིན་ཧྥ་རན་སིའི་གྲོང་ཁྱེར་ཆེན་མོ་སྦོག་ཊོ་ནས་བྲིས།༽
ཉམས་འགྱུར་ཕུན་སུམ་ཚོགས་པའི་སྙན་ངག་འདི་ལྟ་བུ་དེང་སང་ཞེ་དྲགས་མཐོང་རྒྱུ་མི་འདུག མི་དག་སྙན་ངག་གསར་པའི་ཨ་གསར་གྱི་རྗེས་སུ་བརྒྱུགས་པས་ལོས་ཡིན།
དེ་རིང་་་་་་སྙན་རྩོམ་ཐུང་ཐུང་འདི་བཀླགས་པས་སེམས་ལ་གྲགས་ཅན་སྙན་ངག་པ་ཡིད་དམ་ཚེ་རིང་གི་སྙན་རྩོམ་འགའ་དྲན་བཅུགས་དང་ཐལ། ་་་་ཡང་ཡང་སྙན་ངག་འདི་འདྲ་མཇལ་བའི་སྨོན་ལམ་འདེམས།
ཐེངས་མང་པོ་ཞིག་ལ་སྐྱེ་དགུ་མདོའི་ས་ཡོམ་ཐད་ལ་རང་གི་ཚོར་སྣང་ཞིག་འབྲི་འདོད་ཡོད་ཀྱང་ལུས།
རྩོམ་ཐུང་འདིས་རང་གི་ཚོར་སྣང་ཡོད་ཚད་མཚོན་ཐུབ་པས་ཐུགས་རྗེ་ཆེ་ཞུ།