གཞུང་པ་ཚེ་དབང་བསོད་ནམས།
ང་ཚོ་བོད་ཀྱི་མང་གཙོ་ནི་ཕལ་ཆེར་འཛམ་གླིང་ནང་མང་གཙོ་གསར་ཤོས་དེ་ཡིན་སྲིད་ལ་དེ་ཡང་༸གོང་ས་༸སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་ནས་རླབས་ཆེན་གྱི་དགོང་པ་རྒྱ་ཆེན་པོའི་འོག་ནས་བོད་མི་རིགས་ལ་ཐུགས་བརྩེ་བ་ཆེན་པོའི་མ་འོངས་བོད་ཀྱི་ཆབ་སྲིད་ལམ་ལུགས་དེ་མི་མང་མང་གཙོའི་ལམ་ལུགས་ནང་ཁ་བསྒྱུར་རྒྱུའི་ཆེད་བོད་ས་མ་ཤོར་གོང་བོད་ནང་སྤྱི་ཚོགས་ལེགས་བཅོས་ཚོགས་ཆུང་བཙུགས་ནས་མི་འགྲོ་གཏན་ཁེལ་ལ་ཉེ་བའི་སྐབས་ཕྱི་ནང་གཉིས་ཀྱིས་འགོག་རྐྱེན་སྣ་ཚོགས་འོག་ནས་༸གོང་ས་མཆོག་གི་དགོང་གཞི་བོད་ལུང་པའི་ནང་འགྲུབ་མ་ཐུབ་ནའང་རྒྱ་གར་འཕགས་པའི་ཡུལ་དུ་བཙན་བྱོལ་དུ་༸ཞབས་སོར་འཁོད་མ་ཐག་མ་འོངས་བོད་ཀྱི་ཆབ་སྲིད་ལམ་ལུགས་དེ་མི་མང་མང་གཙོའི་ལམ་ལུགས་ནང་ཁ་ཕྱོགས་ནས་ཆོས་ལུགས་ཆོལ་གསུམ་གྱི་སྐུ་ཚབ་ལས་སྒྲུབ་པའི་མི་མང་གིས་འཐུས་མི་སྤྱི་འཐུས་ཀྱི་སྒྲིག་འཛུགས་གསར་བསྐོ་དང་འབྲེལ་རིམ་པས་སྤྱི་འཐུས་ཀྱི་གྲངས་ཚད་སྤར་ཆ་གནང་བ་དང་བཙན་བྱོལ་བོད་མིའི་བཅའ་ཁྲིམས་ཀྱིས་ནུས་པ་ཐོན་ནས་དབུས་བོད་མིའི་སྒྲིག་འཛུགས་ཀྱིས་ལས་དོན་ཡོངས་རྫོགས་ཁྲིམས་བཟོ་སྤྱི་འཐུས་གྲོས་ཚོགས་བརྒྱུད་ནས་འགྲོ་དགོས་པའི་མང་གཙོ་ཁྲིམས་ཀྱི་དབང་བསྒྱུར་འོག་བཙན་བྱོལ་བོད་མི་འཚོ་ཐུབ་པའི་ལམ་ལུགས་བཟང་པོ་གསར་གཏོད་གནང་བ་དང་ཕྱི་ལོ་ ༢༠༡༡ ལོར་མི་ལོ་བཞི་བརྒྱ་མ་ཟིན་ཙམ་གྱི་དོན་སྙིང་ལྡན་པའི་ལོ་རྒྱུས་ཡོད་་པའི་༸རྒྱལ་དབང་སྐུ་ཕྲེང་རིམ་བྱོན་ནས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་ནས་དགའ་ལྡན་ཕོ་བྲང་གི་བོད་ཀྱི་ཆབ་སྲིད་སྐྱོང་བའི་ལམ་ལུགས་དེ་འཇུག་བསྡུས་ནས་༸གོང་ས་མཆོག་གི་སྲི་དབང་ཡོངས་རྫོགས་བོད་མིའི་མང་གཙོའི་སྒྲིག་འཛུགས་ལ་གནང་ནས་བོད་མི་མང་ནས་བོད་མིའི་ཆབ་སྲིད་དང་འཛིན་སྐྱོང་གི་འགོ་འཁྲིད་བཙན་བྱོལ་བོད་མིའི་བཅའ་ཁྲིམས་འོག་ནས་སྲིད་སྐྱོང་བསྐོ་རྒྱུའི་ལམ་ལུགས་གསར་གཏོད་གནང་ནས་རླབས་ཆེན་གྱི་འགྱུར་བ་འདི་དག་མ་འོངས་བོད་ཀྱི་ལོ་རྒྱུས་དེབ་ཐེར་ནང་འཁོད་ནས་བོད་མི་རིགས་ཀྱི་ལས་དབང་དུ་གསེར་གྱི་ཕ་བོང་སྒོ་འགྲམ་དུ་བབས་པ་འདི་དག་ནི་༸གོང་ས་སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་རླབས་ཆེན་གྱིས་མཛད་འཕྲིན་ཁོ་ན་ལས་བྱུང་བ་ནས་༸མགོན་པོ་མཆོག་གི་བཀའ་དྲིན་ནི་ང་ཚོ་བོད་མི་ཤི་གསོན་ཚང་མས་དུས་ནམ་ཡང་བརྗེད་ཐབས་མེད་པ་དང་ད་ལྟ་ང་ཚོའི་མདུན་དུ་ལྷག་པའི་སྲིད་སྤྱིའི་འོས་བསྡུའི་ལས་རིམ་འགྲོ་བཞིན་པའི་སྐབས་འདིར་སྲིད་སྤྱིའི་འོས་མི་ལ་བཞེངས་མཁན་དང་དེ་ལ་སྒྱབ་སྐྱོར་གནང་གནང་མཁན་ཚང་མས་ཆོལ་གསུམ་བོད་མིའི་ཆིག་སྒྲིལ་ལ་འགན་ཁུར་ནས་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞིའི་ལམ་སྟོན་འོག་ནས་སྲིད་སྤྱིའི་འོས་བསྡུའི་ལས་རིམ་ནང་ཆ་ཤས་བཞེས་དགོས་པ་དེ་མང་གཙོའི་ཐོབ་ཐངས་ཆེ་ཤོས་དེ་ཡིན་པ་དང་། ང་ཚོ་མི་ཡུལ་དུ་ཡོང་དགོས་པའི་དམིགས་ཡུལ་ངོ་མ་དེ་བོད་དོན་བདེན་མཐའ་སེལ་རྒྱུ་དེ་ཡིན་པ་ལས་དེ་ལས་གལ་ཆེ་བའི་སྲིད་སྤྱིའི་འོས་བསྡུ་ཁ་ལ་ཁྱེར་ནས་ཆོལ་གསུམ་བོད་མིའི་ཆིག་སྒྲིལ་ལ་ཉམས་ཆགས་གཏོང་མཁན་ཡོད་ན་ནམ་ཡང་དགའ་བསུ་མེད་ལ་མཐའ་ཅིག་ཏུ་ངོ་རྒོལ་ཡོད་པ་དེ་ཡང་སྲིད་སྤྱིའི་འོས་མི་ལ་བཞེངས་མཁན་དང་རྒྱབ་སྐྱོར་གནང་མཁན་ཚོའི་མཁྱེན་དགོས་པ་དང་། ང་ཚོའི་མང་གཙོ་དེ་ཁྲིམས་ཀྱི་དབང་བསྒྱུར་འོག་བཙན་བྱོལ་མི་མང་འཚོ་དགོས་པ་དེ་ཡིན་པ་ལས་བཙན་བྱོལ་བོད་མིའི་བཅའ་ཁྲིམས་དང་བཙན་བྱོལ་བོད་མིའི་འོས་བསྡུའི་སྒྲིག་གཞི་ལ་འགན་ཁུར་མ་དགོས་པའི་སྲིད་སྤྱི་འོས་བསྡུ་ཟུར་དུ་ལྷག་མེད་པ་དང་། འདས་པའི་མི་ལོ་བཅུ་ཕྲག་གཉིས་ལ་ང་ཚོའི་ཕྱི་མིག་བལྟ་སྐབས་བཙན་བྱོལ་བོད་མིའི་བཅའ་ཁྲིམས་དོན་ཚན་བཅོ་ལྔ་ནང་གསལ་བའི་བོད་དོན་བདེན་མཐའ་སེལ་ཐབས་ལ་འགན་ཁུར་ནས་དབུ་མའི་ལམ་གྱི་སྲིད་ཇུས་བརྒྱུད་ནས་བོད་རྒྱའི་འབྲེལ་ལམ་ལ་ནུས་པ་ག་རེ་ཐོན་ཡོད་མེད་བཙན་བྱོལ་བོད་མིའི་ལོ་རྒྱུས་དེབ་ཐེར་ནང་འཁོད་པ་ནས་ཤེས་རྟོགས་ཐུབ་རྒྱུ་དང་། རྗེས་ལོའི་སྲིད་སྤྱི་གསར་པ་ཚོའི་ལས་འགན་ཆེ་ཤོས་དེ་བཅའ་ཁྲིམས་དོན་ཚན་བཅོ་ལྔ་ནང་གསལ་བའི་བོད་དོན་བདེན་མཐའ་སེལ་ཐུབ་པའི་འགན་ཁུར་བཞེས་ནས་དབུ་མའི་ལམ་གྱིས་སྲིད་ཇུས་བརྒྱུད་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་འཁྲིད་དང་མཉམ་མི་དང་མི་ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་བྱས་ནས་བོད་རྒྱའི་དཀའ་སྙོགས་དེ་༸གོང་ས་མཆོག་གི་སྐུ་དུས་འདིར་སེལ་ཐུབ་པའི་འགན་ཁུར་བཞེས་དགོས་པ་ལས་ཁ་དམག་ལ་འགན་ཁུར་ནས་དུས་ཚོད་ནམ་ཡང་འཕྲོ་རླག་གཏོང་མི་ཉན་པ་བཅས་ཆོལ་གསུམ་བོད་མིའི་ཆིག་སྒྲིལ་ནི་བོད་མི་རིགས་གསོན་གནས་ཐུབ་པའི་བླ་སྲོག་ངོ་མ་དེ་ཡིན་ན་སྲིད་སྤྱིའི་འོས་མི་ལ་བཞེངས་མཁན་དང་རྒྱབ་སྐྱོར་གནང་མཁན་ཚོའི་དགོང་པར་ངེས་པར་དུ་འཇོག་གནང་ཡོང་བའི་འབོད་བསྐུལ་དང་བཅས་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིའི་ཀྱང་་ཆོལ་གསུམ་བོད་མིའི་ཆིག་སྒྲིལ་སྔར་ལས་བསྲ་བརྟན་དང་རྒྱུན་གནས་དམ་གཙང་ཐུབ་པའི་སྨོན་པ་བཟང་པོའི་རྒྱན་ཏེ་རེ་ཞིག་འདིར་འཇུག་བསྡུས་པའོ།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢༠༢༠ སྤྱི་ཟླ་ ༡༡ ཚེས་ ༢༣ ཉིན་རང་ཁྱིམ་དུ་ཟིན་བྲིས་སུ་བཏབ།